ང་ཚོས་ “བྱེད་མི་རུང་བ་བཞི” ལ་སློབ་སྦྱོང་བྱ་རྒྱུ་ཡིན།

ཡོང་རྒྱུའི་ཉིན་ཟླའི་ནང་ང་ཚོས་རྒྱ་ནག་གཞུང་གིས་གླེང་སློང་བྱས་པའི་གནད་དོན་སྤྱི་དང༌། ལྷག་པར་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་གྲོས་རིམ་ཁག དེ་བཞིན་ “བྱེད་མི་རུང་བ་བཞིབཅས་ལ་སློབ་སྦྱོང་བྱ་རྒྱུ་ཡིན། ཚོགས་གྲོས་སྐབས་ནན་ཞུ་བྱས་པ་ལྟར། རྒྱ་ནག་གི་དབུ་ཁྲིད་རྣམས་ཀྱིས་ཀྱང་ང་ཚོས་གླེང་སློང་བྱས་པའི་གནད་དོན་ཁག་གི་ཐོག་བསམ་ཞིབ་ནན་ཏན་གནང་བའི་རེ་བ་ལྷག་བསམ་རྣམ་དག་གིས་བྱེད་ཀྱི་ཡོད། ཅེས་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་གྱིས་གསུངས་ཡོད།  

 

བོད་རྒྱ་འབྲེལ་མོལ་ཐེངས་དགུ་བའི་སྐོར་གྱི་གནས་ཚུལ་ཁག་ཕྱི་ཚེས་ ༢ ཉིན་ཡོངས་ཁྱབ་གསར་འགོད་གསལ་བསྒྲགས་བསྐྱངས་ཡོད་ལ། གསལ་བསྒྲགས་དེའི་ནང་ཐེངས་འདིའི་གྲོས་མོལ་གྱི་ལས་རིམ་སྐོར་བཀོད་དོན། ང་ཚོས་པེ་ཅིང་དུ་ཕྱི་ཟླ་ ༡ ཚེས་ ༣༠ ཉིན་རྒྱ་ནག་རྒྱལ་ཡོངས་ཆབ་སྲིད་གྲོས་མོལ་ཚོཌ་འདུའི་གཙོ་འཛིན་གཞོན་པ་དང༌། དབུས་འཐབ་ཕྱོགས་གཅིག་གྱུར་ལས་ཁང་གི་བློན་ཆེན་ཏུའུ་ཆིན་ལིན་མཉམ་ཟུར་ཚོགས་དང༌། ཕྱི་ཚེས་ ༣༡ ཉིན་དབུས་འཐབ་ཕྱོགས་གཅིག་གྱུར་ཁང་གི་རྒྱུན་ལས་བློན་ཆེན་གཞོན་པ་ཀྲུའུ་ཝེ་ཆོན་དང་དང་བློན་ཆེན་གཞོན་པ་སྲི་ཐར་ལྷན་གྲོས་བསྡུར་བྱས། སྐབས་དེ་དག་ཏུ་བོད་རང་སྐྱོང་ལྗོངས་ཟེར་བའི་མི་དམངས་འཐུས་མིའི་ཚོགས་འདུའི་གོ་འཛིན་གཞོན་པ་ཉི་མ་ཚེ་རིང་ཡང་མཉམ་ཞུགས་བྱས་ཡོད། ང་ཚོ་ཐོག་མར་ཧུའི་ནན་ཞིང་ཆེན་གྱི་རྒྱལ་ས་ཁྲང་ཧྲར་ཕྱི་ཟླ་ ༡ ཚེས་ ༢༦ ཉིན་འབྱོར་བ་དང༌། དེར་ང་ཚོའི་ལས་དོན་ཞུ་སྒོ་ཁག་གོ་འཛུགས་མ་བྱས་གོང་དེ་སྔ་ཕྱི་ལོ་ ༢༠༠༨ ཟླ་ ༡༡ པར་འབྲེལ་མོལ་ཐེངས་བརྒྱད་པ་བསྐྱངས་སྐབསབོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཕུལ་བ་དང་འབྲེལ་ཆགས་ཚིག་ཐོ་ཞིག་དབུས་འཐབ་ཕྱོགས་གཅིག་གྱུར་ལས་ཁང་ལ་འབུལ་ལམ་ཞུས་ཤིང༌། ཚིག་ཐོ་དེའི་ནང་དུ་དོན་ཚན་བདུན་འཁོད་ཡོད་པ་དེ་དག་གིས་འབྲེལ་མོལ་ཐེངས་བརྒྱད་པའི་སྐབས་རྒྱ་ནག་གི་གོ་ཁྲིད་ཚན་ཁག་ནས་བཏོན་པའི་གཞི་རིམ་གྱི་གནད་དོན་ཁག་གི་ཐོག་གསལ་བཤད་དང་སྦྲགས། ད་ཡོད་འབྲེལ་མོལ་གྱི་ལས་རིམ་འདི་དག་འབྱུང་འགྱུར་ལམ་ཕྱོགས་གང་འདྲ་ཞིག་ཏུ་བསྐྱོད་དགོས་པ་བརྡ་སྟོན་བྱེད་པའི་སྒྲུབ་ཕྱོགས་ཀྱི་བསམ་འཆར་འགའ་ཤས་བཏོན་ཡོད། ཅེས་བཀོད་འདུག

 

ཐེངས་འདིར་རྒྱ་གཞུང་ལ་སྤྲད་པའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་ཆར་དང་འབྲེལ་བའི་ཚིག་ཐོ་དེའི་ནང་དོན་ཁག་གསལ་བཤད་བྱས་དོན། ཚིག་ཐོ་དོན་ཚན་བདུན་པོ་དེ་དག་ནང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་མངའ་ཁུལ་བདག་དབང་དང་ས་ཁུལ་གོང་བུ་གཅིག་གྱུར་ལ་བརྩི་སྲུང་བྱ་རྒྱུ་དང༌། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ལ་བརྩི་སྲུང་བྱ་རྒྱུ། “རྒྱུན་འཁྱོངས་བྱེད་དགོས་པ་གསུམ་ལ་བརྩི་སྲུང་ཞུ་རྒྱུ། རྒྱ་ནག་དབུས་གཞུང་གི་སྲིད་འཛིན་དབང་ཆ་དང༌། དེའི་རིམ་པ་བཅས་ལ་བརྩི་སྲུང་བྱ་རྒྱུ། རང་སྐྱོང་སྐོར་གྱི་བསམ་འཆར་ནང་གསལ་བའི་དབང་ཆ་དབྱེ་བགོ་དང་འབྲེལ་བའི་དམིགས་བཀར་དོན་གནད་གང་གི་ཐོག་རྒྱ་ནག་གཞུང་ལ་སེམས་འཚབ་ཡོད་ཁག གནད་དོན་སྙིང་པོ་ངོས་འཛིན་ཐུབ་པ་བྱ་རྒྱུ། དེ་བཞིན་གཉིས་སྨན་གྱི་ཐག་གཅོད་ཅིག་ཡོང་བར་ྋགོང་ས་མཆོག་ནས་མཐུན་འགྱུར་གནང་འདུན་ཡོད་སྐོར་སོགས་ཚུད་ཡོད། གོང་གསལཚིག་ཐོའི་ནང་ྋགོང་ས་མཆོག་དང༌། བཙན་བྱོལ་གཞུང་གི་གོ་ཁྲིད་མི་སྣ་གཞན་དག་ལ་སྒེར་གྱི་དགོས་འདུན་ཞུ་འཆར་གང་ཡང་མེད་པ་གསལ་སྟོན་བྱས་ཡོད། ྋགོང་ས་མཆོག་གི་ཐུགས་འཚབ་གནང་གཞི་གཙོ་བོ་བོད་རྒྱ་ཆེའི་མི་མང་གི་ཐོབ་ཐང་དང་བདེ་དོན་ཡིན། དེར་བརྟེན་ཐག་གཅོད་བྱདགོས་པའི་གཞི་རིམ་གྱི་གནད་དོན་ནི་ཁ་ཞེ་གཉིས་མེད་ཀྱི་སྒོ་ནས་དོན་དམ་གྱི་རང་སྐྱོང་ལག་ལེན་དོན་འཁྱོལ་བྱ་དགོས་པ་དེ་ཡིན་ཞིང༌། དེས་བོད་མི་ཚོར་སོ་སོའི་རྣམ་དཔྱོད་དང༌། དགོས་མཁོར་བསྟུན་ཏེ་རང་གིས་རང་ལ་འཛིན་སྐྱོང་བྱེད་ཐུབ་པ་ཞིག་ཡོང་རྒྱུ་རེད། ཅེས་བསྟན་འདུག

 

གསལ་བསྒྲགས་ནང་མུ་མཐུད་བཀོད་དོན། ྋགོང་ས་མཆོག་གིས་བོད་མི་མང་གི་ངོ་ཚབ་གནང་སྟེ་བཀའ་མོལ་གནང་གིན་ཡོད། ཁོང་དང་བོད་རྒྱ་ཆེའི་མི་མང་བར་ལོ་རྒྱུས་ཀྱི་འབྲེལ་བ་གཏིང་ཟབ་ཡོད་པ་དེ་དག་ཡོངས་སུ་ཡིད་ཆེས་ལ་གཞི་རྟེན་བྱས་ཡོད་པ་ཡིན། ྋགོང་ས་མཆོག་གིས་བོད་མི་མང་གི་ཁྲིམས་མཐུན་ངོ་ཚབ་མཚོན་ཐུབ་ཀྱི་ཡོད་པ་དེ་ནི་རྩོད་དུ་མེད་པའི་གནས་ཚུལ་ཞིག་ཡིན་ལ། བོད་མི་རྣམས་ཀྱིས་ཀྱང་ཁོང་ཉིད་བོད་རྒྱ་ཆེའི་མི་མང་གི་སྐུ་ཚབ་བམ། མགྲིན་ཚབ་པ་དངོས་དེ་ཡིན་པའི་ལྟ་ཚུལ་འཛིན་གྱིན་ཡོད། དེར་བརྟེན་བོད་ཀྱི་གནད་དོན་ཐག་གཅོད་ཐུབ་པར་ྋགོང་ས་མཆོག་དང་འབྲེལ་མོལ་ཞུ་བའི་ཐབས་ཤེས་འདི་ཁོ་ན་མ་བརྟེན་མཐུ་མེད་ཡིན་པའི་དངོས་དོན་འདི་ངོས་འཛིན་ཐུབ་པ་དགོས་རྒྱུ་གལ་ཆེན་པོ་ཡིན། ཅེས་དང་།

 

ད་རེས་ང་ཚོས་དོན་ཚན་འདི་ནན་བཤད་བྱས་པ་སྟེ། ྋགོང་ས་མཆོག་གིས་བོད་ཀྱི་རྩ་དོན་ཐོག་ཐུགས་ཁུར་བསྐྱེད་བཞེས་གནང་བ་ནི་གང་ཉིད་ྋསྐུ་སྒེར་གྱི་ཐོབ་ཐང་དང༌། ཆབ་སྲིད་ཀྱི་གོ་གནས་རྩོད་ཆེད་དམ། ཡང་ན་བཙན་བྱོལ་བོད་གཞུང་གི་ཁེ་ཕན་རྩོད་རྒྱུའི་ཐབས་ཤེས་བྱས་པ་ཞིག་མིན་པ་དེ་ཡིན། དེ་བཞིན་རྒྱ་ནག་གཞུང་གི་ཕྱོགས་ནས་ྋགོང་ས་མཆོག་ལ་ཁ་བྲལ་བ་ཞེས་མཚན་འདོགས་ཞུ་རྒྱུས་མཚོན་གཞི་མེད་ཁུངས་བྲལ་གྱི་སྐྱོན་བརྗོད་ཞུ་རྒྱུ་མཚམས་འཇོག་བྱ་དགོས་པ་དང༌། བོད་ཀྱི་དཀའ་རྙོག་ཐད་ རང་སྐྱོང་སྐོར་གྱི་བསམ་འཆར་གཞིར་བཟུང་གཉིས་མོས་ཀྱི་འགྲིག་ཐབས་ཤིག་འཚོལ་སླད་ཁོང་དང་མཉམ་ལས་གནང་དགོས་པའི་རེ་སྐུལ་ཞུས་པ་ཡིན། འདིས་བརྟན་ལྷིང་དང༌། ཆིག་བསྒྲིལ། འཆམ་མཐུན་གྱི་སྤྱི་ཚོགས་འཛུགས་སྐྲུན་བྱ་རྒྱུ་བཅས་འགན་སྲུང་བྱ་ཐུབ་ཀྱིན་ཡོད། ཅེས་བཀོད་འདུག

 

རྒྱ་གཞུང་གི་བྱེད་སྟངས་ཁག་ཅིག་ལ་མོས་མཐུན་དང་བསྔགས་བརྗོད་ཡོད་སྐོར་བཀོད་དོན། རྒྱ་ནག་གཞུང་གི་ཕྱོགས་ནས་ཁོང་ཚོའི་ལངས་ཕྱོགས་གསལ་སྟོན་ཆེད། “བྱེད་མི་རུང་བ་བཞིཞེས་པ་ཞིག་བཏོན་པར་མ་ཟད། བོད་དང་འབྲེལ་ཡོད་ཉེ་ལམ་གྱི་འགྱུར་འགྲོས་སྤྱི་དང༌། ལྷག་པར་གལ་ཆེའི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་སྐོར་ཞིབ་ཕྲའི་འགྲེལ་བཤད་གནང་སྐབས་བཞུགས་མོལ་ཚོགས་འདུའི་ཐོག་ནས་བོད་རང་སྐྱོང་ལྗོངས་ཟེར་བ་དང༌། བོད་རིགས་ས་ཁུལ་གཞན་དག་ཏུ་ཡོད་པའི་བོད་མིའི་འཚོ་ཐབས་སྤྱི་དང༌། ལྷག་པར་ཤེས་ཡོན་དང༌། སྨན་བཅོས་འཕྲོད་བསྟེན། ཁོར་ཡུག་སྲུང་སྐྱོབ་སོགས་མང་ཚོགས་ཀྱི་ཞབས་ཞུའི་ལས་རིགས་ཁག་ཡར་རྒྱས་གཏོང་རྒྱུའི་ཐག་གཅོད་བྱུང་སྐོར་བརྗོད་བྱུང༌། ང་ཚོས་བཞུགས་མོལ་ཚོགས་འདུའི་སྐོར་ཐོག་མའི་གནས་ཚུལ་ཐོས་པར་གཞིགས་ཏེ་བོད་མི་སྤྱི་དང༌། ལྷག་པར་གྲོང་གསེབ་ཁུལ་གྱི་བོད་མིའི་འཚོ་བའི་གནས་སྟངས་ཡར་རྒྱས་གཏོང་རྒྱུའི་གནད་དོན་ལ་བཀའ་བསྡུར་བྱུང་ཡོད་པ་དེར་དགའ་བསུ་ཞུས་པ་ཡིན། དོན་དངོས་ཐོག་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་ཐོག་བོད་རང་སྐྱོངས་ལྗོངས་དང༌། བོད་རིགས་ས་ཁུལ་གཞན་དག་བཅས་བོད་ཀྱི་ས་ཁུལ་ཡོངས་སུ་རྫོགས་པའི་ནང་འཛུགས་སྐྲུན་ཡར་རྒྱས་གཏོང་རྒྱུའི་གནད་དོན་སྐོར་བསམ་ཞིབ་གྲོས་བསྡུར་བྱས་ཡོད་པར་དགའ་བསུ་ཞུ་རྒྱུ་དང༌། བོད་ཀྱི་ས་ཁུལ་ཡོངས་རྫོགས་ངེས་པར་དུ་འཛིན་སྐྱོང་གོང་བུ་གཅིག་གི་འོག་བཅུག་སྟེདེ་དག་ཐོག་གཅིག་གྱུར་གྱི་སྲིད་བྱུས་ཤིག་ལག་བསྟར་བྱ་དགོས་པ་དེར་ང་ཚོས་ཡིད་ཆེས་བརྟན་པོ་བྱེད་ཀྱིན་ཡོད། གལ་སྲིད་ཆབ་སྲིད་ཀྱི་འབོད་ཚིག་ཁག་དོར་ཚེ། བཞུགས་མོལ་ཚོགས་འདུའི་ཐོག་བཀའ་བསྡུར་བྱུང་བའི་གནད་དོན་གལ་ཆེན་མང་པོ་ཞིག་ང་ཚོས་རང་སྐྱོང་གི་བསམ་འཆར་ནང་གསལ་སྟོན་བྱས་པའི་གཞི་རྩའི་བོད་མི་མང་གི་དགོས་མཁོ་ཁག་དང་གཅིག་མཚུངས་ཡིན་འདུག ཅེས་བཀོད་འདུག

 

གསལ་བསྒྲགས་ནང་མུ་མཐུད་དེ་ད་ལྟའི་འགལ་བ་ཆེ་ཤོས་དང་། འབྱུང་འགྱུར་ཕྱོགས་གཉིས་ཀྱིས་འབད་བརྩོན་འོག་དེ་དག་སེལ་ཐབས་བྱེད་ཕྱོགས་བསྟན་དོན། ཕྱོགས་གཉིས་བར་གྱི་འགལ་ཟླ་ཆེ་གྲས་ཤིག་ནི་ད་ལྟའི་བོད་ནང་གི་གནས་སྟངས་ཐད་ལྟ་ཚུལ་མི་མཐུན་པ་ཡོང་གི་ཡོད་པ་དེ་རེད། དེར་བརྟེན་དངོས་ཡོད་ཀྱི་གནས་སྟངས་ཐད་ཐུན་མོང་གི་ཤེས་རྟོགས་ཤིག་ཡོང་ཆེད་ང་ཚོས་དངོས་ཐོག་བདེན་འཚོལ་གྱི་བསམ་བློའི་ཐོག་ནས་ཐུན་མོང་གི་འབད་བརྩོན་བྱས་པ་བརྒྱུད་ས་གནས་ས་ཐོག་གི་གནས་སྟངས་ལ་བལྟ་ཞིབ་བྱེད་དགོས་པའི་བསམ་ཚུལ་བཏོན་པ་ཡིན། འདིས་ཕྱོགས་ཕན་ཚུན་གཉིས་ཀར་རང་རང་གི་རྩོད་གཞི་ལས་བརྒལ་ཏེ་འགྲོ་ཐུབ་པའི་ཕན་གྲོགས་བྱ་རྒྱུ་ཡིན། ཡོང་རྒྱུའི་ཉིན་ཟླའི་ནང་ང་ཚོས་རྒྱ་ནག་གཞུང་གིས་གླེང་སློང་བྱས་པའི་གནད་དོན་སྤྱི་དང༌། ལྷག་པར་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པའི་གྲོས་རིམ་ཁག དེ་བཞིན་ “བྱེད་མི་རུང་བ་བཞིབཅས་ལ་སློབ་སྦྱོང་བྱ་རྒྱུ་ཡིན། ཚོགས་གྲོས་སྐབས་ནན་ཞུ་བྱས་པ་ལྟར། རྒྱ་ནག་གི་དབུ་ཁྲིད་རྣམས་ཀྱིས་ཀྱང་ང་ཚོས་གླེང་སློང་བྱས་པའི་གནད་དོན་ཁག་གི་ཐོག་བསམ་ཞིབ་ནན་ཏན་གནང་བའི་རེ་བ་ལྷག་བསམ་རྣམ་དག་གིས་བྱེད་ཀྱི་ཡོད། ཅེས་དང་།

 

ྋགོང་ས་མཆོག་གིས་སྔ་ཕྱི་བར་གསུམ་དུ་མ་འོངས་པའི་བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་གནས་རྒྱུའི་བཞེངས་ཕྱོགས་གསལ་སྟོན་གནང་ཡོད་པར་བརྟེན། རྒྱ་ནག་གི་དབུ་ཁྲིད་རྣམས་ལ་ཆབ་སྲིད་ཀྱི་ཆོད་སེམས་ཡོད་ཚེ། གནད་དོན་འདི་དག་ཐོག་ཐུན་མོང་གི་གཞི་རྟེན་ཞིག་འཚོལ་མི་ཐུབ་པའི་རྒྱུ་མཚན་གང་ཡང་མེད་པར་ང་ཚོས་མཐོང་གི་ཡོད། འདིར་བསྐྱར་ནན་བརྗོད་རྒྱུ་ཞིག་ལ། ྋགོང་ས་མཆོག་གིས་བོད་མི་རིགས་ཚོར་བློ་སྤོབས་དང་ཆེ་མཐོང་བཅས་སླར་གསོ་ཐུབ་པ་དང༌། དེ་བཞིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བརྟན་ལྷིང་དང་ཆིག་སྒྲིལ་འགན་སྲུང་བྱེད་ཐུབ་པའི་ཆེད་དུ་རྒྱ་ནག་དབུས་གཞུང་དང་མཉམ་དུ་མུ་མཐུད་ཕྱག་ལས་གནང་རྒྱུའི་ཐུགས་འདུན་རྒྱུན་བཅངས་གནང་གིན་ཡོད། ཅེས་བཀོད་འདུག་ལ། མཇུག་མཐར། ཐེངས་འདིའི་ང་ཚོའི་མགྲོན་བདག་ཧུའེ་ནན་འཐབ་ཕྱོགས་གཅིག་གྱུར་ལས་ཁང་དང༌། པེ་ཅིང་འཐབ་ཕྱོགས་གཅིག་གྱུར་ལས་ཁང༌། དེ་བཞིན་རྒྱ་ནག་དབུས་འཐབ་ཕྱོགས་གཅིག་གྱུར་ལས་ཁང་བཅས་ཀྱིས་ང་ཚོར་སྐབས་བསྟུན་སྣེ་ལེན་མཐུན་འགྱུར་དམ་ཟབ་གནང་བར་ཐུགས་རྗེ་ཆེ་ཞུ་རྒྱུ་བཅས། ཅེས་སོགས་བཀོད་འདུག

བསྐྱར་བཅོས།: ༢༠༡༧/༠༢/༡༦

Leave a Reply

29 thoughts on “ང་ཚོས་ “བྱེད་མི་རུང་བ་བཞི” ལ་སློབ་སྦྱོང་བྱ་རྒྱུ་ཡིན།

  1. སྐུ་ཚབ་ཚོ་
    ཚུགས་ཀ་མེད་ཀྱང་སྡོག་པ་བྱས་ནས་ས་ཡ་དྲུག་གི་སྐུ་ཚབ་དག།

    བོད་ལྭ་གོན་ནས་བོད་ཚུགས་བཏོད་དེ་བོད་ཀྱི་རྒྱལ་ས་གཉིས་བ་ནས།།

    ༧ཡིད་བཞིན་ནོར་བུར་མགོས་ཕྱག་འཚལ་སྟེ་དམ་བཅའ་ཁས་ལེན་བྱས་བ་དང་།།

    ཟ་དང་འཐུང་དང་ཡིན་དང་མིན་སོགས་རྒྱ་སྐད་ཁ་ཤས་སློབ་ཞོར་ལ།།

    བོད་ལྭ་ཕུད་ནས་རྒྱ་ལྭ་གོན་ཏེ་མཁའ་ལམ་བརྒྱུད་ནས་ཕེབས་སོང་ཟེར།།

    གཞིས་བྱིས་གཉིས་ཀྱི་རེ་བ་ཤི་ཡང་རྣ་བས་ཡང་ཡང་ཉན་པ་ན།།

    ཤ་རྩ་དཀར་ལ་ཤ་ཚུགས་ལེགས་པའི་རྒྱ་མོ་འགའ་ཡི་བསུ་བ་བཅས།།

    རྒྱ་མཁར་སྨུག་པོའི་ནང་ལ་འཛུལ་རྗེས་ཟ་འཐུང་སྡེར་མའི་ཁྲོག་སྒྲ་ལས།།

    བོད་མིའི་བདེ་སྡུག་བཤད་པའི་སྐད་ཆ་སུ་དང་གང་གིས་མ་གོ་ཟེར།།

    ༧ཡིན་བཞིན་ནོར་བུའི་གསལ་བཤད་བདུན་པོ་ཕར་ལ་འཕྲོད་པའི་བརྡ་ཙམ་དང་།།

    མི་རུང་ཁ་ཤོར་བཞི་ཡི་ཐོག་ལ་ཐུགས་རྗེ་ཆེ་ཞུ་ཕུལ་བ་དང་།།

    ལག་པ་གཉིས་ཀས་ཕོ་བ་སྐྱོར་ནས་ཟ་འཐུང་བླུགས་པའི་སྒྱེ་མོ་བཞིན།།

    པེ་ཅིང་མཁར་ན་ཡོད་པ་འདྲ་པས་བདེ་མོ་སྐྱིད་པོ་ཡིན་པར་སྨོན།།

    ཆབ་སྲིད་འཐབ་ཕྱོསག་གཅིག་གྱུར་པུའུ་ཡིས་ཁྱོད་ཚོར་སྐད་ལོག་ཨེ་བྱས་ཐལ།།

    པུའུ་ཀྲང་གཞོན་པས་དཔའ་སྐད་འཐེན་སྐབས་ཆོས་སྐྱོང་སྲུང་མ་ཨེ་དྲན་ཐལ།།

    སྐུ་ཚབ་རྣམས་ལ་སྐྲག་སྣང་སྐྱེས་ནས་རྒྱུད་པ་གཉིས་ཀ་ཨེ་འདར་ཐལ།།

    བདག་དབང་བཤད་སྐབས་མགོ་བོ་རྨོངས་ནས་༧ཡིད་བཞིན་ནོར་བུ་ཨེ་དྲན་ཐལ།།

    སྲིད་ཇུས་བཤད་སྐབས་མགོ་ཡོམ་འཁོར་ནས་རྔུལ་ཆུ་མང་བོ་ཨེ་བཞུར་ཐལ།།

    རྒྱལ་ཁབ་ཞིག་གི་སྐུ་ཚབ་ཡིན་པས་རྒྱ་ཆེན་རྒྱས་བ་ཨེ་ཐུབ་ཐལ།།

    ཡ་ཡ་ལེགས་སོ་ཐུགས་རྗེ་ཆེ་ལས་གཞན་པའི་ཚིག་འགའ་ཨེ་ཤོད་ཐལ།།

    ༧གོང་ས་མཆོག་ལ་མཚན་སྨོད་བྱེད་སྐབས་སྐྱུ་མོ་གཉེར་ནས་ཨེ་དཀའ་ཐལ།།

    རྒྱ་མོ་ཚོ་ལ་རྒྱ་རྒྱོ་བརྒྱབས་ནས་གུང་གསེང་སྐྱིད་པོ་ཨེ་བྱུང་ཐལ།།

    མོ་ཐེ་འཐུང་སྐབས་མི་རིགས་ཤིག་གི་བཀའ་དྲིན་ཡིན་པ་ཨེ་ཚོར་ཐལ།།

    ཁྱོད་ཚོར་རྟག་ཏུ་རྙོག་དྲ་མི་འདུག་རྒྱུན་དུ་ཕེབས་ཞེས་ཨེ་བཤད་ཐལ།།

    མྱི་བཟང་རེད་ཅེས་མྱི་ཆེན་དག་གིས་བསྟོད་པའི་མཐེ་བོང་ཨེ་བསྒྲངས་ཐལ།།

    སྒེར་བདག་ཁ་པར་ཨང་གྲངས་སྤྲོད་དང་སྒེར་དོན་བསྒྲུབ་ཞེས་ཨེ་བཤད་ཐལ།།

    ང་ཚོ་ཚང་མ་བཟང་ས་ཡིན་པས་ནང་གཏམ་བཤད་ཅེས་ཨེ་བསྐོར་ཐལ།།

    ཅི་གསུངས་བཀའ་ལ་ལེགས་སོ་ཙམ་ལས་རང་གི་འདོད་འདུན་ཨེ་ཤོད་ཐལ།།

    བོད་པའི་སྐུ་ཚབ་ཡིན་པའི་རྟགས་ལ་བོད་དོན་ཚིག་འགའ་ཨེ་ཁྲོལ་ཐལ།།

    ས་མཚམས་ལོ་རྒྱུས་གྲོས་མོལ་བྱེད་སྐབས་ས་རྒྱུས་མེད་པས་ཨེ་མྱངས་ཐལ།།

    དྲང་མོར་བཤད་ན་འཕྲིན་སྐྱེལ་ཙམ་ལས་བོད་པའི་སྐུ་ཚབ་ཨེ་ཉན་ཐལ།།

    རྡ་རམ་ས་ལའི་ཉེ་སར་འབྱོར་དུས་ཅི་བཤད་བསམ་ནས་ཨེ་སྐྲག་ཐལ།།

    བཀའ་བློན་ཁྲི་བའི་བཀའ་བཀྱོན་དྲན་ནས་སྐྱག་རྫུན་བཤད་པྭ་ཨེ་འདོད་ཐལ།།

    ༧ཡིད་བཞིན་ནོར་བུ་ཡིད་ལ་ཤར་ནས་དགོངས་དག་ཞུ་པྭ་ཨེ་དྲན་ཐལ།།

    སྐྱབས་བཅོལ་བ་ཚོ་སེམས་ལ་ཡོང་ནས་རྒྱ་ཆེན་བཤད་པྭ་ཨེ་འདོད་ཐལ།།

    གསར་འབྱོར་བ་ཚོས་དྲི་བ་འདྲི་ན་དབྱིན་སྐད་རྒྱག་པྭ་ཨེ་དྲན་ཐལ།།

    ཁ་ཤས་གསང་ནས་ཁ་ཤས་བཤད་སྐབས་རང་གིས་འཇོན་སོང་ཨེ་འདོད་ཐལ།།

    པེ་ཅིང་ཁོ་ཡ་ཁོག་ནས་ཞུས་ཏེ་མོ་ཐེའི་བཟི་ཁ་དྭངས་བ་ན།།

    དྲི་བ་འདི་ཚོར་ལན་ཞིག་གནོངས་ཞེས་གུས་མི་ཤེས་བའི་གུས་ལྡན་པ།།

    ས་ཡ་དྲུག་གི་དམའ་ཤོས་དེ་ཡིས་ས་ཁུང་ཞིག་གི་ཡ་ཕུགས་ནས།།

    ལག་པའི་ཐལ་མོ་ཐོད་ལ་སྦྱར་ཏེ་པུས་མོ་ས་ལ་བཙུགས་ནས་ཞུས།

  2. དགེ་བཤེས་སྨོན་ལམ་མཐར་ཕྱིན།

    རྒྱ་ནག་གི་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་གིས་ཀྲུང་དབྱང་གི་འབྲེལ་ཡོད་སྡེ་ཚན་དང་ཏཱ་ལའི་བླ་མ་མི་སྒེར་གྱི་འཐུས་མིའི་དབར་འབྲེལ་ཐུག་གྲོས་མོལ་བྱས་པའི་སྐོར་གསར་འགྱུར་ཡོངས་བསྒྲགས་ཀྱི་ཚོགས་འདུ་འཚོགས་པ་ཟེར་བའི་སྐོར་ཞིབ་ཕྲ།
    http://tb.chinatibetnews.com/news/guonei/2010-02/05/content_401164.htm

    http://epaper.chinatibetnews.com/tibet/html/2010-02/05/node_42.htm

  3. རྒྱ་རི་ཕྱི་ལོ ༢༠༠༢ལོ་ནས་ཕྱི་ལོ ༢༠༡༠ལོར་སྐུ་ཚབ་གནང་བའི་འབྲས་བུ་བོད་དོན་ཏཱ་ལའི་ཅན་ནས་ཏཱ་ལའི་སྒེར་དོན་ཅན་ལ་བསྐུལ་འདེད་གནང་ཡོད་པས། བྱས་རྗེས་ཟེར་ན་འདི་འདྲ་དགོས། སྐུ་ཚབ་ཟེར་ན་འདི་འདྲ་དགོས། བོད་དོན་ཚར་རག་བར་དུ་སྐུ་ཚབ་གནང་བར་ཤོག བོད་པ་འཇིག་རག་བར་དུ་སྐུ་ཚབ་གནང་བར་ཤོག