ངས་བོད་ཕྱི་ནང་གཉིས་ཀྱི་རྩོམ་པ་པོའི་སྨྲ་བརྗོད་རང་དབང་གཙོ་བོར་འཛིན་རྒྱུ་ཡིན།

 

ཟླ་འདིའི་ཚེས་ ༩ དང་ ༡༠ ཉིན་གཉིས་རིང་རྒྱལ་སྤྱིའི་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་ཆེན་ཐེངས་ལྔ་པ་ཚོགས་པའི་སྟེང་། དེ་སྔའི་སྒྲིག་གཞི་ཁག་ཅིག་ལ་བསྒྱུར་བཅོས་བཏང་སྟེ་ཚོགས་བཅར་བ་ཡོངས་ཀྱིས་འོས་ཤོག་འཕངས་བ་བརྒྱུད་དེ། རྩོམ་པ་པོ་མཐུན་ཚོགས་ཀྱི་རྒྱུན་ལས་གསར་འདེམས་གནང་བའི་ཁྲོད། དགེ་རྒན་ཆེན་མོ་སྤྲེལ་ནག་པ་བློ་གྲོས་དཔལ་བཟང་ལགས་ཚོགས་གཙོར་བདམས་ཡོད་སྟབས། འདི་གའི་གསར་འགོད་པས་ཁོང་ལ་བཅར་འདྲི་ཞུས།

 

དྲི་བ། ཁྱེད་རང་ད་ལོའི་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཙོར་བདམས་པའི་ཐད་དགོངས་ཚུལ་ག་རེ་ཡོད།

 

DSC_2014ལན།  ང་ ༢༠༠༦ ལོའི་རྩོམ་པ་པོའི་ཚོགས་ཆེན་སྟེང་ཕྱིན་ཏེ་བོད་ཀྱི་རྩོམ་རིགས་སྒྱུ་རྩལ་ཐད་ཀྱི་ལྟ་བ་ལངས་ཕྱོགས་སྐོར་ལ་ཁ་བརྡ་བྱས་མྱོང་ཡོད། དེ་མ་གཏོགས་ང་པེན་བོད་ཀྱི་རྩོམ་པ་པོའི་མཐུན་ཚོགས་ལ་འབྲེལ་བ་གང་ཡང་མེད། ཉིན་འགའི་སྔོན་ལ་ངས་སློབ་མ་ཚོ་ཁྲིད་ནས་ཝར་ཎ་མཐོ་སློབ་དང་གནས་མཆོག་རྡོར་ལྡན་སོགས་སུ་ཞིབ་མཇུག་སློབ་མ་ཚོའི་མཐའ་མའི་དཔྱད་རྩོམ་ལ་དཔྱད་གཞིའི་ཡིག་ཆ་ཁག་ཅིག་འཚོལ་བསྡུ་བྱེད་དུ་ཕྱིན་ནས་ཕྱིར་ལོག་པའི་ལམ་བར་དུ། ཚོགས་གཞོན་ཨ་རིག་དགེ་མཐོང་ལགས་ཀྱིས་ཁ་པར་ཞིག་བསླེབས་སོང་ཡང་སྐད་ཆ་གསལ་བོ་གོ་ཡི་མི་འདུག དེ་རིང་འདིར་མཐུན་ཚོགས་ཀྱི་ཚོགས་གཞོན་དང་དྲུང་ཆེ་སོགས་ཚང་མ་ཡོང་སྟེ། ང་ཡིན་གཅིག་མིན་གཅིག་ཚོགས་གཙོར་འདུག་དགོས་སྐོར་བརྗོད་བྱུང་། ང་ད་སྔ་དགེ་རྒན་བྱས་མྱོང་བ་ཙམ་མ་གཏོགས་འདི་ལྟ་བུའི་ཚོགས་པ་ཞིག་གི་ནང་ལས་ལས་ཀའི་ཉམས་མྱོང་ཅི་ཡང་ཡོད་པ་མ་རེད། ཡིན་ནའང་ཚོགས་མི་ཡོངས་ཀྱིས་ཡིད་ཆེས་དང་རེ་འདུན་ཆེན་པོ་ཞིག་གི་ཐོག་ནས་བདམས་པ་ཡིན་སྟབས་ངས་ཀྱང་འགན་དེ་བླངས་པ་ཡིན། མཐུན་ཚོགས་ཀྱི་རྒྱུན་ལས་གཞན་རྣམས་དང་ཚོགས་མི་ཡོངས་ཀྱི་རམ་འདེགས་རྒྱབ་སྐྱོར་ལ་བརྟེན་ཏེ་འགྲོ་རྒྱུ་དེ་རེད།

 

དྲི་བ། སྤྱི་ཡོངས་ནས་བོད་ཀྱི་རྩོམ་པ་པོའི་མཐུན་ཚོགས་ཟེར་བ་འདིར་ལྟ་སྟངས་གང་འདྲ་ཡོད།

 

ལན། སྤྱིར་བཏང་བོད་ཀྱི་རྩོམ་པ་པོའི་མཐུན་ཚོགས་འདི་རྒྱལ་སྤྱིའི་རྩོམ་པ་པོའི་མཐུན་ཚོགས་ཀྱི་ཡན་ལག་ཅིག་ཡིན་སྟབས། བོད་ཀྱི་རྩོམ་པ་པོའི་མཐུན་ཚོགས་ཟེར་བ་འདི་བོད་གཞུང་གི་སྟངས་འཛིན་འོག་གི་ཉམས་ཞིབ་སྡེ་ཚན་ཁག་དང་། ཚོགས་པ་ཁག་གི་འོག་ཡོད་པའི་ཉམས་ཞིབ་ཚན་པ་སོགས་དང་ཡེ་ནས་འདྲ་ཡི་མ་རེད། བོད་ཀྱི་རྩོམ་པ་པོའི་མཐུན་ཚོགས་ཀྱི་ཚད་གཞི་དེ་རྒྱལ་སྤྱིའི་རྩོམ་པ་པོའི་མཐུན་ཚོགས་ཀྱི་ཚད་གཞིར་བསླེབ་རྒྱུ་དེ་གལ་ཆེན་པོ་རེད། དེར་བརྟེན། ང་ཚོགས་གཙོར་བསྡད་པའི་རིང་ལ་གཞུང་སྒེར་གང་རུང་གི་སྟངས་འཛིན་འོག་གི་ཚོགས་པ་ལྟ་བུར་ངོས་འཛིན་བྱེད་རྒྱུ་མིན་པར། དེ་ལས་ཡར་རྒྱས་གོང་སྤེལ་དང་འཕོ་འགྱུར་ཇི་ལྟར་གཏང་རྒྱུ། གྲུབ་འབྲས་ཇི་ལྟར་འབྱུང་ཐབས་བཅས་སུ་འབད་བརྩོན་བྱ་རྒྱུ་ཡིན།

 

དྲི་བ། གལ་སྲིད་ཁྱེད་རང་ཚོགས་གཙོར་བསྡད་པ་ཡིན་ན། ད་ལྟ་ལས་འཆར་གསལ་བོ་མེད་ཀྱང་། སྤྱིའི་ཆ་ནས་བཙན་བྱོལ་ནང་གི་རྩོམ་པ་པོའི་མཐུན་ཚོགས་ཞིག་ལ་འདི་དང་དེ་དགོས་པ་རེད་སྙམ་པའི་འཆར་སྣང་གང་འདྲ་ཡོད།

 

ལན། གོང་དུ་བཤད་པ་ལྟར་ང་ཚོགས་གཙོར་བདམས་པ་དེ་གློ་བུར་བ་ཞིག་རེད། ད་ལྟ་ང་ལ་དམིགས་བསལ་གྱི་འཆར་གཞི་གང་ཡང་མེད། ཡིན་ནའང་ང་རང་གིས་ཆ་རྐྱེན་གསུམ་བགྲང་འདོད་པ་ནི། སྤྱིར་རྩོམ་པ་པོ་སྒེར་ཡིན་ན་འདྲ་ལ་རྩོམ་པ་པོའི་མཐུན་ཚོགས་ཡིན་ཡང་ཆོག དང་པོ། རྩོམ་པ་པོ་ཞིག་ལ་ངེས་པར་དུ་ཚང་དགོས་པའི་ཆ་རྐྱེན་གཙོ་བོ་དེ་ཆོས་ལུགས་ཆབ་སྲིད་དཔལ་འབྱོར་གང་ཡང་མ་ཡིན་པར་སྨྲ་བརྗོད་རང་དབང་དགོས་པ་དེ་རེད། རྩོམ་པ་པོ་ཞིག་ལ་སྨྲ་བརྗོད་རང་དབང་མེད་ན། ཆོས་ལུགས་དང་ཆབ་སྲིད་སྒྱུ་རྩལ་བསམ་བློ་ལ་སོགས་པའི་སེམས་ཁམས་ཅི་འདྲ་ཡོད་རུང་དེ་ཕྱི་ལ་འདོན་ཐུབ་པ་མ་རེད། བོད་ཕྱི་ནང་གི་བོད་མི་སུ་ཞིག་ཡིན་ཡང་ང་ཚོ་ཆབ་སྲིད་ཀྱི་དཔྱད་བརྗོད་པ་ཡིན་སྟབས་རང་བཞིན་གྱིས་ཆབ་སྲིད་དང་འབྲེལ་བ་ཡོད་པ་རེད། དེར་བརྟེན་བོད་ནང་གི་རྩོམ་པ་པོ་ཚོར་སྨྲ་བརྗོད་རང་དབང་མེད་པར་རྒྱ་གཞུང་གིས་བཙོན་འཇུག་བྱས་པ་དང་ཉེས་རྡུང་བཏང་བ། ཁྲིམས་ཐག་བཅད་པ་སོགས་ཀྱི་དངོས་ཡོད་གནས་ཚུལ་ཐོན་ཡོང་དུས། ང་ཚོས་འདིར་དེ་དག་ལ་མཐའ་གཅིག་ཏུ་ངོ་རྒོལ་རྒྱག་དགོས་ཀྱི་ཡོད་པ་རེད། དེ་མི་རིགས་ཤིག་གི་སྐྱིད་སྡུག་དར་རྒུད་ལ་འབྲེལ་བ་དམ་ཟབ་ཡོད་སྟབས། དེ་ང་ཚོའི་མ་འོངས་ལངས་ཕྱོགས་དང་ལས་གཞི་ཞིག་ལ་ངོས་འཛིན་གྱི་ཐོག་ནས་རྒྱལ་སྤྱིའི་སྟེང་དངོས་ཡོད་གནས་ཚུལ་དེ་ཁྱབ་བསྒྲགས་དང་དྲང་བདེན་ཞུ་གཏུག་བྱས་ཏེ། ཐབས་བརྒྱ་ཇུས་སྟོང་གིས་རྩོམ་པ་པོའི་སྨྲ་བརྗོད་རང་དབང་རྩོད་ལེན་ཐོག་ཤུགས་རྒྱག་རྒྱུ་ཡིན། གཉིས་པ། ང་ཚོ་བཙན་བྱོལ་སྤྱི་ཚོགས་ཀྱི་གནས་སྟངས་རེད། ང་ཚོ་བཙན་བྱོལ་སྤྱི་ཚོགས་ནང་སྨྲ་བརྗོད་རང་ཡོད་ཟེར་གྱི་ཡོད་པ་རེད། ཡིན་ནའང་སྨྲ་བརྗོད་རང་དབང་དེ་ང་ཚོའི་ལྟོས་བཅས་ཀྱི་སྨྲ་བརྗོད་རང་དབང་ཙམ་རེད། ངས་བལྟས་ན་བཙན་བྱོལ་ནང་དུའང་སྨྲ་བརྗོད་རང་དབང་ཚད་འཛིན་ཡོད་པ་ཞིག་ཡིན་སྟབས། སྔོན་གྱི་རྩོམ་པ་པོ་ཁག་ཅིག་སྨྲ་བརྗོད་རང་དབང་གི་དཀའ་སྡུག་འོག་ཕྱི་ཕྱོགས་སུ་འགྲོ་མཁན་དང་། བཙན་བྱོལ་ནང་གི་སྨྲ་བརྗོད་རང་དབང་གིས་འདོད་བློ་མ་ཚིམ་མཁན་མང་པོ་ཞིག་ཡོད། སྤྱིར་བཏང་གི་རྩོམ་པ་པོ་ཞིག་ཡིན་ན་འདྲ་ལ་སློབ་གྲྭ་ཁག་ཡིན་ནའང་འདྲ། དེ་ལ་ཆོས་ལུགས་དང་ཆབ་སྲིད། གཞུང་སྒེར་གང་གིས་ཀྱང་གནོན་ཤུགས་མ་ཐེབས་པར་སྲུང་སྐྱོབ་བྱ་རྒྱུ་དེ་རེད། དེའི་རྒྱུ་མཚན་གང་ཡིན་ཞེ་ན། དེང་སྐབས་ཀྱི་བོད་འདི་གཞིས་བྱེས་གཉིས་སུ་འཚོ་སྡོད་བྱས་ཡོད་པ་དང་། བོད་ནང་གི་རྩོམ་པ་པོ་ཚང་མ་རྒྱ་ནག་གི་དྲག་གནོན་སྲིད་ཇུས་འོག་ཡོད་སྟབས། ཁོ་ཚོས་སྨྲ་བརྗོད་རང་དབང་རྩོད་ལེན་གནང་རྒྱུ་དེ་ཧ་ཅང་གི་ཉེན་ཁ་ཆེན་པོ་ཆགས་ཡོད། འོན་ཀྱང་འདི་ག་བཙན་བྱོལ་གཞུང་གི་སྟངས་འཛིན་འོག་ཡོད་པའི་རྩོམ་པ་པོ་ཚོར་སྨྲ་བརྗོད་རང་དབང་ངེས་ཅན་ཞིག་དགོས་པ་ཧ་ཅང་གལ་ཆེན་པོ་རེད། ཁོ་ཚོས་ཆོས་ལུགས་གྲུབ་མཐར་དགག་པ་བརྒྱབ་ན་འདྲ། ཆབ་སྲིད་ལངས་ཕྱོགས་མི་མཐུན་ནའང་འདྲ། རྒྱལ་སྤྱིའི་ཁྲིམས་དང་སྤྱི་ཚོགས་ཀྱི་སྒྲིག་གཞིར་མ་འགལ་བ་ཡིན་ན། ཁོ་ཚོའི་བསམ་བློ་གང་དེ་བརྗོད་པའི་རང་དབང་རྩོད་ལེན་བྱ་རྒྱུ་ཡིན། གསུམ་པ་དེ་ད་ལྟའི་བར་དུ་རྩོམ་པ་པོའི་མཐུན་ཚོགས་ཀྱི་ངོས་ནས་བརྩམས་ཆོས་ཚད་ལྡན་རེ་འགའ་དཔར་སྐྲུན་བྱས་ཡོད་ཀྱང་། མ་འོངས་པར་དཔེ་སྐྲུན་གྱི་ཁ་ཕྱོགས་དེ་རིག་གནས་གསར་བ་ནང་འདྲེན་ཐོག་འགྱུར་བ་གཏོང་དགོས་ཀྱི་འདུག དེ་ནས་རྩོམ་པ་པོའི་མཐུན་ཚོགས་ཤིག་གི་ལས་དོན་གཙོ་བོ་དེ་རྩོམ་པ་པོ་མང་པོ་སྐྱེད་སྲིང་བྱེད་དགོས་པ་དང་། རྩོམ་པ་པོ་མང་པོ་ཞིག་སྐྱེད་སྲིང་བྱེད་པ་ལ་ཤེས་ཡོན་དང་བསམ་བློ་སྐྱེད་སྲིང་བྱ་དགོས་པ་མ་གཏོགས། སྔོན་མའི་སྲོལ་རྒྱུན་རིག་གནས་ལྟ་བུར་མཚོན་ན་ང་ཚོར་མང་མེད་ན་ཉུང་ཡོད་པ་མ་རེད། ཆབ་སྲིད་ཀྱི་ཁྱབ་ཁོངས་དང་མཚན་ཉིད་རིག་པའི་ཁྱབ་ཁོངས། རྩོམ་རིག་གི་ཁྱབ་ཁོངས། སྒྱུ་རྩལ་གྱི་ཁྱབ་ཁོངས། ཡང་ན་མཛེས་དཔྱོད་རིག་པའི་ཁྱབ་ཁོངས། དཔལ་འབྱོར་རིག་པའི་ཁྱབ་ཁོངས་སོགས་སྔོན་མའི་སྤྱི་ཚོགས་དང་མི་མང་གི་ཁ་ཕྱོགས་ལ་བཅོས་བསྒྱུར་དང་འཕོ་འགྱུར་བཏང་མྱོང་བའི་རྩོམ་ཡིག་གྲགས་ཆེན་མང་པོ་བདམས་བསྒྱུར་དང་དཔར་འགྲེམ་བྱས་ཏེ་རིག་གནས་ནང་འདྲེན་ཐོག་ཤུགས་རྒྱག་རྒྱུ་ཡིན།

 

དྲི་བ། ད་ལྟའི་བཙན་བྱོལ་ནང་གི་བོད་ཀྱི་རྩོམ་པ་པོ་དང་རྩོམ་ཡིག་གི་ཁ་ཕྱོགས་ཐོག་ལྟ་ཚུལ་གང་འདྲ་ཡོད།

 

ལན། བཙན་བྱོལ་སྤྱི་ཚོགས་ནང་དེབ་དང་རྩོམ་ཡིག་མང་པོ་ཡོད་ཀྱང་། གྲངས་ཚད་དང་སྤུས་ཚད་བར་ཧེ་བག་ཆེན་པོ་འདུག ང་རང་གི་མཐོང་ཚུལ་ཡིན་ན། བཙན་བྱོལ་ནང་རྩོམ་པ་པོ་ཞིག་གིས་སྙན་རྩོམ་ཚད་ལྡན་ཞིག་དང་དཔྱད་རྩོམ་ཚད་ལྡན་ཞིག ཡང་ན་དགག་རྩོམ་ཚད་ལྡན་འདི་བྲིས་འདུག་ཟེར་ནས་སྟོན་རྒྱུ་ཉུང་ཉུར་རེད། དེ་ལ་རྒྱུ་མཚན་གསུམ་འདུག བཙན་བྱོལ་སྤྱི་ཚོགས་ནང་ཚད་ལྡན་རྩོམ་ཡིག་ཉུང་བའི་རྒྱུ་མཚན་གཅིག་རྩོམ་པ་པོའི་ཤེས་ཚད་ཞན་པ་དང་། གཉིས་ནས་བསམ་བློའི་གོ་རྟོགས་མ་སད་པ་དང་། གསུམ་ནས་ཁོར་ཡུག་གུ་དོག་པའི་དབང་གིས་རེད། དེ་ལྟ་བུའི་ཁོར་ཡུག་ཅིག་ཏུ་རྩོམ་ཡིག་གི་སྤུས་ཚད་ཡར་རྒྱས་ཡོང་ཐབས་ཡོད་པ་མ་རེད། རྩོམ་པ་པོའི་མཐུན་ཚོགས་ཤིག་ལ་མཚོན་ན། རྒྱུ་རྐྱེན་དེ་དག་ལ་བསྒྱུར་བཅོས་གཏོང་ཐབས་བྱེད་རྒྱུ་ལས་འགན་གཙོ་བོ་ཡིན་སྟབས། ངས་མ་འོངས་པར་བོད་ཀྱི་རྩོམ་པ་པོའི་རྩོམ་འབྲིའི་ཁ་ཕྱོགས་ལ་བསྒྱུར་བཅོས་གཏང་ཐབས་ལ་འབད་བརྩོན་བྱ་རྒྱུ་ཡིན། དཔེར་ན། ཞན་ཆ་འདི་དག་ཡར་རྒྱས་གཏོང་དགོས་ན། སློབ་མ་ཞིག་ཡིན་ན་སློ་གྲྭ་ཆུང་འབྲིང་གི་རྩོམ་འབྲིའི་རྨང་གཞིའི་གོ་རིམ་གསུམ་རེད། བོད་ཀྱི་རྩོམ་པ་པོའི་མཐུན་ཚོགས་ཀྱི་ངོས་ནས་གཅིག་སློབ་ཆུང་སློབ་མ་ཚོའི་བསམ་བློའི་གོ་རྟོགས་སྤེལ་རྒྱུ་དང་། གཉིས་པ་དངོས་གཞིའི་སློབ་མ་ཚོར་རྩོམ་འབྲིའི་ཁ་ཕྱོགས་སྟོན་རྒྱུ། གསུམ་པ་ཞིབ་འཇུག་སློབ་མ་ཚོའི་རྩོམ་འབྲིའི་ཐད་རམ་འདེགས་དང་ནུས་འདོན་རྒྱུ་སོགས་རེད།

 

དྲི་བ། བཙན་བྱོལ་བོད་མིའི་སྤྱི་ཚོགས་ནང་ཞིབ་འཇུག་དང་དཔྱད་རྩོམ། འབོལ་རྩོམ་མ་གཏོགས་སྒྱུ་རྩལ་རྩོམ་རིག་ལ་ཁྲོམ་རྭ་མེད་དོན་ཅི་རེད།

 

ལན།  བཙན་བྱོལ་བོད་མིའི་སྤྱི་ཚོགས་ནང་སྒྱུ་རྩལ་རྩོམ་རིག་ཡོང་ཐབས་ཡོད་པ་མ་རེད། དེ་ནི་བཙན་བྱོལ་ནང་རྩོམ་རིག་རིག་གནས་ཀྱི་ཁོར་ཡུག་ཡོད་པ་མ་རེད། དེའི་རྒྱུ་མཚན་གཅིག་ནི་རིག་གནས་གཅིག་གི་དབང་བསྒྱུར་དང་། གཉིས་ནི་ཁོར་ཡུག་གཅིག་གི་དབང་བསྒྱུར། གསུམ་ནི་རིག་གནས་སྤྱིའི་ཁྱབ་ཁོང་དབྱེ་གསེས་ཐུབ་ཀྱི་མེད་སྟབས་ཡར་རྒྱས་འགྲོ་ཐུབ་ཀྱི་ཡོད་པ་མ་རེད། ཆོས་ལུགས་ཆབ་སྲིད་ལྟ་བུ་ཡིན་ན། སྒྱུ་རྩལ་རྩོམ་རིགས་ཀྱི་ཁྱབ་ཁོངས་མིན་སྟབས། ཆོས་ལུགས་ཀྱི་ཁྱབ་ཁོངས་ནས་སྒྱུ་རྩལ་རྩོམ་རིགས་བཤད་རྒྱུ་ཟེར་ན་དེ་ཡོང་གི་ཡོད་པ་མ་རེད། སྒྱུ་རྩལ་རྩོམ་རིག་བཤད་པ་ལ་ཐོག་མར་ཆོས་ལུགས་ཀྱི་ཁྱབ་ཁོངས་སུ་མ་སོང་སྔོན་ལ་སྒྱུ་རྩལ་གྱི་ཁྱབ་ཁོངས་ནས་སྒྱུ་རྩལ་གྱི་དངོས་སྦྱོང་དང་སྒྱུ་རྩལ་གྱི་བློ་སྦྱོང་། སྒྱུ་རྩལ་གྱི་དཔེ་སྦྱོང་སོགས་བྱས་རྗེས་ད་གཟོད་སྒྱུ་རྩལ་རྩོམ་རིག་ཡོང་གི་རེད། མདོར་དྲིལ་ན། འདི་གར་དཔྱད་རྩོམ་དང་འབོལ་རྩོམ་ཡོད་མདོག་མདོག་བྱེད་ཀྱི་ཡོད་པ་མ་གཏོགས། དོན་དངོས་སུ་ཚད་ལྡན་གཅིག་ཀྱང་ཡོད་པ་མ་རེད། ང་ཚོར་མཚོན་ན་ཞིབ་འཇུག་བྱེད་པ་ལ་ཐོག་མར་ནང་ཆོས་ཀྱི་ལྟ་བ་ལྟ་གྲུབ་དང་མཐུན་པའི་ཐོག་ནས་ཞིབ་འཇུག་བྱེད་རྒྱུ་ཡིན་ཟེར་གྱི་ཡོད་པ་དང་། དཔྱད་རྩོམ་ཡིན་ན་ཐོག་མར་ནང་ཆོས་ཀྱི་ལྟ་གྲུབ་ཀྱི་ངོས་ལེན་ཐོབ་པའི་སྒོ་ནས་དཔྱད་རྩོམ་འབྲི་རྒྱུ་ཡིན་ཟེར་བ་ལྟ་བུ་རེད། དཔྱད་རྩོམ་ལ་སྔོན་འགྲོའི་ཆ་རྐྱེན་དེ་འདྲ་ཡོད་པ་མ་རེད། གཙོ་བོ་གནས་ལུགས་རེད། རྒྱུ་མཚན་གནས་ལུགས་དང་གཏན་ཚིགས་རིག་པ་སོགས་ཡག་པོ་དང་ཁུངས་འཁྱོལ་བ་ཡིན་ན། ཆོས་ལུགས་ཆབ་སྲིད་ཀྱི་ལངས་ཕྱོགས་ག་རེ་ཡིན་ཡང་ཆོག་གི་རེད། རྒྱུ་མཚན་སྒྱུ་རྩལ་རྩོམ་རིག་ལ་སྒྱུ་རྩལ་རྩོམ་རིག་གི་ཆ་རྐྱེན་མང་པོ་ཞིག་འཛོམ་དགོས་ཀྱི་ཡོད་པ་མ་གཏོགས། སྒྱུ་རྩལ་རྩོམ་རིག་དགོས་ཀྱི་འདུག་ཟེར་ན་དེ་ཡོད་ཆོག་ཆོག་ཅིག་ཡོད་པ་མ་རེད། མང་པོ་ཞིག་གིས་སྒྱུ་རྩལ་རྩོམ་རིག་སྦྱང་མྱོང་མེད་སྟབས། མ་གཞི་ནས་སྒྱུ་རྩལ་རྩོམ་རིག་ཟེར་ན་ག་རེ་ཡིན་མིན་ཡང་ཤེས་ཀྱི་མི་འདུག དེ་འདྲ་ཡིན་དུས་སྒྱུ་རྩལ་རྩོམ་རིག་གི་ཁོར་ཡུག་ཡོད་པ་མ་རེད།

 

དྲི་བ། སྐུ་ཉིད་ཀྱིས་རྩོམ་རིག་དང་རྩོམ་པ་པོ་ཟེར་བ་དེ་ཚད་གཞི་གང་འདྲ་ཞིག་ལ་ངོས་འཛིན་གནང་གི་ཡོད་པ་དང་། བོད་ཀྱི་རྩོམ་པ་པོའི་མཐུན་ཚོགས་ཀྱི་ལངས་ཕྱོགས་དང་འགན་འཁྲི་གཙོ་བོ་གང་ལ་ངོས་འཛིན་གནང་གི་ཡོད།

 

ལན། སྤྱིར་བཏང་རྩོམ་རིག་དང་རྩོམ་པ་པོ་ཟེར་དུས། གཞུང་ལུགས་ངོས་ཀྱི་སྐད་ཆ་མང་པོ་རེད། དེ་ལ་སྐད་ཆ་ཐུང་ཐུང་ཞིག་གིས་བཤད་ན། རྩོམ་པ་པོ་ཚད་ལྡན་ཞིག་ཡིན་ན་རྩོམ་པ་པོ་དང་བརྩམས་ཆོས། ཀློག་པ་པོ་བཅས་ནི་འདྲ་བ་ཟུར་གསུམ་མ་ཞེས་གཞུང་ལུགས་ཁྲོད་གསལ་བོར་བཀྲལ་ཡོད་པ་རེད། འདིར་སྤྱིར་བཏང་གིས་བཤད་ན། མ་མཐར་ཡང་རྩོམ་པ་པོར་ཚད་གཞི་མེད་པ་ཞིག་མིན་པ་དེ་གསལ་བོར་ཤེས་དགོས་པ་རེད་། དེང་སྐབས་རྩོམ་པ་པོ་ཚོས་རྩོམ་ཡིག་ཐབ་ཆག་ཅིག་འབྲི་ཤེས་མ་ཐག་ནས་རྩོམ་པ་པོར་ངོས་འཛིན་བྱེད་ཀྱི་འདུག དེ་ནོར་བ་རེད། སྔོན་ལ་རྩོམ་པ་པོ་ཟེར་བ་དེ་གང་འདྲ་ཞིག་ལ་ཟེར་གྱི་ཡོད་མེད་ཀྱི་ཚད་གཞི་དེ་ཤེས་དགོས་པ་རེད། རྩོམ་པ་པོའི་ཚད་གཞི་མ་ཤེས་པ་དང་། རྩོམ་ཡིག་ཁྱ་ཁྱོག་འབྲི་ཤེས་མཁན་ཚང་མ་རྩོམ་པ་པོའི་མིང་བཏགས་པའི་དབང་གིས་སྤྱི་ཚོགས་ནང་རྩོམ་པ་པོར་མཐོང་བརླགས་སོང་བ་རེད།

རྩོམ་པ་པོ་སུ་ཡིན་ཡང་རང་གིས་བྲིས་པའི་རྩོམ་ཡིག་དེ་ཡག་པོ་ཡོད་ཟེར་ནས་འདོན་གྱི་ཡོད་པ་རེད། འོན་ཀྱང་རང་གི་རྩོམ་ཡིག་དེ་ཡག་པོ་ཡོད་མེད་དེ་གཞན་རྩོམ་མང་པོ་ཞིག་ལ་ཞིབ་བསྡུར་བྱས་ནས་ཐག་གཅོད་དགོས་ཀྱི་ཡོད་པ་རེད། དེ་ལྟར་བྱས་ད་གཟོད་གཅིག་ནས་རྩོམ་པ་པོས་རང་སྐྱོན་ངོས་ཟིན་ཐུབ་པ་དང་། གཉིས་ནས་རང་རྩོམ་ལ་ཕྱིར་ལྡོག་གི་བསམ་བློ་ཞིག་དང་། དེ་ལ་བརྟེན་ནས་གཞན་རྩོམ་དང་རང་རྩོམ་བར་གྱི་ཧེ་བག་རང་ཤུགས་ཀྱིས་ཤེས་ཡོང་གི་རེད། སྐབས་དེར་བསླེབ་ན་རྩོམ་ཡིག་ཚད་ལྡན་ཆགས་ཐུབ་པ་མ་ཟད། སྤྱི་ཚོགས་ནང་རྩོམ་པ་པོར་མཐོང་ཡང་ཡོང་གི་རེད།

རྩོམ་པ་པོའི་མཐུན་ཚོགས་ཤིག་ཡིན་ན། ངའི་རེ་བ་མཐོ་ཤོས་དེ་གཅིག་ནས་རྩོམ་པ་པོའི་མཐུན་ཚོགས་ཀྱི་རྩོམ་པ་པོ་ཚང་མ་རབ་ཡིན་ན་རྩོམ་པ་པོ་ཚད་ལྡན་རྐྱང་རྐྱང་དང་། གཉིས་ནས་རྩོམ་རིག་ལ་དགའ་མོས་ཡོད་མཁན། གསུམ་ནས་རྩོམ་རིག་ལ་དགའ་མི་ཤེས་ནའང་རྩོམ་རིག་གི་བློ་སྦྱོང་ཡོད་མཁན་ཞིག་ཅིས་ཀྱང་ཡིན་དགོས་པ་རེད། དེ་འདྲ་ཞིག་ཡིན་ན། དེ་ནི་བཅོས་བསླད་གང་ཡང་མ་ཡིན་པ། དགོས་པ་གཞན་པར་མ་དམིགས་པར་རྩོམ་རིག་རང་ལ་དམིགས་ནས་ཡོང་དགོས་པ་ཞིག་རེད། དེ་མིན་རྩོམ་རིགས་ཀྱི་ངོས་ནས་མཐུན་ཚོགས་ཤིག་ཇི་ལྟར་གནས་ཐབས་སུ་བསམ་བློ་མི་གཏོང་བར་དཔལ་འབྱོར་གྱི་ཁེ་ཕན་དང་ཆབ་སྲིད་ཀྱི་དབང་ཆ། ཆོས་ལུགས་ཀྱི་ལྟ་གྲུབ། ཡང་ན་མི་སྒེར་གྱི་སྐད་ཆ་གང་རུང་ཞིག་ཁྱེར་ཡོང་ནས་རྩོམ་པ་པོའི་མཐུན་ཚོགས་གནས་ཐབས་བྱེད་པ་དེ་རྩོམ་པ་པོའི་མཐུན་ཚོགས་ཤིག་གི་འགྲོ་སྟངས་མ་རེད། ཐོག་མར་ང་ཚོས་རྩོམ་པ་པོའི་བསམ་བློ་དང་རྩོམ་པ་པོའི་ཤེས་ཚད། རྩོམ་པ་པོའི་ནུས་པ་ལ་བརྟེན་ནས་སྤྱི་ཚོགས་སྟེང་རང་སྐྱ་འཕེར་བའི་ཐོག་ནས་གནས་ཐུབ་དགོས་པ་དང་། དེ་ནས་རིམ་པར་ཆོས་ལུགས་ཆབ་སྲིད་ལ་ཞབས་འདེགས་ཞུ་ཐུབ་དགོས་པ་རེད། ནུས་པ་དེ་འདྲ་ཞིག་གི་སྟེང་ནས་རྩོམ་པ་པོའི་མཐུན་ཚོགས་འདི་གནས་ཐུབ་པ་ཡིན་ན། དེ་ཕུན་སུམ་ཚོགས་པ་རེད།

 

དྲི་བ། ནུབ་ཕྱོགས་ཀྱི་རྩོམ་པ་པོ་དང་དཔྱད་བརྗོད་པ་ཚོས་སྤྱི་ཚོགས་རྩོམ་རིགས་དང་སྤྱི་ཚོགས་ཆབ་སྲིད་ཐོག་ཁ་ཚ་དགོས་ཀྱི་ཕན་ནུས་ཐོན་གྱི་ཡོད་པ་རེད། དེས་ན་བཙན་བྱོལ་སྤྱི་ཚོགས་ཀྱི་རྩོམ་པ་པོ་དང་དཔྱད་བརྗོད་པ་ཚོས་བཙན་བྱོལ་སྤྱི་ཚོགས་ལ་ནུས་པ་ཐོན་གྱི་མེད་པའི་རྒྱུ་མཚན་གང་ཡིན་ནམ།

 

ལན། དེ་གཙོ་བོ་སྤྱི་ཚོགས་རིག་གནས་འཕེལ་རྒྱས་ཕྱིན་དང་མ་ཕྱིན་ལ་ཐུག་ཡོད་པ་རེད། ནུབ་ཕྱོགས་ལྟ་བུ་ཡིན་ན། རིག་གནས་ཚད་ལྡན་དང་རྩོམ་པ་པོ་ཚད་ལྡན་ཡོད་སྟབས། དཔྱད་རྩོམ་ཡང་ཚད་ལྡན་འབྲི་ཐུབ་ཀྱི་ཡོད་པ་རེད། རིག་གནས་ཁོར་ཡུག་ཚད་ལྡན་ཞིག་ཡོད་ན་རྩོམ་པ་པོ་ཚད་ལྡན་ཡོང་གི་རེད་ལ། རྩོམ་པ་པོ་ཚད་ལྡན་ཡོད་ན་དཔྱད་རྩོམ་ཡང་ཚད་ལྡན་ཡོང་གི་རེད། དེ་བཞིན། སྤྱི་ཚོགས་ཚད་ལྡན་ཞིག་གི་ནང་རྩོམ་ཡིག་ཚད་ལྡན་ཞིག་བྱུང་ན། དེས་ནུས་པའང་འཐོན་གྱི་ཡོད་པ་རེད། རྩ་བའི་ང་ཚོ་བཙན་བྱོལ་སྤྱི་ཚོགས་ཤིག་ཡིན་སྟབས་ཁོར་ཡུག་དང་གནས་སྟངས་ཚད་ལྡན་མིན་པ་དང་། གཉིས་ནས་རིག་གནས་ཁོར་ཡུག་ཚད་ལྡན་མེད་པ་སོགས་ལ་བརྟེན་ཏེ། རྩོམ་ཡིག་ཚད་ལྡན་ཞིག་འབྲི་ཐུབ་ཀྱི་ཡོད་པ་མ་རེད། ཚད་ལྡན་མིན་པའི་རྩོམ་ཡིག་ཅིག་ཚད་ལྡན་མིན་པའི་སྤྱི་ཚོགས་ནང་སྤེལ་ན། ཚང་མ་ཚད་ལྡན་མིན་པར་འགྱུར་འགྲོ་བ་རེད། དེར་བརྟེན། ངས་བསམ་ན་ང་ཚོས་གནད་དོན་དེ་ངོས་ཟིན་པའི་རྗེས་ལ། ཐོག་མར་མི་རང་ཉིད་ཀྱི་ངོས་ནས་རང་ཉིད་ལ་བསྒྱུར་བཅོས་གཏོང་རྒྱུ་དང་། རང་ཉིད་བསྒྱུར་བཅོས་བཏང་བའི་རྗེས་ལ་གཞན་པར་བསྒྱུར་བཅོས་གཏོང་རྒྱུ་དེ་ངེས་པར་དུ་ཤེས་དགོས་པ་ཞིག་རེད། གནད་འགག་དེ་ཤེས་པ་ཡིན་ན་ད་གཟོད་སྤྱི་ཚོགས་ལ་ནུས་པ་འཐོན་རྒྱུ་རེད་མ་གཏོགས། སྙན་རྩོམ་འགའ་བྲིས་ནས་ནུས་པ་འཐོན་པ་དེ་འདྲ་ཞིག་རྩ་བ་ནས་མ་རེད། སྤྱི་ཚོགས་ཟེར་བ་འདི་བརྩེ་དུང་དང་ལྟ་བ་ལྟ་གྲུབ་ཅིག་གིས་ཁ་ལོ་བསྒྱུར་རྒྱུ་ཡིན་ཟེར་ན་ཧ་ཅང་དཀའ་མོ་རེད། སྤྱི་ཚོགས་ཟེར་བ་འདི་སྤྱིར་བཏང་ནས་ཡར་རྒྱས་ཡོང་བའི་རྗེས་ལ་ད་གཟོད་སྡེ་ཚན་ཁག་མང་པོ་ཞིག་ཕྱེ་ན་ནུས་པ་འཐོན་གི་རེད། དཔེར་ན། རྩོམ་པ་པོའི་མཐུན་ཚོགས་ཤིག་ཡིན་ན། སྤྱི་ཚོགས་ཡར་རྒྱས་གཏང་རྒྱུ་དེ་རྩོམ་པ་པོའི་དམིགས་འདུན་གཙོ་བོ་རེད། ཡིན་ཡང་སྤྱི་ཚོགས་དེའི་རྩོམ་པ་པོའི་མཐུན་ཚོགས་ཀྱི་འགན་འཁྲི་གཙོ་བོ་དེ་རྩོམ་འབྲིའི་ཁོར་ཡུག་རྒྱ་ཆུང་ཆུང་ཞིག་ནས་བསམ་བློ་བཏང་སྟེ་རིམ་གྱིས་རྒྱ་ཆེ་རུ་གཏོང་རྒྱུ་མ་གཏོགས། ང་ཚོས་ཐོག་མ་ནས་རྩོམ་འབྲི་ཤེས་པ་ཙམ་ནས་སྤྱི་ཚོགས་ལ་བསྒྱུར་བཅོས་གཏང་རྒྱུ་ཟེར་ན། བསམ་བློ་གདོང་ཐུག་རྒྱག་པ་དང་ནུས་པ་མ་ཐོན་པ་སོགས་བྱུང་སྟེ་སེམས་ཤུགས་ཆག་འགྲོ་བ་ཡོང་གི་རེད།

12376400_896345277149208_6946772399336008073_n

ཐེངས་འདིར་གསར་དུ་བདམས་ཐོན་བྱུང་བའི་བོད་ཀྱི་རྩོམ་པ་པོའི་མཐུན་ཚོགས་ཀྱི་རྒྱུན་ལས་རྣམས་ནི་ཚོགས་གཙོ་སྤྲེལ་ནག་པ་བློ་གྲོས་དཔལ་བཟང་། སྨན་ཤེར་བློ་གྲོས་ལགས་ཚོགས་གཞོན། ཉི་མ་མཚོ་ལགས་འཛིན་སྐྱོང་དྲུང་ཆེ། ཨ་རིག་དགེ་མཐོང་ལགས་ཤེས་ཡོན་འགན་འཛིན། བུདྷ་སྐྱབས་ལགས་ཕྱི་འབྲེལ་དྲུང་ཆེ། སྤྱི་ཟུར་ཆབ་བྲག་ལྷོ་མོ་སྐྱབས་ལགས་རྩོམ་སྒྲིག་འགན་འཛིན། གངས་དཀར་རྒྱལ་སྲས་ལགས་རྩོམ་སྒྲིག་པ་དང་ཤ་བོ་རྟ་མགྲིན་ལགས་རྩོམ་སྒྲིག་ལས་རོགས། ཨ་འབྲུག་དཀོན་མཆོག་ལགས་ཉམས་ཞིབ་པ། རྔ་བཟའ་བདེ་པོ་མཚོ་ལགས་དྲ་རྒྱའི་འགན་འཛིན། བསྟན་འཛིན་ཆོས་དབྱངས་ལགས་གསར་འགོད་པ། དེ་བཞིན། ཕྱི་རྒྱལ་ཡུལ་གྲུ་ཁག་གི་རྒྱུན་ལས་སུ་རྒན་ཆབ་བྲག་ལྷོ་མོ་སྐྱབས་མཆོག་དང་རྫ་ཚེ་རིང་བཀྲ་ཤིས་ལགས། ཁ་སྒང་བསམ་གཏན་རྒྱ་མཚོ་ལགས་བཅས་སུ་གཏན་འཁེལ་ཡོད་འདུག

གསར་འགོད་པ། པདྨ་རྒྱལ།

 

བསྐྱར་བཅོས།: ༢༠༡༧/༠༢/༡༦

Leave a Reply

6 thoughts on “ངས་བོད་ཕྱི་ནང་གཉིས་ཀྱི་རྩོམ་པ་པོའི་སྨྲ་བརྗོད་རང་དབང་གཙོ་བོར་འཛིན་རྒྱུ་ཡིན།

  1. བསྟན་རྣམ་ལགས་ཀྱིས་བཤད་ན། སྨྲ་བརྗོད་རང་དབང་ནི་འགན་འཁུར་མི་དགོས་པར་ག་རེ་བཤད་ན་འགྲིག་པའི་རང་དབང་ཞིག་ཡིན་པ་དང་། དེར་ཚོད་འཛིན་བྱས་ན་སྨྲ་བརྗོད་རང་དབང་འཕྲོག་པ་ལ་ངོས་འཛིན་བྱེད་ཀྱི་ཡོད་པ་འདྲ། དེ་འདྲ་གཏན་ནས་མ་རེད། ཁྱེད་རང་ལ་རང་དབང་དགོས་པ་བཞིན་ཕ་རོལ་པོར་ཡང་རང་དབང་དགོས་པ་རེད། ཕན་ཚུན་གཉིས་ཀྱི་རང་དབང་སྲུང་སྐྱོབ་ཡོང་བ་ལ་ཕན་ཚུལ་བརྩི་བཀུར་གྱིས། ག་རེ་བཤད་ནའང་འཕྲད་ཕུགས་རྒྱང་གསུམ་ལ་དམིགས་ཏེ་འགན་འཁུར་དགོས་པ་རེད། འཛམ་གླིང་གི་མཚན་ཉིད་རིག་པ་བ་མང་པོ་ཞིག་གིས་འཇིག་རྟེན་འདིར་ཚད་མེད་པའི་རང་དབང་ཞིག་ཡེ་ནས་མེད་པ་དང་དེ་འདྲ་ཞིག་བསྐྲུན་ཐབས་མེད་པའི་སྡོམ་ཚིག་ལའང་བསམ་བློ་བཏང་ནས་སྐད་ཆ་བཤད་དགོས་པ་རེད་སྙམ།

  2. ང་མཚོན་ན་བློ་གྲོས་དཔལ་བཟང་ལ་མོས་གུས་ཡོད་པ་ཞིག་ཡིན། ཡིན་ནའང་། སྐད་ཆ་ཁ་ཤས་ཁ་ཐུག་ལ་བཤད་དགོས་རེད་སྙམ། བཙོན་བྱོལ་ནང་གི་རྩོམ་པ་པོའི་སྨྲ་བརྗོད་རང་དབང་སྲུང་སྐྱོབ་བྱེད་རྒྱུ་དེ་རྩོམ་པ་པོའི་མཐུན་ཚོགས་ཀྱི་འགན་ཆེན་པོ་ཞིག་རེད། དཔེར་ན་བཙན་བྱོལ་ནང་གི་རྩོམ་པ་པོ་ཞིག་གིས་རྒྱལ་བ་རིན་པོ་ཆེ་དང་ཆོས་ལུགས་གྲུབ་མཐའ་གང་རུང་ལ་དགག་པ་བརྒྱབ་པའམ་ཁ་བཏང་བ། དམའ་འབེབས་ཁྱད་གསོད་བྱས་ན་རྩོམ་པ་པོའི་མཐུན་ཚོགས་ཀྱིས་རྩོམ་པ་པོའི་སྨྲ་བརྗོད་རང་དབང་སྲུང་སྐྱོབ་བྱེད་སྟངས་ཅི་ལྟར་ཡིན་ནམ། ཡང་ན་རྩོམ་པ་པོ་ཞིག་གིས་ལོ་རྒྱུས་ཞིབ་འཇུག་བྱས་ཏེ་བོད་དེ་བོད་བཙན་པོའི་རྗེས་ནས་རྒྱལ་ཁབ་ཅིག་ནམ་ཡང་ཆགས་མྱོང་མེད་པ་དང་ལྷག་པར་དུ་ཁམས་ཕྱོགས་དང་ཨ་མདོ་བ་ཚོ་བོད་པ་མ་ཡིན་པར་མི་རིགས་ཕུང་གསུམ་པ་ཞིག་ཡིན་ཚུལ་གྱི་བདེན་དབང་དང་དངོས་པོའི་ཁུངས་སྐྱེལ་བྱས་ཏེ་ད་ལྟའི་བོད་ཆོལ་ཁ་གསུམ་རང་བཙན་ཟེར་བ་ལ་ལོ་རྒྱུས་ཀྱི་རྒྱབ་ལྗོངས་གང་ཡང་མེད་པར་འཆལ་གཏམ་འབའ་ཞིག་ཡིན་ཚུལ་ཁུངས་དང་རིགས་པར་བསྒྲུབ་ན་དེར་རྩོམ་པ་པོའི་མཐུན་ཚོགས་ཀྱིས་སྨྲ་བརྗོད་རང་དབང་སྲུང་སྐྱོབ་བྱེད་ཐུབ་བམ། ཡང་གཅིག་གིས་བོད་རྒྱལ་ཁབ་ཟེར་བ་དང་། བོད་མི་རིགས་ཟེར་བ། བོད་རང་བཙན་ཟེར་བ་སོགས་ནི་འཆར་སྣང་ཁོ་ན་ཡིན་ཚུལ་དང་། མ་འོངས་པའི་འཛམ་གླིང་གི་ལོ་རྒྱུས་ནང་ནམ་ཡང་ཡོང་རྒྱུ་མེད་པའི་སྟོང་བསམ་ཁོ་ན་ཞིག་ཡིན་ཚུལ་ཁུངས་དང་རིགས་པས་བསྒྲུབ་ན་དེར་སྲུང་སྐྱོབ་བྱེད་ཐུབ་བམ། ངས་བལྟས་ན་ད་སྐབས་རྒྱལ་བ་རིན་པོ་ཆེ་དང་ཆོས་ལུགས་ཀྱི་བླ་ཆེན་ཚོར་སྐྱོན་བརྗོད་བྱེད་པར་སྨྲ་བརྗོད་རང་དབང་གང་འཚམ་ཞིག་ཡོད་པ་མཐོང་གསལ་རེད། ཡིན་ནའང་བོད་མི་ཞིག་གིས་བོད་རང་བཙན་དང་བོད་མི་རིགས་ལ་དགག་པ་རྒྱག་རྒྱུ་ལ་སྨྲ་བརྗོད་རང་དབང་ཧ་ཅང་ཁག་པོ་རེད། མི་ཞིག་གིས་ཁྱི་དང་མཚུངས་པའི་བོད་མི་རིགས་ཟེར་བ་དང་བོད་རང་བཙན་ནི་འདས་པའི་འཆལ་གཏམ་དང་མ་འོངས་པའི་མིའི་རིགས་ཀྱི་ཆགས་སྒོ་རེད་ཟེར་ན་ཅི་བྱ། ང་ཚོར་སྨྲ་བརྗོད་རང་དབང་དགོས་ཀྱི་ཡོད་ཀྱང་སྨྲ་བརྗོད་རང་དབང་ལ་ས་མཚམས་ཡོད་མེད་དེ་དཀའ་ངལ་ཆེ་ཤོས་རེད། ས་མཚམས་ཞིག་བགར་ནས་བཀག་རྒྱ་བཟོས་ན་ཚད་བཀག་ཅན་ཞིག་ཆགས་པ་རེད། དེ་ལྟར་བྱུང་ནའང་འགྲིག་གི་མེད་པ་རེད། རྩོམ་པོ་པོའི་མཐུན་ཚོགས་ངོས་ནས་ཚོགས་མི་རྩོམ་པ་པོ་ཚོར་སྨྲ་བརྗོད་རང་དབང་ལ་འགྲེལ་བཤད་ཡང་དག་པ་ཞིག་དགོས་ཀྱི་ཡོད་རེད། དང་པོ་སྨྲ་བརྗོད་རང་དབང་གསལ་པོ་བཟོ་དགོས་སྙམ།

  3. དགེ་རྒན་ཆེན་མོ་སྤྲེལ་ནག་པ་བློ་གྲོས་དཔལ་བཟང་ལགས་ལ་བཀྲ་ཤིས་བདེ་ལེགས་དང་ཆབས་ཅིག་ཞུ་གསོལ།

    1 རྩོམ་པ་པོ་མང་པོ་ཞིག་སྐྱེད་སྲིང་བྱེད་པ་ལ་ཤེས་ཡོན་དང་བསམ་བློ་སྐྱེད་སྲིང་བྱ་དགོས་པ་མ་གཏོགས། སྔོན་མའི་སྲོལ་རྒྱུན་རིག་གནས་ལྟ་བུར་མཚོན་ན་ང་ཚོར་མང་མེད་ན་ཉུང་ཡོད་པ་མ་རེད། ཆབ་སྲིད་ཀྱི་ཁྱབ་ཁོངས་དང་མཚན་ཉིད་རིག་པའི་ཁྱབ་ཁོངས། རྩོམ་རིག་གི་ཁྱབ་ཁོངས། སྒྱུ་རྩལ་གྱི་ཁྱབ་ཁོངས། ཡང་ན་མཛེས་དཔྱོད་རིག་པའི་ཁྱབ་ཁོངས། དཔལ་འབྱོར་རིག་པའི་ཁྱབ་ཁོངས་སོགས་སྔོན་མའི་སྤྱི་ཚོགས་དང་མི་མང་གི་ཁ་ཕྱོགས་ལ་བཅོས་བསྒྱུར་དང་འཕོ་འགྱུར་བཏང་མྱོང་བའི་རྩོམ་ཡིག་གྲགས་ཆེན་མང་པོ་བདམས་བསྒྱུར་དང་དཔར་འགྲེམ་བྱས་ཏེ་རིག་གནས་ནང་འདྲེན་ཐོག་ཤུགས་རྒྱག་རྒྱུ་ཡིན།

    2 ཆོས་ལུགས་ཆབ་སྲིད་ལྟ་བུ་ཡིན་ན། སྒྱུ་རྩལ་རྩོམ་རིགས་ཀྱི་ཁྱབ་ཁོངས་མིན་སྟབས། ཆོས་ལུགས་ཀྱི་ཁྱབ་ཁོངས་ནས་སྒྱུ་རྩལ་རྩོམ་རིགས་བཤད་རྒྱུ་ཟེར་ན་དེ་ཡོང་གི་ཡོད་པ་མ་རེད། སྒྱུ་རྩལ་རྩོམ་རིག་བཤད་པ་ལ་ཐོག་མར་ཆོས་ལུགས་ཀྱི་ཁྱབ་ཁོངས་སུ་མ་སོང་སྔོན་ལ་སྒྱུ་རྩལ་གྱི་ཁྱབ་ཁོངས་ནས་སྒྱུ་རྩལ་གྱི་དངོས་སྦྱོང་དང་སྒྱུ་རྩལ་གྱི་བློ་སྦྱོང་། སྒྱུ་རྩལ་གྱི་དཔེ་སྦྱོང་སོགས་བྱས་རྗེས་ད་གཟོད་སྒྱུ་རྩལ་རྩོམ་རིག་ཡོང་གི་རེད།

    དང་པོ། སྔོན་མའི་སྲོལ་རྒྱུན་རིག་གནས་ལྟ་བུར་མཚོན་ན་ང་ཚོར་མང་མེད་ན་ཉུང་ཡོད་པ་མ་རེད་ཟེར་གྱི་འདུག འདིའི་ཐད་ལ་ཁྱེད་རང་མིག་ཤེལ་མདོག་ནག་པོ་དེ་བླངས་ནས་བལྟས་ན་ཅ་དངོས་ཡོད་ཚད་ཀྱི་ཁ་དོག་དངོས་གནས་ངོས་ཟིན་པ་ལས་གཞན་མིག་ཤེལ་གྱི་མདོག་གིས་ཕ་རོལ་བོས་མདོག་དེ་ཅུང་བསྒྱུར་འགྲོ་བ་དེ་བཤད་མི་དགོས་པ་ཞིག་རེད། སྔོན་མའི་སྲོལ་རྒྱུན་རིག་གནས་ཀྱི་ལེགས་ཆ་ག་ཚོད་མང་ན་དེ་ལེན་དགོས་པ་ལས་མང་མེད་ན་ཉུང་མེད་ཅེས་མ་རེངས་པའི་རྣམ་འགྱུར་དེ་དག་ཅིག་བསྡད་མེད་པར་འདོད། ད་ལྟ་ང་ཚོ་བོད་པ་ཟེར་བ་ཞིག་སྤྱི་ཚོགས་འདིར་གསོན་ཐུབ་ཡོད་པ་ནི་སྔ་མའི་སྲོལ་རྒྱུན་རིག་གནས་ཀྱི་ལེགས་པའི་ཆ་ལས་བྱུང་བ་རེད་མ་གཏོགས། གལ་སྲིད་དེ་འདྲ་ཞིག་མེད་ན་འཛམ་བུ་གླིང་འདིའི་སྒང་ལ་བོད་པ་ཞེས་མིང་ཙམ་ཡང་མེད་པ་ཆགས་ཡོད་པ་རེད།

    གཉིས་པ། སྤྱིར་སྒྱུ་རྩལ་རྩོམ་རིག་ཟེར་དུས་ཟློས་གར་དང་སྙན་ངག་སོགས་བརྩམ་བྱ་གང་ཡིན་པ་ཐམས་ཅད་ལ་འཇུག་པའི་རིག་པའི་གནས་ཤིག་ལ་ཟེར་གྱི་ཡོད་པ་རེད་མ་གཏོགས། སྒྱུ་རྩལ་རྩོམ་རིག་ཟེར་དུས་ཆགས་སྲེད་ཀྱི་རིགས་ཤ་སྟག་ལྟ་བུ་ཞིག་ཨེ་ཡིན་ན། སྒྱུ་རྩལ་རྩོམ་རིག་ལ་རིགས་མང་དུས་ཆོས་ལུགས་ཀྱི་ཁོངས་སུ་གཏོགས་པ་དང་མ་གཏོགས་པ། ཆོས་ལུགས་ཀྱི་ཁྱབ་ཁོངས་ནས་སྒྱུ་རྩལ་རྩོམ་རིག་བཤད་ན་ཡོང་གི་ཡོད་པ་དང་མེད་པ་གཉིས་ཀ་ཡོད་པ་རེད། གླེན་པའི་ནོར་ན་མཐོ་གང་། མཁས་པས་ནོར་ན་འདོམས་གང་ཞེས་པའི་དཔེ་རུ་འགྱུར་སྲིད།

  4. ཚོགས་གཙོ་མཆོག་གི་བཀའ་མོལ་ཁྱོན་ཡོངས་ཀྱི་ཆ་ནས་བདེན་པའི་ཆ་ཞིག་འདུག ཡིན་ནའང་བཀའ་མོལ་གནང་སྟངས་ཀྱི་ཆ་ནས་ཏག་ཏག་བསྡད་མེད་པ་མང་པོ་ཞིག་མཐོང་སོང་ལ། ཐལ་ཆ་ཆེ་བ་དང་འགན་འཁུར་དཀའ་བའི་གནས་ཚུལ་གང་ལ་གང་འཚམ་ཞིག་འདུག ཡིན་ནའང་ཚོགས་གཙོ་གསར་པའི་རྟེན་འབྲེལ་གྱི་མགོ་འཛུགས་གནང་གི་ཡོད་པའི་སྐབས་ལ་ངས་མི་དགེ་བའི་སྐད་ཆ་གང་ཡང་ཞུ་རྒྱུ་མིན་ལགས། ཚོགས་གཙོ་མཆོག་གི་འཕྲལ་ཕུགས་ཀྱི་དགོངས་འཆར་ཡོངས་ལ་རྒྱབ་སྐྱོར་ཡོད།