ཨ་རིའི་དོན་གཅོད་འཕོ་འགྱུར་གཏོང་དགོས་དོན་ཀྱི་བཀའ་ཤག་གི་གསལ་བཤད་དོན་ཚན་ ༡༠ ཡི་ཁོངས་ནས་དོན་ཚན་ ༩ རྩོད་ལན་པ་བཀའ་ཤག་ནས་ཁུངས་སྐྱེལ་ཐུབ་མེད་པའི་བཅད་ཁྲ་བཏང་འདུགདེ་རིང་ཉིན་རྒྱབ་ཆུ་ཚོད་ ༢།༣༠ ནས་དགོང་མོའི་ཆུ་ཚོད་ ༧།༣༠ ཡས་མས་བར་བོད་མིའི་ཆེས་མཐོའི་ཁྲིམས་ཞིབ་ཁང་གི་གཏུག་བཤེར་ཁང་དུ། སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་ལེའུ་བརྒྱད་པའི་དོན་ཚན་ ༥༠ པ་གཞིར་བཟུང་། ཁ་མཆུ་ཞུ་སྦྱོར་དེབ་འགོད་ཨང་ ༢༠ པ་མ་ཉེས་ཁག་གཡོགས་ཞིབ་དཔྱོད་ཐད། དང་པོ་གྱོད་གཞིའི་གནས་ལུགས་སྙིང་བསྡུས་དང་། གཉིས་པ་ཐག་གཅོད་བྱེད་གཞིའི་གནད་དོན་ཁག གསུམ་པ་དེ་དག་ལ་བརྟེན་པའི་ཐག་གཅོད། བཞི་པ། ཐག་གཅོད་དེ་དག་གི་རྒྱུ་མཚན་བཅས་འཁོད་པའི་ཟུར་སྣོན་ཡིག་ཆ་བཅས་ཤོག་གྲངས་ ༡༠༢༨ ཅན་གྱི་དེབ་མཐུག་པོ་གཉིས་བཏོན་ནས་མཐའ་མའི་ཐག་གཅོད་ཀྱི་གསལ་བསྒྲགས་གནང་སོང་བ་དང་། བཅད་ཁྲའི་བཀའ་ཁྱབ་ནང་དུ་བཙན་བྱོལ་བོད་མིའི་སྤྱི་ཚོགས་ནང་ཁུལ་མ་མཐུན་པ་ཤུགས་ཆེར་གྱུར་པའི་རྩོད་རྙོག་འདི་ད་ཆ་ཆེས་མཐོའི་ཁྲིམས་ཞིབ་ཁང་ནས་ཁྲིམས་ཡིག་ཁག་གི་དགོངས་དོན་ལྟར་ཐག་གཅོད་ཟིན་པར་བརྟེན། བཅད་ཁྲའི་འབྲུ་དོན་གཞིར་བཟུང་བོད་རིགས་སྤུན་ཟླ་རྣམས་ཆིག་སྒྲིལ་དམ་གཙང་ཡོང་བའི་ཐབས་ཚུལ་ལ་གྱོད་ཡ་ཕྱོགས་གཉིས་ནས་འབད་པ་ལྷུར་ལེན་དགོས་པ་དང་། དེ་རིང་ནས་རྩིས་པའི་ཉིན་གྲངས་ ༣༠ ནང་ཚུན་དུ་བཅད་ཁྲའི་འབྲུ་དོན་ཁག་གྱོད་ཡ་ཕྱོགས་གཉིས་ནས་ཉམས་ལེན་ལག་བསྟར་ཟིན་པ་དགོས་པའི་བཀའ་ཁྱབ་བཏང་གནང་འདུག
ཆེས་མཐོའི་ཁྲིམས་ཞིབ་ཁང་ནས་དངོས་དོན་བརྒྱད་དང་ཁྲིམས་དོན་གཉིས་རེ་རེ་བཞིན་ཐག་གཅོད་གནང་བ་རྣམས་གཞི་རྩར་བཞག་པའི་མཐའ་མའི་བཅད་ཁྲའི་ནང་དུ། བཀའ་ཤག་གི་དོན་གཅོད་འཕོ་འགྱུར་བཏང་བའི་ཐག་གཅོད་གནང་ཕྱོགས་ཀྱི་བརྒྱུད་རིམ་ཁག་སྒྲིག་མཐུན། བྱུང་མེད་པ་ཁྲིམས་དོན་དང་པོའི་སྐབས་སུ་ཐག་གཅོད་བྱས་ཡོད་པ་དང༌། ཐག་གཅོད་དེའི་གཞི་རྩ་འཇོག་ཡུལ་བཀའ་ཤག་གི་གསལ་བཤད་དོན་ཚན་ ༡༠ བཀོད་པ་ནས། ནང་གསེས་དོན་ཚན་ ༡༠ པ་དེ་གནད་དོན་གཏན་འབེབས་ཁོངས་སུ་མེད་པ་དང༌། ཞིབ་གཅོད་སྐབས་སུ་རྩོད་བཤད་ཀྱང་བྱས་མེད་པས། འཕྲོས་དོན་ཚན་ ༩ དངོས་དོན་སོ་སོར་གོང་དུ་ཐག་གཅོད་བྱས་ཡོད་པ་ནས། ཞུ་སྦྱོར་བས་ཁུངས་སྐྱེལ་དགོས་པ་ཁག་ཐུབ་པ་དང༌། རྩོད་ལན་པས་ཁུངས་སྐྱེལ་དགོས་པ་ཁག་མ་ཐུབ་པར་བརྟེན།༡) བཀའ་ཤག་ནས་བྱང་ཨ་རི་དོན་གཅོད་སྤེན་པ་ཚེ་རིང་ལགས་འཕོ་འགྱུར་དང་། དེའི་རྗེས་འབྲེལ་གསལ་བཤད་དོན་ཚན་ ༡༠ གསལ་བསྒྲགས་བྱས་པ་དེ། གནས་ཚུལ་ཡོང་ཁུངས་ངེས་བརྟན་མེད་པ་དང་། ཁ་ཡན་ལ་གོ་ནོར་ཐེབས་དབང་གིས། སྤེན་པ་ཚེ་རིང་གི་ལྷག་བསམ་དང་། འཇོན་ཐང་། བཟང་སྤྱོད་བཅས་པར་མ་ཉེས་ཁག་གཡོགས་ཤོར་བ་དང་། སྤྱི་ཚོགས་ནང་དངོས་བདེན་མ་ཡིན་པའི་གནས་ཚུལ་ཁྱབ་འགྲེམས་སོང་བའི་སྐོར་ཆེས་མཐོའི་ཁྲིམས་ཞིབ་ཁང་ནས་ཐག་གཅོད་བཅད་ཁྲ་ཁྱབ་བསྒྲགས་གནང་འདུག་པར་བརྟེན། བཀའ་ཤག་གིས་སྤེན་པ་ཚེ་རིང་ལ་བཟོད་གསོལ་ཞུ་རྒྱུ་ཡིན་ཞེས་བརྗོད་བྱ་འདི་རང་བཀོད་པའི་དགོངས་སེལ་ཞུ་ཡིག་འདི་ཨིན་བོད་སྐད་ཡིག་གཉིས་ཀའི་ནང་བོད་མིའི་སྒྲིག་འཛུགས་ཀྱི་གཞུང་འབྲེལ་གསར་འགྱུར་བརྒྱུད་ལམ་བོད་མིའི་རང་དབང་དང་། bod.asia, tibet.net, tibetonline.tv བཅས་སུ་འདོན་འགྲེམས་གསལ་བསྒྲགས་བྱས་ཏེ། དེ་དག་གི་ཡིག་ཆ་རྣམས་ཞུ་སྦྱོར་བར་སྤྲོད་ཆེད་ཆེས་མཐོའི་ཁྲིམས་ཞིབ་ཁང་ལ་འབུལ་དགོས།
༢) ༼ ཞུ་སྦྱོར་བས་ཞིབ་གཅོད་སྐབས་སུ། ཁྲིམས་རྩོད་པའི་གླ་ཡོན་མ་གཏོགས་ཞུ་སྦྱོར་བ་དོ་བདག་རང་ཉིད་ལ་གུན་གསབ་དགོས་ཀྱི་ཡོད་ཅེས་རྩ་བ་ནས་ཉིད་ནས་ཞུ་ཡི་ཡོད་པ་མ་རེད་ཅེས་བརྗོད་པ་ལྟར། བཀའ་ཤག་གིས་ཞུ་སྦྱོར་བའི་ཁྲིམས་རྩོད་པའི་གླ་ཡོན་སྤྲོད་དམིགས་ཧིན་སྒོར་དགུ་ཁྲི་བརྒྱད་སྟོང་(༩༨,༠༠༠།༠༠) ཕྱི ལོ་ ༢༠༡༩ ཟླ་ ༡༡ ཚེས་ ༡༥ ནང་ཚུན་ཆེས་མཐོའི་ཁྲིམས་ཞིབ་ཁང་ལ་འབུལ་དགོས།
༣) རྩོད་ལན་པ་བཀའ་ཤག་གི་དགོས་འདུན་ནང་། བོད་མིའི་སྤྱི་ཚོགས་ལྷིང་འཇགས་ཡོང་བ་དང་བོད་མི་ནང་ཁུལ་གྱི་ཆིག་སྒྲིལ་ལ་དོ་ཕོག་མི་ཡོང་བ་གཙོར་བཟུང་ཞེས་གསལ་བ་ལྟར། བཙན་བྱོལ་བོད་མིའི་སྤྱི་ཚོགས་ནང་ཁུལ་མ་མཐུན་པ་ཤུགས་ཆེར་གྱུར་པའི་རྩོད་རྙོག་འདི་ད་ཆ་ཆེས་མཐོའི་ཁྲིམས་ཞིབ་ཁང་ནས་ཁྲིམས་ཡིག་ཁག་གི་དགོངས་དོན་ལྟར་ཐག་གཅོད་ཟིན་པར་བརྟེན། བཅད་ཁྲའི་འབྲུ་དོན་གཞིར་བཟུང་། སོ་སོར་འཁྲི་བབས་ཀྱི་ཉམས་ལེན་ཞུ་སྒོ་འཚེམས་མེད་དགོས་ཤིང༌། བོད་བསྟན་སྲིད་མི་རིགས་ཀྱི་ཛ་དྲག་གནས་སྟངས་ལ་བསམ་གཞིགས་ཀྱིས། བོད་རིགས་སྤུན་ཟླ་རྣམས་ཆིག་སྒྲིལ་དམ་གཙང་ཡོང་བའི་ཐབས་ཚུལ་ལ་གྱོད་ཡ་ཕྱོགས་གཉིས་ནས་འབད་པ་ལྷུར་ལེན་དགོས་པ་བཅས་ཀྱི་བཅད་ཁྲར། ཞེས་བཀོད་འདུག
ཡང་ཁྲིམས་ཞིབ་ཁང་གི་བཀའ་ཁྱབ་ནང་དུ། ཁ་མཆུ་འདི་དང་འབྲེལ་བའི་ལབ་གླེང་མང་དག་ཅིག་གྱོད་ཡ་ཕྱོགས་གཉིས་ཀ་ནས་གཞུང་འབྲེལ་ལས་དོན་བཀོད་མངགས་དང་སྙན་གསན་ཁག་ངག་ཐོག་ནས་བྱས་ཏེ་གོ་བརྡ་འཕྲོད་མ་འཕྲོད་དབང་གིས་བྱུང་འདུག་ཅིང༌། དེ་ནི་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་པ་རྣམས་ཀྱི་བླང་དོར་དང་། ཐོབ་ཐང་གི་སྒྲིག་གཞི་དོན་ཚན་ ༢ ནང་གསེས་ ང༽ ནང་། ལས་དོན་གལ་ཆེའི་རིགས་ཐག་གཅོད་བྱ་སྒོ་རྣམས་ཡིག་ཐོག་དགོས་པ་དང་། ངག་ཐོག་མ་ཡིན་པ་གཙོ་འདོན་བྱ་དགོས་ཤིང་། གལ་ཏེ་ངག་ཐོག་ཐག་གཅོད་མི་བྱ་མཐུ་མེད་བྱུང་ཚེ། འཕྲལ་མར་ཡིག་འཇོག་ཐུབ་པ་བྱ་དགོས་ཞེས་པའི་འབྲུ་དོན་ཉམས་ལེན་ལག་བསྟར་ཚུལ་བཞིན་མ་བྱས་པའི་ཉེར་ལེན་གྱིས་ཡིན་འདུག་པས། འཛིན་སྐྱོང་ནས་སླད་མར་སྒྲིག་གཞི་འདིའི་ཞུ་སྒོར་ཐུགས་སྣང་གཟབ་ནན་དགོས་གལ། ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་དོན་ཚན་ ༡༩ (༡) ཆ་རྐྱེན་འོག་ལས་བྱེད་མ་ཡིན་པ་ཞིག་དོན་གཅོད་དུ་བསྐོ་གཞག་བྱས་པ་ཞིག་གི་ཆེད་འགྲོ་ལུགས་འགྲོ་སྟངས་ཟུར་དུ་གཏན་འབེབས་མ་བྱུང་བར། ལས་བྱེད་དེས་འདེམས་ལྷན་སྒྲིག་གཞི་དང་ལས་བྱེད་བླང་དོར་སྒྲིག་གཞི་ཁྱབ་སྲུང་དགོས་པ་དང༌། ཕྱོགས་མཚུངས་བསྐོ་གཞག་བྱེད་པོ་ནས་ཀྱང་ཁྱབ་སྲུང་དགོས་པ་བསྙོན་མེད་ཡིན། ཕུགས་སུ་ལས་བྱེད་མ་ཡིན་པ་ཞིག་དོན་གཅོད་དུ་བསྐོ་གཞག་གི་འོས་ཆོས་དང་། མཐུན་རྐྱེན། ཐོབ་ཐང་། འཕོ་འགྱུར་གཏོང་ཕྱོགས་བཅས་སྒྲིག་གཞི་ཁག་གི་ནང་གསལ་གཏོད་ཐུབ་པའི་འབད་བརྩོན་གནང་གལ་དང༌། མ་བྱུང་ཚེ། དེ་དག་དང་འབྲེལ་བའི་བྱ་ལམ་བྱེད་བདེའི་རྩ་འཛིན་ལམ་སྟོན་ཞིག་འཛིན་སྐྱོང་བཀའ་ཤག་ནས་ཐུགས་འགན་བཞེས་ཏེ་བཟོ་དགོས། ཞེས་བཀོད་འདུག
བཅད་ཁྲ་གསལ་བསྒྲགས་གྲུབ་རྗེས་ཞུ་སྦྱོར་བའི་ཁྲིམས་རྩོད་པ་རྣམ་རྒྱལ་ཚེ་སྐྱིད་ལགས་ཀྱིས་གསར་འགོད་པར། མ་ཉེས་ཁག་གཡོགས་ཀྱི་ཁ་མཆུ་ཨང་ ༢༠ པ་དེ་ཞུ་སྦྱོར་བར་རྒྱལ་ཁ་ཐོབ་བྱུང་། ཁ་མཆུ་འདི་དགའ་དྲག་པའི་ཐོག་ནས་ཞུ་གཏུག་བྱས་པ་ཞིག་མིན་པར་འུ་ཐུག་ནས་དྲང་བདེན་གྱི་ཆེད་དུ་ཞུ་གཏུག་བྱས་པ་ཞིག་ཡིན་པ་དང་། དེ་རིང་རྒྱལ་ཁ་འདི་ནི་དམངས་གཙོ་དང་། ཁྲིམས་ཀྱི་དབང་བསྒྱུར། དྲང་བདེན་བཅས་ཀྱི་རྒྱལ་ཁ་ཞིག་རེད། ཅེས་དང་། ཆེས་མཐོའི་ཁྲིམས་ཞིབ་ཁང་གི་ཐག་གཅོད་དེ་མཐའ་མའི་ཐག་གཅོད་ཅིག་དང་གོང་ན་མེད་པ་ཞིག་ཡིན་སྐོར་བརྗོད་སོང་།
དེའི་རྗེས་དོན་གཅོད་སྤེན་པ་ཚེ་རིང་ལགས་ཀྱིས། གཙོ་བོ་དེ་རིང་ནས་ཁྲིམས་ཀྱི་གནས་ཚུལ་དེ་ཚར་སོང་བ་དང་། ལོ་གཅིག་དང་ཕྱེད་ཀ་ལྷག་ཅིག་འགོར་སོང་བ་དང་དུས་ཡུན་དེའི་རིང་དཀའ་ལས་བརྒྱབས་པའི་འབྲས་བུ་ཐོན་ཡོད་པ་རེད། བཀའ་ཤག་ངོས་ནས་དོན་ཚན་ ༡༠ སྐྱོན་བརྗོད་བྱས་ཡོད་ན་ཡང་། དོན་ཚན་གཅིག་ཙམ་ཞིག་མ་གཏོགས་དོན་ཚན་ ༩ ཆ་ཚང་ཞིག་ཁུངས་སྐྱེལ་བྱེད་ཐུབ་མེད་པ་དང་། དཔེར་ན་ད་ལྟའི་དོན་ཚན་ ༡༠ དེར་ནང་གསེས་དབྱེ་བ་ཕྱེས་པ་ཡིན་ན་ཁ་ཤས་ལ་གཅིག་དང་ཁ་ཤས་ལ་གཉིས་གསུམ་བཅས་ཡོད་པ་དང་། ཁྱོན་བསྡོམས་ནང་གསེས་ཕྱེས་པ་ཡིན་ན་ ༡༩ ཡོད་པ་དང་། དེའི་ནང་ནས་ཞུ་སྦྱོར་བས་ཁུངས་སྐྱེལ་དགོས་པ་དོན་ཚན་ ༥ དང་བཀའ་ཤག་ངོས་ནས་ཁུངས་སྐྱེལ་དགོས་པ་དོན་ཚན་ ༡༤ ཆགས་ཡོད་ན་ཡང་། བཀའ་ཤག་ངོས་ནས་ཁུངས་སྐྱེལ་དགོས་པ་གཅིག་ལ་ཡང་ཁུངས་སྐྱེལ་ཐུབ་ཡོད་པ་མ་རེད། ང་ཚོའི་ངོས་ནས་ཁུངས་སྐྱེལ་དགོས་པ་ཚང་མ་བསྐྱལ་ནས་དེ་རིང་རྒྱལ་ཁ་ཞིག་ཐོབ་ཡོད་པ་རེད། ཅེས་གསུངས་སོང་།
ཁྲིམས་ཀྱི་རྒྱལ་ཁ་དང་འབྲེལ་ནས་སྤྱི་ཚོགས་ནང་རྙོག་ཟིང་མི་ཡོང་རྒྱུ་གལ་ཆེན་པོ་ཡིན་པའི་སྐོར་ལ་ཁོང་གིས། ནམ་རྒྱུན་ཡིན་ན་རྒྱལ་ཁ་དང་གནས་སྟངས་དེ་འདྲ་བྱུང་བའི་སྐབས་སུ་དགའ་ཚོར་འདྲ་བོ་བྱུང་རྒྱུ་ཡོད་ན་ཡང་། དེ་རིང་ཁ་གཏད་དེ་བཀའ་ཤག་ཡིན་པ་དང་བོད་མིའི་སྒྲིག་འཛུགས་ཀྱི་མིང་ཐོག་ནས་ཕམ་ཉེས་བྱུང་བ་དེ་ལ་དགའ་ཚོར་བྱུང་དགོས་པའི་གནས་སྟངས་རྩ་བ་ནས་ཆགས་ཀྱི་མི་འདུག་ལ། ཐེངས་འདིར་ཁྲིམས་ཁང་ལ་དགའ་དྲགས་པའི་ངང་ནས་སོང་བཞག་པ་ཞིག་རྩ་བ་ཉིད་ནས་མིན་པ་དང་། ཁྲིམས་ཞིབ་ཁང་ནས་ཡིག་ཆ་དང་དཔང་རྟགས་རྩོད་པ་སོགས་ཚང་མ་གཞི་ལ་བཞག་ནས་ཐག་གཅོད་རྒྱས་ཤིང་རྒྱས་པ་ཞིག་གནང་ཡོད་པ་དང་། ཁྲིམས་ཞིབ་ཁང་ནས་ནོར་འཁྲུལ་སུས་ཤོར་བ་དེ་གསལ་བོ་ཆགས་ཚར་ཡོད་དུས། མང་ཚོགས་ཀྱིས་གནད་དོན་དེ་ཤེས་རྒྱུ་གལ་ཆེན་པོ་ཡིན་པ་ལས། དེ་ལ་འཁོན་འཛིན་གྱིས་སྤྱི་ཚོགས་ནང་བརྡབ་གསིག་མི་ཡོང་རྒྱུ་གལ་ཆེན་པོ་ཡིན་སྐོར་གསུངས་སོང་།ཁྲིམས་ཞིབ་ཁང་གི་གསར་འགོད་གསལ་བསྒྲགས་གྲོལ་རྗེས་འཛིན་སྐྱོང་བཀའ་ཤག་ནས་གསར་འགོད་ལྷན་ཚོགས་ཤིག་བསྐོངས་ཏེ། ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ནས་ཁྲིམས་ཞིབ་ཁང་གི་ཁྲིམས་ཀྱི་རིམ་པ་ཆ་ཚང་དེ་རིང་ནས་འགྲོ་ཚར་ཡོད་པ་དང་། བཀའ་ཤག་ངོས་ནས་ཐག་གཅོད་དེ་ཚོ་ལས་རྒྱུ་འབྲས་དང་ལྡན་པར་ཡོང་རྒྱུའི་རེ་བ་གནང་བ་གཞིར་བཟུང་ཕལ་ཆེར་བྱུང་མེད་ཀྱང་། ཁྲིམས་ཞིབ་ཁང་ནས་ཐག་གཅོད་གནང་ཚར་བ་ཞིག་ཡིན་དུས། དེར་བསྐྱར་དུ་གོང་ཞུ་བྱ་རྒྱུ་དེ་འདྲའི་བརྒྱུད་རིམ་ཧ་ལམ་མེད་པའི་བཟོ་ལྟ་བུ་ཡིན་སྐོར་དང་། ད་ལྟའི་ཆར་ཤེས་རིག་དང་ནང་སྲིད་བཀའ་བློན་མ་གཏོགས་བཀའ་བློན་མང་ཆེ་བ་དྷ་སར་བཞུགས་མེད་པ་དང་། བར་ལམ་ནས་ཁྲིམས་ཞིབ་ཀྱི་ཐག་གཅོད་ག་དུས་བྱས་པ་ཡིན་ན་ཡང་སྲིད་སྐྱོང་ས་གནས་ལ་བཞུགས་ཀྱི་མེད་པའི་བཀའ་མོལ་ཞིག་ཡོང་གི་ཡོད་ཀྱང་། སྤྱིའི་ལས་ཀ་གལ་ཆེ་ཆུང་ལ་གཟིགས་ནས་ཕེབས་པ་ཞིག་ནས་ཆེས་མཐོའི་ཁྲིམས་ཞིབ་ཁང་ལ་རྩིས་མེད་བཏང་བ་ཞིག་མིན་སྐོར་དང་། བཀའ་ཤག་ལྷན་རྒྱས་འཛོམས་པའི་སྐབས་སུ་ཆེས་མཐོའི་ཁྲིམས་ཞིབ་ཁང་གི་མཐའ་མའི་ཐག་གཅོད་དེ་གང་འདྲ་བྱུང་མིན་བཀའ་བསྡུར་གནང་བ་བརྒྱུད། རིམ་པས་བཀའ་ཤག་གི་ལངས་ཕྱོགས་གང་ཡིན་མིན་གསལ་པོ་ཆགས་རྒྱུ་ཡིན་སྐོར་དང་། ཁྲིམས་ཁང་གི་ཐག་གཅོད་ཀྱི་ལེའུ་དེ་གྲུབ་ཚར་ཡོད་པ་ལྟར་། ཚང་མས་སྤྱི་ཚོགས་ནང་ལ་ཕུ་དཀྲུག་མདའ་དཀྲུག་དང་ཟ་ང་ཟིང་ངེ་རྩ་བ་ཉིད་ནས་མེད་པར་ལྷིང་འཇགས་ཐོག་ལ་གནས་རྒྱུར་དགོངས་པ་བཞེས་དགོས་སྐོར་གསུངས་སོང་།
གསར་འགོད་ལྷན་ཚོགས་ཐོག་བཀའ་ཤག་གི་ཁྲིམས་རྩོད་པ་བློ་བཟང་གྲགས་པ་ལགས་ཀྱིས། རང་ཉིད་ཁྲིམས་རྩོད་པ་ཞིག་ཡིན་པའི་ཆ་ནས་ད་ཐེངས་ཀྱི་ཁ་མཆུའི་ཐག་གཅོད་དེ་དྲང་བདེན་དང་། རྒྱུ་འབྲས་དཔང་ལ་བཙུགས་ཏེ་དངོས་ཡོད་ཀྱི་གནས་ཚུལ་གཞིར་བཞག་ཐོག་ནས་ཐག་གཅོད་བྱས་པ་ཞིག་རེད་རྩ་བ་ནས་དྲན་གྱི་མེད་སྐོར་དང་། ད་ལྟའི་གནད་དོན་དེ་ནི་དོན་གཅོད་འཕོ་འགྱུར་བཏང་བ་ནས་མགོ་བཙུགས་པ་ཞིག་ཡིན་པ་དང་། ཁྲིམས་ཁང་གི་ཐོག་མའི་ཉན་ཞིབ་སྐབས་སུ་ཡང་དོན་གཅོད་འཕོ་འགྱུར་གཏོང་ཕྱོགས་དེ་ཁྲིམས་དང་ལམ་ལུགས་དང་མཐུན་ཡོད་པ་ཐག་བཅད་ཡོད་ཀྱང་། དེ་རིང་གི་བཅད་ཁྲའི་ནང་དེ་འགྲིག་མེད་པ་ལྟ་བུ་འཁོད་ཡོད་སྐོར་དང་། དེ་རིང་བཀའ་མོལ་ག་རེ་གནང་ཡང་རང་ཉིད་ཁྲིམས་རྩོད་པ་ཞིག་གི་ངོ་བོའི་ཐོག་ནས་བརྗོད་ཀྱི་ཡོད་པ་དང་། ད་ལན་གྱི་ཁ་མཆུའི་ཐག་གཅོད་དེ་མི་གཅིག་གི་མེ་མདའ་འཕྲོག རྐང་པ་བཅད། ལག་པ་གཏུབས་ནས་དམག་སར་བཏང་བ་དང་ཁྱད་པར་མེད་པ་ལྟ་བུ་ཚོར་ཡོད་སྐོར་བརྗོད་སོང་།
བཅད་ཁྲ་ཞིབ་ཕྲ་ཁྲིམས་ཞིབ་ཁང་གི་དྲ་བར་གཟིགས།
གསར་འགོད་པ། པ་སངས་ཚེ་རིང་། སངས་རྒྱས་དཀོན་མཆོག