དམངས་གཙོའི་དུས་དྲན་ཐེངས་ ༥༨ པ་སྲུང་གཙི་གནང་།

བཙན་བྱོལ་བོད་མིའི་དམངས་གཙོ་དབུ་བརྙེས་ནས་ལོ་ངོ་ ༥༨ འཁོར་བའི་བཀའ་ཤག་གི་གསུང་འཕྲིན་ནང་ང་ཚོར་གནས་དུས་ལ་གཞིགས་པའི་མང་གཙོའི་སྒྲོམ་གཞི་སོགས་ཚད་ལྡན་ཞིག་ཆགས་ཐུབ་ཡོད་ནའང། མང་ཚོགས་ལ་མང་གཙོའི་གོ་རྟོགས་ཞན་པར་བརྟེན་མང་གཙོའི་རང་དབང་དང་ཐོབ་ཐང་ལ་བསྙད་དེ་བོད་མི་ནང་ཁུལ་གྱི་མཐུན་ལམ་ལ་དོ་ཕོགས་འགྲོ་གཞིའི་རིགས་ཡོང་བཞིན་འདུག་པ་ནི་བློ་ཕམ་གྱི་རང་བཞིན་ལས་མ་འདས་སྐོར་བརྗོད་སོང་། དེ་རིང་སྔ་དྲོའི་ཆུ་ཚོད་ ༩ པའི་སྟེང་། དྷ་ས་ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་རྒྱལ་བ་རིན་པོ་ཆེ་མཆོག་གིས་བོད་གཞུང་མང་ཡོངས་ལ། ཡང་དག་པའི་མང་གཙོའི་ལམ་བཟང་བསྩལ་ནས་མི་ལོ་ ༥༨ འཁོར་བའི་དུས་དྲན་ཉིན་མོ་སྲུང་གཙི་གནང་སོང་བ་དང་། མཛད་སྒོའི་སྐུ་མགྲོན་གཙོ་བོར་རྒྱ་གར་གྲོས་ཚོགས་འོག་མའི་འཐུས་མི་ཀཱན་ཝར་བྷ་ར་ཏན་ཌི་ར་སིང་ (Kunwara Bharatendra Singh) མཆོག་དང་། དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། བོད་མི་མང་སྤྱི་འཐུས་རྣམ་པ་གཙོའི་རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། སྲི་ཞུའི་ལས་བྱེད། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། དྷ་ས་ཁུལ་གྱི་མི་མང་དང་སློབ་ཕྲུག་སོགས་འཛོམས་འདུག

མཛད་སྒོའི་ཐོག་མར་སྲིད་སྐྱོང་མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་སྒྲེང་འཛུགས་གནང་རྗེས། སྐུ་མགྲོན་གཙོ་བོ་མཆོག་གིས་ཕྱི་ལོ་ ༢༠༡༨ ལོའི་སྲིད་སྐྱོང་སློབ་ཡོན་བྱ་དགའ་ཐོབ་མཁན་གསུམ་ལ་བྱ་དགའ་གནང་སོང་བ་དང་། སྲིད་སྐྱོང་བྱ་དགའ་ཐོབ་མཁན་དང་པོ (UGC) གཙུག་ལག་སློབ་གཉེར་ཁང་དུ་རིགས་གཅིག་རྐང་འཛིན་གྱི་བསླབ་པ་མཐར་སོན་བྱུང་བ་ཚེ་རིང་སྒྲོལ་མ་ལགས་ཡིན་པ་དང་། ཁོ་མོའི་རིགས་གཅིག་རྐང་འཛིན་གྱི་ཉམས་ཞིབ་དཔྱད་རྩོམ་དེ་ཧི་མཱ་ལ་ཡའི་རི་རྒྱུད་དུ་ནང་ཆོས་དར་འཕེལ་བྱུང་བའི་གཏེར་མའི་ཆོས་བརྒྱུད་ཀྱི་ཤུགས་རྐྱེན་ཇི་ཐེབས་ཀྱི་དཔྱད་ཞིབ་ཞེས་པ་དང་། ཨང་གཉིས་པ་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་ནས་རིགས་གཅིག་རྐང་འཛིན་གྱི་བསླབ་བ་མཐར་སོན་བསྟན་འཛིན་དགེ་རྒྱས་ལགས་ཡིན་པ་དང་། ཁོང་གི་ཉམས་ཞིབ་དཔྱད་རྩོམ་དེ་སྔ་འགྱུར་རྙིང་མའི་གཏེར་ཆོས་རིག་གནས་ཀྱི་བྱུང་རབས་ལ་དཔྱད་པ་ཞེས་པ་ཡིན་འདུག ཨང་གསུམ་པ་ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་དུ་གསོ་བ་རིག་པ་དང་རྩིས་ཀྱི་ཐོག་ཨཱ་ཅཱརྱའི་བསླབ་པ་མཐར་སོན་པ་བློ་བཟང་ཆོས་སྒྲོན་ལགས་ཡིན་པ་དང་། ཁོ་མོའི་ཉམས་ཞིབ་དཔྱད་རྩོམ་ཁ་བྱང་ལ་དཔལ་དུས་ཀྱི་འཁོར་ལོའི་གཞུང་ནས་བསྟན་པའི་འཇིག་རྟེན་ཁམས་གྲུབ་ཚུལ་ལ་དཔྱད་པ་བཅས་ཡིན་འདུག

གཞན་ཡང་སྲིད་སྐྱོང་མཆོག་ནས་ཕྱི་ལོ་ ༢༠༡༨ ལོའི་རྒྱ་གར་རྒྱལ་ཡོངས་འཛིན་རིམ་ ༡༢ པའི་ཡིག་རྒྱུགས་ཁྲོད་ཚན་རིག་དང་སྒྱུ་རྩལ་ཚོང་རིག་གསུམ་གྱི་ཐོག་ཨང་རིམ་རྩེ་ཕུད་སོན་པའི་སློབ་ཕྲུག་ ༩ ལ་དགའ་ལྡན་ཕོ་བྲང་བྱ་དགའ་གནང་སོང་བ་དང་། ཚན་རིག་ཁྲོད་ཨང་རིམ་དང་པོ་སོན་པ་སེ་ལ་ཀུ་བོད་ཁྱིམ་སློབ་མ་བསྟན་འཛིན་བརྩོན་འགྲུས་ལགས་སྐར་གྲངས་༩༣ དང་། ཨང་གཉིས་པ་སེ་ལ་ཀུ་བོད་ཁྱིམ་སློབ་མ་བསོད་ནམས་དཔལ་མོ་སྐར་གྲངས་ ༩༡.༢། ཨང་གསུམ་པ་སེ་ལ་ཀུ་བོད་ཁྱིམ་སློབ་མ་དཔྱིད་ཀ་ཡ་མ་ས་ཀི་སྐར་གྲངས་༨༨༌༢ བཅས་ཡིན་འདུག སྒྱུ་རྩལ་སྡེ་ཚན་ཁྲོད་ཨང་དང་པོ་མ་སུ་རི་བོད་ཁྱིམ་སློབ་མ་མཁས་མཆོག་དབང་མོ་སྐར་གྲངས་༩༢ དང་། ཨང་གཉིས་པ་སུ་ཇཱ་བོད་ཁྱིམ་སློབ་མ་ཟླ་བ་ལྷ་མོ་སྐར་གྲངས་ ༩༡༌༨ དང་། ཨང་གསུམ་པ་གོ་པལ་པུར་བོད་ཁྱིམ་སློབ་མ་རྡོ་རྗེ་དབང་མོ་སྐར་གྲངས་ ༩༠ ཡིན་འདུག གཞན་ཚོང་རིག་ནང་ཨང་དང་པོ་སྦེལ་ཀོབ་བོད་ཁྱིམ་སློབ་མ་བསྟན་འཛིན་སྟོབས་ལྡན་སྐར་གྲངས་༩༤་༢ དང་། ཨང་གཉིས་པ་སྦེལ་ཀོབ་བོད་ཁྱིམ་སློབ་མ་བསྟན་འཛིན་ཚེ་སྐྱིད་སྐར་གྲངས་ ༩༢ དང་། ཨང་གསུམ་པ་སྦེལ་ཀོབ་བོད་ཁྱིམ་སློབ་མ་བསྟན་འཛིན་ཉི་མ་སྐར་གྲངས་༨༩༌༢ བཅས་ཡིན་པ་དང་། གཞན་བཙན་བྱོལ་བོད་མིའི་ཡར་ཐོན་ཚོང་ལས་མ་དངུལ་རོགས་སྐྱོར་གཟེངས་རྟགས་འགྲན་བསྡུར་ནང་འདེམས་ཐོན་བྱུང་བའི་མི་ ༣ བཅས་ལ་གཟེངས་རྟགས་གནང་སོང་།

དེའི་རྗེས་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གིས་བཙན་བྱོལ་བོད་མིའི་དམངས་གཙོ་དབུ་བརྙེས་ནས་མི་ལོ་ ༥༨ འཁོར་བའི་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོག་སྦྱང་གནང་སོང་བ་དང་། གསུང་འཕྲིན་ནང་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་ཆབ་སྲིད་ཀྱི་རང་བཞིན་མང་གཙོའི་ལམ་སྲོལ་གསར་གཏོད་མཛད་ཅིང་། བོད་མིའི་རང་དབང་འཐབ་རྩོད་ཀྱི་རང་བཞིན་འཚེ་མེད་ཞི་བའི་ཐབས་ལམ་ཁོ་ནར་བརྟེན་དགོས་པའི་ལམ་སྟོན་མཐའ་འཁྱོངས་མཛད་འབྲས་བོད་ཀྱི་བདེན་དོན་དང་བོད་མིར་འཛམ་གླིང་ཁྱོན་ཡོངས་ནས་རྒྱབ་སྐྱོར་ཐོབ་ཡོད་པ་མ་ཟད། རྒྱ་ནག་སྐམ་ས་ཆེན་པོའི་ཤེས་ཡོན་ཅན་དང་། བློ་གཟུ་བོར་གནས་པའི་རྒྱ་རིགས་མི་སྣ་མང་པོ་ནས་ཀྱང་རྒྱབ་སྐྱོར་འཐོབ་བཞིན་ཡོད། ཡང་སྒོས་༸གོང་ས་མཆོག་གི་དབུ་འཁྲིད་འོག་བོད་ཆོལ་གསུམ་གོང་བུ་གཅིག་ཏུ་བསྒྲིལ་ཏེ་ཆོལ་ཁ་དང་ཆོས་བརྒྱུད་དབྱེ་བ་མེད་པར་སྒྲིག་འཛུགས་འདྲ་མིན་ནང་ཚང་མ་འདྲ་མཉམ་དང་། མཉམ་གནས་ཀྱིས་རང་དབང་འཐབ་རྩོད་ཐོག་ནུས་པ་མཉམ་སྤུངས་བྱེད་བཞིན་པ་ནི་ང་ཚོས་དགའ་སྤོབས་བྱ་འོས་པ་ཞིག་ཏུ་གྱུར་ཡོད། དེར་བརྟེན་ད་རེས་ཀྱི་གོ་སྐབས་འདི་བརྒྱུད་ནས་བོད་མི་ཚང་མའི་ཚབ་ཞུས་ཏེ་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་སྙིང་ཁོངས་རུས་པའི་གཏིང་ནས་ཐུགས་རྗེ་བཀའ་དྲིན་བླ་མེད་དུ་ཆེ་ཞེས་ཞུ་རྒྱུ་ཡིན། བཙན་བྱོལ་བོད་མིའི་མང་གཙོའི་ལམ་ལུགས་ནི་སྲིད་དོན་གྱི་ཤོག་ཁག་མེད་པའི་མང་གཙོའི་ལམ་ལུགས་ཡིན་པ་གང་ཞིག་ལ་སྲིད་འཛིན་གྱི་ལམ་སྲོལ་དང་། གྲོས་ཚོགས་ཀྱི་ལམ་སྲོལ་གཉིས་ཀའི་ལེགས་ཆ་ཡོད་པ། བོད་མི་མང་གཙོའི་ལམ་ལུགས་ནི་གྲོས་ཚོགས་དབུས་སུ་བཞག་པའི་མང་གཙོའི་ལམ་སྲོལ་དམིགས་བསལ་བ་ཞིག་ཆགས་ཡོད། དེ་ཡང་ཕྱི་ལོ་ ༡༩༦༣ ལོར་བོད་ཀྱི་རྩ་ཁྲིམས་ཡོངས་ཁྱབ་གསལ་བསྒྲགས་བསྐྱངས་གནང་མཛད་པ་དང་། ཕྱི་ལོ་ ༡༩༩༡ ལོར་བོད་མི་མང་སྤྱི་འཐུས་སྐབས་ ༡༡ པས་བཙན་བྱོལ་བོད་མིའི་བཅའ་ཁྲིམས་གཏན་ལ་ཕབ་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོག་མཆན་བསྩལ་བ་ནས་བཟུང་སྤྱི་འཐུས་ལྷན་ཚོགས་འདི་བཞིན་ཁྲིམས་བཟོ་ལྷན་ཚོགས་མིང་དོན་མཚུངས་པའི་ཐོག་བསྐྱོད་ཐུབ་ཡོད། ཕྱི་ལོ་ ༡༩༩༢ ལོར་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གསར་འཛུགས་བསྐྱངས། ཕྱི་ལོ་ ༢༠༠༡ ལོར་བཀའ་བློན་ཁྲི་པ་མི་མང་ནས་ཐད་ཀར་འོས་འདེམས་ཞུ་རྒྱུའི་ལམ་སྲོལ་གཏོད། ལྷག་པར་དུ་ཕྱི་ལོ་ ༢༠༡༡ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་འཕྲལ་ཡུན་དགག་དགོས་དུ་མར་གཟིགས་ཏེ་ཆབ་སྲིད་དང་འཛིན་སྐྱོང་གི་ཐུགས་འགན་རྣམས་མང་ཚོགས་ཀྱིས་འོས་འདེམས་བྱས་པའི་འགོ་འཁྲིད་རྣམས་ལ་བསྩལ་གནང་གིས་རླབས་ཆེན་དཀྱེལ་ཆེའི་དགོངས་པ་བཞིན་བོད་མི་མང་སྤྱི་འཐུས་ལྷན་ཚོགས་ཀྱིས་གཏན་འབེབས་གནང་བའི་ཁྲིམས་སྒྲིག་ཁག་གཞི་རྩར་བཟུང་ནས། བོད་མིའི་སྒྲིག་འཛུགས་ཀྱི་བྱེད་སྒོ་མཐའ་དག་ཁྲིམས་ཀྱི་དབང་བསྒྱུར་གྱིས་མང་གཙོའི་འགྲོ་ལུགས་ཐོག་སྐྱོད་བཞིན་པ་དང་། དེང་སྐབས་འཛམ་གླིང་ནང་གཞན་ལ་ངོམ་ཆོག་པའི་མང་གཙོའི་ལམ་ལུགས་ཀ་བ་གསུམ་ལྡན་གྱི་ཆ་ལག་ཚང་བ་ཞིག་ལག་བསྟར་བྱེད་བཞིན་ཡོད། ཅེས་དང་།

གཞིས་ལུས་མི་ཚོར་རྒྱ་ནག་གཞུང་གི་འོག་ཏུ་རང་དབང་ལོངས་སུ་སྤྱོད་ཐུབ་ཀྱི་མེད་ཀྱང་བོད་ཀྱི་ཆོས་དང་རིག་གཞུང་སྲུང་སྐྱོབ་འབད་བརྩོན་བྱེད་ཀྱི་ཡོད་པའི་སྐོར་ལ། བཞུགས་བོད་མི་རྣམས་ལ་མང་གཙོའི་རང་དབང་ལོངས་སུ་སྤྱོད་རྒྱུ་ལྟ་ཞོག་རྒྱ་དམར་གཞུང་གིས་བོད་ལ་བཙན་འཛུལ་དབང་བསྒྱུར་བྱས་ཏེ་མི་ལོ་ ༦༠ ལྷག་གི་རིང་། བོད་རྒྱལ་ཁབ་དང་མི་རིགས་ཀྱི་ངོ་བོ་མཚོན་བྱེད་སྐད་ཡིག་དང་། ཆོས་ལུགས། རིག་གཞུང་། ཡུལ་གོམས་གཤིས་ལུགས། བོད་ཀྱི་ཁོར་ཡུག་སོགས་བོད་ཀྱི་ཁྱད་ཆོས་རྣམས་རྨེག་མེད་རྩ་གཏོར་དུ་གཏོང་ཆེད། བོད་མི་རྣམས་དམངས་གཙོ་བཅོས་བསྒྱུར་ཞེས་པའི་དམར་ཤོག་དབང་ཆ་གཅིག་སྡུད་ཀྱི་སྒྲོམ་གཞིའི་ནང་བཙན་བཟུང་བྱས་པ་ནས་རིག་གནས་གསར་བརྗེ་ཆེན་པོའི་ལས་འགུལ་སོགས་ལོ་བཅུ་ཕྲག་མང་པོའི་རིང་ལ་སྲིད་བྱུས་མི་འདྲ་བ་བསྟུད་མར་སྤེལ་ཡོད། བོད་ནང་གི་རང་རེའི་སྤུན་ཟླ་རྣམས་ཀྱིས་ཕྱི་ལོ་ ༡༩༨༠ ནང་ནས་འགོ་འཛུགས་ཀྱིས་ཕྱི་ལོ་ ༢༠༠༨ ལོར་ས་བྱི་ཞི་རྒོལ་ཆེན་མོ་དང་། ལྷག་པར་དུ་ཕྱི་ལོ་ ༢༠༠༩ ནས་བཟུང་བོད་ནང་རང་ལུས་མེར་བསྲེགས་གནང་མཁན་དངོས་སུ་ཤེས་རྟོགས་ར་འཕྲོད་གསལ་པོ་བྱུང་བ་གྲངས་ ༡༥༢ ཀྱིས་བོད་ནང་རྒྱ་གཞུང་གིས་ལག་བསྟར་བྱས་པའི་སྲིད་བྱུས་དང་། སློབ་གསོའི་ལམ་ལུགས་ལ་མོས་མཐུན་དང་འདོད་པ་མེད་པར་རྒྱ་གཞུང་ལ་ཞི་བའི་ངོ་རྒོལ་རིམ་པ་བྱུང་ཡོད། ཆབ་སྲིད་ཀྱི་ཉེས་མིང་འོག་བོད་མི་མང་པོ་འཛིན་བཟུང་བཙོན་བཅུག་གིས་ཁྲིམས་ཆད་བཏང་བ་དང་། ད་ལྟའང་བོད་དུ་རྒྱ་མིའི་མི་སེར་སྤོ་ཤུགས་ཀྱི་ལས་གཞི་རྒྱ་ཆེ་རུ་གཏོང་བཞིན་པ། ལྷག་པར་དུ་མི་རིགས་དབྱེ་འབྱེད་ཀྱི་སྲིད་བྱུས་ཟིན་ཏེ་བོད་མིའི་དགོས་འདུན་དང་རྒྱ་མི་རིགས་ཀྱི་དགོས་འདུན་བཏོན་པ་གཉིས་ལས་རྒྱ་མི་རིགས་ཀྱི་དགོས་འདུན་རྣམས་སྔོན་ལ་སྒྲུབ་ཐུབ་ཐབས་བྱས་པ། བོད་ཀྱི་སྐད་ཡིག་སྲུང་སྐྱོབ་ཀྱི་ལས་འགུལ་བ་བཀྲ་ཤིས་དབང་ཕྱུག་ལགས་ལ་འདི་ལོའི་ཕྱི་ཟླ་ ༥ པའི་ནང་རྒྱལ་ཁབ་ཁ་བྲལ་གྱི་ཉེས་མིང་འོག་ལོ་ལྔའི་བཙོན་འཇུག་གི་ཁྲིམས་ཆད་བཏང་ཡོད་པ་དང་། ཉེ་ལམ་ཕྱི་ཟླ་ ༧ པའི་ནང་བཀྲ་ཤིས་དབང་ཕྱུག་ལགས་ཀྱི་ཁྲིམས་རྩོད་པས་གྱོད་གཞི་འདིའི་ཐོག་མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་ཟེར་བའི་ནང་ཁྲིམས་གཏུགས་བྱས་པར་ཁྲིམས་ཁང་ནས་ཕྱིར་སློག་བྱས་ཏེ་དྲང་བདེན་གྱི་ཁྲིམས་བཤེར་མ་བྱས་པ་ནི་རྒྱ་གཞུང་ངོ་གནོང་དགོས་པའི་བྱེད་ཐབས་ཤིག་ཏུ་གྱུར་ཡོད་པ་སོགས་ནོར་འཁྲུལ་ཅན་གྱི་སྲིད་བྱུས་དེ་དག་མུ་མཐུད་ལག་བསྟར་བྱེད་བཞིན་ཡོད། ཉེ་སྔོན་ཕྱི་ཟླ་ ༧ པའི་ནང་རྒྱ་གཞུང་གིས་བོད་ཕྲུག་ལོ་ན་བཅོ་བརྒྱད་མ་སོན་པར་དགོན་པའི་ནང་ཞུགས་ན་མི་རིགས་ལ་གྱོང་གུན་རེད་ཅེས་བརྗོད་དེ། བོད་ཀྱི་ཐུན་མིན་གོམས་གཤིས་དང་ལམ་ལུགས་ལ་རྩིས་མེད་ཀྱིས་ཟི་ཁྲོན་ཞིང་ཆེན་ཟེར་བའི་ཁོངས་རྫ་སེར་ཤུལ་དགོན་པ་དང་། ལི་ཐང་དགོན་ཆེན་སོགས་ནས་གྲྭ་ཕྲུག་མང་པོ་ཞིག་བཙན་ཁྲིད་བྱས་ཏེ་དགོན་པར་ཆོས་ཞུགས་མ་བཅུག་པར་རྒྱ་གཞུང་གི་བཙུགས་པའི་སློབ་གྲྭ་ཁག་ནང་སློབ་འཇུག་དགོས་པའི་བཙན་བཀའ་བཏང་བ་དང་། དེ་བཞིན་ལྷ་ས་གྲོང་ཁྱེར་ནང་སློབ་ཕྲུག་གི་ཁྱིམ་བདག་ཚོར་དབྱར་དུས་གུང་གསེང་རིང་བུ་ཕྲུག་རྣམས་ལ་ཆོས་ཕྱོགས་ཀྱི་བྱེད་སྒོར་ཞུགས་མི་ཆོག་པའི་གཅིག་གྱུར་གྱི་བཀའ་རྒྱ་བཏང་བ་བཅས་ནི་འགྲོ་བ་མིའི་ཐོབ་ཐང་དང་། ཆབ་སྲིད་ཀྱི་ཐོབ་ཐང་། སྨྲ་བརྗོད་རང་དབང་གི་ཐོབ་ཐང་། ཆོས་དད་རང་དབང་གི་ཐོབ་ཐང་བཅས་ལ་རྩིས་མེད་རྡོག་རོལ་བཏང་དང་གཏོང་བཞིན་ཡོད། ཅེས་འཁོད་འདུག

ཡང་གསུང་འཕྲིན་ནང་༧གོང་ས་རྒྱལ་བ་རིན་པོ་ཆེའི་བཀའ་དགོངས་དང་བོད་མི་མང་སྤྱི་འཐུས་ལྷན་ཚོགས་ཀྱི་སྤྱི་མོས་གཏན་འབེབ་གནང་བ་ལྟར་དབུ་མའི་ལམ་གྱི་སྲིད་བྱུས་ལག་བསྟར་རྒྱུན་འཁྱོང་གིས་བོད་རྒྱའི་དཀའ་རྙོག་གྲོས་མོལ་གྱི་ལམ་ནས་སེལ་ཐུབ་པར་རེ་བ་ཡོད་པའི་སྐོར་ལ། འདས་པའི་ལོ་ངོ་ ༤༠ ལྷག་ཙམ་རིང་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། བཙན་བྱོལ་བོད་མིའི་སྒྲིག་འཛུགས་ཀྱི་བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་གནང་བ་གཞིར་བཟུང་བོད་རྒྱ་གཉིས་སྨན་དབུ་མའི་ལམ་གྱི་སྲིད་བྱུས་ལག་བསྟར་རྒྱུན་འཁྱོང་གིས་བོད་རྒྱའི་དཀའ་རྙོག་གྲོས་མོལ་གྱི་ལམ་ནས་སེལ་ཐུབ་པའི་རེ་བ་དང་ཡིད་ཆེས་བྱེད་བཞིན་པ་དང་། རྒྱ་གཞུང་ནས་ཀྱང་རིམ་པས་བཟང་ཕྱོགས་ཀྱི་འགྱུར་བ་འགྲོ་རྒྱུའི་འགན་ཁུར་ལེན་དགོས་རྒྱུ་ནི་དུས་དང་སྤྱི་ཚོགས་ཀྱི་འགྱུར་འགྲོས་ལ་མ་བརྟེན་ཐབས་མེད་དུ་འགྱུར་ངེས་པས་རྒྱ་གཞུང་གི་འགོ་འཁྲིད་རྣམས་ཀྱིས་མཁྲེགས་བཟུང་གི་སྲིད་བྱུས་དོར་ཏེ་བོད་རྒྱ་གཉིས་སྨན་གྱི་ཐབས་ལམ་བརྒྱུད་དེ་གང་མགྱོགས་འབྲེལ་མོལ་འགོ་འཛུགས་དགོས་རྒྱུའི་འབོད་སྐུལ་བསྐྱར་ནན་བྱ་རྒྱུ་ཡིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐོག་མའི་དགོངས་གཞི་ལྟར་བཙན་བྱོལ་བོད་མིའི་སྒྲིག་འཛུགས་སྲ་བརྟན་དང་། བོད་ཀྱི་སྐད་ཡིག རིག་གཞུང་སོགས་མི་ཉམས་རྒྱུན་འཛིན། འཚེ་མེད་ཞི་བའི་ལྟ་གྲུབ་གཞིར་བཞག་གིས་མང་གཙོའི་ཁེ་དབང་ལོངས་སྤྱད་དེ། བོད་དོན་བདེན་མཐའ་གསལ་ཐབས་དགོས་རྒྱུ་ནི་བོད་མི་ཡོངས་ཀྱི་འཕྲལ་ཕུགས་ཀྱི་དམིགས་ཡུལ་གལ་ཆེ་ཞིག་ཆགས་ཡོད་ན། དེའི་ཆ་རྐྱེན་ལྟ་བུ་མེད་དུ་མི་རུང་བ་ནི་ཆོལ་གསུམ་བོད་མི་ཡོངས་རྫོགས་མཐུན་སྒྲིལ་དམ་ཚིག་འོ་ཆུ་གཅིག་འདྲེས་གནང་དགོས་རྒྱུ་གལ་ཆེའི་ནང་གི་དོན་ཆེན་ལྟ་བུ་གྱུར་བས། བོད་མི་ནང་ཁུལ་འགལ་ཟླ་རིགས་མི་བྱེད་རྒྱུའི་དམ་བཅའ་བརྟན་བཟུང་ཐོག་མགོན་པོ་གང་གི་བཀའ་དྲིན་དང་ཐུགས་རེ་སྙིང་དབུས་སུ་བཅངས་ཏེ། བོད་བསྟན་སྲིད་མི་རིགས་ཀྱི་ཕུགས་འདུན་མངོན་འགྱུར་ཡོང་ཆེད་བོད་མི་རྣམས་སེམས་ཤུགས་ནམ་ཡང་མི་ཆགས་པར་ངལ་བ་ཁྱད་བསད་ཀྱིས་གཞིས་བྱེས་མཉམ་འཛོམས་ཡོང་རྒྱུ་སོགས་ལ་ཚང་མས་ཞུ་སྒོ་ཅི་མཆིས་སྒོ་ཀུན་ནས་ལྷོད་གཡེང་མེད་པར་འབད་འབུངས་གནང་རོགས་ཞེས་རེ་སྐུལ་ཤུགས་ཆེ་ཞུ་རྒྱུ་ཡིན། འདི་ལོའི་ནང་བོད་མི་མང་སྤྱི་འཐུས་ལྷན་ཚོགས་ཀྱིས་རྒྱ་གར་མངའ་སྡེ་ཁག་ནང་བོད་དོན་ཞུ་སྐུལ་གྱི་ལས་འགུལ་གཞི་རྒྱ་ཆེ་བ་ཞིག་སྤེལ་རྒྱུའི་ལས་རིམ་འགྲོ་བཞིན་ཡོད་པས་ཞུ་སྐུལ་གྱི་རྒྱུད་རིམ་འདིས་རྒྱ་གར་དབུས་སའི་གྲོས་ཚོགས་འཐུས་མི་གཙོ་བོར་གྱུར་པའི་གནད་ཡོད་མི་སྣ་མང་པོས་བོད་ཀྱི་དངོས་ཡོད་གནས་སྟངས་མཁྱེན་རྟོགས་ཡོང་རྒྱུ་དང་། རྒྱབ་སྐྱོར་ཤུགས་ཆེ་གནང་བའི་རེ་བ་བྱེད་ཀྱི་ཡོད།

དེའི་རྗེས་སྲིད་སྐྱོང་མཆོག་ནས་བཀའ་ཤག་གི་གསུང་འཕྲིན་སྒྲོག་སྦྱང་གནང་བའི་ནང་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་དགུང་ན་ཆུང་དུས་ནས་དགོངས་བཞེད་ཡོད་པ་ལྟར། ཆོས་སྲིད་གཉིས་ཀྱི་ཐུགས་འགན་བཞེས་རྗེས་བོད་ཀྱི་སྤྱི་ཚོགས་ནང་འདྲ་མཉམ་སོགས་ཡོང་ཆེད་བཅོས་བསྒྱུར་གནང་འགོ་བཙུགས་ཡོད་པ་མ་ཟད། ལེགས་བཅོས་ལས་ཁུངས་ཤིག་ཀྱང་འཛུགས་གནང་མཛད་ཡོད། འོན་ཀྱང་ཕྱི་ནང་གི་འགལ་རྐྱེན་མང་དག་ཅིག་ལ་བརྟེན་ནས་ཐུགས་འདུན་ཡོད་པ་ལྟར་གནང་ཐུབ་མེད། བཙན་བྱོལ་དུ་ཕེབས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞི་དང་ལམ་སྟོན་གཞིར་བཟུང་། ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་བོད་མི་ཡོངས་ཀྱི་ངོ་ཚབ་མཚོན་པའི་ཆོལ་གསུམ་ཆོས་བརྒྱུད་དང་བཅས་པའི་སྤྱི་འཐུས་བསྐོ་འདེམས་བྱེད་པའི་སྲོལ་གཏོད་མཛད་པའི་སྒོ་ནས་བོད་མིའི་མང་གཙོ་དབུ་བརྙེས་པ་དང་། བོད་མིའི་ཆབ་སྲིད་ཀྱི་རང་བཞིན་མང་གཙོའི་ལམ་ཕྱོགས་སུ་འཁྲིད་གནང་མཛད། རིམ་པས་མ་འོངས་བོད་ཀྱི་རྩ་ཁྲིམས་ཁྱབ་བསྒྲགས་གནང་རྒྱུ་དང་བཙན་བྱོལ་བོད་མིའི་བཅའ་ཁྲིམས་གཏན་འབེབས་ཆོག་མཆན་བསྩལ་རྒྱུའི་མཚོན། བུད་མེད་ཀྱི་ཆེད་དུ་སྤྱི་འཐུས་ཞབས་སྟེགས་ཟུར་བཅད་གནང་རྒྱུ་དང། བོད་ཀྱི་ཆོས་བརྒྱུད་ཆེན་པོ་བཞི་དང་སྤྱི་མཚུངས་བོད་ཀྱི་གནའ་བོའི་ཆོས་ལུགས་བོན་གྱི་ཆེད་དུ་ཡང་སྤྱི་འཐུས་ཞབས་སྟེགས་གནང་ནས་ཕྱི་ལོ་ ༡༩༧༧ ལོར་ཐོག་མར་འདེམས་འགོ་ཚུགས་པ་བཅས། གནས་དུས་ལ་གཞིགས་པའི་སྤྱི་འཐུས་ལྷན་ཚོགས་ཀྱི་གྲུབ་ཆར་རིམ་པས་ལེགས་བཅོས་ཇི་དགོས་ལམ་སྟོན་མཛད་དེ་ད་ཆ་མིང་དོན་མཚུངས་པའི་ཁྲིམས་བཟོ་ལྷན་ཚོགས་ཤིག་ཆགས་ཐུབ་ཡོད་པ་དང། དེ་བཞིན་མང་གཙོའི་ཀ་བ་གསུམ་གྱི་ཡ་གྱལ་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་སྒྲིག་འཛུགས་ཀྱང་འཛུགས་གནང་མཛད་ཡོད། ཅེས་དང་།

རྒྱ་ནག་གཞུང་གིས་བོད་ནང་དངོས་ཡོད་དང་མི་མཐུན་པའི་སྲུད་བྱུས་ལག་བསྟར་དང་བོད་མི་ཚོར་དམ་དྲག་ཤུགས་ཆེར་བྱེད་བཞིན་པའི་སྐོར་ལ། ལོ་ངོ་ ༦༠ བརྒལ་བའི་དུས་ཡུན་ནང་གཞིས་བཞུགས་བོད་མི་རྣམས་ནི་རྒྱ་ནག་གཞུང་གི་དྲག་གནོན་གྱི་སྲིད་བྱུས་འོག་གཞི་རྩའི་འགྲོ་བ་མིའི་ཐོབ་ཐང་ཙམ་ཡང་མེད་པར་དུས་དང་རྣམ་པ་ཀུན་ཏུ་དངངས་སྐྲག་འོག་གནས་བཞིན་ཡོད། བོད་ས་ཡོངས་ལ་དུས་རྒྱུན་དུ་དམ་བསྒྲགས་ཡོད་མུས་དང་ལྷག་པར་བོད་ཀྱི་རྒྱལ་ས་ལྷ་ས་ཐེ་བའི་ས་ཁུལ་གང་སར་བོད་ཀྱི་དུས་སྟོན་སོགས་འདུ་འཛོམས་ཆེ་སྐབས་དམིགས་བསལ་དམ་བསྒྲགས་བྱེད་བཞིན་ཡོད། དཔེར་ན། ཉེ་ཆར་ཞོ་སྟོན་སྐབས་བོད་ཀྱི་རྒྱལ་ས་ལྷ་སར་དམག་མི་དང་སྐོར་སྲུང་བ་མང་དུ་བཏང་ནས་གང་སར་འགྲེམས་འཇོག་བྱས་ཡོད། བོད་མིའི་ཐོག་དམ་བསྒྲགས་ཇི་ཡོད་དང་ཆོས་དད་རང་དབང་སོགས་མེད་པའི་གནས་སྟངས་སྐོར་རྒྱལ་སྤྱིའི་ཁུངས་འཕེར་སྙན་ཐོ་མང་པོའི་ནང་བསྟུད་མར་ཐོན་བཞིན་ཡོད། ཉེ་སྔོན་ཨ་རིའི་རྒྱལ་ས་ཝ་ཤིང་ཀྲོན་དུ་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་ཆེན་ཐོག་ཨ་རིའི་སྲིད་འཛིན་གཞོན་པ་མཱ་ཡིཀ་པནསེ་ (Mike Pence) མཆོག་གིས། འདས་པའི་ལོ་ངོ་ ༧༠ ཙམ་རིང་རྒྱ་ནག་གཞུང་གིས་བོད་མི་ཚོར་གཉའ་གནོན་དང་མནར་གཅོད་བཏང་ཡོད་པ་དང་། བོད་མི་ཚོས་ཆོས་དང་རིག་གཞུང་ཉམས་ལེན་གྱི་ཆེད་དུ་མུ་མཐུད་འཐབ་རྩོད་བྱེད་བཞིན་ཡོད། ཅེས་གསུངས་ཡོད་པ་ནི་བོད་མིའི་དངོས་ཡོད་གནས་སྟངས་ལ་བསྡོམས་བརྒྱབ་པ་ལྟ་བུ་ཞིག་ཡིན། དེ་ལྟ་ན་ཡང་རྒྱ་ནག་གཞུང་གི་དབང་འཛིན་པ་ཚོས་བོད་མིའི་ཐོག་བྱེད་སྟངས་འདི་དག་རྒྱ་ནག་རང་ཉིད་ཀྱི་རྩ་ཁྲིམས་ཐེ་བའི་ཡིག་ཆ་ཁག་དང་ཡོངས་སུ་འགལ་བ་ཞིག་རེད། རྒྱ་ནག་གཞུང་གིས་བོད་ཀྱི་དགོན་སྡེ་ཁག་ཏུ་གྲྭ་བཙུན་གྱི་གྲངས་ཀ་ཙམ་མ་ཟད་། ཆོས་ཞུགས་བྱེད་པའི་ལོ་ནར་ཡང་ཚད་བཀག་བཟོས་ཏེ་གྲྭ་བཙུན་སྟོང་ཕྲག་མང་པོ་དགོན་པ་ནས་ཕྱིར་འབུད་ཀྱིས་གཞུང་གཉེར་སློབ་གྲྭའི་ནང་བཙན་དབང་གིས་གཏོང་བཞིན་ཡོད། ཉེ་ཆར་ཁམས་རྫ་ཆུ་ཁ་རྫོང་ཁོངས་ནས་གྲྭ་ཆུང་རྣམས་དགོན་པ་ནས་ཕྱིར་འབུད་ཀྱིས་གཞུང་གཉེར་སློབ་གྲྭ་ཁག་ནང་འགྲོ་དགོས་པ་དང་། དེ་མིན་དགོན་པ་སྒོ་རྒྱག་རྒྱུ་མ་ཟད་དགོན་པའི་བླ་མ་ལས་སྣེ་དང། ཕ་མ་བཅས་ཚང་མར་ཉེས་ཆད་གཏོང་རྒྱུ་ཡིན་པའི་བཀའ་རྒྱ་བཏང་འདུག གཞན་ཡང་ལྷ་ས་གྲོང་ཁྱེར་ཁུལ་དུ་སློབ་མ་རྣམས་དབྱར་ཁའི་གུང་གསེང་སྐབས་ཆོས་ཕྱོགས་ཀྱི་བྱེད་སྒོར་ཞུགས་མི་ཆོག་པའི་བཀའ་རྒྱ་བཏང་འདུག་པ་བཅས་ནི། བོད་ཀྱི་མི་རབས་གསར་པ་རྣམས་བོད་ཀྱི་རིག་གནས་ཀྱི་བསྟི་གནས་དགོན་སྡེ་གྲྭ་ཚང་ཁག་དང་། དེ་བཞིན་ཆོས་ཕྱོགས་ཀྱི་བྱ་བ་ཁག་དང་འབྲེལ་བ་མེད་པ་བཟོས་ཏེ་རིམ་པས་བོད་མི་རིགས་ཀྱི་ངོ་བོ་རྩ་མེད་བཟོ་རྒྱུའི་ཕུགས་དམིགས་ངན་པ་བཅངས་པ་ཞིག་ཡིན་པ་གསལ་པོ་རེད། བོད་མིའི་ཐོག་སྲིད་བྱུས་ལག་བསྟར་བྱེད་མཁན་གྱི་དབང་འཛིན་པ་ཚོས་བྱེད་བབ་དེ་དག་ནི་སྲིད་འཛིན་ཞི་ཅིན་ཕིང་གིས་རྒྱ་ནག་གི་རིག་གཞུང་དར་འཕེལ་ཡོང་བར་ནང་ཆོས་ཀྱིས་ནུས་པ་འདོན་ཐུབ་ཅེས་ཡོངས་གྲགས་ཐོག་ངོས་ལེན་བྱས་ཡོད་པ་དང་འགལ་ཡོད། དེར་བརྟེན་བོད་མིའི་ཆོས་དད་རང་དབང་ཐོག་ལ་དམ་བསྒྲགས་བྱེད་བཞིན་པ་འདི་དག་ལ་བལྟས་ཚེ་དབུས་ཀྱི་འགོ་འཁྲིད་རྣམ་པའི་དགོངས་པ་དང་ས་གནས་ཀྱི་དབང་འཛིན་པ་ཚོས་བྱེད་བབ་གཉིས་ལ་ཧེ་བག་ཆེན་པོ་ཡོད་པ་མ་ཟད་ཡ་མཚན་སྐྱེ་གཞི་ཞིག་ཀྱང་ཆགས་ཡོད། ཅེས་འཁོད་འདུག

ཡང་གསུང་འཕྲིན་ནང་རྒྱ་ནག་གཞུང་གིས་བོད་ཀྱི་གནད་དོན་གལ་ཆེན་འཛིན་བཞིན་པ་དང་བཀའ་ཤག་གིས་ལོ་ལྔའི་ནང་བོད་རྒྱ་འབྲེལ་མོལ་མྱུར་དུ་མགོ་འཛུགས་ཀྱིས་བོད་དོན་བདེན་མཐའ་སེལ་ཐབས་ལ་འབད་བརྩོན་བྱེད་ཀྱི་ཡིན་པའི་སྐོར་ལ། ཉེ་ཆར་སྲིད་བློན་ལི་ཁེ་ཆང་བོད་རང་སྐྱོང་ལྗོངས་ཟེར་བའི་ནང་ཕྱིན་ནས་མེས་རྒྱལ་གོང་བུ་གཅིག་གྱུར་ལ་སྲུང་སྐྱོང་དང་། མི་རིགས་མཐུན་སྒྲིལ་ལ་ཤུགས་སྣོན་རྒྱག་དགོས་སྐོར་བཤད་ཡོད། དེ་བཞིན་རྒྱལ་ཡོངས་སྲིད་གྲོས་ཀྱི་ཚོགས་གཙོ་ཝང་དབྱང་གིས་ཉིན་གསུམ་རིང་གི་ལྟ་སྐོར་སྐབས་ཀྱང་། མེས་རྒྱལ་གོང་བུ་གཅིག་གྱུར་དང་། མི་རིགས་མཐུན་སྒྲིལ། སྤྱི་ཚོགས་བརྟན་ལྷིང་བཅས་སྲུང་སྐྱོང་ཡོང་བར་ཁ་བྲལ་གྱི་གནད་དོན་ཡོངས་རྫོགས་ལ་བློ་ཁོགས་ཆེན་པོའི་ངང་ནས་གདོང་ལེན་བྱེད་དགོས་པ་དང་། དེ་བཞིན་བོད་ཀྱི་དགོན་སྡེ་ཁག་ལ་དོ་དམ་བྱེད་ཤུགས་ཆེ་རུ་གཏོང་དགོས་སྐོར་སོགས་བཤད་ཡོད། འོན་ཀྱང་བོད་མིར་སྡང་ཟུག་བྱེད་པ་དང་། དགྲ་བོར་འཛིན་པ། ཡིད་ཆེས་མི་བྱེད་པ། མི་རིགས་དབྱེ་འབྱེད་བྱེད་པ། དེ་བཞིན་བོད་མི་རིགས་ཀྱི་ངོ་བོ་དང་ཡུལ་གོམས་གཤིས་ལུགས་ལ་བརྩི་མཐོང་མི་བྱེད་པའི་བྱེད་སྟངས་འདི་དག་མི་རིགས་མཐུན་སྒྲིལ་དང་། “སྤྱི་ཚོགས་བརྟན་ལྷིང་མི་ཡོང་བའི་རྒྱུ་རྐྱེན་གཙོ་ཁག་ཅིག་ཡིན་པ་ངོས་ལེན་བྱེད་དགོས། བོད་མིའི་རེ་འདུན་ལ་བསམ་ཤེས་དང་བཟང་ཕྱོགས་ཀྱི་འགྱུར་བ་མ་བཏང་བར་དོན་དམ་གྱི་མི་རིགས་འཆམ་མཐུན་ཡོང་ཐུབ་ཀྱི་མ་རེད་ཅེས་ཚིག་ཐག་ཆོད་པོས་བརྗོད་རྒྱུ་ཡིན། ལི་ཁེ་ཆང་དང་ཝང་དབྱང་གཉིས་གཅིག་རྗེས་གཉིས་མཐུད་ཀྱིས་བོད་རང་སྐྱོང་ལྗོངས་ཟེར་བའི་ནང་ཕྱིན་པ་དེས་བོད་དང་བོད་མིའི་གནད་དོན་གལ་ཆེར་འཛིན་གྱི་ཡོད་པར་ང་ཚོས་ཚོད་དཔག་བྱེད་ཐུབ་ཀྱི་འདུག དེ་ལྟར་ཡིན་ན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་དགོས་འདུན་གཞིར་བཞག་བོད་རྒྱ་གཉིས་སྨན་གྱི་ཐག་གཅོད་ཞིག་ཡོང་རྒྱུར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དུ་གྲོས་མོལ་འགོ་འཛུགས་དགོས་པ་བསྐྱར་བརྗོད་བྱེད་རྒྱུ་ཡིན། བོད་ནང་གི་དངོས་ཡོད་གནས་སྟངས་དང་ཛ་དྲག་གི་གནས་བབ་ལས་སྐྱོབ་ཐབས་སུ་ལོ་ལྔའི་ནང་རྒྱ་ནག་གཞུང་དང་གྲོས་མོལ་འགོ་འཛུགས་ཀྱིས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་འབད་བརྩོན་བྱ་རྒྱུ་དང་། ཅི་སྟེ་བོད་དོན་བདེན་མཐའ་གསལ་རྒྱུར་ལོ་ལྔ་བཅུ་དུས་འགོར་བྱུང་ནའང་བོད་མིའི་སྒྲིག་འཛུགས་འདི་བཞིན་མུ་མཐུད་སྲ་བརྟན་རྒྱུན་གནས་ཐུབ་པ་བྱས་ཏེ་བོད་མིའི་རང་དབང་འཐབ་རྩོད་རྒྱུན་སྐྱོང་བྱེད་རྒྱུའི་དམིགས་ཡུལ་གཞིར་བཞག་ཐོག ལྔ་དང་ལྔ་བཅུའི་འཆར་སྣང་ཞེས་པའི་ཚོགས་འདུ་རིམ་པ་ཁ་ཤས་འཚོགས་དང་ཚོགས་མུས་ཡིན། དེ་ཡང་སྔ་ལོ་ཕྱི་ཟླ་ ༡༠ པའི་ནང་བོད་རྒྱའི་དཀའ་རྙོག་སེལ་ཐབས་ཀྱི་སྲིད་བྱུས་གཙོ་བཟུང་གིས་རྒྱལ་སྤྱིའི་གནས་ཚད་ལྡན་པའི་ཚོགས་འདུ་ཆེན་པོ་ཞིག་བསྐོངས་ཡོད་པ་དང། དེ་བཞིན་བོད་ཀྱི་མ་འོངས་མདུན་ལམ་ཞེས་པའི་བརྗོད་གཞིའི་འོག་མ་འོངས་འགོ་འཁྲིད་བསྐྱེད་སྲིང་དང་འབྲེལ་ནས་ཉེ་ཆར་རྒྱལ་ཁབ་ཁག་ ༡༥ ནས་འདུས་པའི་ན་གཞོན་གྱི་ཚོགས་འདུ་ཞིག་ཀྱང་བསྐོངས་ཡོད། ད་དུང་འདི་ཟླའི་ཟླ་དཀྱིལ་ཙམ་དུ་བོད་ཀྱི་ཆོས་དང་རིག་གཞུང། སྐད་ཡིག་དང་ཤེས་ཡོན་སློབ་གསོ། བོད་མིའི་འཕྲོད་བསྟེན་དང་དཔལ་འབྱོར་བཅས་ཡར་རྒྱས་བཏང་བའི་ཐོག་ནས་བོད་མིའི་སྒྲིག་འཛུགས་སྲ་བརྟན་དང་བཙན་བྱོལ་བོད་མིའི་སྤྱི་ཚོགས་ནུས་པ་ལྡན་པ་བཟོ་ཆེད་ཚོགས་ཆེན་ཞིག་ཚོགས་གཏན་འཁེལ་ཡོད། ཅེས་དང་།

ཡང་བོད་པ་བཙན་བྱོལ་བ་ཚོར་དམངས་གཙོའི་སྒྲོམ་གཞི་ཆ་ལག་ཚང་བ་ཞིག་ཡོད་ཀྱང་དམངས་གཙོའི་གོ་རྟོགས་ཞན་པོ་ཡིན་པས་རང་དབང་དང་དམངས་གཙོ་ཁ་ལ་ཁུར་ནས་ནང་ཁུལ་མཐུན་ལམ་ལ་དོ་ཕོགས་འགྲོ་བཞིན་ཡོད་པའི་སྐོར་ལ། ང་ཚོའི་གནས་དུས་ལ་གཞིགས་པའི་མང་གཙོའི་སྒྲོམ་གཞི་སོགས་ཚད་ལྡན་ཞིག་ཆགས་ཐུབ་ཡོད་ནའང། མང་ཚོགས་ལ་མང་གཙོའི་གོ་རྟོགས་ཞན་པར་བརྟེན་མང་གཙོའི་རང་དབང་དང་ཐོབ་ཐང་ལ་བསྙད་དེ་བོད་མི་ནང་ཁུལ་གྱི་མཐུན་ལམ་ལ་དོ་ཕོགས་འགྲོ་གཞིའི་རིགས་ཡོང་བཞིན་འདུག་པ་ནི་བློ་ཕམ་གྱི་རང་བཞིན་ལས་མ་འདས། དེའི་ཁར་རྒྱ་ནག་གཞུང་དང་དེའི་སོ་ཉུལ་བ་ཚོས་ཀྱང་བོད་མིའི་སྤྱི་ཚོགས་ནང་འཛུལ་ཏེ་ཆིག་བསྒྲིལ་ལ་གནོད་སྐྱོན་གཏོང་ཐབས་བྱེད་བཞིན་ཡོད་པ་ལའང་ཚང་མས་སྤྱང་གྲུང་དང་ཡིད་གཟབ་བྱེད་དགོས། ང་ཚོ་བོད་མི་ནང་ཁུལ་མཐུན་ལམ་རྡོག་རྩ་གཅིག་སྒྲིལ་བྱེད་རྒྱུ་ནི་ང་ཚོའི་འཐབ་རྩོད་ཀྱི་མ་རྩ་དང་སྟོབས་ཤུགས་གལ་ཆེ་ཤོས་ཤིག་ཡིན། ང་ཚོས་རང་ཡུལ་བཞག་ནས་མི་ཡུལ་དུ་ཡོང་བའི་དགོས་དམིགས་མ་བརྗེད་པའི་ཐོག ཕྱི་ལོ་ ༡༩༦༠ ལོའི་ཟླ་ ༢ པའི་ནང་ཆོལ་གསུམ་ཆོས་བརྒྱུད་ཡོངས་རྫོགས་མཚོན་པའི་ང་ཚོའི་ཕ་མེས་དང་མི་རབས་གོང་མ་ཚོས་གནས་མཆོག་རྡོ་རྗེ་གདན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་འཁྲིད་འོག། བོད་མི་ཡོངས་རྫོགས་མཐུན་ལམ་རྡོག་རྩ་གཅིག་སྒྲིལ་ལྕགས་ཀྱི་གོང་བུ་ལྟར་གནས་རྒྱུའི་མནའ་གན་མཐུ་མོ་ཆེའི་དམ་བཅའ་ཕུལ་ཡོད་པ་དེ་ང་ཚོས་བསྐྱར་དྲན་དང་། ཁྱད་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་ཀྱི་བླ་ཆེན་ཁག་ཅིག་གིས་བོད་མི་ནང་ཁུལ་དམ་ཚིག་རྡོག་རྩ་གཅིག་སྒྲིལ་ཐོག་ནས་བོད་མིའི་བདེན་དོན་འཐབ་རྩོད་ཐོག་ནུས་པ་མཉམ་སྤུངས་བྱེད་དགོས་པའི་བཀའ་སློབ་ལམ་སྟོན་རིམ་ཕེབས་རྣམས་ཀྱང་སྙིང་བཅངས་ཞུ་དགོས་པའི་སྐུལ་འདེབས་ཤུགས་ཆེ་བྱ་རྒྱུ་ཡིན། བཀའ་ཤག་གི་ངོས་ནས་བོད་མི་མང་སྤྱི་འཐུས་ལྷན་ཚོགས་ཀྱི་སྤྱི་མོས་གཏན་ལ་ཕབ་པའི་བོད་རྒྱ་གཉིས་སྨན་གྱི་དབུ་མའི་ལམ་གྱི་སྲིད་བྱུས་བརྒྱུད་རྒྱ་ནག་གཞུང་དང་གྲོས་མོལ་བསྐྱར་མཐུད་ཡོང་རྒྱུར་སྒོ་གང་ས་ནས་འབད་བརྩོན་བྱེད་བཞིན་ཡོད། གཞན་ཡང་རང་རེའི་སློབ་གྲྭ་ཁག་གི་བསླབ་གཞིའི་ནང་དུའང་དབུ་མའི་ལམ་གྱི་ངོ་སྤྲོད་སྐོར་སློབ་ཚན་འཆར་འགོད་བྱས་ཡོད། དེ་མཚུངས་རྒྱལ་སྤྱི་དང་རྒྱ་གར་ནང་དུ་སྲིད་སྐྱོང་གིས་གཙོས་བཀའ་བློན་རྣམ་པ་དང་། སྤྱི་འཐུས་ཚོགས་གཙོ་སྦྲེལ་པོས་གཙོས་སྤྱི་འཐུས་རྣམ་པས་ཀྱང་གོ་སྐབས་ནམ་བྱུང་ལ་གནད་ཡོད་མི་སྣ་ཚོར་མཇལ་འཕྲད་ཞུས་ཏེ་དབུ་མའི་ལམ་གྱི་སྲིད་བྱུས་གཞིར་བཞག་བོད་ཀྱི་གནད་དོན་སེལ་རྒྱུར་རྒྱབ་སྐྱོར་ཡོང་བའི་རེ་སྐུལ་ཞུས་དང་ཞུ་བཞིན་ཡོད། ཅེས་འཁོད་འདུག

མཇུག་ཏུ་སྐུ་མགྲོན་གཙོ་བོ་མཆོག་གིས། དེ་རིང་ཁོང་རླབས་ཆེ་བའི་བོད་མིའི་མང་གཙོ་དུས་དྲན་ཐེངས་ ༥༨ བའི་སྐུ་མགྲོན་གཙོ་བོར་གདན་དྲངས་བར་ཧ་ཅང་དགའ་བོ་བྱུང་། སྲིད་སྐྱོང་མཆོག་དང་བཀའ་ཤག་རྣམ་པ། སྤྱི་འཐུས་རྣམས་པས་རིག་གཞུང་དང་ཆོས་ལུགས་མི་རིགས་ཀྱི་ངོ་བོ་སོགས་མ་ཟད། དེང་རབས་ཀྱི་མང་གཙོའི་རིན་ཐང་སོགས་རྒྱུད་འཛིན་བྱེད་བཞིན་པ་དང་། དེ་བཞིན་སྲིད་སྐྱོང་ལ་མཚོན་ན་འཛམ་གླིང་གི་སྙན་གྲགས་ཆེ་བའི་སློབ་ཆེན་ཧ་ཝ་ཊིའི་ནང་དུ་ཁྲིམས་ལུགས་རིག་པར་སློབ་སྦྱོང་བྱས་ཏེ། སློབ་མཐར་ཕྱིན་རྗེས་ཕྱིར་ལོག་ནས་མི་མང་ལ་ཞབས་འདེགས་ཞུ་བཞིན་ཡོད་པ་དེ་ནི་ཧ་ཅང་གི་སྟོབས་ཤུགས་ལྡན་པ་ཞིག་རེད། རྒྱ་གར་གྲོས་ཚོགས་དང་རྒྱལ་ཁབ་གཞན་དག་གི་གྲོས་ཚོགས་ཚང་མས་སང་ཉིན་གྱི་ཉི་མ་དེ་ཡག་པོ་ཞིག་ཏུ་བཟོ་དགོས་པ་དང་། ང་ཚོའི་བྱིས་པ་ཚོ་ལའང་སང་ཉིན་གྱི་ཉི་མ་ཡག་པོ་ཞིག་སྤྲོད་དགོས་ཀྱི་ཡོད་པ་རེད། ད་དུང་མུ་མཐུད་དུ་འབད་བརྩོན་ཆེན་པོས་ཤུགས་རྒྱག་བཞིན་པའི༧གོང་ས་རྒྱལ་བ་རིན་པོ་ཆེའི་དབུ་མའི་ལམ་དེ་རྒྱ་གར་གྱི་གྲོས་ཚོགས་ཙམ་མ་ཟད་གོ་ལ་སྤྱི་ཡོངས་ལ་ཁྱབ་བསྒྲགས་ཆེན་པོར་འགྲོ་བཞིན་ཡོད་པ་ལྟར། ཚང་མས་སེམས་པ་རྣམ་དག་གིས་ངོས་ལེན་དང་མཐོང་ཆེན་བྱེད་ཀྱི་ཡོད་པ་རེད། རྒྱ་གར་དང་བོད་རྒྱ་ནག་གསུམ་ནི་ཕན་ཚུན་ལ་ཧ་ཅང་གི་འབྲེལ་ཐག་ཉེ་བོ་ཡོད་པ་ཞིག་རེད། ཡིན་ཡང་། སྟབས་མ་ལེགས་པ་ཞིག་ལ་རྒྱ་ཁྱབ་ཏུ་འགྲོ་བཞིན་པའི་རྒྱ་ནག་གི་སྲིད་ཇུས་ཀྱིས་མིའི་རིགས་ཚང་མར་ཚད་ལས་བརྒལ་བའི་རྣམ་འགྱུར་སྟོན་གྱི་ཡོད་པ་རེད། ང་ཚོ་འགྲོ་བ་མིའི་གཞི་རྩའི་ཁྱད་ཆོས་ནི་ཡིད་ཆེས་རེད་ལ། རྒྱལ་ཁབ་སོ་སོའི་སྲིད་གཞུང་ཚོས་ཀྱང་ཡིད་ཆེས་གཙོ་བོར་འཛིན་གྱི་ཡོད་པ་རེད། ཡིད་ཆེས་མེད་པ་ཡིན་ན་འགྲོ་ལུགས་གང་འདྲ་ཞིག་ཡིན་རུང་ཕན་ཚུན་གྱི་འབྲེལ་ལམ་ཡག་པོ་བྱུང་ཐུབ་ཀྱི་མེད་སྐོར་གསུངས་སོང་།

གསར་འགོད་པ། བསོད་ནམས་རྒྱ་མཚོ་དང་སངས་རྒྱས་དཀོན་མཆོག

བསྐྱར་བཅོས།: ༢༠༡༨/༠༩/༠༣

Leave a Reply

3 thoughts on “དམངས་གཙོའི་དུས་དྲན་ཐེངས་ ༥༨ པ་སྲུང་གཙི་གནང་།

  1. གཞུང་པ་ཚེ་དབང་བསོད་ནམས་

    མང་གཙོ་དམངས་གཙོ་དོན་གཅིག་བསམ་མཁན་དང་།
    རང་བཙན་རང་དབང་གང་བསམ་བརྗོད་མཁན་དང་།
    ཡུལ་མིའི་རྒྱལ་ཁབ་ཡུལ་མིའི་སྲིད་སྐྱོངས་སོགས་།
    ཆབ་སྲིད་རིག་པས་གོ་རྟོགས་མ་ཐུབ་ནས་།
    ཐ་སྙད་ཚད་སྒྲུབ་ཡིན་པ་བློ་མ་བདེ་།

  2. གཞུང་པ་ཚེ་དབང་བསོད་ནམས་

    བཙན་བྱོལ་བོད་མིའི་བཅའ་ཁྲིམས་ནང་མང་གཙོ་ལས་གྲལ་རིམ་གྱི་ཐ་སྙད་དམངས་གཙོ་
    གསལ་མེད་ན་འདིར་དམངས་གཙོ་ཟེར་བའི་གྲལ་རིམ་གྱི་ཐ་སྙད་མང་ཙམ་བཀོད་འདུག་
    པ་དགོས་དབང་གང་ལ་ཐུག་ནས་བཀོད་པ་ཡིན་གསལ་བཤད་གནང་རོགས་།