རང་བཙན་སླར་གསོའི་མནའ་སྐྱེལ་དམ་འཇོག་གི་ལས་འགུལ་ཞིག་ཡོད།འདོན་སྤེལ། ༢༠༡༢/༠༨/༢༨ དེ་རིང་སྔ་དྲོར་དྷ་ས་དབུས་གཞོན་ནུའི་ཚོགས་ཁང་དུ་གསར་འགོད་ལྷན་ཚོགས་ཤིག་བསྐྱངས་ཏེ། ལོ་རྗེས་མའི་ཕྱི་ཟླ་ ༢ ཚེས་ ༡༣ ཉིན་རང་བཙན་ཚོགས་ཆེན་ཞིག་འཚོགས་རྒྱུ་ཡིན་པའི་ལས་འཆར་དང་། རང་བཙན་མཚོན་རྟགས་ཤིག་ཇུས་འགོད་གསར་བཟོ་བྱ་རྒྱུ་ཡིན་སྐོར་སོགས་བསྒྲགས་སོང་།
 དེ་རིང་སྔ་དྲོ་ཕྱི་ཚོད་ ༡༡ སྟེང་དྷ་ས་དབུས་གཞོན་ནུའི་ཚོགས་ཁང་དུ། བོད་ཀྱི་དབུས་གཞོན་ནུ་ལྷན་ཚོགས་ཀྱི་ཚོགས་གཙོ་གཞོན་གཉིས་ལྷན་བཞུགས་ཐོག ལོ་རྗེས་མར་༸རྒྱལ་དབང་སྐུ་ཕྲེང་བཅུ་གསུམ་པ་མཆོག་གིས་བོད་རང་བཙན་བསྐྱར་ནན་གསལ་བསྒྲགས་གནང་སྟེ། ལོ་ ༡༠༠ འཁོར་བའི་དུས་དྲན་སྲུང་གཙི་གནང་རྒྱུ་ཡིན་པའི་ལས་འཆར་ཁག་ཅིག་གསལ་བསྒྲགས་བསྐྱངས་སོང་། ཚོགས་གཙོ་ཚེ་རིང་རིག་འཛིན་གྱིས་དོན་ཚན་ ༧ ཅན་གྱི་གསལ་བསྒྲགས་སྤེལ་བ་དང་འབྲེལ། ཕྱི་ཟླ་ ༩ ཚེས་ ༣ ནས་གཞོན་ལྷན་གྱི་ཟས་བཅད་ངོ་རྒོལ་ལས་འགུལ་མགོ་འཛུགས་བྱ་རྒྱུ་ཡིན་སྟབས། ལས་འགུལ་སྤེལ་བཞིན་པའི་བརྒྱུད་རིམ་ཁྲོད། ཕྱི་ཟླ་ ༩ ཚེས་ ༡༨ ཉིན་རྒྱལ་སྤྱིའི་ཁྱོན་ཡོངས་ཀྱི་མཉམ་འབྲེལ་རྒྱལ་ཚོགས་ལས་ཁུངས་ཡོད་ས་ཚང་མར། བོད་མི་ཡོངས་ཀྱིས་རྔམ་སྟོན་ཁྲོམ་སྐོར་གཞི་རྒྱ་ཆེ་བ་ཞིག་སྤེལ་དགོས་པ་དང་། དེ་བཞིན། ཕྱི་ཟླ་ ༩ ཚེས་ ༢༤ ཉིན་བོད་པ་དང་བོད་དོན་རྒྱབ་སྐྱོར་བ་ཚང་མས་ཁ་པར་དང་། མགྱོགས་འཕྲིན(Fax)། གློག་འཕྲིན་(Email)སོགས་བརྒྱུད་དེ། བོད་ནང་གི་གནས་སྟངས་ཐད་མཉམ་འབྲེལ་རྒྱལ་ཚོགས་དང་ཡུ་རོབ་གྲོས་ཚོགས། རྒྱལ་སྤྱིའི་གཞུང་ཁག་ཚང་མར་ཞུ་ཡིག་འབུལ་དགོས་པའི་འབོད་སྐུལ་གནང་སོང་།
གཞོན་ལྷན་གྱིས་གསལ་བསྒྲགས་སྤེལ་བའི་ནང་། ཕྱི་ལོ་ ༢༠༡༣ ལོར་ ༸རྒྱལ་དབང་སྐུ་ཕྲེང་བཅུ་གསུམ་པ་མཆོག་གིས་རང་བཙན་གསལ་བསྒྲགས་མཛད་ནས་ལོ་བརྒྱ་འཁོར་བའི་དུས་ཚིགས་གལ་ཆེན་སྲུང་གཙི་དང་། གང་ཉིད་ཀྱི་བཀའ་དྲིན་རྗེས་དྲན། བོད་རང་བཙན་སླར་གསོའི་ནུས་ཤུགས་སྔར་ལྷག་ཆིག་སྒྲིག་དང་མདུན་སྐྱོད་ཐུབ་སླད། ཕྱི་ལོ་ ༢༠༡༠ ལོར་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༤ པའི་ཐོག རྒྱལ་སྤྱིའི་རང་བཙན་ཚོགས་ཆེན་རྒྱས་པ་ཞིག་བསྐོང་རྒྱུའི་གྲོས་ཆོད་བཞག་པ་ལྟར། ཚོགས་ཆུང་ཆེད་འཛུགས་ཀྱིས་རྒྱལ་སྤྱིའི་རང་བཙན་ཚོགས་ཆེན་རྒྱས་པ་ཞིག་འཚོགས་གཏན་ཁེལ་བ་མ་ཟད། དེའི་སྔོན་འགྲོའི་ཚོགས་འདུ་ཞིག་ས་གནས་ཁག་བགོས་བྱས་ཏེ། བོད་རང་བཙན་སླར་གསོའི་དགོས་དམིགས་གསལ་སྟོན་དང་གདེངས་སྤོབས་གོང་མཐོར་གཏོང་ཐབས། བོད་རང་བཙན་སློར་གསོའི་འཆར་གཞི་དང་ཐབས་ལམ། ཞེས་པའི་བརྗོད་གཞི་ཁག་གཉིས་ཀྱི་ཐོག ཡུ་རོབ་དང་། བྱང་ཨ་རི། ཤར་གླིང་ཨེ་ཤི་ཡ། རྒྱ་གར་བཅས་སུ་ཚོགས་གཏན་འཁེལ་བའི་ཁྲོད། ཡུ་རོབ་ཏུ་ཚོགས་རྒྱུའི་ཚོགས་འདུ་དེ་ཕྱི་ལོ་ ༢༠༡༡ ཟླ་ ༧ ཚེས་ ༢༣ དང་ ༢༤ ཉིན་གཉིས་རིང་། སུད་སི་གྲོང་ཁྱེར་ཛུ་རིག་ཏུ་བོད་ཀྱི་གཞོན་ནུ་ལྷན་ཚོགས་ཀྱི་སྤྱི་ཁྱབ་དབུས་རྒྱུན་ལས་ཁང་གིས་གོ་སྒྲིག་དང་། ཡུ་རོབ་གཞོན་ནུའི་འཐུན་འགྱུར་ཐོག་བསྡུ་སྐོང་ཞུས་ཟིན་པ་བཅས། ཅེས་བཀོད་འདུག
གསལ་བསྒྲགས་ནང་ལས་འཆར་ཁག་ཅིག་ཕྱིར་བསྒྲགས་བྱས་དོན། འདི་ལོའི་ཕྱི་ཟླ་ ༡༠ པའི་ཚེས་ ༢༧ ནས་ ༢༨ ཉིན་གཉིས་རིང་ཐེ་ཝན་དུ། དབུས་གཞོན་ནུས་གོ་སྒྲིག་དང་ཐེ་ཝན་ས་གནས་གཞོན་ནུས་མཐུན་འགྱུར་འོག ཤར་གླིང་ཨེ་ཤ་ཡ་ཁུལ་གྱི་རང་བཙན་ཚོགས་འདུ་འཚོགས་རྒྱུ་དང་། ཕྱི་ཟླ་ ༡༡ ཚེས་ ༢༤ ནས་ ༢༥ ཉིན་གཉིས་རིང་རྒྱ་གར་རྒྱལ་ས་ལྡི་ལིར། བོད་ཀྱི་གཞོན་ལྷན་དབུས་རྒྱུན་ལས་ཁང་གི་གོ་སྒྲིག་དང་། ལྡི་ལི་བསམ་ཡས་གླིང་དང་རོ་ཧི་ནི་ས་གནས་གཞོན་ནུའི་མཐུན་འགྱུར་འོག རྒྱ་བལ་འབྲུག་གསུམ་ཁུལ་གྱི་རང་བཙན་ཚོགས་འདུ་འཚོགས་རྒྱུ། ཕྱི་ཟླ་ ༡༢ པའི་ནང་ཉིན་གཉིས་རིང་ནའེ་ཡོག་ཏུ་བོད་ཀྱི་གཞོན་ལྷན་དབུས་རྒྱུན་ལས་ཁང་གི་གོ་སྒྲིག་དང་། ནེའུ་ཡོག་དང་ནེའུ་ཇར་སི་ས་གནས་གཞོན་ནུའི་མཐུན་འགྱུར་འོག བྱང་ཨ་རིའི་ཁུལ་གྱི་རང་བཙན་ཚོགས་འདུ་འཚོགས་རྒྱུ།
རྒྱལ་སྤྱིའི་རང་བཙན་ཚོགས་ཆེན་རྒྱས་པའི་དངོས་གཞི་ནི། ཕྱི་ལོ་ ༢༠༡༣ ཟླ་ ༢ ཚེས་ ༡༣ ཉིན་ཏེ། ༸གོང་ས་བཅུ་གསུམ་པ་མཆོག་གིས་བོད་རང་བཙན་བསྐྱར་ནན་གསལ་བསྒྲགས་བསྐྱངས་ནས་ལོ་བརྒྱ་འཁོར་བའི་ཉིན་མོར། བཞུགས་སྒར་ངྷ་རམ་ས་ལར་བོད་ཀྱི་གཞོན་ལྷན་ཚོགས་ཀྱི་གོ་སྒྲིག་དང་། དྷ་ས་ས་གནས་གཞོན་ནུའི་མཐུན་འགྱུར་འོག་ཚོགས་གཏན་འཁེལ་ཡོད་འདུག
བོད་རང་བཙན་དོན་གཉེར་ཅན་གྱི་བོད་རིགས་དང་བོད་དོན་རྒྱབ་སྐྱོར་བ་ཡོངས་ཀྱིས་གོང་གསལ་ཚོགས་འདུ་ཁག་ནང་ཆ་ཤས་ལེན་རྒྱུའི་འབོད་སྐུལ་གནང་ཡོད་པ་མ་ཟད། ཕྱི་ལོ་ ༢༠༡༣ ཟླ་ ༢ ཚེས་ ༡༣ ཉིན་རང་བཙན་སླར་གསོའི་མནའ་སྐྱེལ་དམ་འཇོག་གི་ལས་འགུལ་ཞིག་ཀྱང་སྤེལ་རྒྱུ་དང་། དེ་བཞིན། ཡིག་ཆ་དཔར་འགྲེམས་དང་། བགྲོ་གླེང་། རང་བཙན་ཁུངས་སྐྱེལ་དང་འབྲེལ་བའི་འགྲེམས་སྟོན་སོགས་ལས་འགུལ་སྣ་ཚོགས་བརྒྱུད། ༢༠༡༣ ལོ་ནི་རྒྱལ་སྤྱིའི་བོད་རང་བཙན་གྱི་ལོ་སྲུང་གཙི་བྱ་རྒྱུ་ཡིན་པ་བཅས་བཀོད་འདུག
གསལ་བསྒྲགས་ནང་། ཉེ་སྔོན་ཡུ་རོབ་རང་བཙན་ཚོགས་འདུའི་ཐོག རང་བཙན་འཐབ་རྩོད་པ་མི་སྒེར་དང་ཚོགས་སྡེ་ཁག་ཚང་མས་གཅིག་གྱུར་བེད་སྤྱོད་གནང་ཐུབ་པའི་རང་བཙན་འཐབ་རྩོད་ཀྱི་མཚོན་རྟགས་ཤིག་བཟོ་དགོས་པའི་དགོངས་འཆར་ཐག་གཅོད་བྱུང་བ་ལྟར། རང་བཙན་མཚོན་རྟགས་ཤིག་ཇུས་འགོད་འགྲན་བསྡུར་གྱི་ལམ་ནས་གཏན་འབེབས་ཞུ་རྒྱུ་ཡིན་པ་དང་། མཚོན་རྟགས་དེ་བཞིན་འབྲི་བདེ་ལ། རང་བཙན་འཐབ་རྩོད་དང་ལོ་རྒྱུས་ཀྱི་རྒྱབ་ལྗོངས་ཚོར་ཤུགས་སྤྲོད་ཐུབ་ངེས་ཤིག་ཡིན་དགོས་པ་མ་ཟད། ཇུས་འགོད་རི་མོའི་རྒྱབ་ལྗོངས་འགྲེལ་བཤད་དང་བཅས། ༢༠༡༢ ཟླ་ ༡༡ ཚེས་ ༣༠ ནང་ཚུད་དབུས་གཞོན་ནུར་འབྱོར་དགོས་ཤིང་། ཇུས་འགོད་རི་མོ་དེ་བཞིན་ལོ་རྒྱུས་དང་རི་མོའི་སྒྱུ་རྩལ་བ་ཁག་ལས་གྲུབ་པའི་ཚོགས་ཆུང་ཆེད་འཛུགས་ཀྱིས་འདེམས་སྒྲུག་གཏན་འབེབས་བྱ་རྒྱུ་ཡིན་ཞིང་། མཐའ་མའི་ཇུས་འགོད་པ་རྩེ་ཕུད་དེར་ཧིན་སྒོར་ལྔ་ཁྲི་ ༥༠༠༠༠ ཡི་ལེགས་སྐྱེས་འབུལ་རྒྱུ་ཡིན་སྐོར་བཅས་བཀོད་འདུག
གསར་འགོད་པ། ཚེ་རིང་རྒྱལ། ཤོག་ངོས་འདི་ཐེངས་ ༣༢༠༢ ལ་བཀླགས་འདུག
| རིག་པ་འདོན་པ། |
ཇོ་བོ་རྣམས་གཉིས།
༢༠༡༢/༠༩/༠༡ ཉིན་འདོན་སྤེལ་བྱས། |
2013ལོར་སྤེལ་རྒྱུའི་ལས་འགུལ་དེ་ནི་དངོས་གནས་རླབས་ཆེན་ཞིག་རེད། ངའི་ངོས་ནས་ཀྱང་སྔོན་སོང་གི་དཔའ་བོ་དཔའ་མོ་དག་གིས་རང་སྲོག་ལ་ཕང་མེད་ཀྱིས་བློས་གཏང་བྱས་པ་དག་ནི་རང་བཙན་ཁོ་ནའི་ཆེད་ཡིན་པ་ལས། དེ་མིན་གི་འདོད་དོན་སྒྲུབ་ཆེད་མིན་ངེས་རེད་དྲན་བཞིན་ཡོད་ལ་ངས་ཀྱང་མ་འོངས་པའི་བོད་དེ་རང་བཙན་ལས་དེ་མིན་གི་གནས་བབ་ཐོག་གནས་པ་ཞིག་མཐོང་འདོད་མེད། དེར་བརྟེན་ཁྱེད་རྣམས་པའི་ལས་འགུལ་དེར་བསྔགས་བརྗོད་ཡོད། དེ་འབྲེལ་གྱི་གསར་འགྱུར་མང་ཙམ་སྤེལ་རོག་གནང། |
ཀརྨ་རྡོ་རྗེ།
༢༠༡༢/༠༩/༠༡ ཉིན་འདོན་སྤེལ་བྱས། |
ཡང་བསྐྱར་ཅིག་ཀློག་གནོངས་དང་། ཚོགས་གཙོ་ཚོགས་མི་སོགས་ཀྱིས་ཀྱང་།
་་་་་། བར་ལམ་ཚོགས་པ་དང་མི་སྒེར་རེ་ཟུང་ནས་བཙན་བྱོལ་ནང་གཞུང་མེད་པར་གྱུར་བས་རེ་བ་རྒྱག་ས་མི་འདུག་ཅེས་ཁུངས་མེད་ཟུར་ཟ་བྱེད་པ་དང་འགན་ཁུར་མེད་པར་རྣམ་རྟོག་སློང་བའི་གཏམ་འཆལ་སྤེལ་དང་སྤེལ་མུས་ལ་སོང་། རྒྱ་ཆེའི་མང་ཚོགས་ནས་དུས་དང་རྣམ་པ་ཀུན་ཏུ་དབུ་མ་འཁོར་བར་གཞིས་བྱེས་མཉམ་འཛོམས་དང་བོད་རང་དབང་སླར་གསོ་འབྱུང་ཐབས་སུ་རང་ཚུགས་བརྟན་པོ་གནང་དགོས་པའི་འབོད་སྐུལ་ནན་པོ་ཞུ་རྒྱུ་ཡིན།
འདི་ཕྱི་གཉིས་ཀྱི་སྐྱབས་གནས་སྤྱི་ནོར་༸གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ཐུགས་ཕམ་འབྱུང་གཞིའི་གནད་དོན་འདི་རིགས་ནི་༸རྒྱལ་བའི་སྐུ་ཕྱྭ་དང་ཐད་ཀར་འབྲེལ་བ་ཡོད་པར་སོང་བཀའ་སློབ་ཇི་ཕེབས་ཀྱི་གནད་དོན་འདི་དག་ལ་བོད་མི་ཚང་མས་ཐུགས་སྣང་དགོས་རྒྱུ་ནི་གལ་འགངས་ཧ་ཅང་ཆེན་པོ་ཞིག་ཡིན།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགུང་གྲངས་ ༡༦ ནས་བཟུང་མི་ལོ་དྲུག་ཅུའི་རིང་བོད་རྒྱལ་ཁབ་དང་མི་རིགས་ལ་བཀའ་དྲིན་བྱམས་སྐྱོང་མཛད་པའི་སྐུ་དྲིན་ལ་བསམ་ཤེས་མེད་པར་ ཚོགས་པ་དང་མི་སྒེར་རེ་ཟུང་གིས་ཡི་མ་རངས་པར་དྲིན་ལན་ལོག་འཇལ་གྱིས་སྤྱི་ཚོགས་ནང་ཁུངས་མེད་སྐད་ཅོར་རྒྱག་བཞིན་པ་དེ་ནི་ཧ་ཅང་གི་ཐབས་སྡུག་གི་ | | 
