རྫ་ཚེ་རིང་བཀྲ་ཤིས།
འཕགས་པ་སྤྱན་རས་གཟིགས་ལ་ཕྱག་འཚལ་ལོ། །དེ་ཡང་གུས་པས་ལོ་འགའི་སྔོན་ལ་ཤེས་རིག་ལས་ཁུངས་ཀྱི་སློབ་དེབ་དང་འབྲེལ་བའི་༼དྲག་ཁྲོས་སོ་བཞི་བ་༽ཟེར་བའི་ཡི་གེ་ཞིག་བྲིས་པའི་རྗེས་ནས་ཉེ་བའི་ལོ་གཅིག་གཉིས་འདིའི་རིང་རང་རེ་ཕྱེས་བཞུགས་དག་གི་གནས་སྟངས་དང་འབྲེལ་བའི་དམིགས་བསལ་རྩོམ་ཡིག་ཆེར་མ་བྲིས།
ལོ་གཉིས་ཡར་སྔོན་གྱི་འོས་བསྡུ་ཆེན་མོའི་སྐབས་སོགས་སུ་རང་ཉིད་སྤྱི་ཚོགས་ལ་དོ་ཁུར་བྱེད་མཁན་ཞིག་ཡིན་པའི་ཆ་ནས་སེམས་ཚོར་ཧ་ཅང་མང་པོ་བྱུང་། བཤད་འདོད་པའང་མང་པོ་བྱུང་། དེ་འདྲ་མ་རེད་འདི་འདྲ་རེད་ཨང་སྙམ་པའི་བསམ་བློ་དང་ཚོར་བ་ཤྭ་འོད་བརྡོལ་བ་ལྟ་བུ་རེ་ཡང་བྱུང་། དེ་ཚང་མ་བསམ་པ་སླད་མེད་ཀྱི་འཆར་སྒོ་ཡིན་སྙམ་པ་ཡོད། དེ་ལྟ་ན་ཡང་དྲང་གཏམ་བཤད་ཀྱང་དྲང་གཏམ་གྱི་སར་འགྲོ་ཁག་པོ་ཞིག་ཏུ་མཐོང་ནས་ཚང་མ་ཡ་ཆུང་ཁོག་པའི་ནང་དུ་མར་མིད་ནས་བསྐྱུར་བཞག་པ་ཡིན།
ཡིན་ན་ཡང་། བདུན་ཕྲག་འདིའི་ནང་ཉིའུ་ཡོག་ཏུ་བྱུང་བའི་འཁྲུངས་སྐར་དང་འབྲེལ་བའི་དོན་རྐྱེན་དེས་ང་ལ་སྐད་ཆ་ཚིག་འགའ་མ་བཤད་ཐབས་མེད་བཟོས་བྱུང་། འདས་པའི་བདུན་ཕྲག་འདི་ནི་འཛམ་བུ་གླིང་གིས་བོད་པ་དང་། བོད་དང་ཆོས་རིག་གཅིག་པའི་རྒྱལ་ཁབ་གཞན། ཐ་ན་བོད་པ་གཅིག་ཀྱང་མེད་པའི་ཡུལ་ལུང་དེ་འདྲ་ན་ཡང་ཡུལ་མི་རང་གི་གཞོན་སྐྱེས་དེ་འདྲས་གོ་སྒྲིག་བྱས་ནས་མི་བརྒྱ་ཕྲག་མང་པོ་འདུས་ཏེ་འཁྲུངས་སྐར་གཏོང་བཞིན་པ་གོ་ཐོས་བྱུང་། དེས་ན་ཟླ་བ་འདི་དང་གཟའ་འཁོར་འདི་ནི་ང་ཚོའི་ཆེའི་རླབས་ཆེ་བའི་ཟླ་བ་དང་གཟའ་འཁོར་ཞིག་རེད། བོད་པའི་ལོ་སར་ལས་ཀྱང་འདི་ལྟ་བུའི་གོ་ལ་ཡོངས་ལ་ཁྱབ་ཆེ་ཤོས་ཀྱི་དུས་སྟོན་ཞིག་ད་བར་བོད་ལ་སྲིད་པ་ཆགས་ནས་ཡོད་མ་མྱོང་བ་རེད། འདི་ནི་ང་ཚོ་ཁ་འཐོར་དགུ་འཐོར་དུ་ཡོད་པ་ཚོ་མཉམ་འདུས་དང་གཞོན་སྐྱེས་ཚོར་ཕ་མེས་ཀྱི་བླ་སྲོག་ངོ་སྤྲོད་བྱེད་པའི་སྡིང་ཆ་ཡོད་ན་མེད་ན་དེ་རེད།
ནམ་རྒྱུན་ང་ཚོས་གཅིག་གིས་གཅིག་ལ་ཁྱོའི་ཁ་ངའི་སྣ་ཟེར་ན་ཡང་འཁྲུངས་སྐར་ལ་ཚང་མ་མཉམ་དུ་འཛོམས་ཀྱི་ཡོད། ཚང་མས་མཇལ་དར་འཐེན། ཞལ་འདོན་སྐྱོར། འབྲས་སིལ་ཟ། བོད་ཇ་བཏུང་། སྒོར་བཞས་འཁྲབས་ནས་ཉི་མ་གཏོང་གི་རེད། འདི་ལ་ལུང་ཚན་དང་ཆོས་བརྒྱུད་ཀྱི་ས་མཚམས་མེད། འདི་ལ་ཁྱེད་དང་ངའི་དབྱེ་བ་མེད། འདི་ནི་རྒྱལ་སྤྱིའི་ཨོ་ལམ་ཕིག་ནང་བཞིན་བོད་པའི་མཛའ་བརྩེ་དང་གཞི་མཐུན་གྱི་ཨོ་ལམ་ཕིག་བླ་ན་མེད་པ་དེ་རེད། ང་དུས་ཆེན་འདི་ལ་ཧ་ཅང་དུང་། དུས་སྟོན་འདི་ཙམ་ཞིག་སྲུང་རྩི་བྱེད་དུ་ཡོད་པ་དང་། གང་ཟག་གཅིག་གི་མཚན་གྱི་འོག་ནས་འདི་ཙམ་གཅིག་ཏུ་བསྡུད་དུ་ཡོད་པ་དེ་ཡང་༧གོང་ས་མཆོག་ཁོ་ནའི་མཚན་གྱི་བྱིན་རླབས་རེད། འདི་ཁོ་ནའི་རིན་ཐང་དང་བཀའ་དྲིན་ཀྱང་བོད་པ་ཚོས་ནམ་ཡང་གསོབ་མི་ཐུབ་པ་ཞིག་རེད། ཉི་མ་གཅིག་ལ་ང་ཚོས་ངོས་ཟིན་གི་རེད་དེ། ངས་རེ་བ་ལ་སྔ་ཙམ་ངོས་ཟིན་པ་དེ་གལ་འགང་ཆེན་པོ་རེད་སྙམ། ངས་ནམ་རྒྱུན་འཁྲུངས་སྐར་ལ་སླེབས་དུས་རྟག་པར་དེ་འདྲ་ཚོར་གྱི་ཡོད། དངོས་གནས་ཡིན།
དེས་ན་ད་ཐེངས་༧གོང་ས་མཆོག་གི་འཁྲུངས་སྐར་ལ་གུས་ཞབས་མེད་པའི་བྱེད་སྟངས་དེས་ངའི་སེམས་པ་ཕམ་བྱུང་། སེམས་པ་མ་སྐྱིད་པ་བྱུང་། སྤྱི་འཐུས་བསྟན་པ་ཡར་འཕེལ་གུས་པ་དང་སྒེར་ངོས་ནས་དམིགས་བསལ་གྲོགས་པོ་དེ་འདྲ་མིན། ཁྱད་པར་ཁོང་གིས་བྲིས་པའི་གནས་ཆུང་དང་འབྲེལ་བའི་རྩོམ་ཡིག་ཅིག་བཀླགས་མྱོང་། སེམས་ལ་འབབ་པོ་དེ་འདྲ་ཞིག་མི་འདུག དེ་ང་རང་གི་བསམ་ཚུལ་ཡིན། ཡིན་ན་ཡང་། གྲོས་ཚོགས་སུ་ཁོང་གིས་གནས་ཆུང་སྐོར་དང་དགའ་ལྡན་ཕོ་བྲང་གི་སྐོར་ཞིག་བཤད་པ་དེ་ངས་ནོར་མེད་ན་སྐབས་དེ་ག་རང་དུ་གྲོས་ཚོགས་རང་གི་ནང་ནས་ཁོ་རང་གི་སྐད་ཆ་ཁོ་རང་གིས་ཡོང་བསྒྲགས་ཕྱིར་འཐེན་བྱས་པ་དང་། དེ་ལ་སྤྱི་མཐུས་ལྷན་ཚོགས་ཀྱིས་དེ་བཞིན་ཐག་བཅད་ནས་མཇུག་བསྡུས་ཟིན་པ་ཞིག་ཡིན་པ་རེད། མང་ཚོགས་ཚོ་ལ་ཁག་ཡོད་རྒྱུ་མ་རེད་དེ། མགོ་འཚོད་མཁན་ཚོས་ཡིན་པ་ཡིན་པ་དང་མིན་པ་མིན་པ་བྱེད་རྒྱུ་དེ་ཧ་ཅང་གལ་ཆེ་བའི་རྩ་དོན་ཞིག་རེད་སྙམ། ཡིན་མིན་སོ་སོས་གཟིགས།
ཡིན་ན་ཡང་གནས་ཆུང་དེ་བོད་པ་མང་པོ་ཞིག་གི་མཆོད་བསྟོད་བྱེད་སའི་སྲུང་མ་ཞིག་ཡིན་སྟབས། དེ་ལ་དད་མཁན་ཚོའི་དད་མོས་ལ་རྩི་བཀུར་དགོས་པ་དེ་སྤྱི་འཐུས་ཤིག་ཡིན་པའི་ཆ་ནས་དམིགས་བསལ་འགན་འཁྲི་ཞིག་ཡོད་ངེས་རེད། ཆབ་སྲིད་མི་སྣ་ཞིག་གི་འགུལ་སྐྱོད་ག་འདྲ་ཡིན་ཡང་དེ་མི་མང་གི་སྔུན་སོ་ནས་ཚབས་ཆེན་དོན་ཆེན་ཡིན་པ་དེ་རྒྱུན་ལྡན་ཞིག་རེད། དེའི་ཆ་ནས་མང་ཚོགས་ཀྱིས་ལུགས་མཐུན་གྱི་བསམ་ཚུལ་དང་དགག་པ་ལ་ངས་ཀྱང་མོས་མཐུན་ཡོད་དང་ཡོད། དེ་ནི་མང་གཙོའི་ཁྱད་རྟགས་བླ་ན་མེད་པ་དེ་རེད། ཡིན་ན་ཡང་དགག་པ་རྒྱག་པ་དེ་གནས་ལུགས་ཡོད་པ་ཞིག་དང་སྐབས་དང་དུས་ལ་རན་པ་ཞིག་དགོས་ངེས་རེད་སྙམ། ད་སྐད་ཆ་འཕྲོས་སོང་།
འོ་རེད། ངའི་སྐད་ཆ་གཙོ་བོ་དེ་གཞི་ནས་བཤད་རྒྱུ་ཡིན། དེ་ཡང་འཁྲུངས་སྐར་མཛད་སྒོ་དེར་སྤྱི་འཐུས་བསྟན་པ་ཡར་འཕེལ་ཁོང་སྒེར་ངོས་ནས་ཡོང་བའམ་ཚོགས་པའི་གདན་ཞུས་གང་ལྟར་ཡང་དེ་ང་ལ་འབྲེལ་བ་མེད། ཡིན་ནང་། ༧སྐུ་མདུན་འཁྲུངས་སྐར་གྱི་ཉིན། མཛད་སྒོའི་དངོས་གཞིའི་སྐབས། ད་དུང་ཕྱི་ནང་གི་སྐུ་མགྲོན་གཙོ་བོ་ཐམས་ཅད་བཞུགས་བཞིན་པའི་མདུན་དུ། གློ་བུར་དུ་བུད་མེད་བརྒྱད་དགུ་ཞིག་མཉམ་གཅིག་ཏུ་ཡོང་ནས་སྐུ་མགྲོན་གྱི་གྲས་ན་བཞུགས་པའི་མི་བྱེ་བྲག་པ་གཅིག་གི་སྔུན་དུ་ཡར་ལངས་ཏེ་རུབ་བརྒྱབས་ནས་ཚོར་བ་རྣོ་བའི་གླེང་སློང་དེ་འདྲ་ཞིག་བྱས་པ་ནི་སྐབས་དང་དུས་ཀྱི་ཆ་ནས་ཤིན་ཏུ་མ་འོས་པ་ཞིག་རེད། ངས་རྩོམ་ཡིག་འདི་འབྲི་མགོ་འཛུགས་སྐབས་ཆེད་དུ་བརྙན་དེར་ཞིབ་ལྟ་ཐེངས་ཁ་ཤས་བྱས་པ་ཡིན། མ་ཉེས་ཁ་ཡོག་བྱེད་ག་ལ་རུང་། བར་འབུད་ཕོ་སར་དེ་ཚོས་ཀྱང་ཚད་ལས་བརྒལ་བའི་གང་ཡང་བྱས་མ་སོང་བསམ། སྐྱེས་སྨན་དེ་ཚོར་ཡང་སྒེར་ངོས་ནས་རྩི་བཀུར་ལོས་ཞུ། ཡིན་ན་ཡང་། ད་ཐེངས་ཀྱི་གནང་སྟངས་དེ་ཏག་ཏག་བསྡད་མ་སོང་།
ད་དུང་སྐབས་དེར་སྡིངས་ཆའི་ཐོག་ན་ལས་རིམ་གཙོ་སྐྱོང་བས་སྐད་ཆ་བཤད་བཞིན་པ་དང་། ཕར་ཉན་ན་ལོ་གཅིག་གི་བོད་ཡིག་ཡིག་ཚད་གྲུབ་འབྲས་དང་འབྲེལ་བ་ཡོད་པ་ཞིག་བཤད་ཀྱི་འདུག་སྙམ། དེ་ཡིན་ན། དེ་ནི་གཟའ་མཇུག་བོད་ཡིག་སློབ་གྲྭའི་སློབ་མ་ཚོས་ཀྱང་དམིགས་བསལ་དོ་སྣང་བྱེད་བཞིན་པ་ཡིན་རྒྱུ་རེད། ཕྲུ་གུ་ཚོར་མཚོན་ན་དུས་ཚོད་དེ་ནི་ལོ་གཅིག་གི་ནང་ནས་ཡོངས་ཁྱབ་ཀྱི་སེམས་ཤུགས་སྤོར་བའི་གོ་སྐབས་གལ་ཆེ་ཤོས་དེ་རེད། སྡིང་ཆའི་ཐོག་ནས་༧སྐུ་པར་མཐང་གྲོལ་རིན་པོ་ཆེའི་མདུན་ནས་སོ་སོའི་ལོ་གཅིག་གི་གྲུབ་འབྲས་ཡིག་ཚད་ལ་ཁ་བཏགས་དཀར་པོ་ཞིག་གི་རྔན་པ་རག་ན་ཡང་། མི་མང་གི་དགའ་བསུའི་ཐལ་སྒྲ་ཐེངས་གཅིག་ཐོས་ན་ཡང་དེ་ཕར་ཆེར་ཚེ་གཅིག་གི་མི་ཚེའི་གཏམ་རྒྱུད་ཀྱི་ཆ་ཤས་གལ་ཆེན་ཞིག་ཏུ་འགྱུར་གྱི་རེད། ང་ཚོ་དང་འདྲ་ནི་མ་རེད། ཁོང་ཚོ་ད་དུང་བྲེད་ཡོད་ནི་མ་རེད། ཤོག་བུ་དཀར་པོ་ལྟ་བུ་རེད། ལེགས་ཉེས་ཀྱི་མཐོང་སྣང་གང་ཡིན་ཡང་ཁོང་ཚོའི་སེམས་སུ་བརྟན་པོར་འཇོག་གི་རེད། ཡིན་ན་ཡང་། མཚམས་དེར་ཆུ་ཁོལ་གྱི་ནང་དུ་འཁྱགས་སོབ་བཤོ་བ་བཞིན་གློ་བུར་དུ་མ་སྐྱིད་པ་དེ་འདྲ་ཞིག་བཟོས་པ་མཐོང་དུས་ཕྲུ་གུ་ཚོའི་ཆེད་དུ་ཡང་ང་ལ་བློ་ཕམ་གཉིས་པ་ཞིག་བྱུང་། ཁྱེད་ཚོ་ཚང་མ་ཕར་བལྟས་ཚོད་ལ་ཕྲུ་གུའི་ཨ་མ་རྐྱང་ཡིན་པ་འདྲ་ཞིག་འདུག དེ་ཡིན་ན་ཁྱེད་རྣམ་པས་སོ་སོའི་ཕྲུ་གུ་ཚོ་མཉམ་དུ་ཕྲུ་གུའི་སྦྱང་འབྲས་ལ་དོ་སྣང་དང་། ཡང་ན་ཉིན་དེའི་མཛད་སྒོ་ལ་སོ་སོའི་ཕྲུ་གུ་ཚོར་བོད་ཀྱི་ཆོས་དང་རིག་གཞུང་གི་སྐོར་ངོ་སྤྲོད་དང་དེའི་ཕྱོགས་ལ་སེམས་པ་གཏད་ནས་མྱོང་རོལ་བྱེད་དུ་འཇུག་རྒྱུ་དེ་ཁྱེད་རྣམ་པའི་དེ་རིང་གི་ཕྱག་ལས་དང་འོས་འགན་མ་རེད་དམ།
སྐབས་དེར་མདོ་འཛིན་པས་སྐད་ཆ་མཚམས་བཅད་ནས། དེ་རིང་འཁྲུངས་སྐར་རེད། དེ་རིང་དུས་ཆེན་ཁྱད་པར་ཅན་རེད། ཟ་ངེ་ཟིང་ངེ་གཏན་ནས་མ་གནང་རོགས། བཞུགས་གདན་འཇགས་རོགས། ཞེས་ཡང་ཡང་ཞུ་བ་འཐེན་བཞིན་པའི་སྒྲ་ཐོས་ཀྱི་འདུག
དེ་འདྲའི་མཛད་སྒོ་གལ་ཆེན་ཞིག བོད་པ་ཚོ་དང་ཕྲུ་གུ་ཚོའི་ལོ་གཅིག་གི་ལོ་སར་ཕར་ཕུད་པའི་བདེ་སྐྱིད་ཀྱི་ཉི་མ་གཅིག་པུ། བོད་ཀྱི་ཆོས་དང་རིག་གཞུང་དང་འབྲེལ་བའི་དུས་སྟོན་ཡག་ཤོས། སངས་རྒྱས་དངོས་དང་རྩ་བའི་བླ་མའི་གསང་གསུམ་རྗེས་སུ་དྲན་པའི་དགེ་སྦྱོར་གྱི་གོ་སྐབས་བཟང་པོ། ཕྲུ་གུ་དག་ལ་ཕ་མེས་ཀྱི་རིག་གཞང་ངོ་སྤྲོད་བྱེད་པའི་སྡིང་ཆ་གལ་ཆེན་པོ་འདི་འུར་འུར་ཟིང་ཟིང་བཟོས་སོང་ཨང་སྙམ་དུས་མི་མང་པོ་ཞིག་ལ་མི་སྐྱིད་པ་ཆེན་པོ་བྱུང་ཡོད་པ་ངས་བཤད་མི་དགོས་པ་ཞིག་རེད། དོན་རྐྱེན་འདི་སུ་ལ་འགན་ཡོད་མེད་དང་སུས་ཆད་པ་ཁུར་དགོས་མིན་ངས་མི་ཤེས། རྒྱབ་ལོགས་ན་སུ་ཡོད་ཀྱང་དོ་སྣང་བྱས་མེད། རྩ་བ་མང་པོ་ཞིག་ཕར་དེད་ནས་སྐད་ཆ་བཤད་འདོད་ཀྱང་མེད། དེ་རིང་ང་རྩོམ་ཡིག་འདི་ནི་མ་བྲིས་ཐབས་མེད་ཀྱི་ཚོར་བ་གཅིག་རང་ཞིག་གིས་དེད་པ་སྟེ། ༧གོང་ས་མཆོག་གི་འཁྲུངས་སྐར་རང་ལ་གཅེས་ཤིང་ཕངས་པའི་སེམས་ཚོར་ཙམ་དང་འབྲེལ་བ་ཡོད། དེའི་ན་ངའི་སྐད་ཆ་ནང་དོན་ཚང་མ་ཡང་དེ་ག་རང་གི་ཐོག་ལ་འབབ་རྒྱུ་ཡིན།
ངས་བསམ་ན་དུས་ཚོད་དེ་འདྲ་ཞིག་ལ་གཏད་ནས་འུར་ཟིང་བྱས་པ་དེ་༧གོང་ས་མཆོག་གི་འཁྲུངས་སྐར་མཛད་སྒོ་ལ་གུས་ཞབས་མ་བྱས་པ་རེད། སྐུ་མགྲོན་གཙོ་བོ་ཐམས་ཅད་ལ་གུས་ཞབས་མ་བྱས་པ་རེད། དགའ་སྤྲོའི་ཁེངས་པའི་མི་མང་གི་སེམས་ཚོར་དང་སྤྲོ་སྣང་ལོངས་སུ་སྤྱོད་པའི་ཐོབ་ཐང་ལ་རྩི་འཇོག་མ་བྱས་པ་རེད། ད་དུང་རང་གི་ཆོས་དང་རིག་གཞུང་གི་ཁོར་ཡུག་དང་ཁ་བྲལ་བའི་ཕྲུ་གུ་དག་གི་རང་གི་རིག་གཞུང་ལ་བཟང་ཕྱོགས་ཀྱི་ཤུགས་རྐྱེན་སྤྲོད་པའི་སེམས་ཁམས་ལ་རྩི་འཇོག་མ་བྱས་པ་རེད།
ད་དུང་གསལ་བཤད་ཡིན་ན་ཅིག་རེད་ཟེར་ནས་སྒྲ་སྒམ་ཞིག་འདུག དེ་ལ་ནི་ཆོ་གཏན་ནས་མི་འདུག མི་མང་གི་སེམས་ལ་དོ་ཕོག་ག་འདྲ་བཏང་ཡོད་མེད་ཉིན་དེར་ཡུལ་ངོས་ནས་ཡོད་ཟེར་མཁན་བརྙན་ཐུང་ནས་ངུ་བཞིན་སྐད་ཆ་ཤོད་བཞིན་པའི་གཞོན་སྐྱེས་བུད་མེད་དེའི་སྐད་ཆ་དང་རྣམ་འགྱུར་ལས་ཤེས་ཐུབ་པ་དེ་རེད། ང་ཡང་ལེ་ཝར་ཁྲི་སྟོང་གིས་ཆོད་པའི་གླིང་ཆེན་གཞན་གྱི་ས་མཐའ་ཞིག་ནས་སེམས་ཕམ་བྱུང་། ངོ་མ་ཡིན།
གོང་དུ་ཡང་དང་ཡང་དུ་ཞུས་པ་ལྟར། སྤྱིར་སྤྱི་འཐུས་ལ་བདེ་སྡུག་དང་སྐད་ཆ་ཞུ་རྒྱུ་སྤྱི་དམངས་ཀྱི་ཐོབ་ཐང་རེད། ཨ་ཅང་ཅང་། ཡིན་ན་ཡང་། དེ་ཡང་སྐབས་དང་དུས་ལ་ངེས་པར་བལྟ་ལོས་དགོས། ཆེ་ས་ནས། དཔེར་ན། དབྱིན་ཇིའི་མི་ཞིག་གིས་དབྱིན་ཇིའི་འཐུས་མི་ཞིག་ལ་འདོད་པ་མ་ཁེངས་པའི་ཐོག་ནས་སྐད་ཆ་བཤད་བསམ་ན་ཡང་དབྱིན་ཇིའི་རྒྱལ་མོའི་སྐྱེས་སྐར་གྱི་མཛད་སྒོའི་དངོས་གཞིའི་ཐོག་སྐུ་མགྲོན་གཙོ་བོ་ཐམས་ཅད་གྲལ་དུ་འཁོད་པའི་མདུན་དུ་རྒྱུག་ནས་འུར་ཟིང་བཟོས་ན་ཆོག་རྒྱུ་ཨེ་རེད།
ཆུང་ས་ཞིག་ནས་ཆབ་སྲིད་མི་སྣ་ཞིག་མི་ཚང་ཞིག་གི་གཉེན་སྟོན་མཛད་སྒོར་ཞུགས་ཡོད་ན། དེར་གཞན་པ་ཞིག་ཡོང་ནས་མཛད་སྒོའི་དཀྱིལ་ནས་ཡར་ཡོང་སྟེ་འུར་ཟིང་བསླངས་ན་དེ་ནི་མི་ཚང་དེ་ལ་གུས་མེད་ཞུས་པ་རེད། ཨ་རི་ན་ཡོད་མཁན་ཞིག་གིས་དེ་ཙམ་ཨི་མི་ཤེས། འདི་ཚོ་རྒྱུན་ཤེས་རེད། གལ་ཏེ་ཁྱོད་རང་གི་བློ་ལ་མ་བབ་པའི་སྤྱི་འཐུས་ཤིག་༧གོང་ས་མཆོག་གི་ཕོ་བྲང་དུ་མཇལ་གཅར་དང་ཚོགས་འདུ་ཤིག་ལ་བསླེབས་ཡོད་ན། ཁྱོད་ཀྱིས་གཏམ་བརྗོད་རང་དབང་གི་དར་ཆ་འཕྱར་ནས་ཕོ་བྲང་ནང་ལ་རྒྱུག་རྒྱུ་ཡིན་ནམ། རྒྱུག་ཆོག་གི་མ་རེད། རྒྱུག་ན་༧སྐུ་མདུན་ལ་གུས་ཞབས་མེད་པ་རེད། རྒྱུ་མཚན་ནི་དེ་ནི་ཁོང་སྒེར་གྱི་བཞུགས་གནས་རེད། དེ་ནང་བཞིན། འཁྲུངས་སྐར་མཛད་སྒོ་འདི་བསྟན་པ་ཡར་འཕེལ་ལ་བདག་པ་ཞིག་མ་རེད། བུད་མེད་དེ་ཚོ་ལ་བདག་པ་ཞིག་མ་རེད། དེ་ནི་༧གོང་ས་མཆོག་དང་དེར་འདུས་བོད་པ་ཚང་མའི་ཐུན་མོང་གི་སྡིང་ཆ་རེད། སྐབས་དེར་༧གོང་ས་མཆོག་གི་འཁྲུངས་སྐར་དང་བོད་པ་སྤྱི་བྱིངས་ཀྱི་འདོད་འདུན་དེ་རྩི་བཀུར་བྱ་ཡུལ་ཨང་དང་པོ་དང་གཅིག་པུ་དེ་རེད། དེ་ལ་ཐོབ་ཐང་གི་སྐད་ཆ་བཤད་ས་ཡོད་མ་རེད། གལ་ཏེ་བཤད་ན་དེ་ནི་ཐོབ་ཐང་མ་ཤེས་པའི་རྟགས་རེད། དཔེར་ན། གནམ་གྲུའི་ནང་ནས་མི་གཅིག་གིས་ཅ་ཟིང་པ་ོབཟོས་ན་ཐོབ་ཐང་བཤད་ས་མེད་པ་རེད། རྒྱུ་མཚན་ནི་སྐབས་དེར་གནམ་གྲུ་དེ་ནི་འགྲུལ་བ་སྤྱི་ལ་དབང་བའི་ཁོར་ཡུག་རེད། སྐབས་དེར་འགྲུལ་བ་སྤྱིའི་བདེ་འཇགས་དང་སྡོད་བཟོས་བདེ་བ་ནི་ཀུན་གྱིས་རྩི་སྲུང་དགོས་པའི་རྩ་དོན་ཨང་དང་པོའང་རེད་ལ་གཅིག་པུའང་རེད།
གལ་ཏེ་བསྟན་པ་ཡར་འཕེལ་ལ་ཅིས་ཀྱང་བཤད་འདོད་པ་ཞིག་ཡོད་ན་ཡང་། མི་གཅིག་གིས་བཤད་ན་ལོས་ཆོག ཡིག་ཐོག་ལ་བྲིས་ནས་སྤྲད་ན་ལོས་ཆོག སྒོ་ལ་མར་དོན་ཚར་དུས་ཕྱི་ལོགས་ཀྱི་སྡོད་གནས་སུ་བཙལ་ན་ལོས་ཆོག ངེས་པར་འཁྲུངས་སྐར་མཛད་སྒོའི་དཀྱིལ་ལ་གཏད་པ་འདི་ནོར་བ་རེད། ནོར་བ་དེ་ཚར་ཚར་རེད། གལ་ཏེ་ཁྱེད་ཚོ་ལ་གཞན་གྱིས་དེ་འདྲ་གྱིས་ཞེས་ལབ་ནས་ཁྱེད་ཚོའི་ཚོར་བ་བེད་སྤྱོད་བྱས་པ་ཡིན་ན་རྗེས་ནས་ད་ཐེངས་ཀྱི་ནོར་འཁྲུལ་ལས་ཉམས་མྱོང་བླངས་ནས་གཞན་གྱི་བཀོད་བྱུས་འོག་ཏུ་མ་ཕྱིན་པ་ཞིག་ངེས་པར་དུ་གནང་རོགས་ཞུ། ང་ནི་ཁྱེད་ཚོ་ལ་མ་དགའ་བ་དེ་འདྲ་གཏན་ནས་མེད། ཡིན་ན་ཡང་བློ་ཏོག་ཙམ་ཕམ་བྱུང་།
ད་ཐེངས་ཀྱི་གནད་དོན་འདིའི་ཐད། ཁྱེད་ཚོས་ཀྱང་དང་པོ་ནས་བསམ་བཞིན་དུ་འཁྲུངས་སྐར་ཡག་པོ་མི་ཡོང་བའི་ཆེད་དུ་དེ་འདྲ་བྱས་པ་རེད་ཅེས་ཞུ་མི་ཤེས་ན་ཡང་། བསམ་བློ་ཞིབ་ཚགས་མ་བཏང་བ་ཡིན་ན་འདྲ། གང་ལྟར་དངོས་ཡོད་ཀྱི་མཇུག་འབྲས་བཟོས་ཟིན་པ་མིག་སྔུན་དུ་ཡོད་པ་ལ་བཟང་སྤྱོད་ཀྱི་འགན་འཁུར་རྒྱུ་ནི་གཡོལ་མི་རུང་བ་ཞིག་རེད། རབ་ཡིན་ན་བུད་མེད་དེ་ཚོས་ངེས་པར་དུ་མི་མང་ལ་དགོངས་སེལ་ཞུ་དགོས་ངེས་རེད།
གལ་ཏེ་བུད་མེད་དེ་ཚོའི་ནང་ན་ས་གནས་བོད་རིགས་མཐུན་ཚོགས་ཀྱི་རྒྱུན་ལས་སམ། སྐབས་དེའི་འཁྲུངས་སྐར་གོ་སྒྲིག་མཛད་སྒོའི་སྣེ་ལེན་ཞུ་མཁན་གྱི་རང་འདུན་གྱི་ཞབས་ཞུ་བ་ཡོད་དམ། ཡོད་ན་ཁྱེད་ཅག་གི་ལས་ཀ་ནི་སྐུ་མགྲོན་དང་ཚོགས་ཞུགས་པ་ཚང་མ་ལ་སྤྲོ་བོ་ཡོང་བའི་སྣེ་ལེན་ཞུ་རྒྱུ་ཁོ་ན་རེད། སྐུ་མགྲོན་ནང་ལ་བོད་པ་མིན་པའི་ཕྱི་མི་ཡང་ཡོད་ངེས་རེད། ཞབས་ཞུའི་ཐད་ཀྱི་ནོར་འཛོལ་ཁོ་ནའི་ངོས་ནས་བསམ་ན་ཡང་ལས་འཛོལ་ཆེན་པོ་ཞིག་རེད། ཆུང་ས་ནས་ཟ་ཁང་གི་ཞབས་ཞ་མས་ཟ་ཁང་ནང་ནས་མགྲོན་པོ་གཞན་གྱི་ཁུ་སིམ་ལ་རྩིས་མེད་ཀྱིས་མི་གཞན་དང་ཁ་རྩོད་བྱེད་ཆོག་གམ། དེང་སང་ནི་ཞབས་ཞུའི་དུས་རབས་ཟེར་བ་རེད།
དེས་ན་མི་དེ་ཚོའི་ནང་དུ་འཁྲུངས་སྐར་མཛད་སྒོའི་ལས་བྱེད་ཞབས་ཞུ་བ་ཡོད་ན་གོ་སྒྲིག་ཚོགས་ཆུང་ལ་ཡང་གསལ་བཤད་དང་དགོངས་སེལ་ཞུ་རྒྱུའི་བཟང་སྤྱོད་ཀྱི་འགན་འཁྲི་དམིགས་བསལ་ཞིག་ཡོད་པ་རེད། རྫོགས་སོ། །