བོད་མི་ཚོར་གསལ་འདེབས་ཤིག་བྱེད་དུ་ཡོང་བ་ཡིན། ང་ཚོ་དང་བོད་རིགས་མི་མང་ལ་ཐུན་མོང་གི་དམིགས་ཡུལ་ཞིག་ཡོད། བོད་རིགས་སྤུན་ཟླ་ཚོས་རྒྱ་ནག་དམར་པོའི་གཞུང་གི་འོག་ནས་མི་ལོ་ ༥༠ རིང་ལ་དཀའ་སྡུག་ཚད་མེད་མྱངས་ཡོད་ལ། དེ་བཞིན་རྒྱ་རིགས་མི་མང་གིས་ཀྱང་མི་ལོ་ ༦༠ རིང་ལ་དཀའ་སྡུག་མྱངས་ཡོད། སྐབས་འདིར་ང་ཚོ་རྒྱ་བོད་གཉིས་ལ་ཐུན་མོང་གི་དམིགས་ཡུལ་ནི། རྒྱ་ནག་དམར་གཞུང་གི་སྲིད་དབང་སྒེར་གཅོད་དང༌། ཉམས་ང་རུལ་སུངས་ཀྱི་དབང་ཆ་གཅིག་སྡུད་ལམ་ལུགས་མཇུག་རྫོགས་པར་བྱ་རྒྱུ་དེ་རེད། ཅེས་རྒྱ་རིགས་དམངས་གཙོ་དོན་གཉཻར་བ་ཁག་ཅིག་གིས་གསུངས་ཡོད།
ཕྱི་ཚེས་ ༡༡ ཉིན་བཞུགས་སྒར་ངྷ་རམ་ས་ལའི་བོད་དོན་གླེང་བས་གོ་སྒྲིག་འོག ཨོ་སི་ཊི་ལི་ཡ་ནས་ཕཻབས་པའི་རྒྱ་རིགས་དམངས་གཙོ་དོན་གཉེར་བ་སྐུ་ཞབས་ཆིན་ཇིན་དང་ཨ་རིར་བཞུགས་པའི་རྒྱ་རིགས་དམངས་གཙོ་དོན་གཉེར་བ་དང་རྩོམ་པ་པོ་སྐུ་ཞབས་ཉེ་ཡེ་ཤཱན། དེ་བཞིན་ཐའེ་ཝན་དང་ཧོང་ཀོང༌། ཉི་ཧོང་དང་ཐེ་ལན་ཌི་སོགས་ནས་རྒྱ་རིགས་དམངས་གཙོ་དོན་གཉེར་བ་ ༣༠ ཙམ་དང༌། བོད་ཀྱི་གཞུང་འབྲེལ་མིན་པའི་ཚོགས་པ་ཁག་གི་འཐུས་མི་དང་རང་དབང་གི་བོད་དོན་ཉམས་ཞིབ་པ་ ༣༠ བཅས་ཁག་གཉིས་སུ་བགོས་ཏེ། མེག་ལོར་རྒྱ་གར་གསོལ་མགྲོན་ཁང་ཞིག་ཏུ། བོད་རྒྱའི་གནད་དོན་ཐད་བགྲོ་གླེང་གོ་བསྡུར་བྱས་ཡོད།
སྐབས་དེར་སྐུ་ཞབས་ཆིན་ཇིན་གྱིས་བརྗོད་པར། དེ་རིང་འཛམ་གླིང་ས་ཕྱོགས་སོ་སོ་ནས་ང་ཚོ་རྒྱ་རིགས་དམངས་གཙོ་དོན་གཉེར་བ་ ༣༠ ལྷག་འདིར་ཡོང་དོན་ནི། བོད་མི་ཚོར་གསལ་འདེབས་ཤིག་བྱེད་དུ་ཡོང་བ་ཡིན། ང་ཚོ་དང་བོད་རིགས་མི་མང་ལ་ཐུན་མོང་གི་དམིགས་ཡུལ་ཞིག་ཡོད། བོད་རིགས་སྤུན་ཟླ་ཚོས་རྒྱ་ནག་དམར་པོའི་གཞུང་གི་འོག་ནས་མི་ལོ་ ༥༠ རིང་ལ་དཀའ་སྡུག་ཚད་མེད་མྱངས་ཡོད་ལ། དེ་བཞིན་རྒྱ་རིགས་མི་མང་གིས་ཀྱང་མི་ལོ་ ༦༠ རིང་ལ་དཀའ་སྡུག་མྱངས་ཡོད། སྐབས་འདིར་ང་ཚོ་རྒྱ་བོད་གཉིས་ལ་ཐུན་མོང་གི་དམིགས་ཡུལ་ཞིག་ཡོད་པ་ནི། རྒྱ་ནག་དམར་གཞུང་གི་སྲིད་དབང་སྒེར་གཅོད་དང༌། ཉམས་ང་རུལ་སུངས་ཀྱི་དབང་ཆ་གཅིག་སྡུད་ལམ་ལུགས་མཇུག་རྫོགས་པར་བྱ་རྒྱུ་དེ་རེད། ༧ཏཱ་ལའི་བླ་མ་ཡིས་སྔ་ཕྱི་མང་པོར་རྒྱ་ནག་གཞུང་ལ་ཡིད་ཆེས་ཇེ་སྲབ་ལ་འགྲོ་བཞིན་ཡོད་ཀྱང༌། རྒྱ་རིགས་མི་མང་ལ་རེ་བ་དང་ཡིད་ཆེས་ནམ་ཡང་འགྱུར་བ་མེད། ཅེས་གསུངས་པ་བཞིན་ཧན་མི་རིགས་དང་བོད་མི་རིགས་གཉིས་བར་གྱི་གཞི་རིམ་འབྲེལ་བ་དང༌། མཛའ་བརྩེ་ཇེ་ཟབ་ལ་འགྲོ་རྒྱུ་དེ་གལ་འགངས་ཆེན་པོ་ཆགས་ཡོད་སྟབས། ང་ཚོ་ཚང་མས་འཛམ་གླིང་ས་ཕྱོགས་གང་སར་ཡོད་པའི་ཧན་མི་རིགས་དང་བོད་མི་རིགས་གཉིས་བར་ལ་མཐུན་སྒྲིལ་དང་གཅིག་སྒྲིལ་ཡོང་བར་འབད་པ་བྱ་དགོས། ཞེས་གསུངས་བྱུང༌།
དེའི་རྗེས་བོད་ཀྱི་གཞོན་ནུ་ལྷན་ཚོགས་ཀྱི་དྲུང་ཆེ་དོན་གྲུབ་ལྷ་དར་ལགས་ནས། ཁྱེད་རྣམ་ཅག་རྒྱ་མི་རིགས་དུང་ཕྱུར་མང་པོའི་ཁྲོད་ནས་རང་དབང་བརྩོན་ལེན་གནང་མཁན་ཡིན་སྟབས། སྒེར་ངོས་ནས་ཁྱེད་ཚོའི་བྱ་བཞག་ལ་བརྩི་བཀུར་ཡོད། ངའི་ལྟ་སྟངས་དེ་༧གོང་ས་མཆོག་གི་དགོངས་ཚུལ་དང་མ་འདྲ་བ་ཡོད་སྲིད། ༧གོང་ས་མཆོག་གིས་བོད་དོན་དེ་རྒྱ་ནག་དམར་ཤོག་གཞུང་དང་བོད་མི་རིགས་གཉིས་བར་གྱི་དཀའ་ངལ་ལ་ངོས་འཛིན་བྱེད་ཀྱིན་ཡོད་ཀྱང༌། ངས་དེ་ནི་རྒྱ་བོད་མི་རིགས་གཉིས་བར་གྱི་ལོ་ངོ་ ༦༠ རིང་གི་དཀའ་ངལ་ལ་ངོས་འཛིན་བྱེད་ཀྱིན་ཡོད། དཀའ་ངལ་འདི་སེལ་རྒྱུ་མེད་པ་ཞིག་ལ་མཐོང་གིན་མེད། དཀའ་ངལ་འདི་ང་ཚོ་ཐུན་མོང་གི་འབད་བརྩོན་ལ་བརྟེན་ནས་སེལ་དགོས་པ་ཞིག་ཡིན། དཀའ་ངལ་འདི་སེལ་བར་ཐོག་མར་ང་ཚོས་འདས་ཟིན་པའི་ལོ་རྒྱུས་ལ་ངོས་ལེན་བྱ་དགོས་ལ། དེ་ནི་དཀའ་ངལ་སེལ་བའི་ཆ་རྐྱེན་དང་པོ་ཡིན། ངའི་རེ་བར་ཁྱེད་ཅག་བོད་ཀྱི་ལོ་རྒྱུས་ལ་ཆ་རྒྱུས་ཡོད་པ་དང༌། ལོ་རྒྱུས་ཐོག་གི་བོད་མི་རིགས་ངོས་ཟིན་གསལ་བོ་བྱུང་ཡོད་པའི་རེ་བ་ཡོད། དེ་རིང་ངས་སྤོབས་པ་ཆེན་པོས་གསལ་བཤད་བྱ་རྒྱུ་ཞིག་ལ། རྒྱ་ནག་གིས་བོད་ཀྱི་གཞོན་ནུ་ལྷན་ཚོགས་འཇིགས་སྐུལ་དྲག་སྤྱོད་པ་ཡིན་པར་དྲིལ་བསྒྲགས་བྱེད་ཀྱིན་ཡོད་ཀྱང༌། བོད་ཀྱི་གཞོན་ནུ་ལྷན་ཚོགས་དང་༧གོང་ས་མཆོག་གི་བར་དུ་མཐུན་ས་ཞིག་ཡོད་པ་ནི་འཐབ་རྩོད་ཀྱི་ངོ་བོ་འཚེ་མེད་ཞི་བའི་ལམ་ཡིན། ༧གོང་ས་མཆོག་དང་གཞོན་ནུ་ལྷན་ཚོགས་གཉིས་བར་མི་མཐུན་ས་ཞིག་ཡོད་པ་ནི། ༧གོང་ས་མཆོག་གིས་ལོ་རྒྱུས་གཞི་ལ་འཇོག་གི་མེད་པར་མ་འོངས་པ་གཞི་ལ་བཞག་ནས་འཐབ་རྩོད་བྱེད་བཞིན་ཡོད་པ་དང༌། བོད་ཀྱི་གཞོན་ནུ་ལྷན་ཚོགས་ཀྱིས་ལོ་རྒྱུས་གཞི་ལ་བཞག་ནས་འཐབ་རྩོད་བྱེད་ཀྱིན་ཡོད། ཅེས་བརྗོད་སྐབས། བོད་གཞུང་ཕྱི་དྲིལ་ལས་ཁུངས་རྒྱ་ཡིག་སྡེ་ཚན་གྱི་གསར་འགོད་པ་སངས་རྒྱས་སྐྱབས་ཀྱིས་གསལ་བཤད་ལྟ་བུར། ༧གོང་ས་མཆོག་གིས་ལོ་རྒྱུས་བློས་གཏོང་བྱས་ཡོད་པ་མ་རེད། ༧གོང་ས་མཆོག་གིས་ལོ་རྒྱུས་ཐོག་གི་བོད་བློས་གཏོང་བྱས་མེད་པ་མ་ཟད། ཁོང་གིས་ལོ་རྒྱུས་ཐོག་གི་བོད་དེ་སྔར་བཞག་ཐོག བོད་རྒྱ་མི་རིགས་གཉིས་ཀྱི་མདུན་ལམ་ལ་དགོངས་པ་ཆེར་བཞེས་ཀྱིས། འབྱུང་འགྱུར་བོད་དེ་རྒྱ་ནག་གི་ཆ་ཤས་སུ་ངོས་ལེན་བྱེད་ཀྱིན་ཡོད་པ་དེ་རེད། ཅེས་གསལ་བཤད་བྱས་བྱུང༌།
སྐབས་དེར་རྒྱ་རིགས་དམངས་གཙོ་དོན་གཉེར་བ་ཕན་ཆི་ཡིས། ལོ་སྔོན་མའི་སྤྱི་ཟླ་ ༣ པར་ཨ་རིར་གནས་སྡོད་བོད་མི་ཚོས་རྔམ་སྟོན་ཁྲོམ་སྐོར་བྱས་སྐབས། རྒྱ་རིགས་སློབ་མ་ཞིག་གིས་བོད་མི་ཞིག་ལ་རྒྱ་ནག་གི་དར་དམར་གྱི་ཡུ་བས་བཞུས་ཀྱང༌། བོད་པ་དེས་ཡ་ལན་མ་སློག་པར་བསྡད་སོང༌། ང་ཁོང་ཁྲོ་ལངས་ཏེ་དར་དམར་དེ་ལ་འཇུས་ནས་ས་ལ་གཡུག་ཡིན། སྐབས་དེར་ཁོས་ང་ལ། བོད་ཀྱི་ཁ་བྲལ་བ་ཞེས་རྒྱ་སྐད་ཐོག་སྐད་ཤུགས་ཆེན་པོས་བཤད་བྱུང༌། ངས་ཀྱང༌། སྐད་ཤུགས་ཆེན་པོས་ང་ཧན་མི་རིགས་ཡིན། ཞེས་ལན་བཏབ་པ་ཡིན། དེ་ནི་དཔེ་མཚོན་ཞིག་རེད། རྒྱ་ནག་གི་དྲག་པོའི་སྲིད་ཇུས་ཀྱི་ལག་པ་རིང་པོ་དེ་རང་དབང་དང་དམངས་གཙོ་ལྡན་པའི་ཕྱི་རྒྱལ་ཁག་ལའང་སྲིང་ཡོང་གིན་འདུག རྒྱ་ནག་དམར་ཤོག་གཞུང་གིས་སྲིད་དབང་བཟུང་རྗེས། མི་དམངས་ཁྲི་ཕྲག་དུ་མའི་ཚེ་སྲོག་ཤོར་ཡོད། སྤྱིར་ངས་བོད་ཀྱི་ལོ་རྒྱུས་གསལ་བོ་མི་ཤེས་ཀྱང༌། རྒྱ་ནག་དམར་པོའི་དམག་དཔུང་བོད་དུ་སླེབས་པ་ནས་མ་མཐར་ཡང་བོད་མི་ཁྲི་ཉིས་རྒྱ་ལྷག་གི་ཚེ་སྲོག་ཤོར་ཡོད། དེའི་རྐྱེན་གྱིས་ངས་དེ་རིང་བོད་ཀྱི་གཞོན་ནུ་ལྷན་ཚོགས་ལ་ཞུ་རྒྱུ་ཞིག་ནི། ཁྱེད་ཚོ་ངོ་གནོངས་མི་དགོས་པའི་རང་དབང་འཐབ་རྩོད་པ་ཡིན་ལ། རྒྱ་ནག་དམར་ཤོག་གཞུང་ནི་འཇིགས་སྐུལ་དྲག་སྤྱོད་པ་ངོ་མ་དེ་ཡིན། ཅེས་ཁ་གསལ་བོས་བརྗོད་འདོད་བྱུང་སོང༌། དེ་བཞིན་ང་ལོ་རྒྱུས་ལ་གསལ་ཁ་མེད་ཀྱང༌། ངས་གསལ་བོ་ཤེས་པ་ནི་སྤྱི་ལོ་ ༡༩༥༠ ལོའི་སྔོན་ལ་བོད་ནི་རྒྱ་ནག་གི་ཆ་ཤས་ཤིག་གཏན་ནས་མ་རེད། འདས་ཟིན་པའི་ལོ་རྒྱུས་ནང་དུ་བོད་དང་རྒྱ་ནག་གོང་མའི་བར་དུ་ལོ་རྒྱུས་ཀྱི་འབྲེལ་བ་བྱུང་མྱོང་ཡོད་ལ། བོད་དང་སོག་པོའི་བར་དུ་མཆོད་ཡོན་གྱི་འབྲེལ་བ་བྱུང་བ། དེ་བཞིན་བོད་དང་རྒྱ་ནག་གོ་མིན་ཏང་སྲིད་གཞུང་བར་དུ་འབྲེལ་བ་ཞིག་བྱུང་ཡོད་ཀྱང༌། སྤྱི་ལོ་ ༡༩༥༩ ལོའི་ཡན་ལ་བོད་ནི་རྒྱ་ནག་དམར་པོའི་སྲིད་གཞུང་གི་ཆ་ཤས་ཡིན་པའི་ལོ་རྒྱུས་ཤིག་གཏན་ནས་མེད། ངས་རྒྱ་ནག་དམར་པོ་སྲིད་གཞུང་གི་ཡིག་ཆའི་སྟེང་ནས་བདེན་དཔང་བྱེད་ཐུབ་ཀྱིན་ཡོད། དང་ཐོག་གུང་ཁྲན་ཏང་གིས་སྲིད་དབང་མ་བཟུང་བའི་སྔོན་ལ། མི་རིགས་སོ་སོའི་རང་དབང་དང་བཅིངས་གྲོལ་ནི་ཐུན་མོང་མ་ཡིན་པའི་དབང་ཆ་ཞིག་རེད། ཅེས་ཁོང་ཚོས་ཤུགས་ཆེན་པོས་ཡིག་ཆའི་ནང་བཀོད་ཡོད། ཡིན་ཡང་འདས་པའི་ལོ་ ༦༠ ནང་དུ་བཀྲ་མི་ཤིས་པའི་དོན་དག་མང་པོ་བྱུང་ཡོད་པ་དངོས་ཡོད་ཡིན་པས་ང་ཚོ་ཚང་མས་ངོས་ལེན་བྱ་དགོས།
ཏཱ་ལའི་བླ་མའི་དབུ་མའི་ལམ་ལ་ང་རང་སྒེར་ངོས་ནས་རྒྱབ་སྐྱོར་ཆ་ཚང་བ་ཡོད། ཁ་སང་ང་ཚོ་ཁོང་དང་མཇལ་སྐབས། ཁོང་གིས་རྒྱ་བོད་མི་རིགས་གཉིས་བར་གྱི་འགལ་ཟླ་མེད་པར་བཟོ་རྒྱུ་ནི་བོད་ཀྱི་དཀའ་རྙོག་སེལ་བའི་ཆ་རྐྱེན་ངེས་ཅན་ཡིན་པར་གསུངས་སོང་ལ། དེ་རིང་སླར་ཡང་ཁོང་གིས་ཁ་སང་གི་གསུང་དེ་དྲན་གསོ་བྱས་བྱུང༌། ཁོང་གིས་བཏོན་པའི་དབུ་མའི་ལམ་དེ་འབྱུང་འགྱུར་བོད་རྒྱ་མི་རིགས་གཉིས་ཀྱི་མདུན་ལམ་ལ་དགོངས་པ་གཏིང་ཟབ་བཞེས་ནས་ཐག་གཅོད་གནང་བ་ཞིག་རེད། བོད་རང་བཙན་དགོས་ཟེར་ན། རྒྱ་ནག་གཞུང་གིས་དྲག་གནོན་དང་སྲིད་དབང་སྒེར་གཅོད་བྱ་རྒྱུ་ཞེད་སྣང་མེད། ཞེད་སྣང་ཆེ་ཤོས། ༧ཏཱ་ལའི་བླ་མའི་དགོངས་གཞི་དབུ་མའི་ལམ་འདི་རེད། དེ་ནི་རྒྱ་ནག་གཞུང་འོག་ནས་མང་དོན་མཚུངས་པའི་རང་སྲིད་རང་སྐྱོང་ཟེར་གྱིན་ཡོད། རང་སྲིད་རང་སྐྱོང་གི་སྙིང་དོན། གཞུང་གཅིག་གི་སྲིད་སྐྱོང་སྟངས་ལ་འདོད་པ་མ་ཁེངས་པ་རེད། ད་ལྟའི་རྒྱ་ནག་གཞུང་དང་རང་སྲིད་རང་སྐྱོང་གཉིས་ཉིན་དང་མཚན་གྱི་འགལ་ཟླ་ཆགས་ཡོད། ཁྱེད་ཚོས་བསམ་བློ་ཐོངས་དང༌། རྒྱ་ནག་གིས་དམངས་གཙོ་དང་རང་དབང་དོན་གཉེར་བ་ཚོར་ཡར་ལངས་ཀྱི་གོ་སྐབས་སྤྲོད་སྲིད་དམ། སྤྲོད་ཕོད་དམ། མིའི་རིགས་ཀྱི་ཁྱད་པར་དེ་ཆོས་ལུགས་དང་རྒྱལ་ཁབ་ཀྱིས་དབྱེ་བ་ཕྱེ་ཡོད་པ་ཞིག་མིན་པར། མིའི་རིགས་ནི་བཟང་ངན་གཉིས་བསྡུར་ནས་དབྱེ་འབྱེད་བྱེད་ཀྱིན་ཡོད་སྟབས། རྒྱ་རིགས་དང་བོད་རིགས་ཤ་ཁ་ཁ་དང་གྲི་སོ་སོ་བྱ་རྒྱུ་ཡིན་ན། དེ་ནི་རྒྱ་ནག་དམར་ཤོག་གཞུང་གི་བསམ་དོན་དང་རེ་བ་རེད། ད་ལྟ་རྒྱ་ནག་དམར་ཤོག་གཞུང་ནི་བླ་སྲོག་དང་གཞུང་ཤིང་མེད་པའི་གཞུང་ཞིག་ཡིན་པ་དང༌། ཁོ་ཚོར་མི་རིགས་རིང་ལུགས་ཀྱི་ལྟ་བ་བེད་སྤྱོད་བྱ་རྒྱུ་གཅིག་པུ་ལྷག་ཡོད། རྒྱ་དང་བོད་གཉིས་ཀྱི་མགོ་བོ་མནན་ཡོད་པའི་རྒྱ་ནག་དམར་བོའི་གཞུང་འདི་མེད་པར་བཟོ་བར་རང་དབང་དང་དམངས་གཙོ་དོན་གཉེར་མཁན་ཚང་མས་མཉམ་འབྲེལ་དང་ཐུན་མོང་གི་ནུས་པ་གཅིག་ཏུ་སྤྲེལ་དགོས་པ་གལ་ཆེན་པོ་རེད། ཅེས་གསུངས་བྱུང༌།
དེའི་རྗེས་སྐུ་ཞབས་ཉེ་ཡེ་ཤཱན་མཆོག་གིས། རྒྱ་མི་རིགས་དང་བོད་མི་རིགས་ཀྱི་བཀའ་རྙོག་འདི་ལོ་རྒྱུས་ཀྱིས་བཞག་པའི་བཀའ་རྙོག་རེད། ཡིན་ན་ཡང་ངས་དོ་སྣང་བྱ་ཡུལ་ནི་འདས་པའི་ལོ་རྒྱུས་མ་ཡིན་པར། ད་ལྟ་ལྷག་ཡོད་པའི་དཀའ་ངལ་འདི་ལ་ཇི་ལྟར་གདོང་ལེན་བྱ་རྒྱུ་དང་ཇི་ལྟར་སེལ་ཐབས་བྱ་རྒྱུ་དེ་ཡིན། ངས་སྐད་ཆ་ལས་སླ་བོ་དང་ཐུང་ཐུང་གིས་བཤད་ན། བོད་རྒྱའི་བཀའ་རྙོག་སེལ་རྒྱུ་དང༌། དམངས་གཙོ་དང་རང་དབང་དོན་གཉེར་བ་ཚོའི་དཀའ་ངལ་སེལ་ཐབས་སོགས་ཀྱི་ལྡེ་མིག་དེ་རྒྱ་ནག་དམངས་གཙོར་འགྱུར་རྒྱུ་འདི་རེད། ང་ཚོའི་དམངས་གཙོ་དོན་གཉེར་བ་རྣམས་ལ་དོན་ཚན་གཉིས་ཡོད་པའི་དང་པོ་དམངས་གཙོ་དང་གཉིས་པ་མི་རིགས་རེད། མི་རིགས་ཀྱི་གནད་དོན་དེ་ཧ་ཅང་གལ་ཆེན་པོ་རེད། འོན་ཀྱང༌། རྒྱ་ནག་གི་མི་རིགས་གནད་དོན་གྱི་དཀའ་ངལ་སེལ་དགོས་ན། ཐོག་མར་རྒྱ་ནག་དམངས་གཙོར་འགྱུར་དགོས་ཞེས་བཤད་ཀྱིན་ཡོད། དེའི་རྐྱེན་གྱིས་ང་ཚོས་ཐོག་མར་རྡོག་རྩ་གཅིག་སྒྲིལ་དང་ནུས་པ་མཉམ་འབྲེལ་གྱིས་རྒྱ་ནག་དམར་ཤོག་གཞུང་འདི་མེད་པར་གཏོང་དགོས་པ་དང༌། དེའི་རྗེས་གཞི་ནས་མི་རིགས་ལ་སོགས་པའི་གནད་དོན་མང་པོ་ཞིག་ཐག་གཅོད་བྱ་ཆོག་གི་རེད། ཅེས་གསུངས་བྱུང༌།
དེ་ལྟར་རྒྱ་རིགས་དམངས་གཙོ་དོན་གཉེར་བ་ཚོ་དང་བོད་པ་དག་གིས་བགྲོ་གླེང་གོ་བསྡུར་ཞིབ་ལྷུག་བྱས་ཤིང༌། ཕན་ཚུན་གྱི་དོགས་པ་རྣམ་རྟོག་གསལ་བོ་བཟོས་རྗེས་བོད་གཞུང་བཀའ་ཤག་གིས་གསོལ་ཚིག་ཅིག་ཕུལ་གདན་ཞུ་བྱས་ཡོད།