ཤེས་དབང་བློ་གྲོས།
རྒྱལ་བའི་དགོངས་བཞེད་དང་མཁྲེགས་འཛིན་བསམ་བློ་ལས་འཕྲོས་པའི་ཉེན་བརྡ་རིང་མོ།
ལོ་རབས་མང་པོའི་སྔོན་དུ་འཕགས་ཡུལ་གྱི་རྒྱལ་སྲས་ཆེན་པོ་ཞི་བ་ལྷས། སྔོན་ཆད་མ་བྱུང་བ་ཡང་འདིར་བརྗོད་མེད།། ཅེས་སྔོན་མེད་པའི་བྱུང་བ་གསར་བ་གང་ཡང་བརྗོད་དུ་མེད་པར་གསུངས་ཡོད། དེའི་རྗེས་ཀྱི་དུས་རབས་མང་པོ་འདས་པའི་དེ་རིང་ངས་སྔོན་ཆད་བྱུང་མ་མྱོང་བའི་གཏམ་གསར་བ་ཞིག་བརྗོད་འདོད་བྱུང་། དེ་ནི་ལྟོས་འཇོག་གི་གཏམ་གསར་བ་ཞིག་ལས་རྣམ་པ་ཐམས་ཅད་དུ་གསར་བ་ཡིན་མི་སྲིད། དེ་ཡང་༸གོང་ས་ཐམས་ཅད་མཁྱེན་པ་སྐུ་ཕྲེང་བཅུ་བ་ཆེན་པོས། “ང་ཚན་རིག་ལ་དང་པའི་ཀུན་སློང་འདི་སྒེར་དོན་ཙམ་མིན་པར་བོད་ཀྱི་ཆབ་སྲིད་ཉམས་རྒུད་བྱུང་བའི་གཞི་རྩའི་རྒྱུ་རྐྱེན་གཅིག་ནི་བོད་དེང་རབས་ཅན་ལ་བསྒྱུར་མ་ཐུབ་པ་དེ་རེད། ཅེས་དང་། ཚན་རིག་དང་སེམས་དོན་རིག་པ་གཉིས་ཟུང་འབྲེལ་གྱིས་འགྲོ་བ་མིའི་རིགས་ཀྱི་ཤེས་ཡོན་དང་ཤེས་རབ་ལ་མཐའ་རྒྱ་གསར་བ་ཞིག་བསྐྱེད་པར་རམ་འདེགས་བྱེད་ཆོག ལྷག་པར་ཕན་ཚུན་བར་གྱི་གྲོས་བསྡུར་ལ་བརྟེན་ནས་ཚན་རིག་དང་སེམས་དོན་རིག་པས་འགྲོ་བ་མིའི་རིགས་ཀྱི་དགོས་མཁོ་དང་བདེ་ཐབས་ལ་སྔར་ལས་ལེགས་པའི་ཞབས་འདེགས་བསྒྲུབ་ཐུབ་པའི་རེ་བ་བདག་ལ་ཡོད།” ཅེས་གསུང་བ་བཞིན། ༸གོང་ས་༸སྐྱབས་མགོན་ཆེན་པོས་ཕུགས་རྒྱང་རིང་པོའི་དགོངས་གཞི་སྟེ་བོད་དེང་རབས་ཅན་དུ་བསྒྱུར་རྒྱུའི་རྨང་གཞི་དང་། ནང་ཆོས་ཀྱིས་འཇིག་རྟེན་སྤྱི་ཡོངས་ལ་ཕན་བདེའི་ཞབས་འདེགས་སྒྲུབ་པ་དང་ལྷན་དུ་འཛམ་གླིང་སྤྱི་ཡོངས་ཀྱི་ངོས་ལེན་དང་ཡིད་སྨོན་ཤོར་བའི་ཚན་རིག་གི་སྒྲོམ་གཞིའི་ལམ་ནས་བོད་ཀྱི་ནང་བའི་གྲྭ་བ་རྣམས་རྒྱལ་སྤྱིའི་སྡིངས་ཆར་འཛེགས་ཏེ། བོད་དང་བོད་ཀྱི་མཚན་ནས་སྐྱོར་བཞིན་བོད་ཀྱི་རང་དབང་བསུ་བའི་དགོངས་བཞེད་འོག་ནས་སྔ་ཕྱི་བར་གསུམ་དུ་བཀའ་སློབ་ལམ་སྟོན་གནང་ཞིང་དཔལ་འབྱོར་སོགས་ཀྱི་མཐུན་རྐྱེན་ཡང་སྦྱར་ནས་ནང་བའི་གྲྭ་བ་རྣམས་ཚན་རིག་དང་། ནང་བའི་རིགས་ལམ་མཉམ་གཤིབ་ཀྱི་ཞིང་ཁམས་ཤིག་ཏུ་འཁྲིད་ཐབས་གནང་ཡོད།
དེ་ལྟར་ཡང་ནང་བའི་ལྟ་གྲུབ་དང་གཞུང་ལུགས་ལ་རྒྱུས་མངའ་ཟབ་པའི་ཆེན་པོ་དག་དང་། ནམ་ནམ་ཞར་ཞར་ལ་༸གོང་ས་མཆོག་ཟེར་ནས་ཆེས་རྩ་ཆེན་དུ་གླེང་བའི་འབྲེལ་ཡོད་ལས་སྣེ་དག་གིས་དེ་ནི་བཙན་བཀའ་ལྟ་བུ་ཞིག་ཏུ་ངོས་འཛིན་བྱས་ཤིང་གྲྭ་བས་ཚན་རིག་སློབ་ཚན་སྦྱང་དགོས་པའི་བསམ་བློའི་དགོས་དམིགས་འདི་བློ་ཡུལ་ལ་མ་ཤོང་བར་དེ་ནི་ནང་བའི་ཆོས་ཀྱི་སློབ་གཉེར་ཉམས་ཆག་གི་རྒྱུ་རུ་མཐོང་ནས་སྐད་ངན་སྟོང་ཕྲག་གི་ངུ་རྒྱངས་དང་བཅས་རྒྱལ་བའི་བཀའ་དགོངས་ཡིན་པ་རེད་ཟེར་བ་ཙམ་ལས་དགོས་པ་དང་། རྒྱབ་ལྗོངས་ཀྱི་གནས་ཚུལ་གང་ཡང་མ་གླེང་བ་སྟེ་གང་ཡང་གླེང་མ་ཤེས་པར་ཁྲལ་ཆོས་ཙམ་གྱི་འཛིན་གྲྭ་རེ་བྲེལ་བྲེལ་ཚུབ་ཚུབ་ངང་བསྡུས་པ་རེད། ཁོང་ཚོར་རྒྱུ་མཚན་དང་ཁུངས་འདྲེན་གཅིག་ཡོད་པ་ནི་མཁས་དབང་ཟམ་གདོང་རིན་པོ་ཆེས་ཚན་རིག་གིས་ནང་ཆོས་ཀྱི་པུས་མོ་ཙམ་ལ་སྙོབ་ཀྱི་མ་རེད་ཅེས་པ་དང་། ཚན་རིག་གིས་ནང་ཆོས་ལ་ཕན་ཐོགས་ཆེར་མེད་པའི་དགོངས་ཚུལ་གསུང་བཤད་རྣམས་ཡིན།
ད་ནི་ད་ལྟའི་བར་སུས་ཀྱང་བཤད་མ་མྱོང་བའི་གསུང་བཤད་འདི་གཉིས་ཀྱི་རྒྱབ་ལྗོངས་དང་དགོས་གལ་ནས་གླེང་ཏེ་དགོངས་གཞིའི་གནད་ཀྱི་མདོ་རྩ་བཟུང་སྟེ་བཤད་པར་བྱའོ།། ༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དངོས་ནི་གོང་དུ་རོབ་ཙམ་བཤད་པ་བཞིན་འཇིག་རྟེན་སྤྱི་ཡོངས་ཀྱི་མོས་མཐུན་དང་དད་པས་བཀུར་བའི་ཆོས་ལུགས་ཤིག་དགོས་ན་དེ་ནི་ཚན་རིག་གིས་བདེན་དཔང་གིས་མི་རྣམས་ལ་ཡིད་ཆེས་སུ་འཇུག་དགོས་རྒྱུ་དེ་ཡིན་པའི་གནས་ལུགས་ལ་གཞི་བཅོལ་བ་དང་། མཐར་ཐུག་གི་བདེན་པ་སྟེ་ཆོས་རྣམས་ཀྱི་རང་བཞིན་ངོ་མ་དེ་འཚོལ་བའི་དམིགས་ཡུལ་འདི་ནང་ཆོས་དང་ཚན་རིག་གཉིས་ཀྱི་གཅིག་མཐུན་གྱི་བསམ་བློ་ལྡན་པ་འདིའི་ངོས་ནས་དང་། ནང་ཆོས་དང་ཚན་རིག་གི་མཐུན་ཕྱོགས་མཉམ་སྦྲེལ་གྱི་ནུས་པས་འགྲོ་བ་མི་རྣམས་ཀྱི་ཕྱི་དང་ནང་གི་དགོས་མཁོའམ་བདེ་སྐྱིད་སྒྲུབ་ཐུབ་པའི་ཡིད་ཆེས་བཅས་ཀྱི་རྒྱབ་ལྗོངས་ནས་ཆོས་ཀྱི་གཞུང་ལུགས་ལ་གོ་རྟོགས་ལྡན་པའི་གྲྭ་བ་ཚོར་ཚན་རིག་སློབ་སྦྱོང་གི་གལ་ཆེའི་རང་བཞིན་ནན་བརྗོད་གནང་བ་དང་སློབ་སྦྱོང་བྱེད་པར་སྐུལ་དེད་བྱས་པ་རེད།
དེ་ཡང་གྲྭ་བ་རྣམས་ཚན་རིག་པ་ཆགས་ནས་རྡུལ་ཕྲན་ཚོན་ཆ་བཟོ་རྒྱུ་དང་། དཔལ་འབྱོར་འཚོལ་སྒྲུབ་བྱ་རྒྱུ་སོགས་ཀྱི་ཆེད་དུ་མ་ཡིན་པར་ཚན་རིག་གི་གཞི་རྩའི་ཤེས་བྱ་རྣམས་ངེས་པར་བྱས་ནས་ཐ་སྙད་དང་བསམ་བློའི་ཁ་ཕྱོགས་ངོས་འཛིན་གྱིས་ནང་ཆོས་ཀྱི་ལྟ་གྲུབ་སྒྲོམ་གཞི་གཞན་བློར་འཇུག་བདེ་བའི་བྱེད་ཐབས་ཀྱིས་ཕྱི་ནང་གི་དགོས་མཁོ་མཉམ་སྒྲུབ་ཀྱིས་བདེ་སྐྱིད་ལྡན་པའི་མིའི་རིགས་ཀྱི་སྤྱི་ཚོགས་ཤིག་བསྐྲུན་རྒྱུ་ནི་དགོས་དམིགས་མཐར་ཐུག་པའོ།། དེ་ལྟར་བྱུང་ན་སེམས་ཅན་ཐམས་ཅད་བདེ་བ་དང་ལྡན་པར་ཤོག་ཅེས་པའི་སྨོན་ལམ་འདི་དོན་དངོས་ཀྱི་ཕྱོགས་སུ་བསྙེག་པ་ཡིན་ལ་བསྟན་པ་རྒྱས་པར་ཤོག་ཟེར་བཞིན་དོན་དངོས་ཐོག་རང་དང་རང་གི་ཁོར་ཡུག་གཅིག་པོ་མ་གཏོགས་མི་རིག་པའི་ཆེས་རྒྱང་ཐག་ཉེ་བའི་བློ་མིག་ལྡོངས་པོ་དེ་ཚོར་ཡིད་གཏད་རྗེས་འབྲང་བྱེད་པ་ནི་ཛ་དྲག་དང་ཉེན་ཁའི་གནས་སོ།།
འོ་ན་མཁས་དབང་ཟམ་གདོང་རིན་པོ་ཆེས་ཚན་རིག་གལ་ཆེན་དུ་གཟིགས་ཀྱི་མེད་པ་དང་། ནང་ཆོས་དང་བསྡུར་ཐབས་མེད་པ་གསུངས་པ་མ་ཡིན་ནམ། ད་དུང་ཚན་རིག་ལ་དགག་པ་གནང་བ་མ་ཡིན་ནམ་ཟེར་ན་དེ་ནི་འགལ་འདུ་བྱེད་སྟངས་ཆེས་ཞན་པ་ལས་ཀྱང་ཞན་པའོ།། རྒྱུ་མཚན་ནི་འཇིག་རྟེན་ཡོངས་གྲགས་ཀྱི་བཤད་སྟངས་ལྟར་ན་རིག་གཞུང་དང་བྱ་བ་གང་ཡིན་ཡང་ལེགས་དང་ཉེས་ཀྱི་ཆ་དང་། མཐུན་དང་འགལ་བའི་ཆ་གཉིས་ཡོད་པ་བཞིན་དུ་མཁས་དབང་ཟམ་གདོང་རིན་པོ་ཆེས་ནི་ཚན་རིག་གི་བྱུང་རབས་ཀྱི་ཀུན་སློང་དང་། ལྟ་གྲུབ་རང་ངོས་ནས་ནང་པའི་ཡང་དག་པའི་རིགས་ལམ་ལ་འགྲན་དུ་མེད་པར་གསུངས་ཤིང་། ༸གོང་ས་༸སྐྱབས་མགོན་ཆེན་པོ་མཆོག་གིས་ནི་འགྲོ་བ་མིའི་དགའ་ཕྱོགས་དང་ཤུགས་རྐྱེན་གྱི་འགྲོས་ལས་སྤྱི་ཕན་གྱི་ཆ་རྐྱེན་ཞིག་ཏུ་འགྱུར་བར་གཟིགས་པས་དེ་ལ་འགལ་བར་འཛིན་པ་ནི་འགལ་སྤོང་རྩོད་སྤོང་གི་གཞུང་ལུགས་ལ་གོམས་འདྲིས་ཡོད་མཁན་ཞིག་གི་ངོས་ནས་ཆེས་བླུན་རྟགས་བླ་མེད་པ་ཞིག་གོ།
འདི་དང་འབྲེལ་ནས་ཡིད་སྐྱོ་བའི་གནས་ཚུལ་ཞིག་ཡོད་པ་ནི་གདན་ས་དང་དགོན་པ་ཁག་གི་དབུ་འཁྲིད་རེ་འགས་དུས་དང་དུས་སུ་༸གོང་ས་མཆོག་ཟེར་ཏེ་ཁ་ནས་འདོར་མེད་དུ་འབོད་ཀྱང་དོན་དངོས་ཐོག་རང་གི་བློ་ལ་མ་བབ་པའམ་མ་ཤོང་བའི་གནས་ཚུལ་གང་ལ་ཡང་དེའི་དགོངས་གཞི་འཚོལ་ཐབས་དང་། རྒྱུ་མཚན་དབྱེ་ཞིབ་མི་བྱེད་པར་གཡོལ་ཐབས་དང་། ཁྲལ་ཙམ་གྱི་ལས་གཞི་མགོ་འཛུགས་ཀྱིས་ཁོང་གི་མདུན་ནས་ལེགས་ཕྱོགས་རྐྱང་རྐྱང་གི་འགྲེལ་བཤད་བྱེད་པའི་སྲོལ་རྒྱུན་འདིའི་རྒྱུ་བ་ཧ་ཅང་མཐུག་པ་འདིའོ།། འདི་ནི་གོ་བདེ་བར་བརྗོད་ན་༸གོང་ས་མཆོག་དབུ་སྐོར་བཏང་བ་དང་སེམས་ནང་གི་༸གོང་ས་མཆོག་གི་རིན་ཐང་འགྲེལ་བཤད་བྱས་པའོ།། །།
ད་མང་པོ་མང་པོ་མ་བཤོད། གལ་ཏེ་བཅོས་སུ་ཡོད་ན་ནི། དེ་ལ་མི་དགའ་བྱ་ཅི་དགོས། གལ་ཏེ་བཅོས་སུ་མེད་ན་ནི། དེ་ལ་མི་དགའ་བྱ་ཅི་ཕན། ཞེས་གསུང་པ་བཞིན་རེད་དོ། ད་ཁྱེད་ཚོ་སུ་མཚན་རིག་བྱེད་ན་བྱེད། སུ་ཆོས་པ་བྱེད་ན་བྱེད། མ་བྱེད་ན་མ་བྱེད། གང་ལྟར་བོད་སྤྱི་ལ་ཕན་མ་ཐོག་ནའང་གནོད་མ་སྐྱེད་པ་ཞིག་བྱུང་ན་སྒྲིག་ལེ་རེད།
ཚན་རིག་སློབས་ཤིག རིག་གནས་སྦྱོངས་ཤིག
གདན་སའི་སློབ་གཉེར་ལམ་ལུགས་དང་ཁྲིམས་ལུགས་རྣམས་དུས་རབས་ཀྱི་རྗེས་ཟིན་པར་བརྐྱང་བསྐུམ་དགོས་པ་ལས་གདོད་མ་བཞིན་མཁྲེགས་ན་རྗེས་ལུས་སུ་མཐོང་།
དགེ་བཤེས་ལྷ་རམས་སྟོང་ཕྲག་མང་པོའི་ནང་ནས་དུས་དང་མཐུན་པའི་འགྲོ་མི་་ཡོངས་ལ་ཕན་གྲོགས་དང་། བོད་ཀྱི་ནང་དོན་རིག་པའི་ལ་རྒྱ་བཟུང་ཐུབ་མཁན་ནི། ཚན་འཕྲུལ་དང་ཕྱི་ནང་སྐད་ཡིག་ཤེས་པ་ཁོ་ན་དག་ཡིན་པར་འདོད་དོ།།
འགྱུར་བ་ཛ་དྲག་ཅིག་ངེས་པར་དགོས་པར་སེམས། གདན་སའི་གྲྭ་པ་ཕྱི་རྒྱལ་དུ་ཤོར་ཏེ་ལོག་འགྲོ་བ་ཡང་ཕུག་རྩ་གཅིག་་འདི་རང་ལ་ཐུག་ནས་ཡོད་དོ།།། ནོར་མེད་དོ།། ནང་མོལ་ཡིན་ཏོ།།
དཔེ་མི་སྲིད་པའི་ཡག་པོ་འདུག མངོན་ར་བསྟོད་དོ།།
ཤེས་བློས་དྲེངས་པའི་སྨོན་ལམ་དེ་གཉིས་སྒྲུབ་ཀྱི་ཡིན་ནམ། ཡང་ན་ཁ་ནས་འདོན་པའི་སྨོན་ཚིག་ཙམ་དུ་འཇོག་རྒྱུ་ཨེ་ཡིན་དེ་རེད། ཟམ་གདོང་ཚང་གི་གསུང་ལ་གོ་བླངས་ཚུལ་ཡང་དག་རེད།
འཇིག་རྟེན་སྐྱེ་འགྲོ་ཀུན་པོ་ལུས་བདེ་སེམས་སྐྱིད་ཅིག་ཏུ་འཁོད་འདོད་ན་ནང་ཆོས་དང་ཚན་རིག་ཟུང་འབྲེལ་དགོས་པ་རེད་དམ་མ་རེད་ཐད་ནས་བསམ་བློ་བཏངས་ན། དཔྱད་དོན་ངོ་མ་དེ་རྙེད་ཐུབ་ངེས་རེད་སྙམས་སོ།།
དངོས་གནས་གནད་ལ་འཁེལ་བ་ཞིག་བཤད་འདུག དུས་ད་ལྟའང་ང་ཚོར་༧གོང་ས་མཆོག་ལ་ཡིད་ཆེས་གཙང་མ་ཡོད་པའི་དགོན་སྡེའི་དབུ་ཁྲིད་ཅིག་བྱུང་མ་ཐུབ་པ་ཅི་ཡིན་ནམ།
རྒྱབ་སྐྱོར་ཡོད།
རང་ཉིད་ཤེས་རྒྱ་ཆུང་བས་ཡིན་ནམ་མི་ཤེས་ཀྱང་སུས་བཤད་ནའང་བདེན་པ་འདྲ་ཞིག་མཐོང་གི་འདུག འོན་ཀྱང་ཟམ་གདོང་རིན་པོ་ཆེ་ནི་ཁོང་དང་ཁོང་གི་ཆོས་ལས་གཞན་ལ་ཡོན་ཏན་ཏུ་གཏན་ནས་མཐོང་མཁན་ཞིག་མིན་པས་ཚན་རིག་གི་ལྟ་གྲུབ་ཙམ་དུ་མ་ཟད་ཚན་རིག་གི་བྱེད་ལས་སོགས་ཡོངས་སུ་རྫོགས་པར་ངན་སྣ་དགུ་འཛོམས་སུ་མཐོང་བཞིན་ཡོད་པས་དེར་འགལ་སྤོང་ཇི་ལྟར་བྱེད། རང་རིགས་སྤུན་ཟླ་འབུམ་ཕྲག་མང་པོས་ཚེ་སྲོག་བཅོམ་ཞིང་རྩ་བའི་བླ་མ་རྒྱང་ཕུད་བཏང་སྟེ་སྣོད་བཅུད་ཡོངས་ཁྱུར་མིད་གཏོང་མཁན་རྒྱ་འདྲེ་གུང་ཁྲན་ལ་་ཀྲུང་ཧ་མི་དམངས་སྤྱི་མཐུན་ཟེར་ནས་མི་ཚེར་གད་མོ་ཤོར་ནས་སོ་ཕྱིར་མངོན་མ་མྱོང་བ་ཞིག་ཅུང་ཟད་མངོན་ཡོང་བཞིན་འདུག་ལ། གཙན་བྱོལ་བའི་གཞུང་གྲོན་ཕལ་མོ་ཆེ་ནུབ་ཕྱོགས་ཀྱི་ཡུལ་གྲུའི་གཞུང་དང་ཚོགས་སྒེར་སོགས་ལ་བརྟེན་ཡོད་ཀྱང་ནུབ་ཕྱོགས་པར་ལེགས་བྱང་ཟེར་བ་ཞིག་མེད་རབས་དང་ཚན་རིག་པ་འདི་ཆེས་བླུན་རབས་སོགས་ཚིག་གི་རྡོ་ཆར་འབེབས་སྟངས་འདིར་གཞིགས་ན་ཟམ་གདོང་འདི་བར་མི་ཆོས་ཀུན་སྤྱོད་ཀྱི་སློབ་གསོ་གཏན་ནས་མེད་པ་འདྲ་ཞིག་རེད།
དངོས་གནས་གནད་ལ་འཁེལ་བ་ཞིག་བཤད་འདུག་རྒྱབ་སྐྱོར་ཡོད། དུས་ད་ལྟའང་ང་ཚོར་༧གོང་ས་མཆོག་ལ་ཡིད་ཆེས་གཙང་མ་ཡོད་པའི་དགོན་སྡེའི་དབུ་ཁྲིད་ཅིག་ཅིའི་ཕྱིར་བྱུང་མ་ཐུབ་པ་ཡིན་ནམ།
རྩོམ་བྱང་གིས་འུར་བརྒྱབ་པ་མ་གཏོགས། ཅི་ཡང་ཤོད་མི་འདུག ཡར་དྲུད་མར་དྲུད་ཀྱི་མཐུན་ཐབས་སྨྲ་བ་ཙམ་རེད། ནང་པ་ཚོས་ནང་བསྟན་ཡང་དག་ཏུ་འཛིན་པའི་འདུ་ཤེས་དེ་མ་དོར་བའི་བར་དུ། དུས་ནམ་ཡང་ཚན་རིག་དང་མཐུན་ཐབས་མེད་དོ། དེ་གཅིག་ཡིན། གལ་སྲིད་དངོས་དོན་གྲྭ་བ་རྣམས་ཀྱིས་ཚན་རིག་སྦྱོང་བའི་ལམ་ཁར་ཕྱོགས་རྒྱུ་བདེན་པ་ཡིན་ན། གདམ་ས་ཁག་ནང་སློབ་ཆུང་བའི་གྲངས་རྩིས་ནས། དམའ་འབྲིང་གི་རྩིས་དངོས་རྫས་གསུམ་དང་། མཐོ་འབྲིང་གི་དབྱིབས་རྩིས་དང་ཚབས་རྩིས་སོགས་ཚན་རིག་གི་རིག་པའི་འགྲོས་ལ་འགྲེལ་བཤད་སྐྱོན་བྱེད་རྨང་གཞིའི་ཤེས་བྱ་དག་སྦྱང་དགོས་སོ། འདི་གཉིས་ཡིན། ས་སྒང་འདིའི་སྟེང་ཆེ་བ་ཉ་སྲིན་ནས་ཆུང་བ་སྲིན་འབུ་ཡན་ཆན་གྱི་སྲོག་ལྡན་ཀུན་གྱི་ཚོར་བ་དང་འདུ་ཤེས་མཐའ་དག་འགྲོ་བ་མི་ཁོ་ནའི་ཚོར་འདུའི་ཁབ་མིག་ལ་དྲངས་ཏེ་སྡོམ་རྒྱག་པ་དང་། འགྲོ་མི་ཁོ་ནའི་མཐོང་སྣང་འདུ་ཤེས་ཀྱིས་བདེན་རྫུན་ཡིན་མིན་ཁ་ཚོན་གཅོད་པ་དེ་ནི་འགྲོ་བ་མིའི་རིགས་ཀྱི་ཆོས་ལུགས་རིག་པ་རྣམས་གཙོས་མིའི་རིག་གནས་ཀྱི་ནག་ཉེས་ཆེ་ཤོས་དེ་རེད། འདི་གསུམ་ཡིན། འདས་ནས་ད་ལྟའི་བར་ངོ་ལེབ་རྐང་གཉིས་པ་འགྲོ་བ་མིའི་རིགས་ཀྱི་རྣམ་དཔྱོད་ཀྱིས་བརྡར་ཤ་བཅད་པ་མཐའ་དག་ནི་ཡང་དག་བདེན་པ་ཞིག་མ་ཡིན་པ་དང་། རང་བྱུང་ཁམས་ཆེན་པོའི་འཕྲོད་སྦྱོར་རང་འགྲོས་དང་མཐུན་པ་ཞིག་མིན་པ་དེ་ནི། དེང་གི་དུས་རབས་གསར་བར་འབོད་པའི་ད་ལྟའི་གནས་སྐབས་འདིར་ངོ་ལེབ་རྐང་གཉིས་པ་འགྲོ་བ་མི་ཡོངས་རྫོགས་སྔར་ལས་ལྷག་པར་རང་ཉེས་དཀའ་ངལ་དང་ཉེན་ཁའི་འཇིགས་པའི་བཙུར་ཏེ་ཀི་འདེབས་ངུ་འཆོར་གྱི་གནས་སུ་ལྷུང་ཡོད་པ་འདིས་གསལ་བར་བསྟན་ཡོད་དོ། འདི་བཞི་ཡིན། གལ་དེ་ངོ་ལེབ་རྐང་པ་འགྲོ་བ་མི་དག་གིས་རང་ཉིད་རླབས་ཆེན་དང་རིན་ཐང་ཡོད་ཚད་ཀྱི་ཚད་གཞིར་བརྩིས་ནས་དེང་གི་བར་སླེབས་ཡོད་མོད། དོན་གྱིས་ངོ་ལེབ་རྐང་གཉིས་པ་འགྲོ་བ་མི་རུ་འབོད་པ་འདི་དག་སྒང་འདིར་འབུས་བ་ནས་བཟུང་། རང་བྱུང་ཁམས་ཆེན་པའི་རང་འགྲོས་ཆོས་ཉིད་ལ་མཐའ་གཅིག་ཏུ་གཏོར་རྒོལ་ཁོ་ནའི་ལས་ལ་གཞོལ་ཏེ་འོང་ཡོད་སྟབས། ས་སྒང་འདིའི་རི་ཆུ་ནགས་གསུམ་གྱི་མཛེས་ཉམས་ཤོར་ཞིང་། སྐྱེ་འགྲོ་མཐའ་དག་གི་རིགས་དང་གྲངས་སྟོངས་ཡོད། ད་ནས་བཟུང་། ས་སྒང་སྲིད་པ་འདི་ཆགས་པའི་ཚུན་ཆད་ནས་སྐྱེ་འགྲོ་ཀུན་གྱི་ཨ་མའི་བྲང་གཞུང་དང་མཚུངས་བའི་རང་བྱུང་ཁམས་ཆེན་པོའི་སྣོད་བཅུད་ཡོད་ཚད་རྩ་གཏོར་དུ་གཏོང་མཁན་གྱི་འདྲེ་དང་བདུད། སྲིན་པོ། སྒེར་གཅོད་པ། དབང་སྒྱུར་བ། བཙན་འཛུལ་བ། གཏོར་རྒོལ་བ། དྲག་སྤྱོད་པ་སྟེ། ཐ་སྙད་འདི་དག་གི་འཇུག་ཡུལ་ངོ་མ་ནི་ངོ་ལེབ་རྐང་གཉིས་པ་འགྲོ་མི་འདི་ཡིན་པ་ངེས་ལེན་དགོས། དེ་བཞིན་དུ། མི་རུ་སྐྱེ་བ་འདི་རླབས་ཆེན་ཞིག་ཡིན་མིན་གྱ་ཐེ་ཚོམས་དང་དོགས་སློང་གི་དྲི་བ་ཆེན་པོ་ཞིག་ཡོད་པའི་ཐོག་ནས། གོང་གི་ཐ་སྙད་འདི་དག་འཇུག་ཡུལ་ལས་ཐར་རྒྱུར་འབད་དགོས་པ་ནི། དུས་ཀྱི་རླབས་རྩེ་ནས་དྲག་ཏུ་འཕྱོ་བཞིན་པའི་མིའི་རིགས་ཀྱི་འགན་འཁྲི་དག་རེད།
ནང་ཆོས་དང་ཚན་རིག་གཉིས་ནི་དེང་འཛམ་གླིང་དེའི་ནང་འགྲོ་བ་གཙོ་བྱས་པར་ཕན་ཐོག་མི་ཉུང་བ་ཞིག་ཡོང་མུས་ལ་དེ་གཉིས་ཀྱིས་མི་མཐུན་འགལ་བརྡ་ཡང་ལྟག་སྤྲོད་ཡིན་ལ་རིག་པའི་དཔྱད་པ་བྱེད་ཚུལ་འདྲ་བའི་ཆ་མང་། ཡིན་ནའང་ཁྱེད་ནས་གསུངས་པའི་གཤམ་གཏམ་འདི་ནི་༼མགོ་འཛུགས་ཀྱིས་ཁོང་གི་མདུན་ནས་ལེགས་ཕྱོགས་རྐྱང་རྐྱང་གི་འགྲེལ་བཤད་བྱེད་པའི་སྲོལ་རྒྱུན་འདིའི་རྒྱུ་བ་ཧ་ཅང་མཐུག་པ་འདིའོ།། འདི་ནི་གོ་བདེ་བར་བརྗོད་ན་༸གོང་ས་མཆོག་དབུ་སྐོར་བཏང་བ་དང་སེམས་ནང་གི་༸གོང་ས་མཆོག་གི་རིན་ཐང་འགྲེལ་བཤད་བྱས་པའོ༽ དེ་ཚོ་དགོན་པ་མ་ཡིན་བཙན་བྱོལ་གི་ཚོགས་པ་ཆེ་ཆུང་ཚང་མའི་ནང་ཡོད་པས་གུས་ནི་དེ་སྔ་ནས་ཡིད་མུག་བཞིན་ཡོད་དོ།
དོན་དངོས་རང་རེད་ཡག་པོ་གསུང་འདུག་དེ་དེ་བཞིན་རེད་རྒྱབ་སྐྱོར་ཡོད།