ཐེངས་སྔོན་མ་དག་གི་སྐབས་སུ་སྐུ་ཚབ་རྣམ་གཉིས་ཕྱིར་བཞུགས་སྒར་དུ་འབྱོར་མ་ཐག་ཕོ་བྲང་དུ་བཅར་ཏེ། ༧གོང་ས་མཆོག་དང་བཀའ་བློན་ཁྲི་བར་སྙན་སྒྲོན་ཞུས་རྗེས། ཡོངས་ཁྱབ་ཀྱི་གསར་འགོད་གསལ་བསྒྲགས་སྤེལ་སྲོལ་ཡོད་ནའང༌། ཐེངས་འདིར་༧གོང་ས་མཆོག་དང་བཀའ་བློན་ཁྲི་བ་གཉིས་ངྷ་སར་བཞུགས་མེད་སྟབས། རྒྱ་རི་བློ་གྲོས་རྒྱལ་མཚན་མཆོག་གིས་རྒྱ་གར་ལྡི་ལི་གསར་བ་ནས་ཐེངས་འདིའི་གྲོས་མོལ་གྱི་ནང་དོན་ཁག་ཟླ་མཇུག་གི་དམིགས་བསལ་ཚོགས་ཆེན་བར་ཕྱིར་བསྒྲགས་བྱ་རྒྱུ་མིན་ཚུལ་གསལ་བསྒྲགས་བྱས་འདུག
ཕྱི་ཚེས་ ༦ ཉིན་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་གིས་རྒྱ་གར་གྱི་རྒྱལ་ས་ལྡི་ལི་གསར་བ་ནས་ཐེངས་བརྒྱད་པའི་འབྲེལ་མོལ་སྐོར་གྱི་གསར་འགོད་གསལ་བསྒྲགས་ཤིག་སྤེལ་ཡོད་པ་དང༌། ཁ་སང་ཕྱི་དྲོའི་ཆུ་ཚོད་༣ དང་ཕྱེད་ཀའི་ཐོག་བོད་གཞུང་གི་མགྲིན་ཚབ་པ། ཕྱི་དྲིལ་དྲུང་ཆེ་ཐུབ་བསྟན་བསམ་འཕེལ་ལགས་ཀྱིས་གོང་གི་གསར་འགོད་གསལ་བསྒྲགས་དེ་སྒྲོག་སྦྱོང་དང་ཆབས་གཅིག གསར་འགོད་པའི་དྲི་བར་ལན་འདེབས་གནང་ཡོད། དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་གྱི་གསར་འགོད་གསལ་བསྒྲགས་དེའི་ནང༌། སྐུ་ཞབས་སྐལ་བཟང་རྒྱལ་མཚན་ལགས་དང་ཕྱག་རོགས་གསུམ་བཅས་སྤྱི་ཟླ་ ༡༠ ཚེས་ ༣༠ ནས་སྤྱི་ཟླ་ ༡༡ ཚེས་ ༥ བར་རྒྱ་ནག་གི་སྐུ་ཚབ་དང་ཐུག་འཕྲད་ཀྱིས་བཀའ་མོལ་བྱུང་ཞིང༌། ཟླ་འདིའི་ཕྱི་ཚེས་ ༦ ཉིན་ཕྱིར་རྒྱ་གར་དུ་འབྱོར་བ་ཡིན། ཐེངས་འདིར་ང་ཚོ་རྒྱ་ནག་ལ་འགྲོ་དོན་གཙོ་བོ་སྤྱི་ཟླ་ ༧ པའི་ནང་གི་འབྲེལ་མོལ་ཐེངས་བདུན་པའི་མཇུག་དེ་རྒྱུན་འཁྱོངས་བྱས་པ་ཡིན། སྐབས་དེར་ང་ཚོས་རྒྱ་ནག་གི་མགོ་ཁྲིད་ཚོར་སྙན་ཐོ་ཞིག་ཕུལ་བ་ཡིན། དེའི་ནང༌། བོད་ནང་གི་མི་དམངས་ལ་མིང་དོན་མཚུངས་པའི་མི་རིགས་ས་གནས་རང་སྐྱོང་ལག་བསྟར་དགོས་པའི་སྐོར་བཀོད་ཡོད།
ཐེངས་འདིར་ང་ཚོ་ཕྱི་ཚེས་ ༤ ཉིན་རྒྱ་ནག་དབུས་གཞུང་ཆབ་སྲིད་གྲོས་ཚོགས་ཀྱི་ཚོགས་གཙོ་གཞོན་པ་དང༌། འཐབ་ཕྱོགས་གཅིག་གྱུར་ཁང་གི་བློན་ཆེན་ཏུའུ་ཆེན་ལིན་ལ་ཐུག་འཕྲད་བྱུང་ཞིང༌། ཕྱི་ཚེས་ ༥ ཉིན་འཐབ་ཕྱོགས་གཅིག་གྱུར་གྱི་བློན་ཆེན་གཞོན་པ་ཀྲུའུ་ཝེ་ཆོན་དང་བོད་རིགས་སྐུ་ཞབས་སི་ཐར་ལགས་གཉིས་ལ་ཐུག་འཕྲད་ཀྱིས་བཀའ་མོལ་བྱུང༌། ཁོང་ཚོ་དང་མཉམ་དུ་བོད་རང་སྐྱོང་ལྗོངས་ཀྱི་གཙོ་འཛིན་གཞོན་པ་པད་མ་འཕྲིན་ལས་ལགས་འདུག་ལ། གྲོས་མོལ་སྐབས་རྒྱ་ནག་གི་གྲངས་ཉུང་མི་རིགས་རང་སྐྱོང་ཆེད་མཁས་པ་འགའ་ཡིས་མི་རིགས་རང་སྐྱོང་སྐོར་འགྲེལ་བཤད་བྱས་བྱུང༌། ཐེངས་འདིའི་གྲོས་མོལ་གཙོ་སྐྱོང་གནང་མཁན་བོད་རིག་པའི་ཞིབ་འཇུག་ཁང་གི་འགན་འཛིན་ལྷག་པ་ཕུན་ཚོགས་ལགས་རེད། དེ་ནས་ང་ཚོས་ཉིན་ཞཱ་ཧེ་རིགས་རང་སྐྱོང་ཁུལ་དུ་ལྟ་སྐོར་བྱས་རྗེས། ཕྱི་ཚེས་ ༦ ཉིན་ཕྱིར་རྒྱ་གར་ལ་སླེབས་འབྱོར་བྱུང་བ་ཡིན། རྒྱ་གར་ལྡི་ལི་གསར་བ་ནས་བཀའ་བློན་ཁྲི་པ་མཆོག་ལ་ཐེངས་འདིའི་གྲོས་མོལ་སྐོར་སྙན་སྒྲོན་ཞུས་པ་ཡིན། ཁོང་གིས་༧གོང་ས་མཆོག་གི་བཀའ་བཞིན་ཚེས་ ༡༧ ནས་བོད་དོན་དམིགས་བསལ་ཚོགས་ཆེན་འཚོགས་འཆར་ཡོད་སྟབས། ཚོགས་ཆེན་གྱི་སྔོན་ལ་ཐེངས་འདིའི་གྲོས་མོལ་གྱི་ནང་དོན་གང་ཡང་གསལ་བསྒྲགས་མ་གནང་རོགས། ཞེས་བཀའ་གནང་སོང༌། ཐངས་འདིར་ང་ཚོར་སྣེ་ལེན་བྱེད་མཁན་རྒྱ་ནག་དབུས་འཐབ་ཕྱོགས་གཅིག་གྱུར་ཁང་རེད། གཞན་པེ་ཅིན་གྲོང་ཁྱེར་འཐབ་ཕྱོགས་གཅིག་གྱུར་དང༌། ཉིན་ཞཱ་ཧེ་རིགས་རང་སྐྱོང་འཐབ་ཕྱོགས་གཅིག་གྱུར་སོགས་ལའང་འབྲེལ་བ་ཡོད་པ་ཞིག་རེད། དེ་དག་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་སྒྲོག་སྦྱོང་གནང་སོང༌།
རྒྱ་གར་ངྷ་རམ་ས་ལ་ནས་གོང་གི་གསར་འགོད་བསལ་བསྒྲགས་དེ་མ་སྤེལ་སྔོན་གྱི་རྒྱ་ནག་གི་ཆུ་ཚོད་ ༤ དང་ཕྱེད་ཀའི་ཐོག རྒྱ་ནག་གཞུང་འབྲེལ་ཞིན་ཧ་གསར་ཁང་གིས་ཐེངས་བརྒྱད་པའི་བོད་རྒྱའི་སྐུ་ཚབ་སྐོར་ལ་གནས་ཚུལ་ཞིག་སྤེལ་འདུག་པའི་ནང༌། ཀྲུང་གོའི་ཆབ་སྲིད་གྲོས་ཚོགས་ཀྱི་ཚོགས་གཙོ་གཞོན་པ་དང༌། འཐབ་ཕྱོགས་གཅིག་གྱུར་ཁང་གི་བློན་ཆེན་ཀྲུའུ་ཝེ་ཆོན་སོགས་ཏཱ་ལའི་བླ་མ་སྒེར་གྱི་སྐུ་ཚབ་རྒྱ་རི་བློ་གྲོས་རྒྱལ་མཚན་དང་སྐལ་བཟང་རྒྱལ་མཚན་སོགས་ལ་ཐུག་ཕྲད་བྱས་ཏེ། རྒྱལ་སྤྱིའི་ཨོ་ལམ་པིག་རྩེད་འགྲན་དང་དབང་བོ་སྐྱོན་ཅན་གྱི་ཨོ་ལིམ་པིག ཉེ་སྔོན་བར་སྣང་ལ་བཏང་བའི་འཁོར་སྐར་བདུན་པ་ལེགས་འགྲུབ་བྱུང་བ། མིག་སྔའི་བོད་ལྗོངས་ཀྱི་དཔལ་འབྱོར་འཕེལ་རྒྱས་སོགས་ངོ་སྤྲོད་བྱས་ཡོད་ལ། དེ་མིན་བོད་ཀྱི་ས་ཁུལ་ཁག་ཅིག་ཏུ་ས་འགུལ་གྱི་གནོད་འཚེ་དང་གངས་སྐྱོན་ཚབས་ཆེན་བྱུང་བར་རོགས་སྐྱོར་གྱི་གནས་ཚུལ་ཁག་མཚམས་སྦྱོར་བྱས་ཡོད། ཀྲུང་གོའི་གུང་ཁྲན་ཏང་གི་འགོ་ཁྲིད་རྒྱུན་འཁྱོངས་བྱེད་པ་དང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ལམ་ཕྱོགས་རྒྱུན་འཁྱོངས་བྱེད་པ། མི་རིགས་ས་ཁོངས་ཀྱི་རང་སྐྱོང་ལམ་ལུགས་རྒྱུན་འཁྱོངས་བྱེད་པ་བཅས་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་དུ་ཁ་གསལ་བའི་སྒོ་ནས་གཏན་འབེབས་གནང་ཡོད་ལ། བོད་ལྗོངས་ཀྱི་ཆེས་ཆེ་བའི་ཆབ་སྲིད་དངོས་དོན་ཞིག་ཀྱང་ཡིན། “རྒྱུན་འཁྱོངས་བྱེད་པ་གསུམ”ཞེས་བྱ་བ་ཁས་མི་ལེན་ཞིང་རྩ་ཁྲིམས་དང་རྩ་ཁྲིམས་ལས་འགལ་བའི་བྱ་སྤྱོད་མཐའ་དག་ནི་གཏན་ནས་མི་ཆོག “རྒྱུན་འཁྱོངས་བྱེད་པ་གསུམ”ཞེས་བྱ་བ་དེ་ནམ་ཡང་འགྱུར་བ་མེད་པ་དང་། སྔར་བཞིན་ལག་བསྟར་བྱེད་རྒྱུ་ཡིན་ཞེས་དང༌། མིང་དོན་མཚུངས་པའི་རང་སྐྱོང་གི་སྐད་ཆ་བེད་སྤྱད་དེ། མི་རིགས་ཁ་བྲལ་དང་མི་རིགས་མཐུན་སྒྲིལ་ལ་གནོད་པའི་བྱ་སྤྱོད་རིགས་གཏན་ནས་སྤེལ་མི་ཆོག རྒྱལ་ཁབ་ཁ་ཤས་ཤིག་གིས་ལག་བསྟར་བྱེད་བཞིན་པའི་རྒྱལ་ཕྲན་མཉམ་འབྲེལ་ལམ་ལུགས་དང་རྒྱལ་ཁག་མཉམ་འབྲེལ་ལམ་ལུགས་དང་མི་མཐུན་ལ། མི་རིགས་ས་ཁོངས་རང་སྐྱོང་བཅའ་ཁྲིམས་ནི་རང་རྒྱལ་གྱི་མི་རིགས་གནད་དོན་སྐོར་ཐག་གཅོད་བྱེད་པའི་རྩ་བའི་སྲིད་ཇུས་ཡིན་པ་དང་། རྒྱལ་ཁབ་ཀྱི་རྩ་བའི་ཆབ་སྲིད་ལམ་ལུགས་ཤིག་ཀྱང་ཡིན། རྒྱལ་ཁབ་ཀྱིས་ཞང་ཀང་དང་ཨའོ་མོན་གཉིས་ལ་ལག་བསྟར་བྱེད་པའི“རྒྱལ་ཁབ་གཅིག་ལ་ལམ་ལུགས་གཉིས”ཞེས་པ་དང་མི་འདྲ་བ་ཡིན། མི་རིགས་ས་ཁོངས་རང་སྐྱོང་ནི་མི་རིགས་རང་སྐྱོང་དང་ས་ཁོངས་རང་སྐྱོང་ཟུང་འབྲེལ་དམ་ཚགས་བྱེད་པ་ཡིན་ཞེས་བཀོད་འདུག