བོད་ལྗོངས་མདོ་སྨད་ཆོལ་ཁའི་དྲ་རྒྱ་གསར་པ་སྒོ་འབྱེད།

བཟང་པོ་བཅུ་འཛོམས་ཀྱི་ཉིན་མོ་དང་བསྟུན་ཏེ་མདོ་སྨད་དབུས་སྤྱི་ཁྱབ་རྒྱུན་ལས་ཁང་གིས་༼ བོད་ལྗོངས་མདོ་སྨད་ཆོལ་ཁའི་དྲ་རྒྱ ༽ ཞུ་བའི་བོད་ཡིག་གི་དྲ་རྒྱ་གསར་པ་ཞིག་སྒོ་འབྱེད་གནང་ཡོད་ལ། དྲ་རྒྱ་དེའི་མདུན་ངོས་སུ་༧གོང་ས་མཆོག་གི་མཛད་འཕྲིན་དང་བོད་ནང་གི་གསར་འགྱུར་བཅས་ཚན་པ་བཞི་དང་། ནང་ལོགས་སུ་མདོ་སྨད་སྤྱི་བཤད་དང་ས་བྱི་ལོའི་ཞི་རྒོལ་ཆེན་མོ་སོགས་སྡེ་ཚན་བརྒྱད་དུ་བཀར་འདུག

དེ་རིང་སྔ་དྲོའི་ཆུ་ཚོད་ ༩ དང་ཕྱེད་ཀའི་ཐོག་གངས་སྐྱིད་སྤྱི་ཐབ་ཐོག་ཁང་དུ་མདོ་སྨད་དབུས་རྒྱུན་ལས་ཀྱིས་གསར་དུ་བཟོས་པའི་དྲ་ཚིགས་ ( www.dhomay.net ) ཞེས་པ་དབུ་འབྱེད་ཀྱི་མཛད་སྒོ་སྟབས་བདེ་ཞིག་བསྡུས་ཡོད་ལ། མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་དམིགས་བསལ་སྐུ་མགྲོན་བཀའ་ཟུར་ཨ་ལག་འཇིགས་མེད་རིན་པོ་ཆེ་མཆོག མདོ་སྨད་དབུས་རྒྱུན་ཚོགས་གཙོ་ཡེ་ཤེས་སྒྲོལ་མ་དང་དབུས་རྒྱུན་ཚོགས་གཙོ་ཟུར་བ་རྣམ་པ། དེ་བཞིན་བཞུགས་སྒར་ཁུལ་གྱི་ཚོགས་པ་སྒྲིག་འཛིགས་ཁག་གི་སྐུ་ཚབ་བཅས་ཕེབས་འདུག བོད་ལྗོངས་མདོ་སྨད་ཆོལ་ཁའི་དྲ་རྒྱའི་གཙོ་ངོས་སུ་༧གོང་ས་མཆོག་གི་སྐོར་དང་བོད་ནང་གི་གསར་འགྱུར། བཙན་བྱོལ་ནང་གི་གསར་འགྱུར། རྒྱལ་སྤྱིའི་གསར་འགྱུར་བཅས་ཚན་པ་བཞི་རུ་བགོས་འདུག་ལ། གཡོན་ཟུར་དུ་དྲ་འབྲེལ་ཁག་དང་དཔེ་དེབ་ཁག འོག་ཏུ་གསལ་བསྒྲགས་བཅས་འདུག མདུན་ངོས་ཀྱི་སྒང་དུ་༼ དབུས་རྒྱུན་ལས་ཁང ༽ དང་ ༼ མདོ་སྨད་སྤྱི་བཤད ༽ ༼ དབུ་མའི་ལམ ༽ ༼ རྒྱ་ནག་ངོ་སྤྲོད ༽ ༼ ས་བྱི་ལོའི་ཞི་རྒོལ་ཆེན་མོ ༽ ༼ བཙན་བྱོལ་བོད་གཞུང ༽ ༼ བཀའ་སློབ ༽ ༼ དོལ་རྒྱལ་གྱི་སྐོར ༽ བཅས་སྡེ་ཚན་ཆེ་ཁག་བརྒྱད་འདུག་ལ། སྡེ་ཚན་དེ་དག་རེ་རེ་ལའང་ནང་གསེས་ཚན་པ་མང་པོར་དབྱེ་འདུག གཞན་གློག་བརྙན་དང་པར། ས་ཁྲ། ༧གོང་ས་མཆོག་གི་གསུང་ཆོས་སྒྲ་ལྡན་བཅས་ཀྱང་འདུག

མཛད་སྒོའི་ལས་རིམ་ཐོག་མར་སྐུ་མགྲོན་གཙོ་བོ་རྣམ་པས་༧གོང་ས་མཆོག་གི་སྐུ་པར་མཐོང་གྲོལ་ཆེན་མོར་ཁ་བཏགས་སྒྲོན་འབུལ་དང་། དེའི་རྗེས་མདོ་སྨད་དབུས་རྒྱུན་ཚོགས་གཙོ་ཡེ་ཤེས་སྒྲོལ་མ་མཆོག་གིས་དྲ་ཚིགས་ཐོག་ཕྱག་ལས་གནང་མཁན་ཚོར་ཐུགས་རྗེ་ཆེ་ཞུའི་གསུང་བཤད་གནང་དོན། དྲ་རྒྱ་འདི་དེ་སྔ་མདོ་སྨད་དབུས་རྒྱུན་སྐབས་བཅུ་གསུམ་པའི་ཚོགས་ཆེན་ཐོག་གྲོས་ཆོད་བཞག་པ་ཞིག་རེད། སྐབས་བཅུ་བཞི་བའི་དབུས་རྒྱུན་ཚོས་དངོས་སུ་མགོ་འཛུགས་བྱས་པ་རེད། རྒྱུན་ལས་ཚང་མའི་ངོས་ནས་ཧུར་ཐག་རྦད་ཐག་གིས་ཕྱག་ལས་གནང་སོང་། ལྷག་པར་དུ་དབུས་རྒྱུན་དྲུང་ཆེ་དང་དྲ་རྒྱའི་ལག་རྩལ་པ་ཆོས་འཕེལ་ལགས་གཉིས་ཀྱིས་སྐུ་ངལ་མང་པོ་སྐྱོན་སོང་ལ། ཨེ་ཤ་ཡ་རང་དབང་རླུང་འཕྲིན་ཁང་གི་འགན་འཛིན་བསྟན་འཛིན་དོན་ཡོད་དང་མདོ་སྨད་རྩོམ་སྒྲིག་ཚོགས་ཆུང་བཅས་ནས་ཀྱང་ཕྱག་རོགས་མང་པོ་ཞུས་ཡོད། དེ་རིང་ངས་མདོ་སྨད་མི་མང་ཡོངས་ཀྱི་ཚབ་བྱས་ཏེ་ཐུགས་རྗེ་ཆེ་ཞུ་རྒྱུ་ཡིན། དྲ་རྒྱ་འདིའི་སྟེང་གཙོ་བོ་མདོ་སྨད་ཕྱོགས་ཀྱི་གནས་ཚུལ་ཡིན་མོད། དེ་དང་མཉམ་དུ་བོད་སྤྱི་ལ་ཕན་པའི་གནས་ཚུལ་གལ་ཆེན་ཁག་ཀྱང་བཞག་ཡོད་སྟབས། བོད་ཕྱི་ནང་ཀུན་ནས་དུས་ནས་དུས་སུ་གནས་ཚུལ་མཁོ་སྤྲོད་ཡོང་རྒྱུར་འབོད་སྐུལ་ཞུ་བཞིན་ཡོད། དྲ་རྒྱ་འདི་ད་དུང་ཆ་ཚང་བ་ཞིག་འགྲུབ་ཡོད་པ་མ་རེད། མ་འོངས་པར་དབྱིན་ཡིག་ཀྱང་ཡོད་པ་ཞིག་ལ་འབད་བརྩོན་ཞུ་རྒྱུ་ཡིན། ཞེས་གསུངས་སོང་།

དེའི་རྗེས་དམིགས་བསལ་སྐུ་མགྲོན་བཀའ་ཟུར་ཨ་ལག་འཇིགས་མེད་རིན་པོ་ཆེ་མཆོག་གིས་གསུངས་བཤད་གནང་དོན། མདོ་སྨད་ཆོལ་ཁས་དྲ་རྒྱ་གསར་པ་ཞིག་སྒོ་འབྱེད་བྱས་པ་འདིས་བོད་སྤྱི་བའི་རྩ་དོན་ལ་ཕན་ཐོགས་ངེས་ཅན་ཞིག་ཡོང་གི་རེད་སྙམ་པ་དྲན་ཡོད། ཐོག་མ་ནས་དྲ་རྒྱ་འདིའི་དམིགས་ཡུལ་ལྟེ་བ་གང་རེད་ཟེར་ན། བོད་སྤྱི་བའི་རྩ་དོན་བསྒྲུབ་རྒྱུ་དེ་རེད། དྲ་རྒྱ་འདིས་བཙན་བྱོལ་སྤྱི་ཚོགས་ལ་ཕན་གི་རེད་ལ་གཞིས་ལུས་མི་མང་ལའང་ཕན་གི་རེད། མདོ་སྨད་གཅིག་པུ་མ་རེད། ཆོལ་ཁ་གསུམ་ཀའི་མི་མང་ལ་ཕན་གི་རེད། རྗེས་མ་དབྱིན་ཡིག་ཐོག་བཟོས་པ་ཡིན་ན། ཕྱི་རྒྱལ་མི་རིགས་ཚོ་ལའང་ཕན་གི་རེད་ལ། དེ་དང་བསྟུན་ཏེ་བོད་པའི་གནས་ཚུལ་ཁྱབ་སྤེལ་དང་བོད་དོན་ཐོག་རྒྱབ་སྐྱོར་ཡོང་བ། ༧གོང་ས་མཆོག་གི་མཛད་འཕྲིན་བཅས་ལ་ཡང་ཞུབས་འདེགས་ཀྱི་ནུས་པ་གང་འཚམ་འཐོན་གི་རེད། ད་དུང་མུ་མཐུད་དེ་ལས་དོན་འདི་ཡར་རྒྱས་དང་སྤུས་དག་ཏུ་གཏོང་རྒྱུར་ཚང་མས་ཧུར་ཐག་གནང་རོགས། སྔོན་མ་བོད་གཞུང་གི་ཡིག་ཆ་གལ་ཆེན་ཁག་བོད་ནང་ལ་གཏོང་རྒྱུར་བོད་དང་ཉེ་བའི་རི་སྒང་ནས་རླུང་གི་རྒྱུ་ཕྱོགས་དང་བསྟུན་ཏེ་བསྐུར་ན་ཟེར་བའི་ཨུ་ཐུག་གི་སྐད་ཆ་དེ་འདྲ་བྱུང་བ་རེད། ད་ཆར་གནས་ཚུལ་ཁྱབ་སྤེལ་དང་འབྲེལ་ལམ་ཐད་དྲ་རྒྱ་ལས་མྱུར་བ་ཞིག་དང་སྟབས་བདེ་བ་ཞིག་ཡོད་པ་མ་རེད། ཅེས་གསུངས་བྱུང་།

མཇུག་མཐར་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་བཤད་གནང་དོན། བཙན་བྱོལ་སྤྱི་ཚོགས་ཀྱི་ལོ་རྒྱུས་ནང་བལྟས་པ་ཡིན་ན། མདོ་སྨད་ཆོལ་ཁའི་སྒྲིག་འཛུགས་འདི་དང་པོ་ཆགས་ཡོད། སྒྲིག་འཛུགས་འདི་བཙུགས་ཏེ་ད་ལྟའི་བར་གྱི་བྱུང་རབས་ཐོག སྔོན་མའི་མི་ཚོར་ཤེས་ཡོན་དེ་ཙམ་མེད་ཀྱང་། ལྷག་བསམ་གྱི་ཐོག་ནས་དཀའ་ལས་མང་པོ་བརྒྱབས་པར་བརྟེན། ང་ཚོ་ད་ལྟའི་གནས་སྟངས་འདིར་སླེབས་པ་རེད། ལྷག་པར་དུ་སྐབས་བཅུ་གསུམ་པའི་མདོ་སྨད་དབུས་རྒྱུན་གྱིས་གྲུབ་པ་དང་མ་འགྲུབ་པའི་ལས་དོན་མང་པོ་ཡོད་ཀྱང་། ཕྱོགས་མང་པོ་ཞིག་ཡར་རྒྱས་ཆེན་པོ་བཏང་ཡོད། དེ་རིང་འདིར་བཟང་པོ་བཅུ་འཛོམས་ཀྱི་ཉིན་མོ་དང་བསྟུན་ཏེ། མདོ་སྨད་ཆོལ་ཁའི་དྲ་རྒྱ་གསར་པ་བཏོན་པ་འདི་མདོ་སྨད་ལོ་རྒྱུས་ནང་གཟེངས་སུ་ཐོན་པ་ཞིག་ཆགས་ཡོད། སྔོན་མ་ནས་མདོ་སྨད་པ་ཚང་མ་མཁས་དབང་ཡིན་ཟེར་བའི་ཁ་རྒྱུན་ཞིག་ཡོད་ལ། ངས་ཀྱང་དུས་རྒྱུན་དུ་བཤད་བསྡད་ཡོད། ང་ཚོའི་རྒྱུ་ནོར་རྩ་ཆེ་ཤོས་དེ་མཁས་དབང་ཚོས་བྲིས་བཞག་པའི་བརྩམས་ཆོས་ཁག་རེད། དེ་དག་ཁྱབ་སྤེལ་བྱ་སའི་སྡིངས་ཆ་ཡག་ཤོས་དྲ་རྒྱ་ཆགས་ཡོད་སྟབས། ཐེངས་འདིར་ལས་དོན་གལ་ཆེན་ཞིག་གྲུབ་ཡོད།

ང་རང་གི་བསམ་པར་དྲ་རྒྱ་འདིར་ད་དུང་ཡར་རྒྱས་སུ་གཏོང་དགོས་པའི་ཆ་འགའ་རེ་འདུག དཔེར་ན། དེང་སྐབས་ཁོར་ཡུག་གི་གནད་དོན་གལ་ཆེན་ཆགས་ཀྱིན་ཡོད་སྟབས་ཁོར་ཡུག་གི་ཚན་པ་ཞིག་དང་རྒྱ་ནག་གིས་བོད་ཐོག་འཛིན་པའི་སྲིད་བྱུས་ཀྱི་སྡེ་ཚན་ཞིག བཙན་བྱོལ་སྤྱི་ཚོགས་ཀྱི་སྡེ་ཚན་ཞིག་བཅས་ཡོད་ན་ཡག་པོ་འདུག དེ་དང་ལྷན་དུ་རེ་སྐུལ་ཞུ་རྒྱུ་ཞིག་ལ། ཉེ་ཆར་གློག་ཀླད་ཆེད་མཁས་པ་ཨ་ཁུ་སྨོན་ལམ་ཉི་ཧོང་ལ་ཕྱིན་ཏེ། ཀུ་ཤུ་རྟགས་ཅན་གྱི་གློག་ཀླད་ནང་སྨོན་ལམ་བོད་ཡིག་གསུམ་པ་འཇོག་རྒྱུའི་སྐད་ཆ་བྱུང་འདུག མ་འོངས་པར་གློག་ཀླད་སྒེའུ་ཁུང་གཞན་དག་ལའང་དེ་ལྟར་ཡོང་ཐུབ་པར་རེ་བ་རྒྱག་གིན་འདུག སྨོན་ལམ་བོད་ཡིག་གསུམ་པ་དེ་རྒྱལ་སྤྱིའི་ཚད་ལྡན་ཨང་རྟགས་སྟེང་བཟོས་ཡོད་སྟབས། ཧི་མ་ལ་ཡ་དང་གཅིག་པ་རེད། དེར་བརྟེན། བོད་རང་གིས་བཟོས་པའི་སྨོན་ལམ་བོད་ཡིག་གསུམ་པའི་སྟེང་འཇོག་ཐུབ་ན་ཡག་པོ་རེད། ཅེས་གསུངས་བྱུང་།