བསམ་ཤེས་མ་ཐུབ་པས།

སེམས་ན་ཉེ་རིང་མེད་པས་ལྟ་སྟངས་ཤིག་གིས་རང་ཉིད་དང་འདྲ་བ་ག་ཚོད་ཅིག་ལ་སེམས་གཏིང་གི་གྲོགས་པོ་བྱེད་འདོད་ཀྱི་འདུན་པ་ནི་མི་སུས་ཀྱང་འགོག་དུ་མེད་པ་ཞིག་ཡོད་ན་ཡང་། གནམ་འོག་འདི་ནས་མི་མང་བོ་ཞིག་ལ་དོགས་པ་རྣམ་དོག་ཆེ་བ་དང་རང་རྩིས་ཁོ་ན་ལས་གཞན་རྩིས་ཆུང་བས་གནས་ཚུལ་འདིའི་རིགས་ཀྱི་མི་ཕན་ཚུན་གྱི་སེམས་ནང་གི་འབྲེལ་ཐག་སུ་འབོད་རུང་བས་ཡིད་ཆེས་ལ་གས་ཆག་ཤོར་བཞིན་ཡོད། གས་ཆག་ཤོར་རྗེས་ཀྱི་ཕན་ཚུན་གྱི་ཕར་རོལ་དུ་རྒྱང་ཐག་ཧ་ཅང་རིང་བ་ནས་སྡུག་ཉེས་ན་སླེབས་ཐུབ་མེད་པར་ཡང་འགྱུར་བཞིན་ཡོད། འདི་ལྟ་བའི་ནད་ཚ་འདི་ལ་རང་ཉིད་ནས་བཤགས་བཅོས་ལེགས་པོ་ཞིག་བྱེད་མ་ཐུབ་པར་མི་གཞན་གྱིས་གང་ཡང་བྱེད་མི་ཐུབ་པ་ཞིག་རེད། དེ་ཡང་རྒྱུ་མེད་རྐྱེན་མེད་ཞིག་ཀྱང་མ་ཡིན་ལ། རང་གི་སེམས་ནང་གི་བཙན་ས་འཛིན་མཁན་གྱི་ཚོར་བ་དེའི་གནས་སྟངས་ངོ་ཤེས་དགོས། དེ་མ་ཤེས་པ་ཡིན་ན། དེའི་རང་སྡུག་ལ་སྦྱོར་བ་ནི་བཤད་མི་དགོས་པར་མི་གཞན་ཡང་དེའི་རྐྱེན་གྱིས་སྡུག་ལ་གཏོད་ངེས་རེད། རང་གཞན་གཉིས་ཀ་སྡུག་སྦྱོར་གྱི་གནས་སྟངས་དངོས་དེ་ནི་གང་ནས་བྱུང་བཞིན་ཡོད་ཟེར་ན། དེ་ནི་རང་ལས་གཞན་མ་མཐོང་བ་དང་། རང་ལས་གཞན་གྱི་དཀའ་ངལ་ལ་བསམ་ཤེས་མ་ཐུབ་པས་རེད་ཟེར་ཐག་གཅོད་བྱས་ཀྱང་མ་ཆོག་པ་མེད།