རྒྱ་ནག་གཞུང་གིས། བོད་ཀྱི་གནད་དོན་ཐད་ཏཱ་ལའི་བླ་མའི་སྐུ་ཚབ་དང་མཉམ་དུ་ལྷག་བསམ་ཟོལ་མེད་ཀྱིས་འབྲེལ་མོལ་བྱ་རྒྱུ་དང༌། ཕན་ཚུན་གྱི་དཀའ་རྙོག་དེ་འབྲེལ་མོལ་གྱིས་ལམ་ནས་སེལ་ཐུབ་པའི་རེ་བ་ཡོད། ཅེས་སྐད་ཆ་རྙིང་བ་ཞིག་བསྐྱར་ཟློས་བྱས་དེ་སླར་ཡང་འཛམ་གླིང་མི་དམངས་ལ་སྤྲེལ་ལད་ཅིག་འཁྲབ་པ་མ་གཏོགས། བོད་བཙན་བྱོལ་གཞུང་དང་ལྷན་དུ་བོད་རྒྱ་ཞི་མོལ་བྱེད་ཀྱི་ཡིན་ཟེར་ནས་གླེང་མི་འདུག དེ་ནི་རྒྱ་ནག་སྲིད་གཞུང་གི་ནམ་རྒྱུན་རང་བཞིན་གྱི་གཡོ་སྒྱུའི་གཏམ་ཞིག་ལས། བོད་མི་དམངས་ལ་དགོས་འཁོ་ཡོད་པའི་གཏམ་གསར་བ་གང་ཡང་རེད་མི་འདུག ད་དུང་རྒྱ་ནག་གིས་བོད་ནང་གི་བཙན་གནོན་འོག་གནས་པའི་བོད་མི་དག་གི་བསྐོར་གང་ཡང་གླེང་མི་འདུག་པ་དེ་རེད། རྒྱ་ནག་འདི་བ་ཚང་གི་གཡོ་སྒྱུའི་བཤད་ལུགས་དེ་ལ་ངེད་ཅག་གི་མགོ་འཁོར་མི་རུང་བ་ཡིན། དེ་ལས་རང་རིགས་ཀྱི་རྐ་ལག་འགུལ་བསྐྱོད་བྱས་དེ་རྒྱ་ནག་སྲིད་གཞུང་གིས་བོད་རྒྱ་ཞི་མོལ་བྱེད་འདོད་ཡོད་ཅེས་ཚུར་ལ་འགྲེལ་བ་འཛིན་རོགས་བར་དུ་ངེད་ཅག་གི་ལས་འགུལ་སྤེལ་དགོས་ཀྱི་ཡོད་པ་རེད།
ལས་འགུལ་སྤེལ་ཕྱོགས་དེ་ཡང་སྐབས་རེ་ཡོད་པ་འདྲ་བོ་སྐབས་རེར་མེད་པ་འདྲ་བོ་དེ་འདྲ་མ་ཡིན་པར། བོད་མི་དམངས་ཀྱི་དོན་དུ་སྐད་ཆ་ཞིག་ཚུར་ལ་བཤད་རྒྱུ་ཡིན་ཟེར་ནས་རྒྱ་ནག་སྲིད་གཞུང་གིས་གྲོས་ཆོད་དམ་ཆིངས་ཡིག་གང་རུང་ཞིག་འཛམ་གླིང་མི་དམངས་ཀྱི་མཐོང་ས་ནས་མ་བཞག་པར་དུ་ངེད་ཅག་གི་ལས་འགུལ་བ་སུ་ཞིག་བྱུང་ན་དེའི་ཤ་གཟད་དེ་རུས་དང་། རུས་གཟད་དེ་ཐལ་བ་མ་གྱུར་བར་དུ་གཅིག་རྗེས་གཉིས་མཐུད་ཀྱི་ལས་འགུལ་མཚམས་འཇོག་མི་རུང་། ལས་འགུལ་དེ་ཡང་བོད་མི་སུ་ཞིག་གི་སྤེལ་རྒྱུར་མགོ་བརྩམས་པ་ནས་བཟུང་རང་ཉིད་ཀྱིས་ཆོད་སེམས་བརྟན་པོའི་ངང་དུ་མདུན་བསྐྱོད་བྱེད་རྒྱུ་ལས་ཕྱི་ནུར་གོམ་བཀང་ཡང་རྒྱག་མི་རུང་བ་ཡིན། ད་ལྟ་བར་དུ་ལས་འགུལ་གང་མང་ཞིག་སྤེལ་མྱོང་ན་ཡང་། རྒྱུན་ཡོད་པ་ནས་མཐའ་འཁྱོལ་བ་ཞིག་སུས་ཀྱང་བྱེད་ཐུབ་བྱུང་མེད་པ་རེད། ལས་འགུལ་རེ་སྤེལ་ནས་གཏམ་བཤད་རེ་དང་གསལ་བསྒྲགས་རེ་སྤེལ་ནས་སྐད་ཆ་བརྫིག་པོ་རེ་བཤད་དེ་བསྡད་ཡོད་པ་རྐྱང་ལས། རང་གི་ཆོད་སེམས་ལ་འགྱུར་བ་མེད་པ་དེ་འདྲ་མ་བྱུང་སྟབས། རྒྱ་ནག་སྲིད་གཞུང་གིས་ཀྱང་བོད་པ་ཚང་གི་མི་འདི་དག་གི་སྐད་རེ་ཟུང་རེ་རྒྱག་པ་ལས་མཇུག་ཡོད་པས་ལས་འགུལ་ཞིག་སྤེལ་ཐུབ་ཀྱི་མེད་པ་ཚོད་ཐིགས་བཟུང་ཡོད་པ་རེད། དེ་ལ་དངོས་སུ་ལན་འདེབས་གསལ་བོ་ཞིག་བྱེད་དགོས་ན། ཤ་གཟད་རུས་ཐུག རུས་གཟད་ཐལ་བ་མ་གྱུར་བར་དུ། བོད་ནང་གི་དབའ་བོ་དབའ་མོ་དེ་དག་གི་རྗེས་འཛིན་བྱེད་ཐུབ་པ་དགོས་རྒྱུ་དེ་ནི་གལ་ཆེན་ནང་གི་དོན་ཆེན་ཆགས་ཡོད་པ་རེད།
ཡང་ཁ་ཤས་ཀྱི་ད་ལྟའི་བར་དུ་མི་དམངས་ཀྱི་ལས་འགུལ་མང་བོ་སྤེལ་ཡོད་པ་དེ་དག་གི་གང་ཡང་འཇོན་མེད་པ་རེད་དམ་སྙམ་སྲིད་པ་རེད། གང་ཡང་མེད་པ་ནས་ཅུང་ཙམ་བྱུང་ཡོད་ཀྱང་མཇུག་བསྐྱེལ་ནས་ཉིན་མཚན་མཐའ་བསྐྱེལ་བྱེད་མཁན་བྱུང་མེད་སྟབས། དཀའ་སྡུག་མ་རིག་པས་བོད་མི་མགོ་སྟོང་དེ་དག་གིས་ཀྱང་རྒྱང་རིང་ས་ནས་སྐྱག་ལབ་རེ་བརྒྱབ་དེ་བསྡད་ཡོད་པ་རེད། བོད་པ་ཟེར་ན་བོད་རིགས་ཡོད་དོ་ཅོག་གི་འགན་ཞིག་ཡིན་པ་ཡང་མི་ཤེས་མཁན་ལོ་རེ་ནས་ལོ་རེར་ཇེ་མང་དུ་འགྲོ་བཞིན་པ་ནི་མི་རིགས་གཞན་དག་གི་མཐོང་བ་དང་ཤེས་ན་ངོ་ཚ་དགོས་པས་དུས་ཚོད་ཞིག་ལ་སླེབས་ཡོད་པ་རེད།
