ལྷག་དཀར་དམ་བཅའ།

ལྷག་དཀར་དམ་བཅའ།

༡༽ ལས་གཞི་འདིའི་ངོ་བོ།
ལྷག་དཀར་དམ་བཅའ། ཞེས་བའི་ལས་གཞི་ཆུང་ཆུང་འདི་ནི་བོད་ཕྱི་ནང་གཉིས་ནས་མ་སྐུལ་དང་བླང་གིས་བྱུང་བའི་། ང་བོད་ཡིན། ཞེས་པའི་སྒྲུབ་བྱེད་ལས་འཕྲོས་བའི་ཉིན་རེ་འཚོ་བའི་ནང་དུ་རང་ཉིད་བོད་རིགས་གཙང་མ་ཞིག་ཡིན་པའི་དྲན་ཐོ་ལྟ་བུ་ཡིན་ལ། ལས་འཆར་ཆུང་ཆུང་འདི་རྒྱུད་ནས། ད་ལྟའི་ཆར་རང་ཉིད་ལ་བོད་མིའི་ངོ་བོ་དང་ཁྱད་ཆོས་གང་ཡོད་པ་། ཉམས་པ་སླར་གསོ་དང་མ་ཉམས་གོང་འཕེལ་དུ་བཏང་ནས་རང་གི་མི་རབས་ཚ་རྒྱུད་དང་བཅས་པའི་བོད་གངས་ཅན་པའི་ངོ་བོ་སྐལ་བའི་བར་ཏུ་སྐྱོང་བའི་ཐབས་ལམ། ལས་སླ་དོན་ལྡན་ཞིག་ཡིན།
༢༽ རེ་བ།
གཞིས་ལུས་རྒྱ་ཆེ་མི་དམངས་ཀྱི་རེ་འདུན་དྲག་པོ་ལྟར་དུ།  ཕྱི་རྒྱལ་ཁག་ན་ཡོད་པའི་བོད་རིགས་སྤུན་ཟླ་རྣམས་དང་རྒྱ་ནང་ཁག་ན་ཡོད་པའི་བོད་རིགས་སྤུན་ཟླ་རྣམས་ལ་ནད་བརྒྱ་སྨན་གཅིག་ཏུ་དགོངས་ནས་ལྷག་དཀར་གྱི་ལས་གཞི་འདི་དབུ་བརྙེས་བ་ཡིན་ལ། བོད་མི་སྤུན་ཟླ་གང་མང་ལས་འཆར་འདིའི་ནང་དང་བླང་གིས་འཛུལ་ཞུགས་གནང་རྒྱུ་དང་། གཞུང་སྒེར་གཉིས་ཕན་གྱི་དམ་བཅའ་བདུན་ཡོངས་སུ་སྲུང་བའམ། ཡང་ན་སྣ་གཅིག་ཙམ་ཡིན་ཡང་གཙིགས་སུ་བཟུང་ནས་དང་ལེན་བྱེད་རྒྱུར། པུས་མོའི་ལྷ་ང་ས་ལ་བཙུགས་ནས་ལག་ཟུང་གི་ཐལ་མོ་སྙིང་ཁར་སྦྱར་ཏེ་རེ་འདུན་གྲང་མེད་བྱེད་ཀྱིན་ཡོད།
ལྷག་དཀར་དམ་བཅའ་ཁག
    •    ང་བོད་ཡིན། དེ་རིང་ནས་བཟུང་ངེད་གྱི་མི་ཚང་ནང་བོད་སྐད་གཙང་མ་བཤད་རྒྱུ་ཡིན།
    •    ང་བོད་ཡིན། དེ་རིང་ནས་བཟུང་ང་རང་བོད་མི་དང་འཕྲད་སྐབས་བོད་སྐད་གཙང་མ་བཤད་རྒྱུ་ཡིན།
    •    ང་བོད་ཡིན། དེ་རིང་ནས་བཟུང་མ་ཤི་བར་དུ་རང་ཉིད་བོད་མི་ཞིག་ཡིན་པ་ཉིན་རེར་དྲན་པ་བྱེད་ རྒྱུ་ཡིན།
    •    ང་བོད་ཡིན། དེ་རིང་ནས་གཟའ་ལྷག་པའི་ཉིན་བོད་ལ་གོན་ནས་འགྲོ་རྒྱུ་ཡིན།
    •    ང་བོད་ཡིན། དེ་རིང་ནས་བཟུང་གཟའ་ལྷག་པའི་ཉིན་བོད་སྐད་བཤད་རྒྱུ་ཡིན།
    •    ང་བོད་ཡིན། དེ་རིང་ནས་བཟུང་ངའི་བོད་ཡིག་སྦྱང་རྒྱུ་ཡིན།
    •    ང་བོད་ཡིན། དེ་རིང་ནས་བཟུང་བོད་པར་བཏང་པའི་འཕྲིན་ཡིག་དང་ཁ་པར་གང་ཡིན་ཡང་བོད་སྐད་དང་བོད་ཡིག་བེད་སྤྱད་བྱེད་རྒྱུ་ཡིན།

ལྷག་དཀར་ནས།

བསྐྱར་བཅོས།: ༢༠༡༧/༠༢/༡༦

Leave a Reply

22 thoughts on “ལྷག་དཀར་དམ་བཅའ།

  1. ཀརྨ་རྡོ་རྗེ།

    ལྷ་ དཀར་ དམ་ བཅའ།

    ལྷག་པའི་གཟའ་འདི་༧ རྒྱལ་བའི་བླ་གཟའ་དང་། །
    དཀར་པོའི་ཆོས་རྣམས་བོད་ དོན་གཅིག་ཡིན་པ། །
    དམ་པ་དགོངས་མས་ཞལ་ནས་ཐོས་ བྱུང་བས། །
    བཅའ་དགོས་ཁྲིམས་ཤིག་ད་ནི་ བཅའ་རན་འདུག །

    ལྷ་དཀར་དམ་བཅའ་ཕྱོགས་ཀུན་འཕེལ་གྱུར་ཅིག །

  2. ཀརྨ་རྡོ་རྗེ།

    ང་ཚོ་བོད་མིའི་བོད་སྐད།

    ང་བོད་མི་ཡིན།
    ང་སྐྱེས་ས་བོད་ཡིན།
    ང་འཚོ་ས་བོད་ཡིན།
    ང་འཆི་ས་བོད་ཡིན།

    ང་བོད་པ་ཡིན།
    ངའི་ཕ་བོད་པ་རེད།
    ངའི་ཕ་ཡུལ་བོད་རེད།
    ངའི་ཡུལ་སྐད་བོད་སྐད་རེད།

    ང་རྩམ་ཟན་པ་ཅིག་ཡིན།
    ང་འབྲོག་ལས་བྱེད་མཁན་ཅིག་ཡིན།
    ང་ཞིང་ལས་བྱེད་མཁན་ཅིག་ཡིན།
    ང་བོད་སྐད་རྒྱག་མཁན་ཅིག་ཡིན།

    ང་གངས་ཅན་པ་ཡིན།
    ངའི་ཨ་མ་བོད་མི་རེད།
    ངའི་མ་ཡུལ་བོད་རེད།
    ངའི་མ་སྐད་བོད་སྐད་རེད།

    ང་ཁ་བ་ཅན་པ་ཞིག་ཡིན།
    ངའི་ཕ་མ་ཁ་བ་ཅན་ནས་རེད།
    ངའི་སྤུན་གཉེན་ཁ་བ་ཅན་ནས་ རེད།
    ངའི་ཁ་སྐད་དེ་བོད་སྐད་འདི་རེད།

    ང་ཚོ་བོད་རིགས་ཤིག་ཡིན།
    ང་ཚོ་ཏྰ་ལའི་རྗེས་འབྲངས་ཤིག་ཡིན།
    ང་ཚོ་མདོ་དབུས་ཁམས་གསུམ་ནས་ཡིན།
    ང་ཚོའི་སྐད་དེ་བོད་སྐད་འདི་ཡིན།

    ང་ཚོ་བོད་ལ་སྡོད་མཁན་ཅིག་ཡིན།
    ང་ཚོ་ཁག་ཅིག་བཙན་བྱོལ་བ་ཡིན།
    ང་ཚོ་ཁག་ཅིག་ཚོང་རྒྱག་མཁན་ཡིན།
    ང་ཚོའི་ཚོང་སྐད་དེ་བོད་སྐད་འདི་ཡིན།

    ང་ཚོ་གྲངས་ཉུང་མི་རིགས་ཅིག་ཡིན།
    ང་ཚོ་ཞི་བའི་འཐབ་རྩོད་པ་ཅིག་ཡིན།
    ང་ཚོ་དྲང་བདེན་འཐབ་རྩོད་པ་ཅིག་ཡིན།
    ང་ཚོའི་འབོད་སྒྲ་དེ་བོད་སྐད་འདི་ཡིན།

  3. ལྷག་པ་ཚེ་རིང༌།

    ངེད་བོད་རིགས་ཚང་མས་རང་དོན་རང་གཅེས་ཀྱིས་ལས་གཞི་འདི་རིགས་ཕྱོགས་གང་ས་ནས་གང་ཐུབ་ཀྱིས་སྤེལ་ན་མི་རིང་བར་བོད་སྐད་ཀྱི་ཟུངས་གསོས་ཤིང་རིག་གཞུང་གི་སྟོབས་སྔར་བཞིན་རྒྱས་ངེས་ཡིན་པས་ཕྲན་གྱིས་རྗེས་སུ་ཡིད་རངས་ཙམ་མིན་པར། རྗེས་སུ་འབྲངས་ཏེ་ལག་སྟར་བྱེད་དོ༎