ང་དྲ་ངོས་རིག་གནས་ཀྱི་དགའ་ཚལ་འདིར་འཛུལ་ཞུགས་བྱས་ནས་ལོ་གཅིག་དང་ཟླ་བ་ཁ་ཤས་འགོར་སོང།དུས་ཡུན་དེའི་ནང་ལ་ངས་རང་གི་བསམ་ཚུལ་མང་པོ་སྤེལ་བ་ཡིན། གཞན་གྱི་བསམ་ཚུལ་མང་ཙམ་བཀླགས་པ་དང་མཆན་ཁ་ཤས་ཀྱང་བཏབ་པ་ཡིན། རྩོད་པ་ཙག་ཙིག་རེ་ཡང་བྱས་པ་ཡིན།གང་ལྟར་དྲ་ངོས་རིག་གནས་འདི་ང་ལ་འཚམ་པོ་ཞིག་འདུག དེ་བས་མུ་མཐུད་དུ་དྲ་ངོས་འདི་ན་འདུག་དགོས་ཆགས་སོང།
ངས་དྲ་ངོས་ཀྱི་བསམ་ཚུལ་དང་དཔྱད་བརྗོད།སྙན་ངག་དང་གསར་འགྱུར་སོགས་བཀླགས་ཤིང་རྩོམ་ཡིག་རང་ངོས་ཀྱི་ལེགས་ཉེས་དང་དགོས་མཁོ་ཡོད་མེད་ལ་བལྟས་པ་ཡིན་མ་གཏོགས།བསམ་ཚུལ་སྤེལ་མཁན་དང་རྩོམ་ཡིག་འབྲི་མཁན་སུ་ཡིན་རྩད་གཅོད་བྱས་མྱོང་མེད་ལ།དུ་དུང་ཀྱང་གང་ཟག་རྩད་གཅོད་བྱེད་འདོད་མེད།གཙོ་བོ་རྩོམ་ཡིག་རང་ངོས་ཀྱི་རིན་ཐང་དེ་ག་རང་གཞི་ལ་འཇོག་གི་ཡིན།
དྲ་ངོས་ཀྱི་རྩོམ་ཡིག་དང་བསམ་ཚུལ་གྱི་རིགས་གང་ཡིན་ཡང་ཁྱད་མེད་དུ་ཀློག་གི་ཡོད། ཚང་མ་མི་རེ་རེའི་རྣམ་དཔྱོད་ཀྱི་རྩལ་འབྲས་ཡིན་པར་ངོས་འཛིན་བྱེད་ཀི་ཡོད། ཡིན་ནའང།ང་རང་སྒེར་ངོས་ནས་ཆེས་ཀློག་པར་སྤྲོ་བའི་ཟིན་བྲིས་ནི་ལུང་རིགས་རྒྱལ་དང་ཁང་གསར་རྡོ་རྗེ།གངས་ཐིགས་བཅས་ཡིན།མིའི་བསམ་བློ་གཏོང་སྟངས་མ་འདྲ་བ་དང་རིན་ཐང་འཇོག་ཚུལ་མ་འདྲ་བའི་དབང་གིས་ང་ལ་ཁོང་ཚོའི་ཟིན་བྲིས་ལས་ཟ་རྒྱུ་འཐུང་རྒྱུ་མང་པོ་མང་པོ་རག་གི།བསམ་བློ་གཏོང་རྒྱུ་དང་དཔྱད་པ་གཏོང་རྒྱུ་མང་པོ་མང་པོ་རག་གི དེ་བས་ཁོང་ཚོའི་ཟིན་བྲིེས་ལ་དམིགས་ཀྱིས་དོ་སྣང་སྤྲོད་ཀི་ཡོད།
མཆན་འདེབས་མཁན་ཁ་ཤས་ལ་བསམ་བློ་བརྗེ་རེས་བྱེད་ཀི་ཡོད ཁ་ཤས་ལ་རྩོད་པ་རྒྱག་གི་ཡོད། འགའ་རེ་ལ་ཁོང་ཁྲོ་ཟ་གི་ཡོད། ལ་ཤས་ལ་གད་མོ་འཆོར་གི་ཡོད། ཁ་ཤས་ལ་བརྩི་བཀུར་བྱེད་ཀི་ཡོད། གང་ལྟར་ཚང་མ་ལ་ཆ་སྙོམ་གྱིས་དོན་སྣང་སྤྲོད་ཀི་ཡོད་མ་གཏོགས། གཅིག་ཀྱང་སྣང་མེད་དུ་འཇོག་གི་མེད།ཡིན་ནའང༌།རྗེས་མ་ནས་མཆན་ཀློག་རྒྱུ་ཉུང་དུ་གཏོང་གི་ཡིན། དེ་ལ་དུས་ཚོད་མང་པོ་འགྲོ་གི་འདུག་པས་ལས་ཀ་དང་དཔེ་ཀློག་ཀྱི་དུས་ཚོད་འདང་ངེས་མི་སྟེར་གི རྒྱུ་མཚན་དེ་ཙམ་མ་གཏོགས་མེད།
ང་དྲ་ངོས་འདིར་ཞུགས་ནས་ལོ་གཅིག་ལྷག་འགོར་སོང། དེའི་རིང་ལ་སེམས་གཤིས་ངོ་མ་ཟེར་ན་འགྲིག་གི། གནད་དོན་གྱི་གསང་ཕུག་ཟེར་ན་ཆོག་གི། བྱ་དངོས་ཀྱི་གཤིས་ལུགས་ཟེར་ན་མི་ཆོག་རྒྱུ་མེད་ཀི། གང་ལྟར་དེ་འདྲའི་རིགས་གཅིག་ཀྱང་རྙེད་མ་སོང། མི་ཐམས་ཅད་ཀྱི་མདུན་ན་གཡོ་འཁྲུལ་གྱིས་འགུལ་བཞིན་པའི་གློག་ཀླད་ཚང་མ་འགས་གཏོར་བྱུང་དགོས་པའི་གནད་དོན་གང་ཡང་གླེང་ཐུབ་མ་སོང། ནམ་ཡང་དེ་འདྲ་འབྱུང་མ་སྲིད་པ་ཞིག་ཡིན་ནམ། དེ་ངས་ཀྱང་གསལ་བོ་བཤད་ཤེས་ཀི་མི་འདུག ཚོད་དཔག་བྱེད་ཐུབ་ཀི་མི་འདུག མ་གཞི་མི་ཞིག་ཡིན་ཕྱིན་གནད་དོན་མང་པོ་བཤད་མ་ཐུབ་པར་འཇོག་དགོས་པ་དེ་འདྲ་ཡི་ནམ། དེ་ནི་ཞོར་འཕྲོས་ཙམ་ཡིན།
དེ་རིང་ངས་འདི་ལྟར་ལོ་གཅིག་གི་དྲ་ངོས་རིག་གནས་ལ་ཕྱི་མིག་ཅིག་བལྟས་པ་ཡིན། ཡིན་ནའང་ངས་ཟིན་བྲིས་ཀྱི་ཁ་ཕྱོགས་ལ་རེ་ཞིག་འགྱུར་བ་གཏོང་དགོས་པའི་གནད་དོན་ཞིག་མ་མཐོང་བས། སྔར་བཞིན་ལམ་ལ་བུད་ནས་འགྲོ་གི་ཡིན།
