ཨ་ཉ་སེང་སྒྲས་ལོ་བདུན་གྱི་ཁྲིམས་ཆད་དྭང་ལེན་གནང་མི་འདུག

མགོ་ལོག་དགའ་བདེ་རྫོང་འབྲིང་རིམ་ཁྲིམས་ཁང་གིས་སྤྱི་ཚོགས་ལ་དཀྲུག་རྐྱེན་བསླངས་བ་སོགས་ཀྱི་ཉེས་མིང་འོག་ལྐོག་ཟ་རུལ་སུངས་ཐེར་འདོན་པ་ཨ་ཉ་སེང་སྒྲ་ལགས་སུ་ལོ་བདུན་གྱི་ཁྲིམས་ཐག་བཅད་འདུག

ཁ་སང་ཉིན་རྒྱབ་ཏུ་མགོ་ལོག་དགའ་བདེ་རྫོང་འབྲིང་རིམ་ཁྲིམས་ཁང་གིས། ལྐོག་ཟ་རུལ་སུངས་ཐེར་འདོན་པ་དང་འབྲོག་མིའི་ཐོབ་ཐང་རྩོད་ལེན་པ་ཨ་ཉ་སེང་སྒྲ་ལགས་སུ་ཁྲིམས་བཤེར་བཅད་ཁྲ་བཏང་ཡོད་པ་ལྟར། ཨ་ཉ་སེང་སྒྲ་ལགས་སྒེར་གྱི་ཁྲིམས་རྩོད་པ་ལིན་ཆི་ལི་ལགས་ཀྱིས་རང་གི་ཊི་ཝི་ཊར་སྤྱི་ཚོགས་དྲ་ལམ་དུ་ཨ་ཉ་སེང་སྒྲའི་སྐོར་གྱི་གནས་ཚུལ་ཐུང་ཐུང་སྤེལ་བ་ལྟར་ན། ཨ་ཉ་སེང་སྒྲ་ལགས་གཙོ་བོར་གྱུར་བའི་མི་ ༨ ལ་ཉིན་གྲངས་གཉིས་རིང་ཁྲིམས་བཤེར་བྱས་པ་བརྒྱུད།  དཀྲུག་རྐྱེན་བསླངས་བ་དང་སྤྱི་ཚོགས་སྒྲིག་གཞིར་གཏོར་བཤིག་གཏོང་བའི་འདུ་འཛོམས་བྱས་པ་སོགས་ཀྱི་ཉེས་མིང་འོག ཨ་ཉ་སེང་སྒྲ་ལགས་སུ་ལོ་ ༧ བཙོན་འཇུག་ཁྲིམས་ཆད་ཡོད་པ་དང་། ཨ་ཉ་སེང་སྒྲ་ལགས་ནས་མ་ཉེས་ཁག་གཡོག་བྱས་པའི་ཁྲིམས་ཆད་དེ་དྭང་ལེན་གནང་གི་མེད་པས་བསྐྱར་དུ་ཞུ་གཏུག་གནང་རྒྱུ་ཡིན་སྐོར་བརྗོད་འདུག ད་ལན་ཨ་ཉ་སེང་སྒྲ་ལགས་ཀྱི་ལྷན་དུ་ཁྲིམས་བཤེར་བྱས་པའི་མི་བདུན་དེའི་སྐོར་གང་ཡང་གསལ་མི་འདུག

ཉེ་སྔོན་ཕྱི་ཟླ་ ༡༡ ཚེས་༡༩ ཉིན་ཁྲིམས་རྩོད་པ་ལིན་ཆི་ལི་ཡིས་སྒེར་གྱི་ཊི་ཝི་ཊར་ཐོག འདི་ལོའི་ཕྱི་ཟླ་ ༡༠ ཚེས་ ༡༥ ནས་ཉིན་གྲངས་ ༣ དང་ཕྱེད་རིང་དགའ་བདེ་རྫོང་ཉེན་རྟོག་ཁང་གིས་ཁྲིམས་བཤེར་གྲ་སྒྲིག་གི་ཚོགས་འདུ་བསྡུས་ཡོད་པ་དང་། ཕྱི་ཟླ་ ༡༡ ཚེས་ ༡༨ ཉིན་དགའ་བདེ་རྫོང་ཉེན་རྟོག་ཁང་གི་གྱོད་དོན་ལག་བསྟར་བ་རྡོ་རྗེ་ཚེ་རིང་ཟེར་བ་དེས་ཁོང་ལ་ཁ་པར་ཡོང་སྟེ། ཨ་ཉ་སེང་སྒྲའི་གྱོད་དོན་དང་འབྲེལ་བའི་གནས་ཚུལ་ཞིབ་ཕྲ་ཐོ་འགོད་དགོས་སྐོར་བརྗོད་ཡོད་ཀྱང་ཁོང་གིས་དྭང་ལེན་གནང་མེད་སྐོར་དང་། ཕྱིས་སུ་ཡང་བསྐྱར་མི་དེས་ཁ་པར་ཡོང་སྟེ། དེ་སྔོན་ཨ་ཉ་སེང་སྒྲ་ཡིས་གནས་ཚུལ་རྫུན་བཟོ་བྱས་ཡོད་པའི་དོགས་གཞི་དེ། ཉེས་དོན་ཞིབ་བཤེར་ཁང་གིས་ཁྲིམས་ཁང་ལ་ཡར་ཞུ་བྱས་མེད་སྟབས། གནད་དོན་དེར་རྒྱུས་ལོན་དགོས་སྐོར་བརྗོད་ཡོད་ཀྱང་ཁོང་གིས་དྭང་ལེན་གནང་མེད་སྐོར་དང་། ཁྲིམས་བཤེར་གྲ་སྒྲིག་གི་ཚོགས་འདུའི་ཐོག་ཏུ་མི་བཅུ་ཡོད་ཀྱང་། དེའི་ཁྲོད་ནས་ཁྲིམས་རྩོད་པ་ཁོང་དང་ཨ་ཉ་སེང་སྒྲ་གཅིག་པུས་ཉེས་འཛུགས་དྭང་ལེན་གནང་མེད་ལ། ཁོང་གཉིས་ཀྱི་ངོས་ནས་གནས་ཚུལ་རྫུན་བཟོ་བྱས་པའི་ནག་ཉེས་ཡོད་པ་ཞིག་ལ་གཏན་ནས་ངོས་འཛིན་བྱེད་ཀྱི་མེད་སྐོར་བརྗོད་འདུག

ཕྱི་ལོ་ ༢༠༡༨ ་ཟླ་ ༩ ཚེས་ ༤ ཉིན་གྱི་ཕྱི་དྲོར་མགོ་ལོག་དགའ་བདེ་རྫོང་ཉེན་རྟོག་ཁང་གིས། ཨ་ཉ་སེང་སྒྲ་ལགས་འཛིན་བཟུང་བྱས་ཏེ་ཟི་ལིང་གི་གྲོ་ཚང་བཀག་ཉར་ཁང་དུ་བཅུག་ཡོད་པ་དང་། ལོ་དེའི་ཕྱི་ཟླ་ ༩ ཚེས་ ༡༢ དང་། ཟླ་ ༡༠ ཚེས་ ༢༡ བཅས་སྔ་གཞུག་ཏུ་ཁོང་གི་བཟའ་ཟླ་དང་གཉེན་ཉེ། ཁྲིམས་རྩོད་པ་བཅས་དགའ་བདེ་རྫོང་ཉེན་རྟོག་ཁང་དུ་ཁོང་ལ་ཐུག་པར་ཕྱིན་ཡོད་ཀྱང་།  ཉེན་རྟོག་པས་ཐུག་ཏུ་བཅུག་མེད་པ་དང་།  ཕྱིས་སུ་ཁོང་གི་ཁྲིམས་རྩོད་པས་ཐུག་འཕྲད་བྱེད་སྐབས་ཨ་ཉ་སེང་སྒྲའི་གཟུགས་པོའི་གནང་སྟངས་ཧ་ཅང་སྐྱོ་བོ་ཆགས་ཡོད་སྐོར་བརྗོད་ཡོད་པ་དང་། ལོ་དེའི་ཕྱི་ཟླ་ ༩ པའི་ནང་མགོ་ལོག་རྐྱང་ཆད་ཡུལ་ཚོའི་ས་གནས་མི་མང་རྣམས་ཀྱིས། རྒྱ་ནག་གི་ཁྲིམས་འཛིན་ལས་ཁུངས་དང་དེ་འབྲེལ་གྱི་མགོ་འཁྲིད་རྣམས་ལ་ཨ་ཉ་སེང་སྒྲ་ལགས་ཀྱིས་མི་མང་གིས་ཚབ་བྱས་ཏེ། གཞུང་ནས་སྡོད་ཁང་གི་དངུལ་སྒོར་སོགས་རྩིས་སྤྲོད་བྱེད་དགོས་པ་རེ་ཞུ་བྱས་པ་ཙམ་ཡིན་པས། ཁོང་ལ་མནར་གཅོད་དང་གཅར་རྡུང་སོགས་མེད་པར་མྱུར་ཏུ་ཀློད་གློལ་གཏོང་དགོས་པའི་ཞུ་ཡིག་ཅིག་ཕུལ་ཡོད་པ་རེད།

སྐབས་དེར་ཨ་ཉ་སེང་སྒྲའི་བཟའ་ཟླ་གཡང་སྐྱིད་ལགས་ཀྱིས། ཁོང་འཛིན་བཟུང་བཀག་ཉར་བྱས་པའི་རྒྱུ་མཚན་ནི། ཁོང་གིས་མཚོ་སྔོན་ཞིང་ཆེན་མགོ་ལོག་ཁུལ་ཞིབ་དཔྱོད་ཁང་དང་པེ་ཅིན་གྲོང་ཁྱེར་གྱི་འབྲེལ་ཡོད་ཁྲིམས་ཁང་ཁག་ལ། ས་གནས་སྲིད་གཞུང་གིས་སྐྱོབ་གསོ་རོགས་དངུལ་ལྐོག་ཟ་གསུག་ལེན་བྱས་ཏེ། འབྲོག་པ་མང་ཚོགས་ཕྱུག་འགྱུར་ལས་ལྡོག་སྟེ་རིམ་ཁག་མགོ་ཁྲིད་ཚོ་ཕྱུག་པོ་ཆགས་པ་དང་། འབྲོག་པ་མང་ཚོགས་ཀྱི་འཚོ་གནས་ལ་ཡར་རྒྱས་ཀྱི་འགྱུར་ལྡོག་གང་ཡང་མེད་པར་སྔར་བཞིན་དབུལ་ཕོངས་དཀའ་སྡུག་གི་གནས་སྟངས་བཅས་ལ་སྐྱོན་བརྗོད་བྱས་ཡོད་པ་དང་། ས་གནས་མགོ་འཁྲིད་ཀྱི་ལྐོག་ཟ་གསུག་ལེན་ཐེར་འདོན་དང་། མི་མང་ ༢༠༠ ལྷག་གི་སྣེ་འཁྲིད་དེ་འབྲེལ་ཡོད་ལས་ཁུངས་ལ་ཞུ་གཏུག་བྱས་པར་བརྟེན། དགའ་བདེ་རྫོང་ཉེན་རྟོག་པས་དཀྲུག་རྐྱེན་བཟོས་པའི་ཉེས་མིང་གཡོགས་ཡོད་སྐོར་བརྗོད་འདུགའདས་ལོའི་ཕྱི་ཟླ་ ༡༡ ཚེས་ ༡༢ ཉིན་དགའ་བདེ་རྫོང་ཉེན་རྟོག་ཁང་གིས་བརྡ་ཡིག་ཅིག་བཏང་བའི་ནང་། ཨ་ཉ་སེང་སྒྲས་སྤྱི་ཚོགས་ནང་དཀྲུག་རྐྱེན་བསླངས་པའི་ཉེས་དོན་ཐག་གཅོད་བྱེད་བཞིན་ཡོད་ལུགས་དང་། དོགས་ཡོད་ཉེས་ཅན་ལ་ད་དུང་ཉེས་པ་ཆེན་པོ་གཞན་ཡོད་སྲིད་པས། ཉེས་དོན་ཞུ་གཏུག་གི་བཅའ་ཁྲིམས་དོན་ཚན་ ༡༦༠ ཡི་གཏན་འབེབ་ལྟར། དགའ་བདེ་རྫོང་ཉེན་རྟོག་ཁང་ནས་ཆོག་མཆན་སྤྲད་པ་བརྒྱུད། ཨ་ཉ་སེང་སྒྲ་འདས་ལོའི་ཕྱི་ཟླ་ ༡༡ ཚེས་ ༡༢ ཉིན་ནས་ཕྱི་ལོ་ ༢༠༡༩ ཟླ་ ༡ ཚེས་ ༡༢ ཉིན་བར་བཀག་ཉར་བྱ་རྒྱུ་ཡིན་ལུགས་བརྗོད་ཡོད་པ་རེད།མགོ་ལོག་དགའ་བདེ་རྫོང་རྐྱང་ཆད་ཡུལ་ཚོ་ནས་ཡིན་པའི་ཨ་ཉ་སེང་སྒྲ་ལགས་ལ་རྒྱ་ནག་གཞུང་གིས་ཉེས་འགེལ་གྱིས་འཛིན་བཟུང་བྱས་པ་ཐེངས་གཅིག་ཙམ་མིན་པར། ཕྱི་ལོ་ ༢༠༡༤ ལོར་ཁོང་ས་གནས་སྲིད་གཞུང་གི་མགོ་འཁྲིད་དུ་འོས་འདེམས་བྱུང་ཡོད་ཀྱང་། རྒྱ་ནག་གཞུང་གིས་སེང་སྒྲ་ལགས་དེ་སྔ་ཁྲིམས་དང་འགལ་བའི་ལས་ཀ་བྱས་ཡོད་ལུགས་སོགས་བཤད་དེ་རྩིས་མེད་བཏང་ཡོད་པ་མ་ཟད། ཕྱི་ལོ་༢༠༡༤ ཟླ་ ༡༢ ཚེས་ ༡༤ ཉིན་འཛིན་བཟུང་བྱས་ཏེ། ལོ་གཅིག་དང་ཟླ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་འདུག

གསར་འགོད་པ། པ་སངས་ཚེ་རིང་།

བསྐྱར་བཅོས།: ༢༠༡༩/༡༢/༠༧

Leave a Reply