བཀའ་ཟུར་འབྲོང་ཆུང་དངོས་གྲུབ་ཀྱི་ཐུན་མོང་མིན་པའི་ཁྱད་ཆོས།

རྩོམ་པ་པོ་བསྟན་འཛིན་རྣམ་དག

བཙན་བྱོལ་སྤྱི་ཚོགས་ནང་སྲིད་སྐྱོང་འོས་མི་གོ་འཕེར་རིགས་མང་དུ་བྱུང་ན་དེ་ནི་དགའ་འོས་པ་ཞིག་ཡིན། རང་དོན་ཁོག་བཅུག ཡང་ན་ཆོལ་ཞེན་སོགས་དང་མ་འབྲེལ་བའི་རྒྱུ་མཚན་ཡང་དག་པར་གཞི་བཅོལ་ཏེ་རྒྱབ་སྐྱོར་ཞུ་དགོས་པ་ནི་སྤྱི་དོན་ལ་ཕན་ཞིང་། བོད་དོན་བདེན་མཐའ་བསལ་བའི་མཐུན་རྐྱེན་ཡང་དག་པར་འགྱུར་བས། སྲིད་སྐྱོང་དུ་ལངས་འཆར་ཡོད་པ་ཚོའི་ཁྲོད་སྐུ་ངོ་བཀའ་ཟུར། ལྡི་ལི་དོན་གཅོད་འབྲོང་ཆུང་དངོས་གྲུབ་མཆོག་ལ་ཐུན་མོང་མིན་པ། གཞན་ལ་མེད་པའི་ཁྱད་ཆོས་འགའ་ཡོད་པར་མཐོང་བ་ཁྱོད་ལ་ཞུ་འདོད་པས། གཟིགས་དཔྱད་གནང་རོགས་ཞུ།

བརྗོད་དོན་གཙོ་བོ། ཉམས་མྱོང་ཕུན་སུམ་ཚོགས་པ། སྨྲ་བ་ཉུང་ལ་བཤད་པ་དག་ཐོན་པ། ཆོལ་གསུམ་ཆིག་སྒྲིལ་དང་གཞིས་བྱེས་མཉམ་རུབ་ཀྱི་དབུ་ཁྲིད་ཐུབ་པ། བསམ་བློ་གུ་ཡངས་ལ་ལྟ་བ་ཚང་མ་མཉམ་འཁྲིད་ཐུབ་པ། དབུ་མའི་ལམ་དང་འབྲེལ་མོལ་ལ་མཁས་པ། བོད་ཀྱི་རིག་གཞུང་གིས་བསྐྲུན་པའི་བོད་མིའི་ཞགས་རྩི་ཚད་ལོངས་པ་ཡོད་པ། གཞིས་ཆགས་དང་སློབ་གྲྭ་ཁག་ལ་ཐུགས་འཁུར་ཟབ་པ།

གཅིག ཉམས་མྱོང་ཕུན་སུམ་ཚོགས་པ་ཞིག་རེད།

ཉམས་མྱོང་ཕུན་སུམ་ཚོགས་པའི་དོན་ནི་ཉམས་མྱོང་བསགས་པའི་བརྒྱུད་རིམ་འཆལ་འཆོལ་མིན་པར། བར་དུ་མ་བཅད་པ། མཐར་ཕྱིན་པ། ཕུལ་དུ་བྱུང་བའི་གཞུང་ཞབས་ཤིག་གི་ཉམས་མྱོང་བསགས་པ་མ་ཟད། ཆབ་སྲིད་དང་སྤྱི་ཚོགས། གསང་བའི་གནས་ཚུལ། རྒྱ་གར་གཞུང་དང་། རྒྱལ་སྤྱིའི་མཐུན་ཕྱོགས་རྒྱལ་ཁབ་ཁག་དང་དངོས་ཤུགས་བརྒྱུད་གསུམ་གྱི་འབྲེལ་ལམ། རང་གཞུང་བཀའ་ཤག་དང་སྐུ་ཚབ་དོན་གཅོད་བཅས་ཀྱི་ལས་དོན་ཐད་ཉམས་མྱོང་ཕུན་སུམ་ཚོགས་ཤིང་། དམིགས་བསལ་ལྷ་སྲས་ཁྲི་ཟུར་རྒྱལ་ལོ་དོན་གྲུབ་མཆོག་གི་ལྷན་ ༡༩༩༡ ནས་ ༡༩༩༣ བར། ཆབ་སྲིད་མཁས་ཅན་བདེ་སྲུང་བཀའ་ཟུར་དྲུང་ཡིག་ལྷ་མོ་ཚེ་རིང་མཆོག་གི་ལྷན་ ༡༩༩༣ ནས་ ༡༩༩༦ བར་ཕྱག་ལས་གནང་བ། དེ་བཞིན་བདེ་སྲུང་བཀའ་ཟུར་སྟག་ལྷ་ཕུན་ཚོགས་བཀྲ་ཤིས་དང་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེའི་ལྷན་བཅས་ལོ་བཅུ་ཕྲག་གཉིས་ལྷག་ཕྱག་ལས་གནང་བ་བཅས་གང་ཅིར་ཉམས་མྱོང་ཕུན་སུམ་ཚོགས་པས། འོག་དྲུང་ཆེ་ནས་ལས་བྱེད་དཀྱུས་མའི་བར་སྐུ་ངོ་མཆོག་གི་མཁྱེན་དཔྱོད་དང་། འཛིན་སྐྱོང་རིགས་ལམ། ཕྱག་ལས་གནང་སྟངས་ཡོངས་ལ་ཡིད་ཆེས་བློ་གཏོད་ཞུ་ཞིང་། ལོ་མང་བཤིབས་པའི་ལས་བྱེད་ཚོས་སྐུ་ངོ་མཆོག་ལ་ཁ་ཞེ་གཉིས་མེད་ཀྱི་བརྩི་བཀུར་ཐོབ་སྟེ། ལས་དོན་ཐོག་ཕ་མ་བཞིན་གསོ་སྐྱོང་གནང་སོང་ཞེས་གསུངས་མཁན་ཧ་ཅང་མང་། དེ་བཞིན་ལས་རོགས་དང་གྲོགས་པོ་བཅས་ཀྱིས་ཀྱང་བཅོས་མིན་ཡིད་ཆེས་ཞུ་ཞིང་། བབ་བརླིང་བརྟན་གསུམ། མཁས་བཙུན་བཟང་གསུམ། ཉེ་རིང་ཕྱོགས་རིས་མེད་པར་ཉི་མ་གཅིག་ལྟར་འགྱུར་བ་མེད་པ་ཞིག་ཡིན་ཞེས་མགྲིན་གཅིག་གིས་གསུངས།

གཉིས། ཁ་ཉུང་ལ། བཤད་པ་དག་ཐོན་པ་ཞིག་རེད།

གཞུང་གི་དཔོན་རིགས་ཤིག་ལ་མཚོན་ན། ཁ་ཉུང་རྒྱུ་ནི་ཧ་ཅང་གལ་ཆེ། སྐུ་ངོ་མཆོག་གིས་གཞུང་དོན་གལ་ཆེ་དང་། ཡང་ན་གསང་གནས། དེ་བཞིན་རང་ཉིད་སྒེར་དང་འབྲེལ་བའི་གཞུང་གི་ལས་དོན་བཅས་དུས་ཚོད་ལ་མ་སླེབས་པ་ཞིག ལན་བརྒྱར་དྲི་བ་ཞུས་ཀྱང་མི་གསུངས་ལ། ནང་ཚགས་ཀྱི་རྣམ་པས་ཀྱང་གསུངས་པ་སྦྲང་སྐད་ཙམ་གོ་རྒྱུ་མེད། དེ་ནི་གཞུང་ཞབས་དཀྱུས་མ་ནས་རིམ་པར་བརྒྱུད་རིམ་ཚད་དང་ལྡན་པའི་གོམ་པ་སྤོས་ཏེ་རིགས་གཅིག་རྐང་འཛིན་ལྟར་གཞུང་དོན་སྒྲུབ་ཕྱོགས་ཀྱི་རྨང་གཞི་བརྟན་པོ་བརྩིགས་པ་ལས་བྱུང་བས། ཆབ་སྲིད་པ་ཚོའི་མི་དགོས་པའི་ངན་གཤིས་ཁ་མང་པའི་ནོར་འཁྲུལ་ནི། སྐུ་ངོ་མཆོག་ལ་དྲི་ཙམ་ཡང་མེད་ལ། གང་བཤད་པ་རྣམས་ཀྱང་དག་མ་ཐོན་པ། ནང་འགལ། ཟུར་ཟ། ལྗིད་ཁོག་མེད་པ། མང་ཉུང་རན་འཚམས་མིན་པ། བཤད་ཡུལ་རྒྱུས་མ་ལོན་པ། བཤད་ཐབས་ལ་མི་མཁས་པ། ཚིག་རྩུབ་པ། མདོར་ན་གཏམ་གང་བཤད་ཕྱོགས་རིས་པར་འགྱུར་ཉེན་བཅས་རྩ་ནས་མེད་པ་ཞིབ་འཇུག་བྱས་ན་མཁྱེན་ཅིང་། ད་བར་བྱུང་མྱོང་མེད། གཙོ་བོ་མི་ལོ་ ༣༠ རིང་བོད་གཞུང་གི་གསང་བ་ཐམས་ཅད་ཀྱི་ལྡེ་མིག་ཕྱག་ཏུ་བཟུང་ཡོད་ཀྱང་། གསང་བ་འདི་དང་གན་ཤོར་བཅུག་པ་རེད་ཅེས་མཛུབ་མོ་འཛུགས་ས་ཁྱོན་ནས་མེད། འཛིན་སྐྱོང་གི་ལས་དོན་གལ་ཆེའི་རིམ་པ་བཅས་པ་གང་ལ་ཐུག་ཀྱང་ཉར་དགོས་སར་ཏག་ཏག་ཉར། འཇོག་དགོས་སར་ཏག་ཏག་བཞག་ཡོད་པ་ལས། ཡར་གྱི་གནས་ཚུལ་མར་བཤད། ཕར་གྱི་གནས་ཚུལ་ཚུར་བཤད་པའི་གཏམ་ཞིག་གོ་རྒྱུ་མེད། བོད་ཀྱི་ཡབ་མེས་རྫ་དཔལ་སྤྲུལ་དང་རྗེ་གུང་བ་སོགས་མཁས་པ་ཚོས་ཀྱང་ཁ་ཉུང་ལ། བཤད་པ་དག་ཐོན་པ་ནི་ཕོ་རབ་དང་བོད་ཀྱི་མི་གཤིས་ལ་རྣལ་མ་ཡིན་ཚུལ་ལན་མང་གསུངས་ཤིང་། བོད་བཙན་པོའི་སྐབས་ནས་ཀྱང་། ཁོ་ཁྱོ་གར་ཕོ་རྩལ་སྣ་དགུ་དགོས་པ་བསྟན་ཅིང་། དེའི་ནང་ངག་གི་རྩལ་གསུམ་གྱི་ནང་དུའང་། སྨྲ་བ་ཉུང་ལ། སྨྲས་པ་དག་ཐོན་པ། སྨྲ་མཁས་པ་ཡིན་དགོས་ཚུལ་བཀོད་ཡོད།

གསུམ། ཆོལ་གསུམ་ཆིག་སྒྲིལ་དང་། གཞིས་བྱེས་མཉམ་རུབ་ཀྱི་དབུ་ཁྲིད་བྱེད་ཐུབ།

སྐུ་ངོ་དངོས་གྲུབ་ལགས་ལ་བཙན་བྱོལ་ནང་ཆོལ་གསུམ་རིས་མེད་ཀྱི་བྱས་ཅན་བཙོན་ཟུར་རྣམ་པ་དང་། ཤེས་ཡོན་ཅན། གཞུང་ཞབས་ལས་ཟུར། མི་མང་བཅས་ཀྱིས་དགའ་མོས་དང་ཡིད་ཆེས། ཐུགས་རེ་གནང་བའི་ཚད་ཤིན་ཏུ་མཐོ། རྒྱ་ཆེ་མི་མང་གི་སེམས་ལ་བབས་པའི་སྐུ་ངོ་དངོས་གྲུབ་ཀྱི་སྣང་བརྙན་ནི་སྤྱི་མི་ཞིག་ཡིན་པ་ལས། ཟུར་གཅིག་གམ་ཕྱོགས་གཅིག་ཏུ་གཅོད་མཁན་ད་བར་གོ་རྒྱུ་མེད་པས། ཆོལ་གསུམ་ཆིག་སྒྲིལ་གྱི་དབུ་ཁྲིད་བྱེད་ཐུབ་པའི་ཆ་རྐྱེན་དང་འཇོན་ཐང་། ཉམས་མྱོང་སུམ་འཛོམས་ཡིན། ཕྱོགས་གཞན་ཞིག་ནས་དཔྱད་ཚེ། གང་དུ་དོན་དམ་པའི་ཆིག་སྒྲིལ་ཡོང་དགོས་ཚེ་དེའི་འགལ་རྐྱེན་རྣམས་ཞིབ་ཏུ་ངེས་ཤིང་། རྒྱུ་མ་ཕུ་འདེད་ལྟར་ཐུགས་ངོར་ཧ་ཅང་གསལ་བ་ཞིག་དགོས། དེ་ཡོད་ན་ཕྱོགས་ལྷུང་དང་ཧོལ་རྒྱུགས་ཀྱང་ཡོང་ཤེས་མེད། བཙན་བྱོལ་ནང་ཁུལ་ལབ་གླེང་གི་གཞིར་གྱུར་པའི་རྙོག་གྲ་རིམ་པའི་གནས་ཚུལ་ཆ་ཚང་ལ་ཟེར་སྒྲོས་ཙམ་མིན་པར་གཏིང་ལོན་པའི་རྒྱུས་མངའ་ཡོད། རྒྱུས་མངའ་དེ་ཡང་ལས་འགན་བབ་འབྲེལ་གྱིས་ཞིབ་དཔྱོད་ཀྱི་ལམ་ནས་ཐོབ་པ་ཡིན་སྟབས། སྲང་བར་གྱི་གཏམ་ཙམ་ལ་གཞི་བྱས་ཏེ་གཏམ་བཤད་མཁན་དག་དང་མི་འདྲ། དཔེར་ན། སྨན་བཅོས་ཞུ་བ་ལ་ནད་ངོས་འཛིན་གསལ་བོ་དགོས་པ་ཇི་བཞིན། ཀུན་གྱིས་སྤྱི་མིར་ངོས་འཛིན་པའི་མི་ཞིག་གིས་གང་དུ་ཆིག་སྒྲིལ་མ་ཡོང་བའི་འགལ་རྐྱེན་རྣམས་མཁྱེན་པའི་ཐོག ཆིག་སྒྲིལ་ཡོང་ཐབས་གནང་ན་དོན་དམ་གྱི་ཆིག་སྒྲིལ་གོང་འཕེལ་འགྲོ་བའི་རེ་བ་ཤིན་ཏུ་ཆེ། དེ་མ་ཟད་གཞིས་བྱེས་མཉམ་རུབ་ཀྱི་དབུ་ཁྲིད་ཀྱང་བྱེད་ཐུབ། གང་ཡིན་ཞེ་ན། བོད་ནས་གསར་དུ་འབྱོར་བའི་བྱས་རྗེས་ཅན་གྱི་བཙོན་ཟུར་རྣམ་པ་གཙོས་མང་ཆེ་བས། སྐུ་ངོ་དངོས་གྲུབ་མཆོག་གི་བོད་ནང་འབྲེལ་བ་ཞུ་ཕྱོགས། གསར་དུ་འབྱོར་བ་ཚོར་འཚོ་བ་དང་ལས་ཀ མདུན་ལམ་བཀོད་སྒྲིག་བྱེད་སྟངས་ལ་ཧ་ཅང་ཡིད་ཆེས་ཐོབ་ཡོད། མ་གཞི་ནས་བོད་ནང་བྱས་རྗེས་ཆེ་བའི་ཆབ་སྲིད་བཙོན་ཟུར་ཚོས་གནད་དོན་འདི་རིགས་རིམ་བཞིན་གསལ་བཤད་ཞུ་ངེས་སྙམ་པ་བཅས། ཆོལ་གསུམ་ཆིག་སྒྲིལ་དང་གཞིས་བྱེས་མཉམ་རུབ་ཀྱི་དབུ་ཁྲིད་སྐུ་ངོ་དངོས་གྲུབ་ཀྱིས་ཚད་དང་ལྡན་པ་བྱེད་ཐུབ།

བཞི། བསམ་བློ་གུ་ཡངས་པས་ལྟ་བ་ཚང་མ་མཉམ་འཁྲིད་བྱེད་ཐུབ།

སྐུ་ངོ་མཆོག་ལ་གཞོན་སྐྱེས་ཚོས་དགའ་མོས་བྱེད་པ་བཞིན། སྐུ་ངོ་མཆོག་གཞོན་སྐྱེས་ཚོར་ཧ་ཅང་ཐུགས་སྣང་ཆེ། ཕྱི་རྒྱལ་སྤྱི་ཚོགས་ནང་འཚར་ལོངས་བྱུང་བའི་གཞོན་སྐྱེས་ཚོར་རྟག་ཏུ་བོད་རང་གི་རིག་གཞུང་ཟུང་འབྲེལ་གྱི་འདབ་གཤོག་གཉིས་ལྡན་ཞིག་ཡོང་ཐབས་ལ་ཐུགས་འཁུར་རྒྱ་ཆེར་བཞེས་ཀྱི་ཡོད་པ། སྐུ་ངོ་མཆོག་དང་མཇལ་འཕྲད་ཞུས་མྱོང་མཁན་མང་ཆེ་བས་གླེང་། བཙན་བྱོལ་ནང་རང་བཙན་དང་དབུ་མའི་ལམ་གྱི་ལྟ་བ་འཛིན་མཁན་ཁག་གཉིས་ཡོད་པ་རྣམས་ལའང་གཟིགས་ཚུལ་ཚད་དང་ལྡན་པ་ཡོད་པ་ཕྱོགས་གཉིས་ལ་ངོས་འཛིན་ཡོད་པས། མཚམས་རེར་ང་ཚོའི་སྤྱི་ཚོགས་ནང་འདི་དག་ལ་བརྟེན་ནས་མི་དགོས་ལབ་གླེང་ཡོང་བཞིན་པ་དག་ལ་ལམ་སྟོན་ནུས་མཁན། ལམ་སྟོན་གནང་ན་གསན་འཇོག་ཞུ་ཡུལ་སྐུ་ངོ་དངོས་གྲུབ་ལས་རྙེད་དཀའ། སྐུ་ངོ་དངོས་གྲུབ་མཆོག་གིས་བོད་ཀྱི་ལོ་རྒྱུས་ཀྱི་གལ་གནད་རྣམས་དེ་སྔ་བདེ་སྲུང་ཉམས་ཞིབ་ཀྱི་འགོ་འདོམས་གནང་སྐབས་ཡོངས་སུ་མཁྱེན་ལ། བདེ་སྲུང་ཉམས་ཞིབ་ཀྱིས་བཏོན་པའི་རྒྱ་བོད་གཉིས་ལོ་རྒྱུས་ནང་ཐ་དད་ཡིན་པའི་གཏམ་དོན་ཚད་དྲུག་ཅུ་པ་ཞེས་པའི་དེབ་དེ་ནི་བཙན་བྱོལ་ནང་དག་ཐོན་པའི་དཔེ་དེབ་ཚད་འཛིན་སར་གྱུར་ཡོད་པས། དབུ་མའི་ལམ་དང་རང་བཙན་གྱི་རྒྱབ་ལྗོངས་དང་བཅས་པའི་གནས་ཚུལ་ཆ་ཚང་མཁྱེན་གྱི་ཡོད། དེ་བཞིན་གནད་དོན་གང་ཞིག་ཁ་ལ་འཁྱེར་ནས་༧གོང་ས་མཆོག་ལ་མཚད་སྨོད་ཞུས་ཚེ། སྐུ་ངོ་དངོས་གྲུབ་མཆོག་གིས་དེ་སྔ་ནས་མི་མང་གི་སྡིངས་ཆར་རྒོལ་ལན་མཐའ་གཅིག་ཏུ་སྤྲད་པ་ལྟར། མ་འོངས་པར་དེའི་ཐད་ཕྱི་ནང་གསང་གསུམ་གྱི་གནས་ཚུལ་ལ་དཔྱད་ནས་ལན་འདེབས་གནང་ཚེ། རྒྱ་གཞུང་གི་བེད་སྤྱོད་འོག་ཡོད་པ་མང་པོ་ཞིག་རང་བཞིན་གྱིས་འགག་འགྲོ་གི་ཡོད་པས། གུ་ཡངས་སར་གུ་ཡངས། བཙན་དགོས་སར་བཙན་ཐུབ་པ། ཕྱི་ནང་གི་ས་མཚམས་གསལ་བོ་བཀར་ཐུབ་མཁན་ནི་སྐུ་ངོ་འབྲོང་ཆུང་དངོས་གྲུབ་ལས་གཞན་མེད་ཅེས་ན་འུར་གཏམ་དུ་ནམ་ཡང་མི་འགྲོ།

ལྔ། དབུ་མའི་ལམ་དང་འབྲེལ་མོལ་ལ་ཤིན་ཏུ་མཁས་པ།

རྒྱ་ནག་གི་གནས་ཚུལ་ལ་མཁྱེན་རྒྱ་ཡངས་པའི་མདའ་དཔོན་ཟུར་པ་སྟག་ལྷ་ཕུན་ཚོགས་བཀྲ་ཤིས་དང་། དབུ་མའི་ལམ་ལ་མཁྱེན་རྒྱ་ཡངས་པའི་བདེ་སྲུང་དྲུང་ཆེ་ཟུར་པ་བློ་བཟང་སྦྱིན་པ། བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་སོགས། རྒྱ་ནག་ལ་མཁས་པ། རྒྱལ་སྤྱིར་མཁས་པ། རྒྱ་གར་ལ་མཁས་པ། བོད་ལ་མཁས་པ། དབུ་མའི་ལམ་དང་འབྲེལ་མོལ་ལ་མཁས་པ་ཞེ་གཅིག་གི་མཉམ་དུ་ཉིན་མཚན་བསྟུད་དེ། ལོ་ནས་ལོར་ཕྱག་ལས་གནང་ཙང་། དབུ་མའི་ལམ་གྱི་སྔ་ཕྱིའི་འགངས་ཆེའི་གནད་དོན་ཡོངས་རྫོགས་དང་། རྒྱ་ནག་དང་འབྲེལ་བ་བྱུང་བ་ནས་འབྲེལ་མོལ་ཐེངས་བདུན་གནང་བའི་བར་གྱི་བརྒྱུད་རིམ་ཧྲིལ་བོར། དངོས་དང་ཐད་ཀར་གྱིས་འབྲེལ་བ་ཡོད་སྟབས། གཞན་ལས་མཁྱེན་རྒྱ་དང་དངོས་དོན་ཇི་བཞིན་གཟིགས་ཡོད་པའི་རྨང་གཞི་ཧ་ཅང་བརྟན་པ་བཅས་ཀྱིས། མ་འོངས་པར་འབྲེལ་མོལ་གནང་ཕྱོགས། དབུ་མའི་ལམ་གྱི་སྲིད་བྱུས་འཛིན་ཕྱོགས་ལ་གཞན་དྲིང་མི་དགོས་པ་ཡིན། ལྷག་པར་དམིགས་བསལ་སྐུ་ཚབ་རྣམ་གཉིས་ཀྱི་ཐུགས་འགན་བཞེས་རིང་གི་ཕྱི་ནང་གསང་གསུམ་གྱི་གནས་ཚུལ་ཡོད་དོ་ཅོག་ལ། སྐབས་དེའི་བཀའ་བློན་ཁྲི་པ་དང་བདེ་སྲུང་བཀའ་བློན་འབྲོང་ཆུང་དངོས་གྲུབ་རྣམ་གཉིས་རྒྱུས་ཡོད་ཆེ་ཤོས་ཡིན་སྟབས། ཕྱོགས་གང་ནས་བལྟས་ཀྱང་སྐུ་ངོ་དངོས་གྲུབ་ལས་འོས་པ་གཞན་མེད་ཚུལ་མི་བཤད་ག་མེད་རེད།

དྲུག བོད་ཀྱི་རིག་གཞུང་གིས་བསྐྲུན་པའི་བོད་མིའི་ཞགས་རྩི་ཚད་ལོངས་པ་ཡོད།

ད་ལྟ་དུས་ངན་ཞིང་། མིའི་ལུང་པར་གྱར་ནས་དུས་རབས་ཕྱེད་ལྷག་འགོར་བས། བོད་ནང་བོད་མི་རྒྱ་བསྒྱུར་གྱི་དངངས་འཚབ་ཉིན་རེ་བཞིན་ཡོད་མུར། བོད་ཕྱི་ལོག་ཏུ་བོད་ཀྱི་རིག་གཞུང་གི་ཞགས་རྩི་ཅན་གྱི་མི་རབས་འཚར་ལོངས་ཡོང་བར་དམིགས་བསལ་ཤུགས་རྒྱག་དགོས་པའི་དུས་ལ་བབས་ཡོད། རང་གི་རིག་གཞུང་བརླགས། གཞན་གྱི་རིག་གཞུང་ལ་ཡང་གཏིང་མ་ཚུགས་པར། མི་དགོས་པ་ཇི་སྙེད་ཅིག་ལ་ལད་མོ་བྱས་ཏེ། བོད་ཀྱི་ཁྱད་ཆོས་ལྡན་པའི་སྤྱི་ཚོགས་ལ་འགྱུར་བ་འགྲོ་བཞིན་པའི་སྐབས་འདིར། ངེས་པར་དུ་བོད་ཀྱི་རིག་གནས་ཀྱི་ཞགས་རྩི་ལྡན་ལ། བོད་ཀྱི་རིག་གནས་ལ་ངེས་པ་རྙེད་པའི་མི་ཞིག་གིས་དབུ་ཁྲིད་ཐུབ་ན་དགེ་མཚན་བླ་ལྷག་ཏུ་ཆེ། སྐུ་ངོ་དངོས་གྲུབ་ལགས་དེའི་ཐད་གཟེངས་སུ་ཐོན་ཅིང་ངེས་པ་རྙེད་པ་ཞིག་རེད། རྟག་ཏུ་ལས་འབྲས་རྩ་ཆེར་བརྩི་ཞིང་། ནང་ཆོས་ཀྱི་གཞི་རིམ་གྱི་གནས་ཚུལ་ཁག་ལ་ཐུགས་སྣང་ཟབ་པོ་གནང་མུས་མ་ཟད། གོ་ཐོས་བྱས་ན། ལོང་ནམ་ཡོད་ལ་བརྙན་འཕྲིན་ནང་༧གོང་ས་མཆོག་གི་གསུང་ཆོས་གསན་བཞིན་བཞུགས་ཀྱི་ཡོད་འདུག ཉིན་རེའི་ཁ་བཏོན་དགེ་སྦྱོར་གྱི་རིམ་པའང་རྒྱུས་ཡོད་གྲོགས་པོ་ཚོས་བཤད་ན། ཐུན་མང་དུ་བཅད་དེ། རྟེན་དགེ་བསྙེན་ཡིན་སྟབས་སྲུང་བྱ་མཐའ་དག་ལ་དྲན་ཤེས་ཚུལ་བཞིན་བསྟེན་ཏེ་འཚོ་བ་སྐྱེལ་མཁན་ཞིག་ཡིན་པ་ནི་དམིགས་བསལ་གྱི་ཁྱད་ཆོས་ཤིག་རེད་སྙམ། འགོ་ཁྲིད་ཚོས་ཅི་ཙམ་ནང་ཆོས་ཀྱི་རྒྱུ་འབྲས་རྣམ་བཞག་དང་། ལྟ་གྲུབ་ཁག་ལ་ངེས་པ་རྙེད་པ་དེའི་ཚོད་ཀྱིས་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་བྱེད་ཕྱོགས་ཐད་ནུས་ཤུགས་གཅིག་ཏུ་སྤུངས་ངེས་སྟབས། ང་ཚོ་བོད་མི་ཚོར་དགོས་པའི་དོན་གྱི་སྙིང་བོ་ནི་འདི་རེད། ཆབ་སྲིད་ནི་འཕར་འབབ་དང་འགྱུར་བ་ཆེ་ཞིང་། མང་ཆེ་བ་གཞན་ལ་ལྟོས་དགོས་པ་རེད། འོན་ཀྱང་རང་གི་ཆོས་རིག་འཛིན་སྐྱོང་ནི་རང་གིས་ག་ཚོད་འཇོན་ན་དེ་ལྟར་དུ་གནང་ཆོག་སྟབས། བོད་ཀྱི་རིག་གནས་ཀྱི་ཞགས་རྩི་ལྡན་པའི་དབུ་ཁྲིད་ཚད་ལྡན་ཞིག་དགོས་པ་སྨྲས་མེད་ལ་སོང་། སྲིད་སྐྱོང་འོས་མིའི་ཁྲོད་སྐུ་ངོ་དངོས་གྲུབ་ལས་ལྷག་མེད་པ་ཚང་མས་མཁྱེན་གསལ་ལྟར་ལགས།

བདུན། གཞིས་ཆགས་དང་སློབ་གྲྭ་ཁག་ཟླ་སྒྲིལ་ལ་ཐུགས་འཁུར་ཆེ་བ།

གཞིས་ཆགས་དང་སློབ་གྲྭ་ཁག་གི་ཁྱོན་ཡོངས་ཀྱི་གནས་བབ་ལ་ལོ་བཅུ་ལྷག་བཀའ་ཤག་ནང་མཁྱེན་རྟོགས་གནང་ཡོད་པ་མ་ཟད། བོད་ནང་ནས་བཙན་བྱོལ་བོད་མིའི་ཤེས་ཡོན་སྐོར་བཏོན་པའི་དགོངས་ཚུལ་ཞིག་ཡིན་ན་ཐོག་མར་དགའ་ལྡན་ཕོ་བྲང་དང་སྐུ་ངོ་དངོས་གྲུབ་གང་རུང་ལ་འབྱོར་གྱི་ཡོད། རྟག་ཏུ་ཤེས་ཡོན་གཙོས་གལ་གནད་ཅན་གྱི་ལས་དོན་མཐའ་དག་ལ་ཐུགས་རྒྱུས་ཞིབ་ཚགས་མངའ་སྟབས། ཁོང་ལ་ལམ་སྟོན་ཞུ་མི་དང་། མཇལ་འཕྲད་ཞུ་མི་དོ་སྣང་ཅན་དང་། དགེ་རྒན། ཤེས་ཡོན་ཅན་མང་པོའི་འདོད་བློ་ཡོངས་སུ་ཚིམ་ཡོད། གཞིས་ཆགས་དང་སློབ་གྲྭ་ཟླ་སྒྲིལ། སློབ་གྲྭ་ཁག་ཏུ་ནང་དོན་རིག་པ་ཆེད་སྦྱོང་སྡེ་ཚན་གསར་འཛུགས་བཅས་ལ་རྒྱ་གར་གཞུང་དང་འབྲེལ་བ་དམིགས་བསལ་ཆེ་སྟབས། ལས་དོན་ལམ་ལྷོང་གི་གོམ་བསྐྱོད་ཆེ་ཞིང་། བོད་མིའི་སྤྱི་ཚོགས་ནང་མཐོ་དམའ་ཤེས་ལྡན་མང་པོས་ཡིད་ཆེས་གཅིག་ཏུ་ཞུ་པས། གང་སར་ལས་དོན་ལེགས་འགྲུབ་ཡོང་ངེས་ཀྱི་རྟགས་མཚན་མཐོང་རྒྱུ་ཡོད་པ་ལྟ་བུ་ནི་སྐུ་ངོ་འབྲོང་ཆུང་ལགས་ཕུད། གཞན་ལ་འཛོམས་དཀའ་བར་སྙམ་པ་བཅས། གཙོ་བོར་མི་སོ་སོའི་རྣམ་དཔྱོད་གཞན་བྲན་དུ་མ་བཏང་བར། སྤྱི་སེམས་ཀྱི་བློ་རྒྱ་སྐྱེད་དེ་དགོངས་བཞེས་གནོང་དང་། ཏན་ཏན་སྐུ་ངོ་དངོས་གྲུབ་ནི་གཞན་དང་མ་འདྲ་བ་ཞིག་ཡིན་ནོ།།  །།

བསྐྱར་བཅོས།: ༢༠༢༠/༠༧/༡༣

Leave a Reply

7 thoughts on “བཀའ་ཟུར་འབྲོང་ཆུང་དངོས་གྲུབ་ཀྱི་ཐུན་མོང་མིན་པའི་ཁྱད་ཆོས།

  1. བདེན་པའི་རྒྱབ་ལངས།

    ཁྲིམས་མཐུན་དང་ཁྲིམས་རྒལ་གང་ཡང་ཡིན་བཟོ་མི་འདུག་མང་གཙོ་ཟེར་ན་དེ་འདྲ་ཞིག་ལ་གོ་དགོས་ཀྱི་ཡོད་པ་འདྲ། དངོས་གནས་རང་དབང་ལོངས་སྤྱོད་ཤེས་ན་ག་རེ་ཡིན་ནའང་ཆོག་པ་ཤ་སྟགས་རེད་གདའ།

  2. གཞུང་པ་ཚེ་དབང་བསོད་ནམས

    དབུས་འོས་བསྡུ་ལས་ཁང་ནས་སྲིད་སྤྱིའི་འོས་བསྡུའི་སྐོར་གསལ་བསྒྲགས་མ་གནང་གོང་ནས་སྲིད་སྐྱོང་དང་འབྲེལ་བའི་སྐོར་གསར་ཤོག་སྟེང་གསལ་བསྒྲགས་གནང་རྒྱུ་དེ་བཙན་བྱོལ་བོད་མིའི་བཅའ་ཁྲིམས་དང་འོས་བསྡུའི་སྒྲིག་གཞི་སོགས་དང་མཐུན་པ་ལ་ངོས་འཛིན་དགོས་པ་རེད་དམ་ཁྲིམས་འགལ་དང་སྒྲིག་འགལ་ལ་ངོས་འཛིན་དགོས་པ་རེད?