ཆོས་རིག་བཀའ་བློན་ནས་དགོངས་པ་ཞུ་དགོས་ཀྱི་འདུག

༄༅།། དཔལ་ལྡན་བཀའ་ཤག་ལྷན་རྒྱས་ཀྱི་དྲུང་དུ།

ཞུ་དོན། ཨོ་རྒྱན་སྟོབས་རྒྱལ་གྱིས་ནང་དོན་ཡང་དག་ཁུངས་ཐུབ་རྒྱུ་མཚན་ཅན་མེད་ཁར། ཕྱི་ཚུལ་ཚིག་འགྲོས་རྒྱ་ནག་གཞུང་ལས་ངན་པའི་ཐ་སྙད་ཆེད་སྤྱོད་ཀྱིས་༧གོང་ས་ཆེན་པོར་མཚན་དམས་ཞུས་པར། ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་ནས་བབ་བརླིང་བརྟན་གསུམ་ཁྱོན་ནས་མེད་པའི་དགོངས་སེལ་གསལ་བཤད་སྔ་ཕྱིར་སྤེལ་བ་དེ་ལྟར་ཡང་། རང་ཅག་ལས་ཀྱི་སྣེ་མོ་བ་ཐམས་ཅད་ཀྱིས་ནམ་ཞག་རྒྱུན་དུ། དབུས་བོད་མིའི་སྒྲིག་འཛུགས་འདི་བཞིན་སྲོག་ལ་བསྡོས་ཏེ་སྲ་བརྟན་སྲུང་དགོས་པའི་ལྟ་གྲུབ་འཛིན་པའི་ཡང་སྙིང་ནི། མི་མང་གི་ཡིད་ཆེས་སྒྲིག་འཛུགས་ལ་དུས་ནམ་ཡང་གཡོ་མེད་དུ་གནས་ཐུབ་ཆེད་རེད། ལས་ཀྱི་སྣེ་མོ་བའི་བྱེད་འཛོལ་ལས་མི་མང་བློ་ཕམ་བྱུང་ཚེ། ཨུ་ཚུགས་བསྐྱོན་ཏེ་སྡིག་པ་མིག་བཙུམ་མི་གནང་བར། འཕྲལ་དུ་རང་ཉིད་ལས་གནས་ནས་དགོངས་པ་ཞུ་བའང་སྒྲིག་འཛུགས་སྲུང་སྐྱོབ་བྱེད་སྟངས་ཤིག་ཡིན། འོན་ཀྱང་། ཆོས་རིག་བཀའ་བློན་ནས། ནད་དགོངས་སུ་ཡོད་བཞིན་པའི་སྐབས། བཀའ་ཤག་གི་རྩ་བའི་ལས་དོན་གལ་ཆེ། ༧གོང་ས་ཆེན་པོར་མཚན་དམས་ཞུ་མཁན་ལ་གདོང་ལེན་ཞུ་སྟངས་བཀའ་ཤག་ལ་དགོངས་སྐོར་ཙམ་ཡང་མ་ཞུས་པར། རྒྱ་ཆེ་མི་མང་དེ་བས་ཀྱང་བློ་ཕམ་བླ་ལྷག་ཏུ་ཡོང་གཞི་བསྐྲུན། སྒྲིག་གཞི་ལྟར་ན་ནད་དགོངས་སམ་གུང་གསེང་གཙང་ནས་ཕྱིར་ལས་གནས་སུ་མ་འབྱོར་བར་བཀའ་བློན་གྱི་མཚན་འཕྱར་ནས། བཀའ་ཤག་གི་རྩ་བའི་ལས་དོན་གལ་ཆེའི་ཐད་གསལ་བསྒྲགས་སྤེལ་ཆོག་གམ། དེ་ལྟར་སྤེལ་བ་ནི་རང་ཁྲིམས་རང་གིས་བརྡལ་བཤིག་བཏང་བ་མ་རེད་དམ།

གྲོས་ཚོགས་དང་མི་མང་འདུ་འཛོམས་གང་སར་༧གོང་ས་ཆེན་པོར་མཚན་དམས་ཞུ་མཁན་ལ་གདོང་ལེན་མཐར་ཕྱིན་པ་གནང་རྒྱུ་ནི་དཔལ་ལྡན་བཀའ་ཤག་གི་རྩ་བའི་ལས་དོན་ནམ་ཐུགས་འགན་ཡིན་ཞེས་ལན་མང་གསུངས་ཟིན་པས། དེའི་ཐད་བཀའ་ཤག་ལ་རྩ་བའི་ལངས་ཕྱོགས་ཡོད་པའང་ཀུན་གསལ་ལྟར་ལགས་ཀྱང་། ཆོས་རིག་བཀའ་བློན་ནས། བཀའ་ཤག་གི་རྩ་བའི་ཐུགས་འགན་དུ་དམ་འཛིན་གནང་བཞིན་པའི་ལས་དོན་གལ་ཆེ་ཞིག་ལ། བཀའ་ཤག་ལ་དགོངས་སྐོར་མེད་པར་སྔ་ཕྱི་མི་མཚུངས་པའི་གསལ་བསྒྲགས་སྣ་ཚོགས་སྤེལ་བ་ནི་ལས་ཀྱི་སྣེ་མོ་བ་བབ་བརླིང་བརྟན་གསུམ་མིན་པ་སྒྲུབ་བྱེད་ཙམ་མ་ཟད། འཛིན་སྐྱོང་སྒྲིག་གཞི་དོན་ཚན་བརྒྱད་ ༨ པའི་ནང་གསེས་ ༢ ནང་། བཀའ་ཤག་གི་འགན་འཁུར་ནི་སྲིད་སྐྱོང་དང་། བཀའ་བློན་རྣམས་མཉམ་འདུས་ཀྱི་འགན་འཁུར་ཡིན་པས་བོད་མིའི་སྒྲིག་འཛུགས་ཀྱི་རྩ་བའི་སྲིད་བྱུས་དང་འབྲེལ་བ་ཡོད་པའི་དོན་གནད་རྣམས་སྲིད་སྐྱོང་དང་བཀའ་བློན་རྣམས་སྤྱི་མོས་སམ་མང་མོས་ཀྱིས་གྲོས་དོན་ཐག་གཅོད་བྱེད་དགོས་པ་ལས་སྲིད་སྐྱོང་ངམ་བཀའ་བློན་བྱེ་བྲག་པ་ཞིག་གིས་ཐག་གཅོད་མི་ཆོག་ཅེས་པར་འགལ་བ་གསལ་བོ་རེད། གང་ཡིན་ཞེ་ན། ༧གོང་ས་མཆོག་ལ་མཚན་དམས་ཞུ་མཁན་ལ་གདོང་ལེན་མཐར་ཕྱིན་པ་གནང་རྒྱུ་ནི་བོད་མིའི་སྒྲིག་འཛུགས་ཀྱི་རྩ་བའི་སྲིད་བྱུས་དང་འབྲེལ་བ་ཡོད་པའི་དོན་གནད་གོང་ན་མེད་དེ་རེད། དེ་བཞིན་སྒྲིག་གཞི་འདིའི་དོན་ཚན་བརྒྱད་ ༨ པའི་ནང་གསེས་ ༡ པོར་གསལ་བ་ཇི་བཞིན། བཀའ་ཤག་གིས་བོད་མིའི་སྒྲིག་འཛུགས་ཀྱི་འགན་འཛིན་འོག་ཡོད་པའི་ལས་ཁུངས་སྡེར་གཏོགས་དང་བཅས་པར་བཀོད་བྱུས་སྟངས་འཛིན་ཏག་ཏག་ཐུབ་དགོས་ཀྱི་ཡོད་ཀྱང་། ཆོས་རིག་བཀའ་བློན་གྱི་གནང་བབ་དེས་སྟངས་འཛིན་ཏག་ཏག་ཐུབ་ཀྱི་མེད་པའང་གསལ་བོ་མཚོན་པ་རེད།

བཀའ་བློན་བྱེ་བྲག་པའི་འགན་དབང་ནི་སྒྲིག་གཞི་འདིའི་དོན་ཚན་དགུ་ ༩ པར་གསལ་བ་བཞིན། བཀའ་ཤག་གི་མཉམ་འདུས་ཀྱི་འགན་འཁུར་དང་ལྷན་ལས་ཁུངས་ཀྱི་ལས་དོན་ཁག་ཡིན་པ་གསལ་བོ་ཡིན་ཡང་། ཆོས་རིག་བཀའ་བློན་ནས། ༧གོང་ས་མཆོག་ལ་གཞི་མེད་མཚན་དམས་ཞུས་པའི་བྱ་ངན་ལ་གདོང་ལེན་ཞུ་ཕྱོགས་ཆོས་རིག་ལས་ཁུངས་ཀྱི་ལས་འགན་ལྟ་བུར་འབྲེལ་བ་ཡོད་ཚུལ་མི་མང་ལ་ཞལ་རྫུན་གསུངས་ཏེ་གསལ་བསྒྲགས་སྤེལ་བ་ནི་ཧ་ཅང་ནོར་འཁྲུལ་ཚབས་ཆེན་ཞིག་རེད། ༧གོང་ས་མཆོག་ལ་མཚན་དམས་ཞུས་ཚེ་ཆོས་རིག་ལས་ཁུངས་ཀྱི་ལས་འགན་ལྟ་བུར་ཚུར་བླངས་ཏེ་ཆོས་རིག་བཀའ་བློན་ནས་རང་ཐག་རང་གཅོད་ཀྱིས་ལན་འདེབས་གསལ་བཤད་གནང་ཆོག་པའི་ཐག་གཅོད་ཅིག་བཀའ་ཤག་གིས་ལོ་ཟླ་ཚེས་གྲངས། ཉིན་སྔ་ཕྱི་ག་དུས་གནང་བ་ཡིན་ནམ། གནད་འདི་བཀའ་ཤག་གིས་མཁྱེན་བཞིན་གསུང་མི་འབྱོན་པ་དང་། ཆོས་རིག་བཀའ་བློན་ནས་ད་དུང་ཡི་གེ་འདྲ་མིན་སྤེལ་བཞིན་པ་ནི་ཁྲིམས་ཀྱི་དབང་བསྒྱུར་ལ་ཆོད་སེམས་བརྟན་པོ་མེད་པ་དང་། མི་མང་གིས་ཞིབ་གསལ་མཁྱེན་གྱི་མ་རེད་དགོངས་ཏེ་ཧམ་པ་བྱེད་པ་ནི་ལས་འབྲས་དང་མི་མཐུན་པས་ཧ་ཅང་གཟབ་དགོས་པར་རན།

འཛིན་སྐྱོང་སྒྲིག་གཞིའི་དོན་ཚན་བཅུ་གསུམ་༡༣ པ། ལས་དོན་ཐག་གཅོད་ཅེས་པའི་ནང་གསེས་ ༢ པར། བཀའ་ཤག་གི་སྤྱི་བྱེའི་འཆར་འཕར་ལས་དོན་ཚང་མ་སྲིད་སྐྱོང་དང་བཀའ་བློན་ལྷན་རྒྱས་མཉམ་གྲོས་གོ་བསྡུར་གྱི་ལམ་ནས་གནང་དགོས་པ་དང། ལྷག་པར་ལས་དོན་དམིགས་བསལ་དང་། དངུལ་གྲོན་འཕར་མ་གཏོང་ཕྱོགས་ཀྱིས་མཚོན་ལས་དོན་གང་ཅི་གོ་བསྡུར་མེད་པར་སྲིད་སྐྱོང་དང་བཀའ་བློན་སུ་ཐད་ནས་ཐག་གཅོད་གནང་མི་ཆོག་ཅེས་དང། དེ་བཞིན་དོན་ཚན་བཅུ་གཉིས་ ༡༢ པའི་ནང་གསེས་དང་པོ་ ༡ ནང་ཛ་དྲག་གནས་ཚུལ་སྐབས་བཀའ་ཤག་འཕར་མ་ཚོགས་དགོས་པ་གསལ་ཡང་། ཚོགས་རྒྱུ་ལྟ་ཅི། བཀའ་ཤག་གིས་མི་མང་ལ་ཨང་ཉན་གནང་སྟེ། མི་མང་འགོ་ཁྲིད་ཡིན་པ་ལྟར་མདུན་ལ་ཐོན་བཅུག རང་ཉིད་ནས་གནས་སྟངས་ལ་ལྟ་གིན་ལྟ་གིན་གནང་བ་ནི་སྒལ་རལ་གྱི་མཚོན་རྟགས་དངོས་ཡིན་པ་ཞོར་འཕྲོས་བཅས་གོང་གསལ་ཁྲིམས་སྒྲིག་དང་འགལ་འཛོལ་གྱུར་འདུག་ན། བཅའ་ཁྲིམས་དོན་ཚན་ཉེར་དགུ་ ༢༩ པའི་ནང་གསེས་ ༤ ལྟར་སྲིད་སྐྱོང་གིས་ཆོས་རིག་བཀའ་བློན་ལ་དགོངས་ཞུ་བྱེད་འཇུག་པའམ། ཡང་ན་ཆོས་རིག་བཀའ་བློན་རང་ངོས་ནས་ངེས་པར་དགོངས་པ་ཞུ་དགོས། མང་གཙོའི་ལྟ་གྲུབ་ནང་ནོར་འཁྲུལ་ཤོར་ཏེ་དགོངས་པ་ཞུ་པ་ནི་རང་ཉིད་སྒེར་པ་ནོར་འཁྲུལ་ལས་ལྡོག་པའི་ལམ་དུ་ཞུགས་པ་དང་། སྤྱི་པའི་སྒྲིག་འཛུགས་སྲ་བརྟན་གཏོང་ཆེད་ཡིན་པས། མགོར་བབས་ན་ཕྱིར་ནུར་བྱེད་ས་མེད། དེར་ཡ་ཡོ་ཆེན་པོས་གཡོལ་ཐབས་གནང་བ་ནི་རང་ཉིད་ཆབ་སྲིད་ཀྱི་ལས་ཀར་ཞུགས་དོན་ལ་བསམ་བློའི་རྨང་གཞི་འདང་ངེས་མེད་པའི་རྟགས་མཚན་ཡིན་པས། གོམས་གཤིས་ངན་པ་དེ་རིགས་ཀོ་རོ་ན་བཅུ་དགུ་ལྟར་སྤྱི་ཚོགས་ནང་འགོས་བཅུག་ན་བོད་ཀྱི་རྩ་དོན་དང་བོད་མིའི་སྒྲིག་འཛུགས་སྲ་བརྟན་གཉིས་ཀར་གནོད་ངེས་པས། ཆོས་རིག་བཀའ་བློན་ལགས་ནས་ཅི་ནས་ཀྱང་དགོངས་པ་ཞུ་རོགས།།

མཐའ་དོན་ཆོས་རིག་བཀའ་བློན་ལགས་དགོངས་ཞུ་དགོས་དོན་གོང་གསལ་ཁག་མདོར་བསྡུས་ན་རྒྱུ་མཚན་ལྔ་ཡོད།

གཅིག བཀའ་ཤག་གི་རྩ་བའི་ལས་འགན་གལ་ཆེ་དང་འབྲེལ་བའི་སྐོར་གདོང་ལེན་ཞུ་སྐབས། ཁྲིམས་སྒྲིག་ལྟར་ངེས་པར་བཀའ་ཤག་ལ་གྲོས་བསྡུར་ཞུ་དགོས་ཀྱང་མ་ཞུས་པས་སྒྲིག་འགལ་བྱུང་འདུག

གཉིས། ནད་དགོངས་སམ་གུང་གསེང་དུ་ཡོད་བཞིན། བཀའ་བློན་ཞིག་ལ་དམིགས་བསལ་ཛ་དྲག་གཞུང་དོན་གལ་ཆེ་བཀའ་ཤག་གི་བཀའ་འཁྲོལ་ཡོད་ན་མ་གཏོགས་གནང་ལམ་མེད་བཞིན་གནང་སྟེ། རྒྱ་ཆེ་མི་མང་ཡོངས་སུ་བློ་ཕམ་དུ་བཅུག

གསུམ། མཚན་དམས་ཞུས་རིགས་ལ་གདོང་ལེན་བྱེད་རྒྱུ་བཀའ་ཤག་གི་རྩ་བའི་ལངས་ཕྱོགས་དང་ཐུགས་འགན་ཡིན་པ་བཀའ་ཤག་གི་ཐག་གཅོད་ཡོད་བཞིན། བཀའ་ཤག་གི་བཀའ་འཁྲོལ་དང་། ཁུངས་ལུང་གཞན། ཁྲིམས་མཐུན་བརྒྱུད་རིམ་བཅས་གང་ཡང་མེད་པར་རང་གི་ལས་ཁུངས་དང་ལས་གནས་ཀྱི་མགོར་བླངས་པ།

བཞི། ཁྲིམས་མཐུན་ནམ་ཁྲིམས་ཀྱི་དབང་བསྒྱུར་གྱི་ཕྱག་ལས་གནང་ཕྱོགས་ཀྱི་གོམས་གཤིས་དང་མིག་དཔེ་ཡལ་བར་དོར་ནས། རང་སྣང་གང་དྲན་བྱས་པའི་གསལ་བསྒྲགས་སྔ་རྗེས་སྤེལ་ཏེ་མི་མང་དེ་བས་ཀྱང་ཡིད་ཆད་བཟོས་པ།

ལྔ། མི་མང་ལ་དོན་གནད་རང་ལས། ལས་དོན་བྱ་རིམ་ཁྲིམས་མཐུན་མ་གནང་བ་ཟུར་ཙམ་ཡང་དགོངས་སེལ་ནང་འཁོད་མེད་པ་ནི་ལས་སྣེའམ་བཀའ་བློན་ཞིག་ལ་མཚོན་ན་ཆེས་ཚབས་ཆེར་སོང་། དགོངས་པ་ཞུ་རྒྱུ་ལས་ལམ་ཁ་གཞན་མི་འདུག་ན། བཟང་སྤྱོད་ལྡན་པའི་ངང་དགོངས་པ་ཞུ་རོགས།།

བོད་མི་མང་སྤྱི་འཐུས་བློ་བཟང་ཆོས་འབྱོར་རམ་ཤར་ཕྱོགས་ཁུག་རྟས་བཅའ་ཁྲིམས་དང་སྒྲིག་གཞིས་སྐུར་པའི་ལས་འགན་བཞིན། ༢༠༢༠ ཟླ་ ༥ ཚེས་ ༣༡ རེ་གཟའ་ཉི་མའི་ཉིན་ཕུལ།།

བསྐྱར་བཅོས།: ༢༠༢༠/༠༥/༣༡

Leave a Reply

21 thoughts on “ཆོས་རིག་བཀའ་བློན་ནས་དགོངས་པ་ཞུ་དགོས་ཀྱི་འདུག

  1. མཆོག་གླིང་གདུང་སྲས་ཨོ་སྟོབ་ཁྱེད་ཀྱིས་ད་ལྟ་གོང་ས་མཆོག་ལ་བཟོད་གསོལ་ཞུས་པ་དེ་ས་སྐྱ་ཁྲི་འཛིན་དང་མཁྱེན་སྤྲུལ་རྣམས་ཀྱི་ངོ་ལ་བལྟས་ནས་བྱས་ཚུལ་བ་ཤད་འདུག་པས་རྫོང་གསར་མཁྱེན་བརྩེ་ཆོས་ཀྱི་བློ་གྲོས་དང་དིལ་མགོ་མཁྱེན་བརྩེ་རབ་གསལ་ཟླ་བ་རྣམས་ཀྱིས་སྡོན་ཆད་གསུངས་པ་རྣམ་བརྗེད་སོང་བ་ཡིན་ན་ཡང་ན་བཀའ་ལུང་ལ་ཚད་མར་མ་འཛིན་པ་ཡིན།
    ད་རྙིང་མའི་ཞབས་འདྲེན་མ་བཞག་ཞུ།
    དེ་ལས་ཀྱང་གལ་ཆེན་ཞུ་བ་ན། ཤར་ཕྱོགས་ཁུག་རྟས་བརྩོས་པའི་ཁ་ཤས་ཀྱིས་གོ་སྐབ་ནམ་བྱུང་དུས་སུ་བཀའ་ཤག་གཏོར་ཐབས་ཀྱིས་འབད་བརྩོན་བྱེད་ཀྱི་འདུག་ དེནི་བོད་དང་ཁམ་པ་སྤྱི་ལ་ལྷག་བསམ་མ་རེད་ ཆོལ་ཁའི་ཕྱོག་རིས་མ་རེད་ གུང་ཕྲན་གྱིས་ཐབས་བརྒྱ་ཇུས་སྟོང་གི་ཆ་ཤས་ཞིག་སྤྱི་མཐུས་ནང་སླེབས་ནས་དཀྲུག་ཤིང་གི་སྲིད་ཇུས་རེད་ ཐམས་ཅད་གྱིས་ཤེས་པར་གྱིས།

  2. འདམ་སྐྱེས།

    མཆོག་སྲས་ཨོ་སྟོབས་ནས་རང་དང་འབྲེལ་ཡོད་ཁག་ཅིག་ལ་དཔལ་ལྡ་ཆོས་རིག་བཀའ་བློན་ནས་གསུང་དོན་ལྟར་རང་སྣང་གང་དྲན་ཐོལ་བྱུང་དུ་རྒྱུན་ལྡན་ཁོ་རང་གི་ངན་གོམ་བཞིན། བློ་ཁོག་ཆེ་མདོག་གིས་༧གོང་ས་ཆེན་པོའི་མཚན་སྨོས་ཏེ་ཞྭ་དཔེ་ལྷམ་འགེབ་ལྟ་བུར་རྣམ་དཔྱོད་ཀྱི་ཤེས་རབ་ཞན་པས་འཕྲལ་ཕུག་ལ་ལེགས་ཉེས་འབྱེད་མ་ཐུབ་པའི་གཏམ་བཤད་གཅིག་ལ་རིན་ཐང་དེ་ཙམ་བྱ་དགོས་མ་མཐོང་། འོན་ཀྱང་གནད་དོན་འདིའི་ཐད་དགོས་པ་ལས་ལྷག་ཅིག་གནང་སྟངས་འདི་རིག་ལ་དཔྱད་ན་རང་སྨ་རང་རང་འབེབ་མངོན་པར་གསལ་བ་ཙམ་ལས་དོན་གནད་མ་མཐོང་།
    བོད་མིའི་སྒྲིག་འཛུགས་ཀྱི་གཞུང་ཞབས་ནང་ཕྱི་ནང་གི་ཤེས་ཡོན་དང་དྲང་ཚུགས། ལས་ཀའི་ཉམས་མྱོང་ཅན་ད་ལྟའི་ཆོས་རིག་བཀའ་བློན་ནང་བཞིན་མེད་པ་ནི་མངོན་གསལ་ཡོངས་གྲགས་རེད། དེས་ན་ཤར་ཁུག་ཁྱེད་རང་ནད་རྙིང་ལངས་ཏེ་ངོ་ཚའི་བརྒྱན་དང་བྲལ་ནས་ཁོང་དགོང་པ་ཞུ་དགོས་ཚུལ་བཤད་པ་ནི་ཕ་རོལ་པོའི་འདོད་སྒྲུབ་པ་ལས་སྙིང་པོ་མ་མཐོང་། ལར་ནས་འདི་ལྟབུ་བཤད་འདོད་གཏན་ནས་མེད་ཀྱང་ཁྱེད་རང་ཉིད་ཀྱི་ཉེ་ཆར་གཅིག་པུའི་གཏམ་བཤད་དང་གོང་གི་ཡིག་སྙོགས་འདི་དག་ཁྱེད་རང་ཉིད་ནས་བསྐྱར་ཞིབ་གཅིག་གནང་ན་གོ་བ་ཞིག་ལོན་ངེས་སུ་མཐོང་། མཐའ་དོན་ཁྱེད་རང་ལོ་ན་ཆུང་བའི་སྤྱི་མི་ཚད་ལྡན་ཞིག་ཆགས་རྒྱུའི་རེ་བ་འཆར་རུང་འདས་མ་ད་གསུམ་གྱི་བྱེད་བབ་ལ་གཞིགས་ན་དགོངས་པ་ཞུ་དགོས་མཁན་ངོ་མ་དེ་ཁྱེད་རང་ལ་འོས་བབ་མཐོང་ངོ།།

  3. སྐུ་ངོས་ཡག་མོ་དྲག་མོ་བྲིས་འགུ སྐུ་རྩེད་ཞུས་ཡིན། ཧ་ཅང་ཡག་པོ་བྲིས་འདུག སྤྱི་འཐུས་ཚོའི་ནང་ཁྱོད་འདྲ་དཀོན་པ་ཞེས་གང་སར་ཐོས་པ། འགན་དངོས་གནས་ནམ་གི་འདུག ཁྱོད་ལ་རླབས་ཆེན་མི་སྣ་མང་པོས་ཐུགས་རེ་བཅངས་ཡོད་པ་བཞིན། སྐུ་ཚེ་རིང་། མཛད་འཕྲིན་རྒྱས། མུ་མཐུད་ཤུགས་རྒྱག་རོགས། ཕྱི་ནང་གི་ཇག་ཚོགས་ཀྱི་མགོར་ཁྱོད་ལས་ཐཽ་བ་ལྗིད་པོ་མེད།