ཆོལ་གསུམ་ལོ་རྒྱུས་འབྲི་མཚམས་བཞག་པ།

 

སྐུ་སྒེར་ཡིག་ཚང་ནས་རྒྱུ་མཚན་གཉིས་དྲངས་ཡོད་པ་དེར་ངོས་ལེན་བྱ་ཐབས་མི་འདུག

ཆོལ་གསུམ་ལོ་རྒྱུས་ཕྱོགས་སྒྲིག་གི་ལས་གཞི་མགོ་བཙུགས་ནས་ལོ་ངོ་དགུ་ཙམ་འགོར་གྱིན་ཡོད་པ་དང་། ད་ལྟའི་བར་དུ་ཡིག་ཆ་འཚོལ་སྡུད་བྱས་པ་དག་ཤོག་སྙིགས་ལ་འགྲོ་སྲིད་པར་སེམས་འཚབ་ཆེན་པོ་འདུག ཅེས་ལོ་རྒྱུས་ཕྱོགས་སྒྲིག་ཁང་འདིའི་འགན་འཛིན་འགུ་ལོག་དམ་ཆོས་དཔལ་བཟང་གིས་གསུངས་བྱུང་།

    ཟླ་ ༥ ཚེས་ ༡ ཉིན་ནས་བཟུང་ཆོལ་གསུམ་ལོ་རྒྱུས་ཕྱོགས་སྒྲིག་གི་ལས་གཞི་མཚམས་དགོས་པའི་བཀའ་མངགས་པ་ལྟར། ལས་བྱེད་ཚོས་ཉིན་དེ་ནས་ལས་མཚམས་ཡོངས་སུ་བཞག་ཡོད་འདུག འདིའི་ཐད་ལོ་རྒྱུས་ཕྱོགས་སྒྲིག་གི་ལས་གཞིའི་འགན་འཛིན་འགུ་ལོག་དམ་ཆོས་དཔལ་བཟང་ལགས་ལ་བཀའ་འདྲི་ཞུས་སྐབས། ཁོང་གིས། ཆོལ་གསུམ་ལོ་རྒྱུས་ཀྱི་ལས་གཞིའི་རྨང་གཞི་བཏང་ནས་མི་ལོ་ ༩ ལྷག་འགོར་གྱིན་འདུག་ལ། རྒྱ་བལ་འབྲུག་གསུམ་དང་བོད། ཕྱི་རྒྱལ་ཁག་ཏུ་ཡིག་ཆ་ ༣༠༠ ལྷག་གི་ཁྲོད་ནས་རྒྱུ་ཆ་འཚོལ་སྡུད་དང་ཕྱོགས་སྒྲིག་བྱས་ཡོད་ལ། དེ་བཞིན་ས་ཕྱོགས་གང་སའི་རྒན་རབས་པ་ ༢༤༥ ལྷག་ལ་བཅར་འདྲི་བརྒྱུད་རྒྱུ་ཆ་འཚོལ་སྡུད་བྱས་ཡོད་པས། ད་ལྟའི་ཆར་ཕྱོགས་ཡོངས་ཀྱི་ཡིག་ཆ་བརྒྱ་ཆ་ ༧༠ ཙམ་འཚོལ་སྡུད་དང་ཕྱོགས་སྒྲིག་བྱས་ཡོད། དེའི་ཁྲོད་ནས་ད་ལྟ་དེབ་གཟིགས་སུ་དཔར་ཆོག་པ་དང་ཞུ་དག་རིམ་པ་དང་པོ་ཡང་སོང་ཚར་བ་གཅིག་ནི་བོད་ཆེན་པོའི་ཡིག་ཚང་དེབ་ཕྲེང་དང་པོ་དང་གཉིས་པ་གཉིས་ཡིན།  སྤྱི་ཟླ་ ༤ ཚེས་ ༣༠ ཉིན་གློ་བུར་དུ་སྐུ་སྒེར་ཡིག་ཚང་གིས་ཕྱག་འཕྲིན་ཞིག་འབྱོར་ཏེ་ལས་མཚམས་འཇོག་དགོས་གསུངས་འདུག ཅེས་གསུངས་བྱུང་།

    ལས་མཚམས་འཇོག་དགོས་པའི་རྒྱུ་མཚན་གང་ཡིན་བཀའ་འདྲི་ཞུས་སྐབས། ཁོང་གིས། ཡི་གེ་དེའི་ངོ་བཤུས་གསར་ལམ་ཁག་ལ་སྤྲད་ཀྱང་མ་འགྲིག་པ་མེད་མོད། ད་དུང་སྐུ་མདུན་ལ་དངོས་སུ་མཇལ་ཁ་ཞིག་མ་ཞུས་པར་སྤྲོད་ཐུབ་པ་མི་འདུག ཡིན་ཡང་སྐུ་སྒེར་ཡིག་ཚང་ནས་རྒྱུ་མཚན་བཀོད་ཡོད་པ་དེ་རྒྱུ་མཚན་ངེས་ཅན་ཞིག་ཡིན་པར་ངོས་ལེན་བྱ་ཐབས་མི་འདུག ལས་གཞི་འདི་ཐོག་མར་ང་རང་གིས་འགུ་ལོག་ལོ་རྒྱུས་བྲིས་ཏེ་སྐུ་སྒེར་ལ་ཕུལ་སྐབས། ༧གོང་ས་མཆོག་གིས་སྐུ་དངོས་སུ་ལས་གཞི་འདི་འདྲ་ཞིག་རྩོམ་པར་བཀའ་གནང་ཡོད་པ་མ་ཟད། དེ་རྗེས་ལོ་རྒྱུས་ཕྱོགས་སྒྲིག་འདི་དང་འབྲེལ་བའི་བགྲོ་གླེང་ཞིག་ཚོགས་སྐབས་ཀྱང་༧རྒྱལ་བ་རིན་པོ་ཆེ་དང་བཀའ་ཁྲི་ཟམ་གདོང་རིན་པོ་ཆེ་སྐུ་དངོས་སུ་ཕེབས་ཡོད་པ་རེད། ང་རང་མ་གཞི་ནས་ལོ་རྒྱུས་འབྲི་མཁན་ཞིག་མ་རེད་ལ། འགུ་ལོག་ལོ་རྒྱུས་དེའི་ནང་དུ་ཡང་གནས་ཚུལ་གསལ་བོ་འབྱོར་མིན་དང་ཡིག་ཆ་རག་མིན་གྱིས་གནས་ཚུལ་ཁ་ཤས་ཏག་ཏག་ཅིག་ཆགས་ཡོད་པ་མ་རེད། ཡིན་ཡང་༧རྒྱལ་བ་རིན་པོ་ཆེ་སྐུ་དངོས་ཀྱིས་ལས་གཞི་འདི་འདྲ་ཞིག་རྩོམ་དགོས་པའི་བཀའ་གནང་དུས་མ་འཇོན་པ་མ་གཏོགས་ཤུགས་རྒྱག་དགོས་པ་དང་འགྱོད་པ་མེད་པ་ཞིག་བྱ་དགོས་བསམ་ཡོད་ལ། ལོ་འདི་དག་གི་ནང་དུ་ང་ཚོ་ས་ཆ་གང་དུ་མི་སྣ་འདྲ་མིན་གྱི་གམ་དུ་བཅར་བ་དང་ཡིག་ཆ་འཚོལ་སྡུད་བྱེད་སྐབས། སྐུ་སྒེར་ཡིག་ཚང་དང་དམིགས་བསལ་གྱིས་༧གོང་ས་མཆོག་གི་ཐུགས་རེ་དང་འགྲོ་གྲོན་ཆུད་ཟོས་ལ་མི་འགྲོ་ཆེད་རླངས་འཁོར་འབབ་ཚིགས་དང་མཁར་ཤུལ་སོགས་ནས་ཉལ་བ་ལས་མགྲོན་ཁང་གཅིག་གི་ནང་དུ་ཡང་བསྡད་མ་མྱོང་། ཡིན་ན་ཡང་གློ་བུར་དུ་ལས་མཚམས་འཇོད་དགོས་ཟེར་ན་སྐུ་སྒེར་ཡིག་ཚང་ལ་ཐུགས་ཁག་ཡོད་རྒྱུ་མ་རེད་དེ། ང་རང་གི་ངོས་ནས་ཀྱང་བློ་ཕམ་བྱུང་སོང་། ཞེས་གསུངས་བྱུང་།

    ཤེས་གསལ་ལྟར་ན་སྐུ་སྒེར་ཡིག་ཚང་གི་བཀའ་ཡིག་ནང་དུ་ལས་མཚམས་འདི་འཇོག་པར་རྒྱུ་མཚན་གཉིས་དྲངས་ཡོད་པ་སྟེ། མདོ་སྨད་ལོ་རྒྱུས་ཆེན་མོ་ཚད་དང་ལྡན་པ་ཞིག་ཧོར་གཙང་འཇིགས་མེད་ལགས་ཀྱིས་ལེགས་གྲུབ་བྱུང་ཡོད་པ་དང་། ད་ཕན་མི་སུས་ཀྱང་དེ་འདྲའི་ལོ་རྒྱུས་ཤིག་འབྲི་མི་ཐུབ་པའི་ཡིད་ཆེས་ཡོད་པ། དེ་བཞིན་སྐུ་སྒེར་ཡིག་ཚང་གིས་རྒྱ་བལ་འབྲུག་གསུམ་གྱི་བོད་མིའི་ཤེས་ཡོན་དང་འཕྲོད་བསྟེན་ཐད་འགྲོ་གྲོན་ཕོན་ཆེན་གཏོང་གི་ཡོད་པས་ཕྱག་དངུལ་གྱི་དཀའ་ངལ་ཡོད་པ་དགོངས་འཇགས་ཀྱིས་ཆོལ་གསུམ་ལོ་རྒྱུས་ཕྱོགས་སྒྲིག་གི་ལས་མཚམས་འཇོག་དགོས་པ། ད་ལྟའི་བར་ཡིག་ཆ་འཚོལ་སྡུད་བྱས་པ་རྣམས་སྐུ་སྒེར་ཡིག་ཚང་ལ་འབུལ་དགོས་པ་སོགས་བཀོད་འདུག འགུ་ལོག་དམ་ཆོས་དཔལ་བཟང་གིས་གསུངས་དོན། ང་སྐུ་སྒེར་ཡིག་ཚང་ལ་བཅར་ཏེ་སྐུ་ངོ་བྲེ་སྲང་ལགས་ལ་ཕྱག་ལས་གནང་སྟངས་མ་འགྲིག་པ་ཡོད་ཚེ་ལས་མི་བརྗེ་བོ་བརྒྱབ་ཆོག་གི་རེད། ལས་མཚམས་བཞག་ན་བློ་ཕངས་པོ་འདུག་ཅེས་ཞུ་རྒྱུ་བྱུང་ལ། དེ་བཞིན་ང་རང་སྐུ་སྒེར་ཡིག་ཚང་ལ་ཡིད་མ་ཆེས་པ་དེ་འདྲ་མིན་ཡང་༧གོང་ས་མཆོག་བཞུགས་སྒར་ལ་ཆིབས་བསྒྱུར་བསྐྱངས་སྐབས་མཇལ་ཁ་ཞུས་ཏེ་སྐུ་མདུན་ནས་ལས་མཚམས་འཇོག་དགོས་པ་གསུངས་ན་གཞི་ནས་ད་ལྟ་བར་དུ་འཚོལ་སྡུད་བྱས་པའི་ཡིག་ཆ་རྣམས་སྤྲོད་ཆོག་ཅེས་ཀྱང་ཞུ་རྒྱུ་བྱུང་། སྐུ་ངོ་བྲེ་སྲང་ལགས་ནས་སྐུ་སྒེར་ཡིག་ཚང་གི་ལས་གཞི་ཚོགས་ཆུང་གིས་ཐག་གཅོད་བྱས་པ་ཡིན་རབས་གསུངས་སོང་། གང་ལྟར་ང་རང་ངོས་ནས་ཡིག་ཆ་འདི་དག་ཤོག་སྙིགས་ལ་མི་འགྱུར་བའི་ཆེད་རྩིས་སྤྲོད་དམ། ཡང་ན་ལས་གཞི་མཇུག་སྐྱོང་འདོད་འདུག ཅེས་གསུངས་བྱུང་།

    འདི་གའི་གསར་འགོད་པས་སྐུ་སྒེར་ཡིག་ཚང་གི་དྲུང་ཆེ་བྲེ་སྲང་ལགས་ལ་འདིའི་སྐོར་བཀའ་འདྲི་ཞུས་སྐབས། ཁོང་གིས། སྐུ་སྒེར་ཡིག་ཚང་གི་ལས་བྱེད་ཚོས་གྲོས་བསྡུར་བརྒྱུད་ལས་མཚམས་འཇོག་རྒྱུ་ཐག་བཅད་པ་རེད། མདོ་སྨད་ཀྱི་ལོ་རྒྱུས་རྒྱས་པ་ཞིག་ཧོར་གཙང་འཇིགས་མེད་ཀྱིས་བྲིས་ཡོད་པ་རེད། དེ་བཞིན་འགྲོ་གྲོན་གྱི་དཀའ་ངལ་ཡང་འདུག ཅེས་གསུངས་བྱུང་། ལས་གཞི་འདི་ཐོག་མར་༧གོང་ས་མཆོག་གིས་བཀའ་གནང་བ་ཡིན་ན་ཐེངས་འདིར་ལས་མཚམས་འཇོག་དགོས་པ་༧གོང་ས་མཆོག་གིས་མཁྱེན་གྱིན་ཡོད་མེད་བཀའ་འདྲི་ཞུས་སྐབས།ཁོང་གིས། སྤྱིར་བཏང་གི་ལས་གཞིའི་རིགས་འདི་སྐུ་སྒེར་ཡིག་ཚང་གི་ལས་བྱེད་དང་ལས་གཞི་ཚན་ཆུང་གིས་ཐག་གཅོད་གནང་གིན་ཡོད་པས། ཐེངས་འདིའི་ལས་མཚམས་འཇོག་རྒྱུ་ཡང་འདི་ལྟར་ཐག་བཅད་པ་ཡིན། ལས་གཞི་ཐོག་མར་རྒན་དམ་ཆོས་དཔལ་བཟང་གིས་སྐུ་མདུན་ལ་སྙན་སེང་ཞུས་པ་རེད་ལ། སྐུ་མདུན་ནས་ལས་གཞི་འདིར་རྒྱབ་སྐྱོར་གནང་དགོས་པའི་བཀའ་གནང་ཡོད་པ་རེད། དེའི་རྗེས་ལས་གཞི་འདི་འཛིན་སྐྱོང་དཔེ་མཛོད་ཀྱི་འོག་ཏུ་འགྲོ་གྲོན་སྐུ་སྒེར་ཡིག་ཚང་ནས་བཏང་བ་ཡིན། ཞེས་གསུངས་བྱུང་།

    ཆོལ་གསུམ་ལོ་རྒྱུས་ཕྱོགས་སྒྲིག་གི་ཉམས་ཞིབ་པ་མཁན་པོ་འཇུ་བསྟན་སྐྱོང་ལགས་སུ་དགོངས་ཚུལ་གང་ཡོད་དྲིས་སྐབས། ཁོང་གིས། སྤྱིར་ལས་མཚམས་འཇོག་དགོས་པར་སྐུ་སྒེར་ཡིག་ཚང་ནས་རྒྱུ་མཚན་གཉིས་དྲངས་ཡོད་པ་དེ་རྒྱུ་མཚན་ཞིག་ཡིན་པར་ངོས་ལེན་བྱ་ཐབས་མི་འདུག དེ་མིན་ང་ཚོའི་ཤེས་ཡོན་དང་ནུས་པས་འདང་གིན་མེད་པ་ཡིན་ན་ལས་བྱེད་བརྗེ་བོ་རྒྱག་ཆོག་གི་རེད། གང་ལྟར་ལས་མཚམས་འཇོག་དགོས་བྱུང་བར་བསམ་ཚུལ་གཉིས་འདུག དང་པོ་དེ་ལོ་རྒྱུས་འབྲི་བ་ནི་རྩོམ་རིག་གཞན་དག་འབྲི་བ་ལས་འགན་ཆེ་བ་ཡོད་ལ། དམིགས་བསལ་གྱིས་ང་ཚོའི་བོད་འདི་དཀའ་ངལ་འཕྲད་ཡོད་སྐབས་འདིར་ལོ་རྒྱུས་འབྲི་རྒྱུ་ནི་དེ་བས་ཀྱང་གནད་འགག་དང་འགན་ཆེ་བ་ཡོད། འདི་ལྟ་བུའི་འགན་ཆེན་པོ་ཞིག་གིས་ནམ་ཡིན་ཡང་རང་ཉིད་གནོན་ཤུགས་ཁྲོད་བཅུག་ཡོད་ཀྱང་། གནོན་ཤུགས་དང་ལས་འགན་འདི་གློ་བུར་དུ་མེད་སོང་ན་སྒྲོག་ལས་ཐར་སོང་བ་ལྟ་བུའི་གུ་ཡངས་པོ་རེད། དེ་བཞིན་ད་ལྟ་བར་ལྷག་བསམ་རྣམ་དག་གིས་ལས་ཀ་བྱས་ཡོད་བསམ་ནས་སྤོབས་པ་ཡོད་ལ། དེ་བཞིན་ལོ་ངོ་འདི་དག་གི་ནང་དུ་ཡིག་ཆ་འཚོལ་སྡུད་ཀྱིས་ཡིག་ཆ་མི་འདྲ་བ་ ༢༠༠ ལྷག་ལ་ལྟ་རྒྱུ་བྱུང་བས། ང་རང་མུ་མཐུད་དུ་ལོ་རྒྱུས་ཞིབ་འཇུག་ལ་སོགས་པའི་བྱ་བར་འཇུག་འདོད་ཡོད།གཉིས་པ། སྐལ་བ་ཡ་ཐོག་ནས་རྒྱལ་ཕྲན་སིལ་མའི་བར་བཙན་པོ་རིམ་བྱུང་ནས་བོད་སིལ་བུའི་དུས་དང་། བོད་ཡུལ་ཁྲི་སྐོར་ ༡༣ ལ་སོགས་པའི་ཡུལ་ལུང་སོ་སོའི་ཚོ་བ་ཁག་དང་ཚོ་བ་དེ་དག་དང་འབྲེལ་བའི་རིག་གནས་ཀྱི་འཕེལ་རིམ་སོགས་ཐེངས་འདིའི་ང་ཚོའི་ལོ་རྒྱུས་ཕྱོགས་སྒྲིག་གི་འབྲི་ཐབས་དང་ཁེ་ཕན། རྒྱབ་ལྗོངས་སོགས་སྔར་མེད་མང་པོ་ཞིག་ཡོད། ཚོ་བའི་འབྲི་ཐབས་སྤྱད་ནས་བོད་ཆོལ་ཁ་གསུམ་གྱི་ལོ་རྒྱུས་ཤིག་ད་ལྟ་བར་མཐོང་རྒྱུ་ཁག་པོ་འདུག་པས། ང་ཚོས་བོད་ཕྱི་ནང་གི་ལོ་རྒྱུས་དཔེ་ཆ་དང་ཡིག་རིགས་གཞན་པའི་ལོ་རྒྱུས་དེབ། གཙོ་བོ་དེ་ས་ཁུལ་སོ་སོའི་རྒན་རབས་པ་དག་དང་བཅར་འདྲི། དེ་བཞིན་ཡུལ་ལུང་སོ་སོའི་རིག་གནས་དང་འཚོ་བ་སོགས་ཀྱི་ཁྱད་པར་སོགས་ཞིབ་འཇུག་གིས་ཡིག་ཆ་བརྒྱ་ཆ་ ༧༠ ལྷག་སྒྲུབ་ཐུབ་ཡོད་ལ། དཀར་ཆག་ཀྱང་བཟོས་ཚར་ཡོད་པ་རེད་དེ། འདི་ལྟར་གློ་བུར་དུ་མཚམས་འཇོག་དགོས་བྱུང་ཡོད། དེ་བས་ད་ལྟ་བར་དུ་ཡིག་ཆ་འཚོལ་སྡུད་བྱས་པ་དང་ཕྱོགས་སྒྲིག་བྱས་པ། དཀར་ཆག་བཟོས་པ་སོགས་ཤོག་སྙིགས་ལ་འགྲོ་བར་དོགས་ནས་བློ་འཚབ་ཆེན་པོ་འདུག  ཅེས་གསུངས་བྱུང་།

བསྐྱར་བཅོས།: ༢༠༡༤/༠༣/༢༦

Leave a Reply

38 thoughts on “ཆོལ་གསུམ་ལོ་རྒྱུས་འབྲི་མཚམས་བཞག་པ།

  1. དྲང་མོ་བཤད་ན་སྐུ་སྒེར་ཡིག་ཚང་གིས་མཛད་རྣམ་གྱི་ལས་གཞི་རྩིས་སྤྲོད་བྱེད་ས་ནོར་བ་རེད། ནོར་གླིང་ན་དཔལ་འབྱོར་གྱི་ལས་གཞི་གཙོ་བོ་གཉེར་བ་མ་གཏོགས་༸གོང་ས་མཆོག་གི་མཛད་རྣམ་རྩོམ་སྒྲིག་བྱེད་ཐུབ་པའི་ཤེས་ཚད་ལྡན་པ་སུ་ཡོད། འདི་ལྟར་བྱས་ནས་ཕྱོགས་འདྲ་མིན་ལ་བསམ་བློ་བཏང་ན་ལོ་རྒྱུས་གྲུབ་འབྲས་མ་ཐོན་པ་དང་ནོར་འཁྲུལ་ཤོར་བ་རྒན་དམ་དཔལ་རྐྱང་པ་གཏན་ནས་མིན། བེ་རིས་མཐའ་ན་འབྲས་སྤུངས་བློ་གླིང་གི་མཁན་རབས་ཁ་གྲངས་ཚང་བ་ཞིག་བགྲང་ཐུབ་མེད། མཁན་པོའི་གྲངས་བགྲང་མི་ཐུབ་མཁན་ཞིག་གིས་གདན་རབས་ཆོས་འབྱུང་ཇི་ལྟར་འབྲི། ཁོའི་ཆོས་འབྱུང་ནང་དུ་ཤུགས་ལྡན་གྱི་གནད་དོན་དང་འབྲེལ་བའི་ཚབས་ཆེའི་ནོར་འཁྲུལ་ཡང་ཡོད།