• ༧གོང་ས་མཆོག
• ངྷ་ས།
• བཙན་བྱོལ།
• བོད།
• འཛམ་གླིང་།
• བསམ་ཚུལ།
• བོད་དོན།
• ཆེད་བརྗོད།
• ས་མིག
• གསལ་སྒྲག
• དམངས་གཙོ།
• རྒྱ་ནག
• ཚན་རྩལ།
• འཕྲོད་བསྟེན།
• གོ་ལའི་ཚ་དྲོད།
• ཁོར་ཡུག
• ཟིན་བྲིས།
• གླེང་སྟེགས།
• གསར་འགོད་རིག་པ།
• ཚིག་མཛོད།
• དཔེ་དེབ།
• གླུ་གཞས།
• བརྙན་འཕྲིན།
• པར་མཛོད།

རིན་པོ་ཆེ་ནང་པའི་ཚོགས་འདུའི་ནང་ཕེབས་ཡོད་པ་མ་རེད་ཟེར།

ཉེ་ལམ་ལྷོ་ཀོ་རི་ཡར་ཚོགས་པའི་ནང་པའི་ཚོགས་ཆེན་སྟེང་དབུས་བོད་མིའི་སྒྲིག་འཛུགས་ཆོས་རིག་བཀའ་བློན་མཆོག་དངོས་སུ་ཞུགས་ཡོད་པ་དང་། བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་སྐབས་དེར་ཀོ་རི་ཡར་ཕེབས་ཡོད་ཀྱང་། ནང་པའི་ཚོགས་ཆེན་སྟེང་ཞུགས་མེད་སྐོར་གསལ་བཤད་གནང་འདུག

ཉེ་སྔོན་ལྷོ་ཀོ་རི་ཡར་ཚོགས་པའི་རྒྱལ་སྤྱིའི་ནང་པའི་ཚོགས་ཆེན་ཐོག ༧གོང་ས་མཆོག་གི་སྐུ་ཚབ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་དང་ཆོས་རིག་བཀའ་བློན་པདྨ་ཆོས་འབྱོར་མཆོག་བཅས་མཉམ་ཞུགས་གནང་ཡོད་སྐོར་དང་། རྒྱ་ནག་ནས་ཕེབས་པའི་སྐུ་ཚབ་ཚོས་ངོ་རྒོལ་གྱི་རྣམ་པའི་ཐོག་ནས་ཚོགས་འདུ་ལས་ཕྱིར་ཐོན་ཡོད་སྐོར་སོགས་ཀྱི་གནས་ཚུལ་འབྱོར་འཕྲལ། འདི་གའི་གསར་འགོད་པས་དབུས་བོད་མིའི་སྒྲིག་འཛུགས་ཆོས་རིག་དྲུང་ཆེ་མཆོག་ལ་བཀའ་འདྲི་ཞུས་སྐབས། བོད་མིའི་སྒྲིག་འཛུགས་ཀྱི་ངོས་ནས་འཛམ་གླིང་ནང་པའི་ཚོགས་ཆེན་ཐོག་ཆོས་རིག་བཀའ་བློན་མཆོག་གཅིག་པུ་ཕེབས་ཡོད་ལ། དེ་སྔོན་བཀའ་བློན་མཆོག་དང་ལྷན་དུ་མི་གཞན་ཞིག་ཕེབས་འཆར་གནང་ཡང་ཕེབས་མ་ཐུབ་པ་དང་། བཀའ་ཟུར་ཟམ་གདོང་རིན་པོ་ཆེ་མཆོག་ཐེངས་འདིར་གང་གི་ངོ་བོའི་ཐོག་ཕེབས་ཡོད་མེད་ཐད་ང་ཚོར་ཞུ་རྒྱུ་གང་མེད་སྐོར་བརྗོད་སོང་།

ཀོ་རི་ཡའི་ནང་པའི་ཚོགས་ཆེན་སྐོར་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་ཨེ་ཤ་ཡ་རང་དབང་རླུང་འཕྲིན་ཁང་གི་ཁམས་སྐད་སྡེ་ཚན་གྱི་བཅར་འདྲིའི་ལན་དུ། “སྤྱིར་བཏང་ཟམ་གདོང་རིན་པོ་ཆེ་ལྷོ་ཀོ་རི་ཡའི་ཚོགས་འདུ་ཚོགས་ས་དེར་ཕེབས་ཡོད་པ་རེད། ཁོང་དེ་གར་བླ་ཆེན་དང་གཙུག་ལག་སློབ་གྲྭ་དེ་འདྲས་གདན་འདྲེན་ཞུས་ཏེ་བཅར་འདྲི་དང་བཀའ་སློབ་གནང་ཡོད་ས་རེད་མ་གཏོགས། ནང་པའི་ཚོགས་ཆེན་སྟེང་སྐུ་དངོས་སུ་ཕེབས་ཡོད་པ་མ་རེད། དེའི་ནང་ལ་བོད་པའི་སྐུ་ཚབ་ང་གཅིག་པུ་རེད།  ” ཅེས་གསུངས་ཏེ། ཐེངས་འདིར་རིན་པོ་ཆེ་མཆོག་ངོ་བོ་ག་འདྲ་ཞིག་གི་ཐོག་ནས་ཕེབས་པ་ཡིན་མིན་གསལ་པོ་ཞུ་ཐུབ་ཀྱི་མེད་ཀྱང་། ཚོགས་འདི་དེ་དང་འབྲེལ་བ་ཡོད་པ་ཡིན་ན། ཚོགས་འདུའི་ནང་རྩ་བ་ཉིད་ནས་ཕེབས་མེད་སྐོར་དང་། བོད་གཞུང་དྲ་བརྙན་གྱིས་བདེན་པ་མིན་པའི་གནས་ཚུལ་བསྟན་ཡོད་ཚུལ་སོགས་ངོ་སྤྲོད་གནང་ཡོད།

ཆོས་རིག་བཀའ་བློན་མཆོག་གིས་ཚོགས་ཆེན་དབུ་འཛུགས་སྐབས་ཀྱི་གནས་ཚུལ་ངོ་སྤྲོད་གནང་བ་ལྟར་ན། ཕྱི་ཚེས་ ༡༢ ཉིན་གྱི་ཞོགས་པར་ཚོགས་བཅར་བ་རྣམས་མཉམ་དུ་འཛོམས་ཏེ་སོ་སོ་ངོ་སྤྲོད་གནང་སྟེ་ཚོགས་འདུ་མགོ་འཛུགས་སྐབས། རྒྱའི་སྐུ་ཚབ་ཚོས་བཙན་བྱོལ་བོད་མིའི་སྒྲིག་འཛུགས་ཆོས་རིག་བཀའ་བློན་ཚོགས་འདུའི་ནང་བསྡད་ཚེ། ཁོ་ཚོ་ཚོགས་བཅར་ཞུ་རྒྱུ་མིན་སྐོར་བརྗོད་དེ་རྙོག་དྲ་བཟོས་བར་བརྟེན། སྔ་རྗེས་ཐེངས་གསུམ་ལ་ཚོགས་འདུའི་འབྲེལ་ཡོད་འགན་འཁུར་བ་དང་དྲུང་ཆེ་ཡིས་བཀའ་བློན་པདྨ་ཆོས་འབྱོར་མཆོག་ལ། འཛམ་གླིང་ཞི་བདེ་ལ་སྨན་པའི་ཚོགས་འདུ་འདི་གྲ་སྒྲིག་པོ་ཞིག་ཡོང་ཆེད་ཁྱེད་རང་འཁྱུག་ཙམ་རིང་ཕྱི་ལོགས་སུ་ཕེབས་དགོས་ཚུལ་བརྗོད་པ་ལྟར། དུས་ཐུང་རིང་ཕྱི་ལོགས་སུ་ཕེབས་ཏེ་གསར་འགོད་པ་མང་པོ་ཞིག་ལ་གསལ་བཤད་ཀྱི་གོ་སྐབས་བྱུང་ཡོད་པ་དང་། དེའི་རྗེས་ཁོང་བསྐྱར་དུ་ཚོགས་འདུར་ཞུགས་སྐབས་རྒྱ་མིའི་སྐུ་ཚབ་ཚོ་སྡེབས་གཅིག་ཏུ་ཡར་ལངས་ཏེ་ཕྱི་རུ་ཐོན་འདུག་ལ། ཕྱི་ལོགས་ནས་ཁོ་ཚོ་ཚོགས་ཐུན་གཉིས་རིང་ལ་སྡོད་དགོས་བྱུང་འདུག

དེའི་རྗེས་མཛད་སྒོ་དངོས་གཞི་དེ་ཚོགས་ཁང་ཆེན་པོ་ཞིག་ནང་ཚོགས་ཡོད་པ་དང་། ལྷོ་ཀོ་རི་ཡའི་གཞུང་གི་ཕྱི་སྲིད་བློན་ཆེན་དང་། རིག་གཞུང་བློན་ཆེན། ཀོ་རི་ཡའི་བླ་ཆེན་མང་པོ་ཞིག་བཅས་ཕེབས་ཏེ་གཏམ་བཤད་དང་། རྒྱལ་ཁབ་འདྲ་མིན་ནས་ཡོང་བའི་འཁྲབ་སྟོན་པ་དག་གིས་རིག་གཞུང་འཁྲབ་སྟོན་སྐབས། རྒྱའི་སྐུ་ཚབ་ཚོ་ཡར་རྒྱུག་མར་རྒྱུག་ཀྱིས་ཀོ་རི་ཡའི་བླ་ཆེན་ལ། བོད་པའི་སྐུ་ཚབ་ཚོགས་འདུར་ཞུགས་ཚེ་ཁོ་ཚོ་ཕྱིར་འཐོན་རྒྱུ་ཡིན་སྐོར་བརྗོད་པར། བླ་ཆེན་གྱིས་ཁྱེད་ཚོ་འགྲོ་ན་འདུག་ན་ཁྱེད་རང་ཚོས་ཐག་གིས་ཆོད། ང་ཚོའི་ངོས་ནས་བོད་པའི་སྐུ་ཚབ་ཕྱིར་འབུད་རོགས་ལབ་རྒྱུ་མིན་ཞེས་གསུངས་འཕྲལ། རྒྱའི་སྐུ་ཚབ་ཚང་མ་ཚོགས་ཁང་ནས་ཐོན་ཡོད་པ་མ་ཟད། ཚོགས་ཁང་གི་ཕྱི་ལོགས་སུ་གོ་སྒྲིག་ཚོགས་ཆུང་གི་འབྲེལ་ཡོད་མི་སྣ་ཚོ་དང་རྩོད་རྙོག་ཡུན་རིང་བྱས་མཐར། ཐེངས་འདིའི་ཚོགས་ཆེན་སྟེང་གི་རྒྱལ་ཁབ་ ༤༩ ཡོད་པ་ལས། ཧོང་ཀོང་དང་སིང་གྷ་པོར། ཐེ་ལན་ཌི་གསུམ་མ་གཏོགས། གཞན་པའི་སྐུ་ཚབ་ཚང་མས་བོད་མིར་རྒྱབ་སྐྱོར་གནང་ཡོད་སྟབས། ཕྱི་ཚེས་ ༡༣ ཉིན་གྱི་སྔ་དྲོར་རྒྱ་ནག་གི་སྐུ་ཚབ་ཡོངས་ཕྱིར་ལོག་དགོས་བྱུང་ཡོད་འདུག

མཇུག་ཏུ་ཆོས་རིག་བཀའ་བློན་མཆོག་གིས། “ལྷོ་ཀོ་རི་ཡའི་མི་མང་དང་ཀོ་རི་ཡའི་བླ་ཆེན་རྣམ་པས། བློ་ཁོག་ཆེན་པོ་དང་ཐག་ཆོད་པའི་སྒོ་ནས་དྲང་བདེན་ལ་རྒྱབ་སྐྱོར་གནང་བ་དེ་ནི། ཧ་ལས་པའི་རྒྱབ་སྐྱོར་ཚད་མཐོན་པོ་ཞིག་རེད་བསམ་པའི་ཚོར་སྣང་བྱུང་།” ཅེས་སོགས་གསུངས་ཡོད་པ་རེད།

གསར་འགོད་པ། ཚེ་རིང་རྒྱལ།