ལྷ་ས་ནས་འབྲུག་གྲགས་ན་རེབ་གོང་ནས་ཆར་བ་གཏོང་།

ནམ་མཁའ།

གོང་གི་རྩོམ་བྱང་འདི་༡༩༨༧ལོ་མཇུག་ཏུ་རྒྱ་ནག་གི་རྒྱལ་ས་པེ་ཅིན་གཞུང་གི་སྐད་ཆ་ཞིག་རེད།  པེ་ཅིན་གཞུང་གི་སྐད་ཆ་འདི་ཅི་ལྟར་བྱུང་མིན་ནི་ལོ་རྒྱུས་ཅུང་ཟད་རིང་མོ་ཞིག་ཡོད་མོད། འོན་ཀྱང་དེ་རིང་འདིར་སྐབས་དེའི་ངའི་གྲོགས་པོ་དཔའ་ངར་ལྡན་པ་ཞིག་གི་མི་ཚེ་དང་འབྲེལ།  དྲན་ཐོ་ཐུང་ངུ་འདིའི་ནང་དུ་མདོར་བསྡུས་ཞིག་འབྲི་རྒྱུ་ཡིན།  ཉིན་ཤས་སྔོན་བོད་ནང་གི་གྲོགས་པོ་ཞིག་གིས་ཕྲན་དང་མཉམ་དུ་ཡོད་པའི་འདྲ་པར་རྙིང་པ་ཞིག་བསྐུར་སོང་། པར་དེའི་ནང་དུ་ལོ་ཤས་གོང་ནས་དབུགས་བསགས་ཀྱི་ན་ཚ་སྙུང་བཞིན་པའི་གྲོགས་པོ་ཞིག་ཡོད་པ་དེ་འདུག་པས།  ཕྲན་གྱིས་ཁོང་གི་འཕྲོད་བསྟེན་སྐོར་གྱི་གནས་ཚུལ་དྲིས་པ་ཡིན།  བློ་ཡུལ་ལས་འདས་པ་ཞིག་ལ།  དཔའ་ངར་ལྡན་པའི་གྲོགས་པོ་ཁོང་ད་ལོའི་ཧོར་ཟླ་གཉིས་པའི་ནང་ཚེ་ལས་འདས་སོང་ཟེར་པས།  ངའི་མགོ་ནང་དུ་ནག་ཐོམ་མེར་སྐར་ཆ་ཞིག་གི་ནང་དུ་ཅི་ཡང་དྲན་རྒྱུ་མེད་པ་ཞིག་ཏུ་གྱུར་སོང་ལ།  ཕྲན་གྱིས་ཡིད་སྐྱོ་བའི་གནས་ཚུལ་དེ་ཐོས་དུས། གྲོགས་པོ་ཁོང་འདས་ནས་ཟླ་བ་འགའ་ཕྱིན་འདུག་པས།  སྐབས་ཐོག་དེར་ཕྲན་གྱིས་འདས་པོ་ཁོང་གི་ཤུལ་ལུས་དགུང་ལོ་བརྒྱད་བཅུར་སོན་པའི་ཨ་མ་ལགས་དང་།  ཁོང་གི་བཟའ་ཟླ་བུ་ཕྲུག་ནང་མི་སྤུན་མཆེད་ཚོར།  མྱ་ངན་གྱི་འཚམས་འཕྲིན་ཙམ་ཡང་ཞུ་བའི་གོ་སྐབས་ཡང་མ་བྱུང་སྟབས།  སེམས་ཤིན་ཏུ་སྐྱོ་ཡང་བྱ་ཐབས་བྲལ།

འོན་ཀྱང་ངས་དེ་རིང་འདིར་དཔའ་ངར་ལྡན་པའི་གྲོགས་པོ་ཁོང་རེབ་གོང་རོང་བོ་དགོན་ཆེན་གྱི་གྲྭ་བ་ཡིན་པའི་སྐབས།  ཁོས་བོད་མི་རིགས་ཀྱི་བདེ་སྡུག་ཆེད་ལས་ཀ་ཅི་ཞིག་བྱས་མིན་དང་།  དེ་དང་འབྲེལ་རྒྱ་ནག་སྲིད་གཞུང་གིས་ཁོང་བཙོན་ཁང་ནང་བཅུགས་པའི་གནས་ཚུལ་སོགས་ཀྱི་ཕྱིར་དྲན་གྱི་འགྲུལ་བཞུད་ཐུང་ངུ་འདི་ནི།  འདས་པོ་ཁོང་གི་ནང་མི་ཤུལ་ལུས་ཨ་མ་ལགས་དང་། ཁོའི་བཟའ་ཟླ་བུ་ཕྲུག་ནང་མི་སྤུན་མཆེད་ཡོངས་ལ་མྱ་ངན་གྱི་འཚམས་འཕྲིན་ཞིག་གི་ཆེད་ཡིན།

དཔའ་ངར་ལྡན་པའི་གྲོགས་པོ་ཁོང་ནི་རེབ་གོང་ལྕང་སྐྱ་ཟེར་བའི་གྲོང་སྡེ་རུ་སྐྱེས་ཤིང་།  རེབ་གོང་རོང་བོ་དགོན་ཆེན་གྱི་གྲྭ་བ་བྱས་ཏེ།  ས་དཀྱིལ་ཨ་ཁུ་ཤ་བོ་ཐར་ཟེར་བའི་༥༨ཡར་སྔོན་གྱི་གྲྭ་བ་རྒྱུ་དངོས་ལ་བདག་འཛིན་རྩ་བ་ནས་མེད་པའི་དགེ་སློང་རྣམ་པར་དག་པ་ཞིག་ཡོད་པ་དེའི་དགེ་ཕྲུག་རེད།  ཁོའི་མིང་ལ་ལྕང་སྐྱའི་དགེ་འདུན་རྒྱལ་མཚན་ཟེར།  དེ་རིང་འདིར་ཕོག་ཐུག་འགྲོ་མིན་ལ་མ་ལྟོས་བར་དྲང་མོ་བཤད་ན།  སྐབས་ཐོག་དེར་རྒྱུ་དངོས་ལ་བདག་འཛིན་མེད་པའི་དགེ་སློང་རྣམ་དག་ཞིག་འཇོག་དགོས་ཚེ།  ས་དཀྱིལ་ཨ་ཁུ་ཤ་བོ་ཐར་ལས་གཞན་དགེ་སློང་ཞིག་རྙེད་པར་དཀའ་བ་ནི་དངོས་བོའི་གནས་ཚུལ་ཡིན་རྒྱུ་རེད་སྙམ།  ཕྲན་གྱིས་དང་པོ་ལྕང་སྐྱའི་དགེ་འདུན་རྒྱལ་མཚན་ཁོང་ཅི་ལྟར་ངོ་ཤེས་མིན་དང་གྲོགས་པོ་ཅི་ལྟར་གྱུར་མིན་གསལ་བོར་ཞིག་མི་དྲན་མོད། འོན་ཀྱང་ཕལ་ཆེར་རྒྱལ་བ་སྨིན་དྲུག་པ་ལྟ་བུའི་ཆོས་འདུལ་ཁྲིམས་ཀྱི་ཉེས་པ་ཕྲ་མོ་ཙམ་གྱིས་ཀྱང་མ་གོས་བའི་དགེ་བའི་བཤེས་གཉེན་ཆེན་མོ།  འཇའ་མོ་ཨ་ཁུ་ཚང་དགེ་འདུན་ཆོས་འཕེལ་ལམ་ཨ་ཁུ་སྙིང་དཀར་ཚང་གི་སྐུ་མདུན་ནས་བསྡུས་གྲྭ་མཉམ་དུ་ཁྲིད་དུས་ང་ཚོ་མཉམ་དུ་ཡིན་སྙམ། དགེ་བའི་བཤེས་གཉེན་དམ་པ་འདི་ཚང་སྐབས་དེའི་རོང་བོ་དགོན་ཆེན་གྱི་གྲྭ་བ་རྒན་གཞོན་ཚང་མས་གཙིགས་སུ་བཀུར་ཡུལ་ཞིག་རེད།

གང་ལྟར་ཡང་དེ་ནས་བཟུང་རིམ་གྱིས་ངོ་ཤེས་ཆོས་གྲོགས་ཞིག་ནས།  ཕན་ཚུན་གྱི་སེམས་རྒྱུད་ཤེས་བའི་བློས་ཐུབ་ཀྱི་གྲོགས་པོ་ཞིག་ཏུ་གྱུར་ཏེ་ཁོའི་གྲྭ་ཤག་ཏུ་རྒྱུན་ཏུ་འགྲོ་གི་ཡོད།  ཁོའི་ཤག་གི་དགེ་རྒན་ཨ་ཁུ་ཤ་བོ་ཐར་ནི་གཤིས་རྒྱུད་འཇམ་ཞིང་སེམས་རྒྱུད་བཟང་བོའི་དགེ་སློང་ཞིག་ཡིན་པ་གོང་དུ་ཞུས་པ་ལྟར།  མགྲོན་པོ་སེར་སྐྱ་སུ་ཞིག་ཁོའི་གྲྭ་ཤག་ཏུ་སོང་ཚེ།  གྲྭ་ཤག་དེར་ཟ་མ་གང་ཡོད་པ་རྣམས་མགྲོན་པོའི་མདུན་དུ་བཞག་སྟེ་ཨུ་ཚུགས་ཀྱིས་ཟ་རུ་འཇུག་ལ།  གལ་སྲིད་མགྲོན་པོས་འཚེར་སྣང་གིས་མ་ཟོས་ཚེ།  ཨ་ཁུ་ཤ་བོ་ཐར་ཁོང་གི་སེམས་སྐྱིད་པོ་མི་འདུག་ཅེས་མགྲོན་པོ་ངོ་ཤེས་ཡིན་མིན་ལ་ཁྱད་མེད་པར་དངོས་སུ་གསུངས་ཀྱི་ཡོད་པས།  ང་རང་ལྟ་བུ་གྲྭ་རྐྱང་ཉམས་ཆུང་མང་པོ་ཞིག་གི་འཚོ་བའི་དཀའ་སྡུག་སེལ་ས་ཞིག་ཏུ་གྱུར་ཡོད།   རིམ་གྱིས་འདས་པོ་ལྕང་སྐྱའི་དགེ་འདུན་རྒྱལ་མཚན་ཁོ་རང་ཡང་ཁོའི་ཤག་གི་དགེ་རྒན་ཨ་ཁུ་ཤ་བོ་ཐར་གྱི་གོམས་གཤིས་ཀྱི་ཤུགས་རྐྱེན་ཆེན་པོ་ཐེབས་ཏེ། སྐབས་དེའི་རོང་བོ་དགོན་ཆེན་གྱི་གྲྭ་བ་ཚོས་ལྕང་སྐྱའི་དགེ་འདུན་རྒྱལ་མཚན་ཡང་།  རང་གཤིས་བརྟན་ལ་སེམས་རྒྱུད་བཟང་བོའི་གྲྭ་བ་ཡ་རབ་ཞིག་ཏུ་བརྩི་གི་ཡོད།

ད་ནི་གོང་གི་རྩོམ་བྱང་དེ་ཅི་ལྟར་བྱུང་མིན་གྱི་བརྗོད་བྱ་དངོས་སུ་འཇུག་འདོད་པས།  ༡༩༨༧ལོའི་མཇུག་ཙམ་ལ།  རོང་བོ་དགོན་ཆེན་གྱི་གྲྭ་བ་གཞོན་པ་ཚོས་གླེང་གཞི་ནི།  ལྷ་ས་ནས་ཁྲོམ་སྐོར་བྱས་ཏེ་བོད་མི་སེར་སྐྱ་མང་པོ་དམར་གསོད་བཏང་བའི་གནས་ཚུལ་རེད།  དེང་སང་བཞིན་དྲ་རྒྱའི་དུས་རབས་མིན་སྟབས།  གནས་ཚུལ་ཇི་མ་ཅི་བཞིན་ཤེས་ཐུབ་ཀྱི་མེད་ན་ཡང་། ང་ཚོའི་རྣ་ལམ་དུ་དངོས་སུ་ཐོས་ཡོང་པ་ནི། མཚོ་སྔོན་རྒྱང་སྒྲོགས་ལས་ཁུང་དང་རྒྱ་ནག་གི་བརྙན་འཕྲིན་ནང་།  ཏྰ་ལའི་རུ་ཚོགས་ཀྱིས་ངན་སྐུལ་བྱས་ཏེ་ཁ་བྲལ་རིང་ལུགས་པ་སྐོར་ཞིག་གིས་ཁྲོམ་སྐོར་བྱས་ཚུལ་སོགས་ཀྱི་སྐྱོན་བརྗོད་ཀྱི་ཚིག་ཁོ་ན་རེད།

སྐབས་ཐོག་དེར་ང་ཚོ་ལོ་ཉི་ཤུ་ཡས་མས་ཟིན་ཙམ་ཡིན་སྟབས། སློབ་སྦྱོང་དང་ཉམས་མྱོང་སོགས་ཕྱོགས་གང་ཅིའི་ཐད་ནས་ཧ་ཅང་ཤེས་ཚད་སྐྱོ་བོ་རེད།  ང་ཚོས་ཆབ་སྲིད་ཀྱི་ཚིག་ཞིག་ཤེས་པ་ནི་བོད་རང་བཙན་དང་མི་རིགས་ཀྱི་ལ་རྒྱ་ཟེར་བའི་ཚིག་འདི་གཉིས་རེད།  དེ་རིང་ཁ་ཕྱིར་འཁོར་ནས་བསམ་བློ་གཏོང་དུས་དགོད་བྲོ་བ་ཞིག་ལ།  མཚོ་སྔོན་རྒྱང་སྒྲོགས་ལས་ཁུང་ལ་ཉན་དུས་ཏྰ་ལའི་བླ་མ་ཞེས་བའི་ཚིག་འདི་ཐོས་ཚེ་ཡང་།  མཐོང་ཆུང་གི་ཚིག་ཞིག་ཏུ་སྣང་སྟེ་མ་སྐྱིད་པ་བྱུང་མྱོང་ཡོད།

དེ་ལྟ་ན་ཡང་།  དགུན་དུས་ཀྱི་གྲང་ངར་ཆེ་བའི་ཞོགས་པ་ཞིག་ལ།  རོང་བོ་དགོན་ཆེན་གྱི་ཐོས་བསམ་གླིང་གྲྭ་ཚང་གི་ཆོས་གྲྭའི་མདུན་གྱི་ཨར་འདམ་གྱིས་བཟོས་བའི་གློག་སྡོང་ཞིག་ཡོད་པ་དེའི་ངོས་སུ་སྦྱར་ཡིག་ཞིག་སྦྱར་ཡོད་པ་ཐོས།   ཡིན་ན་ཡང་ང་རང་བལྟ་རུ་འགྲོ་དུས་སྦྱར་ཡིག་དེ་སྲིད་གཞུང་གིས་བཀོག་སྟེ།  བཀོག་ཤུལ་དུ་ཤོག་སྣེ་སྲེན་མོ་ལྟ་བུ་ལས་ཅི་ཡང་མཐོང་མ་སོང་ལ།  ཡི་གེ་ནང་ཅི་ཞིག་བྲིས་ཡོད་པ་ཡང་མ་ཤེས།  དེའི་ཉིན་གྱི་ཕྱི་དྲོ་གོ་ཐོས་ཞིག་ལ།  དགོན་པའི་འདབ་འབྲེལ་དུ་ཡོད་པའི་རྨ་ལྷོ་དགེ་ཐོན་སློབ་གྲྭ་དང་།  དགུ་ཆུའི་ཕ་རོལ་གྱི་འཇའ་མོའི་ཀོན་མཐུལ་དུ་ཆགས་པའི་རེབ་གོང་མི་རིགས་སློབ་འབྲིང་གཉིས་ཀྱི་ནང་དུ་ཡང་།  སྦྱར་ཡིག་གཅིག་མཚུངས་ཞིག་སྦྱར་བའི་གནས་ཚུལ་ཐོས།  ཡིན་ན་ཡང་གོང་ལྟར་ཡི་གེའི་ནང་ཅི་ཞིག་བྲིས་ཡོད་པ་དེའི་ཉིན་མོར་མ་ཤེས་ཡང་།  དུས་ཚོད་རིམ་འདས་ཀྱིས་སྦྱར་ཡིག་ནང་བྲིས་བའི་གནས་ཚུལ་རྣམས་རྣ་ལམ་དུ་གྲགས་ཡོང་པ་ནི།  ༡༩༥༨ནས་བཟུང་། རྒྱ་ནག་གུང་ཁྲན་ཏང་གིས་བོད་མི་ཅི་ཙམ་བསད་པའི་གྲངས་ཀ་དང་། དགོན་པ་གཏོར་བཤིགས་བཏང་བའི་གྲངས་ཀ་སོགས་ཀྱི་གནས་ཚུལ་རེག་བསྡུས་ཞིག་བྲིས་ཏེ།  ཡི་གེ་མཇུག་མཐར་རེབ་གོང་བོད་སྐྱོབ་གཞོན་ནུ་ཚོགས་པ་ནས་བྲིས་འདུག་ཟེར་བ་ཐོས་པ་ལས།  ང་རང་ཉིད་ཀྱིས་ཡི་གེ་དེ་དངོས་སུ་མཐོང་མ་མྱོང་པས།  དེ་རིང་ད་རུང་ཡང་ཡི་གེའི་ནང་ཇི་མ་ཅི་བཞིན་ཅི་ཞིག་བྲིས་ཡོད་པ་ངས་གསལ་བོ་མི་ཤེས།

གང་ལྟར་ཡང་།  སྦྱར་ཡིག་དེ་སྦྱར་བའི་གནས་ཚུལ་བྱུང་སྟེ་ཉིན་ཤས་རྗེས།  རེབ་གོང་མི་རིགས་སློབ་འབྲིང་གི་སློབ་མ་ཚོས་ཞོགས་པའི་སློབ་ཁྲིད་ལ་མ་འཚོགས་པར་ཞི་བའི་སྐད་འབོད་བྱས་ཏེ།  རེབ་གོང་ཁུལ་ཐོག་གི་ས་གནས་སྲིད་གཞུང་ལས་ཁུང་ནང་དུ་སོང་བའི་གནས་ཚུལ།  དེའི་ཕྱི་དྲོ་ཕལ་ཆེར་དུས་ཚོད་༢དང་༣ཡས་མས་ཙམ་ལ་ཐོས།  སྐབས་དེར་གྲྭ་བ་འགའ་དང་མཉམ་དུ་ཁུལ་ཐོག་ཏུ་སྔོ་ཚོད་ཉོ་རུ་ཕྱིན་དུས།  གང་སར་མཉམ་འཇོག་ཡག་པོ་བྱས་ཀྱང་ཁུལ་ཐོག་ནི་སྔར་ལྟར་འཇམ་ཐིང་ངེར་འདུག་པས།  དུས་ཐོག་དེར་དགོན་པའི་གྲྭ་བ་ཚོས་ཐོས་བའི་གནས་ཚུལ་དཀྲོགས་གཏམ་ཞིག་རེད་སྙམ་པ་ལས་ཡིད་ཆེས་མ་བྱུང་མོད།  འོན་ཀྱང་དེའི་ཕྱི་ཉིན་རེབ་གོང་སེར་སྐྱ་ཡོངས་ཀྱི་གླེང་གཞི་ནི།  རེབ་གོང་མི་རིགས་སློབ་འབྲིང་གི་སློབ་མ་ཚོས་ཞི་བའི་ཁྲོམ་སྐོར་བྱས་བའི་གནས་ཚུལ་རེད།

ད་དུང་མི་རིགས་འདྲ་མཉམ་མེད་པའི་གནས་ཚུལ་སྟེ།  རེབ་གོང་རྫོང་ཐོག་སྐར་མ་ཐང་དུ་ཆགས་ཡོད་པའི་རྒྱ་རིགས་སློབ་ཆུང་ཞིག་ཡོད་པ་དེའི་སློབ་མའི་མཐུན་རྐྱེན་དང་།  མི་རིགས་སློབ་འབྲིང་གི་སློབ་མ་ཚོའི་མཐུན་རྐྱེན་དང་བསྡུར་ནས་བསམ་འཆར་བཤད་ཚུལ་སོགས་གླེང་གི་འདུག་ཟེར་བ་མ་གཏོགས་གཞན་གང་གི་སྐོར་བསམ་འཆར་བཤད་ཡོད་པ་མ་ཐོས་ལ།  དེ་རིང་ད་དུང་ཡང་ངས་གསལ་བོར་མི་ཤེས།

སྐབས་དེ་འདྲ་ཞིག་ལ་རོང་བོ་དགོན་པའི་གྲྭ་བ་ཚོའི་སེམས་ཤུགས་ཀྱི་མེ་ལྕེ་དགུང་ལ་འཕྱུར་ཞིང་། ཚོགས་དང་ཆོས་གྲྭར་གང་ལ་ཚོགས་ཀྱང་། གྲྭ་བ་ཚོས་གླེང་རྒྱུ་ནི་བོད་དོན་དང་མི་རིགས་སློབ་འབྲིང་གི་སློབ་མ་ཚོའི་སྙིང་སྟོབས་དང་ལ་རྒྱ་རེད།   དགོན་པའི་གྲྭ་གཞོན་ཕལ་ཆེ་བའི་གླེང་བཞིན་པའི་འདོད་ཚུལ་གཅིག་མཚུངས་སྟེ།  དགོན་པའི་གྲྭ་བ་ཚོ་ཡང་འདི་ལྟར་ལྟད་མོ་བལྟས་ནས་མི་སྡོད་པར་ཞི་བའི་སྐད་འབོད་བྱེད་རྒྱུ་དེ་རེད།   ཉིན་ཞིག་ཉིན་གུང་གི་ཚོགས་ལ་འཚོགས་གྲབས་ཡོད་པའི་སྐབས་དེར། སྤྱིར་བཏང་ཚོགས་ལ་ཚོགས་ཆེན་འདུ་ཁང་ཀ་བརྒྱའི་མའི་འཚོགས་དགོས་མོད། འོན་ཀྱང་ མི་སུས་ཀྱང་སྐུལ་བརྡ་མ་རྒྱབ་པར་རང་འགུལ་གྱིས་གྲྭ་གཞོན་ཕལ་ཆེ་བར་དགོན་པའི་མཁར་སྒོའི་འགྲམ་དུ་འཛོམས་འདུག་པ་མ་ཟད།  དེ་གར་གྲྭ་གཞོན་ཚོ་ཟང་ཟིང་ལྟ་བུ་ཞིག་གྱུར་འདུག་ལ།  འདས་བོ་སྤྱང་སྐྱའི་དགེ་འདུན་རྒྱལ་མཚན་དཔའ་ངར་ལྡན་ཞིང་། སྙིང་སྟོབས་ཆེན་པོའི་སྒོ་ནས་སྐད་ཆ་བཤད་ཀྱི་ཡོད་པ་ཐོས་མོད། འོན་ཀྱང་ཚིག་འདི་འདྲ་ཞིག་བཤད་སོང་སྙམ་པ་ཞིག་དེ་རིང་ངའི་དྲན་ངོགས་སུ་མི་འདུག་པས་འདིར་འགོད་ཐུབ་མ་སོང་།

གང་ལྟར་ཡང་།  རོང་བོ་དགོན་པའི་གྲྭ་གཞོན་ཚོ་གཞུང་ལམ་སྟེང་བུད་སྟེ།  གོམས་པ་འགའ་སྤོས་བའི་མཚམས་སུ་ངེད་ཅག་གི་རྩ་བའི་བླ་མ་གསེར་ཁྲི་རྡོ་རྗེ་འཆང་ཚང་གི་གཉེར་བ་ཨ་ཁུ་སྒོ་མེ་ལགས།  གང་ཞིག་ནས་ཕེབས་པ་ཡང་མ་ཤེས་བར་ཁོའི་ལག་ཏུ་ཁ་བཏགས་དཀར་པོ་ཞིག་བཟུང་སྟེ།  ང་ཚོའི་མདུན་དུ་སླེབས་ནས་བཀག་སྟེ།  གསེར་ཁྲི་རྡོ་རྗེ་འཆང་ཚང་དང་རེབ་གོང་མི་དམངས་སྤྱི་ལ་ཐུགས་སེམས་ཞིག་བཞེས་རོགས།  དེ་རིང་འདི་ལྟར་སོང་ན་དོན་རྐྱེན་ཆེན་པོ་འབྱུང་ངེས་ཡིན་པས། རེབ་གོང་མི་དམངས་དང་གསེར་ཁྲི་རྡོ་རྗེ་འཆང་ཚང་ལས་སླ་བོ་འདུག་ཐབས་ཡོད་ནི་མ་རེད་ཞེས་གསུངས་ཞོར་དུ།  ཁོའི་ལག་གི་ཁ་བཏགས་ངའི་ལག་ཏུ་འཇོག་བར་དུ་ང་རང་གྲྭ་མང་གི་མདུན་དུ་ཅི་ལྟར་སླེབས་ཡོད་པ་ཡང་མ་ཤེས་ལ།  དེ་བར་དུ་ངའི་འགྲམ་དུ་ཡོད་པའི་དེང་སང་དགའ་བྱང་ཀླུ་འབུམ་དུ་བཞུགས་པའི་དགེ་བཤེས་ལྷ་རམས་པ་ཆོས་གྲགས་ལགས་ཡོད་པ་ཡང་དོན་སྣང་འབྱུང་མི་འདུག

སྐབས་ཐོག་དེའི་གྲྭ་བ་རྒན་གཞོན་ཡོངས་ཀྱིས་སེམས་ནས་བཅོས་མིན་གྱི་དད་གུས་ཞུ་ཡུལ་ཉག་གཅིག་ཡོད་པ་ནི་གསེར་ཁྲི་རྡོ་རྗེ་ཚང་ཡིན་ལ།  གཉེར་བ་ཨ་ཁུ་སྒོ་མེ་ཡང་བླ་མའི་བླ་བྲང་ལས་རོང་བོ་དགོན་པ་སྤྱི་བསམ་མཁན་ཞིག་ཡིན་སྟབས། རོང་བོ་དགོན་པའི་གྲྭ་བ་རྒན་གཞོན་ཚོས་བརྩི་བཀུར་ཞུ་ཡུལ་ཞིག་ཡིན།  མཚམས་དེ་འདྲ་ཞིག་ལ་གྲྭ་གཞོན་ཡོངས་བྲོས་ནས་དགོན་པའི་རྒྱབ་ཀྱི་གླིང་སྐོར་ལམ་དུ་འགྲོ་གི་འདུག་པས།  ང་རང་ཡང་རི་བོང་ཅལ་འདྲོགས་ལྟར་གྲྭ་བ་ཚོས་རྗེས་དེད་ནས་བྲོས་པ་ཡིན་མོད། འོན་ཀྱང་ལྷ་མོ་ཁང་གི་རྒྱབ་ལོགས་སུ་ཚོགས་ཆེན་དགེ་བསྐོས་དང་གྲྭ་བ་རྒན་པ་འགས་བཀག་འདུག  རྗེས་ནས་ཤེས་གསལ་ལ།  དགོན་པའི་མཁར་སྒོའི་གཞུང་ལམ་སྟེང་གྲྭ་བ་ཚོའི་མདུན་བཀག་པའི་དུས་དེར་ཚོགས་ཆེན་དགེ་བསྐོས་ཡང་སླེབས་པས་།  གྲྭ་བ་ཚོ་བྲོས་ནས་དགོན་པའི་རྒྱབ་ཀྱི་གླིང་སྐོར་བརྒྱུད་ས་དཀྱིལ་སྡེ་འདབ་ནས་མར་ཁུལ་ཐོག་ཏུ་སྐད་འབོད་བྱེད་དུ་འགྲོ་རྩིས་བྱས་པ་རེད་ཟེར་བ་ཤེས།  གང་ལྟར་ཡང་། དེའི་ཉིན་མོ་རོང་བོ་དགོན་པའི་གྲྭ་བ་ཚོ་ས་གནས་སྲིད་གཞུང་གི་ལས་ཁུང་བར་དུ་སྐད་འབོད་དུ་འགྲོ་ཐུབ་མེད།  ཡིན་ན་ཡང་རྗེས་ནས་རེབ་གོང་ཁུལ་དུ་ཁྱབ་བརྡལ་ཕྱིན་པའི་སྐད་ཆ་ཞིག་སྟེ།   དེའི་ཉིན་མོ་རེབ་གོང་ཁུལ་ཐོག་ཏུ་དམག་སྒར་ཆེན་པོ་ཞིག་ཡོད་པའི་དམག་མི་ཚོས། ལག་ཏུ་མཚོན་ཆ་དང་བཀྱིག་བྱེད་ཀྱི་ཐག་པ་སོགས་བཟུང་སྟེ། དགོན་པའི་མདུན་གྱི་གཞུང་ལམ་ཆེན་མོ་དང་ཁུལ་ཐོག་གི་ས་མཚམས་དེར་སྒུགས་ཡོད་པ་མཐོང་འདུག

དགོན་པའི་གནས་ཚུལ་དེ་བྱུང་བའི་ཉིན་ཤས་རྗེས་སུ།  རོང་བོ་དགོན་པ་དང་འདབ་འབྲེལ་དུ་ཡོད་པའི་རྨ་ལྷོ་དགེ་ཐོན་སློབ་གྲྭའི་སློབ་མ་ཚོས་ཞོགས་པ་ཞིག་ལ་སྐད་འབོད་བྱས་ཏེ། རེབ་གོང་ཁུལ་ཐོག་ཏུ་ཕྱིན་པ་རེད་ཟེར་བ་ལས།  དགེ་ཐོན་སློབ་གྲྭའི་སློབ་ཕྲུག་ཚོ་ལས་ཁུང་གང་གི་ནང་དུ་སོང་བ་དང་སྐད་ཆ་ཅི་ཞིག་བཤད་པ་ཡང་མ་ཤེས་ལ།  དེ་རིང་ད་དུང་ཡང་ངས་གསལ་བོ་ཤེས་མེད།  ཡིན་ན་ཡང་།  རོང་བོ་དགོན་པའི་ཆོས་ཕྱོགས་ཀྱི་མཛད་རིམ་རྣམས་སྔོན་ལྟར་འགྲོ་བཞིན་ཡོད།

ངའི་གོམས་གཤིས་ལྟར་མཚན་མོ་དཔེ་ཆ་བལྟ་གི་ཡོད་སྟབས།  ལེགས་བཤད་གསེར་ཕྲེང་གི་སྐབས་དང་པོར་ཀློག་བཞིན་པའི་སྐབས་སུ།    ངའི་གྲྭ་ཤག་གི་རྒྱབ་ལོགས་སུ་སྐད་དམའ་མོའི་སྒོས་ང་རང་འབོད་ཀྱི་ཡོད་པ་ཞིག་ཐོས།  ང་རང་ཕྱི་ལོགས་སུ་ཕྱིན་དུས་བྲག་དཀར་དགེ་འདུན་གྲགས་པ་རེད།  ཁོས་ཕྲན་ལ་སྤྱང་སྐྱའི་དགེ་འདུན་རྒྱལ་མཚན་དང་ཆུ་སྐྱེས་དཔལ་བཟང་གཉིས་འཛིན་བཟུང་བྱས་ཏེ་ཁྲིད་སོང་ཟེར།  དེ་ཡིན་ན་ང་རང་ཁོང་གཉིས་ཀྱི་གྲྭ་ཤག་ལ་བལྟ་རུ་འགྲོ་གི་ཡིན་ལབ་དུས།  ད་ཁྱོད་མ་འགྲོ་ད་རུང་ཉེན་རྟོག་པ་འགའ་ཤས་འདུག་ཁྱེད་རང་ཡང་འཛིན་བཟུང་བྱེད་སྲིད་ཟེར་པས།  དྲང་མོ་བཤད་ན།  ང་རང་ཡང་སེམས་ནས་ཅུང་ཟད་སྐྲག་སྣང་བྱུང་སོང་མོད། འོན་ཀྱང་ང་རང་སྦྱར་ཡིག་དེ་ལ་འབྲེལ་བ་ཅི་ཡང་མེད་ལ།  སྦྱར་ཡིག་དེ་སུས་སྦྱར་བ་དང་ཡི་གེ་འབྲི་མཁན་སུ་ཡིན་ཅི་ཡང་མི་ཤེས་ན་ཡང་། དེའི་མཚན་མོ་དེར་རྔམ་སྐྲག་བྱུང་བའི་ཚོར་སྣང་།  དེ་རིང་ད་རུང་ཡང་ངའི་སེམས་སུ་གསལ་བོར་དྲན་གྱི་འདུག་ལ།  དེ་རིང་ཁ་ཕྱིར་འཁོར་ནས་བསམ་བློ་གཏོང་དུས།  དགོད་བྲོ་ལ་ངུ་ཡང་བྲོ་བའི་བྱིས་པ་བསམ་མེད་ཞིག་གི་སྐད་ཆ་ངས་ཁོ་ལ་འདི་ལྟར་བཤད།    ཁྱོད་འདིར་དགོན་པའི་ནང་ཡིབ་ནས་སྡོད་པ་ལས།  དགོན་པའི་རྒྱབ་རིའི་ཕྱོགས་ཀྱི་གྲོང་སྡེ་དོར་ཉིན་ཕྱོགས་སུ་བྲོས་ཤོག་ལབ་པས།  ཅི་འདྲའི་དགོད་བྲོ་བ་ཞིག་མ་རེད་དམ། དེ་དུས་ངས་ད་རུང་དཔའ་ངར་ལྡན་པའི་འདས་བོ་སྤྱང་སྐྱའི་དགེ་འདུན་རྒྱལ་མཚན་དང་རེབ་གོང་ཡུལ་སྐོར་ཟིན་ཐོ་དང་ཙོང་ཁ་བའི་ཞབས་རྗེ་འཚོལ་བ་ཟེར་བའི་དཔེ་དེབ་གཉིས་རྩོམ་མཁན་ཆུ་སྐྱེས་དཔལ་བཟང་གཉིས་འཛིན་བཟུང་བྱེད་དགོས་བའི་རྒྱུ་མཚན་ཡང་ཤེས་ཀྱི་མེད་ལ།  ཅི་ཞིག་ལ་བྲག་དཀར་དགེ་འདུན་གྲགས་པ་ཁོ་རང་བྲོས་ནས་འགྲོ་ཤོག་ལབ་དགོས་དོན་ཡང་ངས་མི་ཤེས།  ངས་དེ་རིང་ཡང་བསམ་བློ་འཁོར་ཐུབ་ཀྱི་མི་འདུག  དེའི་མཚན་མོ་འཛིན་བཟུང་བྱས་བའི་གྲྭ་་བ་དེ་གཉིས་དང་བྲག་དཀར་དགེ་འདུན་གྲགས་པ་གསུམ་ར་སྐོར་གཅིག་གི་ནང་བསྡད་ཡོད།

སྐབས་ཐོག་དེར།  རོང་བོ་དགོན་པའི་ནང་གྲྭ་ཤག་དེང་སང་བཞིན་མ་ཡིན་པར།  རིག་གནས་གསར་བརྗེ་སྐབས་རོང་བོ་དགོན་པ་ཆ་ཚང་གཏོར་བཤིགས་བཏང་རྗེས་སུ།  རྒྱ་ནག་སྲིད་གཞུང་གིས་ལས་ཁུང་གི་ལས་ཤག་རྒྱ་ཁང་ཁང་ལེབ་མང་པོ་རྒྱབ་ཡོད་པའི་ནང་གྲྭ་བ་ཆ་ཚང་རྒྱ་ཁང་ནང་བསྡད་ཡོད་ལ། ང་རང་ཡང་རོང་བོ་དགོན་པའི་གྲྭ་བ་སུ་ཡང་བསྡད་འདོད་མེད་པའི་རྒྱ་ཁང་ཐེབས་ཆགས་ཞིག་སྟེ། རེབ་གོང་གི་གནམ་གཤིས་ཡག་པོ་མེད་དུས་ནམ་མཁའི་སྤྲིན་ནག་གཏོར་བྱེད་ཀྱི་འགད་རྫས་འཇོག་སའི་ནང་བསྡད་ཡོད།   སྤྱིར་རོང་བོ་དགོན་པར་ཐོས་བསམ་གླིང་གྲྭ་ཚང་དང་རྒྱུད་སྨད་གྲྭ་ཚང་དུས་འཁོར་གྲྭ་ཚང་བཅས་གདན་ས་གསུམ་ཡོད་ལ།  རྒྱ་ནག་གིས་གཏོར་བཤིགས་བཏང་རྗེས་སུ་འདུ་ཁང་སྟོང་པ་ལྷག་ཡོད་པ་ནི།  ཐོས་བསམ་གླིང་གྲྭ་ཚང་གི་འདུ་ཁང་དང་ཚོགས་ཆེན་འདུ་ཁང་ཀ་བརྒྱ་མ་གཉིས་ལུས་པ་རེད།  མཚན་ཉིད་གྲྭ་ཚང་གི་འདུ་ཁང་ནང་རྨ་ལྷོ་ཆུ་གློག་ལས་ཁུང་གི་འཕྲུལ་ཆས་འཇོག་ས་དང་། ཚོགས་ཆེན་འདུ་ཁང་ནང་ཞིང་ཁར་རྒྱག་ཡ་ལུད་རྫས་འཇོག་ས་བཟོས་འདུག་པས།  ཚོགས་ཆེན་འདུ་ཁང་ནང་ད་རུང་ཡང་སྐབས་རེ་ལུད་སྨན་གྱི་དྲི་ངན་ཐུལ་ཡོང་གི་ཡོད།

དགོན་པའི་ནང་རྒྱ་ནག་གི་ལས་ཁུང་ཆེན་པོ་གཉིས་ཡོད་པ་སྟེ།  གཏེར་ཁ་སྔོགས་འདོན་གྱི་ལས་ཁུང་དང་། ལམ་བཟོ་རུ་ཁག་གི་ལས་ཁུང་གཉིས་རེད།  ད་རུང་རྡོ་སོལ་བཙོང་ས་སོགས་བཟོས་ཡོད་ལ།  གྲྭ་ཚང་ཆོས་རའི་ནང་དུད་འགྲོའི་རུས་པ་དང་པགས་པ་ལྕགས་རིགས་སོགས་ཉོ་ཚོང་བྱེད་སའི་ལས་ཁུང་བཟོས་འདུག ལོ་ངོ་བདུན་བརྒྱ་ལྷག་གི་ལོ་རྒྱུས་ཡོད་པའི་དགོན་པའི་ནང་གི་སྐུ་གསུང་ཐུགས་རྟེན་རྣམས་ས་གནས་གང་ཞིག་ལ་ཁྱེར་སོང་བ་དང་།  ཉིན་ག་ཚོད་ཞིག་ལ་དབོར་འདྲེན་བྱས་པ་ངས་ད་རུང་ཡང་མི་ཤེས་ལ།  གྲྭ་བ་རྒན་པ་ཚོར་དྲིས་ཀྱང་མ་མྱོང་།   དེང་སང་རོང་བོ་དགོན་པ་ཁྲ་ལམ་ལེར་དད་ལྡན་རྣམས་ཀྱི་དྭངས་པ་འདྲེན་པའི་ཞིང་ས་རུ་གྱུར་བ་འདི་ནི།  རེབ་གོང་མི་དམངས་ཀྱིས་དད་སྟོབས་ཀྱིས་འཛུགས་སྐྲུན་བྱས་པ་ཞིག་ཡིན་པ་ལས།  ང་རང་རོང་བོ་དགོན་པར་ཡོད་དུས། རྒྱ་ནག་སྲིད་གཞུང་གིས་རོགས་སྐྱོར་མ་བྱས་སྟབས་དགོན་པའི་གྲྭ་བ་ཚོས་སྲིད་གཞུང་ལ་ངོ་རྒོལ་བྱས་རྐྱེན་གྱི་རྩ་བ་གཅིག་འདིར་ཐུག་ཡོད།

གང་ལྟར་ཡང་། བྲག་དཀར་དགེ་འདུན་གྲགས་པ་ནི་རྒྱུན་ཏུ་གདོང་ལ་འཛུམ་གྱིས་ཁེངས་ཤིང་། གཤིས་རྒྱུད་འཇམ་པའི་གྲྭ་བ་ཉམ་ཆུང་ཡ་རབ་ཞིག་ཡིན་ལ།  འདས་པོ་སྤྱང་སྐྱ་དགེ་འདུན་རྒྱལ་མཚན་དང་ཆུ་སྐྱེས་དཔལ་བཟང་ཁོང་གསུམ་གྲོགས་པོ་ཡིན་པ་མ་ཟད།  དགེ་སློང་ཆོས་གྲོགས་ཡང་རེད།  ཁོ་རང་འགྲོ་ཁར་ང་ལ་ཁྱེད་རང་དོ་དགུང་ཤག་འདིར་མ་འདུག་གསུངས་ཏེ་ཁོ་རང་ཕྱིར་ཕྱིན་སོང་མོད།  འོན་ཀྱང་ཁོའི་ཤག་ཏུ་སོང་པ་ཡིན་ནམ་གཞན་ཞིག་ཏུ་སོང་བ་ངས་ད་རུང་མི་ཤེས།   དེའི་མཚན་མོར་ང་རང་ཡང་ཁོས་བཤད་པ་ལྟར་རང་གི་ཤག་ཏུ་སྡོད་མ་ནུས་པར་གྲྭ་ཤག་གཞན་ཞིག་ཏུ་སྐྱབས་བཅོལ་དུ་ཕྱིན་པ་ཡིན།  ངའི་ད་རུང་ཡང་ཡིད་ལ་གསལ་བོར་ཞིག་དྲན་པ་ནི།  དེའི་མཚན་གོང་བོར་ཁོང་གཉིས་འཛིན་བཟུང་བྱེད་དགོས་བའི་རྒྱུ་མཚན་ཅི་ཞིག་ཡིན་མིན་སྐོར་ལ་བསམ་གཞིགས་བྱས་ཏེ།  མཚན་གང་བོར་གཉིད་ཐུབ་མ་སོང་ཡང་རྒྱུ་མཚན་འདི་དང་གན་ཟེར་བ་ཞིག་ལ་དོགས་པ་བྱེད་གཞི་ཞིག་མ་རྙེད།  གལ་སྲིད་དགོན་པའི་གཞུང་ལམ་སྟེང་སྐད་འབོད་དུ་སོང་བ་ནི་ཁོ་གཉིས་གཅིག་པོ་མ་ཡིན་པར་རོང་བོ་དགོན་པའི་གྲྭ་བ་༣༠༠ཡས་མས་ཞིག་ཡོད་པ་ཆ་ཚང་སོང་ཡོད་ངེས།

ཞོགས་པ་སྔ་བོ་ཉི་རྩེ་དགོན་པའི་ནང་རྒྱབ་པའི་དུས་རང་ཤག་ཏུ་སོང་སྟེ།  ཉེན་རྟོག་པ་རྣམས་ང་རང་བཙལ་རུ་ཡོང་ཡོད་མེད་ལ་ཞིབ་བལྟ་བྱས་ཀྱང་ཡོང་མེད་པ་གསལ་བོར་ཤེས་ཐུབ།  དེ་ནས་ཅང་མ་འགོར་བར་དེང་སང་དགའ་བྱང་ཀླུ་འབུམ་དུ་བཞུགས་པའི་དགེ་ལྷ་རམས་པ་དགེ་བཤེས་ཆོས་གྲགས་ལགས་ངའི་སར་འོང་སྟེ།  འདས་པོ་སྤྱང་སྐྱའི་དགེ་འདུན་རྒྱལ་མཚན་དང་དཔལ་བཟང་གཉིས་འཛིན་བཟུང་བྱས་བའི་གནས་ཚུལ་ཙམ་གསུངས་ཏེ།  གང་ཞིག་ཏུ་ཁྲིད་ཡོད་མེད་ལ་བལྟ་རུ་འགྲོ་གལ་སྲིད་ཤེས་ཚེ།  ཁོང་གཉིས་ལ་ཟ་མ་དང་དགུན་དུས་ཀྱི་གོན་ཆས་སྣོན་མ་ཞིག་སྤྲོད་དགོས་རྒྱུ་རེད་ཟེར།  དེ་མིན་ལུས་ལ་གང་ཞིག་མནབས་ཡོད་པ་དེ་ལས་ཅི་ཡང་ཁྱེར་ཐུབ་མེད་པས།   ངེད་གཉིས་ཁུལ་ཐོག་གི་ཆོས་ལུགས་ཅུའུ་ལས་ཁུང་ལ་འདྲི་རུ་ཕྱིན་དུས།  ཆོས་ལུགས་ཅུའུ་ཡི་ལས་བྱེད་སངས་རྒྱས་མཛུབ་གདུམ་ཟེར་བའི་བོད་རིགས་རྒད་པོ་གཟུགས་རིང་སྟོབས་ཆེན་ཞིག་ཡོད་པ་དེར་གནས་ཚུལ་རྣམས་བཤད་དུས།  ཁོ་རང་འཚབ་འཚུབ་ཞིག་ཏུ་གྱུར་ཏེ།  ང་ཚོའི་ལས་ཁུང་གིས་མ་ཤེས་བར་འཛིན་བཟུང་བྱེད་ཆོག་གི་མ་རེད་ཟེར།  ཁྱེད་རང་གཉིས་ཕྱིར་དགོན་པའི་ནང་སོང་དང་ངས་བརྩད་གཅོད་གཏོང་གི་ཡིན་ཟེར།  སངས་རྒྱས་མཛུབ་གདུམ་ནི་རེབ་གོང་གི་ཤ་སྦྲང་གི་ཡིན་ལ།  རྒྱ་ནག་གི་ལས་བྱེད་མང་པོ་ཡོད་ས་ནས་དགོན་པའི་གྲྭ་བ་ཚོ་བཀའ་ཀྱོན་གཏོང་མཁན་ཞིག་ཡིན་པས། དགོན་པའི་གྲྭ་བ་ཚོས་ཁོ་རང་ལ་སྡིག་དམོད་བྱེད་ས་ཞིག་ཡིན་མོད། འོན་ཀྱང་ཁོ་རང་གི་སེམས་གཏིང་ནས་གུང་ཁྲན་ཏང་ལ་ཡིད་ཆེས་མེད་པའི་མི་ཞིག་ཡིན་པ་རྗེས་ནས་ངས་གསལ་བོར་ཤེས་སོང་།

རྒྱུ་མཚན་ནི།  རེབ་གོང་ནས་མི་རིགས་ཀྱི་ལ་རྒྱའི་དར་ལྕོག་སྒྲེངས་མཁན་འདས་བོ་སྤྱང་སྐྱའི་དགེ་འདུན་རྒྱལ་མཚན་དང་ཆུ་སྐྱེས་དཔལ་བཟང་གཉིས་འཛིན་བཟུང་བྱས་བའི་རྗེས་སུ།  རེབ་གོང་ཁུལ་ཐོག་གི་བདེ་སྲུང་ལས་ཁུང་དང་ཆོས་ལུགས་ཅུའུ་ཡི་ལས་བྱེད་ཚོས།  དུས་ཚོད་ངེས་མེད་དུ་དགོན་པའི་ཚོགས་ཆེན་འདུ་ཁང་གི་ཆོས་གྲྭའི་ནང་བཙན་དབང་གིས་གྲྭ་མང་ཡོངས་ཚོགས་འདུ་རྒྱུན་ཏུ་་སྐོང་ཡོད་པའི་སྐབས་ཞིག་ལ།  སངས་རྒྱས་མཛུབ་གདུམ་གྱིས་ང་ཚོར་གོ་རྒྱུ་ཡོད་པའི་བརྡ་ལན་ཞིག་སྤྲད་སོང་།  ཁྱེད་ཚོས་དགོན་པའི་ནང་དུག་དྲི་ཞིག་བཏང་ཀྱང་ང་ཚོས་ཚོར་གི་རེད་ཟེར།  དེ་དུས་རྗེས་ནས་ངས་དགོན་པའི་ནང་རྒྱ་ནག་གསང་བའི་ལས་ཁུང་གི་རྣ་བ་ཞིག་བཞག་ཡོད་པ་ཤེས་སོང་།

དེའི་རྗེས་ནས་དགོན་པའི་གྲྭ་བ་མང་པོ་གྲྭ་བ་ཞིག་གི་སྟེང་དོགས་པ་བྱུང་ཡོད་མོད། འོན་ཀྱང་ང་ཚོས་བདེན་དབང་གསལ་བོ་ཞིག་རྙེད་ཐུབ་མེད་པས་འདིར་འབྲི་རྒྱུ་མིན།  རེབ་གོང་ནས་མི་རིགས་ཀྱི་ལ་རྒྱའི་མེ་དཔུང་སྤར་མཁན་འདས་པོ་སྤྱང་སྐྱའི་དགེ་འདུན་རྒྱལ་མཚན་དང་ཆུ་སྐྱེས་དཔལ་བཟང་གཉིས་བཙན་གྲོལ་ཐོབ་རྗེས།  ཁོང་གཉིས་ལ་ཡང་སངས་རྒྱས་མཛུབ་གདུམ་སྟེང་ལྟ་སྟངས་གཅིག་མཚུངས་སླེབས་འདུག་པས།  ཁོང་གཉིས་ཀྱིས་སངས་རྒྱས་མཛུབ་གདུམ་མི་དྲང་མོ་དགོན་པ་ལ་ཤ་ཚ་གཏིང་ནས་ཡོད་མཁན་ཞིག་དང་མི་རིགས་ཀྱི་ཞེན་ཁོག་ཡོད་མཁན་ཞིག་ཏུ་མཐོང་འདུག

དེ་ལྟ་ན་ཡང་།  འདས་བོ་སྤྱང་སྐྱའི་དགེ་འདུན་རྒྱལ་མཚན་དང་ཆུ་སྐྱེས་དཔལ་བཟང་གཉིས་འཛིན་བཟུང་བྱས་ཏེ།  ཉིན་ཤས་རྗེས་སུ་མཚན་མོར་གཞན་གྱི་སྲོག་ལ་རྒོལ་བའི་འུག་བྱ་བཞིན།  བྲག་དཀར་དགེ་འདུན་གྲགས་པ་དང་ཧོར་རྒྱའི་དཔལ་ལྡན་ དུས་འཁོར་གྲྭ་ཚང་གི་ལྕགས་པར་ཁང་གི་འགན་འཛིན་ཚོ་བཞིའི་གྲགས་པ་གསུམ་ཡང་གཅིག་རྗེས་གཉིས་མཐུད་ཀྱིས་འཛིན་བཟུང་བྱས་པས།  རྗེས་ནས་ད་གཟོད་ང་རང་དགོན་པ་དང་སློབ་གྲྭའི་ནང་སྦྱར་བའི་ཡི་གེ་དེ་འབྲི་མཁན་ཁོང་གཉིས་མིན་ནམ་སྙམ་པའི་དོགས་པ་སྐྱེས་ལ།  སེམས་ཕྲལ་ཡང་ཤིན་ཏུ་ཆེན་པོ་བྱུང་།

སྐབས་ཐོག་དེར།  ཉིན་ཞིག་གྲྭ་ཚང་འདུ་ཁང་ནང་གྲྭ་ཇ་འཚོགས་ཁར།  ཞིང་གཤེགས་དམ་པ་དགེ་བཤེས་ཆེན་མོ་ལྷ་སྡེ་ཚང་གིས་ངའི་རྒྱབ་ལོགས་ནས་གཟན་གྱི་སྣེ་མོ་ནས་མར་འཐེན་ཙམ་བྱས་ཏེ།  ཅུང་ཙམ་སྒུགས་དང་ཟེར་པས་ང་ཡང་རྗེས་ལ་བསྡད་པ་ཡིན།  ཁོང་གི་ཞལ་རས་ལ་ཅུང་སྐྱོ་ཉམས་ཞིག་གི་གྲིབ་མའི་གཡོགས་ཏེ།

གཅིག་བྱས་ན།  ད་རུང་ཡང་གྲྭ་བ་འགའ་རེ་འཛིན་བཟུང་བྱེད་སྲིད་པས་སྐད་ཆ་གཅིག་མཚུངས་བཤད་རྒྱུ་དེ་གལ་ཆེན་རེད།  ནམ་རྒྱུན་ང་ཚོས་བཤད་བཞིན་པའི་སྐད་ཆ་སྟེ།  ས་གནས་གཞན་གྱི་དགོན་པ་ལ་རོགས་སྐྱོར་བྱས་པ་དང་། རོང་བོ་དགོན་པ་རོགས་སྐྱོར་བྱས་པ་ལ་གནམ་སའི་ཁྱད་པར་ཤོར་ཡོད་ཚུལ་དེ་ཡིད་ལ་འཛིན་དགོས་པ་དང་། གལ་སྲིད་ཡིག་ཆ་འདྲ་མིན་ཡོད་ན་བསྡུ་གསོག་རྒྱབ་ན་ལེགས་ཚུལ་གསུངས་ཞོར།  ངའི་མགོ་ལ་བྱིལ་བྱིལ་ཞིག་བྱས་ཏེ་དཔེ་ཆ་བལྟ་ཡ་བློས་གཏོང་མ་བྱེད་གསུངས་དུས།  ང་རང་སེམས་སྐྱོ་ནས་མགྲིན་པ་ཡང་བརྣངས་ཞོར་ལགས་སོ་ཞུས་པ་ཡིན།

དེ་མ་ཐག་ངའི་ཡིད་ལ་རྒྱ་ནག་གི་ཡེང་ཧན་ཊན་གྱིས་བྲིས་བའི་ཏྰ་ལའི་བླ་མའི་རྣམ་ཐར་ཟེར་བ་དེའི་དགག་ལན་དུ།  ཞྭ་སྒབ་པས་བྲིས་པ་ཞིག་ཡོད་པ་དེ་ཡིད་ལ་འཁོར་ཞིང་།  དེ་ནི་ཞོགས་པ་སྔ་བོ་ཞིག་ལ་གྲྭ་ཇ་འགྲོ་སྐབས་ངའི་ཤག་གི་སླེ་རའི་ནང་གཡུག་ཡོད་པ་དེ་རེད།  ལྕགས་པར་ནང་བྲིས་བའི་དེབ་ཆུང་ཤོག་ངོས་འགའ་ལས་མི་འདུག་པ་ཞིག་རེད།  ངས་དེབ་དེ་ང་རང་ཁོ་ནས་ཆ་ཚང་བཀླགས་མོད། འོན་ཀྱང་མི་གཅིག་ལ་བསྟན་མ་མྱོང་ལ།  སུ་ཞིག་གིས་ངའི་ཤག་གི་སླེ་རའི་ནང་གཡུགས་པ་ཡང་།  དེ་རིང་ད་རུང་ཡང་མི་ཤེས་ལ་འདྲི་བརྩད་ཡང་བྱས་མ་མྱོང་།  ལྷ་སྡེ་ཨ་ཁུ་ཚང་ངའི་དཔེ་ཁྲིད་དགེ་རྒན་མིན་ན་ཡང་།  ང་རང་ལ་འདི་འདྲའི་ཐུགས་ཁུར་དང་ལམ་སྟོན་གནང་བ་ནི།  སྐབས་དེར་བཀའ་དྲིན་ཤིན་ཏུ་ཆེན་པོ་ཞིག་གི་མཐོང་ལ།  ཆབ་སྲིད་ཀྱི་བསམ་བློའི་གོ་རྟོགས་ཡང་རྒྱ་ཆེན་པོ་ཞིག་ཡོད་པ་ཤེས་སོང་པས།  དེ་ནས་བཟུང་ངའི་སེམས་དེ་ལྷ་སྡེ་ཨ་ཁུ་ཚང་དང་སེམས་ཐག་ཤིན་ཏུ་ཉེ་བོ་ཞིག་ཏུ་གྱུར།  སྐབས་ཐོག་དེར་ངའི་གྲོགས་པོ་གཉིས་འཛིན་བཟུང་བྱས་ཟིན་པས།  ངའི་གདོང་ན་སེམས་ཁུར་གྱི་གཟུགས་བརྙན་ཞིག་ཡོད་པ་འདྲ། དེ་མ་ཡིན་པའི་གྲྭ་བ་རྒན་པ་ཞིག་གིས་ཀྱང་ང་ལ་སེམས་གསོའི་ཁ་བརྡ་བྱས་མྱོང་ཡོད།

ཉིན་ཞིག་ཁོང་གཉིས་ཀྱི་གྲོགས་པོ་གྲྭ་བ་ཞིག་ངའི་སར་ཡོང་སྟེ།  དེ་རིང་ཡང་ཉེན་རྟོག་པ་འགའ་སླེབས་ནས་དགེ་འདུན་རྒྱལ་མཚན་གྱི་གྲྭ་ཤག་སྔོགས་གཤེར་བྱེད་ཀྱི་འདུག་ཟེར།  ང་རང་ཁོའི་ཤག་ཏུ་སོང་དུས་ཉེན་རྟོག་པ་ཚོ་ཕྱིར་ཕྱིན་ཚར་འདུག ཁོའི་དགེ་རྒན་ཨ་ཁུ་ཤ་བོ་ཐར་གྱིས་ཁོའི་ཉལ་ཁང་གི་གནམ་ནས་ཤོག་བུ་ཞིག་ཁྱེར་ནས་འགྲོ་སོང་ཟེར།  གྲྭ་བ་གཞན་ཞིག་གིས་ལ་ཊི་རེད་ཟེར།  ལ་ཊི་ནི་ཡི་གེ་འབྲི་སའི་སྣུམ་ཤོག་ཞིག་ཡིན།  སྐབས་དེར་དེང་སང་བཞིན་གློག་ཀླད་མེད་པའི་དཔེ་ཆ་སོགས་པར་སྐྲུན་བྱས་ཚེ་སྣུམ་ཤོག་ཐོག་འབྲི་གི་ཡོད།

གང་ལྟར་ཡང་།  སྦྱར་ཡིག་གི་གནས་ཚུལ་མ་བྱུང་གོང་གི་དཔའ་ངར་ལྡན་པའི་སྤྱང་སྐྱའི་དགེ་འདུན་རྒྱལ་མཚན་དང་ཆུ་སྐྱེས་དཔལ་བཟང་གཉིས་དང་ང་ཚོའི་ཁ་བརྡའི་གླེང་མོལ་ལ་བསམ་གཞིགས་བྱས་སྟབས།  སེམས་ཕྲལ་སྔར་ལས་ཆེ་རུ་གྱུར་ཡང་བྱ་ཐབས་ཅི་ཡང་མ་རྙེད།  བྲག་དཀར་དགེ་འདུན་གྲགས་པ་དང་ཧོར་རྒྱའི་དཔལ་ལྡན་དུས་འཁོར་གྲྭ་ཚང་གི་གྲགས་པ་གསུམ་དུས་ཡུན་རིང་པོ་བཙོན་འཇུག་མ་བྱས་པར་ཀློད་གྲོལ་བཏང་སོང་།  ཡིན་ཡང་འདས་པོ་སྤྱང་སྐྱའི་དགེ་འདུན་རྒྱལ་མཚན་དང་ཆུ་སྐྱེས་དཔལ་བཟང་གཉིས་བཙོན་ཁང་ནང་བཅུགས་ཡོད་པ་མ་ཟད། ཁྲིམས་ཐག་གཅོད་ངེས་རེད་ཟེར་བའི་སྐད་ཆ་ཞིག་རེབ་གོང་ཡུལ་དུ་ཁྱབ།   ལོ་དེའི་ཆོ་འཕྲུལ་སྨོན་ལམ་ཆེན་མོའི་སྐབས།  ཁུལ་ཐོག་ཏུ་ཡོད་པའི་དམག་སྒར་ཆེན་མོའི་ནང་གི་དམག་མི་ཚོས་རྐང་གསུམ་སྦག་སྦག་སྟེང་།  མེ་མདའ་འཁོར་ལོ་ཅན་གྱི་མདེའུ་དང་བཅས་བཞག་ནས།  དྲག་མནོན་བྱེད་ཆོག་ཆོག་གིས་འཇིག་སྐུལ་མཚོན་བྱེད་དུ་ཁུལ་ཐོག་ཡོངས་སྐོར་བཞིན་པ་ངས་དངོས་སུ་མཐོང་།

དེ་ལྟ་ན་ཡང་། ངས་དེ་དུས་ད་རུང་ཡང་བློ་ཐག་ཆོད་པོས་ཁོང་གཉིས་ཀྱིས་ཡི་གེ་བྲིས་ཏེ་སྦྱར་བ་ལ་ཐེ་ཚམ་གྱི་ངང་དུ་ལུས་ཡོད་པ་མ་ཟད།  བྲག་དཀར་དགེ་འདུན་གྲགས་པ་དང་ཧོར་རྒྱའི་དཔལ་ལྡན་དུས་འཁོར་གྲྭ་ཚང་གི་མ་ཎིའི་ལྕགས་པར་འགན་འཛིན་ཚོ་བཞིའི་གྲགས་པ་གསུམ།  ཅི་ཞིག་ལ་འཛིན་བཟུང་བྱས་པ་མི་ཤེས་ལ།  ཁོང་ཚོ་ཀློད་གྲོལ་བཏང་རྗེས་དྲིས་ཀྱང་མ་མྱོང་པས།  དེ་རིང་ད་དུང་ཡང་ངས་མི་ཤེས།

སྐབས་ཐོག་དེར་རོང་བོ་དགོན་པའི་གྲྭ་བ་ཚོ་ཆ་རྐྱེན་ཧ་ཅང་ཞན་ན་ཡང་།  དགོན་པའི་གྲྭ་བ་དང་རེབ་གོང་མི་དམངས་ཀྱིས་ཁོང་གཉིས་ལ་སིལ་ཏོག་ཤེལ་དམ་དེ་༼ཀོན་ཐིག༽དང་ཟ་མ་སོགས་གང་འཛོམས་ཀྱིས་བཙོན་ཁང་དུ་བསྐྱལ་གྱི་ཡོད།  དུས་དེར་བཙོན་སྲུང་བ་ཐམས་ཅད་ཡང་རེབ་གོང་མི་དམངས་ཀྱི་སེམས་ཚོར་ལ་ཧ་ལས་ཡོད་པ་རེད།  ཉིན་ཞིག་དེང་སང་དགའ་བྱང་ཀླུ་འབུམ་དུ་བཞུགས་པའི་དགེ་བཤེས་ལྷ་རམས་པ་དགེ་བཤེས་ཆོས་གྲགས་ལགས།  ཁོང་གཉིས་ལ་ཟ་མ་ཞིག་བསྐྱལ་དུ་བཙོན་ཁང་དུ་ཕྱིན་པའི་སྐབས་དེར། བཙོན་སྲུང་ཚོའི་འགོ་ཁྲིད་༼ཁེན་ཧྲི་ཀྲང༽གིས་ཁོ་ལ་སྐད་ཆ་འདི་བཤད་༼ལྷ་ས་ནས་འབྲུག་གྲགས་ན་རེབ་གོང་ནས་ཆར་བ་གཏོང་། ༽སོང་ཅེས་དགེ་བཤེས་མཆོག་གིས་ཕྲན་ལ་དངོས་སུ་གསུངས་མྱོང་ལ།

སྐབས་དེར་པཎ་ཆེན་སྐུ་ཕྲེང་བཅུ་བ་མཆོག་སྐུ་འཚོ་བཞུགས་ཡིན་སྟབས། པཎ་ཆེན་རིན་པོ་ཆེ་ཡི་སྐུ་ཚ་རེབ་གོང་རོང་བོ་དགོན་པའི་ཨ་ལགས་གཡེར་གཤོངས་ཆོས་པ་རིན་པོ་ཆེ་སོགས་ཀྱིས་པཎ་ཆེན་རིན་པོ་ཆེ་ལ་ཡར་ཞུ་བྱས་སྐབས་ཀྱང་།  པཎ་ཆེན་རིན་པོ་ཡིས་ཀྱང་དེང་སང་ཀྲུང་དབྱངས་ཀྱི་མིག་ནང་དུ་རེབ་གོང་ཚེར་མ་རྩུབ་པོ་བཞིན་མཐོང་གི་འདུག་ལ།  ཀྲུང་དབྱངས་ཀྱིས་ད་རུང་༼ལྷ་ས་ནས་འབྲུག་གྲགས་ན་རེབ་གོང་ནས་ཆར་བ་གཏོང་གི་འདུག་༽ཟེར་ནས་ལྟ་སྟངས་ཁྱོན་ནས་ཡག་པོ་མི་འདུག་གསུངས་སོང་ཅེས་རེབ་གོང་ཡུལ་དུ་ཁྱབ་བརྡལ་དུ་ཕྱིན་ཡོད།  དེ་ལྟ་ན་ཡང་།  ཁོང་གཉིས་ལ་ཁྲིམས་ཐག་མ་བཅད་པའི་སྔོན་ལ།  པཎ་ཆེན་རིན་པོ་ཆེ་ཡིས་མཚོ་སྔོན་སྤྱི་བདེ་ལས་ཁུང་གི་མགོ་ཁྲིད་གཙོ་བོ་བློ་བཟང་སྙན་གྲགས་ལགས་ལ་བཀའ་གནང་སྟེ།  དཔའ་ངར་ལྡན་པའི་འདས་པོ་སྤྱང་སྐྱའི་དགེ་འདུན་རྒྱལ་མཚན་དང་ཆུ་སྐྱེས་དཔལ་བཟང་གཉིས་བཙོན་གྲོལ་བཏང་།  ཁོ་རང་གཉིས་རེབ་གོང་ཁུལ་ཐོག་གི་བཙོན་ཁང་ནང་ཡོད་དུས།  རེབ་གོང་ཁུལ་ཐོག་གི་ཉེན་རྟོག་ལས་ཁུང་གི་མགོ་ཁྲིད་ནོར་བུ་ཟེར་བ་དེ་རེད་ཟེར། འདས་པོ་ནོར་བུའི་སེམས་ནས་ཁོང་གཉིས་ལ་ང་ཚོའི་འདོད་ཚུལ་གཅིག་རེད་ཅེས་གསུངས་སོང་་ཟེར།  རྗེས་ནས་སྐད་ཆ་གསལ་བོར་གོ་ཐོས་ཞིག་ལ། ༼ལྷ་ས་ནས་འབྲུག་གྲགས་ན་རེབ་གོང་ནས་ཆར་བ་གཏོང་། ༽ཟེར་བའི་སྐད་ཆ་འདི་བཤད་མཁན་ནི།  ༡༩༨༧ལོར་བོད་རང་སྐྱོང་ལྗོངས་ཀྱི་འགོ་ཁྲིད་གཙོ་བོ་དང་དེང་སང་རྒྱ་ནག་གི་སྲིད་འཛིན་ཟུར་བ་༼ཧོའུ་ཆིན་ཐོའོ༽ཡིས་བཤད་པ་རེད་ཟེར།

གང་ལྟར་དེ་ནས་བཟུང་རེབ་གོང་ནས་མི་རིགས་ཀྱི་ལ་རྒྱའི་མེ་དཔུང་ཆད་མ་མྱོང་།    ༡༩༨༩ལོར་པེ་ཅིན་ནས་སློབ་ཕྲུག་ཚོས་ཞི་རྒོལ་བྱེད་བཞིན་པའི་སྐབས།  རེབ་གོང་རོང་བོ་དགོན་ཆེན་ནས་ཀྱང་ཧོར་ཟླ་༤ཚེས༡༥ཉིན་ཡང་བསྐྱར་ཞི་བའི་ངོ་རྒོལ་ཆེན་པོ་ཞིག་བྱས་ཏེ།  ཁུལ་ཐོག་གི་ལས་ཁུང་ནང་བར་དུ་སོང་པས།  སྐབས་དེར་འཛིན་བཟུང་བྱས་བའི་མི་དེང་སང་ནུབ་བྱང་མི་རིགས་སློབ་ཆེན་གྱི་དགེ་རྒན་ཆུ་སྐྱེས་བསམ་གཏན་དང་། དེང་སང་ཨོ་སི་ཊི་ལེ་ཡར་བཞུགས་པའི་ཆབ་སྲིད་བཙོན་ཟུར་བསྟན་འཛིན་ཆོས་རྒྱལ་ལམ་རིན་ཆེན་གྲགས་པ་མདོ་བའི་བསྟན་འཛིན་གསུམ་རེད།  སྐབས་ཐོག་དེར་ང་རང་ཕ་ཡུལ་དང་ཁ་དགྱེས་ཏེ་རྒྱ་གར་དུ་སླེབས་ཟིན་པས།  སྐབས་དེའི་གནས་ཚུལ་ཅི་བཞིན་མི་ཤེས་པའི་བྲིས་མེད་མོད། འོན་ཀྱང་སྐབས་ཐོག་དེར་པཎ་ཆེན་རིན་པོ་ཆེ་སྐུ་འཚོ་བཞུགས་མིན་ན་ཡང་།  མཚོ་སྔོན་གྱི་བདེ་སྲུང་ལས་ཁུང་གི་མགོ་གཙོ་བློ་བཟང་སྙན་གྲགས་ལགས་རང་འཇགས་རེད།

བློ་བཟང་སྙན་གྲགས་ལགས་ལྡི་ཚ་དགོན་ཆེན་གྱི་དགེ་བཤེས་ཞོ་ཕོང་ཨ་ཁུ་ཚང་གི་སློབ་མ་ཡིན་སྟབས།  རོང་བོ་དགོན་པའི་དགེ་བཤེས་ཞིག་ཆེད་མངགས་ཞོ་ཕོང་ཨ་ཁུ་ཚང་གི་མདུན་དུ་སོང་སྟེ།  རྒྱ་གཞུང་གིས་འཛིན་བཟུང་བྱས་བའི་རོང་བོ་དགོན་པའི་གྲྭ་བ་གསུམ་གྱི་གནས་ཚུལ་རྣམས་ཞུས་ཏེ།  ཞོ་ཕོང་ཨ་ཁུ་ཚང་གིས་སྙན་གྲགས་ཐེའུ་ཀྲང་ལ་གསུངས་རོགས་ཅེས་ཞུས་པས།  ཞོ་ཕོང་ཨ་ཁུ་ཚང་གིས་མཚོ་སྔོན་སྔོན་ཉེན་རྟོག་ལས་ཁུང་གི་མགོ་གཙོ་སྙན་གྲགས་ལགས་ལ་ཕྱག་བྲིས་ཞིག་བྲིས་ཏེ།   ཁོང་ཚོ་གསུམ་ཡང་ཁྲིམས་ཐག་མ་བཅད་པའི་སྔོན་བཙོན་གྲོལ་ཐོབ།   སྐབས་དེར་ཁོང་ཚོ་གསུམ་འཛིན་བཟུང་བྱས་བའི་བརྒྱུད་རིམ་རྣམས་མཚོ་སྔོན་བརྙན་འཕྲིན་ཁང་ནས་མི་དམངས་ལ་བསྟན་ཡོད།

ད་འདིར་རེབ་གོང་ནས་མི་རིགས་ཀྱི་ལ་རྒྱའི་མེ་དཔུང་སྤར་མཁན་གྱི་དཔའ་རྒོད་སྤྱང་སྐྱའི་དགེ་འདུན་རྒྱལ་མཚན་དང་རྩོམ་པ་པོ་ཆུ་སྐྱེས་དཔལ་བཟང་གཉིས།  བཙོན་གྲོལ་ཐོབ་རྗེས་སུ་རེབ་གོང་ཤར་སྐལ་ལྡན་རྒྱ་མཚོ་སྐུ་ཕྲེང་བརྒྱད་པའི་ཡང་སྤྲུལ་ངོས་འཛིན་ཆེད།  འོས་བསྡུའི་མཚན་ཐོ་རྣམས་ཁྱེར་ཏེ་གསང་སྟབས་ཀྱིས་ཧི་མ་ལ་ཡའི་རི་བོ་བརྒལ་ནས་རྒྱ་གར་དུ་ཡོང་བའི་གནས་ཚུལ་ཞིག་བྲིས་ཏེ།  དྲན་ཐོ་ཐུང་ངུ་འདིའི་མཇུག་བསྡུ་རྒྱུ་ཡིན། ཕལ་ཆེར ༡༩༩༡ལོའི་དབྱར་དུས་ཞིག་ལ།  ཁོང་གཉིས་ཀྱི་གྲོགས་པོ་དགེ་བཤེས་ལྷ་རམས་པ་ཆོས་གྲགས་ལགས་དང་ངེད་གཉིས་ཀྱིས་རྒྱ་གར་ལྷོ་ཕྱོགས་དགའ་ལྡན་དུ་སློབ་གཉེར་བྱེད་བཞིན་པའི་སྐབས།  དེང་སང་ཨེ་ཤེ་ཡ་རང་དབང་རླུང་འཕྲིན་ཁང་གི་འགན་འཛིན་གཞོན་པ་དཔལ་ལྡན་རྒྱལ་གྱིས་ཁྲིད་ནས་སེ་འབྲས་དགེ་གསུམ་ལ་མཇལ་བར་སླེབས།

ཆབ་སྲིད་བཙོན་ཟུར་ཁོང་གཉིས་བཙོན་ཁང་དུ་བཞུགས་བཞིན་པའི་སྐབས།  དགེ་བཤེས་ཆོས་གྲགས་ལགས་དང་ངེད་གཉིས་ཕ་ཡུལ་དང་ཁ་དགྱེས་ཟིན་པས། རྒྱ་གར་ལྷོ་ཕྱོགས་ནས་མཇལ་དུས་འདས་གསོན་མཇལ་བ་ལྟ་བུའི་དགའ་སྐྱོ་འདྲེས་མ་ཞིག་ང་ཚོ་ཆ་ཚང་ལ་སྐྱེས།  ཉིན་ཤས་འགོར་བར་དུ་ང་ཚོའི་ཁ་བརྡ་ནི་རྫོགས་རྒྱུ་མེད་པའི་གླེང་མོལ་གྱི་འགྲུད་བཞུད་རིང་མོ་ཞིག་རེད། ཁོང་གཉིས་ལ་དགེ་བཤེས་ཆོས་གྲགས་ལགས་དང་ངེད་གཉིས་ཀྱིས་གདན་ས་དགའ་ལྡན་ནས་སློབ་གཉེར་བྱས་ཏེ་བཞུགས་རོགས་ཅེས་རེ་སྐུལ་ཞུས་ཀྱང་།  ཁོང་གཉིས་ཀྱིས་དཀའ་སྡུག་གང་ལ་འཕྲད་ཀྱང་ད་ཐེངས་ངེས་བར་དུ་ཕྱིར་འགྲོ་དགོས།  རེབ་གོང་མི་དམངས་དང་ཁོང་གཉིས་ཀྱི་དགེ་རྒན་ཨ་ཁུ་བློ་བཟང་ལ་ཡེ་སོགས་ཀྱིས་རེ་སྒུགས་བྱས་ནས་ཡོད་ཟེར།  ངེད་གཉིས་ཀྱི་བསམ་ཚུལ་ནི།  ཁོང་གཉིས་ཕྱིར་སོང་ན་ཡང་བསྐྱར་་བཙོན་ཁང་དུ་འགྲོ་བར་དོགས་ནས་རེ་སྐུལ་ཞུས་པ་དེ་རེད།

ཡིན་ན་ཡང་ཁོང་གཉིས་ཀྱི་དཔའ་ངར་གྱི་སྙིང་སྟོབས་ལ་ཞུམ་པ་མེད་པར་སྐྱེ་ཐེངས་གཅིག་ལ་འཆི་ཐེངས་གཅིག་རེད་ཟེར་བས།  རེབ་གོང་མི་དམངས་ཀྱི་རེ་སྒུགས་ཉིན་མོ་ལ་འོད་སྣང་འཕྲོ་བར་བཅུགས་ཏེ།  ཤར་སྤྲུལ་སྐུ་ཕྲེང་བརྒྱད་པ་གདན་ས་བཀོད་ཐུབ་ཡོད་པས།  དཔའ་ངར་ལྡན་པའི་འདས་བོ་སྤྱང་སྐྱའི་དགེ་འདུན་རྒྱལ་མཚན་དང་སྐུ་འཚོ་བཞུགས་ཡིན་པའི་རྩོམ་པ་པོ་ཆུ་སྐྱེས་དཔལ་བཟང་གཉིས་ཀྱི་བཀའ་དྲིན་ནམ་ཡང་རེབ་གོང་མི་དམངས་ཀྱི་སེམས་ནས་བརྗེད་མི་སྲིད།

བསྐྱར་བཅོས།: ༢༠༡༨/༠༨/༢༠

Leave a Reply

One thought on “ལྷ་ས་ནས་འབྲུག་གྲགས་ན་རེབ་གོང་ནས་ཆར་བ་གཏོང་།

  1. དམ་པ་ཁོང་གི་ལོ་རྒྱུས་ཟེར་ན་འདྲ་འདི་ཆ་ཚང་ཀློག་པ་ཡིན། སེམས་ལ་བརྗོད་མི་ཤེས་པའི་ཚོར་བ་ཞིག་སྤྲད་སོང་། ཡུལ་ཕྱོགས་རེ་ལ་སྐྱེ་བུ་འདི་འདྲ་རེད་བྱོན་པ་ནི་དགའ་འོས་པ་ཞིག་རེད། དགེ་ཁོང་གི་མཚན་གོ་བ་ཙམ་གྱི་ཁོང་སྔོན་མ་ཞིག་ནས་ངོ་ཤེས་པ་ཞིག་ཡིན་པས་ཚོར་བ་སྐྱེ། ཡིན་ཡང་ཁོང་ངོ་ཤེས་པ་ཞིག་མ་རེད། འོན་ཀྱང་ཁོང་གི་གྲགས་སྙན་དེ་གོ་བ་འདྲ་གང་ལྟར་དམ་པ་ཁོང་གུས་འདུག་ཞུ།