ལྷོ་ཀོ་རི་ཡའི་སྲིད་འཛིན་ཟུར་པར་ཞིབ་བཤེར།

ལྷོ་ཀོ་རི་ཡའི་སྲིད་འཛིན་ཟུར་པ་ཕར་ཅིན་ཧའེ་ལ་ལོ་ ༢༤ ཡི་བཙོན་འཇུག་ཁྲིམས་ཐག་བཅད་དེ་ཉིན་གསུམ་ལས་མ་འགོར་བར་སྲིད་འཛིན་ཟུར་པ་ལི་མིང་བྷག་ལ་ཞིབ་བཤེར་བྱེད་ཀྱི་ཡོད་པའི་གནས་ཚུལ་ཐོན།ལྷོ་ཀོ་རི་ཡའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། དེ་རིང་སྔ་དྲོར་ལྷོ་ཀོ་རི་ཡ་རྒྱལ་ཁབ་ཞིབ་བཤེར་ཁང་གིས། ཡུལ་དེའི་སྲིད་འཛིན་ཟུར་པ་ལི་མིང་བྷག་(Lee Myung-bak)གིས་ལྐོག་ཟ་རུལ་སུངས་དང་། ཁྲལ་གཡོལ།  ལྐོག་རྔན་བླངས་པ།  དབང་ཆ་བེད་སྤྱོད་ལོག་པར་བཏང་བ་སོགས་ཀྱི་ནག་ཉེས་ ༡༤ ཐེར་འདོན་བྱས་ཏེ། རྒྱལ་ས་སོལ་(Seoul)དུ་ཡོད་པའི་སྤྱི་ཁྱབ་ཁྲིམས་ཁང་ལ་ཞུ་གཏུག་བྱས་ཡོད་པ་མ་ཟད། ཁོའི་རྒྱུ་དངོས་ཚང་མ་བཀག་སྡོམ་བྱས་སྟེ་མུ་མཐུད་ཞིབ་བཤེར་གཏིང་ཟབ་བྱ་རྒྱུ་དང་། ཁོའི་བཟའ་ཟླ་ཅིན་རོན་ཡས་དང་བུ་ཆི་ཛི་ལི་གཉིས་ལའང་རིམ་གྱིས་ཞིབ་བཤེར་བྱ་རྒྱུ་ཡིན་འདུག

ལྷོ་ཀོ་རི་ཡ་རྒྱལ་ཁབ་ཞིབ་བཤེར་ཁང་གིས་ཉེ་སྔོན་ལི་མིང་བྷག་ལ་ཞིབ་བཤེར་བྱས་པའི་གྲུབ་དོན་ཞིག་ཕྱིར་བསྒྲགས་བྱས་པའི་ནང་དུ། ཆེས་མཐོའི་ཁྲིམས་ཁང་གི་བཀའ་ཁྱབ་ལྟར་ཟླ་སྔོན་མའི་ཕྱི་ཚེས་ ༢༢ ཉིན་ནས་ལི་མིང་བྷག་འཇུ་བཟུང་བྱས་སྟེ། རྒྱལ་ས་སོལ་གྱི་ཤར་ཕྱོགས་སུ་ཡོད་པའི་བཀག་ཉར་ཁང་ཞིག་ཏུ་ཕྱི་ཚེས་ ༢༦ དང་ ༢༨། དེ་བཞིན་ཟླ་འདིའི་ཚེས་ ༢ ཉིན་ཐེངས་གསུམ་ལ་འདྲི་རྩད་ཞིབ་བཤེར་བྱས་ཡོད་ཀྱང་། ལི་མིང་བྷག་གིས་ཞིབ་འཇུག་གི་གྲུབ་དོན་དྲང་བདེན་མིན་ལུགས་བརྗོད་དེ་ངོས་ལེན་བྱས་མེད་སྐོར་བརྗོད་འདུག

སྲིད་འཛིན་ཟུར་པ་ལི་མིང་བྷག་ནི་ལྐོག་ཟ་རུལ་སུངས་ཀྱི་དོགས་གཞིའི་འོག་འཛིན་བཟུང་བཀའ་རྒྱ་བསྒྲགས་པའི་ཡུལ་དེའི་སྲིད་འཛིན་བཞི་པ་དེ་ཡིན་ཞིང་། ཁོས་སྲིད་ཟུར་ལས་ཁང་གི་ཁེ་ལས་སྤྱི་གཉེར་ཅིན་པའོ་ཅེན་གྱི་གཉེན་འབྲེལ་སོགས་ནས་ལྐོག་རྔན་ལྷོ་ཀོ་རི་ཡའི་སྒོར་དུང་ཕྱུར་ ༧ དང་། སམ་སང་(SAMSUNG)གློག་རྡུལ་བཟོ་གྲྭས་(DAS)ཞེས་པའི་བཟོ་གྲྭར་གཏུག་བཤེར་ཆེད་འཇལ་སྤྲོད་བྱས་པའི་ཨ་སྒོར་ཁྲི་ ༥༨༥ བླངས་བ། DASབཟོ་གྲྭའི་བྱང་བུ་(Credit  Card)བེད་སྤྱད་དེ་ཁྲིམས་འགལ་གྱི་དངུལ་འབོར་སྒོར་དུང་ཕྱུར་ ༣༤༩ ཡི་མ་དངུལ་བེད་སྤྱོད་བྱས་པ།   གཞན་ཡང་ཁོས་ཡུའུ་ཡའོ་དངུལ་རྩའི་མ་རྐང་གི་ཚོགས་གཙོ་ཟུར་པའི་ལག་ནས་སྒོར་དུང་ཕྱུར་ ༢༢.༥ དང་།  (DAEBO)ཌི་བོ་ཚོགས་པ་ནས་ཀོ་རི་ཡའི་སྒོར་དུང་ཕྱུར་ ༥ བཅས་ཁྱོན་ཀོ་རི་ཡའི་སྒོར་དུང་ཕྱུར་ ༤༦༠ ལྷག་གི་ལྐོག་རྔན་བླངས་ཡོད་པའི་དོགས་གཞི་ཡོད་འདུག

ལི་མིང་བྷག་ནི་ཕྱི་ལོ་ ༡༩༤༡ ལོར་འཇར་པན་དུ་སྐྱེས་ཤིང་།  ཆུང་དུས་ཁྱིམ་ཚང་གི་ཆ་རྐྱེན་ཞན་ཡང་རང་ནུས་ལ་བརྟེན་ནས་མཐོ་སློབ་འགྲིམ་ཐུབ་པ་བྱུང་བ་མ་ཟད། ཕྱི་ལོ་ ༡༩༦༡ ལོར་ཀའོ་ལིས་སློབ་ཆེན་ཚོང་རིག་ཚན་ཁག་ནས་ཐོན། ཕྱི་ལོ་ ༡༩༦༨ ལོར་དེང་རབས་ཚོགས་པ་ཞེས་པའི་དེང་རབས་ཀྱི་འཛུགས་སྐྲུན་ལས་གྲྭའི་ནང་ལོ་ངོ་ ༢༧ ལས་ཀ་བྱས་ཡོད་རྗེས། ཕྱི་ལོ་ ༡༩༩༢ ལོ་ནས་བཟུང་ཆབ་སྲིད་ལས་རིགས་ནང་ཞུགས་ཡོད་པ་དང་། ཕྱི་ལོ་ ༢༠༠༢ ལོ་ནས་སྔ་རྗེས་སུ་ཧན་ཁྲང་གྲོང་ཁྱེར་དང་རྒྱལ་ས་སོལ་གྲོང་ཁྱེར་གྱི་སྤྱི་ཁྱབ་བྱས་རྗེས།  ཕྱི་ལོ་ ༢༠༠༨ ནས་ ༢༠༡༣ བར་ལྷོ་ཀོ་རི་ཡའི་སྐབས་༡༧ པའི་སྲིད་འཛིན་དུ་བསྐོས་ཡོད་འདུག