༢༠༠༩ ལོར་རྒྱ་ནག་ལ་ཟིང་འཁྲུག་ཆེན་པོ་འབྱུང་རྒྱུ་རེད།

ལོ་འདིར་རྒྱ་ནག་ནང་དུ་ལས་མེད་ཀྱི་གྲངས་ཀ་འཕར་བར་བརྟེན་ཡུལ་གྱར་ལས་འཚོལ་བ་དང་སློབ་ཐོན་ལས་མེད་ཚོའི་ངོ་རྒོལ་གྱི་ཟིང་འཁྲུག་ཡོང་བགྱི་རེད་ཅེས་རྒྱ་ནག་གི་གཞུང་གཉེར་དུས་དེབ་ཅིག་གིས་ཚོར་ཤུགས་ཀྱིས་ཁེངས་པའི་ལོ་འདིར་ཉེན་བརྡ་རབ་རིབ་ཅིག་བཏང་ཡོད།

གོང་གསལ་གནས་ཚུལ་དེ་བདུན་ཕྲག་འདིའི་ལའོ་ཝང་དུས་དེབ་སྟེང་དུ་ཞིན་ཧྭ་གསར་ཁང་གིས་སྤེལ་ཡོད་ལ། ༼ད་སྐབས་ང་ཚོ་སྤྱི་ཚོགས་དཀའ་རྙོག་གི་དུས་རིམ་མཐོ་ཤོས་ཤིག་ལ་སླེབས་ཡོད་པ་ནི་དོགས་པ་མེད་པ་ཞིག་རེད།༽ ཅེས་ཞིན་ཧྭ་གསར་ཁང་གི་མཐོ་རིམ་གསར་འགོད་པ་ཧྭང་ཧྭ་ཞེས་པས་དུས་དེབ་དེར་བཤད་འདུག ཁོས་མུ་མཐུད་དོན། ༼༢༠༠༩ ལོར། རྒྱ་ནག་གི་སྤྱི་ཚོགས་ནང་སྔར་ལས་ལྷག་པའི་རྩོད་རྙོག་དང་ཟིང་ཆ་མང་པོ་ཞིག་འབྱུང་ངེས་པ་དང་། དེ་དག་གིས་ཏང་དང་སྲིད་གཞུང་གི་རིམ་པ་འདྲ་མིན་གྱི་ཆབ་སྲིད་འཛིན་སྐྱོང་ལ་ཡིག་རྒྱུགས་དེ་ལས་ལྷག་པ་ཞིག་ལེན་གི་རེད།༽ ཟེར།

སྲིད་འཛིན་ཧུའུ་ཅིན་ཐའོ་ཡིས་༼འཆམ་མཐུན་གྱི་སྤྱི་ཚོགས་༽ཤིག་འཛུགས་པར་ཁས་ལེན་དམ་བཅའ་བཞག་ཡོད་མོད། ལས་ཤོར་ཇེ་མང་དུ་གྱུར་བ་དང་། ཡོང་སྒོ་འགག་པ། དེའི་ཁར་ལྐོག་ཟ་རུལ་སུངས་དང་ས་ཞིང་བདག་བཟུང་སོགས་ཀྱི་རྒྱུན་རིང་གི་གནད་དོན་དག་གིས་སྲིད་འཛིན་གྱི་ཁས་ལེན་དེ་ཉམས་དམས་སུ་གཏོང་གི་ཡོད།

ད་སྐབས་རྒྱ་ནག་གིས་ཚོར་ཤུགས་རྣོ་པའི་ལོ་ཞིག་བསུ་གི་ཡོད། ལྷག་པར་དུ་ ༡༩༨༩ ལོའི་པེ་ཅིན་གྱི་དྲུག་བཞིའི་དོན་རྐྱེན་བྱུང་ནས་ལོ་ ༢༠ འཁོར་གི་ཡོད། དུས་དྲན་འདི་དང་བསྟུན་རྒྱ་ནག་ནང་གི་འགྲོ་བ་མིིའི་ཐོབ་ཐང་རྩོད་ལེན་པ་དང་། གཞུང་དང་ཆབ་སྲིད་ཀྱི་ལྟ་བ་མི་མཐུན་མཁན་ཚོས་རྒྱ་ནག་ལ་གཏིང་ཟབ་པའི་ཆབ་སྲིད་ཀྱི་བཅོས་བསྒྱུར་ཞིག་བྱེད་པའི་དགོས་འདུན་ཤུགས་ཆེར་འདོན་གིན་ཡོད།

ཧྭང་ཧྭ་ཡིས་བརྗོད་དོན། རྒྱ་ནག་གི་མི་སེར་མང་པོ་ཞིག་གིས་སོ་སོའི་འདོད་བློ་མ་ཚིམས་པ་དེ་བཤད་སྐབས་གཞུང་གི་ལས་བྱེད་ཚོར་འཁྲུག་རྩོད་བྱེད་གི་འདུག་ཅེས་བཤད་ཡོད་པ་རེད། ཁོས་བཤད་དོན། སྤྱི་ཚོགས་ཀྱི་རྩོད་རྙོག་ནི་ད་ཆར་ཚད་ངེས་ཅན་གྱི་ཐོག་ནས་སྤྱི་ཚོགས་སམ་མང་ཚོགས་ཀྱི་རྨང་གཞི་ཞིག་གྲུབ་ཚར་ཡོད་པ་རེད། དེའི་རྐྱེན་གྱིས་ག་དུས་མི་མཐུན་སའི་གཞི་ཆུང་ཆུང་ཞིག་བྱུང་བ་ཡིན་ན་ལམ་སེང་འཁྲུག་མགོ་ལངས་པ་དང་ཕན་ཚུན་གདོང་ཐུག་ལག་ཐུག་ཆགས་ཡོང་གི་འདུག ཅེས་བཤད་ཡོད་པ་རེད།

ནམ་རྒྱུན་ཡིན་ན་རྒྱ་ནག་གི་དཔོན་པོ་ཚོས་ཁོང་ཚོའི་སྟངས་འཛིན་ལས་བརྒལ་བའི་གནས་ཚུལ་འབྱུང་སྐབས་ཧ་ཅང་དོགས་ཟོན་གྱིས་གསང་བ་བྱེད་མོད། ད་རེབ་ཀྱི་རྩོམ་ཡིག་དེ་ཞིན་ཧྭ་དྲ་རྒྱའི་སྟེང་དུའང་སྤེལ་ཡོད་ལ། སྤྱི་ཚོགས་ཀྱི་ཉེན་བརྡ་འདི་ལྟར་བཏང་བ་ནི་གཞུང་གི་ལས་བྱེད་ཚོར་དོ་སྣང་སྤྲད་པ་ཞིག་ཡིན་པར་ངོས་འཛིན་བྱེད་ཀྱི་ཡོད་འདུག

རྒྱ་ནག་གི་བརྟན་ལྷིང་ལ་གནོད་པའི་འཇིགས་སྣང་ཆེ་ཤོས་ནི་སློབ་གྲྭ་ཆེན་མོ་མཐར་ཕྱིན་མཁན་དག་གི་ཁྲོད་ནས་སླེབ་ངེས་ལ། དེ་ནི་སློབ་མཐར་ཕྱིན་མཁན་ཚོར་ལས་ཀ་མི་རག་པ་དང་ཡོང་སྒོ་འཚོལ་ས་མེད་པའི་རྐྱེན་གྱིས་ཡིན་འདུག ཕྱོགས་གཞན་པ་ནི་ཕྱིར་འཚོང་གི་བཟོ་གྲྭ་མང་པོ་སྒོ་བརྒྱབས་པར་བརྟེན་ལས་ཀ་ཤོར་བའི་ཡུལ་གྱར་ལས་འཚོལ་བ་དག་ཡིན་པར་ངོས་འཛིན་བྱེད་གི་ཡོད་པ་རེད།

གོང་གསལ་གནས་ཚུལ་ནང་བཀོད་དོན། རྒྱ་ནག་གི་མཚོ་བརྒྱུད་བཟོ་གྲྭ་ཁག་ཏུ་ལས་གླ་དམའ་བོའི་ཐོག་ནས་ལས་ཀ་བྱེད་མི་གྲངས་ས་ཡ་ ༡༠ ལྷག་ནི་ལས་ཀ་ཤོར་ཏེ་ཕྱིར་རང་རང་གི་ཞིང་པའི་ཁྱིམ་དུ་ལོག་མཁན་སྔ་ཤོས་ཀྱི་གྲས་ཡིན་འདུག གཞུང་གི་ཚོད་རྩིས་ལྟར་ན། ལས་འཚོལ་མི་གྲངས་ས་ཡ་ ༡༠ ལྷག་གིས་ད་སྔ་ནས་ལས་ཀ་ཤོར་ཚར་ཡོད་འདུག

ཞིན་ཧྭ་གསར་ཁང་གི་གསར་འགོད་པ་ཧྭང་ཧྭ་ཡི་ཚོད་རྩིས་ལྟར་ན། ༢༠༠༨ ལོར་སློབ་མཐར་ཕྱིན་པ་དག་ཚུད་ན་ད་ཆར་གཙུག་ལག་སློབ་གཉེར་ཁང་དང་མཐོ་རིམ་སློབ་ཆེན་དག་ནས་མཐར་ཕྱིན་མཁན་སློབ་མ་ས་ཡ་ ༧ ལྷག་གིས་ལོ་འདིར་ལས་ཀ་འཚོལ་གི་ཡོད་འདུག

རྒྱ་ནག་གཞུང་གིས་ལོ་འདིའི་རྒྱལ་ནང་ཐོན་སྐྱེད་མ་དངུལ་བརྒྱ་ཆ་ ༨ ཡིན་པར་བཤད་པ་དེས་རྒྱལ་ཁབ་འདིའི་ནང་དུ་ལས་ཀ་གསར་པ་ས་ཡ་ ༨ མ་གཏོགས་མཁོ་སྤྲོད་བྱེད་ཐུབ་ཀྱི་མི་འདུག་ཅེས་ཧྭང་ཧྭ་ཡིས་བརྗོད་ཡོད་པ་རེད། ༡༩༨༩ ལོར་བློ་འདོད་མ་ཁེངས་པའི་སློབ་ཕྲུག་དག་གིས་སྐབས་དེའི་དམངས་གཙོའི་ལས་འགུལ་སྤེལ་ཡོད་པ་རེད།

གལ་སྲིད་ ༢༠༠༩ ལོར་ཞིང་གྲོང་གི་ལས་འཚོལ་བ་ཕོན་ཆེན་པོ་ཞིག་གིས་ལོ་ཕྱེད་དང་ཡང་ན། དེ་ལས་རིང་བའི་དུས་ཡུན་རིང་ལས་ཀ་མ་བརྙེད་ཚེ་རྒྱ་ནག་གི་སྤྱི་ཚོགས་ཀྱི་དཀའ་རྙོག་དེ་ལས་ལྷག་པའི་ཚབས་ཆེན་དུ་འགྱུར་ངེས་རེད་ཅེས་ཧྭང་ཧྭ་ཡིས་བཤད་ཡོད་འདུག

བསྐྱར་བཅོས།: ༢༠༡༤/༠༣/༢༦

Leave a Reply

6 thoughts on “༢༠༠༩ ལོར་རྒྱ་ནག་ལ་ཟིང་འཁྲུག་ཆེན་པོ་འབྱུང་རྒྱུ་རེད།

  1. ༢༠༠༨ ལོ་རྒྱ་ནག་གི་ལོ་རེད་ཅེས་ཚང་མས་བསྒྲགས་པ་རེད། དོན་དག་ཀྱང་མང་པོ་བྱུང་སོང་། ཁ་ཉིན་ཞིག་ནས་བཟུང་ཚང་མས་རྒྱ་ནག་ལ་སྡོམ་བརྒྱབས་སོང་། ངོ་མ་རྒྱ་ནག་གི་ལོ་ཡིན་པ་འདྲ་ཞིག་འདུག

    ཁ་སང་དེ་རིང་ ༢༠༠༩ ལོ་ཡང་རྒྱ་ནག་གི་ལོར་སྒྱུར་གི་འདུག ངས་སྐད་ཆ་འདི་ཚོའི་རིགས་རླུང་འཕྲིན་ནས་ཐོས་སོང་། དྲ་ཐོག་ནས་མཐོང་སོང་། ༢༠༠༩ ལོ་འདི་རྒྱ་ནག་གི་ཟིང་འཁྲུག་གི་ལོ་རེད་ཟེར། དམངས་གཙོའི་ལོ་རེད་ཟེར། ཡིན་ཡང་རྒྱ་ནག་གི་གསར་བརྗེའི་སྐོར་བཤད་ཀྱི་མི་འདུག འགྱུར་བ་ Change དང་ revolution གསར་བརྗེ་གཉིས་ལ་ཁྱད་པར་འདུག་གམ་མི་འདུག དོན་དམ་རྒྱ་ནག་གི་ ༢༠༠༩ ལོ་དེ་གང་འདྲ་ཞིག་ལ་འགྱུར་ས་རེད།

  2. བོད། ཤ་ཁྲག་རུས་གསུམ།

    འུ་ཚང་གི་ཨ་ཞང་དྲིན་ཆེན་པོ་ད་ནི་སེམས་འཁྲལ་གྱི་སྟེང་ལ་སྡུག་བསྔལ་མང་བོ་ཞིག་རིམ་གྱིས་བྱུང་བཞིན་ཡོད་པ་རེད་དེ། ནམ་ཞིག་སྔ་གཞུག་མ་གཏོགས་རྒྱ་ནག་སྲིད་གཞུང་གི་དམར་པོའི་སྲིད་གཞུང་མགོ་གཏིང་ལོག་རྒྱུུ་ཡིན་པ་གཏན་འཁེལ་རེད། ཡིན་ཡང་། དེའི་བར་དུ་བོད་པ་ཚང་གི་རང་གི་སྐད་ཡིག་འདི་རྒྱུན་འཛིན་ཡག་པོ་བྱེད་ཐུབ་ཀྱི་ཡོད་མེད་དེ་ནི་གནད་དོན་གཙོ་བོ་ཞིག་ཆགས་ཡོད་པ་རེད།

  3. མགྲིན་པ་ཟབ་མོ།

    རྒྱ་ནག་གི་སེམས་ཁྲལ་ནི་མི་ལོ་ ༢༠ རྗེས་ལ་སླར་ཡང་དྲུག་བཞིའི་དོན་རྐྱེན་དེ་སླེབ་མི་ཡོང་ངམ་སྙམ་པ་དེ་རེད། གུང་ཁྲན་ཏང་གིས་དྲུག་བཞིའི་ལས་འགུལ་བ་ཚོར་རྒྱ་ནག་གི་མི་ལོ་ ༡༠༠ ཐམ་པ་དག་དག་གི་ཁག་འཁུར་བྱས་ཡོད་པ་རེད། མི་ལོ་ ༡༠༠ འཁོར་རྗེས་ཏེ། ༢༠༥༠ ནས་དམངས་གཙོ་ཡང་དག་པ་ཞིག་སྤྲོད་ཐུབ་གི་འདུག དེའི་ཕན་ཆད་དུ་རྩ་བ་ཉིད་ནས་ཡོང་ས་མ་རེད་ཅེས་བཤད་གི་ཡོད་པ་རེད། ཡིན་ནའང་རྐྱེན་ལ་འཕྲད་ན་དམངས་གཙོའི་ལས་འགུལ་དེ་འབར་ཆོག་ཆོག་དང་འགད་ཆོག་ཆོག་བྱས་ནས་བསྡད་ཡོད་པ་རེད། ད་ལོ་ཡང་རྒྱ་ནག་གི་སེམས་ཁྲལ་གཙོ་བོ་འདི་རེད།

  4. ལྐུགས་པ་ལ། ཁོང་ཚོས་དྲག་གནོན་ལ་ད་ལྟ་ནས་ཁ་གཡར་ས་འཚོལ་གྱི་ཡོད་པ་རེད་མ་གཏོགས་གཞན་བཤད་ཀྱི་ཡོད་པ་མ་རེད་དཱ།