• ༧གོང་ས་མཆོག
• ངྷ་ས།
• བཙན་བྱོལ།
• བོད།
• འཛམ་གླིང་།
• བསམ་ཚུལ།
• བོད་དོན།
• ཆེད་བརྗོད།
• ས་མིག
• གསལ་སྒྲག
• དམངས་གཙོ།
• རྒྱ་ནག
• ཚན་རྩལ།
• འཕྲོད་བསྟེན།
• གོ་ལའི་ཚ་དྲོད།
• ཁོར་ཡུག
• ཟིན་བྲིས།
• གླེང་སྟེགས།
• གསར་འགོད་རིག་པ།
• ཚིག་མཛོད།
• དཔེ་དེབ།
• གླུ་གཞས།
• བརྙན་འཕྲིན།
• པར་མཛོད།
• ཊེ་ཝེ་ཊར།

ཁྲིམས་དང་སྒྲིག་གཞི་མ་ཤེས་པའི་དཀའ་ངལ་སེལ་དགོས།

ང་ཚོས་བོད་ནང་འཇུ་བཟུང་བྱས་པ་དང་དམར་གསོད་བཏང་བ་སོགས་རྒྱལ་ཚོགས་ཀྱི་འབྲེལ་ཡོད་སྡེ་ཚན་ཁག་ལ་ཞུ་གཏུགས་མ་བྱས་པར་སྤྱི་ཡོངས་ནས་མཉམ་འབྲེལ་རྒྱལ་ཚོགས་ལ་ཕུལ་བ་ཡིན་ན། དེ་སྤྱི་བའི་བར་ནས་ལྷག་པའི་ཉེན་ཁ་ཡོད་ཅེས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཨོ་རྒྱན་བསྟན་འཛིན་ལགས་ཀྱིས་བརྗོད་ཡོད། 

དེ་རིང་ཞོགས་པར་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་སུད་སིའི་རྗེ་ནེ་ཝར་རྟེན་གཞི་བྱས་པའི་འགྲོ་བ་མིའི་ཐོབ་ཐང་སྦྱོང་བརྡར་བསྟི་གནས་ཁང་། དེ་བཞིན་སུད་སི་བོད་གཞུང་སྐུ་ཚབ་དོན་གཅོད་ཁང་བཅས་མཉམ་འབྲེལ་ཐོག་གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་སྒྲོམ་གཞི་ཞེས་པའི་བརྗོད་གཞིའི་ཐོག་ཉིན་གཉིས་རིང་ཟབ་སྦྱོང་ཞིག་གོ་སྒྲིག་གནང་ཡོད་ལ། ཐེངས་འདིའི་ཟབ་སྦྱོང་སྤྲོད་མཁན་ནི་རྗེ་ནེ་ཝར་རྟེན་གཞི་བྱས་པའི་མཉམ་སྤྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྦྱོང་བརྡར་བསྟི་གནས་ཁང་གི་ཚོགས་གཙོ་སྐུ་ཞབས་ཨར་ཌི་རེན་རྫོབ་ལེར་ལགས་རེད། 

འདིའི་ཐད་འདི་གསར་འགོད་པས་ཐེངས་འདིའི་ཟབ་སྦྱོང་གོ་སྒྲིག་པ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཨོ་རྒྱན་བསྟན་འཛིན་ལགས་སུ་བཀའ་འདྲི་ཞུས་པར། ཁོང་གིས། སྦྱིར་འགྲོ་བ་མིའི་ཐོབ་ཐང་ཞེས་པ་དེ་བརྗོད་གཞི་ཆེན་པོ་ཞིག་རེད། ཡིན་ནའང་། ང་ཚོས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་གང་འདྲ་ཆགས་ཡོད་མེད་ཀྱི་གནད་དོན་དེ་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཁྲིམས་དང་སྒྲིག་གཞི་དང་མཐུན་པའི་ཐོག་སྒྲུབ་ལུགས་དང་འགྲོ་ལུགས་ཤེས་པར་བྱ་རྒྱུ་གལ་ཆེན་དུ་དམིགས་ཏེ་ཟབ་སྦྱོང་འདི་གོ་སྒྲིག་ཞུས་པ་ཡིན་ལ། དེ་ཡང་གཙོ་བོ་ནམ་རྒྱུན་འགྲོ་བ་མིའི་ཐོབ་ཐང་ཐོག་ཕྱག་ལས་གནང་བཞིན་པའི་གཞུང་འབྲེལ་མ་ཡིན་པའི་ཚོགས་པ་གཙོས། བཙན་བྱོལ་བོད་གཞུང་གི་དྲིལ་བསྒྲགས་ལས་ཁུངས་དང་བདེ་སྲུང་། ཁྲིམས་ཞིབ་ཁང་། དེ་བཞིན་མཐོ་རིམ་སློབ་གྲྭའི་ནང་སྲིད་དོན་ཚན་རིག་གི་ཐོག་སློབ་སྦྱོང་དང་ཕྱག་ལས་གནང་བཞིན་པའི་དགེ་སློབ་བཅས་ལས་ཀ་འདི་དང་འབྲེལ་བ་ཡོད་མཁན་དང་དགའ་མོས་ཡོད་མཁན་གྱི་མི་སྣ་ ༢༠ ལྷག་གདན་ཞུའི་ཐོག་མ་འོངས་པར་འགྲོ་བ་མིའི་ཐོབ་ཐང་གི་སྲུང་སྐྱོབ་སྒྲོམ་གཞི་དང་འབྲེལ་བའི་ཐོག་ནས་སྙན་ཞུ་ཕུལ་སྟངས་དང་ལས་འགུལ་སྤེལ་སྟངས་སོགས་འགྲོ་ལུགས་འགྲོ་སྟངས་གནད་ལ་སྨིན་པ་ཞིག་ཡོང་བར་བྱ་ཆེད་ཟབ་སྦྱོང་གོ་སྒྲིག་ཞུས་པ་ཡིན་ཞེས་བརྗོད་བྱུང་ལ།  ཡང་ཁོང་གིས། ང་ཚོས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཞུ་ས་གཙོ་བོ་དེ་མཉམ་འབྲེལ་རྒྱལ་ཚོགས་ཆགས་ཡོད་ཀྱང་། དེ་ལའང་ཞུ་ལུགས་ཞུ་སྟངས་ཡོད་པ་རེད། གལ་སྲིད། ང་ཚོས་འཇུ་བཟུང་བྱས་པ་དང་དམར་གསོད་བཏང་བ་སོགས་འབྲེལ་ཡོད་ཀྱི་སྡེ་ཚན་ཁག་ལ་ཞུ་གཏུགས་མ་བྱས་པར་སྤྱི་ཡོངས་ནས་མཉམ་འབྲེལ་རྒྱལ་ཚོགས་ལ་ཕུལ་བ་ཡིན་ན། དེ་སྤྱི་བའི་བར་ནས་ལྷག་པའི་ཉེན་ཁ་ཡོད་སྟབས། ང་ཚོས་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་བཏང་བའི་གནད་དོན་གང་བྱུང་བ་དེ་མཉམ་འབྲེལ་རྒྱལ་ཚོགས་ཀྱི་སྒྲོམ་གཞིའི་ནང་ཏག་ཏག་ཚུད་རྗེས་འབྲེལ་ཡོད་སྡེ་ཚན་ཁག་ལ་འབུལ་ཐུབ་པར་བྱ་རྒྱུ་དང་། ཁྲིམས་དང་སྒྲིག་གཞི་མ་ཤེས་པའི་དཀའ་ངལ་གང་མང་ཞིག་སེལ་ཆེད་ལས་རིམ་འདི་ལྟ་བུ་ཞིག་གོ་སྒྲིག་གནང་བ་ཡིན་ཞེས་བརྗོད་བྱུང་།

ཟབ་སྦྱོང་འདི་ནི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྦྱོང་བརྡར་ཁང་གཉིས་མཉམ་འབྲེལ་གྱིས་བཞུགས་སྒར་ངྷ་རམ་ས་ལར་བོད་རིགས་ཚོར་འདི་ལྟའི་ཟབ་སྦྱོང་སྤྲད་པ་ཐོག་མ་དེ་ཆགས་ཡོད་པ་རེད།

གསར་འགོད་པ། དོན་གོ།