བཀའ་ཁྲིར་ཕུལ་བ། ཧུན་སུར་མི་དམངས་ནས།

དཔལ་ལྡན་༧མི་དབང་བཀའ་ཡི་མདུན་ན་འདོན་ཁྲི་བ་ཟམ་གདོང་རིན་པོ་ཆེ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གི་ཞབས་པད་དགེ་ལེགས་འདབ་སྟོང་བཞད་པའི་ཁྲིའི་དྲུང་དུ།

                            སྒོ་གསུམ་རབ་གུས་ཧུན་སུར་རབ་རྒྱས་གླིང་སེར་སྐྱ་མི་མང་སྤྱི་མགྲིན་ནས་གསོལ་བ་ཕུར་ཚུགས་སུ་འདེབས་སྙིང༌། དེ་ཡང་བགྲང་བྱ་གཉིས་ཙམ་གྱི་རྗེས་གང་ཉིད་བཀའ་ཁྲིའི་མཛད་འགན་ནས་འཁྱུར་རྒྱུ་ཡིན་ཡང༌།  བདག་ཅག་མི་མང་ནི་གང་ཉིད་ཀྱི་སྐུ་གསུང་ཐུགས་ཀྱི་ཡོན་ཏན་དང༌། གངས་ཅན་བོད་ཀྱི་བསྟན་པ་ཆབ་སྲིད་ཐོག་མཛད་འཕྲིན་སྐྱོང་ཚུལ་ལ་བསམས་ན་བློས་ཐོངས་ཐབས་མི་འདུག་ལ། ལྷག་པར་བདག་ཅག་ཆབ་འབངས་རྣམས་ཀྱང་ཟུངས་ཟད་ཀྱི་ནད་པ་ལྟར། ཆབ་སྲིད་ཀྱི་དཀའ་རྙོག་འོག་གནས་ཡོད་སྟབས། སྐྱོབ་རོགས་སུ་སྐྱེས་བུ་ཁྱེད་ལྟ་བུ་༧གོང་ས་མཆོག་གི་ཕྱག་རོགས་མེད་དུ་མི་རུང་བར་འདུག་པས། སྐྱེས་མཆོག་གང་ཉིད་སླར་ཡང་བཀའ་ཁྲིར་འོས་འདེམས་དགོས་ལུགས་སྐོར། བདག་ཅག་ཧུན་སུར་རབ་རྒྱས་སེར་སྐྱ་མི་མང་སྤྱི་མགྲིན་ནས་བོད་མི་མང་སྤྱི་འཐུས་ལྷན་ཚོགས་ལ་༧སྙན་ཞུ་ཞིག་འབུལ་ལམ་ཞུས་པའི་ངོ་བཤུས་བཀའ་ཤག་ཏུ་ཡང་འབུལ་ལམ་ཞུས་དོན་བཞིན། བདག་ཅག་མི་མང་གི་དགོས་འདུན་ལ་རྒྱལ་ཁ་ཐོབ་ན། བཀའ་ཁྲི་རིན་པོ་ཆེ་གང་ཉིད་སླར་ཡང་བཀའ་ཁྲི་སྐབས་བཅུ་བཞི་པའི་འོས་གཞིར་ཕེབས་བཞུགས་མཛད་གནང་ཐུགས་རྗེ་བཀྲིན་ཆེ་བ་ཞེས་སྙིང་ཁོང་རུས་པའི་གཏིང་ནས་གསོལ་བ་ཕུར་ཚུགས་སུ་འདེབས་པ་ལགས་ན། ཉི་མའི་འོད་ཟེར་ལ་སྲིན་བུ་མེ་ཁྱེར་ལྟར་བདག་ཅག་གིས་རྒྱས་བཤད་ཞུ་ག་ལ་དགོས་ཀྱང༌། མདོར་ན་གང་ཉིད་རང་གི་མཁན་པོའི་དྲུང་ནས་བྱང་ཆུབ་མཆོག་ཏུ་ཐུགས་བསྐྱེད་པ་དོན་ལ་གནས་ན། བྱང་ཆུབ་སེམས་པའི་སྤྱོད་པ་བསླབ་ཚུལ་༧རྒྱལ་བསྟན་ཆབ་སྲིད་ཀྱི་སྲི་ཞུ་འདི་ལས་ལྷག་པ་ཁྱེད་ཀྱིས་གཟིགས་སམ། མ་གཟིགས་ན་བདག་ཅག་གིས་རེ་བའི་མིག་འབུར་གཏད་ཅིང་ལག་གཉིས་ཐལ་མོ་སྦྱར་ཏེ་གདུང་ཤུགས་དྲག་པོས་གསོལ་བ་ཕུར་ཚུགས་འདེབས་པའི་གདུང་དབྱངས་འདི་འབྲས་མེད་དུ་མ་མཛད་པར། རེ་བའི་དོན་འབྲས་གཡུར་དུ་ཟ་བའི་སྐྱབས་འཇུག་ཐུགས་རྗེས་འཛིན་པ་མཁྱེན། མཁྱེན། ཅེས་གསོལ་བ་འདེབས་པ་ལགས། ཧུན་སུར་རབ་རྒྱས་གླིང་སེར་སྐྱ་མི་མང་སྤྱི་མགྲིན་ནས་ཕྱི་ལོ་ ༢༠༠༩ ཟླ་ ༦ ཚེས་ ༡༢ ལ་གུས་འདུད་ཀྱིས་བརྒྱན་ཏེ་ཕུལ།    །

བསྐྱར་བཅོས།: ༢༠༡༤/༠༣/༢༦

Leave a Reply

16 thoughts on “བཀའ་ཁྲིར་ཕུལ་བ། ཧུན་སུར་མི་དམངས་ནས།

  1. ད་རེས་ང་ཚོས་བཀའ་ཁྲི་བུད་མེད་ཞིག་འདེམས་ཐུབ་ཡིན་ན་བོད་པའི་མི་སྐྱ་དེ་ཚོ་སྨྲ་རྒྱུ་བཤད་རྒྱུ་གང་ཡང་མེད་པ་ཆགས་ངེས་རེད། སོ་སོས་མི་འགྱོན་པར་ད་དུང་བླ་མ་དང་གྲྭ་པ་དེ་ཚོ་ཞེས་ཁ་ནས་ཐོན་པར་བལྟས་ན། ཁྱོད་རང་བློ་ཤིག་ཙམ་ཞིག་ལྡན་པའི་བློ་ལྡན་དེ་ཡིན་ས་རེད།
    ཧ་ཧ་ཀུ་རེ་ཡིན། དགོངས་པ་མ་ཚོམས་རོགས། ང་ནི་བུད་མེད་ཞིག་བཀའ་ཁྲིར་འདེམས་ངེས་ཡིན། དེས་ཆུང་ས་ནས་འཛམ་གླིང་སྟེང་དུ་བག་ཆགས་གསར་པ་ཞིག་དང་། དོ་སྣང་གསར་པ་ཞིག་སླེབས་ཐུབ་ངེས་རེད།

  2. གཡུ་དྲུག་དཀར།

    ཧུན་སུར་རབ་རྒྱས་གླིང་གི་མི་མང་ཚོའི་མིག་རྒྱང་དེ་འདྲའི་ཐུང་བ་ལ། ལེགས་ཉེས་མི་ཤེས་ན་སྨྲ་བ་ཉུང་རུ་བཏང་ན་མཛེས་སྙམ། བླུན་པོ་སྨྲ་བ་ཉུང་ངུ་བྱས་ན་མཛེས་ཞེས་པའི་ལེགས་བཤད་དེ་རབ་རྒྱས་གླིང་གི་རྩིག་ངོས་ཡོད་ཚད་ལ་སྦྱར་ཐུབ་ན་མ་འོངས་པར་༧གོང་ས་མཆོག་གི་ཐུགས་རེ་དང་མཐུན་པའི་བཀའ་བློན་ཞིག་རེག་པར་ཕན་ཐོག་ཆེན་པོ་ཡོང་ངེས།

  3. བློ་བཟང་ལུང་རྟོགས།

    ཟམ་གདོང་བླ་མ་ལ་སྐྱབས་སུ་མཆིའོ། འདི་ཧུན་སུར་གཞིས་ཆགས་དང་ཡི་གེ་འབྲི་མཁན་ཚོས་རིམ་གྲོ་ཡིན།
    འོན་ཀྱང་། ང་ཚོ་བོད་གཞུང་གི་བཅའ་ཁྲིམས་ནང་ཁོང་ལ་ཡང་བསྐྱར་བཀའ་ཁྲི་སྡོད་པའི་ཐོབ་ཐང་མེད་པས་ད་དུང་ལྐུགས་པ་ཨུ་ཚུགས་རྒྱག་དགོས་དོན་ཡོད་དམ།
    ཁྱེད་ཚོ་ཟམ་གདོང་བླ་མ་དད་གུས་ཡོད་མཁན་ཡིན་ན་ཁོང་ཉིད་ཀྱིས་ནམ་རྒྱུན་གསུང་བཞིན་པའི་ཁྲིམས་ཀྱི་དབང་བསྒྱུར་ཟེར་བ་དེའི་གོ་དོན་ལ་སློབ་སྦྱོང་བྱེད་རྒྱུ་གལ་ཆེ་བར་བསམ།

  4. བློ་གྲོས་རྒྱལ་པོ།

    ཡི་གེ་འདི་འབྲི་མཁན་ཕལ་ཆེར་སྤྱི་ཟུར་ཐུབ་བསྟན་འོད་ཟེར་ཡིན་ལགས་ཡིན་ལེ་རེད་གོ