ཤི་མ་ཐུབ་པའི་སྔ་གཞུག

སྤྱིར་བཏང་ནི་མི་ཟེར་བ་འདིས་ཁ་ཁོམ་སོང་ན་ག་རེ་ཡིན་ཡང་བཤད་ཀྱི་ཡོད་ངེས་རེད་ལ། བཀག་རྒྱ་དང་སྐྲག་སྣང་མེད་ས་ནས་དེ་བས་ཀྱང་མི་འདི་དག་གི་ཁ་ལ་རང་ཚོད་ཅིག་མེད་པ་ལྟར་ང་རང་གིས་ཀྱང་རང་གི་གང་བསམ་དང་རང་ཉིད་བོད་པ་ཞིག་ཡིན་པ་དང་བོད་སེམས་ཤིག་ཡོད་པ། བོད་ལུས་ཤིག་ལངས་ཡོད་པ་བོད་ཞེན་ཞིག་ཡོད་པ་འདི་དག་ལ་བརྟེན་ནས་ངས་ཀྱང་རང་གི་སྐད་ཡིག་གི་ཤེས་ཚད་སྐྱོ་བོ་ཡིན་མིན་ལ་མ་བལྟས་པར་རང་ཉིད་ཤི་མ་ཐུབ་པའི་སྔ་རོལ་བོད་ལ་བཅིངས་བས་སྐད་ཆ། ཤ་གསེང་རུས་གསེང་ནས་ཐོན་འོང་བས་སྙིང་གཏམ་ཟེར་ན་འདྲ། སྐྱེ་བ་ད་རེབ་བོད་ལུས་ཐོབ་པ་འདི་ལ་འགན་ཞིག་ལེན་འདོད་ཀྱིས་ཉིན་མཚན་གར་ཡོད་ལ་རང་ཉིད་ལ་དུས་ཚོད་རེ་དང་ཁོམ་ལོངས་ཕྲན་བུ་རེ་བྱུང་དུས་སུ། བྱ་བ་གཞན་གང་ཡང་ཡོད་མེད་ལ་མ་བལྟས་པར་ཐོག་མར་བོད་ཀྱི་དུས་བབ་ཀྱི་མཚོན་པའི་བོད་ཡིག་གི་དྲ་ཚིགས་དག་ལ་ཉུལ་ནས་རང་དང་འདྲ་བའི་ན་མཉམ་དག་གི་བོད་ལ་བཅིངས་བས་སེམས་ཤུགས་ཀྱི་བསླེང་བས་སྐད་ཆ་དག་ལ་ཉན་ཞོར་དང་བསམ་ཚུལ་རེ་འདྲི་བཞིན་ཡོད་ལ། དེ་དག་བྱེད་པ་དང་འབྲི་རྩོམ་སོགས་གང་ཞིག་བྱེད་བཞིན་པ་ཡོད་ཚད་དེ་ནི་རང་ཉིད་ནི་ཐུན་མོང་མ་ཡིན་པའི་བློ་རིག་ཞིག་ཡོད་ཟེར་བས་དོན་ནི་གཏན་ནས་མིན་པར། དྲ་གྲོགས་རང་དང་མཉམ་པ་དག་གི་ཕན་ཚུན་ལ་གྲོས་མོལ་དང་བསམ་ཚུལ་གང་མང་ཞིག་སྤེལ་ཐུབ་པ་ཡིན་ན། ད་གཟོད་ནམ་ཞིག་ཕྱི་རབས་པ་དག་གིས་ཀྱང་སྔ་རབས་དེ་དག་གིས་རང་ཉིད་ཀྱི་འཚོ་བའི་དཀའ་སྡུག་ཞོར་དུ་བོད་ཡིག་ལ་བཅིངས་པས་སེམས་ཤུགས་དང་བོད་ལ་བཅིངས་པས་བརྩེ་བ་རྣམ་དག་ཡིན་པ་ཤེས་སུ་འཇུག་འདོད་ཀྱི་ཡིན་པ་ལས། མིང་དང་སྙན་གྲགས། གོ་གནས་སོགས་རྐུབ་སྟེགས་ལ་དགའ་ནས་རང་གི་ཉིན་རེའི་འཚོ་བ་བསྐྱལ་ཞོར་དུ་ངལ་བ་སོགས་ལ་མ་འཛེམ་པར་བོད་ཡིག་གི་དྲ་ཚིགས་ལ་ཤི་འཐམ་རོ་འཐབ་བྱས་པ་གཏན་ནས་མིན་མོད། ཡིན་ཡང་། བོད་ཡིག་གི་དག་ཆ་སོགས་ལ་ཅུང་ཙམ་དཀའ་ངལ་མེད་པ་དང་རང་ཉིད་ལ་བོད་ཡིག་སྤྱོང་བས་གོ་སྐབས་དང་སློབ་སྤྱོང་བྱེད་པས་མཐུན་རྐྱེན་ཡོད་པ་དེ་དག་གི་བཀའ་དྲིན་ཡིན་པ་དེས་བོད་རིགས་གཞན་དག་གི་གནས་བབ་མ་ཤེས་པར་སྡུག་དམོད་དང་ཟུར་ཟ། དམའ་འབེབས་བྱེད་ཀྱི་ཡོད་པ་དེ་དག་ནི་དངོས་ནས་བཤད་ན་མ་འོས་ཤིག་ལས། ཤེས་ཡོན་པ་དང་བོད་མི་དམངས་ལ་སེམས་འཁུར་ཡོད་པ་དག་གིས་བཤད་རྒྱུའི་སྐད་ཆ་ཞིག་གཏན་ནས་མ་རེད། ངས་ཉིན་མ་འདི་དག་གི་རིང་དུ་རང་ཉིད་ཀྱི་མི་ཚེའི་ནང་གི་བརྒྱུད་རིམ་ལ་བསམ་བློ་གང་མང་མང་ཞིག་བཏང་མཐར། ང་རང་ལ་བོད་ཡིག་ལ་དགའ་བ་དང་བོད་ཡིག་གི་ཟིན་བྲིས་ནས་ཕྱིར་འབུད་བྱེད་རྒྱུ་ཡིན་ཟེར་ནས་གླེང་བ་དེ་ནི་རང་ཉིད་ཀྱི་ནོར་འཁྲུལ་ཤིག་ལས། མི་གཞན་གྱིས་ནོར་འཁྲུལ་མིན་པ་ཤེས་སོང་། གང་ཡིན་ཟེར་ན་རང་རིགས་ཀྱི་ལ་རྒྱ་དེ་ནི་རང་གི་སེམས་ཁོང་དུ་ཡོད་བཞིན་དུ་རང་གི་གང་ནུས་པ་རེ་བོད་ཡིག་གི་དྲ་ཚིགས་བརྒྱུད་དེ་རང་རིགས་ཀྱི་གྲོགས་པོ་དག་ལ་བཤད་དགོས་པ་ལས། དེ་དག་གིས་ཀྱང་དེ་དག་གི་ཁྲོད་དུ་མི་འོས་པ་ཞིག་མཐོང་ན་དེ་ལ་བསམ་ཚུལ་འདྲ་མིན་བཤད་དགོས་པ་ནི་ཁོང་ཚོས་རང་དབང་ལོས་ཡིན། འོན་ཀྱང་། རང་དབང་དེ་ལག་ལེན་བྱེད་མཁན་གྱི་མི་དེ་དག་གིས་ཀྱང་སྨྲ་བརྗོད་རང་དབང་ནི་མི་ལ་ཟུར་ཟ་དང་དམའ་འབེབས་བྱེད་ཆེད་དུ་སྨྲ་བརྗོད་རང་དབང་བེད་སྤྱོད་བྱེད་ཀྱི་མེད་པ་ཤེས་ན་རེད་སྙམ་སོང་། གལ་ཏེ་ང་རང་བོད་ལ་དགའ་བ་ནས་བོད་ཡིག་འབྲི་རྒྱུར་དགའ་བ། ད་དུང་བོད་ཞིག་མིིན་རྒྱུ་ན་ངས་དེ་རིང་འདི་ལྟར་འགན་འཁུར་གང་ཡང་མེད་པར་འབུད་སོང་ན་ལོས་ཆོག དེ་འདྲ་ཞིག་མིན་སྟབས། འདི་ནས་བཟུང་དྲ་གྲོགས་གང་ཡང་རུང་བ་ཞིག་གིས་ང་རང་ལ་གང་ཞིག་བཤད་ཀྱང་ཆོག་ལ། ངས་དེ་དག་གི་སྐད་ཆ་ལ་དང་ལེན་བྱེད་དགོས་སར་ང་རང་གིས་དང་ལེན་བྱེད་དགོས་པ་ཡིན་ལ། དང་ལེན་བྱེད་མི་དགོས་སར་ཏིང་སྙོམས་སུ་བཞག་ན་རེད། ཡིན་ཡང་། ངེད་ཅག་གི་བོད་ཡིག་གི་དྲ་ཚིགས་འདི་ནས་ཉིན་མཚན་མང་བོ་བོད་ཡིག་གི་ཟིན་བྲིས་འདེབས་བཞིན་པ་ནི། ངེད་ཅག་གི་བོད་པ་ཚང་གི་མི་རབས་འདི་ཚོ་ཕན་ཚུན་ལ་ཡིད་ཆེས་དང་བརྩི་བཀུར་རྡོག་རྩ་ཆིག་སྒྲིག་སོགས་བྱེད་པར་ཕྱོགས་དགོས་པ་ཞིག་རེད་འདོད་ཀྱི་ཡོད།

ཉིན་མ་འདི་དག་རིང་དུ་ང་རང་གི་བསམ་བློ་མང་བོ་མང་བོ་ཞིག་བཏང་བ་ཡིན། བསམ་བློ་དེ་དག་ཡུན་རིང་བཏང་རྗེས་ཀྱི་ང་རང་ནི་སླར་ཡང་རང་གི་ཟིན་བྲིས་འདེབས་སར་ལོག་ཡོང་བ་ཡིན། ནོར་འཁྲུལ་ཞིག་དང་བསམ་བློ་མང་བོ་ཞིག་གཏོང་ཁོམ་བྱུང་བ་དང་བོད་ཡིག་དང་བོད་མི། བོད་ཞེན་དང་བོད་མི། བོད་ཀྱི་ཤ་ཁྲག་རུས་གསུམ་འདིས་རང་ཉིད་ལ་ཐར་བ་ཞིག་གཏོང་རབས་མེད་པ་གསལ་བོ་ཤེས་སོང་ལ་རང་ཉིད་ཀྱི་སེམས་ཁོང་གི་བོད་ཞེས་པ་དེ་ནི་རང་ཉིད་མ་ཤི་བར་དུ་བརྗེ་འགྱུར་བྱེད་མི་ཐུབ་པ་ཡང་གསལ་བོ་ངེས་ཤེས་ཐོབ་སོང་།