བུད་མེད་ཚོ་རང་བཞིན་གྱིས་སྐྱེས་པ་ལས་སེམས་གཉོམ་ཞིང་ཉམས་ཆུང་བ། ཧམ་སེམས་དང་ང་རྒྱལ་དེ་ཙམ་མེད་པ་བཅས་ལྷན་སྐྱེས་ཀྱིས་ཞི་བདེ་དང་། འཚེ་བ་མེད་པས་རྒྱུད་ཟིན་ཡོད་ཟེར་ཆོག་པ་རེད། དེར་བརྟེན། བུད་མེད་ཚོས་སྣེ་ཁྲིད་དེ་ཞི་བདེ་ལས་འགུལ་སྤེལ་རྒྱུ་གལ་ཆེན་པོ་རེད། སྤྱི་ཚོགས་ནང་ཐད་གར་ནུས་པ་ཐོན་ཐུབ་མཁན་ཡང་བུད་མེད་ཚོ་ཆགས་ཡོད། ཅེས་༧གོང་ས་མཆོག་གིས་གསུངས་ཡོད།
སྤྱི་ནོར་༧གོང་ས་མཆོག་གིས་ཨི་ཊ་ལིའི་ཉིན་གསུམ་རིང་གི་མཛད་འཕྲིན་ཡོངས་ལེགས་པར་གྲུབ་རྗེས་ཟླ་འདིའི་ཕྱི་ཚེས་ ༡༩ ཉིན་གྱི་ཕྱི་དྲོ་རྒྱ་གར་རྒྱལ་ས་ལྡི་ལིར་ཕེབས་འབྱོར་བྱུང་ཡོད། ཕྱི་ཚེས་ ༢༠ ཉིན་ནས་སླར་ཡང་ལྡི་ལི་ཁུལ་གྱི་ཉིན་གྲངས་ ༤ རིང་གི་མཛད་འཆར་ཁག་ཅིག་བསྐྱང་མགོ་བཙུགས་ཡོད། ཕྱི་ཚེས་ཉི་ཤུ་ཉིན་གྱི་དགོང་མོིའི་ཆུ་ཚོད་ ༦ སྟེང་ལྡི་ལི་གསར་བའི་སི་རི་ཧྤོ་ཊི་ siri fort ཚོགས་ཁང་ཆེན་མོའི་ནང་རྒྱ་གར་དབུས་གཞུང་གི་ཁྲིམས་དཔོན་ལྕམ་སྐུ་དམ་པ་སའུ་ནན་ཌ་བྷན་ཌར་ Justice Sunanda Bhandare མཆོག་གི་རྗེས་དྲན་ཚོགས་འདུ་ཐེངས་བཅོ་ལྔ་བའི་ཚོགས་མགོན་དུ་ཆིབས་སྒྱུར་བསྐྱངས་ཏེ། ༼ བུད་མེད་དང་ཞི་བདེ ༽ ཞེས་པའི་བརྗོད་གཞིའི་ཐོག་བཀའ་སློབ་གསུང་བཤད་གནང་ཡོད། མཛད་སྒོའི་ཐོག་མར་༧གོང་ས་མཆོག་གཙོས་པའི་སྐུ་མགྲོན་གཙོ་བོ་གསུམ་གྱིས་སྐུ་གཤེགས་དམ་པ་སའུ་ནན་ཌ་མཆོག་གི་སྐུ་པར་ལ་མཆོད་མེ་སྒྲོན་ཞིང་མེ་ཏོག་ཕུལ་ཡོད་ལ། དེའི་རྗེས་རྒྱ་གར་གྱི་སྲིད་འཛིན་དང་ཀཱང་རི་སི་ཚོགས་པའི་ཚོགས་གཙོ་ལྕམ་སྐུ་སའོ་ནེ་ཡ་གྷན་ངྷི་གཉིས་ཀྱིས་གསུང་འཕྲིན་སྒྲོག་སྦྱོང་གནང་ཡོད།
སྐབས་དེར་༧གོང་ས་མཆོག་གིས་སྐུ་གཤེགས་དམ་པ་སའུ་ནན་ཌ་མཆོག་སྐུ་འཚོ་བཞུགས་སྐབས་ཀྱི་མཛད་རྗེས་ལ་བསྔགས་བརྗོད་དང་། དམ་པ་དེ་ཉིད་ཀྱི་རླབས་ཆེན་དགོངས་གཞི་མཐའ་དག་ལ་རྗེས་རབས་པ་དག་གིས་སློབ་སྦྱོང་ནན་ཏན་དང་། ལག་ལེན་རྒྱུན་འཁྱོངས་བྱ་དགོས་པའི་འབོད་སྐུལ་དང་སྦྲགས་ཏེ། འཛམ་གླིང་ཞི་བདེ་སྐོར་ལ་གསུང་བཤད་གནང་དོན། ཐེངས་འདིར་ང་རང་ལྕམ་སྐུ་དམ་པ་སའུ་ནན་ཌ་མཆོག་གི་རྗེས་དྲན་ཚོགས་འདུར་ཞུགས་ཐུབ་པ་གཟི་བརྗིད་ཆེན་པོ་རེད་དྲན་ཡོད། དམ་པ་སའུ་ནན་ཌ་མོ་རང་ལོ་ ༥༦ སྟེང་སྐུ་གྲོངས་པ་རེད། ཧ་ཅང་ལོ་ཆུང་ཆུང་རེད། སེམས་པ་སྐྱོ་བོ་ཞེ་དྲག་རེད། སྤྱིར་མི་སུ་འདྲ་ཞིག་ཡིན་ནའང་མི་ཚེ་ཚད་ཡོད་པ་ཞིག་ཡིན་ཡང་། མི་དེའི་རླབས་ཆེན་གྱི་དགོངས་པ་དང་ལྟ་གྲུབ། བརྩམས་ཆོས་དག་ནི་ལོ་ངོ་སྟོང་ཕྲག་རིང་གནས་པ་ཞིག་རེད། ངས་རྟག་པར་ང་རང་རྒྱ་གར་གྱི་སྐད་འཁྱེར་བ་ཡིན་ཟེར་གྱིན་ཡོད། དེ་ལས་གཞན་པའི་ང་ལ་དམིགས་བསལ་གྱི་ཁྱད་ཆོས་གང་ཡང་མེད། ངས་བཤད་ཀྱིན་པའི་འཚེ་བ་མེད་པའི་ལྟ་བ་དང་། བྱམས་སྙིང་རྗེ་རྩ་བར་གྱུར་བའི་ཞི་བདེ་ལས་དོན་དེ་དག་རྒྱ་གར་ནས་བོད་དུ་དར་བའི་སངས་རྒྱས་བཅོམ་ལྡན་འདས་ཀྱི་གསུང་དང་མཚན་ཉིད་རིག་པའི་ལྟ་གྲུབ་ལས་བྱུང་པ་ཤ་སྟག་རེད། མཐར་གཏུགས་ན་གནའ་བོའི་རྒྱ་གར་བའི་རིག་གཞུང་རེད། ཅེས་དང་།
ཁོང་གིས་མུ་མཐུད་དུ་གསུངས་དོན། དེ་རིང་འདིར་རྒྱ་གར་གྱི་གནད་ཡོད་མི་སྣ་མང་པོ་ཕེབས་འདུག་ལ། ཡུ་རོབ་ཁག་ནས་ཀྱང་འགའ་རེ་ཕེབས་ཡོད་ས་རེད། ངས་འདིར་བུད་མེད་དང་ཞི་བདེ་ཞེས་པའི་ཐོག་ལ་སྐད་ཆ་བཤད་ཀྱིན་ཡོད། ང་འཛམ་གླིང་ཞི་བདེ་ཟེར་བ་དེར་ལག་པ་འཆང་མཁན་ཞིག་དང་བསམ་བློ་གཏོང་མཁན་ཞིག་ཡིན་པའི་ཁུལ་རེད། དེང་སྐབས་ཞི་བདེ་ཟེར་བ་དེ་རིག་གསར་དང་། དེང་རབས་ཅན་གྱི་ཚིག་རྫིག་ཤོས་ཤིག་ཆགས་ཡོད། འཛམ་གླིང་གི་མཁས་དབང་ཁག་དང་དབུ་ཁྲིད་མང་པོ་ཞིག་གིས་ཀྱང་ཞི་བདེ་དང་ཞི་བདེ་ཟེར་གྱིན་ཡོད། འོན་ཀྱང་། ལག་ལེན་དངོས་ལ་དེ་ཙམ་དོ་སྣང་མེད་པ་ཞིག་ཆགས་འདུག ཞི་བདེ་ཟེར་བ་དེ་ཁ་ནས་བཤད་རྐྱང་བྱ་རྒྱུའི་ཚིག་སྐམ་པོ་ཙམ་ཞིག་མ་རེད། མི་རེ་ངོ་རེ་ནས་སོ་སོའི་སེམས་ལ་བཅང་དགོས་པ་ཞིག་རེད། མིའི་སེམས་ན་ཞི་བདེ་དང་བྱམས་སྙིང་རྗེ་མེད་ན། འདོད་ཆགས་དང་ཞེ་སྡང་། ང་རྒྱལ། ཁོང་ཁྲོ། འཚེ་བ་སོགས་མིའི་སེམས་ནས་བྱུང་བའི་བྱས་འབྲས་ཁོ་ན་རེད། མིའི་དགའ་སྐྱོ་ཆགས་སྡང་སོགས་ཀྱི་དབང་གིས་མི་དང་མིའི་བར། སྤྱི་ཚོགས་དང་ལུང་པའི་བར། ཐ་ན་རྒྱལ་ཁབ་དང་རྒྱལ་ཁབ་བར་བཅས་སུ་མི་གསོད་ཁྲག་སྦྱོར་དང་དམག་འཁྲུག་སོགས་ཀྱི་འཚེ་བའི་དོན་རྐྱེན་བསྟུད་མར་ཡོང་གིན་ཡོད། དེར་བརྟེན། ཐོག་མར་མི་སོ་སོས་རང་ཉིད་ཀྱི་སེམས་ལ་ཞི་བདེའི་རྨང་གཞི་བརྟན་པོ་ཞིག་ཚུགས་ཐུབ་པ་བྱ་དགོས། སེམས་སུ་བྱམས་བརྩེ་དང་ཞི་བདེ་ཡོད་ན། ཁོས་ལས་དོན་གང་ཞིག་སྒྲུབ་ཀྱང་ཞི་བདེ་ཡིས་ཟིན་པའི་འགུལ་སྐྱོད་ཅིག་ཆགས་ཡོད་ལ། ཐ་ན་ཁོ་ལས་བརྒྱུད་པའི་བྱ་བ་དག་ཀྱང་ཞི་བདེ་དང་འཚེ་བ་མེད་པའི་ཟིན་པ་ཞིག་ཡོང་གི་རེད། ཅེས་གསུངས་བྱུང་།
༧གོང་ས་མཆོག་གིས་མུ་མཐུད་དུ་ཞི་བདེ་ཐད་བུད་མེད་ཚོས་ནུས་པ་ཆེ་ཙམ་འདོན་ཐུབ་པའི་སྐོར་གསུངས་དོན། སྤྱི་ཡོངས་ཀྱི་ཆ་ནས་བཤད་ན། ཕོ་དང་མོ་གཉིས་ལས་ཞི་བདེ་དང་འཚེ་བ་མེད་པ། བྱམས་སྙིང་རྗེ་སོགས་བུད་མེད་ཚོར་ཅུང་ཤུགས་ཆེ་བ་མེད་དམ་སྙམ། གང་ཡིན་ཟེར་ན། འཛམ་གླིང་ནང་བྱུང་དང་འབྱུང་བཞིན་པའི་རྙོག་དྲ་དང་། དྲག་སྤྱོད། འཚེ་བའི་ལས་རིགས་བྱེད་མཁན་མང་ཆེ་ཤོས་སྐྱེས་པ་ཚོ་ཡིན་ཞིང་། འདས་པའི་དུས་རབས་ནང་འཛམ་གླིང་ནང་མི་གྲངས་ས་ཡ་ཉི་ཤུ་ལྷག་དྲག་སྤྱོད་ཀྱི་ལམ་ནས་རྐྱེན་ལམ་དུ་ཕྱིན་ཡོད། དེ་དག་མང་ཆེ་ཤས་སྐྱེས་པ་རེད། འཛམ་གླིང་རྒྱལ་ཁབ་ཁག་གི་དམག་འཁྲུག་རིམ་པར་ཆ་མཚོན་ན་ཡང་། དྲག་འཐབ་བྱེད་མཁན་གྱི་དམག་མི་ཚོ་སྐྱེས་པ་ཡིན་ལ། ཚེ་སྲོག་ཤོར་མཁན་དག་ཀྱང་སྐྱེས་པ་ཆགས་ཡོད། བུད་མེད་ཚོ་རང་བཞིན་གྱིས་སྐྱེས་པ་ལས་སེམས་གཉོམ་ཞིང་ཉམས་ཆུང་བ། ཧམ་སེམས་དང་ང་རྒྱལ་དེ་ཙམ་མེད་པ་བཅས་ལྷན་སྐྱེས་ཀྱིས་ཞི་བདེ་དང་། འཚེ་བ་མེད་པས་རྒྱུད་ཟིན་ཡོད་ཟེར་ཆོག་པ་རེད། དེར་བརྟེན། བུད་མེད་ཚོས་སྣེ་ཁྲིད་དེ་ཞི་བདེ་ལས་འགུལ་སྤེལ་རྒྱུ་གལ་ཆེན་པོ་རེད། སྤྱི་ཚོགས་ནང་ཐད་གར་ནུས་པ་ཐོན་མཁན་ཡང་བུད་མེད་ཚོ་ཆགས་ཡོད། ཅེས་གསུངས་བྱུང་།
སྐབས་དེར་གསར་འགོད་པའི་ལྡི་ལི་མཐོ་སློབ་བོད་ཁང་གི་འགན་འཛིན་ཀརྨ་འཕྲིན་ལས་ལགས་སུ་ཁྲིམས་དཔོན་འདས་པོ་སའུ་ནན་ཌ་མཆོག་གི་ལོ་རྒྱུས་སྐོར་བཅར་འདྲི་ཞུས་པར་ཁོང་གིས་ངོ་སྤྲོད་གནང་དོན། དེ་རིང་འདིར་རྒྱ་གར་གྱི་ཁྲིམས་དཔོན་ལྕམ་སྐུ་འདས་པོ་སའུ་ནན་ཌ་གྲོངས་ཏེ། རྗེས་དྲན་ཐེངས་བཅོ་ལྔ་བ་ཚོགས་ཀྱིན་ཡོད་པ་རེད། མོ་རང་སྔོན་ཆད་བུད་མེད་དང་ཞི་བདེ་སྐོར་ལ་ཕྱག་ལས་རླབས་ཆེན་མང་པོ་གནང་མཁན་ཞིག་ཡིན། སྔར་རྒྱ་གར་གྱི་སྲོལ་རྒྱུན་ནང་བུད་མེད་ལ་གཉའ་གནོན་དང་བརྙས་བཅོས། མཐོང་ཆུང་ཁྱད་གསོད་ཚད་ལས་འདས་པ་བྱེད་པའི་ལུགས་སྲོལ་མ་དག་ཅིག་ཡོད། དེ་དག་བཅོས་སྒྱུར་ཐད་མོ་རང་གིས་ཚོགས་པ་བཙུགས་ཏེ། སྐུ་ངལ་མང་པོ་སྐྱོན་ཞིང་གྲུབ་འབྲས་མངོན་གསལ་བླངས་ཡོད། མོ་རང་སྐུ་གྲོངས་རྗེས་མོའི་ཁྱོ་ག་དང་བྱིས་པ་དག་གིས་ཚོགས་པའི་ལས་དོན་མུ་མཐུད་རྒྱུན་འཁྱོངས་བྱས་ཏེ། སྤྱི་ཚོགས་ནང་བུད་མེད་ཀྱི་ཐོབ་ཐང་དང་ཞི་བདེ། ཤེས་ཡོན། འཕྲོད་བསྟེན། མིའི་ཀུན་སྤྱོད་སོགས་ལས་རིགས་མང་པོའི་ཐད་བྱ་འགུལ་རིམ་པ་སྤེལ་ཀྱིན་ཡོད། དེ་རིང་འདིར་རྒྱ་གར་དབུས་གཞུང་གི་གནད་ཡོད་མི་སྣ་མང་པོ་དང་། ལྷག་པར་དུ་ཁྲིམས་དཔོན་ཁག་ཕེབས་འདུག ང་ཚོ་ལྡི་ལི་མཐོ་སློབ་ཀྱི་འགན་འཛིན་དང་ལས་བྱེད། སློབ་ཕྲུག་གི་འཐུས་མི་བཅས་ཀྱང་མགྲོན་འབོད་བྱས་པ་ལྟར་བཅར་རྒྱུའི་གོ་སྐབས་བྱུང་སོང་། ཞེས་ངོ་སྤྲོད་གནང་བྱུང་།
ཡང་རྗེས་དྲན་གོ་སྒྲིག་གནང་མཁན་རྒྱ་གར་བ་སྐུ་ཞབས་ངྷར་མ་སེན་ཀའུ་ཞེ་ཁུ་ Dharamsingh Kaushik ལགས་སུ། ཐེངས་འདིའི་མཛད་སྒོའི་སྒུ་མགྲོན་གཙོ་བོར་༧གོང་ས་ཏཱ་ལའི་བླ་མ་མགྲོན་འབོད་གནང་དོན་གང་ཡིན་དང་། ༧གོང་ས་མཆོག་གི་གསུང་བཤད་ཐད་དགོངས་ཚུལ་གང་འདྲ་བྱུང་སྐོར་དྲིས་པར་ཁོས་བརྗོད་དོན། དེང་གི་དུས་འདིར་༧གོང་ས་ཏཱ་ལའི་བླ་མ་མཆོག་ནི་འཛམ་གླིང་ཡོངས་སུ་ཧ་ཅང་གི་གལ་གནད་ཆེ་བའི་མི་ཞིག་ཆགས་ཡོད་པ་མ་ཟད། ལྷག་པར་དུ་ང་ཚོ་རྒྱ་གར་གཞུང་དམངས་གཉིས་ལ་གཟི་བརྗིད་དང་སོ་ནམས་ཆེན་པོ་ཞིག་ཆགས་ཡོད། ད་ལྟའི་དུས་འདིར་རྒྱ་ནག་གཞུང་གིས་རྒྱ་གར་ལ་བཙན་འཛུལ་དང་གཉའ་གནོན་བྱ་རྒྱུའི་ཉེན་ཁ་ཆེན་པོ་ཞིག་ཏུ་སླེབས་ཡོད། ༧གོང་ས་ཏཱ་ལའི་བླ་མ་ནི་ང་ཚོ་སྲུང་སྐྱོབ་བྱེད་མཁན་གྱི་ལྕགས་རི་ལྟ་བུ་ཡིན། རྒྱ་གར་གཞུང་དམངས་ཀྱི་སེམས་འཚབ་དང་དངངས་སྐྲག་དེ་སེལ་དགོས་ན། སྔོན་ལ་བོད་རྒྱའི་གནད་དོན་ཐག་གཅོད་ཡོང་དགོས། ༧གོང་ས་ཏཱ་ལའི་བླ་མ་ནི་བོད་རྒྱའི་གནད་དོན་ཙམ་དུ་མ་ཟད། རྒྱ་གར་དང་རྒྱ་ནག་བར་གྱི་རྩོད་རྙོག་ཐོག་ལའང་མེད་དུ་མི་རུང་བ་ཞིག་ཆགས་ཡོད། ཅེས་དང་བརྗོད་བྱུང་།
མཇུག་མཐར་ཁོས་༧གོང་ས་མཆོག་གི་གསུང་བཤད་བརྒྱུད་དེ་ཁོ་རང་ལ་སེམས་ཚོར་ཅི་བྱུང་བརྗོད་དོན། ཏཱ་ལའི་བླ་མ་འདིར་ཕེབས་ཏེ། ཞི་བདེ་སྐོར་ལ་གསུང་བཤད་གནང་བ་དེས་ང་ལ་བློ་སྟོབས་དང་སྤོབས་པ་སྐྱེད་སོང་། ཏཱ་ལའི་བླ་མས་ཞི་བདེ་ཟེར་བ་དེ་ཁ་ནས་བཤད་རྒྱུ་ཙམ་མ་ཡིན་པར། མི་སོ་སོས་སེམས་ལ་འགྱུར་བ་བཏང་སྟེ་ཞི་བདེ་བསྐྲུན་པ་ཡིན་ན། རང་ཉིད་ཀྱི་ཁོར་ཡུག་གི་མི་ལ་ཤུགས་རྐྱེན་བཟང་པོ་ཐེབས་ལ། སྡེ་བ་ཚོ་བ་དང་སྤྱི་ཚོགས། རིམ་པས་རྒྱལ་ཁབ་དང་འཛམ་གླིང་ཡོངས་ཞི་བདེ་ཕྱོགས་སུ་བསྐྱོད་ཐུབ་པ་རེད། ཅེས་བཀའ་སློབ་ཟབ་མོ་གནང་བ་དེ་དག་གིས་ང་དང་ང་ལྟ་བུ་མང་པོ་ཞིག་ལ་ཡིད་འགུལ་ཐེབས་སུ་བཅུག་སོང་། ད་བར་སོ་སོར་ནུས་པ་དང་འཇོན་ཐང་གང་ཡང་མེད་སྙམ་པའི་བག་འཁུམ་གྱི་བསམ་བློ་དེ་ལ་སད་རྟོགས་བྱུང་སྟེ། མི་སུ་འདྲ་ཞིག་ཡིན་ནའང་འཛམ་གླིང་ཞི་བདེ་དང་། མི་ལ་ཕན་ཐོགས་པའི་ནུས་པ་འདུག་སྙམ་པའི་ངེས་ཤེས་སྐྱེས་བྱུང་། ཞེས་བརྗོད་བྱུང་།
༼ གསར་འགོད་པ་དོན་འགྲུབ་བཀྲ་ཤིས་ཀྱིས་རྒྱ་གར་རྒྱལ་ས་ལྡི་ལི་ནས་སྤེལ ༽