ང་དང་ང་འདྲ་བའི་འབྲེལ་ཡོད་སྲི་ཞུ་བ་རྣམས་ཀྱིས་ད་ལྟའང་ལག་བསྟར་མ་ཐུབ་པ་དེ་ནི་ངོ་གནོང་དགོས་པ་ཞིག་དང་། རང་སྐྱོན་ངོས་ལེན་བྱེད་དགོས་པ་ཞིག་ཡིན་སྟབས། ༧གོང་ས་སྐྱབས་མགོན་ཆེན་པོ་མཆོག་དང་། བོད་རིགས་མང་ཚོགས་ལ་བཟོད་གསོལ་ཞུ་རྒྱུ་ཙམ་ལས་བྱ་ཐབས་བྲལ་ཅེས་བཀའ་ཁྲི་མཆོག་གིས་ཤེས་རིག་ཚོགས་ཆེན་སྟེང་གསུངས།
ཕྱི་ཚེས་ ༢༧ ཉིན་གྱི་ཤེས་རིག་ཚོགས་ཆེན་སྟེང་བཀའ་ཁྲི་མཆོག་གིས་བཀའ་ཤག་གི་གསུང་བཤད་སྒྲོག་སྦྱོང་གནང་སྐབས་ཤེས་ཡོན་སྲིད་བྱུས་ཀྱི་ཐོག་ལ་སྔ་མོ་ནས་༧གོང་ས་མཆོག་གིས་ལམ་སྟོན་བཀའ་སློམ་རིམ་པར་གནང་ཡོད་ཀྱང་སྲི་ཞུ་བ་རྣམས་ཀྱིས་དེ་དག་ལག་བསྟར་མ་ཐུབ་པའི་ཐད་ཐུགས་འགྱོད་ཀྱི་གསུང་བཤད་ཀྱང་གནང་ཡོད། བཀའ་ཁྲི་མཆོག་གིས། ༡༩༦༤ ལོར་ཤེས་རིག་ཚོགས་ཆེན་ཐེངས་དང་པོ་འཚོགས་པ་ནས་བཟུང་ད་བར་དུ་ཤེས་ཡོན་སློབ་གསོའི་ཐོག་བཀའ་སློབ་ཡང་ཡང་རྒྱུན་མར་ཕེབས་ཡོད་ཀྱང་། ང་དང་ང་འདྲ་བའི་འབྲེལ་ཡོད་སྲི་ཞུ་བ་རྣམས་ཀྱིས་ད་ལྟའང་ལག་བསྟར་མ་ཐུབ་པ་དེ་ནི་ངོ་གནོང་དགོས་པ་ཞིག་དང་། རང་སྐྱོན་ངོས་ལེན་བྱེད་དགོས་པ་ཞིག་ཡིན་སྟབས། ༧གོང་ས་སྐྱབས་མགོན་ཆེན་པོ་མཆོག་དང་། བོད་རིགས་མང་ཚོགས་ལ་བཟོད་གསོལ་ཞུ་རྒྱུ་ཙམ་ལས་བྱ་ཐབས་བྲལ་ཅེས་གསུངས་ཡོད།
བཀའ་ཁྲི་མཆོག་གིས་གསུངས་དོན། ཚང་མས་མཁྱེན་གསལ་ལྟར་བཙན་བྱོལ་གཞུང་མང་གཉིས་ཀའི་བསྒྲུབ་བྱའི་ལས་འགན་གལ་ཆེ་ཤོས་གཅིག་ནི་བཙན་བྱོལ་དུ་ཡོད་པའི་བོད་རིགས་ན་གཞོན་རྣམས་ལ་ཤེས་ཡོན་སློབ་སྦྱོང་ཚད་ལྡན་སྤྲོད་རྒྱུ་དེ་ཡིན་པ་དང་། དེ་ནི་བོད་མི་རིགས་ཀྱི་ཕུགས་དམིགས་སྒྲུབ་པའི་ཐབས་ལམ་གཅིག་པུ་ཡིན་པར་མ་ཟད། ཕན་བདེའི་འབྱུང་གནས་ཚང་ལ་མ་ནོར་བའི་བོད་བརྒྱུད་ནང་བསྟན་དང་། དེའི་ལེགས་བྱང་སྲུང་སྐྱོབ་རྒྱུན་འཛིན་ཁྱབ་སྤེལ་བྱ་རྒྱུ་བཅས་ཀྱི་བརྒྱུད་ལམ་ཡང་ཡིན་ཁར། བྱ་བ་དེ་མཐའ་གཅིག་ཏུ་གཞན་དབང་སྟབས་བསྟུན་མ་དགོས་པར་ང་ཚོས་སྒྲུབ་ནུས་པ་ཞིག་ཀྱང་ཡིན། དོན་གྱི་དབང་འདི་ལ་གཟིགས་ནས་༧གོང་ས་མཆོག་གིས་བཙན་བྱོལ་དུ་ཞབས་སོར་འཁོད་མ་ཐག་བོད་རིགས་ན་གཞོན་རྣམས་ལ་སྲོལ་རྒྱུན་དང་། དེང་རབས་གཉིས་འཛོམས་ཀྱི་སློབ་སྦྱོང་བྱ་ཡུལ་བོད་མིའི་གཞི་རིམ་སློབ་གྲྭ་ཟུར་འཛུགས་གནང་རྒྱུའི་མཛད་འཕྲིན་རླབས་ཆེན་བསྐྱངས་པ་མ་ཟད། སྐབས་དེའི་མཛད་གཙོ་རྣམ་པས་ཀྱང་༧གོང་ས་མཆོག་གི་བླ་ན་མེད་པའི་ལམ་སྟོན་གཞིར་བཟུང་སྟེ། དུས་ཡུན་ཐུང་ངུའི་ནང་བོད་སློབ་ཁག་མང་པོ་གསར་འཛུགས་དང་བོད་རིགས་དགེ་རྒན་རྣམས་ལ་དེང་རབས་དང་མཐུན་པའི་འོས་སྦྱོང་། སློབ་ཁག་ཡོངས་ལ་ཆོས་དགེ་ཚད་ལྡན་བསྐོ་འཛུགས་གནང་བ་སོགས་འབོད་བརྩོན་ཤུགས་བསྐྱེད་གནང་འབྲས་སུ། ༡༩༦༤ ལོའི་ཤེས་རིག་ཚོགས་ཆེན་ཐེངས་དང་པོའི་ཐོག་བཙན་བྱོལ་དུ་འབྱོར་མ་ཐག་པའི་ལོ་ལྔའི་རིང་བོད་མིའི་ཤེས་ཡོན་སློབ་སྦྱོང་གི་ལས་དོན་ཐོག་གསར་གཏོོད་དང་ཡར་རྒྱས་ཀྱི་གྲུབ་འབྲས་རླབས་ཆེན་གཟིགས་ལམ་དུ་གྱུར་པ་མ་ཟད། འབྱུར་འགྱུར་གྱི་འཆར་གཞི་ཕུགས་དམིགས་ལྡན་པའང་མང་པོ་སྒྲིག་གཤོམ་གནང་ཐུབ་པ་བྱུང་ཡོད། སྐབས་དེར་གྲོས་གཞི་དོན་ཚན་ལྔའི་ཐོག་འཇོག་གནང་མཛད་པའི་གྲོས་ཆོད་ཀྱི་འབྲུ་དོན་ཇི་སྙེད་ཅིག་ད་ལྟའང་འབྲེལ་ཆགས་མ་ཟད། འགའ་ཤས་ད་དུང་ལག་བསྟར་མ་ཐུབ་པའང་འདུག སྐབས་དེར་༧གོང་ས་མཆོག་གིས་སོ་སོ་རང་གི་མི་རིགས་ཀྱི་ཁྱད་ཆོས་དང་གཟི་བརྗིད་མ་ཉམས་པ་ཞིག་ངེས་པར་བྱ་དགོས། ཞེས་སོགས་ལམ་སྟོན་བཀའ་སློབ་ཞིབ་གསལ་གནང་བ་མ་ཟད། རྗེས་སུའང་ཕྱོགས་མཚུངས་ཀྱི་བཀའ་སློབ་རྒྱུན་མར་ཕེབས་ཡོད་ཀྱང། ང་དང་ང་འདྲ་བའི་འབྲེལ་ཡོད་སྲི་ཞུ་བ་རྣམས་ཀྱིས་ད་ལྟའང་ལག་བསྟར་མ་ཐུབ་དེ་ནི་ངོ་གནོང་དགོས་པ་ཞིག་དང་། རང་སྐྱོན་ངོས་ལན་བྱེད་དགོས་པ་ཞིག་ཡིན་སྟབས། ༧གོང་ས་མཆོག་དང་བོད་རིགས་མང་ཚོགས་ལ་གཟོད་གསོལ་ཞུ་རྒྱུ་ཙམ་ལས་བྱ་ཐབས་བྲལ། ཅེས་གསུང་བྱུང་ལ། ཡང་ཁོང་གིས། བཙན་བྱོལ་དུ་འབྱོར་ཏེ་དང་ཐོག་ལོ་གྲངས་བཅུ་ཕྲག་ཙམ་གྱི་རིང་ཤེས་ཡོན་གྱི་ལས་དོན་གང་ཅིར་ཚ་ཚ་འུར་འུར་ལྟ་བུའི་གྲུབ་འབྲས་མི་དམན་པ་ཙམ་བྱུང་ཡོད་ཀྱང། རིམ་བཞིན་ལས་ཀྱི་སྣེ་མོ་བ་དང་། སློབ་ཕྲུག། ཕ་མ་བཅས་སོ་སོའི་འཚོ་ཐབས་ཀྱི་མདུན་ལམ་འགྲིགས་ཙམ་བྱུང་སྐབས་བོད་མི་རིགས་ཀྱི་ཕུགས་རྒྱང་རིང་པོའི་དམིགས་ཡུལ་རྣམས་རིམ་བཞིན་བརྗེད་པ་དང་། ཤེས་ཡོན་སློབ་སྟོན་གྱི་ལས་དོན་རྣམས་ཀྱང་འཆར་ཅན་ཆོ་ག་ཕྱག་ལེན་གྱི་རྣམ་པར་གྱུར་ནས་ཕྱི་ལོ་ ༡༩༧༠ དཀྱིལ་ཙམ་ནས་འཐུས་ཤོར་འགྲོ་མགོ་ཚུགས་ཏེ་བར་སྐབས་གཞི་རིམ་ཤེས་ཡོན་གྱི་གནས་ཚད་དང་། ཡ་རབས་བཟང་སྤྱོད་ཆེས་ཉམས་དམས་སུ་གྱུར་སྟབས། བརྒྱད་ཅུ་གྱ་གྲངས་ནས་བཟུང་དཀའ་ངལ་འདིའི་སྐོར་དབུ་ཁྲིད་རྣམ་པ་དང་། སྲི་ཞུ་ལས་བྱེད། དགེ་རྒན། སློབ་ཕྲུག ཕ་མ་ཡོངས་ལ་ཚོར་སྣང་གསལ་བོར་བྱུང་ཡོད་པར་མ་ཟད། གང་དགའ་ཅི་ལེགས་ཀྱི་གྲོས་བསྡུར་བགྲོ་གླེང་སྔ་རྗེས་སུ་གནང་འདུག་ཀྱང་དོན་ཕན་ལྡན་པའི་ཐབས་བྱུས་ལག་བསྟར་ཐུབ་པ་དམིགས་བསལ་མ་བྱུང་ཅེས་གསུངས།
དེ་བཞིན་བཀའ་ཁྲི་མཆོག་གིས་ཐེངས་འདིའི་ཚོགས་ཆེན་དང་འབྲེལ་ནས་གསུངས་དོན། ད་ལྟའི་གནས་སྐབས་འདིར་བཙན་བྱོལ་བོད་གཞུང་གིས་འབད་བརྩོན་བྱ་དགོས་པ་ནི་བོད་མིའི་ཤེས་ཡོན་སྲིད་བྱུས་ཆ་ཚང་ལག་བསྟར་ཐུབ་ཐབས་དང་། དེ་དག་ལག་བསྟར་གནང་མཁན་གྱི་དགེ་རྒན་ཚད་ལྡན་འདང་ངེས་ཡོང་ཐབས་བྱ་རྒྱུ་དེ་ཡིན། དེའི་ཆེད་བཙན་བྱོལ་བོད་གཞུང་ཤེས་རིག་ལས་ཁུངས་ཀྱི་ངོས་ནས་བསྒྲུབ་དགོས་པ་དང་བསྒྲུབ་ཐུབ་པའི་རིགས་ད་བར་གང་ཐུབ་འབད་རྩོན་ཞུ་མུས་མ་ཟད། འབྱུང་འགྱུར་ཡང་མུ་མཐུད་ཞུ་རྒྱུའི་གྲ་སྒྲིག་དང་ཆོད་སེམས་བརྟན་པོ་ཡོད། ང་ཚོའི་ཤེས་ཡོན་གྱི་ལམ་སྲོལ་ནི་དགེ་རྒན་དབུས་སུ་བཞག་པ་ཞིག་ཡིན་སྟབས། སློབ་གྲྭའི་འཛིན་སྐྱོང་དང་སྒྲིག་འཛུགས། ཕྲུ་གུ་དང་ཕ་མ་བཅས་ལས་ཀྱང་དགེ་རྒན་རྣམ་པ་གལ་གནད་ཆེ་བ་ཡིན་ཞིང་། དགེ་རྒན་ཚོར་ཤེས་ཡོན་སྲིད་བྱུས་ཀྱི་གོ་རྟོགས་དང་ཡིད་ཆེས་ཡོད་ན་འཛིན་སྐྱོང་གིས་ཤེས་ཡོན་སྲིད་བྱུས་ལག་སྟར་བྱས་པའི་ངོས་ལེན་མེད་ཀྱང་། སྲིད་བྱུས་ཀྱི་སྙིང་དོན་ལག་བསྟར་ཐུབ་རྒྱུ་ཞིག་ཡིན། ད་རེབ་ཚོགས་ཆེན་འདིའི་ཐོག་ནས་བཀའ་ཤག་གིས། ༡༽ བཙན་བྱོལ་བོད་མིའི་གཞི་རིམ་ཤེས་ཡོན་གྱི་སྲིད་བྱུས་ལ་སློབ་སྤྱི་དང་། དགེ་ཆེ། དགེ་རྒན་རྣམ་པའི་གཟིགས་ཚུལ་དང་གོ་རྟོགས། ཡིད་ཆེས་ཇི་ཙམ་ཡོད་མེད་ཤེས་རྟོགས་ཐུབ་པ་བྱ་རྒྱུ་དང་། ༢༽ ཤེས་ཡོན་སྲིད་བྱུས་སྐོར། བཙན་བྱོལ་བོད་མིའི་ཁྲོད་དང་། ལྷག་པར་ཤེས་ཡོན་གྱི་ལམ་སྲོལ་ལ་མཁྱེན་མྱོང་ཡོད་པའི་མཁས་དབང་འགའ་ཞིག་གིས་སྐྱོན་བརྗོད་དྲིལ་བསྒྲགས་ཇི་སྙེད་ཅིག་གནང་གི་ཡོད་པ་དེ་དག་གི་དགོངས་གཞི་དང་། རྒྱུ་མཚན་གཙོ་བོ་གང་ཡིན་ཤེས་རྟོགས་ཐུབ་པ་བྱ་རྒྱུ། ༣༽ ད་ལྟའི་ཤེས་ཡོན་སྲིད་བྱུས་འདི་བཞིན་ཡོངས་གྲགས་ཕྱག་བསྟར་གནང་སྐབས་དང་། ཡང་ན་འཛིན་སྐྱོང་གི་ངོས་ནས་ཡོངས་གྲགས་ཕྱག་བསྟར་མ་གནང་ཡང་དགེ་རྒན་སོ་སོས་སྲིད་བྱུས་ཀྱི་སྙིང་དོན་ཕྱག་བསྟར་གནང་སྐབས་དངོས་ཡོད་དཀའ་ངལ་དང་། འགལ་རྐྱེན་གང་དང་གང་གཟིགས་པ་རྣམས་གསལ་རྟོགས་ཐུབ་པ་བྱ་རྒྱུ། ༤༽ འབྱུང་འགྱུར་བོད་རིགས་ན་གཞོན་ནང་རིག་གཅིག་རྐང་འཛིན་དང་ཆེད་ལས་པ་ཚད་ལྡན་གང་མང་འཐོན་ཐབས་བྱེད་ཕྱོགས་ཇི་དགེའི་སྐོར་སློབ་སྤྱི་དང་དགེ་རྒན་རྣམ་པའི་དགོངས་འཆར་ཇི་ཡོད་ཤེས་རྟོགས་ཐུབ་པ་བྱ་རྒྱུ་བཅས་ཀྱི་གྲུབ་འབྲས་ཁག་འཐོན་པའི་རེ་བ་བྱེད་ཀྱིན་ཡོད་ཅེས་གསུངས་སོང་།