དེ་རིང་ངའི་གྲོགས་མོ་མགོ་སེར་ཞིག་གིས་ང་ལ་འཕྲིན་ཡིག་ཅིག་བསྐུར་འདུག མོ་ནི་རྗལ་མི་ནེའུ་ནས་རེད། མོ་བོད་པའི་སྤྱི་ཚོགས་ལ་དེ་འདྲའི་རྒྱུས་མངའ་མེད་ལ། ཡིན་ནའང་བོད་དོན་ལ་སེམས་ཁུར་ཡོད་མཁན་ཞིག་ཡིན། དེ་རིང་གི་མོའི་འཕྲིན་ཡིག་དེ་མོའི་རྒྱལ་ཁབ་ཀྱི་ནང་ན་བྱུང་བའི་གྱོད་དོན་གནས་ཚུལ་ཛ་དྲག་ཅིག་རེད།ཟླ་བ་གཅིག་གི་གོང་ནས་བྱུང་བའི་གསར་འགྱུར་ཚ་ཤོས་ཀྱི་གྲས་ཀྱང་རེད་ཟེར་འདུག ད་དུང་གསར་འགྱུར་དེ་མུ་མཐུད་དུ་ཉིན་རེའི་གསར་འགྱུར་བརྒྱུད་ལམ་ཁག་ན་མཚམས་ཆད་རྒྱུ་མི་འདུག་ཟེར།
དེ་ལྟ་བུའི་གསར་འགྱུར་ནི་ཁ་ཐོ་ལེ་ཁུ་ཡེ་ཤུའི་སློབ་གྲྭ་ཁག་ན་ཆོས་པ་ཚོས་ན་ཆུང་སློབ་མ་མང་པོར་གང་འདོད་ཀྱིས་འཁྲིག་སྤྱོད་བྱས་པའི་གྱོད་དོན་རེད་འདུག དོན་རྐྱེན་འདི་ལོ་ཉི་ཤུ་སུམ་བཅུའི་ཡར་སྔོན་ན་བྱུང་བ་ཡིན། འོན་ཀྱང་རྗལ་མི་ནེའི་རྒྱལ་ཁབ་ཀྱི་ཁྲིམས་འོག་ནས་ཉེས་ཅན་པ་དག་ལ་ཉེས་ཆད་གང་ཡང་བཏང་ཐུབ་མི་འདུག་ཟེར།
ཡེ་ཤུའི་ཆོས་པ་ཚོས་སློབ་ཕྲུག་ལ་ཧམ་སྤྱོད་བྱས་པའི་གནས་ཚུལ་འདི་ཕྱི་ལོ་༡༩༦༠ ནས་༡༩༨༠ ལོའི་བར་བྱུང་ཡོད་ཅིང༌། ཕལ་ཆེར་ད་ལྟའང་འབྱུང་བཞིན་པ་ཡིན་རྒྱུ་རེད། ཚབས་ཆེ་བའི་དོན་རྐྱེན་འདི་རྗལ་མི་ནེའུ་གཅིག་པོའི་ནང་ལ་བྱུང་བ་མ་ཡིན་པར། འ་རེའི་ལན་སྒྲི་དང་ཨ་རིའི་ནང་ལ་ཡང་བྱུང་ཡོད།
ཁོ་ཚོ་བྱིས་པ་ཡིན་དུས་དོན་རྐྱེན་འདི་བྱུང་ཞིང༌། ཁ་ཐོ་ལེའུ་ཁིའི་སློབ་གྲྭ་ན་ཡོད་དུས་ཁོ་ཚོ་ལ་ཧམ་སྤྱོད་ཀྱི་གྱོང་གུད་འདི་ཐེབས་པ་རེད། ཁོ་ཚོའི་ཁྲོད་ཀྱི་ཁ་ཤས་ད་ལྟ་གཞོན་སྐྱེས་ཡིན་པ་དང་དོན་རྐྱེན་དེ་བཤད་པའི་མགོ་བརྩམས་འདུག རིམ་གྱིས་མང་ཚོགས་ཀྱིས་ཁོ་ཚོའི་སྒྲུང་དེ་བཤད་ཅིང་བདུན་ཕྲག་ཁ་ཤས་ཀྱི་སྔོན་ནས་ཧམ་སྤྱོད་ཀྱི་དོན་རྐྱེན་གནས་ཚུལ་དེ་ཡོངས་ཁྱབ་ཆགས་སོང༌།
དོན་རྐྱེན་དེས་རྗལ་མི་ནེའུ་མི་མང་ཤུགས་ཀྱིས་དཀྲོགས་པ་དང༌། ཆབ་སྲིད་ཚོགས་པ་མང་པོས་མ་འོངས་པར་ཧམ་སྤྱོད་དོན་རྐྱེན་དེ་རིགས་འགོག་ཐབས་དང་གྱོང་གུད་ཐེབ་མཁན་དག་ལ་གུན་གསབ་སྤྲོད་ཐབས་བཅས་ཀྱི་ཐད་ལ་ཕྱག་ལས་གནང་གི་འདུག ཡིན་ནའང་གྱོང་གུད་ཆགས་སྒོ་ཐེམ་མཁན་ཚོས་དོན་རྐྱེན་དེ་རིགས་སྒྲིག་ཁྲིམས་་ཀྱི་ནང་དུ་ག་འདྲ་བྱས་ནས་བྱུང་ཐུབ་སོང་བའི་སྐོར་ལ་ཤེས་འདོད་ཆེན་པོ་ཡོད་པར་བཤད།
དོན་རྐྱེན་འདིའི་ཐད་ལ་བགོ་གླེང་བྱེད་མཁན་རིགས་ཤིག་གིས་ཉེས་ཅན་པ་དག་ཉེས་ཆད་གཅོད་དགོས་པའི་བསམ་ཚུལ་བཏོན་ཅིང༌། ཤོག་ཁག་གཞན་ཞིག་གིས་དོན་རྐྱེན་འདི་རིགས་མ་འོངས་པར་འགོག་ཐབས་སྐོར་ལ་བགྲོ་གླེང་བྱེད་ཀི་འདུག གང་ལྟར་དོན་རྐྱེན་འདི་རིགས་ཐེངས་མང་པོར་བྱུང་བར་བརྟེན། དོན་རྐྱེན་འདི་འབྲེལ་གྱི་གནད་ཡོད་མི་སྣ་དག་གིས་ཡོངས་ཁྱབ་ཀྱིས་གསལ་བཤད་བྱེད་དགོས་པའི་བསམ་ཚུལ་ཀྱང་བཏོན་འདུག
ས་ཆ་ཞིག་ན་ཡེ་ཤུའི་སློབ་དཔོན་ཞིག་གིས་ཆོས་སྤེལ་མཁན་ཞིག་གིས་བྱིས་པ་རྣམ་ལ་འཁྲིག་སྤྱོད་བྱེད་ཀི་ཡོད་པ་ཧ་གོ་བཞིན་དུ་འབྲེལ་ཡོད་ལས་ཁུངས་ལ་མ་བཤད་པ་མ་ཟད། གྲོང་བརྡལ་ཁག་ལ་ཆོས་སྤེལ་བར་བཏང་འདུག་པས་ཆོས་པ་ཚོས་བྱིས་པ་རྣམ་ལ་གང་འདོད་དུ་ཧམ་སྤྱོད་བྱེད་ཐུབ་པ་བྱུང་ཡོད་པ་ནི་བློ་ཕམ་གྱི་གནས་ཡིན་པར་བཤད་འདུག
རྗལ་མི་ནེའུ་ནང་ལ་ཡོད་པའི་ཡེ་ཤུའི་ཆོས་དཔོན་་བྷ་ནས་སྒྲེ་ཀེ་ཌི་ཁོ་ཆོས་དཔོན་ཡིན་པའི་སྐབས་ཆོས་སྤེལ་མཁན་ཚོས་བྱིས་པ་རྣམ་ལ་གང་འདོད་དུ་འཁྲིག་སྤྱོད་བྱེད་ཀི་ཡོད་པ་ཤེས་རྟོགས་བྱུང་ཡོད་ཀྱང༌། ཁོས་བྱ་ངན་དེ་སྔོན་འགོག་བྱེད་པར་ལས་ཀ་གང་ཡང་བྱས་མེད་པར་མང་ཚོགས་ཀྱིས་ཁོ་ལ་སྐྱོན་བརྗོད་བྱེད་ཀི་འདུག་ ཨ་རིའི་ནང་ལ་ཡེ་ཤུའི་ཆོས་སྤེལ་མཁན་ཚོས་བྱིས་པ་རྣམ་ལ་ཧམ་སྤྱོད་བྱེད་ཀི་ཡོད་པའི་དོན་རྐྱེན་ཆོས་དཔོན་དེས་ཤེས་རྟོགས་བྱུང་ཡོད་ཀྱང༌། དེ་མཚམས་འཇོག་བྱེད་པར་འབད་བརྩོན་གང་ཡང་བྱས་མེད་པའི་ལྟ་ཚུལ་ཤུགས་ཆེན་སྤེལ་བཞིན་ཡོད།
རྗལ་མི་ནེའུ་མི་མང་གིས་རྗལ་མི་ནེའུ་ནང་ཡེ་ཤུའི་ཆོས་ཁང་གི་སློབ་གྲྭ་ན་བྱུང་བའི་ཚབས་ཆེའི་དོན་རྐྱེན་དེའི་སྐོར་ལ་ཆོས་དཔོན་དེས་གསལ་བསྒྲགས་ཅིག་སྤེལ་བར་རེ་སྒུག་བྱས་ཀྱང༌། ཆོས་དཔོན་དེས་རང་ངོས་ནས་ཧམ་སྤྱོད་དོན་རྐྱེན་ཞུ་གཏུགས་ཀྱི་སྐོར་ལ་སྐད་ཆ་གང་ཡང་བཤད་མི་འདུག ཆོས་དཔོན་དེས་འ་རིས་ལན་སྒྲའི་ནང་ལ་བྱུང་བའི་ཧམ་སྤྱོད་སྐོར་ལ་འཕྲིན་ཞིག་བྲིས་འདུག ཡིན་ནའང་རྗལ་མི་ནེའུ་ནང་བྱུང་བའི་དོན་རྐྱེན་ལ་སྐད་ཆ་ཙམ་ཡང་བཤད་མི་འདུག ཆོས་དཔོན་དེས་བྲིས་པའི་འཕྲིན་ཡིག་གི་ནང་དུ། ཡེ་ཤུའི་ཆོས་སྤེལ་མཁན་ཚོས་བྱིས་པ་རྣམ་ལ་ཧམ་སྤྱོད་བྱས་པ་དང༌། ཁོ་རང་ཚོའི་གནས་བབ་ལོག་སྤྱོད་བྱས་པར་ངོས་རང་ངོ་ཚ་དང་བློ་ཕམ་བྱུང་སོང་ཞེས་བྲིས་འདུག ཆོས་དཔོན་དེས་ཆགས་སྒོ་དང་གྱོང་གུད་ཐེབ་མཁན་རྣམ་ལ་དགོངས་དག་ཞུས་ཤིང༌། བརྟག་དཔྱད་ཀྱིས་ལོག་སྤྱོད་དོན་རྐྱེན་དེ་ཕྱིར་བཏོན་བྱེད་ཀི་ཡིན་པར་བཤད་འདུག གང་ལྟར་གནས་ཚུལ་འདི་ཅུང་ཛ་དྲག་ཡིན་པ་དང་བརྗོད་གཞི་ཆེན་པོ་དེ་འདྲ་རེད། འདིའི་སྐོར་མང་པོ་ཤེས་འདོད་ཡོད་ན། དྲི་བ་མང་པོ་གཏོན་ཤོག་དང་གང་ཐུབ་ཀྱིས་ལན་འབྲི་གི་ཡིན།
མཇུག་མཐར་མོས།ནང་བའི་ཆོས་པ་རྣམས་ཀྱི་ནང་ལ་གནས་ཚུལ་སྐྱོ་བོ་འདི་རིགས་བྱུང་མེད་པ་ནི་ཡིད་དབང་འཕྲོག་པ་ཞིག་རེད་འདུག་ཅེས་བཤད་འདུག
