སྤྱི་ཚོགས་རིང་ལུགས་ཀྱི་གྲོང་གསེབ།

རྒྱ་ནག་གིས་ལོ་འདིར་འཚོ་བའི་ཚད་གཞི་གོང་མཐོར་གཏོང་བ་ཞེས་པའི་ལས་གཞི་ཞིག་གི་འོག་ནས་བོད་རང་སྐྱོང་ལྗོངས་ཀྱི་ཞིང་ཕྱུགས་ཁྱིམ་ཚང་ ༥༧༨༠༠ ཡི་ནང་མི་ ༣༠༠༠༠༠ ཙམ་ཨར་འདམ་གྱིས་གྲུབ་པའི་ཁང་ཁྱིམ་གསར་པའི་ནང་སྤོར་ཡོད་པར་བཤད། ༢༠༠༦ ལོ་ནས་ ༢༠༠༧ ལོའི་བར་དུ་ཞིང་ཕྱུགས་ལས་པ་མི་གྲངས་ ༢༥༠༠༠༠ ཙམ་སྟེ། རང་སྐྱོང་ལྗོངས་ཀྱི་མི་འབོར་སྤྱིའི་བཅུ་ཆའི་གཅིག་ལྷག་ཟིན་པ་ཞིག་སྤྱི་ཚོགས་རིང་ལུགས་ཀྱི་གྲོང་གསེབ་འཛུགས་སྐྲུན་ཞེས་པའི་ལས་གཞིའི་འོག་ཁང་ཁྱིམ་གསར་པ་དག་གི་ནང་སྤོར་ཡོད་པར་བཤད། འདི་ནི་རྒྱ་ནག་གིས་བོད་ནང་འཛུགས་སྐྲུནབྱས་པའི་ཁུངས་སྐྱེལ་དུ་བགྲང་གི་ཡོད། འོན་ཀྱང༌། བོད་ནང་གི་བོད་མི་ཚོའི་ངོ་རྒོལ་དང༌། སྐད་འབོད་དག་གིས་ཁུངས་སྐྱེལ་འདི་དག་གི་ཕར་ངོས་ཀྱི་སྒྲུང་དེ་བཤད་ཀྱིན་ཡོད།

བོད་ཀྱི་འགྲོ་བ་མིའི་ཐོབ་ཐང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་འཇམ་དཔལ་སྨོན་ལམ་ལགས་ཀྱིས་ཕྱི་ཚེས་ ༢༩ ཉིན་འདི་ག་གསར་ཁང་ལ་བཤད་པ་ལྟར་ན། ལོ་འདིར་བོད་ཆོལ་ཁ་གསུམ་གྱི་རྫོང་ ༩༠ ལྷག་གི་ནང་ལས་འགུལ་གྲངས་ ༣༠༠ ལྷག་སྤེལ་ཏེ་མི་ ༦༤༠༠ ལྷག་འཛིན་བཟུང་བཙོན་འཇུག་བྱས་ཡོད་པ་རེད། དེའི་ཁྲོད་ལས་འགུལ་སྤེལ་བའི་སྐབས་ཤི་རྐྱེན་བྱུང་བའི་མི་ ༡༢༠ ལྷག་དང༌། བཙོན་ཁང་ནས་མནར་གཅོད་འོག་གྲོངས་པ་མི་ ༡༠ ལྷག སྤྱི་ཟླ་བཞི་བ་ནས་བཟུང་མི་ ༡༧༤ ལྷག་ལ་ཁྲིམས་ཆད་བཏང་ཟིན་པའི་སྐོར་བརྗོད་བྱུང་ལ། དེའི་ཁྲོད་ཀྱི་མི་ ༧ ལྷག་ལ་ཚེ་བཙོན་གྱི་ཁྲིམས་ཆད་ཕོག་ཡོད་པ་དང༌། མི་ ༩༠ ལྷག་ལ་ལོ་ ༡༠ ཡན་གྱི་ཁྲིམས་ཆད་ཕོག་ཡོད་པ་འདི་དག་ང་ཚོས་ཁུངས་ལྡན་གནས་ཚུལ་ལས་ཤེས་རྟོགས་བྱུང་བའི་རིགས་ཡིན་ལ། དེ་མིན་བོད་མི་ ༧༠ ལྷག་ད་དུང་ཁྲིམས་ཆད་ཕོག་རྒྱུའི་ཉེན་ཁ་ཡོད་ཚུལ་བརྗོད་སོང་ལ། ལོ་འདིའི་ཁྲིམས་ཆད་ཁྲོད་ཀྱི་མང་ཆེ་བ་དེ་གྲྭ་ཡིན་ཚུལ་བརྗོད་སོང༌།

བསྐྱར་བཅོས།: ༢༠༡༤/༠༣/༢༦

Leave a Reply