ཕྱི་ཟླ་ ༥ ཚེས་ ༦ ཉིན་ཀིརྟི་དགོན་པའི་རང་




ཕྱི་ཟླ་ ༥ ཚེས་ ༦ ཉིན་ཀིརྟི་དགོན་པའི་རང་ལོ་ ༣༩ ཡིན་པའི་གྲྭ་བློ་བཟང་མཁས་གྲུབ་རྒྱ་ནག་གིས་འཛིན་བཟུང་བྱས་ཡོད་ཅིང་། ཁོང་འཛིན་བཟུང་བྱེད་དགོས་པའི་རྒྱུ་མཚན་དང་ད་ཆར་གང་དུ་བཀག་ཉར་བྱས་ཡོད་མེད་ཤེས་རྟོགས་བྱུང་མི་འདུག ཁོང་གི་ཕ་ཡུལ་རྔ་པ་ཕྱུགས་ལས་འགབ་མ་ཡིན་ཞིང༌ཕ་མིང་ལ་ཐོས་ལི་ཟེར།

གཞན་རྔ་པ་རྫོང་རྨེའུ་རུ་མའི་རུ་ཆེན་གསུམ་པའི་དགེ་ཚང་གི་རང་ལོ་ ༦༠ ཡིན་པའི་དགེ་རིག་འདི་ལོའི་ཕྱི་ཟླ་ ༣ ཚེས་ ༡༩ ཉིན་གྱི་མཚན་མོའི་ཆུ་ཚོད་༡ ། ༤༠ ཙམ་ལ་རྔ་པ་རྨེའུ་རུ་མའི་ནང་ནས་འཛིན་བཟུང་བྱས་ཏེ་ད་བར་གར་ཡོད་ཅི་ཆགས་ཀྱི་གནས་ཚུལ་ཤེས་ཐུབ་མེད།

ཁོང་གིས་ཕྱི་ལོ་ ༢༠༠༨ ལོ་ནས་ད་བར་བོད་ནང་གི་གནས་ཚུལ་མང་པོ་ཞིག་དང་། ལྷག་པར་ཉེ་ཆར་གྲྭ་ཕུན་ཚོགས་ལགས་ཀྱིས་རང་ལུས་མེར་བསྲེགས་བཏང་བའི་སྐོར་ཕྱིར་བསྒྲགས་བྱས་པའི་དོགས་གཞིའི་འོག་འཛིན་བཟུང་བྱས་པ་ཞིག་ཡིན་འདུག་ལ། ད་ཐེངས་ཀྱི་བཀག་ཉར་འདི་ནི་ཁོང་བཀག་ཉར་བྱས་པ་ཐེངས་གསུམ་པ་ཡིན་ཞིང༌།

དེང་སྐབས་ཤེས་རྟོགས་བྱུང་བར་ཁོང་དང་གྲྭ་པ་དགུ་ལ་ད་ལོའི་དོན་རྐྱེན་དང་འབྲེལ་བའི་ ནག་ཉེས་ཆེ་ཤོས་ཀྱི་ཞྭ་མོ་གཡོགས་ནས་མི་སྤྱོད་ལས་འདས་པའི་སྡུག་སྦྱོང་མནར་ གཅོད་གཏོང་གིན་ཡོད་པ་དང་།

ཁོང་འཛིན་བཟུང་བྱས་རྗེས་ཁོང་གི་གཟའ་ཟླ་བུ་ཕྲུག་དང་ཉེ་འབྲེལ་སོགས་ལ་དཀའ་ངལ་ཆེན་པོ་བཟོ་བཞིན་ཡོད་འདུག་པ་ནི།

འདི་ལོའི་ཕྱི་ཟླ་ ༣ ཚེས་ ༢༠ ཉིན་ཁོང་གི་གཟའ་ཟླ་དོན་ཁོ། རང་ལོ་ ༥༧

ཡིན་པ་འཛིན་བཟུང་གིས་ཉིན་ཤས་རིང་བཀག་ཉར་བྱས་པ་དང་དེའི་རིང་གཅར་རྡུང་དྲག་པོ་བཏང་ཞིང༌།

ཕྱི་ཟླ་ ༣ ཚེས་ ༢༢ ཉིན་ཁོང་གི་བུ་མོ་མེ་ཏོག རང་ལོ་ ༢༣

ཡིན་པ་འཛིན་བཟུང་གིས་ཕྱི་ཟླ་ ༤ ཚེས་ ༢ བར་བཀག་ཉར་བྱས་པ་དང།
ཉིན་དེར་ཁོང་མོ་ཀློད་གྲོལ་སྐབས་བཀག་ཉར་ཁང་དུ་གཅར་རྡུང་དྲག་པོ་བཏང་སྟེ་གསོན་པའི་རེ་བ་མེད་པ་ལྟ་བུར་བཟོས་ཡོད་ཅིང༌།

སྨན་ཁང་དུ་བསྟེན་གཏུག་བྱེད་རྒྱུར་ས་གནས་སྲིད་གཞུང་གིས་བཀག་འགོག་བྱས་ཏེ་སྨན་ བཅོས་མཐུན་རྐྱེན་གཏན་ནས་མ་རག་པར་ད་ལྟ་ཡང་ཉལ་སར་ལྷུང་ནས་ཡོད་ཅིང༌།

མོའི་གཟུགས་པོ་ཡོངས་རྨ་ཁས་ཁེངས་ཤིང༌།
ཀླད་པ་ཡང་རྒྱུན་ལྡན་མ་ཡིན་པ་ཞིག་ཆགས་ཡོད་འདུག
བུ་མོ་མེ་ཏོག་ལགས་ནི་ཕྱི་ལོ་ ༢༠༠༨
ལོར་ཡང་རྒྱ་གཞུང་གིས་བཀག་ཉར་འོག་དཀའ་སྡུག་མནར་གཅོད་ཧ་ཅང་མང་པོ་མྱངས་མཁན་ཞིག་ཡིན་ཞིང་།

ཉེ་ཆར་འཛིན་བཟུང་བྱེད་དགོས་པའི་རྒྱུ་མཚན་ནི་ཕ་དགེ་རིག་གིས་ཕྱི་ཕྱོགས་སུ་མི་སུ་ ལ་འབྲེལ་བ་བྱེད་ཀྱིན་ཡོད་མེད་རྩད་གཅོད་བྱེད་ཆེད་ཡིན་འདུག་ལ།

ཁོང་མོས་མོ་བསད་ཀྱང་གང་ཡང་མི་ཤེས་ཞེས་པའི་ལན་གཅིག་པུ་བཏབ་རྐྱེན་དེ་ལྟར་ཚད་ལས་བརྒལ་བའི་གཅར་རྡུང་མནར་གཅོད་ཕོག་པ་ཞིག་ཡིན་འདུག

གཞན་ ཡང༌། དགེ་རིག་དང་ཉེ་འབྲེལ་ཡོད་པའི་སྐྱ་སེར་མང་པོ་ཞིག་རྒྱ་གཞུང་གིས་འཛིན་བཟུང་ བྱེད་ཉེའི་མཚམས་བྲོས་བྱོལ་བྱས་ཡོད་ཀྱང་དེ་ནས་བཟུང་ཁོང་རྣམས་ཀྱི་གནས་ཚུལ་གང་ ཡང་འབྲེལ་ཡོད་ཚོས་ཤེས་རྟོགས་ཡོང་གི་མེད་འདུག་པས་རྒྱ་གཞུང་གིས་འཛིན་བཟུང་ བྱས་པ་མིན་ནམ་སྙམ་པའི་སེམས་ཁྲེལ་ཡོང་གི་ཡོད་འདུག

དགེ་རིག་དང་དོན་ཁོ་གཉིས་ཀྱི་བུ་མོ་ཞིག་སློབ་གྲྭའི་ནང་ཡོད་པ་དེས་ཀྱང་བཀའ་དྲིན་ཆེས་ཆེ་བའི་དགེ་ རྒན་དང་། སློབ་གྲོགས་རྣམས་དང་དེ་བཞིན་སློབ་གྲྭ་བཅས་བློས་བཏང་ནས་ཉེན་ཡོལ་དུ་འགྲོ་དགོས་བྱུང་འདུག

དགེ་རིག་གི་གཟའ་ཟླ་དོན་ཁོའི་ཚ་བུ་རྔ་པ་ཀིརྟི་དགོན་པའི་གྲྭ་བློ་བཟང་ཚེ་རིང་།

རང་ལོ་ ༢༤ ཡིན་པ་ཁོང་འདི་ལོའི་ཕྱི་ཟླ་ ༣ ཚེས་ ༡༦

རྗེས་ནས་གར་སོང་ཆ་མེད་དུ་གྱུར་ཡོད་པའི་གནས་ཚུལ་སོགས་དགེ་ཚང་དང་དགེ་ཚང་གི་གཉེན་ ཉེ་འབྲེལ་སོགས་ལ་དེང་སྐབས་དཀའ་ངལ་ཧ་ཅང་མང་པོ་ཞིག་འཕྲད་བཞིན་ཡོད་འདུག

དེང་སྐབས་ཀིརྟིའི་དགོན་པའི་ནང་ལ་གྲྭ་ཤག་རེ་རེ་བཞིན་དྲག་ཆས་དམག་དཔུང་དང་དམིགས་བསལ་ཉེན་རྟོག་པ་སོགས་དང༌།
དེ་མིན་གཟུགས་དང་སྒྲ་ལེན་འཕྲུལ་ཆས་བཅས་ཀྱིས་ཕྱི་ནང་ཀུན་ལ་དམ་དྲག་སྔར་བཞིན་ཡོད་མུས་དང༌།

དེང་སྐབས་དགོན་པའི་ནང་མེད་པའི་གྲྭ་པ་རྣམས་ཀྱི་མིང་གསལ་བསྒྲགས་བྱས་ཏེ། ཁོང་ཚོ་ད་ནས་བཟུང་དགོན་པའི་ནང་ཕྱིར་ཡོང་གཏན་ནས་མི་ཆོག་ཚུལ་དང་།

དེ་བཞིན་གྲྭ་ཤག་སྟོང་པ་རྣམས་ཀྱི་སྒོ་ལ་(སྒོ་ཕྱེ་མི་ཆོག)ཅེས་པའི་ཡི་གེ་སྦྱར་ ཏེ་ད་ནས་བཟུང་ཁང་པ་འདིའི་བདག་པོ་ཕྱིར་ཁང་པ་འདིའི་ནང་ལ་ཡོང་མི་ཆོག་ཚུལ་སོགས་ཀྱི་གསལ་བསྒྲགས་ཡི་གེ་མང་པོ་སྦྱར་བཞིན་ཡོད་འདུག

དགོན་པ་བཀག་སྡོམ་བྱས་ཏེ་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་སྤེལ་རྒྱུའི་དུས་ཡུན་ཐོགས་མའི་ཐག་ གཅོད་ཟླ་བ་གསུམ་ཡིན་ཡང་། ད་ལྟའི་རྣམ་འགྱུར་ལ་བལྟས་ན་དེ་ལས་རིང་དུ་གཏོང་དགོས་ སྐོར་ཡང་དང་བསྐྱར་དུ་རྗོད་ཀྱིན་ཡོད་འདུག་ལ།

དེང་སྐབས་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་སྤེལ་མཁན་དུ་རིམ་པ་སོ་སོའི་ལས་བྱེད་པ་སྟོང་ཕྲག་ བརྒལ་བ་དགོན་པའི་ནང་རྒྱུན་དུ་ཡོང་བཞིན་པ་དང་།

གྲྭ་ཤག་རེ་རེ་བཞིན་དུ་ལས་བྱེད་པ་དང་ཉེན་རྟོག་པ་དམག་མི་བཅས་ཀྱིས་སློབ་གསོ་ཟེར་བ་བཙན་དང་དབང་གིས་སྤེལ་མུས་སུ་ཡོད་པར་མ་ཟད།
ཕྱི་ཟླ་ ༥ ཚེས་ ༦ ནས་ད་བར་གྲྭ་པ་ ༢༠
ལྷག་འཛིན་བཟུང་གིས་བཀག་ཉར་བྱས་ཡོད་ཚུལ་འདུག་ནའང་དགོན་པའི་ནང་དམ་དྲག་བྱེད་ཤུགས་ཆེ་བའི་དབང་གིས་རེ་རེ་བཞིན་ཤེས་ཐབས་མ་བྱུང་བ་བཅས།




བསྐྱར་བཅོས།: ༢༠༡༦/༠༡/༠༦

Leave a Reply