About Us

རྩ་ཆེའི་གསུང་འཕྲིན་ཁག


སྐུ་སྒེར་ཡིག་ཚང་གི་གསུང་འཕྲིན།

f

༄༅། བོད་ཀྱི་དུས་བབ་གསར་ཁང་གི་ལས་འཛིན་ཐོུང་ལ། བརྗོད་འབྲས། ཁྱེད་ཅག་ནས་རང་འགན་སྙིང་བཅངས་ཀྱིས་བོད་ཀྱི་དུས་བབ་ཞེས་པའི་གསར་ཤོག་རིང་མིན་འདོན་སྤེལ་བྱེད་འཆར་ལ་བཀྲ་ཤིས་བདེ་ལེགས་ཡོད།
གསར་ཤོག་གི་དགོས་དོན་དམིགས་ཡུལ་གཙོ་བོ་ནི་འཛམ་གླིང་གི་གནས་ཚུལ་འཕོ་འགྱུར་སྤྱི་དང། བྱེ་བྲག་བོད་དོན་དང། བོད་པའི་སྤྱི་ཚོགས་ཀྱི་དངོས་ཡོད་དྲང་བདེན་གྱི་གནས་ཚུལ་ཁུངས་ལྡན་རྣམས་སྨྲ་བརྗོད་རང་དབང་གི་ལམ་ནས་དགེ་འདོན་སྐྱོན་སེལ་གྱི་བསམ་འཆར་དང་བཅས་འཕྲལ་མྱུར་སྤེལ་ཏེ་རྒྱ་ཆེའི་ཀློག་པ་པོ་རྣམས་ཀྱི་རྣམ་དཔྱོད་བློ་གྲོས་གོང་མཐོར་སྤེལ་ཐབས་བྱ་རྒྱུ་དེ་ཡིན། རྡོ་དོན་ཀུན་གྱིས་ཡིད་ཆེས་དགའ་མོས་བྱེད་པའི་ཚད་ལྡན་གྱི་གསར་ཤོག་ཅིག་ཡོང་ཐབས་འབད་བརྩོན་དང་འབྲེལ་དམིགས་དོན་མཇུག་སྐྱོང་མཐའ་འཁྱོལ་དགོས་གལ་བཅས།

ཏཱ་ལའི་བླ་མས། ༡༩༩༦ ཟླ་ ༨ ཚེས ༢༨ ལ།།

བོད་མིའི་སྒྲིག་འཛུགས་བཀའ་ཤག་གི་གསུང་འཕྲིན།

f

གསུང་ཕྲིན།

༑ ད་ལམ་ “བོད་ཀྱི་དུས་བབ” ཞེས་གསར་འཕྲིན་ཞིག་གསར་དུ་འདོན་སྤེལ་གནང་ཐུབ་པར་མཚམས་འདྲི་ཞུ་རྒྱུ། མང་གཙོའི་སྲིད་གཞུང་གི་སྤྱི་ཚོགས་འཕེལ་རིམ་ནང་དང་ལྷག་པར་རང་དབང་འཐབ་རྩོད་ཀྱི་དུས་སྐབས་སུ་གསར་འཕྲིན་གྱི་ལས་དོན་ནི་ཤིན་ཏུ་མཁོ་གནད་གལ་ཆེ་ཞིག་དང་། དེ་ཡང་རྩོམ་བསྒྲིགས་པའི་འདོད་ཕྱོགས་སུ་མ་ལྷུངས་པ་ཕྱོགས་ཡོངས་མཐོང་ཐུབ་པ་དང་། ཁུངས་བདེན་གནས་ཚུལ་འགྲེམས་སྤེལ་གྱི་ལམ་ནས་མང་ཚོགས་ཀྱི་ཆབ་སྲིད་དང་། འཛིན་སྐྱོང་། སྤྱི་ཚོགས་འཕེལ་རིམ་གྱི་གནད་དོན་གོ་རྟོགས་མཐོ་རུ་གཏོང་རྒྱུ་དེ་ཡིན་ཅིང་། ལྷག་པར་རང་རེའི་བོད་མིའི་སྤྱི་ཚོགས་དང་སྲིད་གཞུང་གཉིས་ཀ་བཙན་བྱོལ་བའི་གནས་བབ་ཤིག་ཡིན་པའི་ཆ་ནས་འཛམ་གླིང་རྒྱལ་རབས་ལོ་རྒྱུས་ནང་རང་དབང་རྩོད་ལེན་དུས་སྐབས་སུ་གསར་འགོད་པའི་ལས་འགན་ཇི་ལྟར་འཁྱེར་བ་དག་མིག་དཔེར་བླངས་ཏེ་གཙོ་བོ་སྤྱི་ནོར་༧གོང་ས་༧སྐྱབས་མགོན་ཆེན་པོའི་ཐུགས་ཀྱི་བཞེད་དགོངས་དང་། བཙན་བྱོལ་བོད་གཞུང་གི་མཛད་བྱུས་དེ་བཞིན་སྤྱི་ཚོགས་ཀྱི་འཕེལ་རིམ་རྣམས་བརྒྱུད་ལམ་འདི་ཐོག་ནས་བོད་ཀྱི་ཕྱི་ནང་དུ་གནས་འཁོད་རྒྱལ་གཅེས་སྤུན་ཟླའི་མཁྱེན་རྟོགས་ཐུབ་པ་ཞིག་ཡོང་ཐབས་འབད་བརྩོན་གནང་རྒྱུའི་རེ་བ་བཅས།

བཀའ་ཤག་ནས་ ༡༩༩༦ ཟླ་ ༨ ཚེས་ ༢༣ ལ།།

བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན།

f

༄༅། ། “བོད་ཀྱི་དུས་བབ” ཅེས་པའི་གསར་ཤོག་འདོན་སྤེལ་གནང་བར་བོད་མི་མང་སྤྱི་འཐུས་ལྷན་ཚོགས་ཀྱིས་སྙིང་ནས་དགའ་བསུ་ཡོད།

མང་གཙོའི་འཕེལ་རིམ་ནང་། རང་དབང་ཅན་གྱི་གསར་ཤོག་ནི་སྤྱི་ཚོགས་དང་སྲིད་གཞུང་གཉིས་ཀའི་ལེགས་ཉེས་བལྟ་བའི་མེ་ལོང་ལྟ་བུ་དང་། མང་ཚོགས་ཀྱི་ལྟ་གྲུབ་སྤེལ་བའི་རྒྱུད་ལམ། ཉམ་ཆུང་ཡུལ་མིའི་མགྲིན་ཚབ། གཞུང་མང་གཉིས་ཀའི་སྐྱོན་མཚང་སྟོན་པའི་མཛུག་མོའི་ཚུལ་དུ་གལ་གནད་ཆེ་བའི་སྨྲ་བརྗོད་ཀྱི་རང་དབང་གི་ཆ་ཤས་ཤིག་ཡིན་པས། བོད་ཀྱི་དུས་བབ་ཀྱི་ལས་བྱེད་རྣམ་པས་གསར་ཤོག་འདི་འདོན་པའི་འབད་བརྩོན་གནང་བར་ཡི་རང་དང་བསྔགས་བརྗོད་ཞུ་རྒྱུ་ཡིན།

ཁྱེད་རྣམས་པའི་ཕྱག་བྲིས་ནང་ “བོད་ཀྱི་དུས་བབ་ཅེས་པའི་རང་དབང་གི་གསར་ཤོག་ཅིག་འདོན་རྒྱུའི་གྲ་སྒྲིག་བྱེད་བཞིན་པའི་ཐོག” ཅེས་གསལ་བ་བཞིན་གསར་ཤོག་འདི་ངེས་དོན་གྱི་རང་དབང་ཅན་ཞིག་གནས་ཐུབ་པའི་རེ་བ་ཡོད། སྤྱི་ཚོགས་ཀྱི་བསམ་ཚུལ། དཔལ་འབྱོར་གྱི་དགོས་མཁོ། ཕྱོགས་དང་སྡེ་ཚན་གྱི་ལར་ཞེན། སྙན་གྲགས་དང་དབང་ཤུགས་ཅན་གྱི་སྐྱེ་བོའི་རྔམ་ཟིལ། ཡ་མེད་ཀྱི་སྡིགས་ར། མཁས་འཇམ་གྱི་བསླུ་བྲིད། གཡོ་རྒྱུའི་མགོ་སྐོར། ཐབས་ཟད་ཀྱི་གནས་ཚུལ་སོགས་མངོན་པར་གསལ་བ་དང་མི་གསལ་བའི་རྐྱེན་ངན་གྱི་རླུང་དམར་ཕྱོགས་ཀུན་ནས་གཡོ་བའི་ནང་རང་དབང་གི་མར་མེ་དེ་ཇི་ཙམ་གྱི་བར་གནས་ཐུབ་བམ། འདི་ནི་འབྱུང་འགྱུར་གྱི་དུས་ཉིད་དུ་གསལ་བར་འགྱུར་རྒྱུ་ལས་སྔོན་ནས་ཚོད་དཔག་དཀའ་མོད།

ད་ལྟའི་རང་རེའི་སྤྱི་ཚོགས་དོ་སྣང་ཆུང་ལ་ལོག་རྟོག་མང་བ། སྲོལ་རྒྱུན་གྱི་མངོན་ཞེན་དང་གཡམ་རྒྱུག་གི་འཆལ་རྟོག་ཕྱོགས་ལྷུང་གིས་རིས་བཅད་བཅས་ཀྱི་གཞན་དབང་དུ་སོང་ཞིང་། ཕ་རོལ་པའི་གཡོ་འཕྲུལ་སྲིན་མོའི་ཟློས་གར་ཡ་མ་ཟུང་དུ་སྤྲོ་བའི་དུས་འདིར། འཇིགས་ཞུམ་དང་ཆགས་སྡང་། རེ་དྭོགས་དང་འཁྱོགས་བཤད་ཀྱིས་མ་བསླད་པའི་བདེན་གཏམ་སྲོང་པོར་སྨྲ་བ་དང་། ཉན་པའི་སྙིང་སྟོབས་དང་ཤེས་རབ་གསར་འགོད་པ་དང་། ཀློག་པ་པོ་གཉིས་ཀར་རྙེད་པའི་སྨོན་འདུན་ཞུ་རྒྱུ་བཅས།

བོད་མི་མང་སྤྱི་འཐུས་རྒྱུན་ལས་ཐུན་མོང་གིས་ ༩༦ ཟླ་ ༩ ཚེས་ ༥ ལ་ཕུལ།།

For more information, Please write to:

Tibet Times, Session Road, Dharamsala – 176215, Distt: Kangra, H.P. India
Tel: +91-1892-699402, 92189-38041
Email ID: editor(at)tibettimes.net, office(at)tibettimes.net