ཆེས་མཐོའི་ཁྲིམས་ཞིབ་ཁང་གིས་ཆད་འགེལ་བཀའ་ཁྱབ་བཏང་།

བཀའ་ཤག་གི་ཁྲིམས་རྩོད་པ་བློ་བཟང་གྲགས་པ་ཉན་ཞིབ་སྔ་རྗེས་གཉི་གར་མ་བསླེབས་པར་བརྟེན་ཁྲིམས་རྩོད་པའི་ལག་ཁྱེར་ནུས་མེད་དུ་བཏང་བ་སོགས་ཀྱི་ཆད་འགེལ་བཀའ་ཁྱབ་བཏང་འདུག

དེ་རིང་སྔ་དྲོའི་ཆུ་ཚོད་ ༡༠: ༣༠ སྟེང་། ཁ་མཆུ་ཨང་ ༢༠ པའི་རྩོད་ལན་པ་བཀའ་ཤག་གི་ཁྲིམས་རྩོད་པ་བློ་བཟང་གྲགས་པས་ཁྲིམས་ཞིབ་ཁང་ལ་ཁྱད་གསོད་བྱས་པའི་བཅོས་གསོའི་ཆད་པ་འགེལ་མ་དགོས་པའི་རྒྱུ་མཚན་བརྗོད་རྒྱུའི་ཉན་ཞིབ་ཚོགས་གཏན་འཁེལ་ཡོད་ཀྱང་། རྩོད་ལན་པའི་ཁྲིམས་རྩོད་པ་ཉན་ཞིབ་ཐོག་བསླེབས་མེད་པར་བརྟེན། དེ་རིང་ཉིན་རྒྱབ་ཆུ་ཚོད་ ༢ སྟེང་ཆེས་མཐོའི་ཁྲིམས་ཞིབ་ཁང་ནས་ཆད་འགེལ་བཀའ་ཁྱབ་ཅིག་བཏང་སྟེ། བློ་བཟང་གྲགས་པའི་ཁྲིམས་རྩོད་པའི་ལག་ཁྱེར་ནུས་མེད་དུ་བཏང་སྟེ། ད་ནས་བཟུང་བཙན་བྱོལ་བོད་མིའི་ཁྲིམས་ཞིབ་ཁང་གང་དུའང་ཁྲིམས་རྩོད་པའི་ལས་འགན་ལེན་མི་ཆོག་པའི་ཆད་འགེལ་ཐག་གཅོད་དང་བཅོས་གསོའི་ཆད་འགེལ་བཀའ་ཁྱབ་གཉིས་བཅས་བཏང་འདུག

ཆེས་མཐོའི་ཁྲིམས་ཞིབ་ཁང་གིས་ཁྲིམས་རྩོད་པ་བློ་བཟང་གྲགས་པས་ཁྲིམས་ཞིབ་ཁང་ལ་ཁྱད་གསོད་ཇི་ལྟར་བྱས་པ་སོགས་ཀྱི་ཡིག་ཆ་ཁག་མཉམ་སྦྱར་གྱིས་བསྒྲགས་པའི་བཀའ་ཁྱབ་ནང་། ཕྱི་ལོ་ ༢༠༡༩ ཟླ་ ༡༢ ཚེས་ ༧ ཉིན། ཆེས་མཐོའི་ཁྲིམས་ཞིབ་ཁང་ནས་བློ་བཟང་གྲགས་པར་བརྡ་ཐོ་གཉིས་པ་བཏང་སྟེ། ཁྲིམས་ཞིབ་ཁང་གི་བརྡ་ཐོར་བརྩི་བཀུར་མ་ཞུས་པའི་རྒྱུ་མཚན་ཆབས་ཅིག་ཕྱི་ལོ་ ༢༠༡༩ ཟླ་ ༡༢ ཚེས་ ༩ ཉིན་སྔ་དྲོའི་ཆུ་ཚོད་ ༡༠:༣༠ སྟེང་ཉན་ཞིབ་བྱེད་གཏན་འཁེལ་བའི་སྐོར་ཆེས་མཐོའི་ཁྲིམས་ཞིབ་ཁང་གི་དྲུང་གཞོན་དང་དྲུང་ལས་གཉིས་ཆེད་བརྫངས་ཀྱིས། ཕྱི་དྲོའི་ཆུ་ཚོད་ ༣་༤༥ སྟེང་དོ་བདག་ངོ་མར་བརྡ་ཐོ་གདོང་སྤྲད་ཀྱིས་འབྱོར་ལན་མིང་རྟགས་བླངས་ཡོད་ཀྱང་། བློ་བཟང་གྲགས་པ་གོང་གསལ་དུས་བཀག་ལྟར་ཁྲིམས་ཞིབ་ཁང་དུ་ངོ་བཅར་བྱས་མེད། ཅེས་བཀོད་འདུག

ཡང་བཀའ་ཁྱབ་ནང་། ཁ་མཆུ་ཨང་ ༢༠ པའི་རྩོད་ལན་པའི་ཁྲིམས་རྩོད་པ་བློ་བཟང་གྲགས་པས་གནས་དུས་ཚོད་རྩིས་ཀྱིས། ཆེས་མཐོའི་ཁྲིམས་ཞིབ་ཁང་ནས་ཁ་མཆུ་འདིའི་བྱ་རིམ་ལག་བསྟར་སྐབས་སུ། རྩོད་ལན་པའི་ངོས་ནས་ཁྲིམས་ཞིབ་ཁང་ལ་ཁྱད་གསོད་ཆགས་གཞིའི་བྱེད་སྟངས་མང་དག་ཅིག་ལ་བློ་དཀྱེལ་ཡངས་པོའི་ཐོག་ནས་བཟོད་བསྲན་གུ་བཤངས་དང༌། ལས་དང་པོ་བ་ལག་ཁྲིད་ལྟར་ཁྲིམས་ཡིག་གི་བྱ་རིམ་ཁག་ངང་རིང་གིས་ལམ་སྟོན་གསེད་བཀྲོལ་རིམ་བསྟུད་གནང་རིགས་བཅད་ཁྲའི་ནང་དུའང་མངོན་གསལ་ཡོད་པ་ལ་བཀའ་དྲིན་བསམ་ཤེས་ལས་ལྡོག་སྟེ། ཁྲིམས་ཞིབ་ཁང་ལ་ཁྱད་གསོད་བྱེད་མི་རུང་བའི་ཁྲིམས་ཡིག་གི་བཀག་རྒྱ་གཏོར་བཤིག་དང༌། ཁྲིམས་རྩོད་པའི་ཆེད་ལས་བཟང་སྤྱོད་ཡལ་བར་དོར་ཏེ། བཅའ་ཁྲིམས་ཀྱིས་བསྐུར་བའི་ཡུལ་མིའི་ལས་འགན་རྒྱབ་ཏུ་བསྐྱུར། སྤྱི་ཚོགས་ནང་དཀྲོག་རྐྱེན་བཟོ་མི་རུང་བའི་འཇིག་རྟེན་ཡ་རབས་ལ་ལྟོས་མེད་ཀྱིས་མངོན་སུམ་འཛེམས་མེད་ཐོག ཁྲིམས་ཞིབ་ཁང་གི་ཐག་གཅོད་བཅད་ཁྲ་ལ་གཞི་མེད་དམའ་འབེབས་དང་། རང་སྣང་ཚད་མར་བཟུང་སྟེ་ཁྲིམས་ཞིབ་ཁང་གི་ཐག་གཅོད་བྱ་རིམ་ལ་འཕྱ་དམོད་སྒྲོ་འདོགས་དང་། གཟུགས་མེད་གྲིབ་བཟོ། དཀར་ནག་གོ་ལྡོག་གིས་ངན་དམོད་བྱེད་པ། རང་ཉིད་ཀྱིས་ཁྲིམས་ཡིག་ལྟར་གྱི་འགན་ཁུར་ལེན་མ་ཐུབ་པའམ། མ་བླངས་པའི་གྱོང་གུན་གྱི་ངན་ཁག་ཁྲིམས་ཞིབ་ཁང་ལ་འགེལ་དཀྲི། བཙན་བྱོལ་བོད་མིའི་བཅའ་ཁྲིམས་དང་། ཁྲིམས་ཡིག་ཁག་གིས་ཆེས་མཐོའི་ཁྲིམས་ཞིབ་ཁང་ལ་བསྐུར་བའི་འགན་དབང་ལ་དོགས་སློང་། མི་བདེན་རྫུན་བསྒྲིགས་དང་ར་མགོ་ལུག་སྦྱར་གྱིས་ཆེས་མཐོའི་ཁྲིམས་ཞིབ་ཁང་གི་ཆེ་མཐོང་ཉམས་དམས་བཟོ་གཞིའི་གཏམ་འཆལ་ཧམ་བཤད། བོད་མིའི་སྒྲིག་འཛུགས་ཀྱི་མང་གཙོའི་ལམ་ལུགས་ལ་དོ་ཕོག་གནོད་སྐྱོན་བཏང་སྟེ། ཡ་ང་བག་ཚ་མེད་པར་སྤྱི་ཚོགས་ནང་དཀྲོགས་རྐྱེན་སློང་གཞིར་འགྲེམས་སྒྲོགས་བྱས་པ་བཅས་ཀྱི་ནོར་འཁྲུལ་དེ་རིགས་ཡན་པོར་འཇོག་ཐབས་མེད་སྐོར་བརྗོད་འདུག

བཀའ་ཁྱབ་ཀྱི་མཇུག་ཏུ་ཆད་འགེལ་དང་བཅོས་གསོ་བཏང་བའི་ནང་། རྩོད་ལན་པའི་ཁྲིམས་རྩོད་པ་བློ་བཟང་གྲགས་པས་ཁྲིམས་རྩོད་པའི་ཆེད་ལས་བཟང་སྤྱོད་བོར་བ་དང༌། ཁྲིམས་རྩོད་པའི་བླང་དོར་ཞུ་སྒོར་རྒྱབ་འགལ་བྱས་པའི་བཅོས་གསོར། ཆེས་མཐོའི་ཁྲིམས་ཞིབ་ཁང་ནས་སྤྲད་པའི་བཙན་བྱོལ་བོད་མིའི་ཁྲིམས་དང་ལམ་ལུགས་ཀྱི་ཁྲིམས་རྩོད་པའི་ལག་ཁྱེར་ནུས་མེད་དུ་བཏང་སྟེ། བཀའ་ཁྱབ་འདི་བཏང་ཉིན་ནས་བཟུང་བློ་བཟང་གྲགས་པས་བཙན་བྱོལ་བོད་མིའི་ཁྲིམས་ཞིབ་ཁང་གང་དུའང་ཁྲིམས་རྩོད་པའི་ལས་འགན་ལེན་མི་ཆོག་པའི་ཆད་འགེལ་ཐག་གཅོད་བྱས་པ་དང་།རྩོད་ལན་པའི་ཁྲིམས་རྩོད་པ་བློ་བཟང་གྲགས་པས་སྒལ་རལ་བཙོང་ནས་ཁྲིམས་ཞིབ་ཁང་ལ་ཁྱད་གསོད་ཚབས་ཆེན་བྱས་པའི་བཅོས་གསོར། ༡ བློ་བཟང་གྲགས་པ་ཆེས་མཐོའི་ཁྲིམས་ཞིབ་ཁང་ལ་ཁྱད་གསོད་བྱེད་མཁན་ཡིན་པའི་གསལ་བསྒྲགས་བྱས་པ་དང་། ༢ བློ་བཟང་གྲགས་པས་བཀའ་ཁྱབ་འདི་བཏང་ཚེས་ནས་ཉིན་གྲངས་བཅོ་ལྔ་ནང་ཚུན་ཐེག་ཆེན་ཆོས་གླིང་གཙུག་ལག་ཁང་གི་རྟེན་གཙོ་དང་། ྋརྒྱལ་བའི་བཞུགས་ཁྲི་རིན་པོ་ཆེར་བཤགས་སྡོམ་མཇལ་དར་དང་། བརྒྱ་མཆོད་འབུལ་དགོས་ཀྱི་ཆད་འགེལ་བཀའ་ཁྱབ་བཏང་བ་ཡིན་ཞེས་བཀོད་འདུག

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༩/༡༢/༠༩

Leave a Reply

11 thoughts on “ཆེས་མཐོའི་ཁྲིམས་ཞིབ་ཁང་གིས་ཆད་འགེལ་བཀའ་ཁྱབ་བཏང་།

  1. གཞུང་པ་ཚེ་དབང་བསོད་ནམས།

    བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་དང་བློ་གཏད་རྩི་བཀུར་ཉམས་ལེན་ཞུས་ནས་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་སྒྲུབ་ནས་དབུས་བོད་མིའི་སྒྲིག་འཛུགས་ཀྱི་ལས་འགན་ཆེ་འབྲིང་ཆུང་གསུམ་ནང་ཞུགས་ནས་བོད་རྒྱལ་ཁབ་དང་བོད་མི་མང་ཞབས་འདེེགས་ཞུ་དགོས་པ་ནི་བཙན་བྱོལ་བོད་མིའི་བཅའ་ཁྲིམས་ཀྱི་བཀུར་བའི་ལས་འགན་ཞིག་ཡིན་པ་དང་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་མ་སྒྲུབ་ནས་བཙན་བྱོལ་སྒྲིག་འཛུགས་ཀྱི་ལས་འགན་ཆེ་འབྲིང་ཆུང་གསུམ་གང་དུའང་ལས་འགན་སྒྲུབ་རྒྱུ་དེ་ཁྲིམས་མཐུན་དང་བཟང་སྤྱོད་ལ་ངོས་འཛིན་ཞུ་ཐབས་བྲལ་བ་མ་རེད་དམ།