སྤྱི་འཐུས་ཇེ་མང་དུ་གཏོང་རྒྱུ།

སྐབས་བཅུ་བཞི་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་བའི་ཚོགས་རྒྱུན་ཧྲིལ་བོར་དགོངས་པ་ཞུས་ཏེ། ཚོགས་བཅར་གནང་མེད་མཁན་གྱི་སྤྱི་འཐུས་ ༦ ཙམ་བྱུང་ཡོད་ལ། ཁོང་ཅག་ནི་སྤྱི་འཐུས་དགེ་བཤེས་ཐུབ་བསྟན་འཕེལ་རྒྱས་དང་། སྤྱི་འཐུས་བསོད་ནམས་སྟོབས་རྒྱལ། སྤྱི་འཐུས་དབུ་བཀར་ཚང་གཡུ་སྒྲོན། སྤྱི་འཐུས་ཆབ་བྲག་ལྷ་མོ་སྐྱབས། སྤྱི་འཐུས་ཨཱ་ཙཱརྱ་ཡེ་ཤེས་ཕུན་ཚོགས། སྤྱི་འཐུས་བསྟན་འཛིན་མཁས་གྲུབ་བཅས་རེད། དེ་བཞིན། ཨ་རིའི་སྤྱི་འཐུས་བསྟན་འཛིན་ཆོས་ལྡན་ཡང་ཐོངས་ཆེན་ལག་འཁྱེར་གྱི་དཀའ་ངལ་ཞིག་གི་དབང་གིས་རྒྱ་གར་ལྡི་ལིར་འབྱོར་མ་ཐག་ཕྱིར་ཨ་རིར་ལོག་དགོས་བྱུང་སྟེ་ཐེངས་འདིའི་གྲོས་ཚོགས་སུ་བཅར་ཐུབ་མེད།

 

བོད་མི་མང་སྤྱི་འཐུས་ལྷན་ཚོགས་ནི་བཙན་བྱོལ་བོད་མིའི་ཁྲིམས་བཟོ་ལྷན་ཚོགས་ཡིན་ཞིང་། དུས་ནས་དུས་སུ་བཙན་བྱོལ་བོད་མིའི་བཅའ་ཁྲིམས་དང་། ལས་ཁུངས་ཁག་གི་སྒྲིག་གཞི་བསྐྱར་བཅོས་དང་སྣོན་བྲི་སྤོར་འཇོག་གི་མཛད་འགན་ཡོད་སྟབས། ཐེངས་འདིར་ཡང་སྔོན་རྩིས་ཀྱི་ཞོར་དུ་བཙན་བྱོལ་བོད་མིའི་བཅའ་སྒྲིག་གི་དོན་ཚན་མང་པོ་ཞིག་ལ་ལེགས་བཅོས་དང་གསར་སྣོན་གྱི་ལས་དོན་སྒྲུབ་བཞིན་ཡོད་པ་ལྟར། ཕྱི་ཚེས་ ༡༢ ཉིན་གྱི་གྲོས་ཚོགས་ལས་རིམ་ནང་། སྤྱི་འཐུས་རྒྱལ་རོང་ཟླ་བ་ཚེ་རིང་ལགས་ཀྱིས་གཞུང་འབྲེལ་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་ཞིག་དང་། སྤྱི་འཐུས་འཇུ་ཆེན་དཀོན་མཆོག་ལགས་ཀྱིས་འོས་བསྡུ་ལྷན་ཁང་གི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་ཞིག་བཅས་བཏོན་འདུག

 

གོང་གི་བཅའ་ཁྲིམས་བསྐྱར་བཅོས་དང་སྒྲིག་གཞི་བསྐྱར་བཅོས་འདི་གཉིས་ཀྱི་དམིགས་ཡུལ་གཙོ་བོ་སྤྱི་འཐུས་ཀྱི་གྲངས་འབོར་ཇེ་མང་ལ་གཏོང་རྒྱུ་དེ་ཡིན་ཞིང་། སྔར་༧གོང་ས་མཆོག་གི་ཐད་བསྐོས་སྤྱི་འཐུས་མེད་པ་ཡིན་ན། ཆོལ་ཁ་རེ་ལས་སྤྱི་འཐུས་བཅུ་རེ་དང་། ཆོས་རྒྱུད་རེ་ལ་སྤྱི་འཐུས་གཉིས་རེ། ཨ་རི་དང་ཁེ་ན་ཊ་ཁུལ་དུ་སྤྱི་འཐུས་གཅིག ཡུ་རོབ་ཁུལ་དུ་སྤྱི་འཐུས་གཉིས་བཅས་ཁྱོན་བསྡོམས་བོད་མི་མང་སྤྱི་འཐུས་ལྷན་ཚོགས་ཀྱི་གྲངས་འབོར་ ༤༣ ཡིན་ན་ཡང་། ཐེངས་འདིར་བཅའ་ཁྲིམས་དང་སྒྲིག་གཞི་བསྐྱར་བཅོས་བརྒྱུད་དེ། ཨ་རི་དང་ཁེ་ན་ཊ་ཁུལ་དུ་སྤྱི་འཐུས་གཉིས་དང་། རྒྱ་བལ་འབྲུག་གསུམ་དང་ཡུ་རོབ་ཁུལ། དེ་བཞིན་ཨ་རི་དང་ཁེ་ན་ཊ་སོགས་ཕུད་པའི་རྒྱལ་ཁབ་གཞན་དག་ནང་སྤྱི་འཐུས་གཅིག་བཅས་བོད་མི་མང་སྤྱི་འཐུས་ལྷན་ཚོགས་ཀྱི་གྲངས་འབོར་དེ་ ༤༥ ལ་སྤར་ཆ་གཏོང་རྒྱུ་དེ་ཡིན་ཡང་། ཕྱི་ཚེས་ ༡༢ ཉིན་གྲོས་ཚོགས་འཐུས་མི་རྣམ་པས་བགྲོ་གླེང་གོ་བསྡུར་མང་པོ་གནང་སྟེ། ད་སྔ་ཐག་གཅོད་བྱུང་མེད།

བསྐྱར་བཅོས།: ༢༠༡༧/༠༢/༡༦

Leave a Reply

38 thoughts on “སྤྱི་འཐུས་ཇེ་མང་དུ་གཏོང་རྒྱུ།

  1. རྒྱ་རྡེའུའི་དགེ་འདུན་དང་ཅོ་རུ་ཉི་མ་སོགས་ཀྱི་སྤྱི་མཐུས་གསར་བསྐོས་རྣམས་ལ་ཚང་དགོས་པ་མང་པོ་ཞིག་གསུང་འདུག་མོད།འོན་ཀྱང་ང་ཚོའི་ཚོགས་སྡེའི་ནང་ཆ་རྐྱེན་དེ་དག་ཚང་བའི་སྤྱི་མཐུས་ཞིག་ཁག་པོ་རེད།གང་ཡིན་ཟེར་ན་བསྐོས་སྐབས་གཅིག་ནས་མི་མང་ལ་རྒྱས་མངའ་མེད་པ་དང་།གཉིས་ནས་ལྷག་བསམ་ནམ་དག་དྲང་བདེན་རང་བྱེད་མི་ཞིག་རྙེད་དཀའ།རང་གི་རང་ལ་དཔེ་བླང་ན་ཤེས་ཐུབ།སྤྱི་ཚོགས་ནང་ལས་དོན་བསྒྲུབ་མྱོང་མཁན་ཞིག་ཡིན་ན་ཕལ་ཆེར་ཤེས་ཡོད་པ་འདྲ།ཁ་སྟོང་ནང་གི་ཚིག་སྟོང་རེ་བཤད་ནས་ཕན་ཐོག་གང་ཡང་མེད།དེ་ལས་རང་གི་ཉམས་མྱོང་རེ་ལེན་ཐུབ་ལ་འབད་རོགས།

  2. རྒྱ་རྡེའུའི་དགེ་འདུན།

    འབྱུང་འགྱུར་གྱིས་སྤྱི་འཐུས་ཚོར་ཚང་དགོས་པའི་མ་མཐའི་ཆ་རྐྱེན .༼ ༡ ་་་་་བོད་ཡིག་ཐོག་ནས་བཙན་བྱོལ་བོད་གཞུང་གི་བཅའ་ཁྲིམས་ཀློག་ཐུབ་པ་ཙམ་གྱི་མི་ཆོག བོད་ཡིག་ལ་རང་རྐྱ་འཕེལ་བ་ཞིག་དགོས
    ༼༢རྒྱ་ཡིག་དང་དབྱིན་ཡིག་གང་རུང་ལ་རང་རྐྱ་ཐུབ་པ
    ༼༣ཕྱོགས་ལྷོང་མེད་པའི་སྤྱི་སེམས་ཅན་ཡིན་པ
    ༼༤གཏམ་བཤད་སྐབས་གྲྭ་བའི་ཞལ་འདོན་སྐྱོར་བ་ལྟ་བུ་མིན་པ་མི་སེམས་འགུགས་པའི་གཏམ་གནད་ལ་ཁེལ་བ་བཤད་ཐུབ་པ་

  3. རྒྱ་རྡེའུའི་དགེ་འདུན།

    ཅོ་རི་ལགས་
    དོ་ཚན་གཉིས་པ་ཚང་རྒྱུ་ཅུང་དཀའ་བར་འདུག
    ཁྱེད་ཀྱི་བསམ་ཚུལ་ལྟར་དོན་ཚན་དེ་དག་ཚང་བའི་སྤྱི་འཐུས་ཞིག་ཕར་ཆེར་དཀའ་རྒྱུ་རེད་ཡ
    དེ་དག་གི་ནང་ནས་དོན་ཚན་གཉིས་པ་ཆོས་ལུགས་སྤྱི་འཐུས་ཚོར་ཚང་དགོས་ཚོད་རེད་་་འོན་ཀྱང་་་་་་་་་་་་་་་་་་་་་་་་་མི་འདུག་ག

  4. ཅོ་རི་ཉི་མ།

    འཇིགས་བྲལ་ལགས།
    ཁྱེད་ཀྱིས་གསུངས་པར་ལྟར་ང་ཚོ་ལ་དགོས་པའི་སྤྱི་འཐུས་ནི། ཆ་རྐྱེན་ཁག
    1.བོད་ཡིག་ཐོག་ནས་བཙན་བྱོལ་བོད་གཞུང་གི་བཅའ་ཁྲིམས་ཀློག་ཐུབ་མཁན་ཞིག་དགོས།
    2.༧གོང་ས་མཆོག་གི་ཐེངས་བརྒྱ་ལས་མང་གསུངས་མྱོང་བའི་མཚན་ཉིད་རིག་པ་ཤེས་མཁན་ཞིག་དགོས།
    3.ཀློག་ཀླད་དང་དབྱིན་ཡིག་རང་སྐྱ་ཐུབ་མཁན་ཞིག་དགོས།
    4.ཕྱོགས་ཞེན་གྱི་རྗེས་སུ་མ་འགྲོ་བ་དངོས་ཡོད་གནས་ཚུལ་དང་དངོས་སྟོབས་རིག་པའི་རྗེས་འབྲངས་བྱེད་མཁན་ཞིག་དགོས།
    5.ལོ་ན་༦༥ལས་མ་བརྒལ་བའི་ཀླད་པ་གསར་པ་དང་སྤྱི་ཚོགས་གསར་འགྲོ་ལུགས་ཤེས་མཁན་ཞིག་དགོས།
    6.ལྐོག་ཟས་རུས་ཟུངས་ཀྱི་ཟ་ནག་ཡོད་པའི་མི་ཚང་ནང་གི་མི་ཞིག་མ་ཡིན་མཁན་ཞིག་དགོས།

    ཞེས་ཆ་རྐྱེན་འདི་ཙམ་མ་ཚང་ན་སྤྱི་འཐུས་མང་པོ་ག་ཚོད་ཡོད་ཀྱང་གླ་ཕོག་འགྲོ་རོགས་ལས་གཞུང་དམངས་གཉིས་ལ་ཕན་པ་དེ་ཙམ་མེད་སྙམ།