• ༧གོང་ས་མཆོག
• ངྷ་ས།
• བཙན་བྱོལ།
• བོད།
• འཛམ་གླིང་།
• བསམ་ཚུལ།
• བོད་དོན།
• ཆེད་བརྗོད།
• ས་མིག
• གསལ་སྒྲག
• དམངས་གཙོ།
• རྒྱ་ནག
• ཚན་རྩལ།
• འཕྲོད་བསྟེན།
• གོ་ལའི་ཚ་དྲོད།
• ཁོར་ཡུག
• ཟིན་བྲིས།
• གླེང་སྟེགས།
• གསར་འགོད་རིག་པ།
• ཚིག་མཛོད།
• དཔེ་དེབ།
• གླུ་གཞས།
• བརྙན་འཕྲིན།
• པར་མཛོད།

སློབ་གཞི་དང་བསླབ་གཞིའི་དོགས་སློང༌།

རྡོ་རྗེ་རིན་ཆེན།

བོད་དུ་སློབ་ཆུང་འགྲིམ་སྐབས་ཞིང་ཆེན་དང་ལྗོངས་ལྔའི་མཉམ་སྒྲིག་སློབ་གཞི་ཞེས་པའི་དེབ་ཅིག་ལ་ལྟ་ཀློག་བྱས་པ་དྲན་སོས་པ་དང༌། དེ་བཞིན་བྱང་ཆུབ་ཆོས་འཕེལ་གྱིས་རྩོམ་སྒྲིག་བྱས་པའི་བོད་ཡིག་བསྐྱར་སྦྱོང་ནང་དོན་ཕྱོགས་བཏུས་ཞེས་པའི་དམའ་འབྲིང་གི་སློབ་དེབ་ཅིག་ལའང་ལྟ་ཀློག་བྱས་པ་དྲན་གྱིན་འདུག

འདིར་ཤོད་འདོད་པའི་སྙིང་པོ་ནི་ཀློག་དེབ་དེ་དག་གི་ཁྲོད་སློབ་གཞི་ཞེས་པའི་ཡིག་འབྲུ་འདི་གཉིས་ངའི་མིག་ལམ་ན་ད་དུང་གཟུགས་ཅན་བཞིན་སྣང་བ་དང༌། བཙན་བྱོལ་བོད་གཞུང་གི་ཤེས་ཡོན་སྲིད་ཇུས་གསར་བ་དང་འབྲེལ་ནས་ཡིག་ཆ་ཁག་ཏུ་བསླབ་གཞི་ཞེས་ཐོན་བཞིན་པ་མ་ཟད། བོད་གཞུང་ཤེས་རིག་ལས་ཁུངས་ཀྱིས་འདོན་སྤེལ་གནང་བའི་སྔོན་འགྲོ་དང་གཞི་རིམ་འོག་མའི་ཤེས་ཡོན་སྲིད་བྱུས་རྩ་འཛིན་ཡིག་ཆའི་སྟེང་དུའང༌། སྔོན་འགྲོ་དང་གཞི་རིམ་འོག་མའི་བསླབ་གཞི་རྩ་འཛིན་ཞེས་འཁོད་འདུག་པ་དེ་གཉིས་ང་ལ་མཚོན་ན་དོགས་གནས་ཤིག་ཡིན་པ་ཟད། བོད་ཕྱི་ནང་གཉིས་ཀྱི་མིང་ཚིག་ཁ་གྱེས་སྟངས་ཤིག་ཀྱང་རེད། 

སྔོན་ཆད་ངེད་ནས་ལོག་སྒྲུབ་ལྒང་བུ་དབུག་པའི་གཙགས་བུ་ཞེས་པའི་རྩོམ་བྱང་ཞིག་མཐོང་མྱོང༌། རྩོམ་བྱང་དེའི་ཐོག་དོ་བདག་དང་ཐད་ཀར་བགྲོ་གླེང་བྱས་ཀྱང་སྐབས་ཐོག་ཏུ་གྲུབ་འབྲས་ཅང་མ་ཐོན། ལོ་ཤས་རྗེས་ནས་ཁོང་གིས་དེ་ཁྱེད་རང་བདེན་འདུག་ཅེས་ང་ལ་བདེན་ཁ་ཕྱིན་མྱོང༌། ད་རེས་སྔོན་གྱི་རྩོམ་བྱང་དེ་མཚན་གཞིར་བྱས་ཏེ་སློབ་གཞི་དང་བསླབ་གཞི་གང་ཞིག་དོན་ལ་འབྱོར་མིན་སྐོར་བསམ་འཆར་ཐུང་ངུ་ཞིག་བརྗོད་པར་འདོད། 

དེ་ཡང་རང་རེའི་མི་རིགས་འདིར་ཡང་གནའ་ནས་བརྡ་སྤྲོད་ཀྱི་སྐད་ཡིག་རང་ཆས་སུ་ཡོད་པ་དང༌།  ཕྱིས་སུ་བརྡ་སྤྲོད་ཀྱི་གཞུང་ལུགས་གཏན་འབེབས་བྱས་པ་ནས། ཡི་གེ་གང་ཞིག་བྲིས་ཀྱང་བརྡ་སྤྲོད་ཀྱི་གཞུང་ལུགས་དང་མཐུན་དགོས་པར་སྣང༌། ལོག་སྒྲུབ་ལྒང་བུ་དབུག་པའི་གཙགས་བུ་ལྟ་བུར་མཚོན་ནའང་བྱ་བྱེད་ལས་གསུམ་དང་དངོས་པོ་བདག་གཞན་གྱིས་བསྡུས་དགོས།  དཔེར་ན།  ལོག་སྒྲུབ་ལྒང་བུ་དབུག་པའི་གཙགས་བུ་ཞེས་པ་འདིའི་ནང་གི་བྱ་བའི་ལས་ནི་ལོག་སྒྲུབ་ལྒང་བུ་ཡིན་པ་དང༌།  འབིགས་མཁན་གང་ཟག་དེ་བྱེད་པ་པོ་དང༌།  འབིགས་བྱེད་གཙགས་བུ་བྱེད་པ། འབིགས་པ་བྱ་བ་ཡིན་པ་རེད། དེ་བཞིན་འབིགས་མཁན་དང་འབིགས་བྱེད་གཙགས་བུ་གཉིས་དངོས་པོ་བདག་དང༌། དབུག་བྱའི་ལོག་སྒྲུབ་ལྒང་བུ་ནི་དངོས་པོ་གཞན་ཡིན། 

 རྩ་བར་སྔོན་འཇུག་སྐབས་སུ་མཁན་པོས་“མོ་ནི་བདག་ད་”ཞེས་པའི་བདག་སྒྲས་སྔོན་འཇུག་གི་མོ་འ་ཡིག་དེ་དངོས་པོ་བདག་གཞན་གཉིས་ལས་བདག་ལ་འཇུག་པ་གསལ་བོར་བསྟན་པ་དང༌། དངོས་པོ་བདག་སྟོན་བྱེད་ཀྱི་ལས་ཚིག་ཡིན་ན་དུས་ལྟ་བ་ཡིན་པའི་ཁྱབ་པ་ངེས་པས་ན། ལོག་སྒྲུབ་ལྒང་བུ་དབུག་པའི་གཙགས་བུ་ཞེས་མི་ཟེར་བར། ལོག་སྒྲུབ་ལྒང་བུ་འབིག་པའི་གཙགས་བུ་ཞེས་ཟེར་དགོས་པ་ཡིན།

དཔེ་དེ་བཞིན་དུ་དགེ་རྒན་གྱིས་སློབ་མར་སློབ་དེབ་སྟེང་སློབ་ཁྲིད་བྱས་ལྟ་བུར་བྱ་བྱེད་ལས་གསུམ་དགར་ཚེ། སློབ་མཁན་དགེ་རྒན་བྱེད་པ་པོ་དང༌།  སློབ་བྱེད་ཀྱི་སློབ་དེབ་བྱེད་པ།  བསླབ་པར་བྱ་བའི་ཡུལ་གྱི་སློབ་མ་བྱ་ཡུལ། བསླབ་བྱའི་སློབ་ཁྲིད་བྱ་བའི་ལས་དང༌། སློབ་མཁན་དགེ་རྒན་དང་སློབ་བྱེད་ཀྱི་སློབ་དེབ་གཉིས་དངོས་པོ་བདག  བསླབ་བྱའི་ཡུལ་དང་བསླབ་བྱ་གཉིས་དངོས་པོ་གཞན་ཡིན།

ཡིག་མཁན་ཞིག་ལ་མཚོན་ན།  ཡིག་མཁན་རང་ཉིད་བྱེད་པ་པོ་དང་འབྲི་བྱེད་སྙུ་གུ་བྱེད་པ་ཡིན། ཡིག་མཁན་གྱིས་སྙུ་གུ་སྤྱད་དེས་བྱ་བའི་ལས་ཡི་གེ་བྲིས་པ་དང༌།  སློབ་མཁན་དགེ་རྒན་གྱིས་སློབ་གཞི་དཔེ་དེབ་སྤྱད་ནས་བསླབ་བྱའི་སློབ་ཚན་བསླབས་པ་གཉིས་རིགས་འགྲེ་ཞིང༌། འབྲི་མཁན་དང་སློབ་མཁན་གཉིས་དངོས་པོ་བདག་དང༌། འབྲི་བྱེད་དང་སློབ་བྱེད་གཉིས་ཀྱང་དངོས་པོ་བདག་ཡིན།

དེ་ལྟ་ན་མཁན་པོས་རྩ་བར་“ཕོ་ནི་འདས་དང་གཞན་སྒྲུབ་ཕྱིར་”ཞེས་སྔོན་འཇུག་གི་ཕོ་བ་ཡིག་དེ་དངོས་པོ་བདག་གཞན་གཉིས་ལས་གཞན་ལ་འཇུག་པ་དམིགས་ཀྱིས་བཀར་བའང་དགོས་པ་དེ་ལྟར་ཡིན་པར་སྙམ། 

མདོར་བསྡུས་ན་བསླབ་ཡུལ་སློབ་མར་བསླབ་བྱའི་རིག་གནས་ཇི་ལྟར་སློབ་དགོས་མིན་རྩ་འཛིན་མཁན་དེ་དགེ་རྒན་དང་འཛིན་བྱེད་དེ་སློབ་གཞི་ཡིན་ཞིང༌། སློབ་གཞི་དེ་སློབ་མཁན་དགེ་རྒན་གྱི་སློབ་བྱེད་ཡིན་པར་བརྟེན་བདག་གཞན་གཉིས་ལས་དངོས་པོ་བདག་ཡིན་དགོས་པ་ཡང་དེ་ལྟར་རེད།

ཡང་གཅིག་བཤད་ན་བསླབ་ཡུལ་སློབ་མར་ལྟོས་ཏེ་སློབ་མཁན་དགེ་རྒན་གྱིས་བསླབ་བྱའི་གནས་གང་ཞིག་ཇི་ལྟར་སློབ་པར་བྱེད་པའི་གཞི་འཛིན་ས་ལ་སློབ་གཞི་ཞེས་བསྙད། སྐབས་འདིར་བསྟན་གྱི་གཞི་ནི་གནས་སམ་རྩ་བའམ་ངོ་མའི་དོན་ཡིན། དཔེར་ན་གཞི་དེབ་ཅེས་པ་མ་དེབ་ལ་གོ་བ་ལྟར་རོ། །

ཡང་འདིར་གསལ་བཤད་ཞུ་རྒྱུ་ཞིག་ལ། འདུལ་བ་ན་བསླབ་གཞི་ཞེས་པ་དང་འདི་གཉིས་གཏན་ནས་མི་འདྲ། དགེ་སློང་རྣམས་ཀྱིས་བསླབ་དགོས་པའི་ཚུལ་ཁྲིམས་ཏེ་སྲུང་བྱ་གཞི་བཅུ་ལ། བསླབ་གཞི་བཅུ་ཞེས་དང༌། དེ་བཞིན་བསླབ་པའི་གཞི་ཉིས་བརྒྱ་ལྔ་བཅུ་རྩ་གསུམ་ཞེས་པ་རྣམས། སློབ་མཁན་ཏེ་དགེ་སློང་རྣམས་ལ་ལྟོས་ཏེ་བྱ་བའི་ལས་ཡིན་སྟབས་བསླབ་གཞི་ཞེས་མིང་གིས་རིགས་པ་དང༌། དེ་བཞིན་སྦྱང་གཞི་ཡང་དེ་དང་མཚུངས། སྦྱོང་མཁན་སློབ་མར་ལྟོས་ཏེ་སྦྱང་བྱ་རྣམས་ལ་སྦྱང་གཞི་ཞེས་ཟེར་དགོས།

སྦྱང་གཞི་ནི་སྦྱང་བྱ་ཡིན་པས་སྦྱོང་མཁན་སློབ་མར་བརྟེན་དགོས་པ་དང༌། སློབ་གཞི་ནི་སློབ་བྱེད་ཡིན་པས་སློབ་མཁན་དགེ་རྒན་ལ་བརྟེན་དགོས་པའི་གནད་ཀྱིས་བོད་ནང་གི་གཞི་རིམ་སློབ་དེབ་ཁག་ཅིག་ཏུ།  བོད་རང་སྐྱོང་ལྗོངས་སློབ་གཞི་རྩོམ་སྒྱུར་ཞེས་དང༌། བོད་རང་སྐྱོང་ལྗོངས་སློབ་གཞི་ཞིབ་བཤེར་ཞེས་འབྱུང་བཞིན་པ་རྣམས་གོང་གསལ་བོད་ཀྱི་བརྡ་སྤྲོད་རྟགས་འཇུག་གི་རྩ་བའི་གཞུང་དང་མཐུན་པར་འདོད་པས་གཟུར་གནས་དཔྱོད་ལྡན་རྣམས་ཀྱིས་དཔྱད་པར་འཚལ་ལོ། །