ངའི་གྲོང་སྡེ་ཆུས་ནུབ་ཐལ།

ཉེ་བའི་ཉིན་ཤས་རིང་བོད་ཁུལ་གྱི་ས་ཆ་ཁག་ཅིག་གཙོའི་འཛམ་གླིང་གི་ཡུལ་ཕྱོགས་མང་སར་ཆུ་ལོག་བྱུང་སྟེ་འབྱུང་བའི་གནོད་སྐྱོན་ཆེན་པོ་སྤྲོད་ཀྱི་ཡོད་འདུགམདང་ནུབ་རྔ་ཁུལ་མཛོད་དགེ་རྫོང་གི་ཉེ་འགྲམ་དུ་ཡོད་པའི་གླིང་དཀར་སྡེ་བར་རྨེ་ཆུ་རྒྱས་ཏེ། ཆུ་རགས་ཀྱིས་མ་ཁོག་པར་གྲོང་སྡེ་ཚང་མ་ཆུས་ཁེངས་ནས་ཡུལ་མི་ཚོ་རང་ཁྱིམ་ནས་ཡུལ་བྱོལ་དུ་འགྲོ་དགོས་བྱུང་ཡོད་པ་མ་ཟད། ཁྱིམ་ཚང་གི་རྒྱུ་དངོས་སོགས་གཅིག་ཀྱང་ལེན་མ་ཐུབ་པར་དཔལ་འབྱོར་ཐད་གྱོང་གུད་ཆེན་པོ་ཐེབས་ཡོད་འདུག

འདི་གའི་གསར་འགོད་པར་ཕ་ཡུལ་མཛོད་དགེ་ནས་ཡིན་པའི་འབྲེལ་ཡོད་ཅིག་གིས། མདང་ནུབ་ངའི་གྲོང་སྡེ་ཆུས་ནུབ་ཐལ། མཚན་མོའི་ཆུ་ཚོད་ ༡ ཙམ་གྱི་སྟེང་གྲོང་སྡེའི་མཐའ་སྐོར་དུ་ཆུ་རགས་བརྒྱབ་ཡོད་པ་འཐོར་ནས་གློ་བུར་དུ་ཆུ་གྲོང་སྡེའི་ནང་དུ་ཤོར་སོང་སྟབས། ང་ཚོར་གོན་པ་གྱོན་ཁོམ་ཀྱང་ཡོད་མེད་ཀྱིས་ཉེ་འགྲམ་དུ་ཡོད་པའི་རི་ངོས་སུ་བྲོས་ཕྱིན་པ་དང་། ཆུ་ལོག་ཧ་ཅང་ཆེན་པོ་བརྒྱབས་པའི་རྐྱེན་གྱིས་གྲོང་སྡེ་ཚང་མ་ཆུས་ཁེངས་སོང་བས་ཅ་ལག་སོགས་གཅིག་ཀྱང་ལོན་མ་སོང་། ཅེས་བརྗོད་བྱུང་།

ཡང་ཁོས་གིས་ཁ་སང་རྫོང་གི་དམག་མི་ ༡༠༠ ལྷག་ཙམ་དང་སྟག་ཚ་དགོན་པའི་གྲྭ་བ་མང་པོས་རོགས་སྐྱོར་ཧ་ཅང་ཡག་པོ་བྱས་ཏེ། ཆུ་རགས་ཆེན་པོ་ཞིག་བརྒྱབས་ཡོད་ན་ཡང་མདང་ནུབ་ཆུ་རགས་འཐོར་སོང་བས་ཐབས་ཤེས་གང་ཡང་མེད་པ་ཆགས་སོང་། རྫོང་སྲིད་གཞུང་གི་ངོས་ནས་རོགས་པ་ཡག་པོ་བྱེད་ཀྱི་འདུག་ལ། སླད་མར་རོགས་པ་ག་རེ་དགོས་ན་བྱ་དགོས་ཞེས་བརྗོད་སོང་ལ། རྫོང་གི་འཕྲོད་བསྟེན་ཚན་པ་སོགས་ཡོང་ནས་རོགས་རམ་བྱེད་ཀྱི་འདུག ཅེས་ཟེར།

གླིང་དཀར་སྡེ་བ་ནི་མཛོད་དགེ་རྫོང་གི་ཉེ་འགྲམ་གྱི་རྨེ་ཆུའི་ཕར་ཁ་རུ་ཆགས་ཡོད་པ་དང་། སྡེ་བ་ཆགས་ས་རྨེ་ཆུའི་ཁུག་མགོ་ཞིག་ཡིན་པའི་རྐྱེན་གྱིས་ལོ་ལྟར་ཆར་ཞོད་ཀྱིས་རྨེ་ཆུ་རྒྱས་ཡོང་སྐབས་ཆུ་གྲོང་སྡེའི་ནང་བླུགས་ཡོང་གི་ཡོད་འདུག ལོ་སྔོན་མར་ཡང་གྲོང་སྡེའི་ནང་རྨེ་ཆུ་རྒྱས་པའི་ཆུ་ལོག་བྱུང་སྟེ་ཡུལ་མི་ཚོའི་རྒྱུ་ནོར་ལ་གྱོང་གུད་ཆེན་པོ་ཐེབས་ཡོད་འདུག

ད་ལྟའི་ཆར་མཛོད་དགེ་རྫོང་གཅིག་པུ་ཙམ་མ་ཡིན་པར་རྔ་བ་ཁུལ་གྱི་རྔ་བ་རྫོང་དང་ཁྱུང་མཆུ་རྫོང། ཟུང་ཆུ་རྫོང་། ཁྲོ་ཆུ་རྫོང་། ཝུན་ཁྲོན་རྫོང་། འཛམ་ཐང་རྫོང་། མའོ་རྫོང་། དེ་བཞིན་དཀར་མཛེས་ཁུལ་གྱི་དཀར་མཛེས་རྫོང་དང་ལྕགས་ཟམ་རྫོང་། རོང་བྲག་རྫོང་སོགས་སུ་དྲག་ཆར་རྐྱེན་གྱིས་ཆུ་བོ་རྒྱས་པ་དང་། རི་བྲག་ཉིལ་བ། ཁང་པ་དང་ཟམ་པ་རྡིབ་པ་སོགས་ཀྱི་དཀའ་ངལ་ཆེན་པོ་འཕྲད་བཞིན་ཡོད་འདུག

དེ་བཞིན་ཉི་ཧོང་དང་ཐའེ་ཝན། ཨ་རི། རྒྱ་དཀར་ནག་སོགས་འཛམ་གླིང་རྒྱལ་ཁབ་མང་པོའི་ནང་བསྟུད་མར་དྲག་ཆར་བབ་སྟེ་འབྱུང་བའི་གནོད་སྐྱོན་ཆེན་པོ་ཡོང་བཞིན་ཡོད་འདུག ཉེ་ཆར་ཉི་ཧོང་ནང་ཆུ་ལོག་བྱུང་ནས་མི་གྲངས་ ༢༠༠ ལྷག་རྐྱེན་འདས་སུ་ཕྱིན་པ་དང་། རྒྱ་ནག་ཧི་ནན་ཞིང་ཆེན་སོགས་སུ་ཆུ་ལོག་བྱུང་སྟེ་མི་གྲངས་ ༥༠ རྐྱེན་འདས་སུ་སོང་ཡོད་འདུག དེ་བཞིན་ཐའེ་ཝན་མཚོ་གླིང་དང་རྒྱ་གར་གྱི་མཱམ་བྷེ། ཨ་རིའི་ལྷོ་བརྒྱུད་ཀྱི་ནཱེ་ཝ་དྷ(Nevada)མངའ་སྡེ་སོགས་སུ་ཆུ་ལོག་ཆེན་པོ་བྱུང་ནས་གནམ་གྲུ་སོགས་འཕུར་མཚམས་འཇོག་དགོས་བྱུང་ཡོད་ཀྱང་། ད་ལྟའི་ཆར་མི་ལ་འཆི་སྐྱོན་བྱུང་བའི་གནས་ཚུལ་གོ་ཐོས་མི་འདུག

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༨/༠༧/༡༣

Leave a Reply