གནམ་ས་གོ་འབྱེད།

བོད་རིགས་རྩོམ་པ་པོ་སྐུ་ཞབས་ཞོགས་དུང་ངམ། མིང་དངོས་ལ་བཀྲ་རྒྱལ་ལགས་ཀྱིས་ ༢༠༠༨ ལོའི་བོད་མིའི་ཞི་བའི་འོས་ལངས་ཆེན་མོར་བསྐྱར་དུ་བསམ་གཞིགས་གཏིང་ཟབ་བྱས་ཏེ། དོ་རྐྱེན་དེ་ལ་ས་བྱི་ཞི་བའི་གསར་བརྗེ་ཞེས་པའི་ངོས་འཛིན་ཐོག ཁ་བྱང་ལ་༼ གནམ་ས་གོ་འབྱེད ༽ ཞེས་པའི་དཔེ་དེབ་ཅིག་གསར་དུ་བརྩམས་ཡོད་འདུག 

་་་

ཕྱི་ནང་གི་དྲ་རྒྱར་བཀག་སྡོམ།

རྒྱ་ནག་གིས་མ་འོངས་པར་རྒྱ་ནག་ནང་དོན་རྐྱེན་འདྲ་བྱུང་སྐབས་ཕྱི་ཕྱོགས་ཀྱི་མིས་རྒྱ་ནག་ནང་གི་དྲ་རྒྱ་སྔོག་མི་ཐུབ་པ་བཟོ་རྒྱུར་ཚོད་ལྟ་བྱས་འདུག

་་་

ཤིན་ཅང་ལས་དོན་ཚོགས་འདུ།

རྒྱ་ནག་གི་སྲིད་འཛིན་ཧོའུ་ཡིས་རྒྱ་ནག་དབུས་ཆབ་སྲིད་ལྷན་ཁང་གི་རྒྱུན་ལས་ཚོགས་ འདུ་བསྡུས་ཏེ་ད་ལོར་རྒྱ་ནག་དབུས་གཞུང་གིས་ཤིན་ཅང་ལས་དོན་གྲོས་མོལ་ཚོགས་འདུ་ བསྡུ་རྒྱུ་ཐག་གཅོད་བྱུང་ཡོད།

་་་

དོན་གྱིས་གྲྭ་བ་ཚོ་ཞ་ར་དང་འོན་པ་བཟོས་པ་རེད།

ཟླ་འདིའི་ནང་མདོ་སྨད་རྔ་བ་སྒོ་མང་དགོན་པ་དང་ཀིརྟི་དགོན་པ་སོགས་རྔ་བ་ཁུལ་ གྱི་དགོན་སྡེ་ཁག་གི་དོགས་ཡོད་གྲྭ་བཙུན་རྣམས་ཀྱི་ཁ་པར་ཨང་གྲངས་དང་གླེང་མོལ་ ཨང་གྲངས་ཡ་ཧོ་ཁ་བྱང་། དེ་བཞིན་དོགས་ཡོད་དགེ་འདུན་པ་དེ་དག་གི་སྡོད་མིང་འཛིན་བྱང་གི་ཨང་གྲངས་སོགས་ རྔ་བ་ས་གནས་ཉེན་རྟོག་པས་བསྡུ་རུབ་བྱེད་ཀྱིན་ཡོད་འདུག

་་་

གཞུང་ཞབས་པ་ཚོ་ཕྱི་རྒྱལ་དུ་སོང་བ་རེད།

ཕྱི་ལོ་ ༢༠༠༧ ལོ་དང་བསྡུར་ན་འདས་པའི་ལོ་གཉིས་ནང་བཙན་བྱོལ་བོད་གཞུང་གི་གཞུང་ཞབས་ལས་བྱེད་དགོངས་པ་ཞུ་བའི་གྲངས་ཚད་ཉུང་དུ་སོང་ཡོད་ཐོག བཀའ་ཤག་ནས་བཀའ་འཁྲོལ་ཐོབ་པའི་ས་མིག་སྔར་བས་ཀྱང་མང་དུ་སོང་ཡོད།

་་་

མི་ཚེའི་བྱས་རྗེས་ཀྱི་གཟེངས་རྟགས།

རྒྱ་གར་རྒྱལ་ཡོངས་ཀྱི་གཞུང་འབྲེལ་མིན་པའི་ཚོགས་པ་ང་བདུན་གྱིས་མི་ཚེའི་བྱས་ རྗེས་ཀྱི་གཟེངས་རྟགས་ཤིག་བོད་མིའི་རང་དབང་འཐབ་རྩོད་པ་དང་རྩོམ་པ་པོ་དང་བསྟན་ འཛིན་བརྩོན་འགྲུས་ལགས་ལ་སྤྲད་ཡོད་འདུག

་་་

ཀྲུང་དབྱང་གིས་བོད་ཐོག་འཛིན་པའི་སྲིད་བྱུས་ཡང་དག་ཡིན།

ཉེ་ཆར་རྒྱ་ནག་དབུས་གཞུང་གིས་བོད་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་བ་སྐོང་ཚོགས་བྱས་ཤིང་། བོད་ལྗོངས་ཀྱི་འཕེལ་རྒྱས་དང་བརྟན་བརླིང་གཉིས་དཀྱིལ་སྙིང་དུ་བཟུང་སྟེ། བོད་མིར་ཀྲུང་ཧྭ་མི་རིགས་ཀྱི་འདུ་ཤེས་དང་རྒྱལ་ཁབ་ཀྱི་འདུ་ཤེས་བསྐྲུན་གལ་ཆེ་སྐོར་བརྗོད་འདུག་ལ། བོད་ཁུལ་གྱི་སྐྱེས་ཁམས་ཁོར་ཡུག་སྲུང་སྐྱོང་དང་སྤྱི་ཚོགས་འཛུགས་སྐྲུན་སོགས་ཚན་རིག་དང་མཐུན་པར་བསྒྲུབས་ཏེ། ༢༠༢༠ ལོར་བོད་ཁུལ་ཡོངས་འབྱོར་འབྲིང་སྤྱི་ཚོགས་སུ་བསྐྱོད་ཐུབ་པར་སྔོན་དཔག་བྱས་འདུག

་་་

ལྷ་སའི་དྲ་ཁང་དོ་དམ།

ལྷ་ས་རིག་གནས་སྡེ་ཁག་དང་སྤྱི་བདེ་ཉེན་རྟོག་ཚན་པ། གྲོང་ཁྱེར་དོ་དམ་ཚན་པ་བཅས་ཀྱིས་མཉམ་འབྲེལ་ཐོག དུས་ཡུན་ཟླ་གསུམ་རིང་ལྷ་ས་ཁུལ་གྱི་དྲ་ཁང་ཁག་ལ་བཅོས་སྒྲིག་དང་གཙང་བཤེར་བྱས་ཏེ་དོ་དམ་ཤུགས་ཆེ་རུ་གཏོང་རྒྱུ་ཡིན་འདུག

་་་