• ༧གོང་ས་མཆོག
• ངྷ་ས།
• བཙན་བྱོལ།
• བོད།
• འཛམ་གླིང་།
• བསམ་ཚུལ།
• བོད་དོན།
• ཆེད་བརྗོད།
• ས་མིག
• གསལ་སྒྲག
• དམངས་གཙོ།
• རྒྱ་ནག
• ཚན་རྩལ།
• འཕྲོད་བསྟེན།
• གོ་ལའི་ཚ་དྲོད།
• ཁོར་ཡུག
• ཟིན་བྲིས།
• གླེང་སྟེགས།
• གསར་འགོད་རིག་པ།
• ཚིག་མཛོད།
• དཔེ་དེབ།
• གླུ་གཞས།
• བརྙན་འཕྲིན།
• པར་མཛོད།

བོད་མི་རིགས་ཀྱི་དར་རྒུད་མགོ་རྩོམ་ས་ཞིག་ཆགས་ཡོད།

བཙན་བྱོལ་བོད་མིའི་བཅའ་ཁྲིམས་ནང་གི་༧གོང་ས་མཆོག་གི་སྐུ་དབང་དང་འབྲེལ་བའི་རིགས་ཡོངས་རྫོགས་བསྐྱར་བཅོས་གནང་སྟེ། བཀའ་ཤག་སྐབས་བཅུ་བཞི་བ་དང་སྤྱི་འཐུས་སྐབས་བཅོ་ལྔ་བའི་ལས་དོན་མགོ་འཛུགས་བྱ་ལ་ཉེ་བའི་སྐབས་དང་བསྟུན་ཏེ། བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག་ལ་བཅར་འདྲི་ཞུས་ཡོད།

དྲི་བ། སྐབས་བཅུ་བཞི་བའི་བཀའ་བློན་ཁྲི་པའི་འོས་མི་གསུམ་གྱིས་སྤྱི་ཚོགས་ནང་ཁྱབ་བསྒྲགས་ཡུན་རིང་བྱས་ཏེ་དངོས་གཞིའི་འོས་བསྡུའི་གྲུབ་འབྲས་གསལ་བསྒྲགས་བསྐྱངས་ཡོང་སྐབས། ཁྲིམས་ལུགས་ཆེད་མཁས་པ་བློ་བཟང་སེང་གེ་ལགས་སུ་རྒྱལ་ཁ་ཐོབ་ཡོད་པ་རེད། དེར་བརྟེན་ཐེངས་འདིའི་འོས་བསྡུའི་ལས་རིམ་དང་འབྲེལ་བའི་ཐོག་ལ་དགོངས་ཚུལ་གང་འདྲ་ཡོད་དམ།

ལན། རྩ་བའི་ད་ལོའི་བཀའ་བློན་ཁྲི་པའི་འོས་བསྡུའི་ཐད་བཙན་བྱོལ་མི་མང་གིས་དོ་སྣང་ཆེན་པོ་གནང་སོང་། དེ་བཞིན་བོད་ནང་དུའང་དོ་སྣང་ཆེན་པོ་བྱུང་ཡོད་ས་རེད། བགྲོ་གླེང་དང་ལས་འགུལ་ཤུགས་ཆེན་པོ་སྤེལ་སོང་། དེ་དག་གིས་སྤྱི་ཚོགས་ལ་ཕན་ཐོགས་ཆེན་པོ་བྱུང་ཡོད་རྒྱུ་རེད། ཆབ་སྲིད་ཀྱི་སློབ་སྦྱོང་ལྟ་བུ་རེད། གནད་དོན་མང་པོའི་ཐོག་ལ་བསམ་བློ་གཏོང་རྒྱུའི་གོ་སྐབས་བྱུང་བ་རེད། བཙན་བྱོལ་མི་མང་གིས་སྤྱི་བའི་ལས་དོན་ཐོག་དོ་སྣང་དང་ཁུར་ཆེན་པོ་ལེན་གྱི་ཡོད་པའི་རྣམ་འགྱུར་ཤུགས་ཆེན་པོ་ཐོན་སོང་། དེ་བཞིན་ཕྱི་རྒྱལ་ཁག་གི་བོད་རིགས་ཁ་འཐོར་ཚོའི་ནང་དུའང་བཀའ་བློན་ཁྲི་པའི་སྐོར་ལ་དོ་སྣང་ཆེན་པོ་རེད། དེ་རྟགས་མཚན་ཡག་པོ་ཞིག་རེད།

མཐའ་མའི་འོས་ཀྱི་གྲུབ་འབྲས་གསལ་བསྒྲགས་བསྐྱངས་ཡོང་སྐབས། བཀའ་བློན་ཁྲི་པའི་འོས་ཤོག་གི་གྲངས་ཀ་དེ་སྐབས་གཉིས་པ་ལས་མཐོ་རུ་ཕྱིན་འདུག འོན་ཀྱང་། ང་རང་གི་རེ་བར་དེ་ལས་ཀྱང་མཐོ་བ་ཞིག་ཡོང་གི་རེད་བསམས་ཡོད། སྐབས་སྔོན་མ་བརྒྱ་ཆ་སུམ་ཅུ་སོ་གྲངས་རེད། ཐེངས་འདིར་ཕལ་ཆེར་བརྒྱ་ཆ་བདུན་ཅུར་བསླེབ་མདོག་ཁ་བོ་རེད་བསམས་སོང་། འོན་ཀྱང་དེ་ཙམ་ཞིག་བསླེབས་མི་འདུག མཐའ་མའི་གསལ་བསྒྲགས་ནང་བློ་བཟང་སེང་གེ་ལ་འོས་བརྒྱ་ཆ་ལྔ་བཅུ་ལྷག་ཅིག་ཐོབ་པ་རེད། ངས་སྔོན་མ་དེ་ལས་མཐོ་ཞིག་བསླེབ་ཀྱི་རེད་བསམ་སོང་། འོན་ཀྱང་། བརྒྱ་ཆ་ལྔ་བཅུ་ལས་བརྒལ་བ་དེ་ཡག་རྟགས་རེད།

བློ་བཟང་སེང་གེ་ལ་འོས་ཐོབ་དགོས་པའི་རྒྱུ་མཚན་གང་རེད་ཟེར་ན། མི་མང་གིས་བློ་བཟང་སེང་གེ་ལ་འོས་བླུགས་པ་དེ་སློབ་སྦྱོང་ཡོད་པ། ལོ་གཞོན་པ། མི་གསར་པ་ཡིན་པ་སོགས་ལ་བལྟས་པ་གསལ་བོ་རེད། བཀྲ་ཤིས་དབང་འདུས་དང་ངེད་གཉིས་ལོ་ཅུང་རྒན་པ་དང་། བཙན་བྱོལ་གཞུང་གི་ལས་བྱེད་རྙིང་པ། སྤྱི་ཚོགས་རྙིང་པའི་མི་རེད། འདིའི་སྐོར་ལ་སྐད་ཆ་དང་བསམ་ཚུལ་ཕྲན་བུ་བྱུང་ཡོད་ས་རེད། འདི་ཅུང་གནས་ཚུལ་གསར་པ་འདྲ་ཞིག་རེད། ལོ་བཅོ་ལྔ་ཉི་ཤུའི་གོང་ལ་བཙན་བྱོལ་གཞུང་གི་ལས་བྱེད་ཚོར་མི་མང་ནང་བརྩེ་དུང་དང་ཡིད་ཆེས་ཆེ་བ་ཡོད་པ་རེད། བར་སྐབས་ཤིག་ནས་ཅུང་མར་ཆག་ཡོད་པ་འདྲ། དེའི་རྒྱུ་མཚན་གསལ་བོ་ཞིག་བཤད་ཐུབ་ཀྱི་མི་འདུག་མོད། ང་རང་གི་མཐོང་ཚུལ་ཞུས་ན་དེ་ལ་གནད་དོ་ཁ་ཤས་ཡོད་རྒྱུ་རེད་དྲན་ཡོད། གཅིག བོད་རྒྱའི་གནད་དོན་ལ་གྲུབ་འབྲས་མ་སོན་པས་མི་མང་ལ་སེམས་འཚབ་ཡོད་རྒྱུ་རེད། གཉིས། སྔོན་ཆད་བོད་གཞུང་དང་བཙན་བྱོལ་མི་མང་ལ་ཕྱི་ནས་རོགས་རམ་ཡག་པོ་རག་སྟེ་ཡར་རྒྱས་ཕྱིན་པ་རེད། འོན་ཀྱང་བར་སྐབས་ཤིག་ནས་རོགས་རམ་དེ་ཙམ་མ་རག་པས་ལན་པ་མིན་འགྲོ་བསམ་གྱི་འདུག གསུམ་པ། ད་ཆར་བཙན་བྱོལ་ནང་བརྒྱད་ཅུ་གྱ་གྲངས་ཀྱི་རྗེས་ནས་འབྱོར་མཁན་བརྒྱ་ཆ་ ༡༠ ཙམ་ཟིན་གྱི་ཡོད་པ་རེད། བོད་ནས་གསར་དུ་འབྱོར་བ་མང་ཆེ་བས་བཙན་བྱོལ་གཞུང་གི་སྒྲིག་འཛུགས་དང་འགྲོ་སྟངས་གསལ་བོ་ཞིག་ཧ་གོ་ཡི་ཡོད་པ་མ་རེད། དེ་བཞིན། དཀའ་ལས་སུས་བརྒྱབ་པ་དང་བྱས་རྗེས་སུ་ལ་ཆེ་བ་ཞེ་དྲག་ཤེས་ཀྱི་ཡོད་པ་མ་རེད། དེའི་སྒང་ལ་རྒྱ་ནག་ལ་དགའ་བོ་མེད་ཀྱང་། ཆུང་དུས་ནས་རྒྱ་གཞུང་གིས་ “སྤྱི་ཚོགས་རྙིང་པ་དང་སྐུ་དྲག” ཅེས་མང་པོ་བཤད་བསྡད་པའི་དབང་གིས་བསམ་བློའི་ནང་བག་ཆགས་ཕྲན་བུ་ཞིག་ཡོད་པ་རེད། བཞི་བ། ཁ་ཤས་ཀྱི་བཤད་སྟངས་ལ་བལྟས་ཡོང་ན། གདན་ས་ཁག་ནང་བོད་ནས་ཕེབས་མཁན་མང་བ་དང་ཆོལ་ཁ་ཆོས་ལུགས་ཀྱི་ལུང་ཞེན་ཆེན་པོ་ཡོད་པ་རེད་ཟེར། དེ་ཡང་ཕྲན་བུ་ཞིག་ཡིན་རྒྱུ་རེད། དེ་འདྲའི་རྒྱུ་མཚན་མང་པོ་ཞིག་ལ་བརྟེན་ཏེ། སློབ་སྦྱོང་ཡོད་མཁན་ཞིག་དང་མི་རབས་གསར་པ་ཞིག་ལ་རེ་སྙེག་བྱས་པ་རེད་བསམ་གྱི་འདུག

ང་རང་སྒེར་ངོས་ནས་སྔོན་འགྲོ་དང་དངོས་གཞི་གཉིས་ཀའི་ནང་ཧུར་ཐག་འབད་ཐག་བྱས་པ་ཡིན། ལས་འགུལ་འདི་ནི་སྤྱི་བའི་ལས་དོན་ཞིག་ཡིན་སྟབས། སྤྱི་བའི་ལས་དོན་དེའི་ཐོག་ལ་དམིགས་ཡུལ་ཇི་བཞིན་འགྲུབ་པ་ཞིག་དང་འདོད་པ་ཁེངས་པ་ཞིག་ཡོང་རྒྱུ་མེད་པ་ངས་སྔོན་མ་ནས་ཧ་གོ་ཡི་ཡོད། འོན་ཀྱང་ཧུར་ཐག་བྱས་ཏེ་སྤྱི་བའི་ལས་དོན་ཐོག་ཕན་ཐོགས་རེ་བྱུང་ན་བསམ་པ་ཡིན་སྟབས། ང་ལ་འགྱོད་པ་ཆེན་པོ་དང་བློ་ཕམ་ཆེན་པོ་དེ་འདྲ་མེད།

དྲི་བ། བཀའ་ཤག་སྐབས་བཅོ་ལྔ་པའི་བཀའ་བློན་ཁྲི་པའི་སྲིད་བྱུས་དང་ལངས་ཕྱོགས། འོས་བསྡུའི་བརྒྱུད་རིམ་ཁྲོད་འབྲེལ་འདྲིས་བྱས་པའི་མྱོང་ཚོར་བཅས་ལ་གཞིགས་ན། མ་འོངས་པའི་ལོ་ལྔ་དེའི་ནང་བཙན་བྱོལ་སྤྱི་ཚོགས་ལ་འཕེལ་འགྱུར་གང་འདྲ་འབྱུང་སྲིད་དམ། 

ལན། དེ་ངས་འདི་འདྲ་ཞིག་རེད་ཟེར་ནས་མཐའ་གཅིག་ཏུ་གསལ་བོ་ཞིག་བཤད་ཐུབ་ཀྱི་མི་འདུག བཙན་བྱོལ་བོད་གཞུང་གི་ལས་ཀ་དེ་རྙོག་དྲ་ཚ་བོ་ཡོད་པ་རེད། ང་ཚོ་མི་འབོར་ཉུང་ཉུང་དང་གཞུང་གི་སྒྲིག་འཛུགས་ཆུང་ཆུང་ཡིན་ཡང་། རྙོག་དྲ་དང་དཀའ་ངལ་གཞུང་གཞན་ལས་ཆེ་བ་མིན་ཡང་། ཕལ་ཆེར་འདྲ་མཚུངས་ཤིག་ཡོད་པ་རེད། སོ་སོའི་ལུང་པའི་ནང་མིན་སྟབས་ཆབ་སྲིད་དང་འཛིན་སྐྱོང་ཐོག་དཀའ་ངལ་ཆེན་པོ་ཡོད་པ་རེད། བློ་བཟང་སེང་གེ་ལ་མཚོན་ན་གཞུང་གི་ལས་ཀའི་ཉམས་མྱོང་མེད་པའི་དབང་གིས་དཀའ་ལས་ཁག་པོ་ཡོང་གི་རེད། འོན་ཀྱང་བློ་བཟང་སེང་གེ་ལགས་ཀྱི་ལས་ཀ་ལམ་འགྲོ་ཡོང་རྒྱུ་དེ་གལ་ཆེན་པོ་ཞེ་དྲག་རེད། ཁོའི་ལས་དོན་ལམ་འགྲོ་ཡོང་ན་ང་ཚོ་ཚང་མར་ཁྱད་པར་འགྲོ་བ་རེད། གཞུང་སྒེར་ཚང་མས་རྒྱབ་སྐྱོར་དང་རོགས་རམ་གནང་བ་ཡིན་ན་ཁོང་ལ་ཕན་པ་རེད་ལ་ང་ཚོ་ལའང་ཕན་པ་རེད། ད་ལྟའི་དུས་ཚོད་འདི་ང་ཚོར་ཆབ་སྲིད་ཀྱི་རྙོག་དྲ་ཞིག་ཡོད་པ་རེད། སྤྱི་ཚོགས་ནང་གི་ལྟ་བ་ལངས་ཕྱོགས་དང་ཆོལ་ཁ་ཆོས་ལུགས་ཀྱི་བསམ་ཚུལ་འདྲ་མིན་ཡོད་པ་རེད། དེ་དང་མཉམ་དུ་འཛམ་གླིང་སྤྱི་འགྲོས་ལྟར་སྤྱི་ཚོགས་ལ་འགྱུར་ལྡོག་ཆེན་པོ་འགྲོ་བཞིན་ཡོད་པ་རེད། འདི་དག་ཚང་མ་གཞུང་གི་སྒྲིག་འཛུགས་ལ་ཕན་པ་ཞིག་དང་། ལམ་སྟོན་བྱ་ཐུབ་པ་ཞིག་དགོས་པ་རེད། ང་ཚོས་ནམ་རྒྱུན་དུས་ཚོད་ཛ་དྲག་པོ་ཡིན་ཟེར་གྱི་ཡོད་པ་རེད་དེ། ད་ལྟའི་དུས་ཚོད་འདི་དོན་དངོས་ཐོག་འདས་པའི་ལོ་ལྔ་བཅུ་དང་། མ་འོངས་པའི་ལོ་གང་འཚམས་ཤིག་གི་ནང་ཚུན་གྱི་ཛ་དྲག་ཤོས་ཤིག་རེད་བསམས་ཀྱི་ཡོད། བོད་པའི་རྩ་དོན་དང་སྤྱི་ཚོགས་དར་བ་དང་། ཡང་ན་རྒུད་པའི་མགོ་རྩོམ་ས་ཞིག་ཆགས་ངེས་རེད།

དྲི་བ། བཀའ་ཤག་སྐབས་བཅོ་ལྔ་པའི་བཀའ་བློན་ལྷན་ཚོགས་ནང་ཕྱག་ལས་གནང་འདུན་ཡོད་མེད་དང་། གལ་སྲིད་བཀའ་བློན་ཁྲི་པ་གསར་པས་མིང་འདོན་གནང་བ་ཡིན་ན་ངོས་བཞེས་གནང་འཆར་ཡོད་དམ།

ལན། ད་ལྟའི་ཆར་དེ་ཚོའི་ཐོག་ལ་དམིགས་བསལ་རེ་བ་དང་འབད་བརྩོན་གང་ཡང་བྱེད་ཀྱི་མེད། གང་ཡིན་ཟེར་ན། བཀའ་བློན་ཁྲི་པ་གསར་པ་ཞིག་ཐོན་པ་རེད། ཁོང་རང་ལ་འདོད་པ་ཡོད་པ་དང་ལས་ཀ་མཉམ་དུ་བྱེད་ཐུབ་ས་དེ་འདྲ་ཞིག་བྱུང་ན་ཡག་གི་རེད། སྤྱི་ཚོགས་ནང་ནས་ཀྱང་ཡར་ཡག་པོ་ཡོད་པ་རེད་མར་ཡག་པོ་ཡོད་པ་རེད་ཟེར་ནས་བཀའ་བློན་བསྐོ་བཞག་ཐོག་བསམ་ཚུལ་མང་པོ་བཤད་ན་ཡག་པོ་ཡོང་གི་མ་རེད། གལ་སྲིད་ཁོང་གིས་ང་རང་མིང་འདོན་གནང་བ་ཡིན་ན་ཡང་། སྐབས་མཚམས་ལ་ང་སྒེར་ངོས་ནས་བསམ་བློ་ཞིག་གཏོང་དགོས་པ་རེད་བསམ་གྱི་འདུག ཕྱི་ལོགས་འདྲ་ཆགས་པོ་ཞིག་བྱས་ཏེ་ཕན་ཐོགས་ཡོད་པ་མ་རེད། ལུང་པ་ཁ་ཤས་ནང་ཆབ་སྲིད་ཀྱི་ཕྱོགས་ཁག་གཉིས་ཆགས་ཤིང་། བསམ་ཚུལ་མ་མཐུན་པ་བྱུང་སྟེ་སྤྱི་བའི་ལས་ཀ་ཁྱོན་ནས་བྱ་མ་ཐུབ་པ་བྱུང་སྐབས། འོས་འདེམས་བྱས་ཚར་བའི་རྗེས་ལ་མཐུན་སྒྲིལ་ཡོང་བའི་ཆེད་དུ་ཕྱོགས་གཉིས་ཀའི་མི་སྣ་དེ་འདྲ་མཐོ་རིམ་ནང་བསྐོས་ཏེ་ལས་ཀ་མཉམ་དུ་བྱེད་ཀྱི་ཡོད་པ་དེ་འདྲ་ཡོད། ང་ཚོའི་སྤྱི་ཚོགས་ནང་ད་སྔ་དེ་འདྲའི་མ་མཐུན་པ་མེད་སྟབས། མི་མང་གིས་འོས་འདེམས་བྱས་པ་ཚང་མ་ལ་བདག་པོ་རྒྱག་དགོས་དོན་ཡོད་པ་མ་རེད།

དྲི་བ། ༸གོང་ས་མཆོག་གིས་བོད་མིའི་ཆབ་སྲིད་དང་འཛིན་སྐྱོང་གི་ཐུགས་འགན་མཚམས་འཇོག་གནང་གི་ཡོད་པའི་འཕོ་འགྱུར་འདི་ལ་གཟིགས་ཕྱོགས་གང་འདྲ་ཡོད་དམ།

ལན། འདི་འགྱུར་བ་ཆེན་པོ་རེད། རྒྱལ་རབས་ལོ་རྒྱུས་ནང་འགོད་རྒྱུའི་གནས་ཚུལ་ཞིག་ཆགས་ཀྱི་ཡོད། ཏཱ་ལའི་བླ་མ་དང་དགའ་ལྡན་ཕོ་བྲང་བོད་སྤྱི་ལ་འབྲེལ་བ་ཆགས་ཏེ་ལོ་ ༤༠༠ ལྷག་འགྲོ་བཞིན་ཡོད། དེའི་ནང་ནས་ཆབ་སྲིད་ཀྱི་ཐོག་ལ་རྒྱལ་དབང་ལྔ་པ་ནས་བཟུང་སྟེ་ཞེ་དྲག་ཉེ་བའི་ལོ་རྒྱུས་ཤིག་རེད། འོན་ཀྱང་ལོ་རྒྱུས་དེ་རྫོགས་པ་ཡིན་ཟེར་ནས་༧གོང་ས་མཆོག་གིས་གསུངས་པ་རེད། རྒྱལ་དབང་སྐུ་ཕྲེང་ ༡༤ བའི་མཇུག་ཙམ་ནས་དགའ་ལྡན་ཕོ་བྲང་མཇུག་བསྒྲིལ་བ་རེད། འདི་ལོ་རྒྱུས་དེབ་ཐེར་ནང་འགོད་རྒྱུ་གལ་ཆེན་ཞིག་རེད། འོན་ཀྱང་བཙན་བྱོལ་མི་མང་ལ་ལས་དོན་འདི་མཇུག་སྐྱོང་བྱེད་པའི་ལས་འགན་ཞིག་ཡོད་པ་རེད། ང་ཚོར་དམངས་གཙོའི་སློབ་སྦྱོང་ཕྲན་བུ་ཐེབས་ཡོད་པ་རེད་དེ། མ་འོངས་པར་མི་མང་གིས་བདམས་པའི་དབུ་ཁྲིད་དེས་བོད་ཕྱི་ནང་གཉིས་ཀར་ཁྱབ་དགོས་པ་རེད་དམ། བཙན་བྱོལ་གཅིག་པུར་བདག་པོ་རྒྱག་མཁན་རེད། འདི་ལ་དཀའ་ངལ་ཆེན་པོ་ཞིག་ཡོང་གི་རེད་བསམ་གྱི་འདུག ༧གོང་ས་མཆོག་ལ་མཚོན་ན། སྐུ་ཕྲེང་བཅུ་བཞི་བའི་མཛད་པ་འཕྲིན་ལས་དང་འཛམ་གླིང་ཐོག་གི་གཟི་བརྗིད་སྨྲ་མ་དགོས་པ་རེད། ལོ་རྒྱུས་རང་བཞིན་གྱི་ཐོག་དང་། ཆོས་ལུགས་རང་བཞིན་གྱི་ཐོག་ནས་ཀྱང་བོད་མི་ས་ཡ་དྲུག་གི་འདི་ཕྱི་གཉིས་ཀྱི་སྐྱབས་མགོན་དང་། ཆོས་སྲིད་གཉིས་ཀྱི་དབུ་འཁྲིད་དུ་བོད་མི་ཡོད་དོ་ཅོག་གིས་ཁས་ལེན་གནང་གི་ཡོད་པ་རེད། འོན་ཀྱང་མི་མང་གིས་འོས་འདེམས་བྱས་པའི་དབུ་འཁྲིད་དེ་བཙན་བྱོལ་ནང་ནས་སླེབ་ཀྱི་ཡོད་པ་རེད། བཙན་བྱོལ་བོད་མིའི་མི་འབོར་གྱིས་བོད་མི་སྤྱིའི་མི་འབོར་གྱི་བརྒྱ་ཆ་གཅིག་ལྷག་ལས་ཟིན་གྱི་ཡོད་པ་མ་རེད། ང་ཚོས་ཅི་ཙམ་ཧུར་ཐག་འབད་ཐག་བྱས་ཀྱང་། བོད་མི་ས་ཡ་དྲུག་གིས་༧གོང་ས་མཆོག་མི་གཅིག་ལ་ཡིད་ཆེས་བྱེད་པ་དེ་ལྟ་བུའི་ཡིད་ཆེས་ཤིག་ཡོང་གི་མ་རེད། རེ་བ་ཞིག་ཡོད་རྒྱུ་རེད་དེ། རེ་བའི་ཚོད་ཀྱི་ལས་དོན་ཞིག་འདི་ནས་སྒྲུབ་ཐུབ་པ་ཁག་པོ་རེད། 

དྲི་བ། ༧ཏཱ་ལའི་བླ་མས་བོད་པའི་ཆབ་སྲིད་ཀྱི་འགན་བསྐྱུར་ཅིང་དགའ་ལྡན་ཕོ་བྲང་སྒོ་བརྒྱབ་པ་འདི་ལ་རྒྱལ་སྤྱིའི་ཁྲིམས་ཐོག་ནས་ངོས་འཛིན་གང་འདྲ་འབྱུང་སྲིད་དམ། 

ལན། ཕྱི་རོལ་ཆབ་སྲིད་ཀྱི་ཐད་ནས་དོ་ཕོག་ཕྲན་བུ་ཞིག་འགྲོ་སྲིད་པ་རེད་ཟེར་ནས་བཤད་ཐུབ་པ་ཞིག་རེད། འོན་ཀྱང་དོན་དམ་ཐོག་དོ་ཕོག་འགྲོ་བ་མ་རེད་བསམ་གྱི་ཡོད། གཞུང་ཞིག་ཁྲིམས་མཐུན་ཡིན་དང་མིན་དེ་མཐའ་གཅིག་ཏུ་ཁྲིམས་དང་ཁྲིམས་ཡིག་གི་གནད་དོན་ཞིག་མ་རེད། སྐབས་དང་དུས་ཀྱི་ཆབ་སྲིད་གནད་དོན་ཞིག་རེད། ད་ལྟའི་ཆར་བོད་རྒྱ་གཉིས་བར་ཆབ་སྲིད་ཀྱི་རྩོད་པ་ཞིག་རེད། བོད་མི་མང་བསམ་པ་གཅིག་མཐུན་བྱུང་སྟེ་འཐབ་རྩོད་བྱ་ཐུབ་པ་ཡིན་ན། དེ་ང་ཚོའི་ཁྲིམས་མཐུན་རེད། ཁྲིམས་མཐུན་ཡོང་དང་མི་ཡོང་མི་མང་གི་ནུས་པ་དང་མངོན་འདོད་ལ་ཐུག་ཡོད་པ་ཞིག་རེད།

དྲི་བ། བཅའ་ཁྲིམས་ནང་བཀོད་པའི་༧གོང་ས་མཆོག་གི་སྐུ་དབང་ཡོངས་དམངས་གཙོའི་ཀ་བ་གསུམ་ལ་བགོ་བཤའ་རྒྱག་སྟངས་ཐད་དགོངས་འཆར་གང་འདྲ་ཡོད་དམ།

ལན། སྔོན་མ་བཅའ་ཁྲིམས་ནང་༧རྒྱལ་བ་རིན་པོ་ཆེ་ནི། བོད་རྒྱལ་ཁབ་ཀྱི་དབུ་ཁྲིད་དང་འཛིན་སྐྱོང་གི་དབུ་ཁྲིད་ཡིན་ཞེས་བཀོད་ཡོད། ད་ཆར་རྒྱལ་ཁབ་དང་འཛིན་སྐྱོང་གཉིས་ཀའི་དབུ་ཁྲིད་གནང་གི་མེད་སྟབས། འཛིན་སྐྱོང་གི་འགན་དེ་རང་བཞིན་གྱིས་བཀའ་བློན་ཁྲི་པའི་སྟེང་ལ་བབས་ཡོད་པ་རེད། རྒྱལ་ཁབ་ཀྱི་དབུ་ཁྲིད་ཟེར་བ་དེ་གསལ་བོ་ཡོད་པ་མ་རེད། རྒྱལ་ཁབ་རེ་ཟུང་ནང་རྒྱལ་བོ་དང་རྒྱལ་མོ་ཡོད་པ་རེད། ཨ་རི་ལྟ་བུར་མཚོན་ན་དམངས་གཙོའི་ཀ་བ་གསུམ་གྱི་ནང་ནས་སྲིད་འཛིན་གྱིས་འཛིན་སྐྱོང་དང་རྒྱལ་ཁབ་ཀྱི་དབུ་ཁྲིད་གཅིག་ལྕོགས་གནང་གི་ཡོད། རྒྱ་གར་ལྟ་བུར་མཚོན་ན། དམངས་གཙོའི་ཀ་བ་གསུམ་གྱི་སྒང་དུ་སྲིད་འཛིན་ཞིག་ཟུར་དུ་འདེམས་བྱེད་ཀྱི་ཡོད་པ་རེད། ངས་བལྟས་ན་དམངས་གཙོའི་ལམ་སྲོལ་ཐོག་གལ་ཆེ་ཤོས་དབང་ཆ་བགོ་བཤའ་རྒྱག་སྟངས་དེ་མ་རེད། རྒྱལ་བོ་མིན་པར་མི་མང་ལ་དབང་ཆ་ཡོད་མཁན་ཞིག་དང་། སྒྲིག་འཛུགས་ཡན་ལག་གསུམ་བཞི་གང་འདྲ་ཡིན་རུང་། དབང་ཆ་ཆེ་བ་འདི་དང་ཆུང་བ་འདི་ཡིན་ཟེར་བ་མེད་པར། གཅིག་གིས་གཅིག་ལ་བསྟུན་དགོས་པ་ཞིག ཁྲིམས་བཟོའི་ལས་དོན་མཐའ་མའི་ཐག་གཅོད་བྱེད་མཁན་སྲིད་འཛིན་ཡིན་པ་དང་། སྲིད་འཛིན་གྱི་ཐག་གཅོད་འགྲིག་མིན་ཁྲིམས་ཁང་གིས་ཐག་གཅོད་བྱེད་ཆོག་པ་ཞིག་བྱུང་ན་ཡག་པོ་རེད། དམངས་གཙོ་ཟེར་བ་དེ་མང་མོས་ཐག་གཅོད་ཀྱི་དབང་ཚད་ཡོད་པ་ཙམ་གྱིས་དམངས་གཙོ་མ་རེད། མཐོ་རིམ་དབང་འཛིན་པས་ཕན་ཚུན་ལ་བསྟུན་དགོས་པ་དང་། མི་མང་ནང་བསམ་ཚུལ་འདྲ་མིན་བཤད་ས་ཡོད་པ། མཐའ་མའི་ཐག་གཅོད་དེ་མང་མོས་ལ་ལྟ་དགོས་པ་ཞིག་ལ་དམངས་གཙོ་ཟེར་གྱི་ཡོད་པ་རེད།

དྲི་བ། བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་ཟིན་ཐོའི་ཚིག་སྦྱོར་ལེགས་བཅོས་དང་། ཟིན་ཐོ་དེ་༧གོང་ས་མཆོག་ལ་སྐྱབས་འཇུག་ཞུ་ཆེད་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པ་བསྐངས་པའི་ཐད་དགོངས་ཚུལ་གང་འདྲ་ཡོད་དམ།

ལན། ཚོགས་ཆེན་ཚོགས་ཏེ་མི་མང་གི་སྐུ་ཚབ་དང་ཚོགས་པ་སྒྲིག་འཛུགས་ཁག་གི་སྐུ་ཚབ་ཚོས་བགྲོ་གླེང་གནང་བ་དེ་ཡག་པོ་ཞེ་དྲག་རེད་བསམས་ཡོད། འོན་ཀྱང་ཐག་གཅོད་ཀྱི་དབང་ཆ་ཡོད་པ་མ་རེད། སྔོན་ནས་ཐག་གཅོད་བྱས་ཟིན་པ་དག་ལ་མི་མང་གི་རྒྱབ་སྐྱོར་ཤུགས་ཆེན་ཡོད་མདོག་སྟོན་ཆེད་དུ་ཚོགས་ཆེན་བསྐངས་པ་ཡིན་ན། དོན་དམ་ཐོག་ཕན་འབྲས་བྱུང་ཡོད་པ་མ་རེད། ཨུ་རུ་སུ་དང་རྒྱ་ནག་ནང་ཚོགས་ཆེན་མང་པོ་འཚོགས་ཀྱི་ཡོད་པ་རེད་དེ་ཐག་གཅོད་སྔོན་ནས་བྱས་ཚར་ཡོད་པ་རེད། དེ་གཅིག་རེད། གཉིས་པ་ཐག་གཅོད་ཀྱི་དབང་ཆ་མེད་ཀྱང་། མི་མང་གི་སྐུ་ཚབ་དང་ཚོགས་པ་ཁག་གི་སྐུ་ཚབ་སྐད་བཏང་སྟེ། བསམ་ཚུལ་བསྡུ་ལེན་བྱས་ཤིང་བཀའ་ཤག་དང་སྤྱི་འཐུས་ཀྱིས་མི་མང་གི་བསམ་ཚུལ་ལ་བདག་པོ་བརྒྱབ་པ་ཡིན་ན། རྒྱལ་ཡོངས་ཚོགས་ཆེན་གྱི་དམིགས་ཡུལ་འགྲུབ་ཀྱི་ཡོད་པ་རེད། གཞུང་དང་ཚོགས་ཆེན་གོ་སྒྲིག་པའི་ངོས་ནས་གུ་ཡངས་པོ་དང་ལམ་སྟོན་ཁ་གསལ་བོ་དགོས་པ་གལ་ཆེན་པོ་རེད། ༢༠༠༨ ལོར་༧གོང་ས་མཆོག་གི་སྐུ་དབང་འོག་བོད་ནང་གི་ཛ་དྲག་ཐོག་དམིགས་བསལ་ཚོགས་ཆེན་བསྐངས་པ་རེད། སྐབས་དེར་ཚོགས་ཆུང་ཁག་ནང་བསམ་ཚུལ་འདྲ་མིན་ཡོང་སྐབས། མི་མང་པོ་ཞིག་གིས་ང་ཚོ་༧གོང་ས་མཆོག་གི་དབུ་མའི་ལམ་ལས་གཞན་པ་གང་ཡང་མེད་ཟེར་ནས་བགྲོ་གླེང་ཁྱོན་ནས་ཡོང་གི་མི་འདུག

དྲི་བ། ཐེངས་འདིར་༧གོང་ས་མཆོག་གིས་བོད་པའི་ཆབ་སྲིད་ཀྱི་འགན་དབང་མ་བཞེས་པ་འདི་བརྒྱུད་དེ་བོད་རྒྱའི་གནད་དོན་ཐོག་བཟང་ཕྱོགས་དང་སྡུག་ཕྱོགས་ཀྱི་འགྱུར་བ་གང་འདྲ་འགྲོ་སྲིད་དམ།

ལན། འདི་ལ་སྡུག་ཕྱོགས་ཀྱི་འགྱུར་བ་འདྲ་འགྲོ་རྒྱུ་མ་རེད་དྲན་ཡོད། འོན་ཀྱང་ད་ལྟའི་ཆར་རྒྱ་ནག་གཞུང་ཅི་བྱེད་འདི་བྱེད་མེད་པ་ཞིག་བཟོས་ཡོད་པ་རེད། གཅིག་བྱས་ན་རྒྱ་ནག་གཞུང་གིས་བཙན་བྱོལ་སྒྲིག་འཛུགས་ཀྱི་སྐུ་ཚབ་ཅིག་དང་སྐད་ཆ་བཤད་འདོད་མེད་སྐོར་ལབ་སྲིད་པ་རེད། འོན་ཀྱང་ཏཱ་ལའི་བླ་མའི་སྐུ་ཚབ་ཟེར་ན་འདྲ། བོད་གཞུང་གི་སྐུ་ཚབ་ཟེར་ནའང་འདྲ། མིང་གང་འདྲ་ཞིག་བཏགས་ཀྱང་དོན་དམ་གྱི་གྲོས་གཞི་བོད་པའི་སྤྱི་དོན་རེད། ད་ལྟའི་ཆར་རྒྱ་ནག་ནང་ཁུལ་ལ་འགྱུར་བ་ཆེན་པོ་འགྲོ་བཞིན་ཡོད་པ་རེད། འགྱུར་བ་དེས་རྒྱ་ནག་མི་མང་གི་འདོད་པ་གང་ལ་གང་འཚམ་སྐོང་ཐུབ་ཀྱི་ཡོད་པ་རེད། དེ་བཞིན། བོད་ནང་གི་གནས་སྟངས་ལའང་འགྱུར་བ་གཏོང་གི་ཡོད་མོད། དེ་ཙམ་གྱིས་བོད་མི་རིགས་ཀྱི་འདོད་པ་ཁེངས་ཐུབ་ཀྱི་ཡོད་པ་མ་རེད་ལ། འགྱུར་བ་གཏོང་སྟངས་དེ་ཡང་དྲང་བདེན་ཞིག་དང་ཁོད་སྙོམས་ཤིག་ཡོང་ཐུབ་ཀྱི་མེད་སྟབས། བོད་ནང་གི་བོད་མི་ཚོས་གཞུང་གི་སྲིད་བྱུས་ལ་འདོད་པ་མེད་པའི་རྣམ་འགྱུར་སྟོན་གྱི་ཡོད་པ་རེད། འདི་ལ་རྒྱལ་སྤྱིའི་ཐོག་ཏུའང་ལྟ་སྟངས་ཡོང་གི་ཡོད་པ་རེད། བོད་ནང་གི་གནས་སྟངས་ལ་འགྱུར་བ་དོན་འབྲས་ལྡན་པ་ཞིག་བཏང་སྟེ། འཛམ་གླིང་ལ་རྒྱ་ནག་གི་ངོ་གདོང་ཡག་པོ་ཞིག་སྟོན་དགོས་བསམ་ན། ༧གོང་ས་མཆོག་ལ་འབྲེལ་བ་ཞུས་ན་མ་གཏོགས་ལས་སླ་བོ་ཡོད་པ་མ་རེད། མི་ག་ཚོད་ཡག་པོ་ཞིག་བསླེབས་ཀྱང་རྒྱ་ཆེའི་མི་མང་གིས་དགའ་བོ་དང་རྒྱབ་སྐྱོར་ཐོབ་པ་མ་རེད། དེ་བས་༧གོང་ས་མཆོག་ལ་འབྲེལ་བ་གནང་བ་ཡིན་ན། མི་ཐོག་མང་པོར་བསྒྲུབ་དགོས་པའི་ལས་དོན་དེ་ལོ་བཅུ་གྲངས་ནང་གྲུབ་འབྲས་འཐོན་ཐུབ་པ་ཞིག་རེད། གོ་སྐབས་འདི་རྒྱ་གཞུང་གིས་མ་ཤོར་བ་བྱ་དགོས་པ་རེད། ཆབ་སྲིད་ཀྱི་དགོས་མཁོ་ཙམ་རེད་མ་གཏོགས་རྒྱ་ནག་གཞུང་གིས་ཀྱང་གནད་འགག་འདི་ཧ་གོ་ཡོད་པ་རེད།

གསར་འགོད་པ། དོན་འགྲུབ་བཀྲ་ཤིས།