ངས་ཁྱེད་རང་བརྗེད་ཐབས་བྱེད་ན་འདོད། འདོད་ཕྱོགས་འདིས་ངས་ཁྱེད་རང་བརྗེད་རྒྱུ་ཕར་ཞོག ཡང་ཡང་ཁྱེད་རང་ཁོ་ན་དྲན་དུ་བཅུགས། དྲན་སྟངས་འདི་ལ་ཡང་གནས་ལུགས་དང་རྒྱུ་མཚན། ས་མཚམས་དང་གནས་བབ་ཡོད་པ་ཞིག་ཡིན་ན་འདོད། དེ་ཡང་མི་འདུག ངས་རྒྱུན་དུ་ཁྱེད་རང་དྲན་དུས་ཀྱི་ང་རང་དེ་བཙལ་ནས་ཕྱོགས་བཞི་མཚམས་བརྒྱད་དང་མི་སྣ་འདྲ་མིན། སྐད་ཆ་འདྲ་མིན་སོགས་བཤད་དེ། ཁྱེད་རང་དྲན་བཞིན་པའི་སྣང་ཚུལ་དེ་དག་ལ་མགོ་སྐོར་ཐབས་མང་བོ་བྱས་པ་ཡིན། མཚམས་མཚམས་སུ་ཨ་རག་འཐུང་ནས་རང་ངོ་མི་ཟིན་པ་ཞིག་བཟོས་མྱོང་ལ། སྐབས་སྐབས་སུ་ཐ་མག་ནག་པོ་འཐེན་ནས་རང་གི་ལུས་པོ་ཡོངས་དང་རྩ་ལམ་ཡོངས་སུ་རྫོགས་པ་ཡང་སྤྲིད་དུ་བཅུགས་མྱོང་། ལན་རེར་ས་སྟོང་ལུང་སྟོང་དུ་ཀུ་རིང་བཏབ་ནས་ཁྱེད་ཀྱི་མིང་ནས་བོས་ཀྱང་མྱོང་། སྣང་ཚུལ་དེ་དག་དང་བྱེད་སྟངས་དེ་དག་གིས་ངས་ཁྱེད་རང་བརྗེད་ཐབས་ལ་བརྟེན་པ་ཞིག་དུ་བསམ་མྱོང་ན་ཡང་། དེ་དག་གིས་གང་ཡང་བྱེད་ཐུབ་མ་སོང་། སྐབས་དེ་འདྲ་ཞིག་དུ་ངས་ཡིད་ལ་འདི་འདྲ་ཞིག་འཁོར་སོང་། ཁྱེད་རང་གིས་བུད་མེད་ཞིག་བརྗེད་དགོས་ན་བུད་མེད་གཞན་ཞིག་དང་འགྲོག་རྒྱུ་དེ་ཡིན་ཟེར་བ་དྲན་བྱུང་། ངས་དེ་ནས་བཟུང་མི་ལོ་མང་བོའི་རིང་དུ་ཐབས་ཤེས་དེ་ལག་ལེན་དུ་བསྟར་ནས་ས་ཆ་གང་ནས་བུད་མེད་སྣང་བ་མཐུན་ས་རེ་ཐུག་ན་དེ་དང་འགྲོག་པ་ཡིན་ལ། ཕོ་མོའི་བར་གྱི་སྣང་བ་ལ་ཡང་རོལ་མྱོང་ཡོད། དེ་ལྟར་མི་ལོ་ནས་མི་ལོ་མང་བོ་སྐད་ཅིག་ལ་སྐད་ཅིག་ལ་འདས་དེ་སོང་བས་དེ་རིང་ཡང་། ངས་བུད་མེད་དེ་དག་གི་སྟེང་ནས་ང་རང་ལ་དགོས་པའི་བརྩེ་དུང་དེ་རེག་གི་མི་འདུག་ལ། ངས་བརྗེད་ཐབས་ལ་བརྟེན་པས་ཐབས་ལམ་དེ་དག་གིས་ཀྱང་། དུས་དེ་རིང་ཡང་ཁྱེད་རང་བརྗེད་རྒྱུ་ལས་ཁྱེད་རང་དྲན་དུ་བཅུགས། ངས་ད་དུང་མུ་མཐུད་དུ་འཚོལ་བཞིན་ཡོད། ངས་ཁྱེད་རང་ལ་དགའ་བའི་སེམས་བྱུང་དང་མཛེས་སྡུག་གི་སྣང་བརྙན་འདི་དག་ནི། གཅིག་བྱས་ན་འཇིག་རྟེན་འདི་ནས་ལོངས་སྤྱོད་བྱེད་ཐུབ་པའི་བརྩེ་དུང་ཞིག་གཏན་ནས་མིན་པ་ཡང་སྲིད་ངེས། ཨ་ཙི། ངས་ཁྱེད་རང་ལ་གླེང་འདོད་ཀྱང་། ངས་ཁྱེད་རང་གི་བདེ་སྐྱིད་ལྡན་པའི་མི་ཚེ་ཞིག་རོལ་བཞིན་བ་དེར་གས་ཆག་རེ་ཤོར་འགྲོ་བར་བསམ་ན། ངས་ད་དུང་ཁྱེད་རང་བརྗེད་མ་ཐུབ་པའི་སེམས་གཤིས་ཀྱི་རི་གྲོང་འདི་གསང་བའི་གླིང་ག་ཞིག་ནས་སྐོང་དེ་ཁྱེད་རང་གི་མིག་ལམ་དུ་བཀྲམ་རྒྱུར་དཀའ་ངལ་ཞིག་ཆེ་བས་ཡོད།
དཀའ་ངལ་འདིས་དབང་གིས་ང་རང་གིས་ཁྱེད་རང་ལ་བཅིངས་པའི་དགའ་བ་དེའི་བྱུང་རིམ་ལ་བརྟག་དཔྱད་ལོ་མང་བྱས་ཀྱང་ད་དུང་ཡང་གྲུབ་འབྲས་གང་ཡང་མ་བྱུང་བར། ངས་ཁྱེད་རང་བརྗེད་ཐུབ་ཀྱི་མི་འདུག་ལ། ཁྱེད་རང་བརྗེད་ཐབས་ཀྱི་སྨན་ངག་རེ་ཡང་མུ་མཐུད་དུ་འཚོལ་བཞིན་ཡོད། གཅིག་བྱས་ན། ངས་ཁྱེད་རང་བརྗེད་ཐུབ་པའི་ཉིན་མོ་ཞིག་ཡོད་ཀྱང་སྲིད་ལ་མེད་ཀྱང་སྲིད།
དོན་དངོས་སུ་ད་ལྟའི་འཆར་ངེད་གཉིས་ཀྱི་ཕན་ཚུན་གླེང་བ་ནི་སེམས་ནང་གི་དྲ་བ་ཞིག་བརྒྱུད་པ་ལས། ཡིག་ཐོག་དང་ངག་ཐོག་གི་དྲ་ལམ་གང་ཡང་བརྒྱུད་མི་ཐུབ་པར། ཕན་ཚུན་གྱི་སྣང་བརྙན་སེམས་ཁོང་དུ་རུམ་ནས་ལོ་ཟླ་ག་ཚོད་ཅིག་འགྲིམ་དགོས་མིན་ཡང་། ངེད་གཉིས་ཀྱི་སུ་ལ་ཡང་གསལ་ཆ་མེད་སྟབས། རྟོགས་འཆར་གྱི་རི་གྲོང་ནས་སླར་ཡང་དགུན་ཟླ་ལས་གྲང་བའི་སེམས་གཤིས་རེའི་འོག་ན། འུ་གཉིས་ཀྱི་བར་ཐག་ནི་འུ་གཉིས་རང་རང་ལ་ཡང་གསལ་བོ་མེད་པ་དེ་ནི་འུ་གཉིས་བར་གྱི་ད་ལྟའི་གནས་བབ་རེད། ཁྱེད་ཀྱིས་ང་རང་དྲན་བཞིན་ཨེ་ཡོད། ཁྱེད་རང་གིས་ང་རང་འདྲི་མྱོང་ཨེ་ཡོད། ཁྱེད་ཀྱིས་ང་རང་མི་ཡུལ་འདིར་གསོན་ཡོད་མེད་ལ་སེམས་འཁུར་བྱས་མྱོང་ཨེ་ཡོད། ངས་ཁྱེད་རང་བརྗེད་མི་ཐུབ་འདི་ནི་ང་རང་གི་ནོར་འཁྲུལ་ཆེ་ཤོས་སུ་དྲངས་དགོས་པ་ཡིན་ནམ་ཅི། དྲན་དུས་ཀྱི་ཁྱེད་རང་ནི་ཅི་འདྲའི་མཛེས་སྡུག་ལྡན་པ་ཞིག་རེད་འདུག ལོ་ན་རྒས་བཞིན་ཡོད་ཀྱང་། ཁྱེད་ཀྱིས་འཛུམ་འདང་རྒས་མེད། དུས་ཚོད་འགྱུར་བཞིན་ཡོད་ཀྱང་། བརྩེ་དུང་མ་འགྱུར་བར་གནས་ཡོད། ཁྱེད་རང་དྲན་དུས་ཀྱི་ང་རང་། སུ་ཞིག་ཡིན་ནམ། དོན་དངོས་སུ་ངའི་ཚོར་བ་འདི་བདེན་པ་ཡིན་ནམ། སེམས་གཤིས་འདིས་ང་རང་ལ་ཅི་ཞིག་གསལ་སྤྲོད་བྱེད་འདོད་ཡོད་པ་ཡིན་ནམ།
