སྤང་གོང་མཚོ་ཁར་རྒྱལ་དར་བསྒྲེངས་པ་ཆབ་སྲིད་གནད་དོན་ཆགས།

རྒྱ་གར་ཁོན་ཊི་གསར་ཁང་གིས་ ༢༠༡༧།༧།༡༠ ཉིན་སྤེལ། ད་ལྟའི་ཆར་རྒྱ་དཀར་ནག་གཉིས་ས་མཚམས་རྩོད་རྙོག་བྱུང་སྟེ་འབྲོག་ལམ་ཁུལ་དུ་མཐའ་སྲུང་དམག་གི་གདོང་ཐུག་ཡང་ཡང་རྒྱག་བཞིན་པའི་སྐབས་འདིར། གསར་འགྱུར་བརྒྱུད་ལམ་ཁག་ཏུ་དྷ་རམ་ས་ལའི་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་ཡིས་ཕྱི་ཟླ་ ༧ པའི་ཚེས་ ༥ ཉིན་ལ་དྭགས་བྱང་ཐང་སྤང་གོང་མཚོའི་འགྲམ་དུ་བོད་ཀྱི་རྒྱལ་དར་བསྒྲེངས་འཛུགས་བྱས་ཡོད་པའི་གནས་ཚུལ་ཐོན་ཡོད།

སྤང་གོང་མཚོ་ནི་ཕྱོགས་གཅིག་བོད་དང་ཕྱོགས་གཅིག་ལ་དྭགས་སུ་འཁེལ་ཡོད་པ་དང་། ད་ལྟའི་ཆར་རྒྱ་དཀར་ནག་གཉིས་ཀྱི་ས་མཚམས་གཙོ་གནད་ཅིག་ཆགས་ཡོད་པ་རེད། སྤང་གོང་མཚོ་ཁ་ནས་ཕར་ངོས་བོད་ཀྱི་ས་ཆ་མཐོང་ཐུབ་པ་དང་། སྲིད་སྐྱོང་བློ་བཟང་སེང་གེ་ཡིས་ “ད་ལྟ་ང་ལངས་སྡོད་སའི་མཚོ་ཁ་འདིར་ཕྱི་ཚུལ་གྱི་ཆ་ནས་བོད་ནང་གི་བོད་མི་ཚོ་དང་ཁ་ཐག་ཉེ་བོ་ཡོད་ན་ཡང་། བོད་ནང་གི་ཆབ་སྲིད་གནས་སྟངས་ཐད་ནས་ཁོ་ཚོ་དང་ཁ་ཐག་ཧ་ཅང་རིང་བོ་ཡིན་པ་རེད།” ཅེས་བརྗོད་འདུག

གནས་སྟངས་དེར་རྒྱ་གར་གྱི་གསར་ལམ་ཁག་ཏུ་རྩོད་གླེང་ཞིག་ཡོང་གི་ཡོད་པ་དང་། ཁ་སང་བཟའ་ཉི་མའི་ཉིན་རྒྱ་གར་གྱི་( The Wire)གསར་ཁང་གིས་སྤེལ་བའི་གནས་ཚུལ་ནང་། “འདི་ནི་གནད་དོན་ཆེན་པོ་ཞིག་ཡིན་པ་དང་། ལྷག་པར་དུ་ཆབ་སྲིད་ཀྱི་ཚོར་ཤུགས་ཆེ་བའི་ས་ཆ་དེར་ཐོག་དང་པོ་བོད་ཀྱི་རྒྱལ་དར་བསྒྲེངས་འཛུགས་བྱས་པ་ནི་ཆབ་སྲིད་ཀྱི་མཚོན་དོན་གནད་འགག་ཅན་ཞིག་ཆགས་ཡོད།” ཅེས་བརྗོད་ཡོད་པ་རེད། དེ་བཞིན་དུས་ཚོད་ཀྱི་ཆ་ནས་རྒྱ་དཀར་ནག་གཉིས་ཀྱིས་འབྲོག་ལམ་དང་འབྲས་ལྗོངས་ས་ཁུལ་དུ་གདོང་ཐུག་ཡང་ཡང་རྒྱག་གི་ཡོད་པའི་སྐབས་འདིར་བོད་ཀྱི་སྲིད་སྐྱོང་གིས་ས་མཚམས་ལ་རྒྱལ་དར་བསྒྲེངས་འཛུགས་ཀྱི་གནད་དོན་ནི་ཆབ་སྲིད་ཀྱི་རྣམ་འགྱུར་ཆེན་པོ་ཞིག་ཡིན་ཚུལ་བརྗོད་ཡོད་པ་རེད།

༧གོང་ས་ཏཱ་ལའི་བླ་མ་མཆོག་གི་འཁྲུངས་སྐར་དང་བསྟུན་ཏེ་སྲིད་སྐྱོང་བློ་བཟང་སེང་གེ་ཡིས་སྤང་གོང་མཚོ་ནང་དུ་ཕྱག་ནས་གཏོར་བ་དང་ཆོས་དར་བསྒྲེངས་འཛུགས། དེ་བཞིན་གསོལ་བ་སྨོན་ལམ་འདེབས་པ་བཅས་ཀྱི་བྱེད་སྒོ་ཞིག་མཚོ་ཁར་ཚོགས་ཡོད་པ་དང་། བོད་མིའི་སྒྲིག་འཛུགས་ཀྱི་མགྲིན་ཚབ་པ་དྭགས་པོ་བསོད་ནམས་ནོར་བུ་ལགས་ཀྱིས་རྒྱ་གར་( The Wire)གསར་ཁང་ལ་ “འདི་ནི་བོད་མིའི་སྒྲིག་འཛུགས་ཀྱི་སྲིད་སྐྱོང་ལ་དྭགས་སུ་ལྟ་སྐོར་དུ་ཕེབས་པ་ཐེངས་དང་པོ་ཡིན་པ་དང་། དེར་བརྟེན། ཁོང་གིས་ཐེངས་དང་པོར་མཚོ་ཁར་བོད་ཀྱི་རྒྱལ་དར་དང་ཆོས་དར་ཁོང་རང་ཉིད་ཀྱིས་བསྒྲེངས་འཛུགས་བྱས་ཡོད་པ་རེད།” ཅེས་བརྗོད་ཡོད་འདུག

ཡིན་ན་ཡང་། ཁ་སང་གཟའ་ཉི་མའི་ཕྱི་དྲོར་བོད་མིའི་སྒྲིག་འཛུགས་དྲིལ་བསྒྲགས་དྲུང་ཆེ་ཤར་གླིང་ཟླ་སྒྲོན་ལགས་ཀྱིས་(The Wire)གསར་ཁང་ལ་བོད་ཀྱི་རྒྱལ་དར་དེ་སྲིད་སྐྱོང་གིས་བསྒྲེངས་འཛུགས་བྱས་པ་མིན་སྐོར་བརྗོད་ཡོད་པ་དང་། ཁོ་མོས་ “པར་ནང་དུ་མཐོང་བའི་བོད་ཀྱི་རྒྱལ་དར་དེ་སྲིད་སྐྱོང་བློ་བཟང་སེང་གེ་ཡིས་བསྒྲེངས་འཛུགས་བྱས་པ་མ་ཡིན་པར་སྤང་གོང་མཚོ་ཁར་ཡོད་པའི་བོད་པའི་གཞིས་ཆགས་ཀྱི་མི་ཚོས་བསྒྲེངས་པ་ཡིན་ཞིང་། དེ་གའི་རྒྱལ་དར་དེ་ཕྱི་ལོ་ ༡༩༨༩ ཟླ་ ༡༢ པའི་ཚེས་ ༡༠ ཉིན་ནས་ཡོད་པ་རེད།” ཅེས་བརྗོད་ཡོད་འདུག ད་དུང་ཁོ་མོས་བོད་མིའི་སྒྲིག་འཛུགས་ཀྱི་གཞུང་འབྲེལ་གསར་ལམ་ཐོག་སྲིད་སྐྱོང་གིས་བོད་ཀྱི་རྒྱལ་དར་བསྒྲེངས་འཛུགས་བྱས་ཚུལ་འཁོད་མེད་སྐོར་བརྗོད་ཡོད་འདུག

ཡིན་ན་ཡང་། དྭགས་པོ་བསོད་ནམས་ནོར་བུ་ལགས་ཀྱིས་(The Wire)གསར་ཁང་ལ་སྤང་གོང་མཚོ་ཁ་དེ་བོད་མི་ཚོར་མཚོན་ན་ས་གནས་གལ་ཆེན་ཞིག་ཆགས་ཡོད་སྐོར་བརྗོད་དོན། “ཁྱེད་ཚོས་མཁྱེན་གསལ་ལྟར། སྤང་གོང་མཚོ་ཡི་ཕྱེད་ཀ་བོད་ནང་དུ་ཡོད་པ་དང་ཕྱེད་ཀ་རྒྱ་གར་ནང་དུ་ཡོད་པས་བོད་ཀྱི་རྒྱལ་དར་བསྒྲེངས་འཛུགས་བྱས་པ་དེ་ཆབ་སྲིད་དང་བློ་བཟང་སེང་གེ་མི་སྒེར་ལ་མཚོན་ན་གནད་དོན་གལ་ཆེན་ཞིག་ཆགས་ཡོད་པ་རེད།”ཅེས་བརྗོད་ཡོད་འདུག

གནད་དོན་དེར་རྒྱ་གར་གྱི་སྲིད་དོན་པ་ཚོས་དོ་སྣང་ཆེན་པོ་བྱེད་བཞིན་ཡོད་པ་དང་། རྒྱ་གར་རྡུལ་ཕྲན་མཚོན་ཆ་དང་གནམ་རིག་རྟག་དཔྱད་ཁང་གི་འགན་འཛིན་ལྕམ་ར་རྗི་ས་ཝ་རི་པེ་ལི་ར་རྗ་གྷོ་པཱ་ལཱིན་(Dr Rajeswari Pillai Rajagopalan)ལགས་ཀྱིས་(The Quint)གསར་ཁང་ལ། ལས་དོན་དེ་རིགས་རྒྱ་གར་གཞུང་ལ་མཁྱེན་རྟོགས་མེད་པའི་ཐོག་ནས་དེ་ལྟར་གནང་མི་རུང་སྐོར་བརྗོད་ཡོད་པ་དང་། དེ་བཞིན། རྒྱ་གར་(Strartpost)གསར་ཁང་གི་རྩོམ་སྒྲིག་པ་(Saurabh Joshi)ཡིས་ཀྱང་། རྒྱ་གར་ནང་གི་བོད་མིའི་སྒྲིག་འཛུགས་དང་བོད་པ་སྐྱབས་བཅོལ་བ་ཚོ་ནི་རྒྱ་གར་གྱིས་རྒྱ་ནག་ལ་ཁ་གཏད་བཅག་བྱེད་ཀྱི་མཚོན་ཆ་གལ་ཆེན་ཞིག་ཆགས་ཡོད། དེ་ལ་ཕྱོགས་གཞན་ཞིག་ནས་བསལ་བློ་བཏང་ན། ཐེངས་འདིར་སྤང་གོང་མཚོ་ཁའི་གནད་དོན་དེ་ང་ཚོས་རྒྱ་ནག་ལ་གང་ཡང་བྱེད་ཀྱི་མེད་པ་མ་གཏོགས། གལ་སྲིད་བྱས་པ་ཡིན་ན་ང་ཚོར་བྱེད་རྒྱུ་ཡོད་པའི་བརྡ་ལན་ཞིག་ཆགས་ཡོད།

རྩོམ་སྒྲིག་པ་ཁོང་ནི་རྒྱ་གར་གྱི་ཕྱི་འབྲེལ་བློན་ཆེན་ཟུར་བ་དང་རྒྱ་དཀར་ནག་གཉིས་ཀྱི་ས་མཚམས་གནད་དོན་ལ་ཉམས་མྱོང་ཆེན་པོ་ཡོད་མཁན་ཞིག་ཡིན་སྟབས། གནད་དོན་དེར་ཁོས་ཀྱང་སེམས་འཚབ་ཆེན་པོ་བྱེད་ཀྱིན་ཡོད་པ་དང་། ཁོས་ “རྒྱ་གར་གྱི་ས་མཚམས་རྩོད་རྙོག་དེ་རྒྱ་ནག་དང་ཀཱ་ཤི་མིར་བར་གྱི་གནས་སྟངས་ཇེ་སྡུག་ཏུ་སོང་ཡོད་པའི་ཁ་ཐུག་ཅིག་ལ་འཁེལ་ཡོད་སྟབས། གཅིག་བྱས་ན་བོད་པ་ཚོས་གོ་སྐབས་དེ་དང་བསྟུན་ཏེ་ཁེ་ཕན་བླངས་པ་ཡིན་སྲིད།” ཅེས་བརྗོད་ཡོད་པ་རེད།

ཁོས་ད་དུང་ “༧ཏཱ་ལའི་བླ་མ་རྒྱ་གར་ནང་སྡོད་པའི་རིང་གནས་སྟངས་དང་ཆ་རྐྱེན་ཁག་ཅིག་ཡོད་པ་ལྟར། ཁོ་ཚོས་ཆོས་དར་འཛུགས་དགོས་ན་ཡང་ཅིའི་ཕྱིར་སྲིད་དོན་དང་འབྲེལ་བའི་དར་ཆ་དེ་འཛུགས་དགོས་པ་རེད།” ཁོས་ “རྒྱ་ནག་ལ་མཚོན་ན་གནད་དོན་དེར་རྣམ་འགྱུར་སྟོན་སྟངས་གཉིས་ཆགས་ཡོང་གི་ཡོད་པ་རེད། ཅིག་བྱས་ན་རྒྱ་ནག་གིས་དེ་ལ་རྩུབ་པོས་ངང་ནས་རྣམ་འགྱུར་སྟོན་སྲིད་པ་རེད། ཡང་ཕྱོགས་གཞན་ཞིག་ནས་བོད་པ་ཚོས་རྒྱ་གར་ས་ཁོངས་ལ་བདག་བཟུང་བྱེད་ཀྱི་འདུག་བསམ་ནས་དགའ་ཡང་སྲིད་པ་རེད།”ཅེས་བརྗོད་ཡོད་པ་རེད།

རྒྱ་གར་ནང་སྲིད་བློན་ཆེན་ཟུར་བ་(R.S. Kalha)ཡིས་ “ ལྷག་པར་དུ་དུས་ཚོད་འདི་ལྟ་བུ་ཞིག་ལ་སྤང་གོང་མཚོ་ཁར་བོད་ཀྱི་རྒྱལ་དར་བསྒྲེངས་འཛུགས་བྱས་པ་དེ་ནི་ཆབ་སྲིད་ཀྱི་གནད་དོན་ཞིག་ཆགས་ཡོད་པ་རེད།” ཅེས་བརྗོད་ཡོད་འདུག

བདུན་ཕྲག་སྔོན་མའི་གཟའ་པ་སངས་ཉིན་རྒྱ་ནག་གི་སྲིད་འཛིན་ཞི་ཅིན་ཕིན་དང་རྒྱ་གར་སྲིད་བློན་ན་རེན་ཌི་རྭ་མོ་ཌེ་གཉིས་ཡུ་རོབ་འཇར་མན་གྱི་(G20 )ཚོགས་འདུའི་དབུ་ཁྲིད་ལྷན་ཚོགས་ཐོག་ཟུར་དུ་སྐར་མ་ ༥ རིང་ཐུག་འཕྲད་གྱིས་བཀའ་མོལ་གནང་ཡོད་ཀྱང་། གནས་ཚུལ་ཞིབ་རྒྱས་ད་ལྟ་ཕྱི་ལ་བཏོན་མེད།

སངས་རྒྱས་དཀོན་མཆོག་གིས་བསྒྱུར་སྒྲིག་བྱས།

བསྐྱར་བཅོས།: ༢༠༡༧/༠༧/༡༠

Leave a Reply

16 thoughts on “སྤང་གོང་མཚོ་ཁར་རྒྱལ་དར་བསྒྲེངས་པ་ཆབ་སྲིད་གནད་དོན་ཆགས།

  1. གཞུང་པ་ཚེ་དབང་བསོད་ནམས་

    སྤང་གོན་དང་དཔལ་མགོན་གང་ཡིན་རུང་ལོ་རྒྱུས་ནས་ངོ་སྤྲོད་ཐུབ་རྒྱུ་དང་གལ་ཆེ་ཤོས་དེ་ལྷན་ཁང་གཅིག་གི་འགན་ཡོད་ལས་བྱེད་ནས་འབྲེལ་བཤད་མི་འདྲ་གཉིས་གནང་བ་དེ་ཡ་ཚན་མ་རེད་དམ་?

  2. ཀི་ཀི་བསྭོ་བསྭོ་ལྷ་རྒྱལ་ལོ་།བོད་རྒྱལ་ལོ་། སྲིད་སྐྱོངས་རྒྱལ་ལོ་།བདེན་པ་རྒྱལ་ལོ་།ནམ་ཞིག་བོད་རྒྱ་ཁབ་ཆེན་པོའི་རྒྱ་དར་བོད་གི་རྒྱལ་ས་ལ་བཙུགས་ངེས་རེད་།གང་ཡིན་ཟེར་ན་།ལོ་རྒྱུས་ཐོག་ལ་ོད་ནི་རང་བཙན་གཙང་མའི་རྒྱལ་ཁབ་རེད་དོ་།།

  3. ༡སྤང་གོང་མཚོ་ཞེས་པ་དེ་དཔལ་མགོན་མཚོའི་སྒྲ་འགྱུར་བ་ཡིན་པ་འདྲ། ཡིན་ནའང་དེ་གནད་དོན་མ་རེད། ༢གནད་དོན་གཙོ་བོ་དྭགས་པོ་བསོད་ནམས་ནོར་བུ་དང་ཤར་གླིང་བསྟན་འཛིན་ཟླ་སྒྲོན་གཉིས་ཀྱིས་རྒྱ་གར་( The Wire)གསར་ཁང་ལ་གཅིག་གིས་སྲིད་སྐྱོང་གིས་རྒྱལ་དར་བསྒྲེངས་པ་རེད་དང་། གཅིག་གིས་བསྒྲེངས་པ་མ་རེད་ཀྱིས་འགྲེལ་བཤད་བྱས་ཡོད་པ་དེ་རེད། ༣སྲིད་སྐྱོང་གིས་རྒྱལ་དར་བསྒྲེང་བར་ཡོང་བ་ཡིན་གསུངས་མི་འདུག དར་ཆ་བསླང་གི་ཡོང་ཡིན་གསུང་འདུག དངོས་ཡོད་གནས་ཚུལ་བཤད་དགོས་པ་རེད། མ་གསུངས་པ་ཞིག་གསུང་འདུག་ལབ་ན་ཡག་པོ་མེད་པར་འདོད།

  4. ང་ཚོས་ཕྱི་དྲིལ་ལས་ཁུང་གི་དྲུང་ཆེ་གཉིས་ཀྱི་བཀའ་མོལ་གསུངས་བཏང་ལ་ལྟ་དུ། ང་ཚོས་སོ་སོ་ག་རེ་བྱེད་ཀྱི་ཡོད་མེད་མ་ཤེས་པའི་བཟོ་འདྲ་བོ་ཆགས་འདུག། ད་རིང་སྲིད་སྐྱོང་སྦང་གོང་དུ་ཕེབས་ནས་ཆོས་དར་དང་མཚོ་ནང་རབ་གནས་དབྱུགས་ནས་རྒྱ་དཀར་ནག་གཉིས་ནས་བོད་པའི་སྐོར་གླེང་དགོས་པ་དེ་ཡག་པོ་བྱུང་བ་རེད། དོན་དུ་ང་ཚོས་བོད་དང་བོད་མི་ཤི་མེད་པའི་ད་ལན་ཞིག་ཀྱང་ཡིན།

  5. གླིང་གཅེར་བུ།

    http://lehladakhtravelguides.com/destinations/pangong-lake-lake-great-hollow/
    http://www.tibetcnr.com/xwnew/tpxwnew/201011/t20101123_65435.html
    http://www.khabdha.org/?p=65226
    http://bod.asia/2017/07/%E0%BC%B8%E0%BD%82%E0%BD%BC%E0%BD%84%E0%BC%8B%E0%BD%A6%E0%BC%8B%E0%BD%98%E0%BD%86%E0%BD%BC%E0%BD%82%E0%BC%8B%E0%BD%82%E0%BD%B2%E0%BC%8B%E0%BD%96%E0%BE%B1%E0%BD%B2%E0%BD%93%E0%BC%8B%E0%BD%A2%E0%BE%B3/
    སྤང་གོང་དང་དཔལ་མགོན་མཚོ་གང་ཡིན་འདི་དག་ནས་ཐག་གཅོད་ཐུབ། དཔལ་མགོན་མཚོ་ཞེས་པ་ཞིག་བོད་ནང་དུ་ཡོད་ཚོད་འདུག་མོད། ཡིན་ན་ཡང་། མཚོ་འདི་རེད་མི་འདུག དབུས་བོད་མིའི་སྒྲིག་འཛུགས་དྲ་གནས་ན་ཡང་སྤང་གོང་མཚོ་ཞེས་བྲིས་འདུག

  6. བློ་བཟང་དོན་ཡོད།

    དྭངས་གཙང་མཚོ་མོ་གཞུང་ལ། །འུར་རྡོ་བསྐོར་ནས་གཡུགས་སོང་། །ཀླུ་རྒྱལ་དྲག་ཏུ་ཁྲོས་ནས། །ཆབ་མདོ་ཆུ་ཡིས་བསྣུབས་སོང་། །མཚོ་མོའི་འགྲམ་གྱི་སྤང་ལ། །སེང་གེའི་དར་ཆ་བསྒྲེངས་ནས། །ཡུལ་ལྷ་གཞི་བདག་མཆོད་སོང་། །གསེར་སྐྱེམས་ཕུལ་ཉེས་ཤོར་ཏེ། །རྒྱ་གར་ཕྱི་སྲིད་ཁང་གིས། །འཇིགས་སྐུལ་ཉེན་བརྡ་སླེབས་སོང་། །ཤར་གླིང་དྭགས་པོ་གཉིས་ལ། །གང་བཤད་འདི་བཤད་མི་འདུག །

  7. བོད་གཞུང་གི་མགྲིན་ཚབ་པ་དྭགས་པོ་བསོད་ནམས་ནོར་བུ་དང་ཤར་གླིང་བསྟན་འཛིན་ཟླ་སྒྲོན་གཉིས་ཀྱིས་སྲིད་སྐྱོང་གིས་ཆོས་དར་བསྒྲེངས་པ་ཡིན་ཚུལ་གསུངས་འདུག་ཀྱང་སྲིད་སྐྱོང་མཆོག་གིས་ང་རང་གཙོ་བོ་ད་རེས་རྒྱལ་དར་བསྒྲེང་བར་ཡོང་བ་ཡིན་གསུངས་འདུག

  8. ལྷ་ནོར། བོད།

    དེ་ནི་དོན་མེད་རྒྱ་གར་སྲིད་དོན་པ་ཚོས་འུར་འདྲོགས་བྱས་པ་ཞིག་ཡིན་ལ། དོན་དངོས་ཐོག་མཚོ་ཁར་དེར་བོད་ཀྱི་རྒྱལ་དར་བཙུགས་པ་ནི་རྒྱ་ནག་སྡུག་དགོས་པ་ཞིག་ལས། རྒྱ་གར་སྡུག་དོན་དང་འུར་ལངས་དོན་མེད། བོད་ཀྱི་རྒྱལ་དེར་མཚོ་དེར་བཙུགས་པ་ནི་བོད་དང་རྒྱ་གར་གྱི་ས་མཚམས་རྒྱ་ནག་འབྲེལ་མེད་དང་། ཇུས་གཏོགས་མེད་པའི་བརྡ་ལན་ཞིག་ཏུ་ང་ཚོས་བསྒྱུར་བཤད་མི་ཆོག་པ་ཞིག་གང་ན་ཡོད། རྒྱ་གར་གྱི་ཆབ་སྲིད་པ་ཚོས་ཀྱང་དེ་ལུགས་ཀྱི་ལག་ཆ་ཞིག་ཏུ་བཀོད་ནས་ཆབ་སྲིད་ཀྱི་ཚོར་ཤུགས་གླེང་མི་ཆོག་པ་ཅི་ཡོད། དོན་དངོས་ཐོག་རྒྱ་གར་གྱི་ཆབ་སྲིད་པ་ཚོ་ཧ་ཅང་ལྐུགས་དྲགས་ོས་རེད། རྒྱ་ནག་ལ་དྭོགས་སློང་ཡོད་པ་ཞིག་དང་རྒྱ་ནག་དྭོགས་སློང་བྱེད་པའི་ལམ་ཁ་ཁོ་ཚོས་བཙལ་ནས་སྟེར་གྱིན་འདུག འདི་ནི་མི་རིགས་འདི་ཉམ་ཆུང་ཞིག་དང་བཤད་ཐུབ་ས་ཞིག་གིས་སྒང་ལ་སྨྱོ་ལངས་བྱེད་པ་ནི་ཁོ་ཚོའི་ལུགས་སྲོལ་དང་ལྐུགས་རྟགས་དེ་ཡིན།

  9. རྒྱ་གར་གསར་འགྱུར་ནང་ས་མཚམས་རྩོད་ཉོག་ཛ་དྲག་ཆེ་བའི་སྐབས་འདིར་བཙན་བྱོལ་བོད་མིའི་སྲིད་འཛིན་བློ་བཟང་སངས་རྒྱས་ཀྱི་བྱེད་སྟངས་འདི་ལ་བརྟེན་ཏེ་རྒྱ་གར་ནག་བར་དམག་འཁྲུག་བྱུང་ན་དེའི་འགན་བཙན་བྱོལ་བོད་གཞུང་དང་སྲིད་འཛིན་བློ་བཟང་སངས་རྒྱས་ཀྱིས་འཁུར་དགོས་ལབ་འདུག

  10. གླིང་གཅེར་བུ།

    གཞུང་པ་ཚེ་དབང་ལགས་སུ། མཚོ་མིང་ལ་དཔལ་གོང་མ་ཡིན་པར་སྤང་གོང་རེད་འདུག བོད་ཀྱི་ཚིག་མཚོད་ཁག་ན་ཡང་འདུག དེ་བཞིན་དབུས་བོད་མིའི་སྒྲིག་འཛུགས་ཀྱི་སྐད་ཆ་དེ་ཁུངས་ཐུབ་མིན་ན་ཁོ་ཚོས་གནས་ཚུལ་འདི་ལྟར་འགོད་མི་སྲིད་པ་ཞིག་རེད། གནས་ཚུལ་དེ་ཡོང་སའི་དྲ་གནས་གཉིས་ཀ་རྒྱ་གར་གྱི་ཆབ་སྲིད་གནད་དོན་དབྱེ་ཞིབ་དང་རྣོ་དབར་ཚ་བའི་སྲིད་དོན་དཔྱད་བརྗོད་རྐྱང་སྤེལ་ཡོད་པར་དཔག་ན་ཤེས་ངེས་པ་ཞིག་རེད་འདུག

  11. ཧང་སང་རྒྱུ་ག་རེ་ཡོད་རེད། བློ་བཟང་སེང་གེ་ལ་རྒྱབ་སྐྱོར་ཡོད། བཙན་བྱོལ་ནང་གི་བོད་པའི་གཞིས་ཆགས་ཁག་གི་མི་ཚང་རེ་རེས་བོད་ཀྱི་རྒྱལ་དར་བསྒྲེང་ཡོད་རེད།

    1. བདེན་པ་རེད།  བོད་མིའི་སློབ་གྲྭ་ཁག་ཁ་ཤས་དང་གཞིས་ཆགས་ཁག་ནང་ད་དུང་ཡང་བོད་ཀྱི་རྒྱལ་དར་བསྒྲེང་ཡོད་པ་དངོས་ཡོད་གནས་ཚུལ་རེད། བློ་བཟང་སེང་གེ་མཆོག་ལ་རྒྱབ་སྐྱོར་མཐའ་གཅིག་ཏུ་ཡོད།

  12. གཞུང་པ་ཚེ་དབང་བསོད་ནམས་

    དང་པོ་དཱོགས་འདྲི་ཞུ་རྒྱུར་སྤང་གོང་མཚོ་རེད་དམ་དཔལ་མགོན་མཚོ་རེད་?
    གཉིས་པ་དབུས་བོད་མིའི་མགྲིན་ཚབ་པ་དཱགས་པོ་བསོད་ནམས་ནོར་བུའི་གསལ་བཤད་དང་ཕྱི་དྲིལ་དྲུང་ཆེ་ཤར་གླིང་ཟླ་སྒྲོན་གྱི་གསལ་བཤད་དེ་གཉིས་སུ་ཁུང་བཙན་པ་རེད་གསལ་བཤད་གནང་རོགས་།

  13. སྐལ་བཟང་ཚེ་རིང་།

    གནས་ཚུལ་འདི་རྒྱ་གར་གྱི་གསར་འགྱུར་མང་ཆེ་བའི་ནང་འུར་སྒྲ་ཅུང་ཆེན་པོ་ཆགས་འདུག
    གསར་འགྱུར་འབྲེལ་ཐག་ཁ་ཤས་འདི་ལ་བཏང་ཡོད། དང་པོ། https://thewire.in/155657/lobsang-sangay-central-tibetan-administration-tibet-flag-india-china/
    གཉིས་པ། https://www.thequint.com/india/2017/07/08/tibetan-flag-hoisted-at-pang-gong-lake
    གསུམ་པ། http://www.ibtimes.co.in/tibetan-govt-exile-hoists-flag-ladakh-india-china-standoff-rages-sikkim-733940
    བཞི་པ། https://wholedude.com/2017/07/09/world-tibet-day-prayers-at-pang-gong-lake-for-tibet-equilibrium/
    ལྔ་པ། http://www.tibetanjournal.com/index.php/2017/07/08/tibetan-political-leader-hoisted-tibetan-flag-lake-bordering-tibet/
    དྲུག་པ། https://defence.pk/pdf/threads/tibet-card-added-to-india-china-border-mix-as-tibetan-flag-is-hoisted-at-pang-gong-lake.505591/page-2