ཁ་སང་འབར་མའི་དམངས་གཙོའི་དབུ་ཁྲིད་ཨང་སེན་སོ་སྐྱིད་ཀྱི་སྒོ་རའི་ནང་འབར་གས་ཤིག་གཡུགས་ཡོད་ཀྱང་རྗེས་སུ་མི་དེའི་སེམས་ཁམས་ལ་སྐྱོན་ཡོད་པའི་ངོས་འཛིན་འོག་ཁྲིམས་ཆད་ཕོག་རྒྱུ་མིན་སྐོར་བརྗོད།
རྒྱལ་སྤྱིའི་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། ཁ་སང་འབར་མའི་ཉེན་རྟོག་པས་ནོ་བྷེལ་ཞི་བདེ་གཟེངས་རྟགས་བཞེས་མྱོང་མཁན་དང་འབར་མ་རྒྱལ་ཁབ་ཀྱིི་སློབ་སྟོན་པ་ལྕམ་ཨང་སེན་སོ་སྐྱིད་ལགས་ཀྱི་སྡོད་ཁང་དུ་སྣུམ་འབར་འགད་རྫས་ཤིག་གཡུག་པའི་དོགས་གཞིའི་འོག ལོ་ན་ ༤༨ ཡིན་པའི་མིང་ལ་ཝེན་ནེན་(Win Naing)ཟེར་བ་ཞིག་འཛིན་བཟུང་བྱས་ཏེ་འདྲི་གཅོད་བྱས་ཡོད་ཀྱང་ཁྲིམས་ཆད་ཕོག་རྒྱུ་མིན་སྐོར་རྗོད་བཞིན་ཡོད་པ་རེད།
འབར་མའི་ཉེན་རྟོག་པས་བརྗོད་པ་ལྟར་ན། ཟླ་འདིའི་ཚེས་ ༡ ཉིན་མི་ཞིག་གིས་རླངས་འཁོར་ལས་བརྙན་ཕབ་ལེན་བྱས་ཡོད་པའི་ནང་། དོགས་ཡོད་མི་སྣ་དེས་གློ་བུར་དུ་ལྕམ་ཨང་སེན་སོ་སྐྱིད་ལགས་ཀྱི་སྡོད་ཤག་ཏུ་སྣུམ་འབར་འགད་རྫས་ཤིག་གཡུགས་ཏེ་བྲོས་ཡོད་ཀྱང་། འབར་གས་ཀྱིས་ཁང་པའི་ཕྱི་རོལ་དུ་ཆུ་འདྲེན་བྱེད་འགྱིག་ཅིག་ཡོད་པ་དེ་འཚིགས་ཡོད་པ་ལས་གནོད་སྐྱོན་ཚབས་ཆེན་བཟོས་མེད། ཅེས་བརྗོད་ཡོད་པ་དང་། འབར་མའི་གཞུང་གི་མགྲིན་ཚབ་པ་སྐུ་ཞབས་རྫའོ་ཧ་ཊི་(Zaw Htay)ལགས་ཀྱིས། དོན་རྐྱེན་བྱུང་སྐབས་ལྕམ་ཨང་སེན་སོ་སྐྱིད་ལགས་རྒྱལ་ས་རུ་ཡོད་པ་ལས་རང་ཤག་ཏུ་མེད། ཅེས་བརྗོད་ཡོད།
ཡང་བརྒྱུད་ལམ་ཁག་གི་གནས་ཚུལ་ལྟར་ན། འགད་རྫས་གཡུག་མཁན་དེའི་སེམས་ཁམས་ལ་སྐྱོན་ཡོད་པ་དང་། ཁོས་ནོར་འཁྲུལ་ཤོར་ཏེ་འགད་རྫས་གཡུགས་ཡོད་ཚུལ་བཤད་ཡོད་སྟབས་ཁྲིམས་ཆད་ཕོག་རྒྱུ་མིན་སྐོར་བརྗོད་འདུག་ལ། ཕྱི་ལོ་ ༡༩༩༦ ལོར་མི་ ༢༠༠ མ་ཟིན་ཙམ་ཞིག་གིས་གློ་བུར་དུ་ལྕམ་ཨང་སེན་སོ་སྐྱིད་དང་མོའི་སྲིད་དོན་ཚོགས་པའི་ཚོགས་གཞོན་གཉིས་རླངས་འཁོར་ནང་ལྐོག་གསོད་གཏོང་རྩིས་བྱས་ཡོད་ཀྱང་། ཁ་ལོ་བས་ཁོ་གཉིས་ཀྱི་སྲོག་སྐྱོབ་ཐུབ་ཡོད་པ་དང་། སྐབས་དེར་འབར་མའི་གཞུང་ནས་དོན་རྐྱེན་དེ་དང་འབྲེལ་བའི་མི་གཅིག་ལའང་ཉེས་ཆད་བཏང་མེད་པར་བརྟེན། དོན་རྐྱེན་དེ་ནི་དྲག་དམག་སྲིད་གཞུང་རང་གིས་བཟོས་པ་ཡིན་པར་ངོས་འཛིན་བྱེད་བཞིན་ཡོད་པ་རེད།
ལྕམ་ཨང་སེན་སོ་སྐྱིད་ལགས་སུ་འབར་མའི་མི་སེར་དང་རྒྱལ་སྤྱིའི་ཚོགས་སྡེ་ཁག་མང་པོ་ཞིག་གིས་དགའ་མོས་བྱེད་བཞིན་ཡོད་ཀྱང་། ཕྱི་ལོ་ ༢༠༡༧ ལོར་འབར་མའི་གཞུང་གིས་རོ་ཧིན་གྷ་ཡ་ཁ་ཆེའི་གྲངས་ཉུང་མི་རིགས་ལ་དྲག་གནོན་བྱེད་ཀྱིན་ཡོད་པའི་གནས་ཚུལ་ཁྱབ་པར་བརྟེན་ཏེ། ལྕམ་ཨང་སེན་སོ་སྐྱིད་ལགས་རྒྱལ་སྤྱིའི་འགྲོ་བ་མིའི་ཐོབ་ཐང་སྡེ་ཚན་དང་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་མང་པོའི་སྐྱོན་བརྗོད་བྱེད་ཡུལ་དུ་གྱུར་ཡོད།
གསར་འགོད་པ། སྐལ་བཟང་སྦྱིན་པ།
རེད་དེ་བདེན་པ་རེད།
ད་ཧ་གོ་མ་སོང་ཆབ་སྲིད་མི་སྣས་ཆབ་སྲིད་ཀྱི་རྒྱུ་རྩལ་ཁྲབས་ནས་ཞི་བའི་མི་མང་གི་འཚོ་བ་ལ་གྱོང་གུན་ཆེན་པོ་བཟོ་བཞིན་པ་འདི་འབར་མ་གཅིག་པོ་མ་རེད་ང་ཚོའི་མིག་མདུན་དུ་ང་ཚོའི་ཡང་མཐོང་བཞིན་པ་འདི་རེད་ལ་དེ་ཚོ་ཚང་མ་མི་མང་གི་འགོ་འཁྲིད་ཚོའི་རང་དོན་སྒྲུབ་རྒྱུའི་ཆབ་སྲིད་ཁོ་ན་ལས་མ་འདས་།