སྤྱི་ཚོགས་ཀྱི་དགེ་སྐྱོན་གླེང་སྟེགས།

སེམས་པ་ལ་རྨ་ཁ་མེད་ཀྱང་
ན་ཟུག་གིས་ལུས་ཕུང་བཟི་
མྱ་ངན་མེད་པའི་རེ་དོགས་ཀྱི་ཁྲོད་ནས་
ཁྱོད་ངའི་གཅེས་སུ་གྲུབ་ན་
གཟོད་མི་ཚེ་ལ་དྲོད་ཁོལ་ལྡན་

སྙིང་དམར་པོ་ལ་ཕྱི་ཤུན་མེད་ཀྱང་
ཚོར་བས་མནར་བའི་བདག་གི་འཇིག་རྟེན་འདིར་
དགའ་སྐྱོ་ཞིག་དང་ རེ་དོགས་ཤིག
ཡང་ན་མི་ཚེའི་འོད་སྣང་ཞིག་

ན་ཟུག་གི་ཟབས་ས་དང་ སེམས་པའི་མཐོ་ས་ཞིག་ནས་
མི་ཚེའི་གཙང་ཆེན་བརྒལ་ཏེ་
རྒྱང་རིང་མཛེས་སྡུག་གི་དཔལ་ལ་རློམ་བཞིན་ཡོད་ན་
ཁྱོད་རང་གཙང་ཆེན་གྱི་གྲུ་བོ་ཡིན་པར་སྨོན་

ནམ་ཟླ་ཡོད་ཚད་ཐལ་རྡུལ་གྱིས་ཁེངས་པ་མིན་ན་
དཀར་གཙང་གི་སེང་རས་འོག་ནས་
ཁྱོད་བརྩེ་དུང་གི་ལྷ་མོར་བསྒོམ་བཞིན་ཡོད་ན་
དག་ཞིང་གི་བདེ་སྐྱིད་ལ་ཁྲིད་པར་སྨོན་

སེམས་གྱི་གཏིང་རུམ་ནས་ཐོན་པའི་གཟུགས་མེད་སྡོམ་དྲྭ་རེ་རེ་
ཚོར་བའི་གས་སྲུབས་ནས་བཞུར་ཏེ་ ཁྱོད་ཀྱི་མཛེས་སྡུག་ལ་ཐིམ་ཚེ་
རྨི་ལམ་བཞིན་རྨིས་ཆོག་ཆོག་གི་སང་ལོའི་འཇིག་རྟེན་ལ་ཆས་རྩིས་ཡོད་ན་
ཁྱོད་རེ་སྨོན་གྱི་ཁ་བཏགས་ཡིན་པར་སྨོན།

༢༠༡༢ ཟླ་ ༧ པའི་ཚེས་ ༡༩ ཉིན།