ཨི་ཇིབ་ཀྱི་དམངས་གཙོའི་སྲིད་འཛིན་དང་པོ་བདམས་ཐོན་བྱུང་།

ལོ་ ༧༠༠༠ རྗེས་སུ་ཨི་ཇིབ་ནང་དམངས་གཙོའི་སྲིད་འཛིན་ཐོག་མ་དེ་བདམས་ཐོན་བྱུང་སྟེ། ཨ་རབ་གླིང་གི་རྒྱལ་ཁབ་ཆེ་ཤོས་ཤིག་དམངས་གཙོའི་ཕྱོགས་སུ་སྐྱོད་པ་དེས་གླིང་དེར་ཤུགས་རྐྱེན་ཐེབས་ཐུབ་པར་ཨ་རི་གཙོས་ནུབ་ཕྱོགས་པས་དོ་སྣང་ཆེན་པོ་བྱེད་ཀྱི་ཡོད།

ཟླ་འདིའི་ཕྱི་ཚེས་ ༢༤ ཉིན་ཨི་ཇིབ་རྒྱལ་ཡོངས་འོས་བསྡུ་ལྷན་ཁང་གིས་ཕྱི་ཚེས་  ༡༧ ཉིན་གྱི་སྲིད་འཛིན་འོས་བསྡུའི་གྲུབ་འབྲས་ཁྲོད། ཨི་ཇིབ་མཁའ་དམག་གི་དམག་དཔོན་དང་མཱུ་བྷ་རག་སྲིད་དབང་སྐབས་ཀྱི་སྲིད་བློན་ཤཱ་ཧྥེག་(Ahmed Shafiq) ལ་འོས་གྲངས་བརྒྱ་ཆ་ ༤༨ རག་དང་། ཁ་ཆེ་སྤུན་ཟླ་ཚོགས་པའི་(Muslim Brotherhood )འོས་མི་མཱོར་སེ་(Mohamed Morsi) ལ་འོས་གྲངས་བརྒྱ་ཆ་ ༥༢ རག་སྟེ། ཨི་ཇིབ་སྲིད་འཛིན་གྱི་རྒྱལ་ཁ་ཁོང་ལ་ཐོབ་ཡོད་པའི་ཁྱབ་བསྒྲགས་བྱས་པར། རྒྱལ་སྤྱིའི་ཆབ་སྲིད་མགོ་ཁྲིད་ཚོས་ཨི་ཇིབ་དམངས་གཙོའི་བཅོས་སྒྱུར་ལ་བསྔགས་བརྗོད་དང་སྲིད་འཛིན་གསར་པར་འཚམས་འདྲི་ཞུས་ཡོད་འདུག

སི་ཨན་ཨན་གསར་ཁང་གིས་ཨི་ཇིབ་མང་ཚོགས་ཀྱི་བསམ་ཚུལ་བསྡུས་སྐབས་ཌར་ཌེ་རེ་(Abdul MawgoudDardery) ཟེར་པ་ཞིག་གིས་ “ང་ཚོ་ཨི་ཇིབ་མི་མང་གིས་ལོ་ ༧༠༠༠ རིང་། དེ་རིང་གི་ཉིན་མོ་འདིར་སྒུག་བསྡད་པ་རེད། ང་ཚོའི་ལོ་རྒྱུས་ནང་ཐེངས་དང་པོར་ང་ཚོར་སོ་སོས་བདམས་པའི་སྲིད་འཛིན་ཞིག་བྱུང་ཡོད”ཅེས་བརྗོད་འདུག མཱོར་སེར་སྲིད་འཛིན་གྱི་རྒྱལ་ཁ་ཐོབ་པའི་ཁྱབ་བསྒྲགས་བྱས་འཕྲལ་ཁ་ཆེ་སྤུན་ཟླ་ཚོགས་པའི་ཕྱོགས་གཏོགས་པ་སྟོང་ཕྲག་མང་པོ་རྒྱལ་ས་ཁཱའེ་རོ་(Cairo) གྲོང་ཁྱེར་ནང་ཐོན་ཏེ་དར་ཆ་བསྒྲེངས་པ་དང་མཱོར་སེ་ལ་རྒྱལ་སྐྱོར་མཚོན་པའི་སྐད་འབོད་སོགས་དགའ་སྟོན་གྱི་རྣམ་འགྱུར་ཤུགས་ཆེན་བསྟན་ཡོད་པ་མ་ཟད། དམག་མིའི་དབང་ཤུགས་མཇུག་སྒྲིལ་དགོས་པའི་འབོད་སྒྲའང་གང་སར་བསྒྲགས་ཡོད་འདུག

གཟའ་ཉི་མའི་ཉིན་གྱི་སྲིད་འཛིན་འོས་བསྡུའི་གྲུབ་འབྲས་ཁྱབ་བསྒྲགས་མ་བྱས་གོང་ཨི་ཇིབ་གཞུང་གིས་བདེ་འཇགས་དམག་མི་གང་སར་འགྲེམས་འཇོག་བྱས་ཡོད་ཅིང་། སྲིད་འཛིན་འོས་བསྡུའི་གྲུབ་འབྲས་ཐད་རྩོད་རྙོག་རིགས་བྱུང་ཚེ་དྲག་གནོན་བྱ་རྒྱུ་དང་། རྒྱལ་ཡོངས་ནང་མྱུར་སྐྱོབ་སྨན་སྤྱོད་རླངས་འཁོར་(ambulance) ༡༨༠༠ ལྷག་གྲ་སྒྲིག་བྱས་ཡོད་ཚུལ་ཡང་བརྗོད་འདུག སྐབས་དེར་ཡུལ་མི་དཀྱིས་མ་ཚོ་ཟིང་འཁྲུག་འབྱུང་པར་ཞེད་སྣང་གིས་ཁྱིམ་ནས་ཕྱིར་འཐོན་མེད་པ་དང་། དམག་འཐབ་གནམ་གྲུ་འགའ་གྲོང་ཁྱེར་གྱི་མཁའ་དབྱིངས་སུ་སྐོར་བ་རྒྱག་བཞིན་བསྡད་ཡོད་འདུག

མཱོར་སེ་ལ་སྲིད་འཛིན་འོས་བསྡུའི་རྒྱལ་ཁ་ཐོབ་པའི་ཁྱབ་བསྒྲགས་བྱས་རྗེས་ཁོང་གིས་གཏམ་བཤད་ཅིག་སྤེལ་ཏེ། ཁོང་གིས་རྒྱལ་ནང་དང་རྒྱལ་སྤྱིའིོ་གྲོས་དོན་ཚང་མར་བརྩི་འཇོག་བྱ་རྒྱུ་ཡིན་པ། དམིགས་བསལ་ཨི་ཇིབ་རྒྱལ་ནང་གི་བུད་མེད་དང་བྱིས་པའི་ཐོབ་ཐང་ལ་སྲུང་སྐྱོབ། དེ་བཞིན་ཁ་ཆེ་བ་དང་ཡེ་ཤུ་བའི་བར་དབྱེ་འབྱེད་མེད་པར་ལྟ་སྟངས་གཅིག་མཚུངས་འཛིན་རྒྱུའི་དམ་བཅའ། ཆོས་ལུགས་ཁག་དང་ཆབ་སྲིད་ཚོགས་ཁག མི་མང་བཅས་ཚང་མ་ཆིག་སྒྲིལ་འོག་ནུས་ཤུགས་མཉམ་དུ་སྤུངས་རྒྱུ་གལ་ཆེན་པོ་ཡིན་པ། རྒྱལ་ཁོངས་ཆིག་སྒྲིལ་བྱ་རྒྱུ་དེ་ཨི་ཇིབ་བསྐྱར་གསོ་ཐུབ་པའི་ལམ་ཁ་ཉག་ཅིག་ཡིན་པར་བརྗོད་ཡོད་པ་དང་། ཡང་ཁོང་གིས་ “ད་ལྟའི་དམག་དོན་ལྷན་ཁང་གིས་ཨི་ཇིབ་མི་མང་གི་འདོད་འདུན་ལ་བརྩི་བཀུར་བྱས་ཚེ་ང་ཚོ་ཚང་མས་མཉམ་ལས་བྱ་ཐུབ་ངེས། དེ་མིན་དམག་དོན་ལྷན་ཁང་(the Supreme Council of the Armed Forces  ) གིས་ད་ཆར་མུ་བྷ་རཱག་(Hosni Mubarak) གི་གནས་བབ་གང་འདྲ་ཡིན་མིན་གསལ་བོ་ཤེས་ཀྱི་ཡོད་ངེས”ཞེས་ཉེན་བརྡ་ཡང་བཏང་ཡོད།

མཱོར་སེ་ལ་སྲིད་འཛིན་ཐོབ་མ་ཐག་ཁ་ཆེ་སྤུན་ཟླ་ཚོགས་པ་ནས་དགོངས་ཞུ་བྱས་ཏེ་རང་ཉིད་ཚོགས་པ་དང་ལྟ་གྲུབ་བྱེ་བྲག་པ་གང་གི་ཤུགས་རྐྱེན་འོག་མ་སོང་པར་དམངས་གཙོ་དང་འདྲ་མཉམ། ཆིག་སྒྲིལ་བཅས་གཞི་རྩར་བཟུང་སྟེ་ཨི་ཇིབ་མང་ཚོགས་ཀྱི་ཚབ་མཚོན་རང་བཞིན་གྱི་སྲིད་འཛིན་ཞིག་བྱ་རྒྱུ་ཡིན་པའི་ཁས་ལེན་བྱས་ཏེ། “ང་ཚོ་ཁ་ཆེ་དང་ཡེ་ཤུ་གང་ཡིན་ཡང་ཚང་མ་ཨི་ཇིབ་པ་ཡིན་པས། རྒྱལ་ཁོངས་ཆིག་སྒྲིལ་ལ་རྒོལ་བའི་བྱ་སྤྱོད་ངན་པའི་རིགས་ལ་ང་ཚོ་མཉམ་འབྲེལ་གྱི་གདོང་ལེན་བྱ་དགོས་”ཞེས་གཏམ་བཤད་སྤེལ་ཡོད་ཀྱང་། ཆབ་སྲིད་དཔྱད་བརྗོད་པ་དག་གིས་མཱོར་སེ་ནི་ལོ་མང་པོའི་རིང་ནས་ཁ་ཆེ་སྤུན་ཟླ་ཚོགས་པའི་ཁོངས་མི་ཡིན་པ་མ་ཟད། སྲིད་འཛིན་འོས་བསྡུའི་སྤུན་ཟླ་ཚོགས་པའི་ལམ་སྟོན་ཆོག་མཆན་མེད་པར་མཱོར་སེ་རང་ངོས་ནས་ཐག་གཅོད་བྱས་མྱོང་མེད་པ་བཅས་ལ་བརྟེན། ཁོང་གི་སྲིད་ཇུས་འཛིན་ཕྱོགས་ཐོག་ཁ་ཆེ་སྤུན་ཟླ་ཚོགས་པའི་ཤུགས་རྐྱེན་མི་ཡོང་པའི་ངེས་པ་མེད་ཚུལ་གླེང་། ཁ་ཆེ་སྤུན་ཚོགས་པས་གཞུང་གི་རྩ་ཁྲིམས་ཁ་ཆེ་ཆོས་ལུགས་ཀྱི་དགོངས་དོན་གཞིར་བཟུང་གཏན་འབེབ་བྱ་རྒྱུར་རྩོད་ལེན་བྱེད་ཀྱི་ཡོད་འདུག

ཨི་ཇིབ་ནི་ཨ་རབ་གླིང་གི་ཨ་རིའི་མཐུན་ཕྱོགས་རྒྱལ་ཁབ་ཡིན་ཞིང་། འདས་པའི་ལོ་མང་རིང་ཨ་རིའི་གཞུང་གིས་ཨ་སྒོར་ཐེར་འབུམ་ ༡།༣ རོགས་དངུལ་སྤྲོད་བཞིན་ཡོད་འདུག ཨི་ཇིབ་ཀྱི་སྲིད་འཛིན་གསར་པ་ཁྱབ་བསྒྲགས་བྱས་ཉིན་ཨོ་བྷ་མས་ཁ་པར་བརྒྱུད་མཱོར་སེ་ལ་སྲིད་འཛིན་འོས་བསྡུའི་རྒྱལ་ཁ་ཐོབ་པར་འཚམས་འདྲི་དང་ཨི་ཇིབ་ཀྱི་དམངས་གཙོའི་བཅོས་སྒྱུར་ལ་རྒྱབ་སྐྱོར་བྱ་རྒྱུའི་དམ་བཅའ་ཡོད་ཚུལ་བརྗོད་ཡོད་ལ། ཕོ་བྲང་དཀར་པོས་བསྒྲགས་གཏམ་ཞིག་སྤེལ་ཏེ། ཨི་ཇིབ་ནི་ཨ་རབ་གླིང་གི་ཞི་བདེ་དར་སྤེལ་གྱི་ཀ་བ་ཞིག་བྱ་རྒྱུ། འབྱུང་འགྱུར་ཨི་ཇིབ་དམངས་གཙོའི་གཞུང་དང་ཨ་རི་ཕྱོགས་གཉིས་ཀྱིས་མཉམ་ལས་བྱ་དགོས་པ་བཅས་ཀྱི་སྐོར་བརྗོད་ཡོད་པ་རེད།

ཐེངས་འདིའི་ཨི་ཇིབ་དམངས་གཙོའི་སྲིད་འཛིན་འོས་འདེམ་དང་འབྲེལ་ཏེ་དུས་ཡུན་རིང་པོ་ནས་ཡོད་པའི་ཨི་ཇིབ་དང་ཨེ་ཛི་རལ་(Egupt-Israel) བར་གྱི་དམག་འཁྲུག་གང་འདྲ་ཆགས་མིན་ཐད། རྒྱལ་སྤྱིའི་སྤྱི་ཚོགས་ཀྱིས་དོ་སྣང་ཆེན་པོ་བྱེད་བཞིན་ཡོད་པ་དང་། སྲིད་འཛིན་གསར་པ་མཱོར་སེ་ཡིས་དེ་སྔོན་ཨེ་ཛི་རལ་གྱི་དཔོན་རིགས་ཚོ་ཁྲག་འཐུང་སྲིན་པོ་(Vampires) ཡིན་ཚུལ་བརྗོད་མྱོང་ཡོད་ཀྱང་། སྲིད་འཛིན་འོས་བསྡུའི་ཁྱབ་བསྒྲགས་སྐབས་ཁོང་གིས་ ༡༩༧༩ ལོར་ཨི་ཇིབ་དང་ཨེ་ཛི་རལ་བར་བཞག་པའི་ཞི་འགྲིག་ཆིངས་ཡིག་ལ་བརྩི་མཐོང་ཡོད་ཚུལ་ཡང་བརྗོད་ཡོད། སྲིད་འཛིན་རྒྱལ་ཁ་ཐོབ་རྗེས་ཨི་ཇིབ་དང་ཨེ་ཛི་རལ་གྱི་གནད་དོན་སྐོར་ལ་སྐད་ཆ་གང་ཡང་བཤད་མེད་ཀྱང་། མཱོར་སེ་ལ་སྲིད་འཛིན་རྒྱལ་ཁ་ཐོབ་འཕྲལ་ཨེ་ཛི་རལ་གྱི་སྲིད་བློན་བྷན་ཇཱ་མེན་(Benjamin Netanyahu) ཨི་ཇིབ་ཀྱི་དམངས་གཙོའི་འཕོ་འགྱུར་ལ་བསྔགས་བརྗོད་དང་སྲིད་འཛིན་འོས་བསྡུའི་གྲུབ་འབྲས་ལ་བརྩི་མཐོང་ཡོད་ཚུལ། ཨེ་ཛི་རལ་ངོས་ནས་རྒྱལ་ཁབ་གཉིས་བར་གྱི་ཞི་འགྲིག་ཆིངས་དོན་རྨང་གཞིར་བཟུང་སྟེ། ཨི་ཇིབ་གཞུང་དང་ཞི་འགྲིག་འབྲེལ་ལམ་རྒྱུན་འཁྱོང་གོང་འཕེལ་གཏོང་རྒྱུར་རེ་ལྟོས་བྱེད་ཀྱི་ཡོད་པ་དང་། དེ་ནི་ཕྱོགས་གཉིས་ཀྱི་མང་ཚོགས་ཚོའི་འདོད་མོས་དང་རྒྱལ་ཁོངས་བརྟན་བརླིང་ཡོང་ཐབས་ཤིག་ཡིན་པར་བརྗོད་འདུག

ལོ་སྔོན་མའི་ནང་ཨི་ཇིབ་མི་མང་གིས་གསར་བརྗེ་གྱེན་ལངས་བྱས་ཏེ་ལོ་ ༣༠ ལྷག་རིང་སྲིད་དབང་སྒེར་འཛིན་བྱེད་མཁན་མཱུ་བྷ་རཱག་(Hosni Mubarak) གནས་དབྱུང་བཏང་རྗེས་ཁོང་ཚེ་བཙོན་དུ་བཅུག་ཡོད། མཱུ་བྷ་རཱག་གི་སྲིད་དབང་ཤོར་རྗེས་སྐབས་དེའི་དམག་དོན་ལྷན་ཁང་གིས་བར་བརྒལ་གཞུང་བཟུང་སྟེ་དམངས་གཙོ་བཅོས་སྒྱུར་དང་རྩ་ཁྲིམས་གཏན་འབེབས། རྒྱལ་ཡོངས་འོས་བསྡུ་སོགས་ཀྱི་ལས་འགན་ཁུར་ཐོག དམངས་གཙོའི་གཞུང་གསར་པ་ཚུགས་རྗེས་དམག་དོན་ལྷན་ཁང་གིས་དབང་ཚད་ཡོངས་རྫོགས་གཞུང་གསར་པར་རྩིས་སྤྲོད་བྱ་རྒྱུ་བྱས་ཡོད་ཀྱང་། ད་ཆར་ཨི་ཇིབ་མི་མང་དང་རྒྱལ་སྤྱིའི་སྤྱི་ཚོགས་ཁྲོད་དོགས་གཞི་ཆེན་པོ་ཞིག་ཡོང་བཞིན་པ་ནི། དམག་དོན་ལྷན་ཁང་གིས་ཕྱི་ཚུལ་ནས་སྲིད་འཛིན་འོས་བསྡུ་བྱས་ཡོད་ཀྱང་། དབང་ཆ་གཙོ་བོ་ཁོ་ཚོའི་སྟངས་འཛིན་འོག་གནས་མིན་དེ་རེད།

ཨི་ཇིབ་རྒྱལ་ས་ཁཱའེ་རོ་(Cairo) ནང་ཡོད་པའི་ཨ་རིའི་གཙུག་ལག་སློབ་ཆེན་གྱི་ལོ་རྒྱུས་པ་ཧྥ་མཱེ་(Khaled Fahmy) ཡིས་སྔ་ལོའི་གསར་བརྗེ་གྱེན་ལངས་ཀྱིས་སྲིད་དབང་སྒེར་འཛིན་པ་མུ་བྷ་རཱག་གནས་དབྱུང་བཏང་རྗེས་ཨི་ཇིབ་མི་མང་གིས་མཐའ་མའི་རྒྱལ་ཁ་ཐོབ་སྟེ་གསར་བརྗེ་མཇུག་བསྒྲིལ་བ་རེད་བསམ་ཡོད་ཀྱང་། དངོས་ཡོད་སྟེང་གསར་བརྗེ་མཇུག་སྒྲིལ་རྒྱུར་ད་དུང་རྒྱང་ཐག་རིང་པ་དང་། ཨི་ཇིབ་མང་ཚོགས་ཀྱི་དགོས་འདུན་ལ་ད་སྔ་འདོད་བློ་ཁེངས་པའི་ལན་ཞིག་བྱུང་མེད་པ་མ་ཟད། འདི་ལོའི་ལོ་སྟོད་དུ་མི་མང་གིས་འོས་འདེམ་བྱས་པའི་གྲོས་ཚོགས་དེ་ཡང་དམག་དོན་ལྷན་ཁང་གིས་རྩ་གཏོར་བཏང་སྟེ། སྲིད་འཛིན་གསར་པ་འོས་འདེམ་བྱུང་རྗེས་སྲིད་འཛིན་གྱིས་གྲོས་ཚོགས་འཐུས་མིའི་འོས་བསྡུའི་དུས་ཚུགས་གཏན་འབེབས་དང་། གཞུང་གི་ལས་བྱེད་དང་གཞུང་ཚབ་བསྐོ་བཞག་གི་དབང་ཚད་ཡོད་ཚུལ་བསྒྲགས་ཀྱང་། ཁྲིམས་བཟོ་དང་ནོར་སྲིད་གཉིས་ཀྱི་དབང་ཤུགས་དམག་དོན་ལྷན་ཁང་གིས་བཟུང་ཡོད་པ་དེས། གཞུང་གི་འཛིན་སྐྱོང་ནུས་མེད་ཆགས་རྒྱུ་ཡིན་ཚུལ་བརྗོད་ཡོད།

དམག་དོན་ལྷན་ཁང་གི་བསྒྲགས་གཏམ་ཞིག་གི་ནང་གཞུང་གསར་པ་བསླེབ་རྗེས་དམག་དོན་སྐོར་གྱི་གནད་དོན་རིགས་ཡོངས་རྫོགས་དམག་དོན་ལྷན་ཁང་གིས་ཐག་གཅོད་བྱ་དགོས་པ་དང་། སྲིད་འཛིན་གྱིས་དམག་འཁྲུག་རྒྱག་རྒྱུ་ཁྱབ་བསྒྲགས་བྱ་ཆོག་ཀྱང་དེར་དམག་དོན་ལྷན་ཁང་གི་ཆོག་མཆན་འཐོབ་དགོས་པ་གསལ་ཡོད་འདུག

ཆབ་སྲིད་དཔྱད་བརྗོད་པ་ཚོས་སྲིད་འཛིན་འོས་བསྡུ་དེ་ཕྱི་ཚེས་ ༡༧ ཉིན་ཡོངས་སུ་གྲུབ་ཡོད་ཀྱང་དུས་ཐོག་གྲུབ་འབྲས་ཁྱབ་བསྒྲགས་མ་བྱས་པར་ཕྱིར་འགྱངས་བྱས་པ་ནི། དམག་དོན་ལྷན་ཁང་གིས་ཁོང་ཚོའི་ཕྱོགས་གཏོགས་འོས་མི་ཤཱ་ཧྥེག་སྲིད་འཛིན་དུ་བསླེབ་རྒྱུའི་ཇུས་ངན་འཐེན་པ་ཞིག་ཡིན་ཡང་། སྲིད་འཛིན་འོས་བསྡུ་གྲུབ་པའི་ཉིན་གཉིས་པར་ས་གནས་ཁག་གི་འོས་གྲངས་ཞིབ་བཤེར་བརྒྱུད་སྲིད་འཛིན་འོས་མི་སོ་སོའི་འོས་གྲངས་ཕྱིར་བསྒྲགས་དང་། ཁ་ཆེ་སྤུན་ཟླ་ཚོགས་པས་མཱོར་སེ་ལ་སྲིད་འཛིན་གྱི་རྒྱལ་ཐོབ་པའི་ཁྱབ་བསྒྲགས་སོགས་བྱས་རྗེས། ཨི་ཇིབ་མི་མང་གིས་འཕྲལ་དུ་བར་བརྒལ་དམག་མིའི་གཞུང་གིས་དབང་ཆ་མི་མང་གིས་འོས་འདེམས་བྱུང་པའི་སྲིད་འཛིན་ལ་རྩིས་སྤྲོད་བྱ་དགོས་པའི་ངོ་རྒོལ་ཤུགས་ཆེན་བྱས་ཤིང་། རྒྱལ་སྤྱིའི་སྤྱི་ཚོགས་ཀྱི་གནོན་ཤུགས་བཅས་ལ་རྟེན། མཐར་མཱོར་སེ་སྲིད་འཛིན་དུ་ཁྱབ་བསྒྲགས་བྱེད་དགོས་བྱུང་ཡོད་པར་གླེང་།

སྲིད་འཛིན་གསར་པ་མཱོར་སེའི་མདུན་དུ་ལྷག་པའི་དཀའ་ངལ་ཁག དམག་དོན་ལྷན་ཁང་གིས་སྲིད་འཛིན་ལ་དབང་ཆ་སྤྲོད་མིན་དང་། སྤྲོད་དགོས་བྱུང་ཡང་ཁོང་དང་མཉམ་འབྲེལ་བྱ་མིན། ཁོང་གི་ཁ་ཆེ་སྤུན་ཟླ་ཚོགས་པ་ནང་ཁུལ་དུའང་དམག་དོན་ལྷན་ཁང་ལ་ཉེ་བོ་བྱེད་མཁན་རིགས་གཅིག ཆོས་ལུགས་ཚང་མར་ལྟ་སྟངས་གཅིག་གྱུར་འཛིན་དགོས་པར་ཤུགས་གནོན་རྒྱག་མཁན་རིགས་གཅིག ཡང་ཁ་ཆེ་ཆོས་ལུགས་གཙོ་བོར་འཛིན་མཁན་གཡོན་ཕྱོགས་རིང་ལུགས་པ་སོགས་ཡོད་པ་མ་ཟད། ལྟ་བ་མཁྲེགས་འཛིན་ཅན་གྱི་ཁ་ཆེ་སྤུན་ཟླ་ཚོགས་པའི་མི་རབས་རྒན་པ་དང་གསར་བརྗེའི་བསམ་བློ་ཤུགས་ཆེན་ཡོད་པའི་མི་རབས་གསར་པ་གཉིས་ཀྱི་བར་ལྟ་བའི་འཁྱེར་ཕྱོགས་མ་མཐུན་པའི་འགལ་ཟླ་ཞིག་ཡོད་པ། ཡང་ཁོང་ཁ་ཆེ་སྤུན་ཟླ་ཚོགས་པ་ནས་དགོངས་ཞུ་བྱས་པ་ལྟར་གཞུང་གི་སྲིད་ཇུས་དང་རྩ་ཁྲིམས་གཏན་འབེབས་སོགས་ཀྱི་ནང་ཁ་ཆེ་སྤུན་ཟླ་ཚོགས་པའི་ལངས་ཕྱོགས་དང་ལྟ་གྲུབ་འོག་མ་སོང་ཚེ། ཁ་ཆེ་སྤུན་ཟླ་ཚོགས་པའི་གནོན་ཤུགས་ལ་གདོང་ལེན་བྱ་དགོས་པ། སྲིད་འཛིན་འོས་བསྡུའི་སྐབས་འོས་ཤོག་འཕེལ་མཁན་མི་མང་ས་ཡ་ ༢༥ ལྷག་ལས་ས་ཡ་ ༡༢ ལྷག་གིས་ཤཱ་ཧྥེག་ལ་འོས་འཕངས་པ་དེ་ཡང་རྒྱལ་ཁོངས་ཆིག་སྒྲིལ་ལ་འཕྲད་ངེས་པའི་དཀའ་ངལ་ཞིག་ཆགས་ངེས་ཡིན།

གསར་འགོད་པ། བནྡེ་སྐྱབས།