བཀའ་ཟུར་འབྲོང་ཆུང་དངོས་གྲུབ་མཆོག་ལ་རྒྱབ་སྐྱོར་བྱེད་དགོས་པའི་ཐུན་མིན་རྒྱུ་མཚན་བཅུ་གསུམ།

ཤར་ཕྱོགས་ཁུག་རྟ།

གླེང་སློང་།

ད་ཆ་འོས་བསྡུའི་སྒྲིག་གཞི་བསྐྱར་བཅོས་ཀྱིས་ཚོགས་སྡེ་ཁག་གིས་འོས་མི་འདོན་ལམ་བཀག་ཟིན་པས། མི་མང་མི་རེ་ངོ་རེས་ནུས་པ་རྩལ་བཏོན་གྱིས་འོས་མིའི་སྐོར་ཤེས་རྟོགས་བྱེད་དགོས་པ་ནི་གཡོལ་ཐབས་མེད་པའི་ལས་འགན་ཞིག་ཆགས་ཡོད་ལ། རྒྱུ་མཚན་ཁོ་ནར་གཞི་བཅོལ་ཏེ་འོས་བསྡུའི་ལས་རིམ་ནང་ཞུགས་ཐུབ་ཚེ། བོད་སྤྱི་ལ་ཕན་ངེས་པ་ཐེ་ཚོམ་མེད་སྟབས། གུས་པས་བཀའ་ཟུར་འབྲོང་ཆུང་དངོས་གྲུབ་མཆོག་ལ་རྒྱབ་སྐྱོར་བྱེད་དགོན་དོན་ཡང་རང་སེམས་ཁོ་ནར་མ་བཞག་པར། གཟུར་གནས་བློ་ལྡན་རྣམས་ལ་ཞུ་བར་སྤྲོ་ལ། གུས་ལ་ཡིད་ཆེས་དང་རེ་བ་བྱེད་མཁན། དེ་བཞིན་རྒྱབ་སྐྱོར་ཞུ་ས་ནོར་བར་ངོས་འཛིན་གནང་མཁན་རེ་ཟུང་ཞིག་གིས་ཀྱང་དངོས་བརྒྱུད་གང་རུང་ནས་རྒྱུ་མཚན་ཅི་ཡིན་གྱི་དྲི་བ་རེ་འགའ་འབྱོར་སོང་བས། དེ་དག་ཚང་མར་དཀྱུས་གཅིག་ཏུ་ལན་འདི་ཕུལ་བ་ཡིན།

         བཀའ་ཟུར་མཆོག་ངོ་ཤེས་རིམ་དང་དེའི་རིང་གི་མྱོང་བ་ཕྱོགས་སྡོམ།

བཙན་བྱོལ་དུ་ཐོག་མར་འབྱོར་ཉིན་ནས་བཀའ་ཟུར་མཆོག་བོད་ཀྱི་རྩ་དོན་དང་འབྲེལ་ཏེ་ངོ་ཤེས་པར་གྱུར། དེ་ནས་ད་བར་མི་ལོ་ ༡༨ དང་། ལྷག་པར་གཞུང་དང་མི་མང་གི་སྲི་ཞུར་ཞུགས་ཁུལ་གྱི་ལོ་ ༡༣ རིང་གངས་ཅན་སྐྱིད་གཤོངས་སུ། བོད་ཀྱི་གནས་ཚུལ་ལ་ཞབས་ཞུ་དང་སློབ་སྦྱོང་ཟུང་འབྲེལ་བྱས་རིམ་ནང་། བཀའ་ཟུར་འབྲོང་ཆུང་དངོས་གྲུབ་མཆོག་ཡིད་ཆེས་བློ་གཏད་ཆོག་པའི་དབུ་ཁྲིད་ཚད་འཕེར་ཞིག་ཏུ་རྒྱུ་མཚན་རིམ་བརྩེགས་ལ་བརྟེན་ནས་ཡིད་ཆེས་ངེས་རྙེད་ཟབ་མོ་བྱུང་བས། དེ་སྔ་ ༢༠༡༨ ནས་༸གོང་ས་མཆོག་ལྷོད་བཞུགས་ཡོང་ཆེད་དང་བོད་མི་མང་གི་ཆེད་དུ་སྐུ་ངོ་མཆོག་ ༢༠༢༡ ལོར་སྲིད་སྐྱོང་དུ་བཞེངས་དགོས་ཀྱི་འདུག་ཅེས་གསོལ་འདེབས་ནན་ཆེར་ཞུས་པ་ཡིན།

         བོད་མིའི་ཞག་རྩི་ལྡན་པའི་མི་སྤུས་ཚད་ལོངས་པ་ཡོད་པ།

བོད་ཀྱི་རྩ་དོན་གྱི་སྙིང་པོ་རབ་ཏུ་ཕྱུག་པའི་བོད་ཀྱི་རིག་གནས་ལ་ཐུག་པས། བོད་ཀྱི་རིག་གནས་དང་དེའི་གཞི་རྟེན་བོད་ཀྱི་སྐད་ཡིག་ཉམ་ཆག་ཕྱིན་ཚེ། བོད་ཀྱི་བདེན་དོན་འཐབ་རྩོད་ཀྱི་སྙིང་པོ་བོར་ཟིན། བོད་ཀྱི་སྲིད་སྐྱོང་ནི་བོད་རང་གི་རིག་གནས་ལ་བཅོས་མིན་གྱི་ཡིད་ཆེས་ཐོབ་པ་ཞིག་དགོས་ཤིང་། ༸གོང་ས་༸སྐྱབས་མགོན་ཆེན་པོས་དེ་སྐྱོབ་ཐབས་ཀྱི་བཀའ་དགོངས་ལམ་སྟོན་རྣམས་ཚུལ་བཞིན་ལག་བསྟར་བྱེད་མཁན་ཞིག་དགོས་པས། བོད་ཀྱི་རིག་གནས་ཀྱིས་བསྐྲུན་པའི་མི་གཞི་ཚད་ལོངས་ཤིང་། ལས་འབྲས་གཙིགས་སུ་འཛིན་ཅིང་། དྲང་བདེན། ཡ་རབས། བཟང་སྤྱོད། གཞན་ཕན་བཅས་སྤྱི་སྒེར་གྱི་ལས་དོན་གང་གནང་ཁྲོད་དབྱེར་མེད་དུ་འདྲེས་པར་གནང་མཁན་ཞིག་ཡིན་པས། སྲིད་སྐྱོང་གི་གནང་སྒོའི་ཆ་ཐམས་ཅད་དུ་ཁོང་གིས་བོད་ཀྱི་རིག་གནས་སྙིང་པོར་གྱུར་བའི་ལས་དོན་ཐད་ཤུགས་བསྐྱོན་ངེས་པ་ནི་ཡིད་ཆེས་བློས་འགེལ་བྱས་ཆོག་པར་སྙམ།

         དུས་ཚོད་ཀྱི་ཛ་དྲག་རང་བཞིན་ལ་གདོང་ལེན་བྱེད་ཐུབ་པ།

༸གོང་ས་སྐྱབས་མགོན་ཆེན་པོ་དགུང་གྲངས་ ༩༥ སོན་མཚམས་ནི་བོད་མི་རིགས་ཀྱི་གནས་བབ་སྤྱི་ཡོངས་ནས་ཞུས་ན། ཟླ་བ་ཡར་ངོ་མར་ངོའི་དཀྱིལ་ཐིག་ཡིན། ད་ནས་རྩིས་པའི་མི་ལོ་ ༡༠ ནི་བོད་མི་རིགས་ཀྱི་བདེན་དོན་འཐབ་རྩོད་ནང་ཤིན་ཏུ་གལ་གནད་ཆེན་པོ་ཆགས་ཡོད་པས། གནས་སྟངས་འདི་འདྲའི་སྐབས་ཆོལ་གསུམ་ཆོས་བརྒྱུད་དང་བཅས་པས་སྤྱི་མིར་ངོས་འཛིན་ཡིད་ཆེས་ཐོབ་པ་ཞིག་སྲིད་སྐྱོང་དུ་ཐོབ་དགོས་པ། བོད་སྤྱི་པའི་དགོས་མཁོ་ཧ་ཅང་གལ་ཆེན་ཞིག་ཆགས་ཡོད་པས། དེ་ལྟ་བུའི་མི་ཞིག་ནི་བཀའ་ཟུར་འབྲོང་ཆུང་དངོས་གྲུབ་མཆོག་རང་རེད་སྙམ།

         ༸གོང་ས་མཆོག་བོད་མིའི་བླ་སྲོག་ཏུ་ངེས་ཤེས་རྙེད་ཅིང་བཀའ་དགོངས་སྒྲུབ་རྒྱུའི་མཐུན་རྐྱེན་འཛོམས་པ།

༸གོང་ས་༸སྐྱབས་མགོན་ཆེན་པོའི་དགོངས་གཞི་ལམ་སྟོན། མཚན་གྱི་གཟི་བརྗིད་ཚུན་ཆད་བོད་ཀྱི་བདེན་དོན་འཐབ་རྩོད་དང་ཁ་འབྲལ་ཐབས་མེད། ཇི་ཙམ་༸གོང་ས་མཆོག་གི་ལམ་སྟོན་འོག་ཤར་བསྐྱོད་ཐུབ་ན་བོད་ལ་རེ་བ་ཡོད་ཅིང་། དེ་མིན་བོད་ནང་རིམ་བསྒྱུར་རྩད་རྫོགས་ཀྱིས་བོད་མི་རྒྱ་མིར་བསྒྱུར་འགྲོ་བ་དང་། བཙན་བྱོལ་ནང་ཁ་འཐོར་ནས་རིམ་ཡལ་དུ་འགྲོ་ངེས་པའི་རྟགས་མཚན་གང་སར་མཐོང་རྒྱུ་ཡོད་པས། ༸གོང་ས་༸སྐྱབས་མགོན་ཆེན་པོའི་བཀའ་དགོངས་ལམ་སྟོན་གྱི་ཆ་ཙམ་ཡང་ལྷག་ལུས་མེད་པར་དུས་ལྟར་ལག་བསྟར་འབད་སྒྲུབ་ལ་གཞོལ་རྒྱུར། སྙིང་སྟོབས། བློས་གཏོང་། ཉམས་མྱོང་། ཞིབ་འཇུག། གཞོགས་འདེགས་བཅས་ཀྱི་ཆ་རྐྱེན་ཡོད་ཚད་བཀའ་ཟུར་འབྲོང་ཆུང་དངོས་གྲུབ་མཆོག་ལ་ཚང་འདུག་སྙམ།

      གཞིས་ལུས་མི་མང་གི་མངོན་འདོད་དང་གནས་སྟངས་ཚིག་ཙམ་མིན་པར་ཞིབ་ཏུ་མཁྱེན་པ།

བཀའ་ཟུར་མཆོག་བོད་དུ་འཁྲུངས་པ་དང་། བོད་ནས་ཕེབས་མཁན་ཚོའི་ནང་ཆབ་སྲིད་དང་འབྲེལ་བ་ཆགས་པའི་མི་སྣ་བརྒྱ་ཆ་དགུ་ཅུ་གོ་དགུས་ཞིབ་ཏུ་མཇལ་འཕྲད་ཞུས་ཡོད། ལོ་རབས་ ༨༠ ནང་བོད་དུ་གསང་བའི་ངང་རང་སྲོག་བློས་གཏོང་གིས་ཕེབས་པས། བོད་ནང་གི་བོད་མི་ཚོར་འཐབ་རྩོད་ཀྱི་སྙིང་སྟོབས་དང་རེ་བ་འཕར་མ་ཐོབ། གཉེན་འཕྲད་སྒོ་མོ་ཕྱེས་པ་ནས་གཞུང་སྒེར། གཞན་ཡང་ཕྱི་མི་སོགས་བརྒྱུད་བོད་ནང་གི་གནས་ཚུལ་མང་པོ་འབྱོར་ཡོད། ༡༩༩༧ ལོར་མང་མོས་ཐག་གཅོད་འོས་བསྡུའི་སྐབས་བོད་ནས་འབྱོར་བའི་བསམ་ཤོག་དང་། ༢༠༠༨ ལོར་དམིགས་བསལ་ཚོགས་ཆེན་བསྡུ་སྐོང་སྐབས་བོད་འབྱོར་བསམ་ཚུལ། ༢༠༡༡ ལོར་ཆབ་སྲིད་དང་འཛིན་སྐྱོང་གི་སྐུ་དབང་རྩིས་སྤྲོད་སྐབས་གཞུང་མང་རྒྱལ་ཡོངས་ཚོགས་ཆེན་བསྡུ་སྐོང་སྐབས་བོད་ནས་དགོངས་ཚུལ་འབྱོར་ཡོད་པ་སོགས་ཀྱིས། ༸དཔལ་ལྡན་དགའ་ལྡན་ཕོ་བྲང་ཡིག་ཚང་ཕུད། གཞིས་ལུས་བོད་མིས་དགོངས་ཚུལ་ཕུལ་ས་གཉིས་པ་མེད་པ་དང་ཟམ་པ་ལྟ་བུ་ཆགས་ཡོད་པས། བོད་ནང་གི་གནས་ཚུལ་ཞིབ་ཕྲ་མཁྱེན་རྟོགས་ཡོད་པ་བཀའ་ཟུར་འབྲོང་ཆུང་ལས་ལྷག་མེད་ཅེས་ཚིག་ཐག་བཅད་ནས་ཞུ་ཐུབ། གུས་པ་ལྟ་བུ་བོད་ནས་གསར་འབྱོར་གྲས་ཡིན་ཡང་། རང་གི་ཕ་ཡུལ་ཙམ་མ་གཏོགས། བོད་ཁྱོན་ཡོངས་ཀྱི་གནས་ཚུལ་ཞིབ་ཚགས་ཤེས་ཀྱི་མེད། བཀའ་ཟུར་མཆོག་ལས་འགན་གྱི་ཆ་ནས་བོད་ཁྱོན་ཡོངས་ནས་གནས་ཚུལ་ཞུ་ས་ལྟ་བུ་ཆགས་ཡོད། དེ་ཙམ་མ་ཟད། ཁོང་གིས་བོད་དུ་མི་མང་པོ་མྱུལ་ཞིབ་ཏུ་བཏང་ཡོད་ལ། ཡོངས་གྲགས་གསལ་བོ་ཆགས་པའི་དཔེ་མཚོན་གཅིག་ལ། བཙོན་ཟུར་ངག་དབང་འཆི་མེད་ལགས་སྔ་ཕྱི་ཐེངས་ ཙམ་བོད་དུ་བཏང་བ་ཁོང་གི་རྩོམ་ཡིག་བརྗེད་དཀའ་བའི་བདེ་སྲུང་བཀའ་བློན་ཞེས་པར་གསལ་འདུག་པ་བཅས་རྒྱུ་མཚན་ཚད་ཐུབ་གྲངས་མང་གིས་སྒྲུབ་ཐུབ་པ་ནི། བོད་ཁྱོན་ཡོངས་ཀྱི་གནས་སྟངས་ཞིབ་ཏུ་མཁྱེན་པའི་དབུ་ཁྲིད་ཅིག་ཡོད་པ་ནི་བཀའ་ཟུར་འབྲོང་ཆུང་དངོས་གྲུབ་མཆོག་རེད་སྙམ།

         གཞིས་ལུས་རྒྱ་ཆེ་མི་མང་གི་སྙིང་སྟོབས་རྒྱུན་སྲིང་དང་། བོད་མིའི་ཆིག་སྒྲིལ་གྱི་རྩ་བ་ཉམ་ཆག་འགྲོ་གཞི་གཏན་འགོག་ཐུབ་པ།

བོད་ནང་གི་དོན་གྱི་བདག་པོ་བོད་མི་ཚོའི་དགོངས་ཚུལ་དང་ཐུགས་རེ་མཁྱེན་གྱི་ཡོད་པས། ནམ་ཡང་གཞིས་ལུས་བོད་མི་ཚོ་སེམས་ཤུགས་ཆག་གཞིའི་ལས་དོན་ཚོད་འཛིན་ཐད། སྐུ་ངོ་མཆོག་གིས་ཕྱི་ནང་གསང་གསུམ་ནས་ལས་དོན་སྣ་མང་བསྒྲུབས་འདུག་པ་ཞིབ་ཏུ་བལྟས་ན་ཤེས། ༸གོང་ས་སྐྱབས་མགོན་ཆེན་པོ་འཛམ་གླིང་གི་༸སྤྱི་ནོར་ཡིན་པ་ལྟར། བོད་མི་ས་ཡ་དྲུག་གི་ཁོག་པའི་སྙིང་དང་དཔྲལ་བའི་མིག བོད་དོན་བདེན་མཐའ་གསལ་ཐབས་ཀྱི་ནུས་པ་གོང་ན་མེད་པ་དེ་ཡིན། ཆོས་དང་ཆབ་སྲིད། སྤྱི་ཚོགས། མི་མང་གི་མངོན་འདོད་དང་སེམས་ཤུགས་སོགས་གང་ཅིའི་སྲོག་རྩ་༸གོང་ས་ཆེན་པོ་ཉག་ཅིག་ལ་ཐུག་ཡོད་པས། བཀའ་ཟུར་མཆོག་གིས་༸གོང་ས་མཆོག་གི་སྐུ་ཕྱྭར་གནོད་རིགས་དང་། མཚན་སྨད་ཟུར་ཟ་ཞུ་མཁན་ཚོར་གདོང་ལེན་མཐར་ཕྱིན་པ་གནང་ཡོད། དཔེ་མཚོན་ནི། བོད་ཀྱི་ལོ་རྒྱུས་ནང་གི་ཉེས་ཅན་པ། རྒྱ་དམར་གྱི་རྒྱུགས་ཁྱི་དོལ་རྒྱལ་ཚོགས་པའི་རང་མཚང་དམར་རྗེན་དུ་བཏོན་ཏེ། འཛམ་གླིང་ནང་སྐད་གྲགས་ཆེ་བའི་གསར་འགྱུར་བརྒྱུད་ལམ་ཐོག་ཁུངས་སྐྱེལ་ཐུབ་པ་བྱུང་ཡོད་ལ། རྒྱ་གར་གཞུང་དང་ཨ་རི་གཞུང་གཉིས་ཀར་དོལ་རྒྱལ་ཚོགས་པའི་བྱ་བྱེད་ལས་གསུམ་ངོ་སྤྲོད་གསལ་བོ་ཞུས་པས། ད་ཆ་ཁོ་པ་ཚོའི་གདོང་རིས་གསལ་པོ་ཆགས་ཡོད། དེ་བཞིན་མཚན་སྨད་ཞུ་མཁན་རྣམས་ལ་རྒྱུ་མཚན་ཚད་ལྡན་གྱི་ལམ་ནས་སྨྲ་བ་མེད་པའི་གནས་སུ་བཀོད་ཡོད་ཅིང་། མ་འོངས་སྐུ་ངོ་མཆོག་གི་བཀའ་ཤག་ནས་འདིའི་ཐད་དམིགས་བསལ་ཤུགས་སྣོན་རྒྱག་ངེས་སྟབས། བོད་མི་འཐོར་བཤིག་འགྲོ་གཞིའི་མཚན་སྨད་ཞུ་བའི་བྱས་ཉེས་འདི་རིགས་རྩད་ནས་མེད་པ་བཟོ་ངེས་པ་ཞུ་མ་དགོས་པས། བཀའ་ཟུར་མཆོག་ནི་ལས་དབང་གིས་བསམ་སྤྱོད་མ་རུང་བ་དེ་དག་གི་མགོ་གནོན་དུ་མངགས་པ་ཡང་མིན་ནམ་སྙམ།

         རྒྱ་ནག་གིས་བོད་ཐོག་འཛིན་པའི་སྲིད་བྱུས་རགས་པ་ཙམ་མིན་པར་ཞིབ་ཏུ་མཁྱེན་པ།

བཙན་བྱོལ་ནང་གི་མཐོ་རིམ་མི་སྣ་ཚོས་རྒྱ་ནག་གིས་བོད་ཐོག་འཛིན་པའི་སྲིད་བྱུས་ལ་འགྲེལ་བཤད་གནང་སྐབས། ནམ་རྒྱུན་ཞིབ་ཚགས་དེ་ཙམ་མཐོང་གི་མེད། ཡིན་ཡང་། སྐུ་ངོ་འབྲོང་ཆུང་ལགས་ནི་དེ་ལས་ལྡོག་སྟེ། བོད་དུ་རྒྱ་མི་སླེབས་པ་ནས། རིག་གནས་གསར་བརྗེ། མི་མང་སྤྱི་ཁང་ཟེར་པ་སོགས་དང་། ལོ་རབས་བརྒྱད་ཅུའི་ནང་ཧུའུ་ཡའོ་པང་གི་སྐབས་ནས་ཚུགས་པའི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཟེར་པ་ཁག དེ་བཞིན་རྒྱ་རིགས་ཤེས་ལྡན་གཟུར་གནས་པ་སྒེར་གྱི་བསམ་ཚུལ་རྩོམ་ཡིག་ཁག་དེ་སྔ་བདེ་སྲུང་ཉམས་ཞིབ་ཁང་ནས་བོད་བསྒྱུར་གནང་ཡོད་པ་དག བདེ་སྲུང་ཉམས་ཞིབ་ཁང་གིས་བཏོན་པའི་རྒྱ་བོད་འབྲེལ་བའི་ལོ་རྒྱུས་སྐོར་གྱི་ཁུངས་གཏུག་སའི་དེབ་གཏམ་དོན་ཚན་དྲུག་ཅུ་པ།བདེ་སྲུང་བཀའ་ཟུར་སྟག་ལྷ་ཕུན་ཚོགས་བཀྲ་ཤིས་ཀྱིས་རྒྱའི་ཡིག་ཚང་ནས་བོད་འབྲེལ་ལོ་རྒྱུས་ཟུར་བཏོན་གནང་བ་དཔར་བསྐྲུན་བྱས་པས་མཚོན། བགྲང་མི་ཚར་པའི་གནས་ཚུལ་མང་པོའི་ཐད་དངོས་སུ་ལམ་སྟོན་ཕྱག་ལས་གནང་ཙང་། རྒྱ་ནག་གིས་བོད་ཐོག་འཛིན་པའི་སྲིད་བྱུས་ཀྱི་གོ་རིམ་དང་། འགྱུར་བ། ཞི་དྲག་གི་ཐབས་ལམ། དམིགས་ཡུལ་བཅས་ཞིབ་ཏུ་མཁྱེན་པའི་ཐོག་གཏམ་བཤད་ཚད་འཕེར་གནང་ཡོད་པ་ཀུན་གསལ་ལ་སོང་། རྒྱ་ནག་གིས་བོད་ཐོག་འཛིན་པའི་སྲིད་བྱུས་ལ་མཁྱེན་རྒྱ་མཆོག་ཏུ་ཡངས་པ་ཤེས་ལྡན་གཟུར་གནས་ཀུན་གྱིས་ཁས་ལེན་ངེས་སྙམ། གནད་འདི་ཧ་ཅང་གལ་ཆེ་བས་སྲིད་སྐྱོང་གི་ཐུགས་འགན་བཞེས་མཁན་ཞིག་ལ་མེད་ཐབས་མེད་པའི་ཆ་རྐྱེན་ཞིག་ཆགས་ཡོད།

         བོད་རྒྱ་འབྲེལ་མོལ་གྱི་ཕྱི་ནང་གསང་གསུམ་གྱི་གནས་ཚུལ་ཆ་ཚང་མཁྱེན་པ།

དབུ་མའི་ལམ་གྱི་བོད་རྒྱ་འབྲེལ་མོལ་ཐད། བོད་ནང་གི་དོན་གྱི་བདག་པོ་བོད་མི་ཚོའི་དགོངས་ཚུལ་ཤེས་པ། ༸གོང་ས་མཆོག་གི་ལམ་སྟོན་དགོངས་གཞི་རྣམས་ཐུགས་ལ་ངེས་པ། ༡༩༧༩ ནས་ ༡༩༩༤ བར་དང་། ༢༠༠༢ ནས་ ༢༠༡༠ བར་གྱི་རྒྱ་བོད་འབྲེལ་བའི་ཕྱི་ནང་གསང་གསུམ་གྱི་གནས་ཚུལ་ཡོངས་རྫོགས། དེ་བཞིན་བཀའ་ཤག་གིས་བཙུགས་པའི་བོད་རྒྱ་ཞི་མོལ་ལས་དོན་ཚོགས་ཆུང་གི་ལས་དོན་མཐའ་དག རྒྱ་གར་གཞུང་གི་གསང་ལས་ཀྱིས་གཙོས་སྲིད་གཞུང་ཁག་གིས་བོད་རྒྱ་འབྲེལ་མོལ་དང་དེའི་མཐུད་ཐབས་གཉིས་ཀར་ལྟ་སྟངས་བཅས་ཕྱོགས་ཡོངས་ནས་ཞིབ་ཏུ་མཁྱེན་མཁན་ཡང་བཀའ་ཟུར་མཆོག་ཐུགས་འགན་བབ་འབྲེལ་གྱིས་ཆགས་ཡོད་པས། མ་འོངས་པར་བོད་རྒྱ་འབྲེལ་མོལ་མཐུད་ཐབས་ཐད་བཀའ་ཟུར་འབྲོང་ཆུང་མཆོག་ལ་རྒྱུས་མྱོང་དང་མ་རྩ་ཆ་ཚང་ཡོད་པས་མཆོག་ཏུ་གྱུར་བ་མིན་ནམ་སྙམ།

      བཀའ་བློན་ལས་ཁུངས་བདུན་དང་གྲོས་ཚོགས་ལ་འགན་འཁུར་ཞུ་སྟངས་ཀྱི་ཉམས་མྱོང་ལྡན་པ།

བཀའ་ཟུར་མཆོག་གིས་བཀའ་ཤག་ནང་ལོ་བཅུའི་རིང་ཕྱག་ལས་གནང་བས། བཀའ་བློན་ལས་ཁུངས་བདུན་གྱི་ལས་དོན་ཐད་ཉམས་མྱོང་ཕུན་སུམ་ཚོགས་ཤོས་ཡིན། བཅའ་ཁྲིམས་དང་འཛིན་སྐྱོང་སྒྲིག་གཞི་གཉིས་ཀར་གསལ་བ་བཞིན། བཀའ་ཤག་གི་ཐུགས་འགན་ནི་མཉམ་འདུས་ཀྱི་འགན་ཡིན་ཅིང་། བཀའ་བློན་ལས་ཁུངས་སོ་སོའི་རྩ་བའི་སྲིད་བྱུས་དང་འབྲེལ་བའི་ལས་དོན་དང་། གཞུང་ཞབས་གནས་སྤོས་ཀྱིས་མཚོན་ལས་དོན་འགངས་ཆེན་རིགས་བཀའ་ཤག་ལྷན་རྒྱས་ནས་ཐག་གཅོད་གནང་གི་ཡོད་པས། བཀའ་བློན་དུ་བཞུགས་མྱོང་བ་ཞིག་ཡིན་ན། བཀའ་བློན་ལས་ཁུངས་བདུན་ལ་རྒྱུས་ཡོད་ཧ་ཅང་ཆེ་བས། ད་ཡོད་སྲིད་སྐྱོང་འོས་མིའི་ཁྲོད་ལོ་བཅུར་བཀའ་བློན་གནང་མྱོང་བ་བཀའ་ཟུར་འབྲོང་ཆུང་དངོས་གྲུབ་ལས་མེད་ལ། གྲོས་ཚོགས་ནས་ཀྱང་གཟིགས་ཚུལ་ལེགས་པས་བཀའ་བློན་ཐེངས་གཉིས་ཀར་སྤྱི་མོས་བདམས་ཐོན་བྱུང་ཡོད་པ་བཅས་འཛིན་སྐྱོང་ལྷན་ཁང་བདུན་དང་། གྲོས་ཚོགས་ལ་འགན་འཁུར་ཞུ་ཕྱོགས་གཉིས་ཀར་ཉམས་མྱོང་ཕུན་སུམ་ཚོགས་པ་འདུག་སྙམ།

         ༡༠ ཕྱག་སྦྲེལ་བཀའ་བློན་ཚད་ལྡན་རག་ངེས་པ།

ཕྱག་སྦྲེལ་བཀའ་བློན་གྱི་ངོས་ནས་ཀྱང་བཙན་བྱོལ་བོད་མིའི་ཁྲོད་རྒན་གཞོན་ཕོ་མོ་མཁྱེན་འཇོན་རང་རྐྱ་ཐུབ་པ་ཞེ་ཅིག་རག་ངེས་པས། བཀའ་ཤག་གི་ལས་འགན་ཏེ། འབྲེལ་མོལ་སླར་གསོ། རྒྱལ་སྤྱིར་འབྲེལ་ལམ། རོགས་དངུལ་འཚོལ་བསྡུ་སོགས་ལ་ཚགས་ཚུད་ཅིང་། ལབ་གླེང་མེད་པའི་འཛིན་སྐྱོང་གནང་ངེས་པ་ཐེ་ཚོམ་མེད་སྙམ།

      ༡༡ མཉམ་འཁྲིད་མཉམ་བཀོལ་གྱི་ནུས་པ་ཕུལ་དུ་བྱུང་བ་ཡོད་པ།

མཉམ་འཁྲིད་གནང་ཐུབ་ཡོད་མེད་ད་སྔ་ཕྱག་ལས་གནང་མྱོང་སའི་ལས་ཁུངས་ཀྱི་གནས་བབ་ལས་སྡོམ་བརྒྱབས་ན་ཤེས། བཀའ་ཟུར་མཆོག་གིས་མགོ་ཁྲིད་ཀྱི་ནུས་པར་ལས་བྱེད་ཆེ་ཕྲ་ལས་ཐོག་ཙམ་མིན་པར་ལས་ཟུར་དང་བཅས་པས་སྤོབས་པ་བྱེད་ཅིང་། ལས་བྱེད་རྒན་རབས་ཚོས་དགེ་རྒན་དང་ལམ་སྟོན་པ་ཡག་ཤོས། ལས་བྱེད་གཞོན་རབས་ཚོས་ཕ་མ་ལྟ་བུར་བརྩི་བ་ནི་གངས་ཅན་སྐྱིད་གཤོངས་ལ་རྒྱུས་ཡོད་ཚང་མས་དངོས་སུ་མཐོང་ཡོད། རང་གིས་བཤད་མ་དགོས་པར། མིས་གསུངས་པའི་ནང་། བཀའ་ཟུར་མཆོག་གི་མགོ་ཁྲིད་ཀྱི་ནུས་པ་དང་མཉམ་འཁྲིད་མཉམ་བཀོལ་ལ་འགྲན་ཟླ་མེད་པར་གྱུར་ཡོད་པས། མ་འོངས་པར་གཞུང་གི་སྒལ་ཚིགས་ལྟ་བུའི་གཞུང་ཞབས་རྒན་གཞོན་ཚང་མར་རང་རང་གི་ལས་འགན་དང་འབྲེལ་ནུས་པ་འདོན་སའི་ཁོར་ཡུག་གུ་ཡངས་པོ་དང། མ་འདྲེས་པ། ཆེ་མཐོང་དང་ལྡན་པར་འགྱུར་བ་བཅས་ལ་ཐེ་ཚོམ་མི་འདུག་སྙམ།

      ༡༢ མི་གསོ་སྐྱོང་དང་འབྲེལ་བ་ཚད་ལྡན་འཇོག་པར་མཁས་པ།

གཞིས་ལུས་བོད་མིའི་ཁྲོད་དང་། བཙན་བྱོལ་ནང་གཉིས་ཀར་བཀའ་ཟུར་མཆོག་གིས་དངོས་ཤུགས་བརྒྱུད་གསུམ་ནས་གསོ་སྐྱོང་གནང་བཞག་པ་མང་པོ་ཡོད། བཀའ་ཟུར་མཆོག་གིས་བོད་ལ་ཕན་ཐོགས་ས་རེད་བསམས་པའི་མི་ཞིག་ཡིན་ཕྱིན་སྐྱེས་ཁུངས་སོགས་ལ་མ་ལྟོས་པར། གསོ་སྐྱོང་དང་རྒྱབ་སྐྱོར་གནང་གི་ཡོད་པས། ཁོང་དང་འབྲེལ་བ་ཡོད་པ་མང་པོ་ཞིག་ཁོང་ལ་བཅོས་མ་མིན་པའི་ཡིད་ཆེས་ཐོབ་ཡོད་པའང་གནད་འདི་ལས་བྱུང་བ་ཐེ་ཚོམ་མི་འདུག་སྙམ།

      ༡༣ བཙན་བྱོལ་བོད་མི་མང་པོས་ཡིད་ཆེས་དང་བརྩི་བཀུར་འགྲན་མེད་ཐོབ་ཡོད་པ།

གཞུང་ཞབས་ལས་ཟུར་དང་། གནད་ཡོད་མི་སྣ། ཆབ་སྲིད་བཙོན་ཟུར། བཀུར་འོས་མི་མང་སོགས་བཙན་བྱོལ་བོད་མི་གྲངས་ལས་འདས་པས་ཆེ་མཐོང་དང་ཡིད་ཆེས་མ་འདྲ་བ་ཞིག་ཞུ་ཡུལ་དུ་གྱུར་འདུག་པ་བཅས་གུས་ལ་ར་འཕྲོད་སྟབས། རང་ཐག་རང་གཅོད་ཀྱིས་རྒྱུ་མཚན་གལ་ཆེ་འདི་དག་བགྲང་སྟེ། དུས་ལ་བབས་པ་ལྟ་བུའི་སྐུ་ངོ་མཆོག་ལ་བོད་སྤྱི་པའི་ཆེད་དུ་ཕྱི་གསལ་གནང་གསལ། རང་དོན་ཁོག་བཅུག་མིན་པར་སྲིད་སྐྱོང་གི་ཁྲི་ལ་འཁོད་རྒྱུར་རྨི་ལམ་ཚུན་གཏོང་མཁན་གྱི་གྲས་ཤིག་ཡིན་པའི་ཁུལ་ཡིན་ལགས།

         ༢༠༢༠ ཟླ་ ཚེས་ མང་གཙོའི་དུས་དྲན་ཉིན་གྲུབ་པར་བགྱིས།།

འདི་ཡི་དགེ་བས་བདག་གཞན་འགྲོ་བ་ཀུན།།

སྐྱེ་ཀུན་ཕྱག་ན་པདྨོས་རྗེས་བཟུང་སྟེ།།

སྐད་ཅིག་གཡེལ་མེད་བཀའ་བཞིན་སྒྲུབ་པ་ལ།།

བསྒྲུན་དུ་མེད་པའི་སྐལ་བཟང་ཐོབ་པར་ཤོག།།

མཆན། གོང་གསལ་བསམ་ཚུལ་རྩོམ་ཡིག་དེ་ནི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ལངས་ཕྱོགས་ཡིན་པས་མ་ཁྱབ།

བསྐྱར་བཅོས།: ༢༠༢༠/༠༩/༡༦

Leave a Reply

12 thoughts on “བཀའ་ཟུར་འབྲོང་ཆུང་དངོས་གྲུབ་མཆོག་ལ་རྒྱབ་སྐྱོར་བྱེད་དགོས་པའི་ཐུན་མིན་རྒྱུ་མཚན་བཅུ་གསུམ།

  1. མཐུ་སྟོབས་དབང་ཕྱུག་གཡུ་ཐོག་

    སྤྱི་འཐུས་ལས་ཐོག་ཤར་ཕྱོགས་ཁུག་རྟ་ནི་བཅའ་ཁྲིམས་ཤེས་བཞིན་དུ་ཁྱད་གསོད་དང་རྩིས་མེད་གནང་སྟེ་སྲིད་སྤྱི་ ༢༠༢༡ སྐོར་ཁྱབ་བསྒྲགས་ཀྱི་སྒྲ་སྒམ་ཆེད་བཟོས་ཀྱིས་འགྲེམ་སྤེལ་རྒྱ་ཆེ་བྱས་ཡོད་། ཁོང་རང་ཚོགས་ཟུར་སྤེན་པ་ཚེ་རིང་གི་རྒྱབ་སྐྱོར་བ་ཡིན་པ་ཡོངས་གྲགས་ཡིན་མོད་ཀྱང་དེང་སང་འགྱུར་བ་ཆེན་པོ་བཏང་ནས་བཀའ་ཟུར་འབྲོང་ཆུང་དངོས་སྒྲུབ་ལགས་ལ་རྒྱབ་སྐྱོར་གྱི་ལས་གཞིར་འབད་འབུངས་ལྷོད་མེད་གནང་བཞིན་པ་མཐོང་།
    བཀའ་ཟུར་འབྲོང་ཆུང་དངོས་སྒྲུབ་ལགས་བྱས་རྗེས་ཅན་གྱི་མི་དྲག་ཡིན་སྟབས་གུས་བཀུར་ཡོད་། འོན་ཀྱང་ཁོང་བདེ་བསྲུང་བཀའ་གནང་ཞིང་ལས་རྒྱུན་ཟླ་ཤས་མ་གཏོགས་འཁྱུར་ལ་ཉེ་བའི་བློ་བུར་དུ་དགོངས་ཞུ་གནང་བ་དེས་གཞུང་དམངས་གཉིས་ཀར་བློ་འཚབས་དང་སེམས་ཕམས་ཆེན་པོ་བྱུང་བཟོས་ཡོད་། སྲིད་སྐྱོང་དབུ་བཞུགས་བཀའ་ཤག་ལྷན་རྒྱས་ནས་སྤྱིར་ལས་རྒྱུན་འཕོས་ལ་ཉེ་བས་དགོངས་ཞུ་ཕྱིར་འཐེན་ཡོང་བའི་འབོད་བསྐུལ་ནན་རྟེན་ཞུས་ཀྱང་བསེན་འཇོག་མ་གནང་གཙང་དེ་བས་ཀྱང་བློ་ཕམས་དང་དཀའ་ངལ་བཟོས་ཡོད་མོད་། སྔོན་ལ་ཀི་ལོ་ ༡༠ མ་ཐེགས་པར་ད་ཆ་ཀི་ལོ་ ༡༠༠ ཐེགས་པའི་རྣམ་སྤྲུལ་འདྲ་སྟོན་རྒྱུ་ཡོད་ན་མ་གཏོགས་གནས་སྟངས་གང་གི་ཆ་ནས་ཀྱང་ཡོང་ཐབས་མེད་པ་ཟུར་བལྟས་ལེབ་མཐོང་རེད་། ང་ཚོ་བོད་མི་རྣམས་དུས་རབས་ ༢༡ ནང་བསྐྱོད་བཞིན་ཡོད་སྟབས་དེ་འདྲའི་ལས་སླ་བཅོས་མེད་པའང་མཁྱེན་དགོས་དུས་ལ་སླེབས་ཡོད་།

  2. ཤར་ཕྱོགས་ཁུག་རྟ་འདི་ལ་བཅའ་རྒྱུ་ལས་རྒྱུ་མང་དྲག་པ་ཡོད་རེད།
    ངན་པ་དགུ་འཛོམས་ཀྱི་ཁ་ཏ་ནག་པོ་ཞིག་ཡིན།

    1. སྔོན་ཆད་རྒྱལ་བ་རིན་པོ་ཆེས་དོལ་རྒྱལ་བཀག་པ་ནོར་སོང་ལབ་རེད།
    2. ཁོ་རང་དགེ་འདུན་ཆོས་འཕེལ་གྱི་སྤྲུལ་སྐུ་ཡིན་ལབ་རེད།
    3. གྲྭ་བ་ལོག་ནས་ནང་ཆོས་ལ་དགག་པ་བརྒྱབ་པ་རེད།
    4. དབུ་མའི་ལམ་ལ་བསྐྱར་ཞིབ་བྱེད་དགོས་འདུག་ལབ་རེད།
    5. སུད་སིའི་རྒྱ་ནག་གཞུང་ཚབ་ཁང་གི་རྟ་བསེ་ཚུལ་ཁྲིམས་ཀྱི་རྐུབ་ལ་རྒྱག་པ་རེད།
    6. རྒྱལ་བ་རིན་པོ་ཆེ་ཡིས་དགེ་སློང་གི་སྡོམ་པ་གནང་ན་འགྲིག་གི་མ་རེད་ལབ་རེད།
    7. རྒྱ་ནག་གི་སྐར་ལྔའི་དར་དམར་འཕྱར་ནས་རྒྱུག་རེད།
    8. ལོ་རྒྱུས་ཐོག་ཏུ་བོད་རང་བཙན་གཙང་མ་ཡོད་པ་མ་རེད་ལབ་རེད།
    9. མདོ་སྨད་མི་མང་གཡོ་བཙོང་བྱས་ཏེ་དབུས་གཙང་གི་རྐུབ་ལ་རྒྱག་པ་རེད།

  3. སྤྱི་འཐུས་གྲོས་ཚོགས་ནང་གི་ཀ་བ།
    དབུ་མའི་ལམ་གྱི་རྒྱལ་སྲས།
    སྟག་ཤར་ཕྱི་རྫིག་ནང་རྫིག
    ཕྱི་གསལ་ནང་གསལ།
    དྲང་བདེན་སྐྱོང་པའི་དཔའ་བོ།
    ཆོས་དད་ཆེ་བའི་ཕོ་རྒོད།
    རྒྱུ་མཚན་གནས་ལུགས་ཀྱི་གཏེར་བདག
    ཤར་ཕྱོགས་ཁུག་རྟས།
    བདག་གི་མིག་ཕྱེས་སོང་།
    རྒྱུ་མཚན་འདི་དག་གི་རྐྱེན་པས།
    བདག་ཀྱང་བཀའ་ཟུར་འབྲོང་ཆུང་མཆོག་ལ་འོས་ཕུལ་བ་ཡིན་ནོ།

  4. བཀྲ་སྒྲོལ་མ

    ཤ་ཕྱོགས་ཁུག་རྟའི་མིང་དེར་བསྒྱུར་རན་བཞག
    བྱང་ཕྱོགས་ཙི་ཙི་སྐམ་པོ་ཟེར་མིང་དེར་བཏགས་བཞག་ན་ལེགས་ཤོས་རེད་བཞག