ལྷོ་རྒྱ་བོད་གསུམ་ཆོས་བརྒྱུད་རིག་གཞུང་།


གནས་ཚུལ་བཏང་འབྱོར་ལ། ཁ་སང་ཕྱི་ཚེས་ ༡༧ ཉིན། རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་གོ་སྒྲིག་ཞུས་པའི་ལྷོ་རྒྱ་བོད་གསུམ་ནང་བསྟན་རིག་གཞུང་ཉམས་མྱོང་བརྗེ་རེས་ཀྱི་བཞུགས་མོལ་ཚོགས་འདུ་ཐེངས་དང་པོདེ་རྒྱལ་ས་ཐའེ་པེ་ཡི་ཐའེ་ཝན་དགེ་འོས་སློབ་གྲྭ་ཆེན་མོའི་ཕྱོགས་བསྡུས་ཁང་ཆེན་གྱི་རྒྱལ་སྤྱིའི་ཚོགས་ཁང་དུ་འཚོགས་ཡོད་ཅིང་། དེ་ནི་ཐའེ་ཝན་བོད་བརྒྱུད་ནང་བསྟན་གྱི་ལོ་རྒྱུས་ཐོག་ལྷོ་བྱང་བརྒྱུད་པ་གསུམ་གྱི་ཆེད་མཁས་པ་དང་གནད་ཡོད་མི་སྣ་ཚང་འཛོམས་ཀྱིས་བོད་བརྒྱུད་གཙོ་བོར་བྱས་པའི་བརྒྱུད་པ་ཕན་ཚུན་བར་གྱི་གནས་བབ་སྤྱི་དང་བྱེ་བྲག་ལ་བགྲོ་གླེང་ཞིབ་ཕྲ་གནང་ཆེད་བསྡུ་སྐོང་གནང་བའི་ཚོགས་འདུ་ཐོག་མ་དེ་ཆགས་ཡོད།

ཚོགས་འདུའི་དུས་ཡུན་ཧྲིལ་པོར། ནང་བསྟན་མཐུན་སྒྲིལ་དང་ཉམས་མྱོང་བརྗེ་རེས་ཞེས་པའི་རྩ་བའི་བརྗོད་གཞི་གཉིས་ལནང་གསེས་ ༦ ཡོད་པ་དག་ནི། དང་པོ། ལྷོ་རྒྱ་བོད་གསུམ་ནང་བསྟན་ཐུན་མོང་གི་ནང་པའི་ངོས་འཛིན། གཉིས་པ། ལྷོ་རྒྱ་བོད་གསུམ་ནང་བསྟན་ཐུན་མོང་གི་ནང་པའི་གཞུང་ལུགས། གསུམ་པ། ལྷོ་རྒྱ་བོད་གསུམ་ནང་བསྟན་ཐུན་མོང་གི་ནང་པའི་ཉམས་ལེན། བཞི་བ། ལྷོ་རྒྱ་བོད་གསུམ་ནང་བསྟན་འཛིན་སྐྱོང་ཉམས་མྱོང་བརྗེ་རེས། ལྔ་པ། ལྷོ་རྒྱ་བོད་གསུམ་ནང་བསྟན་དར་སྤེལ་ཉམས་མྱོང་བརྗེ་རེས། དྲུག་པ། ལྷོ་རྒྱ་བོད་གསུམ་ནང་བསྟན་ཕན་ཚུན་གྱི་ལེགས་ཆ་བསྡུ་ལེན་བཅས་ཡིན་འདུག

བྱེ་བྲག་གི་ཆ་ནས་བོད་ཀྱི་ནང་ཆོས་ཀྱི་དོན་དངོས་ཀྱི་རང་བཞིན། བོད་ཀྱི་ནང་ཆོས་ལ་གོ་ནོར་དང་ཆེད་དུ་དགག་པ་བྱེད་པའི་ཚོགས་སྡེ་ཁག་ལ་འོས་ཤིང་འཚམས་པའི་གདོང་ལེན་བྱེད་ཕྱོགས། རྒྱ་བརྒྱུད་ནང་ཆོས་དང་བོད་བརྒྱུད། ལྷོ་བརྒྱུད་བཅས་ཀྱི་རྩ་བའི་མཐུན་ཆ་དང་། ཐུན་མོང་གི་འབད་བརྩོན་བྱེད་ཕྱོགས། ནང་ཆོས་དང་སྤྱི་ཚོགས་ཀྱི་བར་ཐག་ཉེ་རུ་གཏོང་ཐབས། རྒྱལ་སྤྱིའི་ཐོག་གི་བོད་བརྒྱུད་ནང་བསྟན་གཙོ་བོར་གྱུར་པའི་ནང་བསྟན་གྱི་གནས་བབ། ཡུལ་དུས་དང་མི་རིགས་རིག་གཞུང་མི་འདྲ་བའི་ཤུགས་རྐྱེན་ཐེབས་པའི་ཆོས་ལུགས་ཕྱེ་ བྲག་པའི་མངོན་སྟངས་ལ་ཕན་ཚུན་རྒྱུས་ལོན་བྱེད་སྟངས། སྐད་ཡིག་དང་འགྲུམ་འགྲུལ་གྱི་བཀག་རྒྱ་ཉུང་དུ་འགྲོ་བཞིན་པའི་དུས་རབས་འདིར་ནང་པ་ཕན་ཚུན་དབར་སྔར་ལས་ལྷག་པའི་མཉམ་འབྲེལ་གྱི་གནས་བབ་སྐྲུན་ཐབས་དང་ཕན་ཚུན་ལེགས་ཆ་ལེན་སྟངས་སོགས་ཀྱི་སྟེང་དུ་གཙོ་བོའི་བགྲོ་གླེང་གནང་ཡོད།

 

དེ་བཞིན། ཐའེ་ཝན་ཕྱོགས་ཀྱི་མཁས་པ་དག་གི་ངོས་ནས་ཀྱང་བོད་བརྒྱུད་ནང་བསྟན་གྱི་གནས་བབ་ལ་ཐུག་ཁུར་དང་། འབྱུང་འགྱུར་ཡང་ཕན་ཚུན་སྔར་ལས་ལྷག་པའི་མཐུན་ལམ་གྱི་ཐོག་ནས་བོད་བརྒྱུད་ནང་བསྟན་དར་སྤེལ་གྱི་ཕྱོགས་ལ་རྒྱབ་སྐྱོར་ཆེན་པོ་ཡོད་པའི་བཀའ་མོལ་དང་རྣམ་འགྱུར་ཆེར་བསྟན་གནང་བ་དང་དོན་ཕན་ལྡན་པའི་དགོངས་ཚུལ་དང་དྲི་བ་ཡང་མང་པོ་གནང་ཡོད་པ་རེད།

ཚོགས་འདུ་དེའི་འཚོགས་སྟངས་གྲལ་རིམ་གྱི་མགོ་མཇུག་གཏན་ནས་མེད་པའི་ཅོག་ ཙེ་སྒོར་མོའི་ཚོགས་འདུ་ཞིག་ཡིན་པ་སྟེ། དེ་ནི་ཆོས་བརྒྱུད་ཁག་གི་མཐུན་སྒྲིལ་གྱི་ཨ་ལུང་རིས་སུ་འཁོར་བའི་རྟེན་འབྲེལ་ དང་། ཐོབ་དང་གོ་ས་ཙམ་ལ་འཁྲེན་པའི་སྐབས་འཚོལ་བ་དག་གི་བྱ་བཞག་ལས་དབྱེ་འབྱེད་བྱས་པའི་དོན་དམ་པའི་ནང་མོལ་གྱི་ལྷན་འཛོམས་ཡིན་པའི་མཚོན་བྱེད་ཡིན་པ་ཞིབ་འཇུག་ ཚོགས་པའི་ངོས་ནས་འགྲེལ་བརྗོད་གནང་ཡོད།

ཉིན་དེར། ཉེ་ཆར་ལེགས་འགྲུབ་བྱུང་བའི་སྐབས་སྔ་མའི་བོད་བརྒྱུད་ནང་བསྟན་དར་སྤེལ་གཏོང་ ཕྱོགས་སྐོར་གྱི་བགྲོ་གླེང་དང་ཞིབ་འཇུག་ཁང་གི་ངོ་སྤྲོད་སོགས་ཀྱི་ཆེད་སྒྲིག་བརྙན་འཁོར་ལྷག་བསམ་གྱི་མགོ་འཛུགས་ཞེས་པ་ཞིག་ཀྱང་དབུ་འབྱེད་གནང་ཡོད་པ་དང་། དུས་ཡུན་ཆུ་ཚོད་གཅིག་གི་རིང་ཚད་ཡོད་པའི་བརྙན་འཁོར་དེར། སྐབས་སྔ་མའི་ཚོགས་འདུའི་ཐོག་གི་རིས་མེད་ཀྱི་མཁས་པ་ཉི་ཤུ་ཡས་མས་ཤིག་གི་འབྲེལ་ཡོད་གསུངས་བཤད་ཀྱི་ཉིང་བསྡུས་དང་། ཞིབ་འཇུག་ཚོགས་པའི་ལས་དོན་དང་དམིགས་ཡུལ་སོགས་ཞིབ་ཕྲ་རྒྱ་བོད་ཡིག་རིག་གནས་ ཀྱི་ཐོག་ནས་གསན་གཟིགས་ཐུབ་པ་བཟོས་ཡོད།

 

ཐེངས་འདིའི་ཚོགས་བཅར་བ་དག་ནི། ཐའེ་ཝན་དུ་ལོ་ཙཱའི་སློབ་སྦྱོང་གནང་བཞིན་པའི་ལྷོ་བརྒྱུད་ནང་པའི་རྒྱལ་ཁབ་ཐའེ་ལན་ཊ་རྒྱལ་ཡོངས་ཀྱི་སྐད་གྲགས་ཆེ་ཤོས་ཀྱི་ཆོས་ཀྱི་བསྟི་གནས་ཆོས་སྐུ་དགོན་གྱི་སྡེ་སྣོད་འཛིན་པ་ཧྲི་ཅི་ཤང་དང་། སྡེ་སྣོད་འཛིན་པ་ཧྲི་ཧྲིན་ཝི་རྣམ་གཉིས། དྷི་ལི་སློབ་གྲྭ་ཆེན་མོའི་ནང་རིག་པའི་འབུམ་རམས་པ་དང་ལོ་ཙཱ་བ། བཙུན་མ་ཧྥ་ཧྭའེ། ཀྲུང་ཧྭ་སྤྱན་ལྔ་མཐུན་ཚོགས་ཀྱི་གཏན་འཇགས་སློབ་སྟོན་པ་དང་བལ་ཡུལ་དུ་རྟེན་གཞི་བྱས་པའི་ཀུན་དགའ་བོ་ཐེབས་རྩ་ཚོགས་པ་གསར་འཛུགས་ཀྱི་ཚོགས་གཙོ། རྩོམ་པ་པོ་དང་སྤྱི་ཚོགས་ཞབས་ཞུ་བ་བཙུན་མ་ལིན་ཧྭི། ཐའེ་ཝན་གྱི་ཚེ་སྲོག་བརྙན་འཕྲིན་ཁང་གི་ཆོས་འཆད་མཁན། ཡྭན་བཀང་ནང་བསྟན་སློབ་གླིང་གི་དགེ་རྒན་ཆེན་མོ་དང་རྩོམ་པ་པོ་སློབ་དཔོན་ཏྭ་ཅི། རྒྱལ་སྤྱིའི་ནང་བསྟན་གཟེངས་ཐོན་བུད་མེད་ཞེས་པའི་བྱ་དགའ་ཐོབ་མཁན་ཀྲུང་ཧྭ་ནང་བསྟན་གཞོན་ནུའི་མཐུན་ཚོགས་ཀྱི་དྲུང་ཆེ་དང་། ཐའེ་པེ་ནང་བསྟན་གཞོན་ནུའི་མཐུན་ཚོགས་ཀྱི་རྒྱུན་ལས་གཙོ་འཛིན་བཙུན་མ་མིན་ཡུས། ཐའེ་པེ་ཚན་རིག་མཐོ་སློབ་ཏུ་འཆར་འགོད་ལས་རིགས་ཀྱི་འབུམ་རམས་ཐོག་སློབ་གཉེར་གནང་ བཞིན་པའི་སྤྱི་ཚོགས་ཞབས་ཞུ་བ་བཙུན་མ་མུའུ་ཧྥན། རྒྱ་བཙུན་ལོ་ཙཱ་བ་བསྟན་འཛིན་རྡོ་རྗེ། ཐའེ་ཝན་ཆབ་སྲིད་མཐོ་སློབ་གྱི་སྐད་བརྡ་རིག་པའི་འབུམ་རམས་པ། ཧྭ་ཧྥན་སློབ་གྲྭ་ཆེན་མོའི་ནང་ཆོས་སྡེ་ཚན་གྱི་དགེ་རྒན་ཆེན་མོ་དང་དངོས་ལུགས་སློབ་གླིང་གི་གླིང་གཙོ་སྐུ་ཞབས་ཞོང་ཝན།

 

ཧྥོའུ་རིན་སློབ་གྲྭ་ཆེན་མོའི་མཚན་ཉིད་རིག་པའི་འབུམ་རམས་པ་དང་ཧྭ་ཧྥན་སློབ་གྲྭ་ཆེན་མོ་དགེ་རྒན་ཆེན་མོ་ལས་རོགས་པ། མདོ་ཕལ་པོ་ཆེའི་ཆོས་བརྒྱུད་ཞིབ་འཇུག་ཁང་གི་འགན་འཛིན་དང་ནང་ཆོས་ཉམས་ཞིབ་པ་སྐུ་ཞབས་ཅི་ཊི་ཐའེ་ཝན་དགེ་འོས་སློབ་ཆེན་གྱི་རྩོམ་རིག་འབུམ་རམས་པ་དང་མདོ་ཕལ་པོ་ཆེའི་ཆེད་ལས་ཉམས་ཞིབ་པ། དགེ་རྒན་ཆེན་མོ་མཁྱེན་ལྡན་མ་ཁྲིན་ཆས་བཅས་ཐའེ་ཝན་ཕྱོགས་ཀྱི་མཁས་པ། དགེ་བཤེས་འཇམ་དཔལ་ཆོས་འཛིན། དགེ་བཤེས་ཕྲིན་ལས་རྒྱ་མཚོ། གཙོས་གསེར་ཁྲི་རིན་པོ་ཆེ། དགེ་བཤེས་ཆོས་ཀྱི་དབང་པོ། མཁན་པོ་ཚུལ་ཁྲིམས་རྣམ་དག མཁན་པོ་བསོད་ནམས་སེང་གེ མཁན་པོ་ཚེ་རིང་བསམ་འགྲུབ། སྤྲུལ་སྐུ་རིག་འཛིན་འཇའ་ཚོན། ཀཿཐོག་རིག་འཛིན་ཆེན་པོ། སྤྲུལ་སྐུ་ཐུབ་བསྟན་ནོར་བུ། མཁན་པོ་ཚུལ་ཁྲིམས་རྣམ་དག མཁན་པོ་ཆོས་ཉིད་དོན་རྟོགས། མཁན་པོ་ཚེ་རིང་བཀྲ་ཤིས། སློབ་དཔོན་གསོད་ནམས་ཕུན་ཚོགས་བཅས་ཆོས་བརྒྱུད་རིས་མེད་ཀྱི་མཁན་སློབ་དགེ་བཤེས་ཁག་བཅས་ལས་རིགས་ཁག་གི་གནད་ཡོད་མི་སྣ་ཤ་སྟག་མཉམ་ཞུགས་གནང་ཡོད

དེ་ཡང་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་ནི། ཕྱི་ལོ་ ༢༠༠༩ ལོར་ཐའེ་ཝན་དུ་དབུ་བརྙེས་པའི་གཞུང་འབྲེལ་མིན་པའི་ཚོགས་པ་ཞིག་ཡིན་ཞིང་། ད་བར་སྐབས་བསྟུན་སྤྱི་ཚོགས་ཞབས་ཞུ་ལས་འགུལ་སྤེལ་བ་དང་། སྒྲ་སྒྱུར་སྐོར་དང་ནང་ཆོས་དར་སྤེལ་གཏོང་ཕྱོགས་ཀྱི་བགྲོ་གླེང་ཚོགས་འདུ་བསྡུ་སྐོང། ནང་ཆོས་དང་འབྲེལ་བའི་དཔེ་དེབ་དང་བརྙན་འཁོར་གལ་ཆེན་པར་སྐྲུན། ནང་ཆོས་ངོ་སྤྲོད་ཀྱི་འཛིན་གྲྭ་གོ་སྒྲིག་སོགས་ཀྱི་ལས་དོན་གཉེར་བཞིན་ཡོད་པ་རེད།

གནས་ཚུལ་མཁོ་གཏོང་བ། རྫ་ཚེ་རིང་བཀྲ་ཤིས།

བསྐྱར་བཅོས།: ༢༠༡༧/༠༢/༡༦

Leave a Reply

6 thoughts on “ལྷོ་རྒྱ་བོད་གསུམ་ཆོས་བརྒྱུད་རིག་གཞུང་།

  1. རྫ་ཚེ་རིང་བཀྲ་ཤིས།

    དཔེར་ན། ང་རང་གཅིག་པུའི་ངོས་ནས་ཀྱང་། ས་སྐྱའི་ངོར་མཁན་ཆེན་སྐུ་གཞོན་དང་། ལྷ་རམས་པ་ཚ་འབྲོང་རིན་པོ་ཆེ། རྒྱའི་སློབ་དཔོན་སྐད་གྲགས་ཅན་བསླབ་པ་རྒན་པ་ཞིག་བཅས་ལ་ཆེད་དུ་ཐེངས་མང་གསོལ་བ་བཏབ་པ་ཡིན་ལ་རོགས་པ་གཞན་དག་གིས་ཀྱང་ཆ་བགོས་ཀྱིས་བླ་མ་སྐད་གྲགས་ཅན་དང་མི་སྣ་སྐད་གྲགས་ཅན་ཧ་ཅང་མང་པོ་ཞིག་ལ་ཞུས་པ་རེད་དེ། འགའ་རེ་དང་པོ་ནས་མཛད་རིམ་སོགས་ཀྱིས་ཕེབས་མི་ཐུབ་པར་གསུངས་པ་དང་། འགའ་རེ་ནི་དུས་ཚོད་སླེབས་པ་དང་དམིགས་བསལ་ལས་བྲེལ་གྱིས་ཕྱིར་འཐེན་གནང་དགོས་པའི་བཀའ་ཕེབས་པ་སོགས་ཧ་ཅང་མང་པོ་ཡོད། རེ་རེ་ནས་ཞུ་ཚོད་མེད་པ་འདྲ་ཞིག་རེད་ལགས།
    སྐུ་ཉིད་ཚོགས་འདུ་བཀོད་སྒྲིག་བྱས་པའི་ཉམས་མྱོང་ཡོད་མཁན་ཞིག་ཡིན་ན་ཆ་རྐྱེན་གཞན་དག་བཀོད་སྒྲིག་བྱེད་པ་ལས་སྐུ་མགྲོན་གདན་འདྲེན་ཞུ་རྒྱུ་ནི་དཀའ་ལས་ཆེ་ཤོས་རེད།

    ཁྱད་པར་

  2. བེ་རོ་ཙ་ན།

    ཚོགས་འདུ་བསྡུ་སྐོང་གནང་བ་ཡག་པོ་འདུག། དེ་གར་བཞུགས་པའི་མཁན་སྤྲུལ་དགེ་བཤེས་གཞུང་ལུགས་སྨྲ་བ་དང་རྒྱ་ཡི་དགེ་སློང་བོད་བརྒྱུད་ནང་བསྟན་ཞིབ་འཇུག་མཁན་མང་པོ་ཞིག་ཕེབས་མི་འདུག། གདན་འདྲེན་ཞུ་མ་ཐུབ་པའི་དགོངས་ཚུལ་འབྲེལ་བརྗོད་གནང་རོགས།