མི་རབས་གསར་པའི་མགོ་འཁྲིད་ཟབ་སྦྱོང་།

གཞོན་སྐྱེས་ཚོའི་ཀླད་པ་གཙང་མ་ཡིན་དུས་མ་འོངས་པར་བོད་པ་ཡིན་བསམ་པའི་བསམ་བློ་ཡོད་པ་དང་ཕྱོགས་ལྷུང་སུ་མི་འགྲོ་བར་སྤྱི་ཚོགས་ཀྱི་སྣེ་འཁྲིད་ཡང་དག་ཅིག་བྱེད་ཐུབ་རྒྱུའི་ཆེད་དུ་ཟབ་སྦྱོང་སྤྲོད་བཞིན་ཡོད་ཅེས་ཟེར།

དེ་རིང་ཞོགས་པའི་ཆུ་ཚོད་ ༩ སྟེང། བོད་ཀྱི་རྒྱལ་ཡོངས་མང་གཙོ་ཚོགས་པའི་དབུས་སྤྱི་ཁྱབ་རྒྱུན་ལས་ཁང་གི་གོ་སྒྲིག་འོག དྷ་སྟེང་བོད་ཁྱིམ་ཞི་བདེ་གླེང་མོལ་ཁང་དུ་མི་རབས་གསར་བའི་མགོ་འཁྲིད་ཟབ་སྦྱོང་ཐེངས་ ༣ པ་མགོ་འཛུགས་གནང་སོང་བ་དང་། མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་དབུས་ཚོགས་སྐྱིད་ཁག་ཅིག་གི་སྐུ་ཚབ་རྣམས་དང་། བོད་རིགས་མཐོ་རིམ་སློབ་གཉེར་བ་དང་བོད་ཁྱིམ་སློབ་གྲྭ་ཁག་གི་སྤྱི་ཁྱབ་འགན་བདག་བཅས་སློབ་གཉེར་བ་ ༣༧ མཉམ་ཞུགས་གནང་འདུག

འདི་གའི་གསར་འགོད་པས་བོད་ཀྱི་རྒྱལ་ཡོངས་མང་གཙོ་ཚོགས་པའི་ཚོགས་གཙོ་ཚེ་བརྟན་ནོར་བུ་ལགས་སུ་ཟབ་སྦྱོང་འདི་ལྟ་བུ་ཞིག་ཚོགས་དགོས་པའི་དམིགས་ཡུལ་གཙོ་བོ་ག་རེ་ཡིན་སྐོར་དྲིས་པར་ཁོང་གིས། གཙོ་བོ་མཐོ་སློབ་ཁག་འགྲིམ་བཞིན་པའི་སློབ་གཉེར་བ་ཚོར་མགོ་འཁྲིད་ཀྱི་ཟབ་སྦྱོང་དེ་ཧ་ཅང་གལ་ཆེན་པོ་ཡིན་པ་དང་། ང་ཚོས་ཟབ་སྦྱོང་འདི་ལྟ་བུ་ཨ་རིའི་ཐེབས་རྩའི་རོགས་སྐྱོར་འོག་ཐེངས་གཉིས་ལ་ཚོགས་ཟིན་པ་རེད། ཐེངས་འདི་ལའང་ཨ་རིའི་ཐེབས་རྩའི་རོགས་སྐྱོར་འོག་ཐེངས་སྔོན་མ་དག་གི་ཉམས་མྱོང་ལས་ཟབ་སྦྱོང་གོ་སྒྲིག་གནང་མཁན་དང་དེ་ལ་མཐུན་རྐྱེན་སྦྱོར་མཁན། དེ་བཞིན་ཟབ་སྦྱོང་ལ་མཉམ་ཞུགས་གནང་མཁན་ཚང་མས་དགོས་མཁོ་ཆེན་པོ་ཞིག་ཏུ་གཟིགས་ནས་མུ་མཐུད་ཚོགས་པ་ཡིན་ལ། གཉིས་ནས་བོད་ཀྱི་རྒྱལ་ཡོངས་མང་གཙོ་ཚོགས་པའི་ལས་འགན་གཙོ་བོ་གསུམ་ཡོད་པ་ལས། དང་པོ་དེ་གཞོན་སྐྱེས་ཚོར་ཆབ་སྲིད་དང་དམངས་གཙོའི་གོ་རྟོགས་སྤེལ་རྒྱུ་དང་མི་མང་ནང་མཁས་དབང་སོགས་གདན་འདྲེན་གྱིས་དུས་ནས་དུས་སུ་བགྲོ་གླེང་བྱེད་པ་བཅས་རེད། གཉིས་པ་དེ་ལོ་ལྔ་རེའི་མཚམས་ནས་སྲིད་སྐྱོང་དང་བོད་མི་མང་སྤྱི་འཐུས་འོས་མི་སོགས་དྲིལ་བསྒྲགས་བྱེད་པ་དང་། གསུམ་པ་བོད་མི་སྤྱི་ལ་འཁྲི་བའི་འགན་འཁུར་ལྟར་ཆབ་སྲིད་འཐབ་རྩོད་བྱེད་པ་བཅས་ཆགས་ཀྱི་ཡོད་པ་རེད། ཅེས་བརྗོད་བྱུང་།

ཡང་ཁོང་གིས་མུ་མཐུད། ཐེངས་འདིའི་ཉིན་གྲངས་ ༣ རིང་ཟབ་སྦྱོང་གི་བརྗོད་གཞི་དང་སྒྲོམ་གཞི་གཙོ་བོ་དེ་བཙན་བྱོལ་བོད་མིའི་སྒྲིག་འཛུགས་ཀྱི་སྒྲོམ་གཞི་ངོ་སྤྲོད་ཞུ་རྒྱུ་དང་། དེ་བཞིན་གཞོན་སྐྱེས་ཚོའི་ཀླད་པ་གཙང་མ་ཡིན་དུས་མ་འོངས་པར་ཁོ་ཚོའི་སེམས་ནང་བོད་པ་ཡིན་བསམ་པའི་བསམ་བློ་ཡོད་པ་དང་། ཕྱོགས་ལྷུང་སུ་མི་འགྲོ་བར་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་པ་བཞིན་སྤྱི་ཚོགས་ཀྱི་སྣེ་འཁྲིད་ཡང་དག་ཅིག་བྱེད་ཐུབ་རྒྱུའི་ཆེད་དུ་ཡིན་ལ། བོད་མིའི་ཡ་རབས་བཟང་སྤྱོད་ཀྱི་གཤིས་ཀ་དེ་འཛམ་གླིང་ལ་སྟོན་མ་ཐུབ་ན་ཡང་བོད་མིའི་སྤྱི་ཚོགས་ཁྲོད་གཞོན་སྐྱེས་ཚོའི་མི་རབས་རྒན་པའི་ཡ་རབས་བཟང་སྤྱོད་ཀྱི་མིག་དཔེ་གང་ཡོད་པའི་ཐོག་འགྲོ་དགོས་པ་དང་། ད་ལྟའི་ཆར་ང་ཚོའི་ངོས་ནས་འགྲོ་གྲོན་སོགས་བཏང་སྟེ་ཟབ་སྦྱོང་འདི་ཚོགས་དགོས་པའི་དམིགས་ཡུལ་གཙོ་བོ་དེ་དག་ཆགས་ཡོད་པ་རེད། ཅེས་བརྗོད་བྱུང་།

མི་རབས་གསར་པའི་མགོ་འཁྲིད་ཟབ་སྦྱོང་ཞེས་པ་དེ་ཐོག་མར་ཕྱི་ལོ་༢༠༡༦ ལོར་དྷ་རམ་ས་ལར་ཚོགས་ཏེ་སློབ་གཉེར་བ་གྲངས་ ༢༦ དང་། ན་ནིང་རྒྱ་གར་ལྷོ་ཕྱོགས་སུ་བསྡུས་ནས་སློབ་གཉེར་བ་ ༣༠ འཛུལ་ཞུགས་བྱས་ཡོད་འདུག ད་ལོར་ཁྱོན་སློབ་གཉེར་བ་ ༤༢ ལ་གོ་སྐབས་སྤྲད་ཡོད་ཀྱང་དངོས་སུ་ཚོགས་འདུར་བཅར་མཁན་ ༣༦ ཡོད་པ་དང་། ཁོང་ཚོ་རྒྱ་གར་མཐོ་སློབ་ལྡི་ལི་དང་བྷིང་ལོར། མེ་སོར། བྷ་རོ་ཊ། ཧར་ཡ་ནཱ། ཅན་རྡི་གྷར། ས་རཱ། ཤེས་རབ་དགའ་ཚལ་སློབ་གླིང་། བོད་ཁྱིམ་སློབ་གྲྭ་ཁག་གི་སྤྱི་ཁྱབ་འགན་བདག་བཅས་ཡིན་འདུག

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༨/༠༦/༢༠

Leave a Reply

One thought on “མི་རབས་གསར་པའི་མགོ་འཁྲིད་ཟབ་སྦྱོང་།

  1. གཞུང་པ་ཚེ་དབང་བསོད་ནམས་་ཉེ

    ཀླད་པ་ལ་གཙང་རྩོག་ག་འདྲ་ཡོད་པ་ཡིན་ནམ་ཧཧཧ
    ཀླད་པ་སོས་པ་ལས་ཀླད་པ་གཙང་མ་ག་འདྲ་ཡོད་པ་ཡིན་ནམ་།