གསར་འགོད་པ། དོན་གོ།
ཤ་རུས་གཅིག་པའི་བོད་རིགས་སྤུན་ཟླ་རྣམ་པ། རྒྱ་ནག་གིས་ང་ཚོར་དངོས་གནས་བརྙས་བཅོས་ཚབས་ཆེན་དང་ཁྲིམས་མེད་ལུགས་མེད་བྱེད་བཞིན་ཡོད་པ་འདི་ཚང་མས་ཤེས་དགོས། ང་ཚོས་ཅིས་ཀྱང་རྡོག་རྩ་གཅིག་སྒྲིལ་བྱས་ཏེ་རྒྱ་ནག་ལ་ངོ་རྒོལ་བྱ་དགོས་ཅེས་འདས་སོང་སྐེད་རི་ཉི་མ་གྲགས་པ་ལགས་ཀྱིས་གཞིས་བྱེས་བོད་མི་ཡོངས་ལ་ཁ་ཆེམས་བཞག་ཡོད་འདུག
ཕྱི་ཚེས་ ༥ ཉིན་ང་རང་དུས་ལྟར་ལས་ཁུངས་སུ་བཅར་རྗེས་རང་གི་ཉིན་གཅིག་གི་བྱ་བའི་གོམས་སྲོལ་ལྟར་བཙན་བྱོལ་ནང་གི་དྲ་ཚིགས་གང་མང་ཞིག་བསྔོགས་པ་ཡིན་ལ། དྲ་ལམ་ཁག་ཏུ་ཡོད་པ་ནི་ནམ་རྒྱུན་མི་རྣམས་ཀྱི་སྣ་ཐོས་དང་གོམས་ལོབས་སུ་གྱུར་བའི་༧གོང་ས་མཆོག་གི་མཛད་འཕྲིན་དང་གསར་འགོད་གསལ་བསྒྲགས། བགྲོ་གླེང་། དུས་སྟོན་མཛད་སྒོ་སོགས་ལས་བོད་ནང་གི་བོད་མི་ཚོའི་བདེ་སྡུག་དང་འབྲེལ་བའི་གསར་འགྱུར་དང་ཁོར་ཡུག་འདིར་ཡོད་པའི་བཙན་བྱོལ་བོད་མི་ཚོའི་དཀའ་ངལ་དང་འབྲེལ་བའི་གསར་འགྱུར་མཐོང་ཁག་པར་གྱུར། རང་ལ་རྒྱུན་ལྡན་གྱི་འགྲོ་ལུགས་ཤིག་ཡོད་པ་ལྟར་ཉིན་གྲངས་བཅུའི་ཉིན་ལྔ་དེར་སྤྱི་ཚོགས་ཁྲོད་ཀྱི་གསར་འགྱུར་ལ་ཉམས་ཞིབ་དང་རྒྱུས་ལོན་བྱ་རྒྱུ་དེ་ཡིན་སྟབས། ཉིན་དེར་ངས་པར་ཆས་དང་སྒྲ་ལེན་འཕྲུལ་ཆས་ཁུར་ཏེ་མེག་རྒན་དུ་ཕྱིན་པ་ཡིན། ཉིན་དེར་མེག་རྒན་གྱི་མི་དམངས་དང་ཁྲོམ་སྲང་གི་རྣམ་པ་དེ་ནམ་རྒྱུན་བཞིན་བྲེལ་འཚུབ་ཡོད་མདོག་གི་རྣམ་པའི་ཁྲོད་འདུག་ནའང་། ཉེ་ཆར་ཁང་སྟོང་ལ་ལྷག་ཉེན་ཆེ་བའི་སྣེ་ལེན་ཁང་གི་སྒོ་འགྲམ་དུ་སྔོན་མ་དང་མི་འདྲ་བར་མི་མང་པོ་ཞིག་འཚང་ཁ་ཤིག་ཤིག་བྱེད་ཀྱིན་འདུག་ལ། གོ་ཚོད་ལ་བོད་ནས་མི་ ༤༠ ལྷག་འབྱོར་བའི་ཁྲོད་ནས་ ༡༥ གསོག་སྒར་སློབ་གྲྭར་གཏོང་གིན་ཡོད་ཚུལ་བརྗོད་བྱུང། ངས་ནམ་རྒྱུན་གྱི་འགྲོ་སྟངས་ལྟར་སྣེ་ལེན་ཁང་གི་ལས་བྱེད་ཟླ་བ་རྡོ་རྗེ་ལགས་སུ་སྐད་ཆ་དྲིས་པར། ཁོང་གིས་ང་ལ་ཉེ་ཆར་བོད་ནས་འབྱོར་བའི་ཆབ་སྲིད་བཙོན་པ་ཚེ་དཔལ་རྒྱལ་མཚན་ལགས་ངོ་སྤྲོད་གནང་བྱུང་།
ངེད་གཉིས་ཁོང་གི་ཉལ་ཁང་དུ་ཕྱིན་རྗེས་ཁོང་གིས་ང་ལ་བཙན་བྱོལ་དུ་ཡོང་དགོས་པའི་སྐོར་གྱི་བརྒྱུད་རིམ་འགྲེལ་བརྗོད་གནང་དོན། ང་རང་བཙན་བྱོལ་དུ་ཡོང་བ་དེ་ཧ་ཅང་བཟོད་ཐབས་བྲལ་བའི་ན་ཟུག་དང་དཀའ་ངལ་ཞིག་གི་འོག་ཏུ་ཚུད་དེ་འདིར་ཡོང་བ་ཡིན། གཙོ་བོ་དེ། ང་ལ་སྤུན་ཆུང་བ་ཞིག་ཡོད་ལ། ཁོང་སྔོན་མར་རྒྱ་གར་ཏུ་ཕྱིན་ཏེ་ལོ་མང་པོར་སློབ་གཉེར་བྱས་རྗེས་ཕྱིར་རྟའུ་ཉི་མ་མཚོ་དགོན་པར་ཞུགས་ཡོད། ཡིན་ནའང་། ཁོང་གིས་ཐེངས་མང་པོར་རྟའུ་གྲོང་བརྡལ་གྱི་དངུལ་ཁང་དང་སྲིད་གཞུང་གི་སྒོ་ཁ་སོགས་སུ་བོད་ནང་རང་དབང་མེད་པ་དང་། བོད་ལ་རང་བཙན་དགོས་ཞེས་པའི་ཡིག་ཆ་སྦྱར་བ་དང་རྗེས་སུ་ལྷ་ས་ནས་འཛིན་བཟུང་བྱས་རྗེས་ཕྱིར་རྒྱ་ནག་གི་བཙོན་ཁང་ཞིག་ཏུ་ཁྲིད་དེ་ཉིན་ ༦ རིང་གཅར་རྡུང་མནར་གཅོད་བྱས་ཏེ་རྐང་པ་གཉིས་འགྲོ་མི་ནུས་པར་བཏང་རྗེས་རྟའུ་སྤྱི་བདེ་ཉེན་རྟོག་རུ་ཁག་ལ་བསྐྱལ་བ་དང་། ཉིན་ ༡༥ ཙམ་འགོར་རྗེས་ཁོང་ལ་ལོ་ ༩ ཡི་ཁྲིམས་ཐག་བཅད་བྱུང། ཁྲིམས་ཐག་བཅད་རྗེས་ཁོང་ཐེངས་མང་པོར་ན་བ་རེད། ན་ཐེངས་རེར་བཙོན་སྲུང་དམག་མིས་ང་ཚོར་སྐད་བཏང་སྟེ་བདག་པོ་རྒྱག་དགོས་ཚུལ་བཤད་པས་ང་ཚོས་ནམ་རྒྱུན་ལྟར་ཐེངས་རེར་རྒྱ་སྒོར་ ༥༠༠ དང་ ༡༠༠༠ རེ་སྤྲད་དེ་སྨན་བཅོས་ཐེངས་མང་བྱས་ཀྱང་ཅི་ཡང་ཕན་མ་སོང།
རྗེས་སུ་ང་ཚོས་སྨན་ཁང་གཞན་ཞིག་ཏུ་འཁྲིིད་ཆེད་ཐེངས་མང་པོར་བཙོན་ཁང་ལ་སྙན་ཞུ་ཕུལ་རྗེས་སྐོར་སྲུང་དམག་མི་གཉིས་རྗེས་འདེད་ཀྱིས་དར་རྩེ་མདོའི་བཙོན་ཁང་ནས་བརྟག་དཔྱད་བྱས་པ་ཡིན་ལ། ཕྱིར་བཙོན་ཁང་དུ་བཅུག་རྗེས་ཁོང་བཙོན་ཁང་ནས་བཀྲོངས་བ་དང་བེམ་པོ་ང་ཚོར་སྤྲད་བྱུང་། སྐབས་དེའི་གནས་སྟངས་མཐའ་དག་ངའི་སེམས་ཀྱིས་མ་བཟོད་པར་ཐོག་མར་ལྷ་ས་ནས་ངའི་སྤུན་འཇུ་མཁན་གྱི་ཉེན་རྟོག་པ་ཡེ་ཤེས་ཟེར་བ་དེ་བཙལ་བ་ཡིན་ལ། ཁོ་ང་ཚོའི་ཕ་ཡུལ་ནས་ལྷ་སར་ཕྱིན་ཏེ་ངའི་སྤུན་ཆུང་བཟུང་བ་རེད། ངེད་གཉིས་ཐེངས་མང་པོར་འཛིང་རེས་བྱས་པ་དང་ངས་ཉེན་རྟོག་པའི་སྒོ་དང་སྒེའུ་ཁུང་སོགས་བཅག་པར་བརྟེན་ང་འཛིན་བཟུང་བྱ་རྒྱུ་ཡིན་ཚུལ་བརྗོད་བྱུང་། ཕ་མ་གཉིས་ཀྱིས་ང་ཕྱིར་འགྲོ་དགོས་ཚུལ་བཤད་སྟབས་ང་རང་ལྷ་སར་བྲོས་པ་ཡིན། དེ་ནས་བོད་ཀྱི་ས་ཁུལ་མང་པོར་ཕྱིན་ཏེ་གཞན་གྱི་རླངས་འཁོར་བསྐོར་ཏེ་འཚོ་བ་རོལ་ཐབས་ཙམ་ལས་ཕྱིར་རང་ཡུལ་ལ་འགྲོ་ས་མེད་པའི་གནས་སུ་བསྐྱལ་བ་དང་། སྔར་ལོའི་ཕྱི་ཟླ་ ༣ པའི་ཚེས་ ༡༢ ཉིན་ང་མངའ་རིས་ནས་ལྷ་སར་ཐོན་པ་ཡིན་ལ། ཕྱི་ཚེས་ ༡༤ ཉིན་ལྷ་ས་ནས་ངོ་རྒོལ་སྐད་འབོད་ཁྲོད་ཞུགས་པར་དམག་མིས་འཛིན་བཟུང་བྱས་ཏེ་གཅར་རྡུང་བྱས་པ་དང་། ངའི་མགོ་དང་ལག་པ་སོགས་ལ་རྨ་ཁ་ཆེན་པོ་བཟོས་པ་མ་ཟད། ང་རང་གང་དུ་སོང་བའི་གནས་སུ་རྗེས་འདེད་བྱས་ཏེ་འདུག་ཐབས་བྲལ་བས་ང་ལྐོག་ནས་ཡུལ་ལ་ཕྱིན་ཏེ་ཕ་མ་དང་བྱིས་པ་གཉིས་ལ་ཐུག་རྗེས་འདི་ལྟར་བྲོས་བྱོལ་ཏུ་ཡོང་བ་ཡིན། ཅེས་བརྗོད་བྱུང།
ཁོང་གི་མིག་མཐར་མཆི་མའི་ཁེངས་བཞིན་གནས་ཚུལ་མཐའ་དག་འགྲེལ་བརྗོད་གནང་བ་དང་མཉམ་དུ་ཁོང་གི་སྤུན་ཟླས་བཙོན་ཁང་ནས་༧གོང་ས་མཆོག་དང་བོད་མི་སྤུན་ཟླ་རྣམས་ལ་བཞག་པའི་ཁ་ཆེམས་ཡི་གེ་དང་སྤུན་ཟླ་འདས་གྲོངས་སུ་ཕྱིན་སྐབས་ཀྱི་པར་སོགས་ང་ལ་མཁོ་སྤྲོད་གནང་བྱུང་ལ། ཡི་གེ་དེའི་ཁ་བྱང་ལ་༼རེ་འབོད་སྙིང་གི་ཐིག་ལེ༽ཞེས་བྲིས་ཡོད་པ་དང་། ཡི་གེའི་ནང་འདས་སོང་ཁོང་གིས་འདི་ལྟར་བྲིས་འདུག ༧གོང་ས་སྐྱབས་མགོན་རིན་པོ་ཆེ་གཙོ་བྱས་པའི་བོད་རིགས་སྤུན་ཟླ་རྣམ་པ། བདག་ནི་ཁམས་ཁུལ་རྟའུ་རྫོང་གི་བོད་རིགས་གཞོན་ནུ་ཞིག་ཡིན་ལ། མིང་ལ་སྐེད་རིའི་ཉི་མ་གྲགས་པ་ཟེར། དེ་ཡང་ཨ་བྲ་ཆུང་ཡང་གཟུགས་གཞི་ཚང་ཞེས་པའི་དཔེ་ལྟར། ང་རང་ཤེས་རིག་ཡོན་ཏན་ལ་མངའ་བརྙེས་པའི་མཁས་པ་ཆེན་མོ་ཞིག་མིན་ལ། སྟོབས་འབྱོར་ལྡན་པའི་གྲགས་ཅན་མི་སྣ་ཞིག་ཀྱང་གཏན་ནས་མིན་མོད། རང་མི་རིགས་ལ་དགའ་ཞེན་ཚད་མེད་ཡོད་མཁན་ཞིག་ཡིན་ཏེ། ངས་རྟག་པར་ད་ལྟ་རང་གི་མི་རིགས་འདི་རྗེས་ལུས་ཡང་ལུས་ཀྱི་གནས་སུ་ལུས་ཡོད་ཚུལ་དང་། རང་ཅག་དབང་བསྒྱུར་གྲལ་རིམ་གྱི་ཁ་འོག་ཏུ་ཐ་ན་རང་གི་སྐད་ཡིག་ཀྱང་སྤྱོད་དབང་མེད་པ་སོགས་འགྲོ་བ་མིའི་ཐོབ་ཐང་ངམ་ཆབ་སྲིད་ཀྱི་དབང་ཆ་ཅི་ཡང་མེད་པའི་གནས་ཚུལ་ལ་བརྟག་དཔྱད་ཡང་ཡང་བྱས་ལ། དུས་མཚུངས་སུ་ཡང་རང་རིགས་ཀྱི་མེས་པོ་གོང་མ་རྣམས་ཀྱིས་སྲིད་དབང་བཟང་ཚུལ་དང་རྒྱལ་ཁབ་བསྐྱངས་ཚུལ་སོགས་མཚར་སྡུག་འོད་སྟོང་འབར་བའི་ལོ་རྒྱུས་མཐའ་དག་ཁོང་དུ་ཆུད་པར་བྱས་ཏེ་ལུས་སྲོག་དེ་འདོར་དགོས་ན་ཡང་མི་རིགས་འདིའི་ཆེད་དུ་འདོར་ངེས་པའི་བློ་ཐག་རྦད་དེ་བཅད་པ་ཡིན། ཞེས་དང་།
དེ་ལྟར་ངས་བཅོས་མིན་སྙིང་ནས་བོད་རིགས་མི་དམངས་ལ་རང་དབང་ཡག་པོ་ཞིག་འཐོབ་རྒྱུ་སྟེ། བོད་རང་གི་རྒྱལ་ཁབ་ཅིག་འཛུགས་རྒྱུ་བྱུང་ན་ཅི་མ་རུང་སྙམ་སྟེ་ ༡༩༩༨ ལོའི་ཟླ་ ༤ པའི་ཚེས་ ༩ དང་། ༡༩༩༩ ལོའི་ཟླ་ ༡༡ པའི་ཚེས་ ༡༠ ཉིན། ༡༩༩༩ ལོའི་ཟླ་ ༡༡ པའི་ཚེས་ ༡༩ ཉིན། ༡༩༩༩ ལོའི་ཟླ་ ༡༢ པའི་ཚེས་ ༦ ཉིན། ༡༩༩༩ ལོའི་ཟླ་ ༡༢ པའི་ཚེས་ ༢༩ ཉིན། ༢༠༠༠ ལོའི་ཟླ་ ༡ པོའི་ཚེས་ ༧ ཉིན་བཅས་ལ་རྒྱ་མི་ཚང་མ་རང་གནས་སུ་ལོག་སྟེ་བོད་རང་བཙན་བྱེད་དུ་འཇུག་དགོས། ཞེས་སྦྱར་ཡིག་མང་པོ་བྲིས་ཏེ་རྫོང་ཐོག་གི་ཁང་སྣེ་དང་གྱང་ངོས་སུ་སྦྱར་བ་མ་ཟད། སྦྱར་ཡིག་གི་མཇུག་ཏུ་འབྲི་མཁན་རང་གི་མིང་ཡང་གསལ་བོར་བྲིས་པ་ཡིན། ཡིན་ན་ཡང། བསོད་ཟད་ངས་དོན་ཅི་ཡང་མ་འགྲུབ་པར་ཚེ་སྲོག་དམར་བོ་དེ་གདུག་རྩུབ་ཆེ་བའི་རྒྱ་ནག་པོར་འཆོར་ལ་ཉེ་སྟེ། དེ་ཡང་ན་ནིང་སྤྱི་ཟླ་ ༣ པའི་ཚེས་ ༢༢ ཉིན་ཁོ་བོ་ལྷ་ས་རུ་བསྡད་ཡོད་སྐབས་རྟའུ་རྫོང་གི་སྤྱི་བདེ་མི་སྣ་ ༤ ཐོན་ཏེ་དེ་མ་ཐག་ཏུ་འཛིན་བཟུང་བྱས་པ་དང་། དང་ཐོག་སྐད་ཆ་ཚིག་གཅིག་ཀྱང་མི་འདྲི་བར་ང་རང་རྔ་རྡུང་རྡུང་བྱས་ཏེ་ཁ་ཡང་གྲགས་མི་ཐུབ་པ་ཞིག་བྱས་ལ། ཟས་ཁམ་གང་དང་ཆུ་ཐིགས་པ་ཙམ་ཡང་མི་སྟེར་བར་གནམ་གྲུར་བཞག་སྟེ་ཁྲིན་ཏུའུ་ལ་ཁྲིད། ཁྲིན་ཏུའུ་ལ་འབྱོར་རྗེས་ཡང་རྒྱ་ནག་ཉེན་རྟོག་པ་ཁ་ཤས་ལ་རྡུང་དུ་བཅུག
ཁོང་གིས་མུ་མཐུད་དུ་བརྗོད་དོན། བདུད་ནག་པོའི་སྐྱེ་བ་ཡིན་པའི་རྒྱ་ནག་པོ་ཚོས་ནི་སྙིང་རྗེ་སྤུ་ཙམ་ཡང་མེད་པའི་སྒོ་ནས་ང་རང་བརྡུང་སྟེ་འཆི་མ་གསོན་བྱས། སྐབས་དེར་ངའི་དྲན་པ་བརྒྱལ་སོང་ལ་ཕྱིར་དྲན་པ་སོས་དུས་མཚན་གྱི་ཆུ་ཚོད་ ༡༡ རེད་འདུག་ལ། ལུས་པོ་ཡོངས་རྫོགས་ན་ཞིང་གཟེར་ཏེ་འགུལ་སྐྱོད་བྱེད་མི་ཐུབ་པར་གྱུར་འདུག་པ་དང་། ལྷག་པར་དུ་རྐང་བ་ཆ་གཅིག་དེར་ཚོར་བ་གཏན་ནས་མི་འདུག རྟའུ་ལ་འབྱོར་ནས་ཉིན་བཅུའི་རྗེས་སུ་ཁོ་བོར་གཞི་ནས་འདྲི་བརྩད་བྱས་བྱུང། འོན་ཏེ། ཟུག་གཟེར་གྱི་སྡུག་བསྔལ་དྲག་པོ་འབའ་ཞིག་མྱོང་བཞིན་ཡོད་པའི་བསོད་ཟད་ངས་སེམས་གཏིང་གི་འཆར་སྒོ་ཚང་མ་ཇི་མ་ཇི་བཞིན་དུ་བཤད་དེ་སྦྱར་ཡིག་བྲིས་ཚུལ་ཁས་བླངས་པ་ཡིན། དེར་བརྟེན་ན་ནིང་ཟླ་ ༡༠ བའི་ཚེས་ ༥ ཉིན་དཀར་མཛེས་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་གིས་ང་རང་བཙོན་ཁང་དུ་ལོ་ ༩ འདུག་དགོས་པའི་ཁྲིམས་ཐག་བཅད་ཡོད། འོན་ཀྱང། ད་ལྟ་ང་རང་ནད་ཀྱིས་མནར་ཏེ་ཟས་ཁམ་གང་ཡང་ཟ་མི་ཐུབ་པར་གྱུར་ལ། རྐང་བ་ཡ་གཅིག་ཀྱང་རྒྱ་ནག་པོས་ཞ་རུ་བཅུག་ཟིན་པས་ཡུན་རིང་མི་འགོར་པར་འཆི་ངེས་མོད། ཁོ་བོ་འཆི་རྒྱུར་མི་སྐྲག་ཐག་ཆོད་ཡིན། ད་ལྟ་ཚེ་སྲོག་གི་རྒྱུན་ཆད་རན་པའི་གདོང་དམར་བ་བདག་གིས་ཞང་བོ་ཇོ་བོ་སྐྱབས་ལ་བཤད་ནའང་འདྲ། བོད་རིགས་ཀྱི་ལ་རྒྱ་ཡོད་པའི་བོད་རིགས་སྤུན་ཟླ་རྣམས་ལ་བཤད་ནའང་འདྲ། རེ་བ་ནི་༧གོང་ས་སྐྱབས་མགོན་རིན་པོ་ཆེ་བརྒྱུད་ནས་རྒྱ་ནག་པས་བདག་དང་བདག་ལྟ་བུའི་བོད་རིགས་མི་དམངས་ལ་གདུག་རྩུབ་ཆེ་བའི་ཁྲིམས་ཆད་གཅོད་རྒྱུ་སོགས་བརྙས་བཅོས་བྱེད་བཞིན་ཡོད་པའི་གནས་ཚུལ་མཐའ་དག་རྒྱལ་སྤྱིའི་ཐོག་ཁྱབ་བསྒྲགས་བྱེད་རོགས། ཤ་རུས་གཅིག་པའི་བོད་རིགས་སྤུན་ཟླ་རྣམ་པ། རྒྱ་ནག་གིས་ང་ཚོར་དངོས་གནས་བརྙས་བཅོས་ཚབས་ཆེན་དང་ཁྲིམས་མེད་ལུགས་མེད་བྱེད་བཞིན་ཡོད་པ་འདི་ཚང་མས་ཤེས་དགོས། ང་ཚོས་ཅིས་ཀྱང་རྡོག་རྩ་གཅིག་སྒྲིལ་བྱས་ཏེ་རྒྱ་ནག་ལ་ངོ་རྒོལ་བྱེད་དགོས། ཞེས་སྐེད་རི་ཉི་མ་གྲགས་པས། སྤྱི་ལོ་ ༢༠༠༡ ལོའི་ཟླ་ ༤ བའི་ཚེས་ ༡ ཉིན་ཅེས་གཞིས་བྱེས་བོད་མི་རྣམས་ལ་ཁ་ཆེམས་ཀྱི་ཡི་གེ་བཞག་སྟེ་ཁོ་བོ་མི་རིགས་འདིའི་བདེན་དོན་གྱི་ཆེད་དུ་ཚེ་ལས་འདས་སོང་བ་རེད།
རང་མི་རིགས་དང་རྒྱལ་ཁབ་ཀྱི་ཐོབ་ཐང་རྩོད་པར་ཆབ་སྲིད་ཀྱི་ནག་ཉེས་ཕོག་པའི་ཁམས་རྟའུ་ཉི་མ་མཚོ་དགོན་གྱི་གྲྭ་ཏྲེ་ཧོར་ཉི་མ་གྲགས་པ་ལགས། ༡༩༩༠ ལོར་རྒྱ་གར་ལ་བཙན་བྱོལ་དུ་ཕེབས་ཏེ་དགའ་ལྡན་བྱང་རྩེ་གྲྭ་ཚང་གི་ཆོས་སྒོར་ཞུགས་ནས་ལོ་གསུམ་རིང་ལ་སློབ་གཉེར་གནང་ཡོད་པ་དང་། ཕྱིས་སུ་ཕྱིར་ཉི་མཚོ་དགོན་དུ་ཕེབས་ནས་སློབ་གཉེར་མུ་མཐུད་གནང་མུས་ཡོད་ཀྱང། ས་གནས་རྒྱ་གཞུང་གིས་རྒྱུན་དུ་རྒྱ་གར་ནས་ཕེབས་མཁན་ཚོར་དོགས་ཟོན་དང་བསུན་གཙེར་བྱེད་བཞིན་ཡོད་པར་བརྟེན། རྗེས་སུ་ཁོང་གིས་སྦྱར་ཡིག་མང་པོ་བཀྲམས་པའི་དབང་གིས་ཁོང་ལ་ཁ་བྲལ་རིང་ལུགས་པའི་ཉེས་མིང་བཀལ་ཏེ་ལོ་ ༩ ཁྲིམས་ཆད་བཏང་ཡོད་ལ། ༢༠༠༣ ལོའི་ཟླ་ ༡༠ བའི་ཚེས་ ༢ ཉིན་གྱིང་སྔ་དྲོའི་ཆུ་ཚོད་ ༤ བའི་སྟེང་འདས་གྲོངས་སུ་ཕྱིན་ཡོད་པ་རེད།
ང་ཚོ་བོད་མི་རིགས་འདི། གཅིག་བྱས་ན་བློ་ཁོག་ཆེ་དྲགས་པ་ཡིན་འགྲོ་སྟེ། གཅིག་བྱས་ན་ལྐུགས་ཐག་ཆོད་འདུག །གོང་ས་སྐྱབས་མགོན་ཆེན་པོས་སྔ་ས་ནས། བསམ་ཕོད་པ། བཤད་ཕོད་པ། བྱེད་ཕོད་པ་བཅས་ཀྱི་ཐོག །དུས་ཤེས་པ་ཟེར་བ་ཞིག་ཀྱང་བསྣན་ཡོད། དེས་ན་ང་ཚོས་དུས་དང་མཐུན་པའི་ཐབས་ལམ་ཞིག་འཚོལ་སྒྲུབ་བྱ་དགོས་ཀྱི། ཧོལ་རྒྱུག་བྱས་པས་ག་ལ་ཕན། དངོས་ཡོད་གནས་ཚུལ་ལ་ད་ལྟའི་སྐབས་འདིར། རྒྱ་ནག་ནི། དམག་ཤུགས་དང་། རྒྱུ་སྟོབས། ཚོང་ལས་གང་ཐད་ནས་འཛམ་གླིང་གི་རྒྱལ་ཁབ་མང་ཆེ་བས་སྟུན་དགོས་པ་ཆགས་ཡོད་སྟབས། ང་ཚོས་ཕྱི་ལོགས་ནས་སྐད་ག་ཚད་བརྒྱབ་ནའང་ནུས་པ་ཐོན་ཐུབ་པ་ཁག་པོ་རེད། དེ་ལས་ད་ལྟའི་སྐབས་འདིར་བོད་ཀྱི་དངོས་ཡོད་གནས་ཚུལ་ཤེས་ཤིང་མི་རིགས་དང་རིག་གཞུང་ལ་ཞེན་པ་དཀར་བའི་དཔའ་བོ་དཔའ་མོ་འདི་ཚོའི་སྲོག་མགོ་ཐོན་ཐབས་བྱེད་རྒྱུ་དེ་གལ་ཆེ་ཤོས་རེད།
སྐྱེ་བ་ཕོ་ཡིན་ཡང་། མིག་མཐའ་མཆི་མས་བཏང་སོང་། སེམས་པ་སྲ་མོ་ཞིག་ཡོད་བསམ་ཡང་། སྙི་མོར་གྱུར་སོང་། ང་ལ་ཉེ་རིང་མེད་བསམ་ཡང་། རྒྱ་ནག་པོའི་གཞུང་གི་རྒྱུགས་ཁྱི་དེ་དག་ལ་མནར་སྨིན་ཞིག་ད་ལྟ་མྱུར་དུ་འཁོར་ནའང་སྙམ་སོང་།
དཀོན་མཆོག་གི་མཁྱེན། མ་གཞི་ནས་དཀོན་མཆོག་ཁྱེད་རང་གི་མཁྱེན་གྱིན་ཡོད་དམ། དོན་དངོས་ཐོག་དཀོན་མཆོག་ཁྱོད་རང་ཡོད་ས་མ་རེད། དཀོན་མཆོག་གིས་ང་མགོ་བསྐོར་གཏོང་གིན་འདུག ངའི་གློ་སྙིང་འདར་གྱིན་འདར་གྱིན་ང་ཡང་ངུ་གིན་ཡོད། དཀོན་མཆོག་གསུམ་ངུ་གིན་ཡོད། ད་བྱུང་ན་འདྲ་མ་བྱུང་ན་འདྲ་ང་ཚོས་ཞི་དྲག་གཉིས་ཟུང་དུ་འབྲེལ་ནི་ཡར་ལངས་རན་འདུག ངའི་སྤུན་ཟླ་ཚོར་དེ་འདྲའི་ཚོད་མེད་རྡུང་རྡེག་ཤ་སྟག་གཏོང་དང་བཏང་དགོས་པ་ཅི་ཡིན་ནམ། ལུང་པ་མི་འདྲ་བ་དང་རྒྱལ་ཁབ་མི་འདྲ་བར་ཡོད་པའི་བོད་རིགས་ཡོད་དོ་ཅོག་རྣམས་རྡོག་རྩ་གཅིག་ཏུ་སྒྲིལ་ནས་ཡིད་གདུང་བའི་སྡུག་སྐད་རྒྱག་རོགས། འུ་ཐུག་པའི་སྨྲེ་སྔགས་སྒྲོག་རོགས།
འདི་གར་ཕྷ་རན་སིའི་བོད་རིགས་ཚོགས་པའི་གོ་སྒྲིག་འོག་རྒྱལ་ས་པ་རི་སི་རྒྱ་ནག་གཞུང་ཚབ་ཁང་གི་མདུན་ལའང་གནང་ཉིན་ཟླ༡༢ཚེས་༡༠ཉིན་འགྲོ་བ་མིའི་ཐོབ་ཐང་ཉིན་མོར་སྲུང་བརྩི་ཞུ་རྒྱུ་ལགས་ན་ སྐབས་དེར་གུས་ཀྱང་རྒྱལ་གཅེས་དཔའ་བོ་འདས་པོའི་ཁ་ཆེམས་དེ་ཚོ་་དྲན་བཞིན་དུ་སྡུག་སྐད་རྒྱག་རྒྱུ་ཡིན་ལགས།
གུས་ཁ་སྟབས་ལག་སྟབས་ཅི་ཡང་མེད་པའི་བླུན་པོ་ཞིག་ཡིན་པས་གཞན་ཅི་གང་འཇོན་གྱི་མི་འདུག་། དགོངས་དག་ཞུ།།
ཧ་ཅང་ཚབས་ཆེན་ལས་ངན་འདི་མཐོང་དུས།།
སྙིང་ཡང་འགས་ཅིང་ཡང་ནས་ཡང་དུ་བརྒྱལ།།
ཀྱེ་མ་གཞིས་ལུས་སྤུན་ཟླའི་གཅེས་སྲོག་དེ།།
རྒྱ་འདྲེ་དམར་པོས་ནམ་གཅོད་ཆ་མེད་རེད།།
༸གོང་ས་མཆོག་གིས་གསུངས།།
བསྟན་དང་དེ་འཛིན་ཆབ་སྲིད་རང་རིགས་སླད།།
གཅེས་པའི་ལུས་སྲོག་ལོངས་སྤྱོད་ཡོངས་བཏང་སྟེ།།
དཀའ་བ་བརྒྱ་ཕྲག་སྒྲུབ་པའི་སྐྱེ་བོ་རྣམས།།
གྲུ་འཛིན་མགོན་དེས་ཐུགས་རྗེས་སྐྱོང་བར་མཛོད།།
ཨོཾམཎེཔདྨེཧུྃ
དེ་རིང་གི་གསར་འགྱུར་འདི་ཀློག་དུས་་མིག་ཆུ་ལ་རང་དབང་མི་འདུག་བོད་ལ་ཡོད་པའིཤ་ཕྲག་གཅིག་པའི་བོད་རིགས་རྣམས་ཀྱི་ཚེ་སྲོག་སྐྱབས་མ་ཐུབ་པ་བློ་ཕམ་ཆེན་པོ་ཡོད།
རྟའུ་ཉི་མ་གྲགས་པ་མཆོག་གིས་ང་ཚོར་བཞག་པའི་ཁས་ཆེན་དེ་སུད་སི་བོད་རོགས་མི་དམངས་ཀྱིས་ཕྱི་ཟླ༡༢ཚེས་༡༠ཉིན་འགྲོ་བ་མིའི་ཐོབ་ཐང་ཉིན་མོར་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་ཡོད་སར་རྗི་ནེས་ཝ་གྲོང་ཁྱེར་ནང་དུ་སྡུག་སྐད་འབོད་སྐབས་སུ་ང་ཅོ་རིས་སྡུག་འབོད་བྱ་རྒྱུ་ཡིན།
བོད་ལ་ཡོད་པའི་བོད་རིགས་སྤུན་ཟླ་རྣམས་ཀྱི་ཚེ་སྲོག་སྐྱབས་མ་ཐུབ་པ་དེར་ང་ཅོ་རིས་དགོངས་དག་ཞུ་རྒྱུ་དང་མ་འོང་ཚེ་སྲོག་ལ་བདག་གཅེས་གནང་རོགས་ཞེས་རེ་བ་ཞུ་རྒྱུ་ཡིན།
སྐྱིད་སྡུག་མཉམ་མྱོང་གིས་རྒྱལ་ཁ་ཐོབ་པ་ཤོག
སྡོམ་རྩ་གཅིག་སྒྲིལ་གྱིས་ནུབ་པ་ཐོན་པ་ཤོག
དགྲ་དམར་པོ་སྟོབས་ཤུགས་ཉམ་པ་ཤོག
བོད་མི་རིགས་རྒྱལ་ཁ་ཐོབ་པ་ཤོག
བོད་མི་རིགས་ཀྱི་བདེ་སྡུག་མཆེད་དུ་སེམས་ཤུགས་བསྐྱེད་ནས་ལུས་སྲོག་ཕང་མེད་བཏང་ནས་
ལས་འགུལ་འདྲ་མིན་སྤེལ་ཐུབ་པ་ལ་སྙིང་ཁུང་རུས་པའི་གཏིང་ནས་རྗེས་སུ་ཡི་རང་ཡོད།།
བསམ་གྱི་དངུལ་ལས་མེད་པའི་སྐུ་ངོ་ཚོ། བོད་མི་ཉམ་ཐག་རྣམས་ཀྱི་ཚེ་སྲོག་དེ།
དམར་པོ་རྒྱ་ཡི་ལག་ཏུ་མ་སྤྲད་རོགས། མཚན་དང་སྙན་གྲགས་ཆེད་དུ་མ་ཚོང་རོགས།
བཙན་བྱོལ་བོད་ཀྱི་སྐུ་ངོ་རྣམས་པ་ཚོ། བོད་མི་ཉམ་ཐག་སྔོན་ལ་མ་བཏང་རོགས།
འགྲོ་དགོས་ཡོད་ན་ཁྱེད་ཚོ་སྔོན་ལ་རྒྱུག། ཉམ་ཆུང་སྲོག་གི་རྩེ་མི་མ་རྩོད་རོགས།
བོད་མི་ཉམ་ཆུང་བསད་མཁན་རྒྱ་དམར་རེད།
གདུང་སེམས་མཉམ་སྐྱེད་བྱས་མཁན་ཉམ་ཐག་རེད།
ལྟད་མོ་རྒྱང་ནས་ལྟ་མཁན་སྐུ་ངོ་རེད།
ཀྱེ་མ་ཁ་བའི་བོད་མི་ཉམ་ཐག་ཚོ།
རྒྱ་དམར་དགྲ་རེ་འདོད་མཁན་ཉམ་ཐག་རེད།
རྒྱ་རིགས་སྤུན་ཟླ་འདོད་མཁན་བོད་གཞུང་རེད།
གངས་རིའི་སྙིང་ནོར་བོད་མི་ཉམ་ཐག་ཚོ།
རང་གིས་རང་སྲོག་མ་དོར་སྐུ་ཚེ་རིང།
བུ་མོ་སྒྲོལ་མ་ནུབ་ཕྱོགས་ཡུལ་དུ་ཡོད།
སེམས་པ་དཀར་ཆུང་ཉམ་ཐག་ཕྱོགས་སུ་ཡོད།
བུ་མོ་སྒྲོལ་མས་རང་སྲོག་མ་ཆད་པ།
བོད་མི་ཉམ་ཐག་རྣམས་ཀྱི་ཕྱོགས་སུ་
ངས་བཟོད་ཐུབ་པ་མི་འདུག
པདྨ་འདམ་གྱིས་མ་འགོས་པར། སྲིད་གསུམ་དྲི་མས་མ་འགོས་ཤིང་། །སྲིད་པའི་པདྨོ་ལས་གྲོལ་མ། །བདེ་བ་ཅན་དུ་སྐྱེ་བར་ཤོག ། ཨོ་ཨ་སྨྲི་དེ་ཝ་ཧྲི།
རི་བོ་ཏྭ་ལའི་ཞིང་ཁམས་སུ། །ཡིད་དམ་ཐུགས་རྗེ་ཆེན་པོ་བཞུགས། །སྙིང་རྗེ་ཅན་གྱི་འཁྲུངས་ས་ཡི། །ཞིང་མཆོག་དེ་རུ་སྐྱེ་བར་ཤོག ། ཨོ་མ་ཎི་པདྨེ་ཧུཾ།
མངོན་པར་དགའ་བའི་ཞིང་ཁམས་སུ། །རྫོགས་པའི་སངས་རྒྱས་མི་འཁྲུགས་བཞུགས། །ངན་སོང་སྦྱངས་བའི་འཁྲུངས་ས་ཡི། །ཞིང་མཆོག་དེ་རུ་སྐྱེ་བར་ཤོག །
ཨོ་ཀཎ་ཀ་ཎི་ཀཎ་ཀ་ཎི་སྭ་ཧྭ།
དེ་ནི་བོད་ཕྱི་ནང་གཉིས་ཀྱི་བོད་རིགས་སྤུན་ཟླ་རྣམས་གཅིག་སེམས་གཅིག་ལ་གཏད་ཡོད་པ་གསལ་པོར་མཚོན་ཡོད།
དེ་རིང་འདི་གའི་གསར་འགོད་པ་མེག་རྒན་ལ་ཕྱིན་སྐབས་ཀྱང་བོད་ནས་ཕེབས་པའི་སྐུ་ཞོགས་ཤིག་གིས་སྒང་ནས་གསར་འགོད་པར་གནས་ཚུལ་བཤད་བཞིན་དུ་ངུ་གིན་འདུག་ཟེར། དེང་སྐབས་གསར་འགྱུར་འབྲི་མཁན་དང་གསར་འགྱུར་བཤད་མཁན་ཕལ་ཆེ་བས་མིག་ཆུ་གཏོང་རེས་བྱས་ནས་བསྡད་ཡོད་པ་རེད། ད་ནི་གསར་འགྱུར་ཀློག་མཁན་ཚོ་ཡང་ངུ་གིན་འདུག
འདྲ་པར་འདོ་དག་མཏོང་ཞིང་གནས་ཚུལ་འདི་ཐིག་ཕྲེང་འགའ་བཀླགས་རྗེས། ངའི་མིག་གཉིས་མཆུ་མས་བསྒྲིབས་སོང་། སྣ་གཉིས་འཚིབས་ནས་འགག་སོང་། ཡ་ཆུང་སེམས་ལ་སྨུག་ལོང་འཐིབས་སོང་། ཅི་ཡང་མི་དྲན་པ་འདྲ་ཆགས་ཡོང་གི་འདུག ངའི་སེམས་ཚོར་འདི་ཁྱོད་ཚོར་བཤད་པ་བཞིན། བོད་དོན་འདི་འཛམ་བུ་གླིང་ལ་བཤད་ཅིང་ཤེས་ཀྱང་ཡོད་པ་རེད་དེ། བྱ་ཐབས་ཅང་ཡོད་ནི་མ་རེད།
རྒྱལ་གཞེན་ལྷག་བསམ་དཀར་བའི་མི་བུ་འདི་བཞིན། རྒྱས་གཅེས་དཔའ་བོ་དཔའ་མོ་མང་པོ་ཞིག་གདུག་རྩུབ་མནར་གཅོད་འོག་མི་རིགས་འདིའི་ཆེད་རང་ཉིད་ཀྱི་ཚེ་སྲོག་ཀྱང་བློས་གཏོང་གི་གནས་སྟངས་འདི་ཚོ་ང་ཚོ་ཚང་མས་ཤེས་དང་ཤེས་མུས་ཡིན་སྟབས། ང་ཚོས་ཅི་ཞིག་བྱེད་ཀྱིན་ཡོད་དམ། ང་དང་ཁྱོད། ཁོ་དང་མོ། ཁོང་དང་ཁོང་ཚོ། ད་དུང་༌༌༌གཞན་ཚོ་༌
ལས་འབྲས་ཤིག་ཡོད་ན་༌༌༌༌༌
ང་ཚོས་ཁ་ས་ཁ་ཉིན་དཀར་མཛེས་ལམ་གྲགས་དགོན་གྱི་བཙུན་མ་དབྱངས་སྐྱིད་སྒྲོལ་མ་ཉེ་ཆར་རྒྱ་མིའི་བཙོན་ཁང་ནང་ཡོད་མུས་སུ་འདས་གྲོངས་ཕྱིན་པའི་ཡིད་སྐྱོ་དགོས་པའི་གནས་ཚུལ་དེ་ཚོ་བཀླགས་ཚར་ཙམ་ཡིན། དེ་རིང་སླར་ཡང་ལོ་ཁ་ཤས་གོང་དུ་བཙོན་ཁང་སྡུག་སྦྱོང་ཕོག་སྟེ་འདས་གྲོངས་སོང་བའི་བོད་མི་དཔའ་བོ་ཞིག་གི་ཞིབ་ཕྲའི་ལོ་རྒྱུས་བལྟ་བཞིན་ཡོད། ངོ་མ་གནས་སྟངས་དེ་ཚོ་མཐོང་དུས་རྒྱ་མི་དམར་པོ་དེས་ང་ཚོའི་ཕ་ཡུལ་གྱི་རྒྱལ་ཞེན་ཆེ་བའི་བོད་མི་ཡོད་དོ་ཅོག་ལ་རྡུང་རྡེག་གང་འདྲ་གཏོང་གི་ཡོད་པ་ཁྲ་ལྷམ་མེར་གསལ་བས་བོད་མི་ཡོངས་རྫོགས་གདུང་ཤུགས་གཅིག་ཏུ་བསྒྲིལ་ཏེ་ད་ལྟ་བཙོན་དུ་ཡོད་བཞིན་པ་རྣམས་རིམ་པས་བདེ་མོ་ཐང་པོའི་ཐོག་ཏུ་གློད་བཀྲ་ ོལ་གཏོང་རྒྱུར་གནད་ལ་འཁེལ་བའི་ལས་འགུལ་ཞིག་སྤེལ་དགོས་པ་མི་འདུག་གམ།
ང་མིག་ཆུ་དབང་མེད་དུ་ཤོར་སོང༌། དཀོན་མཆོག་མཁྱེན།
སྤུན་ཟླ་ལགས་ད་རེབ་མཎི་ཡིག་དྲུག་འདི་ (ཨོཾམཎེཔདྨེཧུྃ།) འཁྱེར་དེ་སྔོན་ལ་གོམ་གཅིག་ཕེབས་དང་ངས་ནམ་ཞིག་ཁྱེད་ཀྱི་རོ་སྐྱིན་ལེན་ངེས་ཡིན་ནོ།