མདའ་མོ་ཚང་།

༡༽ཕྱི་ལོ་༢༠༡༡།༡༠།༣༠་ཉིན་གྱི་དགོང་དྲོ་རྡ་ས་ནས་འགྲུལ་བཞུད་ཀྱི་མགོ་བརྩམས་ཤིང་། བསམ་གཞིགས་ཐན་ཐུན་དང་། རྨི་ལམ་རབ་རུབ་ཀྱི་ཁྲོད་ནས་ཕྱི་ཚེས་༣༡་ཉིན་གྱི་སྐྱ་རེངས་དང་པོའི་སྒོ་གླེགས་ཕྱེས་པ་དང་རྒྱལ་ས་ལྡི་ལིར་འབྱོར། ཕྱི་ཟླ་༡༡་ཚེས་༡་ཉིན་གྱི་ཞོགས་པའི་ཆུ་ཚོད་དྲུག་པའི་སྟེང་ལྡི་ལིའི་རྒྱལ་སྤྱིའི་གནམ་ཐང་(DEL.Terminl3) དུ་སླེབས་ཤིང་། ཆུ་ཚོད་༡༠་དང་སྐར་མ་༡༠་སྟེང་(JET LET)རྟགས་ཅན་གྱི་གནམ་གྲུས་སྤྲིན་དཀར་གྱི་བང་རིམ་བསྟད་དེ་གྷོ་ཧ་ཊི་བརྒྱུད་ཉིན་རྒྱབ་ཆུ་ཚོད་༢་དང་སྐར་མ་༢༥་སྟེང་(DIBRUGARH)གནམ་ཐང་དུ་འབྱོར་བ་དང་། ཏི་ཛི་དར་རྒྱས་གླིང་གི་ས་གནས་འགོ་འཛིན་ཕུན་ཚོགས་ཚེ་རིང་སོགས་བསུ་བ་ཞུས། དེ་འཕྲད་སྣེ་ལེན་མགྲོན་བསུར་བཅར་བའི་ཏི་ཛིའི་འཕྲོད་བསྟེན་སྨན་ཁང་གི་རླངས་འཁོར་ནང་ཆུ་བོ་གྲགས་ཅན་སེང་གེ་ཁ་འབབ་ཀྱི་གཙང་གྲུར་བརྒལ། ཆུ་བོ་ལན་གསུམ་མཆོད་ཅིང་བོད་ཆུ་བོད་ལ་དབང་བའི་སྨོན་ལམ་བརྒྱབ། དགོང་ཁའི་ཉི་འོད་ཀྱི་གཟི་མདངས་དང་། གཙང་བོའི་རླབས་དཀར་གྱི་ཟེགས་མ་ཡིས་ཕ་ཡུལ་ཁྲི་ཤོར་རྒྱལ་མོ་དྲན་སྣང་གི་གདུང་བ་བྱིན། མུན་ནག་གིས་འོད་སྣང་ཟོས་ཤིང་། ཁྲ་ཆེམ་ཆེམ་གྱི་སྐར་ཚོམས་ཤར་སྐབས་དང་བསྟུན་གྲོང་ཁྱེར་སེ་ལ་པ་ཐར་སླེབས་ཤིང་། ལྗང་མདོག་གི་མཚོ་མོ་ཅེས་པའི་མགྲོན་ཁང་ནང་ངལ་གསོ་མཛད། ཕྱི་ཚེས་༢་ཉིན་གྱི་ཞོགས་པའི་ཆུ་ཚོད་༥ བའི་སྟེང་ལམ་དུ་ཆས། ཨ་རུ་ན་ཅལ་མངའ་སྡེ་ས་མཚམས་ཀྱི་སྒོ་ཆེན་བརྒལ་ཏེ་རི་བོ་མཐོན་པོའི་འཕྲེད་ལམ་དུ་ཞུགས། ཀྱག་ཀྱོག་མང་པོའི་བཞུད་ལམ་དང་། ཚང་ཚིག་སྟུག་པོའི་ནགས་ཚལ། མཐོ་ཞིང་བརྗིད་པའི་ས་འཛིན། རྔམ་ཞིང་སྟུག་པོའི་ཆུ་འཛིན་བཅས་ཀྱིས་བདུད་རི་ཧ་ཤིང་ཞེས་པའི་འཇིགས་ཆེན་དེ་དྲན་གསོ་ཐེབས་སུ་བཅུག ད་དུང་སྤྲིན་དཀར་གྱི་རྒྱུ་བ་དང་། དལ་འབབ་ཀྱི་ཆུ་བོ། ལྗང་མདོག་གི་རྐང་འཐུང་། ཉི་ཟེར་ལས་འཕྲོས་པའི་འཇའ་ཚོན་བཅས་ཀྱིས་རང་བྱུང་གི་ཁོར་ཡུག་ལ་དུང་བའི་སྨོན་པ་མང་པོ་ཞིག་ངང་གིས་ཤོར། སྨག་རུབ་མཚམས་དང་བསྟུན་གྲོང་ཁྱེར་ཡུན་སྐྱོང་(Yunkong)དུ་སླེབས་ཤིང་། ཀྲུའུ་ཀྲན་ནས་ཡིན་པའི་བུ་མོ་པདྨ་ཆོས་འཛོམས་ནང་ཞག་འདུག་བྱས། ཕྱི་ཚེས་༣ ཉིན་གྱི་ཞོགས་པའི་ཆུ་ཚོད་དྲུག་པའི་སྟེང་བོད་ཀྱི་ཆུ་བོ་རྟ་མཆོག་ཁ་འབབ་(SIANG RIVER)གྲུ་གཟིངས་ཀྱིས་བརྒལ་ཅིང་། རི་ངོགས་མཐོན་པོའི་ལམ་ཕྲན་ཀྱག་ཀྱོག་སྣ་ཚོགས་ཤིག་བརྒྱུད་ཕྱི་དྲོ་ཆུ་ཚོད་༢་སྐར་མ་༥༠་ལ་ཀྲུའུ་ཀྲན་དུ་(TUTANG)འབྱོར། ས་གནས་ཀྱི་འབྲེལ་མཐུད་པ་དང་། ས་འཐུས་ཚོགས་གཙོ། རང་ཚོགས་ཚོགས་གཙོ། ས་གནས་སྨན་རྩིས་ཁང་དང་། འཕྲོད་ལས་པ། གྲོང་སྡེ་ཁག་ལྔའི་བརྒྱ་དཔོན་སོགས་ནས་མཇལ་དར་གྱིས་སྣེ་ལེན་ཞུས་ཤིང་། ས་གནས་སུ་མཛད་འཆར་སྐོར་ལ་གོ་བསྡུར་རོབ་ཙམ་ཞུས་ཤིང་། ས་གནས་འཐུས་ཚོགས་དང་ལྷན་དུ་དམིགས་བསལ་མཇལ་འཛོམས་བྱེད་དགོས་པའི་བསམ་ཚུལ་བཏོན། དགོང་མོ་དེར་རྙིང་མའི་དགོན་ངེས་གསང་མདོ་སྔགས་བྱང་ཆུབ་དར་རྒྱས་གླིང་གི་མགྲོན་ཁང་དུ་གོ་སྒྲིག་ཞུས་པ་ལྟར་བསྡད། ཕྱི་ཚེས་༤་ཉིན་གྱི་ཞོགས་པའི་ཆུ་ཚོད་བརྒྱད་པའི་སྟེང་དགོན་པའི་འདུ་ཁང་སོགས་སུ་གནས་མཇལ་ཞུས། ཆུ་ཚོད་༡༠་སྟེང་ས་གནས་གསང་བའི་ལས་ཁུངས་སུ་བཅར་ཏེ་རང་ཉིད་ཡོང་དགོས་དོན་ས་གནས་བོད་པ་མི་མང་གི་བདེ་སྡུག་གི་གནས་བབ་ལ་རྟོག་ཞིབ་ཆེད་ཡིན་པ་དང་། རྒྱ་གར་དབུས་ས་གཉིས་ནས་བོད་པ་སྐྱབས་བཅོལ་མི་མང་ལ་གཟིགས་རྟོགས་ཆེན་པོ་གནང་དང་གནང་བཞིན་པར་བོད་པ་མི་རེ་ངོ་རེ་ནས་བཀའ་དྲིན་ལེགས་གསོལ་ཆེ་བ་དང་། ང་རང་བོད་པ་མི་མང་གི་འཐུས་མི་ཞིག་ཡིན་པས་ཆ་ནས་ཁྱེད་རང་ཚོ་ས་གནས་ས་ཐོག་གི་དཔོན་རིགས་ཚོས་ངོས་ནས་ཀྱང་ས་གནས་བོད་པ་མི་མང་ལ་སྔར་ལམ་བཞིན་གྱི་གཟིགས་རྟོགས་དང་ལམ་སྟོན་གནང་སྐྱོང་ཡོང་བའི་འབོད་སྐུལ་ཞུས་ཤིང་སྐྱབས་བཅོལ་ལག་དེབ་འབྱོར་ཐོ་བཀོད། ཆུ་ཚོད་བཅུ་གཅིག་སྟེང་ས་གནས་སྨན་རྩིས་ཁང་དུ་འཚམས་གཟིགས་སུ་བཅར། སྨན་པ་ཕུན་ཚོགས་དབང་འདུས་ལགས་ཀྱིས་སྨན་ཁང་གི་ཕྱི་ནང་ངོ་སྤྲོད་གནང་བ་དང་། རང་ཉིད་ནས་བོད་ཀྱི་གསོ་བ་རིག་པ་གལ་ཆེའི་སྐོར་དང་། ས་གནས་ས་ཐོག་ཏུ་སྨན་པའི་དགོས་མཁོ་སོགས་ཀྱི་ཐད་བཀའ་མོལ་རོབ་ཙམ་ཞུས་ཤིང་། ལྷག་བསམ་དང་འབྲེལ་བའི་སྨན་པའི་ལས་དོན་ནི་ཆོས་དང་མཐུན་པའི་བདེ་རྩ་རླབས་ཆེན་ཞིག་ཡིན་པའི་རྟིང་སྐུལ་གནང་། ཕྱི་དྲོ་ཆུ་ཚོད་༢་པ་ནས་༤་དང་ཕྱེད་ཀ་བར་ཀྲུའུ་ཀྲན་འབྲེལ་མཐུད་ལས་ཁུངས་སུ་ས་གནས་འགོ་འཛིན་དང་། ས་འཐུས་ཚོགས་གཙོ། རང་ཚོགས་ཚོགས་གཙོ་དང་སྤྱི་མི་ཁག སྨན་པ་དང་འཕྲོད་ལས་པ་སོགས་ས་གནས་ཀྱི་གནད་ཡོད་ཁག་དང་ལྷན་འཛོམས་གནང་། དོན་ཚན་གསུམ་གྱི་ཐད་གཏམ་བཤད་གོ་བསྡུར་གནང་། ༡༽འདིར་འཛོམས་པའི་ས་གནས་ཀྱི་གནད་ཡོད་ཁག་ལས་ང་རང་ས་གནས་འདིར་ཕྱོགས་བསྐྱོད་སྐབས་ཀྱི་ལས་དོན་བྱེད་ཕྱོགས་ཀྱི་ལམ་སྟོན་ཞུ་རྒྱུ། ༢༽ཚོགས་གཙོ་སྦྲེལ་བོ་ནས་སྐབས་བཅོ་ལྔ་བའི་སྤྱི་འཐུས་རྣམས་ས་བགོས་ཕྱོགས་བསྐྱོད་སྐབས་ཀྱི་ལས་དོན་བྱེད་ཀྱི་ལམ་སྟོན་ཅི་གནང་སྐོར་དང་། ས་བགོས་སྤྱི་འཐུས་ཀྱི་ལས་འགན་ག་རེ་ཡིན་མིན་ཁོ་ཚོས་མཁྱེན་རྟོགས་ཆེད་ངོ་སྤྲོད་ཞུས། ༣༽ས་གནས་ཀྲུའུ་ཀྲན་དུ་ས་གནས་འཐུས་ཚོགས་གལ་ཆེ་ཡིན་པ་དང་། ས་འཐུས་ཀྱི་འགན་དབང་དང་། ས་འཐུས་ཚོགས་གཙོ་ལ་ང་ཚོ་ཐུན་མོང་གིས་ངོས་ནས་ཕྱར་གྲུ་མཉམ་འདེགས་ཀྱིས་ས་འཐུས་ཚགས་ཚུད་བྱེད་ཐབས་ཅི་ཡོད་སོགས་ཀྱི་ཐད་གོ་བསྡུར་དང་བསམ་ཚུལ་བསྡུ་ལེན་ཞུས། ཕྱི་དྲོ་ཆུ་ཚོད་༦་པའི་སྟེང་ས་གནས་འགོ་འཛིན་དང་། འབྲེལ་མཐུད་པ་སོགས་མཉམ་ཨ་མ་ཚོགས་པའི་ལས་ཞོར་སློབ་སྦྱོང་བྱེད་མཁན་ཚོར་ལྟ་རྟོག་ཆེད་བཅར། རིག་པ་ནང་བར་འཆི་ཡང་བསླབ་ཅེས་པའི་ལེགས་བཤད་ལས་འཕྲོས་པའི་གཏམ་བཤད་དང་། བོད་ཡིག་དང་མཉམ་དུ་བོད་སྐད་ལ་དོ་སྣང་གནང་དགོས་པས་འབོད་སྐུལ་ཞུས། ཚང་མ་ལོ་ཆེན་པོ་ཡིན་སྟབས་ངོ་ཚ་གིན་འདུག་ཟེར། ཁྱོད་ཚོ་ལོ་ཆེན་པོ་གང་ཡང་མཐོང་གིན་མི་འདུག ངས་བལྟས་ཚོད་ཀྱིས་ཨ་མ་ཚོགས་པ་མ་ཡིན་པར་གཞོན་ནུ་མའི་ཚོགས་པ་འདྲ་བོ་མཐོང་གིན་འདུག་ཅེས་ཀུ་རེ་དང་སྦྲགས་ཤིང་སེམས་ཤུགས་སྤར། ཕྱི་ཚེས་༥་ཉིན་གྱི་ཞོགས་པའི་ཆུ་ཚོད་༧པའི་སྟེང་ཀྲུའི་ཀྲན་ནས་ལམ་དུ་ཆས། ཆུ་བོ་རྟ་མཆོག་ཁ་འབབ་(SIANG RIVER) ཀྱི་ཟམ་པ་བརྒལ། ཟམ་པ་དེ་ནི་གདོད་མའི་བཟོ་སྟངས་ལས་གྲུབ་པའི་ལྕགས་སྐུལ་དང་ཤིང་ལས་གྲུབ་པ་ཞིག་རེད། ཆུ་བོ་སྔོ་ཐང་ཐང་བཞུར་བའི་བར་སྣང་དུ་ལྕགས་ཟམ་མི་ཡི་འགྲོ་བསྐྱོད་དང་བསྟུན་ཏེ་ཡོམ་ཡོམ་འགུལ་བསྐྱོད་བྱེད་བཞིན་འདུག་པས། ཟམ་སྟེང་དུ་འགྲུལ་བཞུད་ལ་རྒྱུས་མེད་དང་།སྙིང་ཆུང་དག་འདི་ནས་འགྲོ་སྐབས་གློ་སྙིང་ཁ་ནས་ཐོན་པ་ལྟ་བུའི་དངངས་སྐྲག་ཡོང་བ་ནི་གདོན་མི་ཟ་བ་ཞིག་རེད། ཏི་ཛི་ས་གནས་འགོ་འཛིན་དང་། འབྲེལ་མཐུད་པ། སྨན་རྩིས་ཁང་སྨན་པ། འཕྲོད་ལས་པ་སོགས་མཉམ་ཀྱག་ཀྱོག་མང་པོའི་རྐང་ལམ་ཕྲ་མོར་ཞུགས། ཤིང་ནགས་དང་། རི་བོའི་གཡང་གཟར་རྒོད་པའི་ལམ་ཕྲན་འདི་ནི་རི་དྭགས་དགོ་བ་དང་། རྔོན་པའི་གསང་ལམ་འདྲ་བོ་ཞིག་ལས་རྟ་དང་མཛོ་བོ་སོགས་ཀྱང་ཐར་སྲོལ་མི་འདུག ཡིན་ཡང་ཚ་དྲོད་སྙོམས་ལ་ཉི་འོད་དང་ཆར་ཟིམ་རེས་སུ་འབབ་པ། འཇའ་གུར་ཤར་བ་སོགས་གནམ་གཤིས་བཟང་པོ་བསམ་པ་ལྟར་བྱུང་བ་ནི་བོད་སྐྱོང་ལྷ་སྲུང་དང་། ཡང་དགོས་ས་གནས་ཀྱི་ཡུལ་ལྷ་གཞི་བདག་ཚོས་ཁ་བ་གངས་ཅན་པའི་བསྟན་སྲིད་ལ་ཞབས་འདེགས་བསྒྲུབ་པའི་མཛད་ཕྱོགས་ཤིག་མིན་ནམ་སྙམ་ན་ཁོང་ཚོར་བཀའ་དྲིན་ཞུ་དགོས་པ་ཞིག་ཀྱང་མཆིས། ཕྱི་དྲོ་ཆུ་ཚོད་༤་བ་ཡོལ་ཙམ་ལ་ཉེ་རིང་(NYERING)གྲོང་སྡེར་འབྱོར། བརྒྱ་དཔོན་དང་གྲོང་སྡེ་གནད་ཡོད་ཁག་ནས་ཕེབས་བསུའི་མཇལ་དར་ཕུལ། བརྒྱ་དཔོན་གྱི་ནང་དུ་སྣེ་ལེན་ཞུས་ཤིང་། གྲོང་སྡེ་ཡི་གནད་ཡོད་ཚང་མ་འཛོམས་ཏེ་ཇ་དང་སྐྱུར་ཆང་འཐུང་སྟེ་ཁ་བརྡ་བྱས། ཤིང་ཁང་གྲུ་བཞི་དང་། ནང་གི་སྣོད་ཆས། ཁྱིམ་ཐབ་གླིང་བཞི་མ་ལས་ཕྱི་ལ་མཆེད་པའི་མེ་ལྕེ་བཅས་ཀྱིས་གནའ་བོའི་བོད་ཀྱི་འཚོ་གནས་དང་། བྱིས་དུས་སྐབས་ཀྱི་འབྲོག་པའི་འཚོ་གནས་དྲན་གསོ་བཏང་། དགོང་དྲོའི་ཆུ་ཚོད་༧་པའི་སྟེང་གཞིས་མི་ཉི་ཤུ་ལྷག་བརྒྱ་དཔོན་ནང་འཛོམས་ཏེ་ཚོགས་འདུ་དབུ་འཛུགས་དང་། ཚོགས་གཙོ་སྦྲེལ་བོའི་ལམ་སྟོན་གྱི་ཉིང་བསྡུས་ཞུས། གདོད་མའི་བོད་པའི་སྤྱི་ཚོགས་ཀྱི་འཚོ་གནས་རོལ་སྟངས་འདིས་གནའ་བོའི་གོམས་གཤིས་དང་རིག་གཞུང་མང་པོ་ཞིག་རྒྱུན་འཛིན་བྱས་ཡོད་པ་དང་། ཕྱིའི་དཔལ་འབྱོར་གྱིས་ཡར་རྒྱས་དེ་ཙམ་མེད་པ་དང་། འགྲིམ་འགྲུལ་གྱི་ལམ་ཁར་དཀའ་ངལ་ཡོད་ཀྱང་ཁྱེད་ཅག་གི་འཚོ་གནས་འདི་ཡང་ཧ་ཅང་གི་གལ་ཆེ་ཡིན་པ་དང་། མི་ལོ་ལྔ་བཅུར་བདག་པའི་ས་ཆ་འདི་མུ་མཐུད་རྒྱུན་གནས་ཀྱིས་གྲོང་སྡེ་སྲ་བརྟན་བཟོ་དགོས་པས་ལམ་སྟོན་ཞུས། མི་མང་གི་བསམ་ཚུལ་དང་རེ་སྐུལ་ལ་ཞིབ་ཉན་བྱས། ས་གནས་གཞན་ཞིག་ཏུ་གཞིས་སྤོར་བྱེད་ཐབས་མ་བྱུང་ཕྱིན་གཞིས་ཁང་ཉམས་གསོ་ངེས་པར་གནང་རོགས་ཟེར། ཕྱི་ཚེས་༦་ཉིན་གྱི་ཞོགས་པའི་ཆུ་ཚོད་༨་པའི་སྟེང་ཉེ་རིང་གྲོང་སྡེ་ཡི་དགོན་པ་གསར་གཞེངས་ཀྱི་ས་གནས་སུ་གནས་གཟིགས་ཞུས། (བདེ་སྡུག་ཞུས་པར་ཟུར་མཛར་དུ་ཡོད།) རང་ཉིད་ནས་གྲོང་སྡེ་སྤྱི་བ་དང་དགོན་པ་གསར་གཞེངས་ཆེད་བློས་བཅད་ཞལ་འདེབས་ཤིག་ཕུལ་ཏེ་ཕྱི་དྲོ་ཆུ་ཚོད་༢་པའི་སྟེང་གྲོང་སྡེ་པ་ཡངས་ལྡེམ་(PAYANGDEM)ཕྱོགས་སུ་བསྐྱོད། ལམ་རྐེད་དུ་པ་ཡངས་རྡེམ་འཐུས་མི་ཁག་ཅིག་ནས་འོ་མ་སོགས་འཁྱེར་ཏེ་སྣེ་ལེན་གྲ་སྒྲིག་བྱས་འདུག ཕྱི་དྲོ་སྤྲུལ་སྐུ་ཟླ་བ་ཟེར་བའི་ས་གནས་ཡུལ་མིས་ས་ཆ་འདི་འབུལ་ཡུལ་གྱི་མཚམས་པ་དེའི་མཚམས་ཁང་སོགས་སུ་གནས་གཟིགས་ཞུས། ས་གནས་འདི་ནས་རི་བོ་ཏཱ་ལ་དང་། པདྨ་ཤེལ་རི། ཀྲི་ཏ་པོ་རི། བདེ་བ་ཀོ་ཀྲ རྡོ་རྗེ་ཕག་མོའི་གནས། བྱ་ཁྱུང་བྲག་རི་སོགས་མཇལ་དཀའ་བའི་གནས་ཆེན་ཁག་ཅིག་དང་ཁད་ཉེ་བ་ཞིག་རེད་འདུག (གནས་ཆེན་འདི་དག་ནི་སྤྱན་རས་གཟིགས་དང་། སློབ་དཔོན་རིན་པོ་ཆེ། མགོན་པོ་འོག་དཔག་མེད་སོགས་ཀྱི་གནས་རི་རྩ་ཆེན་ཡིན་པར་ཡོངས་སུ་གྲགས།)དགོང་དྲོ་ཆུ་ཚོད་༦་པའི་སྟེང་ས་གནས་མི་མང་དང་མཉམ་འཛོམས་ཀྱིས་ཚོགས་གཙོ་སྦྲེལ་བོས་ལམ་སྟོན་གྱི་བཀའ་སློབ་ཁག་གི་ཉིང་བསྡུས་ཞུས་ཤིང་། ཆུ་ཚོད་༨་དང་ཕྱེད་ཀ་བར་བསམ་ཚུལ་དང་དྲི་བ་དྲི་ལན་གྱི་གོ་སྐབས་ཕུལ། རང་ཉིད་ནས་གྲོང་སྡེ་སྤྱི་བ་དང་། སྤྲུལ་སྐུ་ཟླ་བའི་མཚམས་ཁང་ཉམས་གསོའི་ཆེད་བློས་བཅད་ཞལ་འདེབས་ཤིག་ཕུལ་ཏེ་མ་ཎི་རིལ་བུ་སོགས་བྱིན། (བདེ་སྡུག་ཞུས་པ་ཟུར་མཛར་ཤོག་བུར་གསལ་ཡོད།) ཕྱི་ཚེས་༧་ཉིན་གྱི་ཞོགས་པའི་ཆུ་ཚོད་བདུན་པའི་སྟེང་ཝར་ནའི་དགེ་རྒན་ཟུར་བ་སྔགས་འཆང་བླ་མ་ཨོ་རྒྱན་བསྟན་འཛིན་དང་མཇལ། ཁོང་གིས་ས་གནས་སུ་མཚམས་ཁང་རེ་ཟུང་དང་། སློབ་གྲྭ སྒྲུབ་སྡེ་ལྷུན་གྲུབ་སྟོབས་རྒྱས་གླིང་ཞེས་པ་ཞིག་ཀྱང་བཙུགས་ཡོད། ཆེ་ཆུང་ལ་མ་ལྟོས་པར་ཁོང་གིས་གནང་བའི་ཕྱག་ལས་འདི་དག་ནི་ས་གནས་འདི་ལ་དཔོག་ན་གལ་ཆེན་པོར་མཐོང་སོང་ལ། གྲོང་སྡེ་སྲ་བརྟན་གྱིི་ལས་གཞིར་དེ་ལས་ཕན་ཐོགས་ཆེ་བར་མངོན། (རེ་སྐུལ་ཞུས་པ་ཟུར་གསར་ཤོག་ངོར་བཀོད་ཡོད། ཆུ་ཚོད་༩་བ་ནས་ཉམ་ཐག་ཁག་ཅིག་གི་ནང་བཅར་བ་དང་། ས་གནས་འགོ་འཛིན་ལགས་ཀྱིས་ཉམ་ཐག་རོགས་དངུལ་ཕུལ་བ་དང་། ནད་གཅོང་ཚོར་གང་ཐུབ་ཆོས་དང་མཐུན་པའི་བསླབ་བྱ་བསྐྱོན་པ་ཡིན། སྤྲུལ་སྐུ་ཟླ་བའི་དགོན་པ་དང་མཆོད་རྟེན་སོགས་སུ་གནས་གཟིགས་གནང་བ་དང་། དགོན་པའི་ནང་གི་དཔེ་རྙིང་གཙོ་བོས་ཆོས་དཔེ་ཁག་ཅིག་ལ་འཇོག་སྣོད་མེད་པ་དང་དཔེ་ཐུམ་ཙི་ཙིས་ཟོས་པ་སོགས་ལ་ཕངས་སེམས་སྐྱེས། ཉིན་གུང་ཞི་མོ་གླིང་(SHIMOLING)གྲོང་སྡེ་ཡི་བརྒྱ་དཔོན་རྡོ་རྗེ་དགྲ་འདུལ་ལགས་ངོ་བཅར་ཞུས། ཁོང་གི་ཡབ་ནི་གཏེར་སྟོན་ཆོས་ཀྱི་ཉི་མ་ཅེས་པའི་ཁམས་དགའ་བ་ནས་ཡིན་པའི་སྔགས་འཆང་ཞིག་ཡིན་པ་དང་། ཁོང་ལ་ས་གནས་ཡུལ་མིས་ཕུལ་བའི་ས་ཆ་ཆེན་པོ་ཡོད་པ་དང་། དགོན་པ་ཞིག་ཀྱང་གཞེངས་ཡོད། ད་ཆར་ས་གནས་འདིར་བོད་མིའི་སྒྲིག་འཛུགས་ཀྱི་ཁྱབ་འོག་སྒྲུབ་མཇལ་ཞུ་བའི་བོད་པའི་ཁྱིམ་ཚང་གསུམ་ལས་མེད་པ་དང་། དགོན་པ་ཉམས་ཆག་ཆེ་བ་སོགས་ཀྱི་བདེ་སྡུག་ཞུས་སོང་། ཁོང་གིས་ཞུས་པའི་བདེ་སྡུག་གི་གནས་བབ་ཐད་འདི་ཡིན་ཟེར་བའི་ལམ་སྟོན་ཞུ་རྒྱུ་མ་བྱུང་། ས་ཆ་དེ་ཧ་ཅང་གི་གལ་ཆེ་ཞིག་ཡོད་ཚུལ་འདུག་ཀྱང་འགྲིམ་འགྲུལ་སྟབས་བདེ་མིན་པར་བརྟེན་ས་གནས་དེར་བོད་མི་གནས་སྡོད་དང་། འཛུགས་སྐྲུན་བདག་སྐྱོང་ཐད་དཀའ་ངལ་ཆེན་པོ་རེད་འདུག ཆུ་ཚོད་གཉིས་པའི་སྟེང་སྨྱུག་ཁང་(NUKKANG)གྲོང་སྡེར་འཚམས་གཟིགས་སུ་སོང་། གྲོང་སྡེ་འདིར་བོད་མི་སྐྱབས་བཅོལ་བའི་ཁྱིམ་ཚང་གསུམ་ཙམ་ལས་མེད་མོད། མི་གྲངས་སུམ་ཅུ་ཙམ་འདུག གྲོང་སྡེའི་ལྷ་ཁང་དང་། དར་ལྕོག ཉེ་འཁྲིས་སུ་ཤིན་ཏུ་རྙིང་བའི་མཆོད་རྟེན་མང་པོ་བཅས་ཀྱིས་ཁོར་ཡུག་འདི་མཐོང་བ་ཙམ་གྱིས་བོད་ཀྱི་ཞིང་ཁམས་ཤིག་ཏུ་སླེབས་པའི་ཚོར་བ་ནི་འགོག་ཐབས་མེད་པ་ཞིག་ཡིན། ས་གནས་བོད་མི་ཚང་མར་རང་སྒེར་གྱིས་མ་ཎི་རིལ་བུ་དང་། བདུད་རྩི་ཆོས་སྨན། ༸གོང་ས་སྐྱབས་མགོན་ཆེན་པོས་བྱིན་རླབས་མཛད་པའི་ཕྱག་མདུད་སོགས་གནང་སྟེ་བདེ་སྡུག་ལ་གཟིགས་རྟོག་ཞུས། གྲོང་སྡེ་ཁག་ཏུ་བསྐོར་བསྐྱོད་སྐབས་ས་གནས་འགོ་འཛིན་ནས་ཉམ་ཐག་གི་རོགས་དངུལ་སྤྲད་པ་དང་། སྨན་པ་དང་འཕྲོད་ལས་པ་གཉིས་ཀྱིས་མི་མང་ལ་དགོས་མཁོ་ལྟར་སྨན་བཅོས་བྱས། འབྲེལ་མཐུད་པས་ལམ་སྟོན་རྒྱུས་ཡོད་དང་ངེད་ཀྱིས་གཏམ་བཤད་སྐབས་སྐད་བསྒྱུར་གནང་། ཕྱི་ཚེས་༨་ཉིན་གྱི་ཞོགས་པའི་ཆུ་ཚོད་༧་པའི་སྟེང་ཕྱིར་ཀྲུའི་ཀྲན་ལ་ལམ་དུ་ཆས། ངལ་གསོ་མང་ཙམ་ཡང་མ་བྱས་པར་འདུར་རྒྱུག་ཁོ་ན་བྱས་ཀྱང་ཕྱི་དྲོ་ཆུ་ཚོད་༤་དང་ཕྱེད་ཀ་ཙམ་ལས་ཀྲུའུ་ཀྲན་དུ་འབྱོར། བྲག་བྱ་ཁྱུང་གི་འཁྲིས་སུ་བོད་མི་ཁག་ཅིག་གིས་གསོལ་ཇ་དང་བཞེས་ཏོག་སོགས་སྒྲིག་ཏེ་ཕེབས་སྒུག་ཞུས་འདུག ལམ་བར་ནས་ཡོ་དོང་(YODONG)བརྒྱ་དཔོན་དང་མཇལ་དེ་འཚམས་འདྲི་དང་གནས་ཚུལ་ཤེས་རྟོག་རོབ་ཙམ་བྱས། གྲོང་སྡེ་འདིར་དེང་སྐབས་བོད་པའི་མི་ཚང་གསུམ་ཙམ་ལས་མི་འདུག བོད་པའི་གྲོང་མི་ཚང་མར་མ་ཎི་རིལ་བུ་སོགས་བསྐུར་ཏེ་ལམ་སྟོན་རོབ་བསྡུས་ཞུས། ཕྱི་ཚེས་༩་ཉིན་གྱི་ཞོགས་པའི་ཆུ་ཚོད་༨་པའི་སྟེང་བྷེ་ཤིང་གྲོང་སྡེ་ཕྱོགས་སུ་ཆས། ཆུ་ཚོད་༡་དང་ཕྱེད་ཀ་ཙམ་ལ་རླངས་འཁོར་ནང་སོང་རྗེས་སྨན་རྩིས་སྨན་པ་དང་། འབྲེལ་མཐུད་པ་ངེད་གསུམ་གླ་བོ་ལྡིང་ལྡིང་དང་། སྟག་མོ་མཆོངས་མཆོངས་བྱེད་བཞིན་ཉིན་རྒྱབ་ཆུ་ཚོད་༣་པ་ཙ