རྒྱ་བལ་འབྲུག་གསུམ་གྱི་བོད་མིའི་ནང་ཏོག་དབྱིབས་ནད་པ་གཅིག་ཀྱང་མེད་ཅེས་གསུངས་འདུག

སྲིད་སྐྱོང་བློ་བཟང་སེང་གེ་མཆོག་གིས་ཏོག་དབྱིབས་ནད་ཡམས་བཀག་འགོག་གི་ལས་འགུལ་ཆེད། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཡོངས་ནས་སོ་སོའི་ཉིན་གཅིག་གི་ཕོགས་དངུལ་རྒྱ་གར་སྲིད་བློན་དང་སྤྱི་ཁྱབ་བློན་ཆེན་གྱི་ངལ་སེལ་ཐེབས་རྩ་ཁང་དུ་འབུལ་རྒྱུ་ཡིན་ཞེས་གསུངས་སོང་།དེ་རིང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གིས་ཕྱི་དྲིལ་བོད་ཀྱི་བརྙན་འཕྲིན་བརྒྱུད་ཏོག་དབྱིབས་ནད་ཡམས་དང་འབྲེལ་བའི་གསར་འགོད་གསལ་བསྒྲགས་ཤིག་སྤེལ་གནང་ཡོད་པ་དང་དང་། གསལ་བསྒྲགས་སྐབས་སྲིད་སྐྱོང་གི་ལྷན་དུ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་དང་། ནང་སྲིད་དྲུང་ཆེ་ཚེ་དབང་སྒྲོལ་མ། འཕྲོད་བསྟེན་དྲུང་ཆེ་དཔལ་ལྡན་དོན་གྲུབ། དྲིལ་བསྒྲགས་དྲུང་ཆེ་ཨཅརྱ་ཚེ་དབང་རྒྱལ་པོ་ལགས་བཅས་ཕེབས་འདུག
 
ཐོག་མར་ད་ལྟའི་ཏོག་དབྱིབས་ནད་ཡམས་ཀྱི་གནས་སྟངས་དང་འབྲེལ་ནས་སྲིད་སྐྱོང་མཆོག་གིས། འཛམ་གླིང་ཁྱོན་ཡོངས་ལ་ཏོག་དབྱིབས་གཉན་རིམ་ཁྱབ་བརྡལ་དུ་ཕྱིན་ཏེ་ད་བར་ནད་པ་མི་གྲངས་ས་ཡ་གཉིས་ལྷག་ཙམ་དང་། མི་གྲངས་འབུམ་གཅིག་དང་ཁྲི་གསུམ་ཙམ་འདས་གྲོངས་སུ་ཕྱིན་ཡོད་སྟབས། འཛམ་གླིང་ཡོངས་ལ་ཛ་དྲག་གི་གནས་སྟངས་ཆགས་ཡོད། དེའི་ནང་བོད་མི་ས་ཡ་དྲུག་ཀྱང་ཚུད་ཡོད། ཚོད་དཔག་དང་གོ་ཐོས་ལྟར་ན་འཛམ་གླིང་ཁྱོན་ཡོངས་ལ་བོད་མི་ཕལ་ཆེར་བརྒྱ་ཕྲག་ལ་ཏོག་དབྱིབས་གཉན་རིམས་ཕོག་ཡོད་ས་རེད། སྟབས་ལེགས་པ་ཞིག་ལ་མང་ཆེ་བ་དྲག་སྐྱེད་འབྱུང་བཞིན་ཡོད་ཚུལ་གསུངས་གནང་སོང་།
 
 ༸གོང་ས་རྒྱལ་བ་རིན་པོ་ཆེ་མཆོག་གི་སྐུ་ཁམས་དང་འབྲེལ་ནས་ཁོང་གིས། རྒྱ་གར་ནང་གནས་ཚུལ་བཟང་བ་ཞིག་ལ་ Red Zone ཞེས་མངའ་སྡེ་ཁག་གི་ཐོ་གཞུང་བཏོན་གནང་འདུག་པའི་ནང་ཧི་མཱ་ཅལ་ཚུད་མི་འདུག ད་ལྟའི་ཆར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་སུ་གང་ལའང་གནང་གི་མེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཁམས་གསལ་ཐང་ཡིན་པས་ཐུགས་ཁྲལ་རྩ་བ་ཉིད་ནས་མ་གནང་རོགས་རོགས་ཞེས་ཞུ་རྒྱུ་ཡིན། ད་ལྟའི་ཆར་རྡ་ས་གངས་སྐྱིད་ཁུལ་གྱི་སྲི་ཞུའི་ལས་བྱེད་ཚོ་ཡིན་ནའང་ཏོགས་དབྱིབས་གཉན་རིམས་ཕོག་པ་གང་ཡང་བྱུང་མེད་ཅེསཞུ་རྒྱུ་ཡིན། ཞེས་དང་། ཡང་ཁོང་གིས། རྩ་བའི་རྒྱ་གར་གཞུང་གིས་ཕྱི་ལོ་ ༢༠༢༠ ཟླ་ ༥ ཚེས་ ༣ རྗེས་ཐེམ་སྤང་བཀའ་རྒྱ་ཉུང་དུ་གཏང་གི་ཡིན་ཞེས་གསལ་བསྒྲགས་གནང་ཡོད་ནའང་དེ་སྔ་ཞུས་པ་ལྟར་བཙན་བྱོལ་བོད་མིའི་གཞིས་ཆགས་ཁག་ཏུ་ཡོད་པའི་བོད་མི་རྣམས་ལ་རང་བཞིན་གྱིས་དམ་བསྒྲགས་སམ་དོགས་པ་ཡོད་སྐོར་མ་གསུང་ནའང་བོད་མི་ཡོངས་ནས་དོགས་པ་ཡོད་ངེས་རེད་བསམ་དགོས་རྒྱུ་ཧ་ཅང་གལ་ཆེན་པོ་རེད་འདུག གང་ཡིན་ཞེ་ན། ཕྱིའི་རྒྱལ་ཁབ་ཁག་ལ་འགྲོ་མཁན་བོད་མིའི་གཞིས་ཆགས་ཡོད་སའི་ཉེ་འཁོར་རྒྱ་གར་ཡུལ་མི་ལས་བོད་མི་མང་བ་ཆགས་ཀྱི་ཡོད་པ་མ་ཟད། ཕྱི་རྒྱལ་ཡུལ་གྲུ་ཁག་ནས་ཡོང་མཁན་ཡང་མང་བ་ཡོད་སྟབས། ཕྱི་ཟླ་ ༥ རྗེས་རྒྱ་གར་ནང་ཁུལ་གནམ་གྲུ་འཕུར་འགོ་བཙུགས་པ་ཡིན་ནའང་བོད་མི་རྣམས་ནས་གང་ཐུབ་དོགས་ཟོན་གནང་རོགས། ངེས་པར་དུ་ཕེབས་དགོས་ཀྱི་ཡོད་ན་མ་གཏོགས་ཕེབས་མི་དགོས་པ་གཙོ་འདོན་གནང་རྒྱུ་ཧ་ཅང་གལ་ཆེན་པོ་རེད་འདུག ཞེས་གསུངས་གནང་སོང་།
 
 དེ་བཞིན་བོད་ཀྱི་བླ་ཆེན་རྣམ་པ་དང་དགོན་པ་ཁག མི་སྒེར་སོ་སོས་དངས་བླངས་ཐོག་ཛ་དྲག་གི་གནས་སྟངས་སྐབས་འདིར་རྒྱ་གར་གཞུང་དམང་ལ་ཞབས་འདེག་གནང་ཚཱུལ་སྐོར་ལ་གསུང་དོན། ད་ལམ་བསྔགས་བརྗོད་ཞུ་འོས་པ་ཞིག་ལ་རྒྱ་གར་ལྷོ་ཕྱོགས་ཁུལ་གྱི་བོད་མིའི་གཞིས་ཆགས་ཁག་གིས་གཙོས་བཙན་བྱོལ་བོད་མིའི་གཞིས་ཆགས་ཁག་དང་། ལྷག་པར་ཆོས་བརྒྱུད་ཁག་གི་བསྟན་བདག་བླ་ཆེན་རྣམ་པ་དང་། དགོན་སྡེ་ཁག་གི་མཁན་པོ་སོགས་ནས་འགན་ཁུར་བཞེས་ཏེ་ཉེ་འཁོར་གྱི་ཁྱིམ་མཚེས་རྒྱ་གར་ཡུལ་མི་དཀའ་ངལ་ཅན་དང་ཉམ་ཐག་རྣམས་ལ་བཟའ་འབྲུ་རིགས་རིན་མེད་བགོ་འགྲེམས་གནང་བ་མ་ཟད། རྒྱ་གར་གྱི་སྲིད་བློན་མཆོག་དང་མངའ་སྡེའི་སྤྱི་ཁྱབ་བློན་ཆེན་སོ་སོའི་ངལ་སེལ་ཐེབས་རྩར་ཞལ་འདེབས་ཧ་ཅང་ཡག་པོ་གནང་གི་འདུག དེ་དག་ལ་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཡོངས་ནས་ཀྱང་རང་གི་ཉིན་གཅིག་གི་ཕོགས་དངུལ་འབུལ་རྒྱུ་ཡིན། ཞེས་གསུངས་སོང་།
 
 དེའི་རྗེས་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་གིས། ད་ལྟའི་ཆར་རྒྱ་བལ་འབྲུག་གསུམ་ནང་གི་བོད་མི་ཚོར་རྒྱ་ནག་ཝུ་ཧན་ནས་ཁྱབ་པའི་ཏོག་དབྱིབས་གཉན་རིམས་བྱུང་མེད། ཕྱི་ཟླ་ ༡ ཚེས་ ༢༤ ཉིན་ནས་འགོ་བཙུགས་ཏེ་ད་བར་འཕྲོད་བསྟེན་ལས་ཁུངས་དང་ནང་སྲིད་ལས་ཁུངས་ནས་ས་གནས་ཁག་གི་བོད་མི་ཚོར་ལམ་སྟོན་གནང་དང་གནང་མུས་རེད། ཕྱི་ཟླ་ ༣ ཚེས་ ༡༩ ཉིན་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་རྒྱ་ནག་ཝུ་ཧན་ཏོག་དབྱིབས་གཉན་རིམས་སྔོན་འགོག་ལས་དོན་ཚོགས་ཆུང་བཙུགས་ཐུབ་ཡོད། ཕྱི་ཟླ་ ༣ ཚེས་ ༣༡ ཉིན་བོད་མིའི་སྒྲིག་འཛུགས་ནས་ཝུ་ཧན་ཏོག་དབྱིབས་གཉན་རིམས་ཛ་དྲག་ཚོགས་ཆུང་ཞེས་ཟུར་དུ་བཙུགས་ཡོདཔ་མ་ཟད། ད་བར་ཚོགས་ཆུང་གིས་ཚོགས་འདུ་ཐེངས་ ༡༩ ཙམ་ཚོགས་ཏེ་ཏོག་དབྱིབས་གཉན་རིམས་སྔོན་འགོག་ཆེད་ལས་གཞི་སྤེལ་དང་སྤེལ་མུས་ཡིན། ཞེས་གསུངས་གནང་སོང་།
 ལྡི་ལིའི་གསར་འགོད་པ་ཉི་མ་ཚེ་རིང་།

བསྐྱར་བཅོས།: ༢༠༢༠/༠༤/༡༦

Leave a Reply

One thought on “རྒྱ་བལ་འབྲུག་གསུམ་གྱི་བོད་མིའི་ནང་ཏོག་དབྱིབས་ནད་པ་གཅིག་ཀྱང་མེད་ཅེས་གསུངས་འདུག

  1. དབུ་མ་བ་འཕྲིན་ལས།

    ཏོག་དབྱོབས་གཉན་རིམས་ཅེས་པའི་དོན་ལྡན་གྱི་ཐ་སྙད་དེ་གཞུང་འབྲེལ་གྱི་གསུང་བཤད་ནང་སྤྱད་གནང་འདུག་པར་དགའ་སྤྲོ་དང་ཡི་རང་ཞུ།