བདེན་དོན་གླེང་རྒྱུ་ནི་ང་ཚོ་གཅིག་མཚུངས་ཀྱི་དམིགས་ཡུལ་ཡིན།

མ་འོངས་པར་རྒྱ་ནག་དམངས་གཙོའི་ལམ་དུ་ཕྱོགས་པའི་དུས་སུའང་ང་ཚོ་ཕན་ཚུན་མཉམ་འབྲེལ་བྱ་ངེས་པས།སྐབས་དེར་རྒྱ་ནག་མི་མང་གིས་བོད་ཀྱི་བདེན་དོན་དང་བོད་རིགས་མི་མང་གི་མངོན་འདོད་འགྲུབ་པར་གདམ་གསེས་ཀྱི་དབང་ཆར་རྒྱབ་སྐྱོར་བྱ་ངེས་ཡིན།
འདི་ལོའི་གསུམ་བཅུའི་དུས་དྲན་ཐེངས་༥༡པའི་དུས་དྲན་གྱི་ཉིན་མོ་དང་སྟབས་བསྟུན། ཕྱི་སྡོད་རྒྱ་རིགས་དམངས་གཙོ་དོན་གཉེར་བ་ཁག་ཅིག་བཞུགས་སྒར་དུ་འབྱོར་ཏེ་༧གོང་ས་མཆོག་ལ་མཇལ་ཁ་ཞུས་རྗེས།དུས་དྲན་མཛད་སྒོའི་སྟེང་མཉམ་ཞུགས་དང་བོད་རིགས་མི་མང་ལ་རྒྱབ་སྐྱོར་གྱི་རྣམ་པ་མཚོན་ཕྱིར་དྲན་རྟེན་རྡོ་བརྐོས་རི་མོ་ཞིག་ཀྱང་བོད་ཀྱི་འགྲེམ་སྟོན་ཁང་ལ་ཕུལ་ཡོད་པ་དང་།  ཕྱི་ཚེས་༡༡ཉིན་མེག་གྷན་གྱི་མགྲོན་ཁང་ལྗང་ཁུ་ ( Green Hotel ) འི་ནང་གསར་འགོད་གསལ་བསྒྲགས་སྤེལ་ཡོད། སྐབས་དེར་རྒྱ་རིགས་དམངས་གཙོ་དོན་གཉེར་བ་ཆིན་ཅིན་ཡིས་བརྗོད་དོན།ཐེངས་འདིའི་བོད་མིའི་ཞི་བའི་སྒེར་ལངས་ཀྱི་དུས་དྲན་ཐེངས་༥༡པའི་གོ་སྐབས་འདི་དང་སྟབས་བསྟུན་ཏེ་ང་ཚོ་ཨ་རི་དང་ཨོ་སི་ཊི་ལི་ཡ།  ཉི་ཧོང་།འཇར་མན།ཐེ་ལན་ཌི།ཐེ་ཝན།ཧོང་ཀོང་། ཁཱམ་སྤེ་ཊེ་ཡ་བཅས་རྒྱལ་ཁབ་ཀྱི་ནང་དུ་གནས་སྡོད་བྱས་པའི་ཕྱི་སྡོད་རྒྱ་རིགས་དམངས་གཙོ་དོན་གཉེར་བའི་ཚོགས་པ་དང་པེ་ཅིན་གྱི་དཔྱིད་ཀ་དུས་དེབ་ཀྱི་ཚོགས་པ་བཅས་ཚོགས་པ་མི་འདྲ་བ་ཁག་གི་མི་སྣ་དང་གསར་འགོད་པ་བཅས་མི་༢༣ངྷ་རམ་ས་ལར་ཡོང་བ་ཡིན།ང་ཚོའི་དམིགས་ཡུལ་ནི།བོད་མི་རིགས་ཀྱིས་མི་ལོ་༥༠ལྷག་གི་རིང་ལ་འཐབ་རྩོད་བྱས་པའི་ཆེས་མཐོའི་རང་སྲིད་རང་སྐྱོང་གི་གནས་བབ་ལ་རྒྱབ་སྐྱོར་དང་བོད་ཀྱི་བདེན་དོན་འཐབ་རྩོད་ཁྲོད་ཀྱི་ཉམས་མྱོང་བསྡུ་ལེན་བྱ་ཆེད།རྒྱལ་སྤྱིའི་སྤྱི་ཚོགས་ཀྱི་དོ་སྣང་དང་ལྷག་པར་རྒྱ་རིགས་ནང་ཁུལ་ཏུ་དོ་སྣང་ཤུགས་ཆེ་རུ་འགྲོ་བར་བྱ་ཆེད་བཅས་ཡིན།འདས་པའི་དུས་སུ་རྒྱལ་སྤྱིའི་སྤྱི་ཚོགས་ཀྱིས་བོད་ཀྱི་གནད་དོན་ལ་དོ་སྣང་བྱས་ཡོད་ཀྱང་།གནད་ལ་འཁེལ་བའི་རྒྱབ་སྐྱོར་ཐོབ་མེད་པའི་དབང་གིས་བོད་ཀྱི་གནད་དོན་ད་ལྟའི་དུས་འདིར་ཡང་ལྷག་ཡོད་པ་རེད་ཅེས་དང་། ཡང་ཁོང་གིས། བོད་རིགས་དང་རྒྱ་རིགས་མི་མང་ད་ལྟའི་དུས་འདིར་ཡང་མཉམ་གནས་བྱས་ཡོད་ལ།མ་འོངས་པར་རྒྱ་ནག་དམངས་གཙོའི་ལམ་དུ་འགྱུར་བའི་དུས་སྐབས་སུའང་ཕན་ཚུན་མཉམ་འབྲེལ་བྱ་ངེས་ཡིན་སྟབས།  སྐབས་དེར་རྒྱ་ནག་མི་མང་གིས་བོད་ཀྱི་བདེན་དོན་དང་བོད་མིའི་མངོན་འདོད་ལྟར་གདམ་གསེས་ཀྱི་དབང་ཆར་རྒྱབ་སྐྱོར་བྱ་ངེས་པར་ང་རང་ལ་ཡིད་ཆེས་ཡོད།འདི་ནི་ང་ཚོ་དམངས་གཙོ་དོན་གཉེར་བ་རྣམས་ཀྱི་དམིགས་ཡུལ་ཡང་ཡིན། འདས་པའི་དུས་ནས་བཟུང་རྒྱ་ནག་གཞུང་དང་ཏཱ་ལའི་བླ་མའི་སྐུ་ཚབ་དབར་གྱི་འབྲེལ་མོལ་ཐེངས་དགུ་བའི་གོ་རིམ་ལ་བལྟས་ན་མངོན་སུམ་གྱི་གྲུབ་འབྲས་གང་ཡང་ཐོན་མེད་སྟབས།ང་ཚོས་ཐེངས་འདིའི་གོ་སྐབས་འདི་བརྒྱུད་རྒྱལ་སྤྱིའི་སྤྱི་ཚོགས་ཀྱིས་བོད་ཀྱི་གནད་དོན་ལ་སྔར་ལས་ལྷག་པའི་དོ་སྣང་དང་རྒྱབ་སྐྱོར་བྱ་རྒྱུའི་རེ་བ་དང་འབོད་སྐུལ་ཞུ་བཞིན་ཡོད།ཅེས་བརྗོད་བྱུང་།
ཡང་།པེ་ཅིན་གྱི་དཔྱིད་ཀ་དུས་དེབ་ཀྱི་རྩོམ་སྒྲིག་པ་ཝེ་ཞོ་ལགས་ཀྱིས།ལོ་༢༠༠ཡར་སྔོན་དུ་ཧྥ་རན་སིའི་མི་དམངས་ཀྱིས་ཨ་རིའི་རང་དབང་འཐབ་རྩོད་ལ་རྒྱབ་སྐྱོར་བྱ་ཆེད་རང་དབང་གི་ལྷ་སྐུ་ཞིག་ཕུལ་ཏེ་ཁོང་ཚོས་ཨ་རིའི་མི་དམངས་ལ་རྒྱབ་སྐྱོར་གྱི་རྣམ་པ་མཚོན་པ་རེད།ཐེངས་འདིར་ང་ཚོས་ཀྱང་དུས་དྲན་ལ་མཉམ་ཞུགས་བྱས་པ་དང་ལྷན་དུ་རྒྱ་རིགས་རྡོ་བརྐོས་པ་ཁྲིན་ཝེ་མེན་ལགས་ཀྱིས་བོད་མིའི་ཞི་བའི་སྒེར་ལངས་དུས་དྲན་འདིར་ཆེད་དུ་བཟོ་བཀོད་བྱས་པའི་རྡོ་བརྐོས་རི་མོ་ཞིག་བོད་རིགས་མི་མང་ལ་ཕུལ་བ་ཡིན།རི་མོ་འདིས་བོད་མི་རྣམས་ཀྱིས་ཏཱ་ལའི་བླ་མ་དང་བོད་རང་དབང་འཐབ་རྩོད་ཆེད་ཧི་མ་ལ་ཡའི་རི་བརྒྱུད་བརྒལ་བའི་གཡོ་མེད་ཀྱི་དམ་བཅའ་དང་སྙིང་སྟོབས་ཀྱི་སྣང་བརྙན་འབུར་དུ་བཏོད་ཡོད་ལ།ང་ཚོ་ཕྱི་སྡོད་རྒྱ་རིགས་རྣམས་ཀྱི་བོད་ཀྱི་བདེན་དོན་ལ་བཅངས་བའི་ལྷག་བསམ་དང་རྒྱབ་སྐྱོར་ཡང་མཚོན་ཡོད། ཅེས་དང་། ཡང་ཁོང་གིས་མུ་མཐུད་དོན།  ང་ཚོ་ཕྱིར་སྡོད་རྒྱ་རིགས་དམངས་གཙོ་དོན་གཉེར་བ་རྣམས་ཀྱིས་གནད་དོན་བཞིའི་སྟེང་ནས་རྒྱ་ནག་དམངས་གཙོའི་ལམ་དུ་འགྲོ་བར་འབད་པ་བྱེད་ཀྱིན་ཡོད།དང་པོ།བོད་མི་མང་གིས་རྒྱ་ནག་ནང་ཁུལ་ཏུ་རང་ཉིད་ཀྱི་བདེ་སྡུག་ཕྱིར་སྒྲོག་མི་ཆོག་པ་ལྟར།རྒྱ་ནག་མི་མང་གིས་ཀྱང་རང་ཉིད་ཀྱི་བདེ་སྡུག་གི་ཚོར་བ་ངོ་མ་སྒྲོག་མི་ཐུབ་པའི་དབང་གིས་ང་ཚོའི་འཛམ་གླིང་ཕྱི་ཕྱོགས་སུ་རྒྱ་ནག་ནང་ཁུལ་གྱི་མི་མང་གི་དངོས་ཡོད་ཀྱི་གནས་ཚུལ་བརྒྱུད་སྒྲོག་བྱེད་ཀྱིན་ཡོད།གཉིས་པ།ང་ཚོས་རྒྱ་སྤྱིའི་སྤྱི་ཚོགས་དང་དབུ་ཁྲིད་རྣམ་པར་རྒྱ་ནག་ནང་ཁུལ་གྱི་མི་མང་གིས་ད་ལྟ་མྱོང་བཞིན་པའི་དཀའ་ངལ་དང་གནས་སྟངས།བྱེད་ལས་སོགས་བརྒྱུད་སྒྲོག་བྱས་ཏེ་རྒྱ་ནག་ནང་ཁུལ་གྱི་དམངས་གཙོ་དོན་གཉེར་བ་དང་མི་མང་ལ་རོགས་སྐྱོར་བྱེད་ཀྱིན་ཡོད།གསུམ་པ།ང་ཚོས་རྒྱ་ནག་ནང་ཁུལ་གྱི་མི་མང་དང་ཕྱི་སྡོད་རྒྱ་རིགས་དབར་གྱི་འབྲེལ་ལམ་ཐད་ལ་འབད་པ་བྱེད་ཀྱིན་ཡོད་ལ།ལྷག་པར་རྒྱ་ནག་ནང་ཁུལ་གྱི་མི་མང་གི་དཀའ་ངལ་དང་དྲང་བདེན་མིན་པའི་གནས་ཚུལ་གང་མང་ཐོག་འབྲེལ་བ་བྱས་ཏེ་སེལ་ཐབས་བྱེད་ཀྱིན་ཡོད།བཞི་པ།ང་ཚོས་རྒྱ་ནག་ནང་ཁུལ་དང་ཕྱི་ཕྱོགས་སུ་དམངས་གཙོའི་སྒྲིག་འཛུགས་གསར་འཛུགས་དང་དམངས་གཙོ་དོན་གཉེར་བ་གསོ་སྐྱོང་བྱེད་བཞིན་ཡོད།ང་ཚོ་ཕྱི་སྡོད་རྒྱ་རིགས་དམངས་གཙོ་དོན་གཉེར་བར་མཚོན་ནའང་ཕྱི་ཕྱོགས་སུ་མི་འདང་བའི་ཆ་མང་བ་བཞིན་བོད་ལ་མཚོན་ནའང་ལྟ་ཚུལ་མི་འདྲ་མང་པོ་ཞིག་ཡོང་གི་ཡོད་པ་རེད།དེ་ལྟ་ནའང་།ང་ཚོའི་གཅིག་མཚུངས་ཀྱི་དམིགས་ཡུལ་ནི་རང་ཉིད་ཀྱི་བདེན་དོན་གླེང་རྒྱུ་དེ་རེད་ཅེས་བརྗོད་བྱུང།
ཆུ་ཚོད་གཅིག་རིང་གི་གསར་འགོད་གསལ་བསྒྲགས་སྟེང་རྒྱ་རིགས་དམངས་གཙོ་དོན་གཉེར་བ་ལྔ་ལྷག་གིས།ཐེངས་འདིའི་བོད་མིའི་ཞི་བའི་སྒེར་ལངས་ཐོག་མཉམ་ཞུགས་གནང་བའི་རྒྱུ་རྐྱེན་དང་།ཕྱི་སྡོད་རྒྱ་རིགས་དམངས་གཙོ་དོན་གཉེར་བ་དག་གི་དམིགས་ཡུལ་སོགས་བརྒྱུད་ལམ་ཁག་ཏུ་ཞིབ་མོར་བརྗོད་བྱུང་ལ།དེ་བཞིན་རྒྱ་ནག་ནང་ཁུལ་གྱི་ད་ལྟའི་གནས་སྟངས་དང་དྲ་ལམ་བཀག་འགོག   ཉེ་ཆར་ཐེ་ལན་ཌིའི་ནང་འཛིན་བཟུང་བཙོན་འཇུག་བྱས་ཡོད་པའི་རྒྱ་རིགས་དམངས་གཙོ་དོན་གཉེར་བ་ཁག་ཅིག་གློད་གྲོལ་ཡོང་ཐབས་སུ་བོད་རིགས་མི་མང་ལ་རྒྱབ་སྐྱོར་དང་འབོད་སྐུལ་གནང་དགོས་པའི་རེད་འདུན་ཡང་བཏོན་ཡོད།

བསྐྱར་བཅོས།: ༢༠༡༧/༠༢/༡༦

Leave a Reply

15 thoughts on “བདེན་དོན་གླེང་རྒྱུ་ནི་ང་ཚོ་གཅིག་མཚུངས་ཀྱི་དམིགས་ཡུལ་ཡིན།

  1. ཅོ་རི་ཉི་མ།

    དཀོན་མཆོག་དོན་འགྲུབ་ལགས།

    དེ་རིང་ཕེབས་པར་དགའ་པོ་བྱུང་མ་ཟད་དེ་ལས་ལྷག་ཁྱེད་ཀྱིས་ང་ལ་བཀའ་བློན་ཁྲི་པའི་འོས་ཤོག་གཅིག་སྤྲོད་པར་ཐུགས་ཆེ།

    ཧ་གོ་དགོས་པ་ཞིག་ལ་རྒྱ་ནག་དམར་པོའི་སྲིད་གཞུང་འདི་འཛུགས་མཁན་རྒྱ་མི་རིགས་རེད་མ་གཏོགས་གནམ་ནས་ལྷུང་བྱུང་བ་ཞིག་དང་ས་ནས་སྐྱེས་ཡོང་བ་ཞིག་རྩ་བ་ནས་མ་རེད།

    དམར་པོའི་སྲིད་གཞུང་དང་དེ་འཛུགས་མཁན་གྱི་མི་རིགས་གཉིས་ནག་ཉེས་ཆེ་ཆུང་གི་ཁྱད་པར་ཅོ་རིས་རྟོག་གེ་རིག་པའི་མདུན་དུ་གཅིག་པ་རེད།

    མ་གཞི་ནས་ཁྱེད་རྒྱ་ལ་དགའ་ན་རྒྱ་ལོ་དོན་འགྲུབ་ཀྱི་རྗེས་སུ་སོང་དང་རྒྱ་མོ་སྣ་ལེབ་རེ་ཆུང་མ་ཐོབ་སྲིད་པ་རེད།་་་་ཧཧ་ཧཧ་ཧཧ་་་་་་རྩེ་མོ་ཡིན་ད།

  2. མདོ་སྨད་ཆོལ་ཁའི་དམིགས་བསལ་ཚོགས་ཆེན་དེ་མ་འོངས་བཀའ་ཁྲི་དང་སྤྱི་འཐུས་འོས་འདེམས་ཚགས་ཚུད་ཡོང་ཐབས་ལ་འཚོག་བཟང་མོས། ཡིན་ཡང༌། ཚ གས་ཚུད་དང་ཞོག་འདེགས་མ་བྱེད་མཁན་ཕྱོགས་རིས་ཆེ་ཤོས་དེ་མདོ་སྨད་ཆོལ་ཁ་ཡིན་པ་གསལ་པོ་རེད། ང་ཚོ་ཚང་མ་ཧ་གོ་ཡི་ཡོད་ལ། སྔོན་ཆད་བཀའ་ཁྲི་འོས་བསྡུ་ལས་འགུལ་ཇི་སྤེལ་དང་ཁོ་རང་གི་ཕྱོགས་གཏོགས་དང་རེ་བ་ཡོད་ས་ད་སླེབས་ཀྱི་མི་འདུག་བསམས་ཏེ་འོས་བསྡུ་ཆ་ཤས་ལེན་གྱི་མིན་ཟེར་བ་གྲོས་ཆོད་ཡང་བཞག་མྱོང་ཡོད་པ་རེད། ངས་རེ་ག་རི་ཞུ་འདོད་བྱུང་སོང་ཟེར་ན་མ་འོངས་པར་ཁྱེད་རང་ཚོའི་སྤྱི་འཐུས་དེ་ཡག་ཙམ་ཞིག་དགོས་ཀྱི་འདུག ད་ལྟའི་མདོ་སྨད་ནང་ནས་སྤྱི་འཐུས་ཤེས་ཡོན་འཇོན་ཐང་ཡོད་པ་གྲགས་ཤོས་དེ་སྤན་པ་ཚེ་རིང་ཁོ་རང་རེད། ཡིན་ཡང་ལྷག་བསམ་གྱི་ཆ་ནས་ཁོ་ལ་ཞན་ཆ་ཆེན་པོ་ཡོད་པ་ཧ་གོ་དོན་གསལ་རེད། གཞན་མདོ་སྨད་ནང་ལ་སྤྱི་འཐུས་ཕན་ཐོགས་ཡོད་རྐང་གཅིག་མེད།

  3. དཀོན་མཆོག་དོན་འགྲུབ།

    ཅོ་རི་ཉི་མ་ལགས་ཀྱིས་རྒྱ་མི་རིགས་ཡིན་པ་ཙམ་གྱི་ཡག་པོ་མ་ཡིན་པ་དང་། མགོ་སྐོར་གཏང་མཁན་ཡིན་པའི་བཟོ་འདྲ་པོ་རྐྱང་བྲིས་འདུག་པར། ངས་བྱས་ན་ཁྱོད་ཀྱིས་ནོར་བ་རེད་དྲན་གྱི་འདུག ཁྱོད་ཀྱིས་དེ་སྔར་བོད་ཀྱི་རྩོམ་པ་པོ་འོད་ཟེར་ལགས་ཀྱི་ཁྱོ་ག་རྒྱ་ཡིན་པའི་ཆ་ནས་ཡག་པོ་མིན་སྒྲུབ་འདུག་པ་དང་། ད་ལྟ་ཡང་དེ་བཞིན་བཤད་པ་དེ་ཚོ་རྒྱ་མི་དམར་གཞུང་ཡག་པོ་མེད་པའི་རྒྱུ་མཚན་དུ་བྱས་ན་འགྲིག་གི་ཨེ་ཡོད་ན། ༸གོང་ས་མཆོག་གི་དབུས་རང་གཞུང་གིས་དུས་རྟག་ཏུ། དམར་གཞུང་སྡུག་ཅག་ཡིན་པ་ལས། རྒྱ་མི་རིགས་སྡུག་ཅག་ནམ་ཡང་མ་རེད། རྒྱ་མི་རིགས་དང་གྲོགས་པོ་བྱེད་དགོས། ཤེས་སོགས་ཀྱི་སླབ་བྱ་ཡང་ཡང་གནང་བཞིན་ཡོད་པ་དེ་ཚོ་ནོར་བ་དང་། ཁྱོད་ཀྱིས་དེ་དག་ལས་ལྷག་ཞིག་མཁྱེན་བ་ནི་ཨེ་ཡིན་ན། གཅིག་བྱས་ན་མ་འོང་ཕྱི་ལོ་ ༢༠༡༡ ལོའི་བཀའ་བློན་ཁྲི་པ་དེ་ཁྱོད་བཞག་དགོས་མིན་འགྲོ། ཁྱོད་ཤེས་འཇོན་གཉིས་ལྡན་དང་། ཁ་ཡོད་ལག་ཡོད། ༸གོང་ས་མཆོག་གི་དབུས་རང་གཞུང་གིས་མ་ཤེས་པ་ཞིག་ཤེས་རྟོགས་ཐུབ་མཁན་ཞིག་རེད་འདུག་ཨ། ཨ་རྐྱང་རྩེད་མོ་ཡིན། དགོངས་འགལ་མེད་པ་མཁྱེན།