ངོས་འཛིན་དཀའ་བའི་གནས་བབ།
ཐག་ཐག་གི་སྒྲ་ཞིག་གིས
ཁྱེད་རང་ལ་ནམ་ཡང་ཁོམ་པ་མི་སྟེར
དུས་ཚོད་ལ་དམ་འཛིན་བྱེད་མི་ཐུབ་མཁན
ཆེས་མང་བོ་ཞིག་ཁྱེད་རང་དང་འདྲ་བར
ཉིན་མཚན་གྲངས་མེད་ཀྱི་ཁྲེལ་གཞུང་གླེང་བ་ལས་གཞན
གོམ་གང་སྤོ་ན་ཡང་གཞན་བརྟེན་གྱི་འཚོ་ལུགས་དེས
སེམས་ཁོང་དུ་འཁུར་འོང་བའི་ངལ་བ
ཇི་ལྟར་གྲངས་ཀ་རྒྱག་དགོས་མིན་གྱི་གནས་ལུགས་དེ་ཡང་
གཞུར་བཞིན་པའི་སེམས་ཤིག་གི་ཚོར་བ་ལས
འགྲེལ་བཤད་དཀའ་བའི་སྔ་གཞུག་དུ
ཁྱེད་རང་ཤི་མེད་པ་ར་སྤྲོད་ཐུབ་ཀྱང་
ཁྱེད་རང་གསོན་ཡོད་པའི་བདེན་དཔུང་ཡང་སུས་བྱེད
༡༩།༡༠།༠༨ཞོགས་པ་ཆུ་ཚོད་༡༡།༤༣སྟེང་བྲིས།
དོ་ནུབ་ཀྱི་ང་།
མི་ཡུལ་གྱི་སྒོ་ཐེམ་དུ་རྐང་པ་བཞག་རྗེས་སུ
ཕྱིར་རང་ཡུལ་དྲན་པས་སྡུག་ཡས་ཡོད་ཚད
ཤོག་བུ་དང་སྨྱུ་གུ་ལ་བསྒྱུར་ནས
རྒྱང་རིང་རྒྱང་རིང་གི་དབྱངས་རྟ་ཞིག་ཐོས་པར་རྣ་བ་གཏད
ཡིན་ཡང་ རླུང་བུ་བསིལ་མོ་ཞིག་གིས
ང་རང་དགའ་སའི་མེ་ཏོག་འཁུར་ནས་སོང་ཤུལ་དུ
མིག་ཆུ་མེད་པས་མི་ཞིག་ནི་ང་རང་ག་ལ་ཡིན་མོད
འོན་ཀྱང་ མིག་ཆུ་གཏོང་བ་དེ་ཡང་ཐབས་ཤེས་ཤིག་མིན་རབས་འདུག་ལ
ཀུ་རིང་རེ་འདེབས་པ་དེ་ཡང་སེམས་ནད་སངས་བྱེད་ཅིག་ག་ལ་ཡིན
བཞུད་སྟངས་འདི་འདྲ་ཞིག་གིས ང་དང་མི་ཚེ་ལྷག་རླུང་གིས་བསྐྱལ་དགོས
༡༧།༡༢།༠༨མཚན་མོ་ཆུ་ཚོད་༡།༠༠སྟེང་བྲིས།
